| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
২. কতাপত্তিৰারো
2. Katāpattivāro
১. পারাজিককণ্ডং
1. Pārājikakaṇḍaṃ
১৯৩. মেথুনং ধম্মং পটিসেৰনপচ্চযা কতি আপত্তিযো আপজ্জতি ? মেথুনং ধম্মং পটিসেৰনপচ্চযা চতস্সো আপত্তিযো আপজ্জতি – অক্খাযিতে সরীরে মেথুনং ধম্মং পটিসেৰতি, আপত্তি পারাজিকস্স; যেভুয্যেন খাযিতে সরীরে মেথুনং ধম্মং পটিসেৰতি, আপত্তি থুল্লচ্চযস্স ; ৰট্টকতে মুখে অচ্ছুপন্তং অঙ্গজাতং পৰেসেতি, আপত্তি দুক্কটস্স; জতুমট্ঠকে পাচিত্তিযং – মেথুনং ধম্মং পটিসেৰনপচ্চযা ইমা চতস্সো আপত্তিযো আপজ্জতি।
193. Methunaṃ dhammaṃ paṭisevanapaccayā kati āpattiyo āpajjati ? Methunaṃ dhammaṃ paṭisevanapaccayā catasso āpattiyo āpajjati – akkhāyite sarīre methunaṃ dhammaṃ paṭisevati, āpatti pārājikassa; yebhuyyena khāyite sarīre methunaṃ dhammaṃ paṭisevati, āpatti thullaccayassa ; vaṭṭakate mukhe acchupantaṃ aṅgajātaṃ paveseti, āpatti dukkaṭassa; jatumaṭṭhake pācittiyaṃ – methunaṃ dhammaṃ paṭisevanapaccayā imā catasso āpattiyo āpajjati.
অদিন্নং আদিযনপচ্চযা কতি আপত্তিযো আপজ্জতি? অদিন্নং আদিযনপচ্চযা তিস্সো আপত্তিযো আপজ্জতি। পঞ্চমাসকং ৰা অতিরেকপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি পারাজিকস্স; অতিরেকমাসকং ৰা ঊনপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি থুল্লচ্চযস্স; মাসকং ৰা ঊনমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি দুক্কটস্স – অদিন্নং আদিযনপচ্চযা ইমা তিস্সো আপত্তিযো আপজ্জতি।
Adinnaṃ ādiyanapaccayā kati āpattiyo āpajjati? Adinnaṃ ādiyanapaccayā tisso āpattiyo āpajjati. Pañcamāsakaṃ vā atirekapañcamāsakaṃ vā agghanakaṃ adinnaṃ theyyasaṅkhātaṃ ādiyati, āpatti pārājikassa; atirekamāsakaṃ vā ūnapañcamāsakaṃ vā agghanakaṃ adinnaṃ theyyasaṅkhātaṃ ādiyati, āpatti thullaccayassa; māsakaṃ vā ūnamāsakaṃ vā agghanakaṃ adinnaṃ theyyasaṅkhātaṃ ādiyati, āpatti dukkaṭassa – adinnaṃ ādiyanapaccayā imā tisso āpattiyo āpajjati.
সঞ্চিচ্চ মনুস্সৰিগ্গহং জীৰিতা ৰোরোপনপচ্চযা কতি আপত্তিযো আপজ্জতি? সঞ্চিচ্চ মনুস্সৰিগ্গহং জীৰিতা ৰোরোপনপচ্চযা তিস্সো আপত্তিযো আপজ্জতি। মনুস্সং ওদিস্স ওপাতং খণতি ‘‘পপতিত্ৰা মরিস্সতী’’তি, আপত্তি দুক্কটস্স; পপতিতে দুক্খা ৰেদনা উপ্পজ্জতি, আপত্তি থুল্লচ্চযস্স; মরতি, আপত্তি পারাজিকস্স – সঞ্চিচ্চ মনুস্সৰিগ্গহং জীৰিতা ৰোরোপনপচ্চযা ইমা তিস্সো আপত্তিযো আপজ্জতি।
Sañcicca manussaviggahaṃ jīvitā voropanapaccayā kati āpattiyo āpajjati? Sañcicca manussaviggahaṃ jīvitā voropanapaccayā tisso āpattiyo āpajjati. Manussaṃ odissa opātaṃ khaṇati ‘‘papatitvā marissatī’’ti, āpatti dukkaṭassa; papatite dukkhā vedanā uppajjati, āpatti thullaccayassa; marati, āpatti pārājikassa – sañcicca manussaviggahaṃ jīvitā voropanapaccayā imā tisso āpattiyo āpajjati.
অসন্তং অভূতং উত্তরিমনুস্সধম্মং উল্লপনপচ্চযা কতি আপত্তিযো আপজ্জতি? অসন্তং অভূতং উত্তরিমনুস্সধম্মং উল্লপনপচ্চযা তিস্সো আপত্তিযো আপজ্জতি – পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আপত্তি পারাজিকস্স, ‘‘যো তে ৰিহারে ৰসতি সো ভিক্খু অরহা’’তি ভণতি, পটিৰিজানন্তস্স আপত্তি থুল্লচ্চযস্স; ন পটিৰিজানন্তস্স আপত্তি দুক্কটস্স – অসন্তং অভূতং উত্তরিমনুস্সধম্মং উল্লপনপচ্চযা ইমা তিস্সো আপত্তিযো আপজ্জতি।
Asantaṃ abhūtaṃ uttarimanussadhammaṃ ullapanapaccayā kati āpattiyo āpajjati? Asantaṃ abhūtaṃ uttarimanussadhammaṃ ullapanapaccayā tisso āpattiyo āpajjati – pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa, ‘‘yo te vihāre vasati so bhikkhu arahā’’ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa – asantaṃ abhūtaṃ uttarimanussadhammaṃ ullapanapaccayā imā tisso āpattiyo āpajjati.
চত্তারো পারাজিকা নিট্ঠিতা।
Cattāro pārājikā niṭṭhitā.
Related texts:
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কতাপত্তিৰারাদিৰণ্ণনা • Katāpattivārādivaṇṇanā
