| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
2. கதாபத்திவாரோ
2. Katāpattivāro
1. பாராஜிககண்ட³ங்
1. Pārājikakaṇḍaṃ
249. காயஸங்ஸக்³க³ங் ஸாதி³யனபச்சயா கதி ஆபத்தியோ ஆபஜ்ஜதி? காயஸங்ஸக்³க³ங் ஸாதி³யனபச்சயா பஞ்ச ஆபத்தியோ ஆபஜ்ஜதி. அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ அத⁴க்க²கங் உப்³ப⁴ஜாணுமண்ட³லங் க³ஹணங் ஸாதி³யதி, ஆபத்தி பாராஜிகஸ்ஸ; பி⁴க்கு² காயேன காயங் ஆமஸதி, ஆபத்தி ஸங்கா⁴தி³ஸேஸஸ்ஸ; காயேன காயபடிப³த்³த⁴ங் ஆமஸதி, ஆபத்தி து²ல்லச்சயஸ்ஸ; காயபடிப³த்³தே⁴ன காயபடிப³த்³த⁴ங் ஆமஸதி, ஆபத்தி து³க்கடஸ்ஸ; அங்கு³லிபதோத³கே பாசித்தியங் – காயஸங்ஸக்³க³ங் ஸாதி³யனபச்சயா இமா பஞ்ச ஆபத்தியோ ஆபஜ்ஜதி.
249. Kāyasaṃsaggaṃ sādiyanapaccayā kati āpattiyo āpajjati? Kāyasaṃsaggaṃ sādiyanapaccayā pañca āpattiyo āpajjati. Avassutā bhikkhunī avassutassa purisapuggalassa adhakkhakaṃ ubbhajāṇumaṇḍalaṃ gahaṇaṃ sādiyati, āpatti pārājikassa; bhikkhu kāyena kāyaṃ āmasati, āpatti saṅghādisesassa; kāyena kāyapaṭibaddhaṃ āmasati, āpatti thullaccayassa; kāyapaṭibaddhena kāyapaṭibaddhaṃ āmasati, āpatti dukkaṭassa; aṅgulipatodake pācittiyaṃ – kāyasaṃsaggaṃ sādiyanapaccayā imā pañca āpattiyo āpajjati.
வஜ்ஜப்படிச்சா²த³னபச்சயா கதி ஆபத்தியோ ஆபஜ்ஜதி? வஜ்ஜப்படிச்சா²த³னபச்சயா சதஸ்ஸோ ஆபத்தியோ ஆபஜ்ஜதி. பி⁴க்கு²னீ ஜானங் பாராஜிகங் த⁴ம்மங் 1 படிச்சா²தே³தி, ஆபத்தி பாராஜிகஸ்ஸ; வேமதிகா படிச்சா²தே³தி, ஆபத்தி து²ல்லச்சயஸ்ஸ; பி⁴க்கு² ஸங்கா⁴தி³ஸேஸங் படிச்சா²தே³தி, ஆபத்தி பாசித்தியஸ்ஸ; ஆசாரவிபத்திங் படிச்சா²தே³தி, ஆபத்தி து³க்கடஸ்ஸ – வஜ்ஜப்படிச்சா²த³னபச்சயா இமா சதஸ்ஸோ ஆபத்தியோ ஆபஜ்ஜதி.
Vajjappaṭicchādanapaccayā kati āpattiyo āpajjati? Vajjappaṭicchādanapaccayā catasso āpattiyo āpajjati. Bhikkhunī jānaṃ pārājikaṃ dhammaṃ 2 paṭicchādeti, āpatti pārājikassa; vematikā paṭicchādeti, āpatti thullaccayassa; bhikkhu saṅghādisesaṃ paṭicchādeti, āpatti pācittiyassa; ācāravipattiṃ paṭicchādeti, āpatti dukkaṭassa – vajjappaṭicchādanapaccayā imā catasso āpattiyo āpajjati.
யாவததியங் ஸமனுபா⁴ஸனாய ந படினிஸ்ஸஜ்ஜனபச்சயா கதி ஆபத்தியோ ஆபஜ்ஜதி? யாவததியங் ஸமனுபா⁴ஸனாய ந படினிஸ்ஸஜ்ஜனபச்சயா பஞ்ச ஆபத்தியோ ஆபஜ்ஜதி. உக்கி²த்தானுவத்திகா பி⁴க்கு²னீ யாவததியங் ஸமனுபா⁴ஸனாய ந படினிஸ்ஸஜ்ஜதி, ஞத்தியா து³க்கடங்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி பாராஜிகஸ்ஸ; பே⁴த³கானுவத்திகா பி⁴க்கு²னீ யாவததியங் ஸமனுபா⁴ஸனாய ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ; பாபிகாய தி³ட்டி²யா யாவததியங் ஸமனுபா⁴ஸனாய ந படினிஸ்ஸஜ்ஜதி, ஆபத்தி பாசித்தியஸ்ஸ – யாவததியங் ஸமனுபா⁴ஸனாய ந படினிஸ்ஸஜ்ஜனபச்சயா இமா பஞ்ச ஆபத்தியோ ஆபஜ்ஜதி.
Yāvatatiyaṃ samanubhāsanāya na paṭinissajjanapaccayā kati āpattiyo āpajjati? Yāvatatiyaṃ samanubhāsanāya na paṭinissajjanapaccayā pañca āpattiyo āpajjati. Ukkhittānuvattikā bhikkhunī yāvatatiyaṃ samanubhāsanāya na paṭinissajjati, ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti pārājikassa; bhedakānuvattikā bhikkhunī yāvatatiyaṃ samanubhāsanāya na paṭinissajjati, āpatti saṅghādisesassa; pāpikāya diṭṭhiyā yāvatatiyaṃ samanubhāsanāya na paṭinissajjati, āpatti pācittiyassa – yāvatatiyaṃ samanubhāsanāya na paṭinissajjanapaccayā imā pañca āpattiyo āpajjati.
அட்ட²மங் வத்து²ங் பரிபூரணபச்சயா கதி ஆபத்தியோ ஆபஜ்ஜதி? அட்ட²மங் வத்து²ங் பரிபூரணபச்சயா திஸ்ஸோ ஆபத்தியோ ஆபஜ்ஜதி. புரிஸேன – ‘‘இத்த²ன்னாமங் ஓகாஸங் ஆக³ச்சா²’’தி வுத்தா க³ச்ச²தி, ஆபத்தி து³க்கடஸ்ஸ; புரிஸஸ்ஸ ஹத்த²பாஸங் ஓக்கந்தமத்தே ஆபத்தி து²ல்லச்சயஸ்ஸ; அட்ட²மங் வத்து²ங் பரிபூரேதி, ஆபத்தி பாராஜிகஸ்ஸ – அட்ட²மங் வத்து²ங் பரிபூரணபச்சயா இமா திஸ்ஸோ ஆபத்தியோ ஆபஜ்ஜதி.
Aṭṭhamaṃ vatthuṃ paripūraṇapaccayā kati āpattiyo āpajjati? Aṭṭhamaṃ vatthuṃ paripūraṇapaccayā tisso āpattiyo āpajjati. Purisena – ‘‘itthannāmaṃ okāsaṃ āgacchā’’ti vuttā gacchati, āpatti dukkaṭassa; purisassa hatthapāsaṃ okkantamatte āpatti thullaccayassa; aṭṭhamaṃ vatthuṃ paripūreti, āpatti pārājikassa – aṭṭhamaṃ vatthuṃ paripūraṇapaccayā imā tisso āpattiyo āpajjati.
பாராஜிகா நிட்டி²தா.
Pārājikā niṭṭhitā.
Footnotes:
