| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
பி⁴க்கு²னீபாதிமொக்க²வண்ணனா
Bhikkhunīpātimokkhavaṇṇanā
பாராஜிககண்ட³ங்
Pārājikakaṇḍaṃ
அபி⁴லாபமத்தமேவாதி எத்த² த³ஹரவஸேன ‘‘ப⁴ந்தே’’தி ச வுட்³ட⁴வஸேன ‘‘ஆவுஸோ’’தி ச தத்த² து³விதோ⁴ அபி⁴லாபோ, இத⁴ பன வுட்³ட⁴த³ஹரானங் ‘‘அய்யா’’தி ஏகமேவ.
Abhilāpamattamevāti ettha daharavasena ‘‘bhante’’ti ca vuḍḍhavasena ‘‘āvuso’’ti ca tattha duvidho abhilāpo, idha pana vuḍḍhadaharānaṃ ‘‘ayyā’’ti ekameva.
காயஸங்ஸக்³கே³ வுத்தனயேனாதி எத்த² தப்³ப³ஹுலனயேன கிரியஸமுட்டா²னதா வுத்தா. ‘‘காயஸங்ஸக்³க³ங் ஸமாபஜ்ஜெய்யா’’தி அவத்வா பன ‘‘ஸாதி³யெய்யா’’தி வுத்தத்தா அகிரியதோபி ஸமுட்டா²தீதி வேதி³தப்³ப³ங். யதா² செத்த², ஏவங் ஹெட்டா² ‘‘மனுஸ்ஸித்தி²யா தயோ மக்³கே³ மேது²னங் த⁴ம்மங் படிஸேவந்தஸ்ஸ ஆபத்தி பாராஜிகஸ்ஸா’’திஆதி³னா (பாரா॰ 56) நயேன கிரியஸமுட்டா²னதங் வத்வா தத³னந்தரங் ‘‘பி⁴க்கு²பச்சத்தி²கா மனுஸ்ஸித்தி²ங் பி⁴க்கு²ஸ்ஸ ஸந்திகங் ஆனெத்வா வச்சமக்³கே³ன அங்க³ஜாதங் அபி⁴னிஸீதெ³ந்தி, ஸோ சே பவேஸனங் ஸாதி³யதீ’’திஆதி³னா (பாரா॰ 58) நயேன அகிரியஸமுட்டா²னஸ்ஸபி வுத்தத்தா பட²மபாராஜிகாயபி தப்³ப³ஹுலனயேனேவ கிரியஸமுட்டா²னதா வேதி³தப்³பா³. ந ஹி பவேஸனஸாதி³யனாதி³ம்ஹி கிரியஸமுட்டா²னதா தி³ஸ்ஸதி.
Kāyasaṃsagge vuttanayenāti ettha tabbahulanayena kiriyasamuṭṭhānatā vuttā. ‘‘Kāyasaṃsaggaṃ samāpajjeyyā’’ti avatvā pana ‘‘sādiyeyyā’’ti vuttattā akiriyatopi samuṭṭhātīti veditabbaṃ. Yathā cettha, evaṃ heṭṭhā ‘‘manussitthiyā tayo magge methunaṃ dhammaṃ paṭisevantassa āpatti pārājikassā’’tiādinā (pārā. 56) nayena kiriyasamuṭṭhānataṃ vatvā tadanantaraṃ ‘‘bhikkhupaccatthikā manussitthiṃ bhikkhussa santikaṃ ānetvā vaccamaggena aṅgajātaṃ abhinisīdenti, so ce pavesanaṃ sādiyatī’’tiādinā (pārā. 58) nayena akiriyasamuṭṭhānassapi vuttattā paṭhamapārājikāyapi tabbahulanayeneva kiriyasamuṭṭhānatā veditabbā. Na hi pavesanasādiyanādimhi kiriyasamuṭṭhānatā dissati.
அங்க³ஜாதசலனஞ்செத்த² ந ஸாரதோ த³ட்ட²ப்³ப³ங் ‘‘ஸோ சே பவேஸனங் ந ஸாதி³யதி, பவிட்ட²ங் ந ஸாதி³யதி, டி²தங் ந ஸாதி³யதி, உத்³த⁴ரணங் ஸாதி³யதி, ஆபத்தி பாராஜிகஸ்ஸா’’தி (பாரா॰ 58) எத்த² டி²தனஸாதி³யனே பகதியாபி பரிபுண்ணசலனத்தா. ஸாதி³யனபச்சயா படிஸேவனசலனஞ்செத்த² ந தி³ஸ்ஸதேவாதி தப்³ப³ஹுலனயேனேவ கிரியஸமுட்டா²னதா க³ஹேதப்³பா³.
Aṅgajātacalanañcettha na sārato daṭṭhabbaṃ ‘‘so ce pavesanaṃ na sādiyati, paviṭṭhaṃ na sādiyati, ṭhitaṃ na sādiyati, uddharaṇaṃ sādiyati, āpatti pārājikassā’’ti (pārā. 58) ettha ṭhitanasādiyane pakatiyāpi paripuṇṇacalanattā. Sādiyanapaccayā paṭisevanacalanañcettha na dissatevāti tabbahulanayeneva kiriyasamuṭṭhānatā gahetabbā.
அபிச பி⁴க்கு²னியாபி பட²மபாராஜிகே தஸ்ஸ ஸாதி³யனஸ்ஸ ஸரூபேன வுத்தத்தா தத³னுரூபவஸேன விப⁴ங்க³னயமனோலோகெத்வா ‘‘கிரியஸமுட்டா²ன’’மிச்சேவ வுத்தங். யதா² சேதேஸு தப்³ப³ஹுலனயேன கிரியஸமுட்டா²னதா வுத்தா, ததா² ஸுராதீ³னங் அகுஸலேனேவ பாதப்³ப³தா. இதரதா² ‘‘யங் அகுஸலேனேவ ஆபஜ்ஜதி, அயங் லோகவஜ்ஜா, ஸேஸா பண்ணத்திவஜ்ஜா’’தி வுத்தே லோகவஜ்ஜபண்ணத்திவஜ்ஜானங் நியமலக்க²ணஸித்³தி⁴ ஹோதி, ததா² தங் அவத்வா ‘‘யஸ்ஸா ஸசித்தகபக்கே² சித்தங் அகுஸலமேவ ஹோதி, அயங் லோகவஜ்ஜா, ஸேஸா பண்ணத்திவஜ்ஜா’’தி (கங்கா²॰ அட்ட²॰ பட²மபாராஜிகவண்ணனா) வுத்தே லோகவஜ்ஜவசனங் நிரத்த²கங் ஸியா வத்து²அஜானநபக்கே²பி அகுஸலேனேவ பாதப்³ப³த்தா. யஸ்மா தத்த² ஸுராபானவீதிக்கமஸ்ஸ அகுஸலசித்துப்பாதோ³ நத்தி², தஸ்மா க²ந்த⁴கட்ட²கதா²யங் ‘‘மஜ்ஜபானே பன பி⁴க்கு²னோ அஜானித்வாபி பீ³ஜதோ பட்டா²ய மஜ்ஜங் பிவந்தஸ்ஸ பாசித்தியங். ஸாமணேரோ ஜானித்வாவ பிவந்தோ ஸீலபே⁴த³ங் ஆபஜ்ஜதி, ந அஜானித்வா’’தி (மஹாவ॰ அட்ட²॰ 108) வுத்தங், ந வுத்தங் ‘‘வத்து²அஜானநபக்கே² பாணாதிபாதாதீ³னங் ஸித்³தி⁴கரஅகுஸலசித்துப்பாத³ஸதி³ஸே சித்துப்பாதே³ ஸதிபி ஸாமணேரோ ஸீலபே⁴த³ங் நாபஜ்ஜதீ’’தி. அபி⁴னிவேஸவசனங் பாணாதிபாதாதீ³ஹி ஸமானக³திகத்தா ஸாமணேரானங் ஸுராபானஸ்ஸ. ‘‘ஸுராமேரயிமே’’தி வத்து²ங் ஜானித்வா பாதப்³ப³தாதி³வஸேன வீதிக்கமந்தஸ்ஸ அகுஸலஸ்ஸ அஸம்ப⁴வோ நத்தி². தேன வுத்தங் ‘‘யஸ்ஸா ஸசித்தகபக்கே²’’திஆதி³.
Apica bhikkhuniyāpi paṭhamapārājike tassa sādiyanassa sarūpena vuttattā tadanurūpavasena vibhaṅganayamanoloketvā ‘‘kiriyasamuṭṭhāna’’micceva vuttaṃ. Yathā cetesu tabbahulanayena kiriyasamuṭṭhānatā vuttā, tathā surādīnaṃ akusaleneva pātabbatā. Itarathā ‘‘yaṃ akusaleneva āpajjati, ayaṃ lokavajjā, sesā paṇṇattivajjā’’ti vutte lokavajjapaṇṇattivajjānaṃ niyamalakkhaṇasiddhi hoti, tathā taṃ avatvā ‘‘yassā sacittakapakkhe cittaṃ akusalameva hoti, ayaṃ lokavajjā, sesā paṇṇattivajjā’’ti (kaṅkhā. aṭṭha. paṭhamapārājikavaṇṇanā) vutte lokavajjavacanaṃ niratthakaṃ siyā vatthuajānanapakkhepi akusaleneva pātabbattā. Yasmā tattha surāpānavītikkamassa akusalacittuppādo natthi, tasmā khandhakaṭṭhakathāyaṃ ‘‘majjapāne pana bhikkhuno ajānitvāpi bījato paṭṭhāya majjaṃ pivantassa pācittiyaṃ. Sāmaṇero jānitvāva pivanto sīlabhedaṃ āpajjati, na ajānitvā’’ti (mahāva. aṭṭha. 108) vuttaṃ, na vuttaṃ ‘‘vatthuajānanapakkhe pāṇātipātādīnaṃ siddhikaraakusalacittuppādasadise cittuppāde satipi sāmaṇero sīlabhedaṃ nāpajjatī’’ti. Abhinivesavacanaṃ pāṇātipātādīhi samānagatikattā sāmaṇerānaṃ surāpānassa. ‘‘Surāmerayime’’ti vatthuṃ jānitvā pātabbatādivasena vītikkamantassa akusalassa asambhavo natthi. Tena vuttaṃ ‘‘yassā sacittakapakkhe’’tiādi.
கிஞ்செத்த² – யுத்திவசனேன அரஹந்தானங் அப்பவிஸனதோ ஸசித்தகாசித்தகபக்கே²ஸு அகுஸலனியமோதி சே? ந, த⁴ம்மதாவஸேன ஸெக்கா²னம்பி அப்பவிஸனதோ. அசித்தகபக்கே² அகுஸலனியமாபா⁴வத³ஸ்ஸனத்த²ங் ஸுபந்தஸ்ஸ முகே² பக்கி²த்தஜலபி³ந்து³மிவ ஸுராபி³ந்து³ஆத³யோ உதா³ஹரிதப்³பா³. தப்³ப³ஹுலனயேன ஹி அத்தே² க³ஹிதே புப்³பே³னாபரங் அட்ட²கதா²ய ஸமேதி ஸத்³தி⁴ங் பாளியா சாதி. ஆசரியாபி ஸுராபானே அகுஸலனியமாபா⁴வமேவ வத³ந்தி. ஏகச்சே பன கிரியஸமுட்டா²னதா பனஸ்ஸ தப்³ப³ஹுலனயமேவ, ந பட²மபாராஜிகே. கத²ங்? காயஸங்ஸக்³க³ஸிக்கா²பத³ங் பட²மபாராஜிகஸமுட்டா²னங். எத்த² பி⁴க்கு²ஸ்ஸ ச பி⁴க்கு²னியா ச காயஸங்ஸக்³க³பா⁴வே ஸதி பி⁴க்கு²னீ காயங்க³ங் அசோபயமானாபி சித்தேனேவ அதி⁴வாஸேதி, ஆபஜ்ஜதி, ந ஏவங் பி⁴க்கு². பி⁴க்கு² பன சோபயமானோவ ஆபஜ்ஜதி, ஏவமேவ பட²மபாராஜிகேபி சோபனே ஸதி ஏவ ஆபஜ்ஜதி, நாஸதி. பவேஸனங் ஸாதி³யதீதி எத்த² பவேஸனஸாதி³யனங் நாம ஸேவனசித்துப்பாத³னங், மக்³கே³ன வா மக்³க³ப்படிபன்னம்பி இச்ச²ந்தி. தஸ்ஸாபி காயசலனங் ஏகந்தங் அத்தி² ஏவ. ஏவங் ஸந்தேபி வீமங்ஸித்வா க³ஹேதப்³ப³ந்தி வத³ந்தீதி லிகி²தங்
Kiñcettha – yuttivacanena arahantānaṃ appavisanato sacittakācittakapakkhesu akusalaniyamoti ce? Na, dhammatāvasena sekkhānampi appavisanato. Acittakapakkhe akusalaniyamābhāvadassanatthaṃ supantassa mukhe pakkhittajalabindumiva surābinduādayo udāharitabbā. Tabbahulanayena hi atthe gahite pubbenāparaṃ aṭṭhakathāya sameti saddhiṃ pāḷiyā cāti. Ācariyāpi surāpāne akusalaniyamābhāvameva vadanti. Ekacce pana kiriyasamuṭṭhānatā panassa tabbahulanayameva, na paṭhamapārājike. Kathaṃ? Kāyasaṃsaggasikkhāpadaṃ paṭhamapārājikasamuṭṭhānaṃ. Ettha bhikkhussa ca bhikkhuniyā ca kāyasaṃsaggabhāve sati bhikkhunī kāyaṅgaṃ acopayamānāpi citteneva adhivāseti, āpajjati, na evaṃ bhikkhu. Bhikkhu pana copayamānova āpajjati, evameva paṭhamapārājikepi copane sati eva āpajjati, nāsati. Pavesanaṃsādiyatīti ettha pavesanasādiyanaṃ nāma sevanacittuppādanaṃ, maggena vā maggappaṭipannampi icchanti. Tassāpi kāyacalanaṃ ekantaṃ atthi eva. Evaṃ santepi vīmaṃsitvā gahetabbanti vadantīti likhitaṃ
பாராஜிகவண்ணனா நிட்டி²தா.
Pārājikavaṇṇanā niṭṭhitā.
