| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၂. ကတာပတ္တိဝာရော
2. Katāpattivāro
၁. ပာရာဇိကကဏ္ဍံ
1. Pārājikakaṇḍaṃ
၁၅၇. မေထုနံ ဓမ္မံ ပဋိသေဝန္တော ကတိ အာပတ္တိယော အာပဇ္ဇတိ? မေထုနံ ဓမ္မံ ပဋိသေဝန္တော တိသ္သော အာပတ္တိယော အာပဇ္ဇတိ။ အက္ခာယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ပာရာဇိကသ္သ; ယေဘုယ္ယေန ခာယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ထုလ္လစ္စယသ္သ; ဝဋ္ဋကတေ 1 မုခေ အစ္ဆုပန္တံ အင္ဂဇာတံ ပဝေသေတိ, အာပတ္တိ ဒုက္ကဋသ္သ – မေထုနံ ဓမ္မံ ပဋိသေဝန္တော ဣမာ တိသ္သော အာပတ္တိယော အာပဇ္ဇတိ။
157. Methunaṃ dhammaṃ paṭisevanto kati āpattiyo āpajjati? Methunaṃ dhammaṃ paṭisevanto tisso āpattiyo āpajjati. Akkhāyite sarīre methunaṃ dhammaṃ paṭisevati, āpatti pārājikassa; yebhuyyena khāyite sarīre methunaṃ dhammaṃ paṭisevati, āpatti thullaccayassa; vaṭṭakate 2 mukhe acchupantaṃ aṅgajātaṃ paveseti, āpatti dukkaṭassa – methunaṃ dhammaṃ paṭisevanto imā tisso āpattiyo āpajjati.
၁၅၈. အဒိန္နံ အာဒိယန္တော ကတိ အာပတ္တိယော အာပဇ္ဇတိ? အဒိန္နံ အာဒိယန္တော တိသ္သော အာပတ္တိယော အာပဇ္ဇတိ။ ပဉ္စမာသကံ ဝာ အတိရေကပဉ္စမာသကံ ဝာ အဂ္ဃနကံ အဒိန္နံ ထေယ္ယသင္ခာတံ အာဒိယတိ, အာပတ္တိ ပာရာဇိကသ္သ; အတိရေကမာသကံ ဝာ ဦနပဉ္စမာသကံ ဝာ အဂ္ဃနကံ အဒိန္နံ ထေယ္ယသင္ခာတံ အာဒိယတိ, အာပတ္တိ ထုလ္လစ္စယသ္သ; မာသကံ ဝာ ဦနမာသကံ ဝာ အဂ္ဃနကံ အဒိန္နံ ထေယ္ယသင္ခာတံ အာဒိယတိ, အာပတ္တိ ဒုက္ကဋသ္သ – အဒိန္နံ အာဒိယန္တော ဣမာ တိသ္သော အာပတ္တိယော အာပဇ္ဇတိ။
158. Adinnaṃ ādiyanto kati āpattiyo āpajjati? Adinnaṃ ādiyanto tisso āpattiyo āpajjati. Pañcamāsakaṃ vā atirekapañcamāsakaṃ vā agghanakaṃ adinnaṃ theyyasaṅkhātaṃ ādiyati, āpatti pārājikassa; atirekamāsakaṃ vā ūnapañcamāsakaṃ vā agghanakaṃ adinnaṃ theyyasaṅkhātaṃ ādiyati, āpatti thullaccayassa; māsakaṃ vā ūnamāsakaṃ vā agghanakaṃ adinnaṃ theyyasaṅkhātaṃ ādiyati, āpatti dukkaṭassa – adinnaṃ ādiyanto imā tisso āpattiyo āpajjati.
၁၅၉. သဉ္စိစ္စ မနုသ္သဝိဂ္ဂဟံ ဇီဝိတာ ဝောရောပေန္တော ကတိ အာပတ္တိယော အာပဇ္ဇတိ? သဉ္စိစ္စ မနုသ္သဝိဂ္ဂဟံ ဇီဝိတာ ဝောရောပေန္တော တိသ္သော အာပတ္တိယော အာပဇ္ဇတိ။ မနုသ္သံ ဩဒိသ္သ ဩပာတံ ခဏတိ ‘‘ပပတိတ္ဝာ မရိသ္သတီ’’တိ, အာပတ္တိ ဒုက္ကဋသ္သ; ပပတိတေ ဒုက္ခာ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယသ္သ; မရတိ, အာပတ္တိ ပာရာဇိကသ္သ – သဉ္စိစ္စ မနုသ္သဝိဂ္ဂဟံ ဇီဝိတာ ဝောရောပေန္တော ဣမာ တိသ္သော အာပတ္တိယော အာပဇ္ဇတိ။
159. Sañcicca manussaviggahaṃ jīvitā voropento kati āpattiyo āpajjati? Sañcicca manussaviggahaṃ jīvitā voropento tisso āpattiyo āpajjati. Manussaṃ odissa opātaṃ khaṇati ‘‘papatitvā marissatī’’ti, āpatti dukkaṭassa; papatite dukkhā vedanā uppajjati, āpatti thullaccayassa; marati, āpatti pārājikassa – sañcicca manussaviggahaṃ jīvitā voropento imā tisso āpattiyo āpajjati.
၁၆၀. အသန္တံ အဘူတံ ဥတ္တရိမနုသ္သဓမ္မံ ဥလ္လပန္တော ကတိ အာပတ္တိယော အာပဇ္ဇတိ? အသန္တံ အဘူတံ ဥတ္တရိမနုသ္သဓမ္မံ ဥလ္လပန္တော တိသ္သော အာပတ္တိယော အာပဇ္ဇတိ။ ပာပိစ္ဆော ဣစ္ဆာပကတော အသန္တံ အဘူတံ ဥတ္တရိမနုသ္သဓမ္မံ ဥလ္လပတိ, အာပတ္တိ ပာရာဇိကသ္သ; ‘‘ယော တေ ဝိဟာရေ ဝသတိ, သော ဘိက္ခု အရဟာ’’တိ ဘဏတိ, ပဋိဝိဇာနန္တသ္သ အာပတ္တိ ထုလ္လစ္စယသ္သ; န ပဋိဝိဇာနန္တသ္သ အာပတ္တိ ဒုက္ကဋသ္သ – အသန္တံ အဘူတံ ဥတ္တရိမနုသ္သဓမ္မံ ဥလ္လပန္တော ဣမာ တိသ္သော အာပတ္တိယော အာပဇ္ဇတိ။
160. Asantaṃ abhūtaṃ uttarimanussadhammaṃ ullapanto kati āpattiyo āpajjati? Asantaṃ abhūtaṃ uttarimanussadhammaṃ ullapanto tisso āpattiyo āpajjati. Pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa; ‘‘yo te vihāre vasati, so bhikkhu arahā’’ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa – asantaṃ abhūtaṃ uttarimanussadhammaṃ ullapanto imā tisso āpattiyo āpajjati.
စတ္တာရော ပာရာဇိကာ နိဋ္ဌိတာ။
Cattāro pārājikā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ကတာပတ္တိဝာရာဒိဝဏ္ဏနာ • Katāpattivārādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ကတာပတ္တိဝာရာဒိဝဏ္ဏနာ • Katāpattivārādivaṇṇanā
