| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
ৰিনযপিটকে
Vinayapiṭake
পরিৰারপাল়ি
Parivārapāḷi
১. ভিক্খুৰিভঙ্গো
1. Bhikkhuvibhaṅgo
সোল়সমহাৰারো
Soḷasamahāvāro
১. কত্থপঞ্ঞত্তিৰারো
1. Katthapaññattivāro
১. পারাজিককণ্ডং
1. Pārājikakaṇḍaṃ
১. যং তেন ভগৰতা জানতা পস্সতা অরহতা সম্মাসম্বুদ্ধেন পঠমং পারাজিকং কত্থ পঞ্ঞত্তং, কং আরব্ভ, কিস্মিং ৰত্থুস্মিং? অত্থি তত্থ পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তি? সব্বত্থপঞ্ঞত্তি, পদেসপঞ্ঞত্তি? সাধারণপঞ্ঞত্তি, অসাধারণপঞ্ঞত্তি? একতোপঞ্ঞত্তি, উভতোপঞ্ঞত্তি? পঞ্চন্নং পাতিমোক্খুদ্দেসানং কত্থোগধং কত্থ পরিযাপন্নং? কতমেন উদ্দেসেন উদ্দেসং আগচ্ছতি? চতুন্নং ৰিপত্তীনং কতমা ৰিপত্তি? সত্তন্নং আপত্তিক্খন্ধানং কতমো আপত্তিক্খন্ধো? ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মতি? কো তত্থ ৰিনযো, কো তত্থ অভিৰিনযো? কিং তত্থ পাতিমোক্খং, কিং তত্থ অধিপাতিমোক্খং? কা ৰিপত্তি? কা সম্পত্তি? কা পটিপত্তি? কতি অত্থৰসে পটিচ্চ ভগৰতা পঠমং পারাজিকং পঞ্ঞত্তং? কে সিক্খন্তি? কে সিক্খিতসিক্খা? কত্থ ঠিতং? কে ধারেন্তি? কস্স ৰচনং? কেনাভতন্তি?
1. Yaṃ tena bhagavatā jānatā passatā arahatā sammāsambuddhena paṭhamaṃ pārājikaṃ kattha paññattaṃ, kaṃ ārabbha, kismiṃ vatthusmiṃ? Atthi tattha paññatti, anupaññatti, anuppannapaññatti? Sabbatthapaññatti, padesapaññatti? Sādhāraṇapaññatti, asādhāraṇapaññatti? Ekatopaññatti, ubhatopaññatti? Pañcannaṃ pātimokkhuddesānaṃ katthogadhaṃ kattha pariyāpannaṃ? Katamena uddesena uddesaṃ āgacchati? Catunnaṃ vipattīnaṃ katamā vipatti? Sattannaṃ āpattikkhandhānaṃ katamo āpattikkhandho? Channaṃ āpattisamuṭṭhānānaṃ katihi samuṭṭhānehi samuṭṭhāti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammati? Ko tattha vinayo, ko tattha abhivinayo? Kiṃ tattha pātimokkhaṃ, kiṃ tattha adhipātimokkhaṃ? Kā vipatti? Kā sampatti? Kā paṭipatti? Kati atthavase paṭicca bhagavatā paṭhamaṃ pārājikaṃ paññattaṃ? Ke sikkhanti? Ke sikkhitasikkhā? Kattha ṭhitaṃ? Ke dhārenti? Kassa vacanaṃ? Kenābhatanti?
২. যং তেন ভগৰতা জানতা পস্সতা অরহতা সম্মাসম্বুদ্ধেন পঠমং পারাজিকং কত্থ পঞ্ঞত্তন্তি? ৰেসালিযং পঞ্ঞত্তং। কং আরব্ভাতি? সুদিন্নং কলন্দপুত্তং আরব্ভ। কিস্মিং ৰত্থুস্মিন্তি? সুদিন্নো কলন্দপুত্তো পুরাণদুতিযিকায মেথুনং ধম্মং পটিসেৰি, তস্মিং ৰত্থুস্মিং। অত্থি তত্থ পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তীতি? একা পঞ্ঞত্তি, দ্ৰে অনুপঞ্ঞত্তিযো। অনুপ্পন্নপঞ্ঞত্তি তস্মিং নত্থি। সব্বত্থপঞ্ঞত্তি, পদেসপঞ্ঞত্তীতি? সব্বত্থপঞ্ঞত্তি। সাধারণপঞ্ঞত্তি, অসাধারণপঞ্ঞত্তীতি? সাধারণপঞ্ঞত্তি। একতোপঞ্ঞত্তি, উভতোপঞ্ঞত্তীতি? উভতোপঞ্ঞত্তি। পঞ্চন্নং পাতিমোক্খুদ্দেসানং কত্থোগধং কত্থ পরিযাপন্নন্তি? নিদানোগধং, নিদানপরিযাপন্নং। কতমেন উদ্দেসেন উদ্দেসং আগচ্ছতীতি? দুতিযেন উদ্দেসেন উদ্দেসং আগচ্ছতি। চতুন্নং ৰিপত্তীনং কতমা ৰিপত্তীতি? সীলৰিপত্তি। সত্তন্নং আপত্তিক্খন্ধানং কতমো আপত্তিক্খন্ধোতি? পারাজিকাপত্তিক্খন্ধো। ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো। চতুন্নং অধিকরণানং কতমং অধিকরণন্তি? আপত্তাধিকরণং। সত্তন্নং সমথানং কতিহি সমথেহি সম্মতীতি? দ্ৰীহি সমথেহি সম্মতি – সম্মুখাৰিনযেন চ পটিঞ্ঞাতকরণেন চ। কো তত্থ ৰিনযো, কো তত্থ অভিৰিনযোতি? পঞ্ঞত্তি ৰিনযো, ৰিভত্তি অভিৰিনযো। কিং তত্থ পাতিমোক্খং, কিং তত্থ অধিপাতিমোক্খন্তি? পঞ্ঞত্তি পাতিমোক্খং, ৰিভত্তি অধিপাতিমোক্খং। কা ৰিপত্তীতি? অসংৰরো ৰিপত্তি। কা সম্পত্তীতি? সংৰরো সম্পত্তি। কা পটিপত্তীতি? ন এৰরূপং করিস্সামীতি যাৰজীৰং আপাণকোটিকং সমাদায সিক্খতি সিক্খাপদেসু। 1 কতি অত্থৰসে পটিচ্চ ভগৰতা পঠমং পারাজিকং পঞ্ঞত্তন্তি? দস অত্থৰসে পটিচ্চ ভগৰতা পঠমং পারাজিকং পঞ্ঞত্তং – সঙ্ঘসুট্ঠুতায, সঙ্ঘফাসুতায, দুম্মঙ্কূনং পুগ্গলানং নিগ্গহায, পেসলানং ভিক্খূনং ফাসুৰিহারায, দিট্ঠধম্মিকানং আসৰানং সংৰরায, সম্পরাযিকানং আসৰানং পটিঘাতায, অপ্পসন্নানং পসাদায, পসন্নানং ভিয্যোভাৰায, সদ্ধম্মট্ঠিতিযা, ৰিনযানুগ্গহায। কে সিক্খন্তীতি? সেক্খা চ পুথুজ্জনকল্যাণকা চ সিক্খন্তি। কে সিক্খিতসিক্খাতি? অরহন্তো সিক্খিতসিক্খা । কত্থ ঠিতন্তি? সিক্খাকামেসু ঠিতং। কে ধারেন্তীতি? যেসং ৰত্ততি তে ধারেন্তি। কস্স ৰচনন্তি? ভগৰতো ৰচনং অরহতো সম্মাসম্বুদ্ধস্স। কেনাভতন্তি? পরম্পরাভতং –
2. Yaṃ tena bhagavatā jānatā passatā arahatā sammāsambuddhena paṭhamaṃ pārājikaṃ kattha paññattanti? Vesāliyaṃ paññattaṃ. Kaṃ ārabbhāti? Sudinnaṃ kalandaputtaṃ ārabbha. Kismiṃ vatthusminti? Sudinno kalandaputto purāṇadutiyikāya methunaṃ dhammaṃ paṭisevi, tasmiṃ vatthusmiṃ. Atthi tattha paññatti, anupaññatti, anuppannapaññattīti? Ekā paññatti, dve anupaññattiyo. Anuppannapaññatti tasmiṃ natthi. Sabbatthapaññatti, padesapaññattīti? Sabbatthapaññatti. Sādhāraṇapaññatti, asādhāraṇapaññattīti? Sādhāraṇapaññatti. Ekatopaññatti, ubhatopaññattīti? Ubhatopaññatti. Pañcannaṃ pātimokkhuddesānaṃ katthogadhaṃ kattha pariyāpannanti? Nidānogadhaṃ, nidānapariyāpannaṃ. Katamena uddesena uddesaṃ āgacchatīti? Dutiyena uddesena uddesaṃ āgacchati. Catunnaṃ vipattīnaṃ katamā vipattīti? Sīlavipatti. Sattannaṃ āpattikkhandhānaṃ katamo āpattikkhandhoti? Pārājikāpattikkhandho. Channaṃ āpattisamuṭṭhānānaṃ katihi samuṭṭhānehi samuṭṭhātīti? Ekena samuṭṭhānena samuṭṭhāti – kāyato ca cittato ca samuṭṭhāti, na vācato. Catunnaṃ adhikaraṇānaṃ katamaṃ adhikaraṇanti? Āpattādhikaraṇaṃ. Sattannaṃ samathānaṃ katihi samathehi sammatīti? Dvīhi samathehi sammati – sammukhāvinayena ca paṭiññātakaraṇena ca. Ko tattha vinayo, ko tattha abhivinayoti? Paññatti vinayo, vibhatti abhivinayo. Kiṃ tattha pātimokkhaṃ, kiṃ tattha adhipātimokkhanti? Paññatti pātimokkhaṃ, vibhatti adhipātimokkhaṃ. Kā vipattīti? Asaṃvaro vipatti. Kā sampattīti? Saṃvaro sampatti. Kā paṭipattīti? Na evarūpaṃ karissāmīti yāvajīvaṃ āpāṇakoṭikaṃ samādāya sikkhati sikkhāpadesu. 2 Kati atthavase paṭicca bhagavatā paṭhamaṃ pārājikaṃ paññattanti? Dasa atthavase paṭicca bhagavatā paṭhamaṃ pārājikaṃ paññattaṃ – saṅghasuṭṭhutāya, saṅghaphāsutāya, dummaṅkūnaṃ puggalānaṃ niggahāya, pesalānaṃ bhikkhūnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā, vinayānuggahāya. Ke sikkhantīti? Sekkhā ca puthujjanakalyāṇakā ca sikkhanti. Ke sikkhitasikkhāti? Arahanto sikkhitasikkhā . Kattha ṭhitanti? Sikkhākāmesu ṭhitaṃ. Ke dhārentīti? Yesaṃ vattati te dhārenti. Kassa vacananti? Bhagavato vacanaṃ arahato sammāsambuddhassa. Kenābhatanti? Paramparābhataṃ –
৩.
3.
উপালি দাসকো চেৰ, সোণকো সিগ্গৰো তথা।
Upāli dāsako ceva, soṇako siggavo tathā;
ভদ্দনামো চ পণ্ডিতো॥
Bhaddanāmo ca paṇḍito.
এতে নাগা মহাপঞ্ঞা, জম্বুদীপা ইধাগতা।
Ete nāgā mahāpaññā, jambudīpā idhāgatā;
ৰিনযং তে ৰাচযিংসু, পিটকং তম্বপণ্ণিযা॥
Vinayaṃ te vācayiṃsu, piṭakaṃ tambapaṇṇiyā.
নিকাযে পঞ্চ ৰাচেসুং, সত্ত চেৰ পকরণে।
Nikāye pañca vācesuṃ, satta ceva pakaraṇe;
ততো অরিট্ঠো মেধাৰী, তিস্সদত্তো চ পণ্ডিতো॥
Tato ariṭṭho medhāvī, tissadatto ca paṇḍito.
ৰিসারদো কাল়সুমনো, থেরো চ দীঘনামকো।
Visārado kāḷasumano, thero ca dīghanāmako;
দীঘসুমনো চ পণ্ডিতো॥
Dīghasumano ca paṇḍito.
পুনদেৰ 11 কাল়সুমনো, নাগত্থেরো চ বুদ্ধরক্খিতো।
Punadeva 12 kāḷasumano, nāgatthero ca buddharakkhito;
পুনদেৰ সুমনো মেধাৰী, ৰিনযে চ ৰিসারদো।
Punadeva sumano medhāvī, vinaye ca visārado;
বহুস্সুতো চূল়নাগো, গজোৰ দুপ্পধংসিযো॥
Bahussuto cūḷanāgo, gajova duppadhaṃsiyo.
তস্স সিস্সো মহাপঞ্ঞো খেমনামো তিপেটকো॥
Tassa sisso mahāpañño khemanāmo tipeṭako.
দীপে তারকরাজাৰ পঞ্ঞায অতিরোচথ।
Dīpe tārakarājāva paññāya atirocatha;
উপতিস্সো চ মেধাৰী, ফুস্সদেৰো মহাকথী॥
Upatisso ca medhāvī, phussadevo mahākathī.
পুনদেৰ সুমনো মেধাৰী, পুপ্ফনামো বহুস্সুতো।
Punadeva sumano medhāvī, pupphanāmo bahussuto;
মহাকথী মহাসিৰো, পিটকে সব্বত্থ কোৰিদো॥
Mahākathī mahāsivo, piṭake sabbattha kovido.
পুনদেৰ উপালি মেধাৰী, ৰিনযে চ ৰিসারদো।
Punadeva upāli medhāvī, vinaye ca visārado;
মহানাগো মহাপঞ্ঞো, সদ্ধম্মৰংসকোৰিদো॥
Mahānāgo mahāpañño, saddhammavaṃsakovido.
পুনদেৰ অভযো মেধাৰী, পিটকে সব্বত্থ কোৰিদো।
Punadeva abhayo medhāvī, piṭake sabbattha kovido;
তিস্সত্থেরো চ মেধাৰী, ৰিনযে চ ৰিসারদো॥
Tissatthero ca medhāvī, vinaye ca visārado.
তস্স সিস্সো মহাপঞ্ঞো, পুপ্ফনামো বহুস্সুতো।
Tassa sisso mahāpañño, pupphanāmo bahussuto;
সাসনং অনুরক্খন্তো, জম্বুদীপে পতিট্ঠিতো॥
Sāsanaṃ anurakkhanto, jambudīpe patiṭṭhito.
চূল়াভযো চ মেধাৰী, ৰিনযে চ ৰিসারদো।
Cūḷābhayo ca medhāvī, vinaye ca visārado;
তিস্সত্থেরো চ মেধাৰী, সদ্ধম্মৰংসকোৰিদো॥
Tissatthero ca medhāvī, saddhammavaṃsakovido.
সিৰত্থেরো চ মেধাৰী, ৰিনযে সব্বত্থ কোৰিদো॥
Sivatthero ca medhāvī, vinaye sabbattha kovido.
এতে নাগা মহাপঞ্ঞা, ৰিনযঞ্ঞূ মগ্গকোৰিদা।
Ete nāgā mahāpaññā, vinayaññū maggakovidā;
ৰিনযং দীপে পকাসেসুং, পিটকং তম্বপণ্ণিযাতি॥
Vinayaṃ dīpe pakāsesuṃ, piṭakaṃ tambapaṇṇiyāti.
৪. যং তেন ভগৰতা জানতা পস্সতা অরহতা সম্মাসম্বুদ্ধেন দুতিযং পারাজিকং কত্থ পঞ্ঞত্তন্তি? রাজগহে পঞ্ঞত্তং। কং আরব্ভাতি? ধনিযং কুম্ভকারপুত্তং আরব্ভ। কিস্মিং ৰত্থুস্মিন্তি? ধনিযো কুম্ভকারপুত্তো রঞ্ঞো দারূনি অদিন্নং আদিযি, তস্মিং ৰত্থুস্মিং। একা পঞ্ঞত্তি, একা অনুপঞ্ঞত্তি। ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি , ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে॰…।
4. Yaṃ tena bhagavatā jānatā passatā arahatā sammāsambuddhena dutiyaṃ pārājikaṃ kattha paññattanti? Rājagahe paññattaṃ. Kaṃ ārabbhāti? Dhaniyaṃ kumbhakāraputtaṃ ārabbha. Kismiṃ vatthusminti? Dhaniyo kumbhakāraputto rañño dārūni adinnaṃ ādiyi, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ katihi samuṭṭhānehi samuṭṭhātīti? Tīhi samuṭṭhānehi samuṭṭhāti – siyā kāyato ca cittato ca samuṭṭhāti , na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
৫. ততিযং পারাজিকং কত্থ পঞ্ঞত্তন্তি? ৰেসালিযং পঞ্ঞত্তং। কং আরব্ভাতি? সম্বহুলে ভিক্খূ আরব্ভ। কিস্মিং ৰত্থুস্মিন্তি? সম্বহুলা ভিক্খূ অঞ্ঞমঞ্ঞং জীৰিতা ৰোরোপেসুং, তস্মিং ৰত্থুস্মিং। একা পঞ্ঞত্তি, একা অনুপঞ্ঞত্তি। ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে॰…।
5. Tatiyaṃ pārājikaṃ kattha paññattanti? Vesāliyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū aññamaññaṃ jīvitā voropesuṃ, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ katihi samuṭṭhānehi samuṭṭhātīti? Tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
৬. চতুত্থং পারাজিকং কত্থ পঞ্ঞত্তন্তি? ৰেসালিযং পঞ্ঞত্তং। কং আরব্ভাতি? ৰগ্গুমুদাতীরিযে ভিক্খূ আরব্ভ। কিস্মিং ৰত্থুস্মিন্তি? ৰগ্গুমুদাতীরিযা ভিক্খূ গিহীনং অঞ্ঞমঞ্ঞস্স উত্তরিমনুস্সধম্মস্স ৰণ্ণং ভাসিংসু, তস্মিং ৰত্থুস্মিং। একা পঞ্ঞত্তি, একা অনুপঞ্ঞত্তি। ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে॰…।
6. Catutthaṃ pārājikaṃ kattha paññattanti? Vesāliyaṃ paññattaṃ. Kaṃ ārabbhāti? Vaggumudātīriye bhikkhū ārabbha. Kismiṃ vatthusminti? Vaggumudātīriyā bhikkhū gihīnaṃ aññamaññassa uttarimanussadhammassa vaṇṇaṃ bhāsiṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ katihi samuṭṭhānehi samuṭṭhātīti? Tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
চত্তারো পারাজিকা নিট্ঠিতা।
Cattāro pārājikā niṭṭhitā.
তস্সুদ্দানং –
Tassuddānaṃ –
মেথুনাদিন্নাদানঞ্চ , মনুস্সৰিগ্গহুত্তরি।
Methunādinnādānañca , manussaviggahuttari;
পারাজিকানি চত্তারি, ছেজ্জৰত্থূ অসংসযাতি॥
Pārājikāni cattāri, chejjavatthū asaṃsayāti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / পঞ্ঞত্তিৰারৰণ্ণনা • Paññattivāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পঞ্ঞত্তিৰারৰণ্ণনা • Paññattivāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পঞ্ঞত্তিৰারৰণ্ণনা • Paññattivāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পঞ্ঞত্তিৰারৰণ্ণনা • Paññattivāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / কতাপত্তিৰারাদিৰণ্ণনা • Katāpattivārādivaṇṇanā
