| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
২. কতাপত্তিৰারো
2. Katāpattivāro
১. পারাজিককণ্ডং
1. Pārājikakaṇḍaṃ
১৫৭. মেথুনং ধম্মং পটিসেৰন্তো কতি আপত্তিযো আপজ্জতি? মেথুনং ধম্মং পটিসেৰন্তো তিস্সো আপত্তিযো আপজ্জতি। অক্খাযিতে সরীরে মেথুনং ধম্মং পটিসেৰতি, আপত্তি পারাজিকস্স; যেভুয্যেন খাযিতে সরীরে মেথুনং ধম্মং পটিসেৰতি, আপত্তি থুল্লচ্চযস্স; ৰট্টকতে 1 মুখে অচ্ছুপন্তং অঙ্গজাতং পৰেসেতি, আপত্তি দুক্কটস্স – মেথুনং ধম্মং পটিসেৰন্তো ইমা তিস্সো আপত্তিযো আপজ্জতি।
157. Methunaṃ dhammaṃ paṭisevanto kati āpattiyo āpajjati? Methunaṃ dhammaṃ paṭisevanto tisso āpattiyo āpajjati. Akkhāyite sarīre methunaṃ dhammaṃ paṭisevati, āpatti pārājikassa; yebhuyyena khāyite sarīre methunaṃ dhammaṃ paṭisevati, āpatti thullaccayassa; vaṭṭakate 2 mukhe acchupantaṃ aṅgajātaṃ paveseti, āpatti dukkaṭassa – methunaṃ dhammaṃ paṭisevanto imā tisso āpattiyo āpajjati.
১৫৮. অদিন্নং আদিযন্তো কতি আপত্তিযো আপজ্জতি? অদিন্নং আদিযন্তো তিস্সো আপত্তিযো আপজ্জতি। পঞ্চমাসকং ৰা অতিরেকপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি পারাজিকস্স; অতিরেকমাসকং ৰা ঊনপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি থুল্লচ্চযস্স; মাসকং ৰা ঊনমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি দুক্কটস্স – অদিন্নং আদিযন্তো ইমা তিস্সো আপত্তিযো আপজ্জতি।
158. Adinnaṃ ādiyanto kati āpattiyo āpajjati? Adinnaṃ ādiyanto tisso āpattiyo āpajjati. Pañcamāsakaṃ vā atirekapañcamāsakaṃ vā agghanakaṃ adinnaṃ theyyasaṅkhātaṃ ādiyati, āpatti pārājikassa; atirekamāsakaṃ vā ūnapañcamāsakaṃ vā agghanakaṃ adinnaṃ theyyasaṅkhātaṃ ādiyati, āpatti thullaccayassa; māsakaṃ vā ūnamāsakaṃ vā agghanakaṃ adinnaṃ theyyasaṅkhātaṃ ādiyati, āpatti dukkaṭassa – adinnaṃ ādiyanto imā tisso āpattiyo āpajjati.
১৫৯. সঞ্চিচ্চ মনুস্সৰিগ্গহং জীৰিতা ৰোরোপেন্তো কতি আপত্তিযো আপজ্জতি? সঞ্চিচ্চ মনুস্সৰিগ্গহং জীৰিতা ৰোরোপেন্তো তিস্সো আপত্তিযো আপজ্জতি। মনুস্সং ওদিস্স ওপাতং খণতি ‘‘পপতিত্ৰা মরিস্সতী’’তি, আপত্তি দুক্কটস্স; পপতিতে দুক্খা ৰেদনা উপ্পজ্জতি, আপত্তি থুল্লচ্চযস্স; মরতি, আপত্তি পারাজিকস্স – সঞ্চিচ্চ মনুস্সৰিগ্গহং জীৰিতা ৰোরোপেন্তো ইমা তিস্সো আপত্তিযো আপজ্জতি।
159. Sañcicca manussaviggahaṃ jīvitā voropento kati āpattiyo āpajjati? Sañcicca manussaviggahaṃ jīvitā voropento tisso āpattiyo āpajjati. Manussaṃ odissa opātaṃ khaṇati ‘‘papatitvā marissatī’’ti, āpatti dukkaṭassa; papatite dukkhā vedanā uppajjati, āpatti thullaccayassa; marati, āpatti pārājikassa – sañcicca manussaviggahaṃ jīvitā voropento imā tisso āpattiyo āpajjati.
১৬০. অসন্তং অভূতং উত্তরিমনুস্সধম্মং উল্লপন্তো কতি আপত্তিযো আপজ্জতি? অসন্তং অভূতং উত্তরিমনুস্সধম্মং উল্লপন্তো তিস্সো আপত্তিযো আপজ্জতি। পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আপত্তি পারাজিকস্স; ‘‘যো তে ৰিহারে ৰসতি, সো ভিক্খু অরহা’’তি ভণতি, পটিৰিজানন্তস্স আপত্তি থুল্লচ্চযস্স; ন পটিৰিজানন্তস্স আপত্তি দুক্কটস্স – অসন্তং অভূতং উত্তরিমনুস্সধম্মং উল্লপন্তো ইমা তিস্সো আপত্তিযো আপজ্জতি।
160. Asantaṃ abhūtaṃ uttarimanussadhammaṃ ullapanto kati āpattiyo āpajjati? Asantaṃ abhūtaṃ uttarimanussadhammaṃ ullapanto tisso āpattiyo āpajjati. Pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa; ‘‘yo te vihāre vasati, so bhikkhu arahā’’ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa – asantaṃ abhūtaṃ uttarimanussadhammaṃ ullapanto imā tisso āpattiyo āpajjati.
চত্তারো পারাজিকা নিট্ঠিতা।
Cattāro pārājikā niṭṭhitā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / কতাপত্তিৰারাদিৰণ্ণনা • Katāpattivārādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / কতাপত্তিৰারাদিৰণ্ণনা • Katāpattivārādivaṇṇanā
