| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༢. ཀཏཱཔཏྟིཝཱརོ
2. Katāpattivāro
༡. པཱརཱཛིཀཀཎྜཾ
1. Pārājikakaṇḍaṃ
༡༥༧. མེཐུནཾ དྷམྨཾ པཊིསེཝནྟོ ཀཏི ཨཱཔཏྟིཡོ ཨཱཔཛྫཏི? མེཐུནཾ དྷམྨཾ པཊིསེཝནྟོ ཏིསྶོ ཨཱཔཏྟིཡོ ཨཱཔཛྫཏི། ཨཀྑཱཡིཏེ སརཱིརེ མེཐུནཾ དྷམྨཾ པཊིསེཝཏི, ཨཱཔཏྟི པཱརཱཛིཀསྶ; ཡེབྷུཡྻེན ཁཱཡིཏེ སརཱིརེ མེཐུནཾ དྷམྨཾ པཊིསེཝཏི, ཨཱཔཏྟི ཐུལླཙྩཡསྶ; ཝཊྚཀཏེ 1 མུཁེ ཨཙྪུཔནྟཾ ཨངྒཛཱཏཾ པཝེསེཏི, ཨཱཔཏྟི དུཀྐཊསྶ – མེཐུནཾ དྷམྨཾ པཊིསེཝནྟོ ཨིམཱ ཏིསྶོ ཨཱཔཏྟིཡོ ཨཱཔཛྫཏི།
157. Methunaṃ dhammaṃ paṭisevanto kati āpattiyo āpajjati? Methunaṃ dhammaṃ paṭisevanto tisso āpattiyo āpajjati. Akkhāyite sarīre methunaṃ dhammaṃ paṭisevati, āpatti pārājikassa; yebhuyyena khāyite sarīre methunaṃ dhammaṃ paṭisevati, āpatti thullaccayassa; vaṭṭakate 2 mukhe acchupantaṃ aṅgajātaṃ paveseti, āpatti dukkaṭassa – methunaṃ dhammaṃ paṭisevanto imā tisso āpattiyo āpajjati.
༡༥༨. ཨདིནྣཾ ཨཱདིཡནྟོ ཀཏི ཨཱཔཏྟིཡོ ཨཱཔཛྫཏི? ཨདིནྣཾ ཨཱདིཡནྟོ ཏིསྶོ ཨཱཔཏྟིཡོ ཨཱཔཛྫཏི། པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཨགྒྷནཀཾ ཨདིནྣཾ ཐེཡྻསངྑཱཏཾ ཨཱདིཡཏི, ཨཱཔཏྟི པཱརཱཛིཀསྶ; ཨཏིརེཀམཱསཀཾ ཝཱ ཨཱུནཔཉྩམཱསཀཾ ཝཱ ཨགྒྷནཀཾ ཨདིནྣཾ ཐེཡྻསངྑཱཏཾ ཨཱདིཡཏི, ཨཱཔཏྟི ཐུལླཙྩཡསྶ; མཱསཀཾ ཝཱ ཨཱུནམཱསཀཾ ཝཱ ཨགྒྷནཀཾ ཨདིནྣཾ ཐེཡྻསངྑཱཏཾ ཨཱདིཡཏི, ཨཱཔཏྟི དུཀྐཊསྶ – ཨདིནྣཾ ཨཱདིཡནྟོ ཨིམཱ ཏིསྶོ ཨཱཔཏྟིཡོ ཨཱཔཛྫཏི།
158. Adinnaṃ ādiyanto kati āpattiyo āpajjati? Adinnaṃ ādiyanto tisso āpattiyo āpajjati. Pañcamāsakaṃ vā atirekapañcamāsakaṃ vā agghanakaṃ adinnaṃ theyyasaṅkhātaṃ ādiyati, āpatti pārājikassa; atirekamāsakaṃ vā ūnapañcamāsakaṃ vā agghanakaṃ adinnaṃ theyyasaṅkhātaṃ ādiyati, āpatti thullaccayassa; māsakaṃ vā ūnamāsakaṃ vā agghanakaṃ adinnaṃ theyyasaṅkhātaṃ ādiyati, āpatti dukkaṭassa – adinnaṃ ādiyanto imā tisso āpattiyo āpajjati.
༡༥༩. སཉྩིཙྩ མནུསྶཝིགྒཧཾ ཛཱིཝིཏཱ ཝོརོཔེནྟོ ཀཏི ཨཱཔཏྟིཡོ ཨཱཔཛྫཏི? སཉྩིཙྩ མནུསྶཝིགྒཧཾ ཛཱིཝིཏཱ ཝོརོཔེནྟོ ཏིསྶོ ཨཱཔཏྟིཡོ ཨཱཔཛྫཏི། མནུསྶཾ ཨོདིསྶ ཨོཔཱཏཾ ཁཎཏི ‘‘པཔཏིཏྭཱ མརིསྶཏཱི’’ཏི, ཨཱཔཏྟི དུཀྐཊསྶ; པཔཏིཏེ དུཀྑཱ ཝེདནཱ ཨུཔྤཛྫཏི, ཨཱཔཏྟི ཐུལླཙྩཡསྶ; མརཏི, ཨཱཔཏྟི པཱརཱཛིཀསྶ – སཉྩིཙྩ མནུསྶཝིགྒཧཾ ཛཱིཝིཏཱ ཝོརོཔེནྟོ ཨིམཱ ཏིསྶོ ཨཱཔཏྟིཡོ ཨཱཔཛྫཏི།
159. Sañcicca manussaviggahaṃ jīvitā voropento kati āpattiyo āpajjati? Sañcicca manussaviggahaṃ jīvitā voropento tisso āpattiyo āpajjati. Manussaṃ odissa opātaṃ khaṇati ‘‘papatitvā marissatī’’ti, āpatti dukkaṭassa; papatite dukkhā vedanā uppajjati, āpatti thullaccayassa; marati, āpatti pārājikassa – sañcicca manussaviggahaṃ jīvitā voropento imā tisso āpattiyo āpajjati.
༡༦༠. ཨསནྟཾ ཨབྷཱུཏཾ ཨུཏྟརིམནུསྶདྷམྨཾ ཨུལླཔནྟོ ཀཏི ཨཱཔཏྟིཡོ ཨཱཔཛྫཏི? ཨསནྟཾ ཨབྷཱུཏཾ ཨུཏྟརིམནུསྶདྷམྨཾ ཨུལླཔནྟོ ཏིསྶོ ཨཱཔཏྟིཡོ ཨཱཔཛྫཏི། པཱཔིཙྪོ ཨིཙྪཱཔཀཏོ ཨསནྟཾ ཨབྷཱུཏཾ ཨུཏྟརིམནུསྶདྷམྨཾ ཨུལླཔཏི, ཨཱཔཏྟི པཱརཱཛིཀསྶ; ‘‘ཡོ ཏེ ཝིཧཱརེ ཝསཏི, སོ བྷིཀྑུ ཨརཧཱ’’ཏི བྷཎཏི, པཊིཝིཛཱནནྟསྶ ཨཱཔཏྟི ཐུལླཙྩཡསྶ; ན པཊིཝིཛཱནནྟསྶ ཨཱཔཏྟི དུཀྐཊསྶ – ཨསནྟཾ ཨབྷཱུཏཾ ཨུཏྟརིམནུསྶདྷམྨཾ ཨུལླཔནྟོ ཨིམཱ ཏིསྶོ ཨཱཔཏྟིཡོ ཨཱཔཛྫཏི།
160. Asantaṃ abhūtaṃ uttarimanussadhammaṃ ullapanto kati āpattiyo āpajjati? Asantaṃ abhūtaṃ uttarimanussadhammaṃ ullapanto tisso āpattiyo āpajjati. Pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa; ‘‘yo te vihāre vasati, so bhikkhu arahā’’ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa – asantaṃ abhūtaṃ uttarimanussadhammaṃ ullapanto imā tisso āpattiyo āpajjati.
ཙཏྟཱརོ པཱརཱཛིཀཱ ནིཊྛིཏཱ།
Cattāro pārājikā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཀཏཱཔཏྟིཝཱརཱདིཝཎྞནཱ • Katāpattivārādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཀཏཱཔཏྟིཝཱརཱདིཝཎྞནཱ • Katāpattivārādivaṇṇanā
