Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi

    பாராஜிககண்டோ³

    Pārājikakaṇḍo

    இதா³னி யதே³தங் நிதா³னானந்தரங் தத்ரிமே சத்தாரோதிஆதி³ பாராஜிககண்ட³ங், தத்த² தத்ராதி தஸ்மிங் ‘‘பாதிமொக்க²ங் உத்³தி³ஸிஸ்ஸாமீ’’தி ஏவங் வுத்தே பாதிமொக்கே². இமேதி இதா³னி வத்தப்³பா³னங் அபி⁴முகீ²கரணங். சத்தாரோதி க³ணனபரிச்சே²தோ³. பாராஜிகாதி ஏவங்னாமகா. த⁴ம்மாதி ஆபத்தியோ. உத்³தே³ஸங் ஆக³ச்ச²ந்தீதி ஸரூபேன உத்³தி³ஸிதப்³ப³தங் ஆக³ச்ச²ந்தி, ந நிதா³னே விய ‘‘யஸ்ஸ ஸியா ஆபத்தீ’’தி ஸாதா⁴ரணவசனமத்தேன.

    Idāni yadetaṃ nidānānantaraṃ tatrime cattārotiādi pārājikakaṇḍaṃ, tattha tatrāti tasmiṃ ‘‘pātimokkhaṃ uddisissāmī’’ti evaṃ vutte pātimokkhe. Imeti idāni vattabbānaṃ abhimukhīkaraṇaṃ. Cattāroti gaṇanaparicchedo. Pārājikāti evaṃnāmakā. Dhammāti āpattiyo. Uddesaṃ āgacchantīti sarūpena uddisitabbataṃ āgacchanti, na nidāne viya ‘‘yassa siyā āpattī’’ti sādhāraṇavacanamattena.

    1. பட²மபாராஜிகவண்ணனா

    1. Paṭhamapārājikavaṇṇanā

    யோ பனாதி ரஸ்ஸதீ³கா⁴தி³னா லிங்கா³தி³பே⁴தே³ன யோ கோசி. பி⁴க்கூ²தி ஏஹிபி⁴க்கு²உபஸம்பதா³, ஸரணக³மனூபஸம்பதா³, ஓவாத³ப்படிக்³க³ஹணூபஸம்பதா³, பஞ்ஹாப்³யாகரணூபஸம்பதா³, அட்ட²க³ருத⁴ம்மப்படிக்³க³ஹணூபஸம்பதா³, தூ³தேனூபஸம்பதா³, அட்ட²வாசிகூபஸம்பதா³, ஞத்திசதுத்த²கம்மூபஸம்பதா³தி இமாஸு அட்ட²ஸு உபஸம்பதா³ஸு ஞத்திசதுத்தே²ன உபஸம்பதா³கம்மேன அகுப்பேன டா²னாரஹேன உபஸம்பன்னோ. தஸ்ஸ பன கம்மஸ்ஸ வத்து²ஞத்திஅனுஸ்ஸாவன ஸீமா பரிஸாஸம்பத்திவஸேன அகுப்பதா வேதி³தப்³பா³.

    Yo panāti rassadīghādinā liṅgādibhedena yo koci. Bhikkhūti ehibhikkhuupasampadā, saraṇagamanūpasampadā, ovādappaṭiggahaṇūpasampadā, pañhābyākaraṇūpasampadā, aṭṭhagarudhammappaṭiggahaṇūpasampadā, dūtenūpasampadā, aṭṭhavācikūpasampadā, ñatticatutthakammūpasampadāti imāsu aṭṭhasu upasampadāsu ñatticatutthena upasampadākammena akuppena ṭhānārahena upasampanno. Tassa pana kammassa vatthuñattianussāvana sīmā parisāsampattivasena akuppatā veditabbā.

    தத்த² வத்தூ²தி உபஸம்பதா³பெக்கோ² புக்³க³லோ, ஸோ ட²பெத்வா ஊனவீஸதிவஸ்ஸங் அந்திமவத்து²அஜ்ஜா²பன்னபுப்³ப³ங், பண்ட³காத³யோ ச ஏகாத³ஸ அப⁴ப்³ப³புக்³க³லே வேதி³தப்³போ³. தத்த² ஊனவீஸதிவஸ்ஸோ நாம படிஸந்தி⁴க்³க³ஹணதோ பட்டா²ய அபரிபுண்ணவீஸதிவஸ்ஸோ. அந்திமவத்து²அஜ்ஜா²பன்னபுப்³போ³ நாம சதுன்னங் பாராஜிகானங் அஞ்ஞதரங் அஜ்ஜா²பன்னபுப்³போ³. பண்ட³காத³யோ வஜ்ஜனீயபுக்³க³லகதா²யங் வுத்தா. தேஸு ஆஸித்தபண்ட³கஞ்ச உஸூயபண்ட³கஞ்ச ட²பெத்வா ஓபக்கமிகபண்ட³கோ நபுங்ஸகபண்ட³கோ பண்ட³கபா⁴வபக்கே² டி²தோ பக்க²பண்ட³கோ ச இத⁴ அதி⁴ப்பேதோ.

    Tattha vatthūti upasampadāpekkho puggalo, so ṭhapetvā ūnavīsativassaṃ antimavatthuajjhāpannapubbaṃ, paṇḍakādayo ca ekādasa abhabbapuggale veditabbo. Tattha ūnavīsativasso nāma paṭisandhiggahaṇato paṭṭhāya aparipuṇṇavīsativasso. Antimavatthuajjhāpannapubbo nāma catunnaṃ pārājikānaṃ aññataraṃ ajjhāpannapubbo. Paṇḍakādayo vajjanīyapuggalakathāyaṃ vuttā. Tesu āsittapaṇḍakañca usūyapaṇḍakañca ṭhapetvā opakkamikapaṇḍako napuṃsakapaṇḍako paṇḍakabhāvapakkhe ṭhito pakkhapaṇḍako ca idha adhippeto.

    தெ²ய்யஸங்வாஸகோ பன திவிதோ⁴ லிங்க³த்தே²னகோ ஸங்வாஸத்தே²னகோ உப⁴யத்தே²னகோதி. தத்த² யோ ஸயங் பப்³ப³ஜித்வா ந பி⁴க்கு²வஸ்ஸானி க³ணேதி, ந யதா²வுட்³ட⁴ங் பி⁴க்கூ²னங் வா ஸாமணேரானங் வா வந்த³னங் ஸாதி³யதி, ந ஆஸனேன படிபா³ஹதி, ந உபோஸதா²தீ³ஸு ஸந்தி³ஸ்ஸதி, அயங் அஸுத்³த⁴சித்ததாய லிங்க³மத்தஸ்ஸேவ தே²னிதத்தா லிங்க³த்தே²னகோ நாம. யோ பன பி⁴க்கூ²ஹி பப்³ப³ஜிதோ ஸாமணேரோ ஸமானோ காஸாயானி அபனெத்வா தேஸு ஸஉஸ்ஸாஹோவ மேது²னங் த⁴ம்மங் படிஸேவித்வா புன நிவாஸெத்வா ஸாமணேரபா⁴வங் படிஜானாதி, அயங் பி⁴க்கூ²ஹி தி³ன்னலிங்க³ஸ்ஸ அபரிச்சத்தத்தா ந லிங்க³த்தே²னகோ, ந லிங்கா³னுரூபஸ்ஸ ஸங்வாஸஸ்ஸ ஸாதி³தத்தா நாபி ஸங்வாஸத்தே²னகோ. அந்திமவத்து²அஜ்ஜா²பன்னகேபி ஏஸேவ நயோ. யோ ச கோ² ஸாமணேரோ ஸமானோ விதே³ஸங் க³ந்த்வா பி⁴க்கு²வஸ்ஸானி க³ணேதி, யதா²வுட்³ட⁴ங் வந்த³னங் ஸாதி³யதி, ஆஸனேன படிபா³ஹதி, உபோஸதா²தீ³ஸு ஸந்தி³ஸ்ஸதி, அயங் ஸங்வாஸமத்தஸ்ஸேவ தே²னிதத்தா ஸங்வாஸத்தே²னகோ நாம. பி⁴க்கு²வஸ்ஸக³ணனாதி³கோ ஹி ஸப்³போ³பி கிரியபே⁴தோ³ இமஸ்மிங் அத்தே² ‘‘ஸங்வாஸோ’’தி வேதி³தப்³போ³. ஸிக்க²ங் பச்சக்கா²ய ‘‘ந மங் கோசி ஜானாதீ’’தி புன ஏவங் படிபஜ்ஜந்தேபி ஏஸேவ நயோ. யோ பன ஸயங் பப்³ப³ஜித்வா விஹாரங் க³ந்த்வா யதா²வுட்³ட⁴ங் வந்த³னங் ஸாதி³யதி, ஆஸனேன படிபா³ஹதி, பி⁴க்கு²வஸ்ஸானி க³ணேதி, உபோஸதா²தீ³ஸு ஸந்தி³ஸ்ஸதி, அயங் லிங்க³ஸ்ஸ சேவ ஸங்வாஸஸ்ஸ ச தே²னிதத்தா உப⁴யத்தே²னகோ நாம. து⁴ரனிக்கே²பவஸேன காஸாயானி அபனெத்வா அந்திமவத்து²ங் அஜ்ஜா²பஜ்ஜித்வா புன தானி அச்சா²தெ³த்வா ஏவங் படிபஜ்ஜந்தேபி ஏஸேவ நயோ, அயங் திவிதோ⁴பி தெ²ய்யஸங்வாஸகோ இத⁴ அதி⁴ப்பேதோ. ட²பெத்வா பன இமங் திவித⁴ங்.

    Theyyasaṃvāsako pana tividho liṅgatthenako saṃvāsatthenako ubhayatthenakoti. Tattha yo sayaṃ pabbajitvā na bhikkhuvassāni gaṇeti, na yathāvuḍḍhaṃ bhikkhūnaṃ vā sāmaṇerānaṃ vā vandanaṃ sādiyati, na āsanena paṭibāhati, na uposathādīsu sandissati, ayaṃ asuddhacittatāya liṅgamattasseva thenitattā liṅgatthenako nāma. Yo pana bhikkhūhi pabbajito sāmaṇero samāno kāsāyāni apanetvā tesu saussāhova methunaṃ dhammaṃ paṭisevitvā puna nivāsetvā sāmaṇerabhāvaṃ paṭijānāti, ayaṃ bhikkhūhi dinnaliṅgassa apariccattattā na liṅgatthenako, na liṅgānurūpassa saṃvāsassa sāditattā nāpi saṃvāsatthenako. Antimavatthuajjhāpannakepi eseva nayo. Yo ca kho sāmaṇero samāno videsaṃ gantvā bhikkhuvassāni gaṇeti, yathāvuḍḍhaṃ vandanaṃ sādiyati, āsanena paṭibāhati, uposathādīsu sandissati, ayaṃ saṃvāsamattasseva thenitattā saṃvāsatthenako nāma. Bhikkhuvassagaṇanādiko hi sabbopi kiriyabhedo imasmiṃ atthe ‘‘saṃvāso’’ti veditabbo. Sikkhaṃ paccakkhāya ‘‘na maṃ koci jānātī’’ti puna evaṃ paṭipajjantepi eseva nayo. Yo pana sayaṃ pabbajitvā vihāraṃ gantvā yathāvuḍḍhaṃ vandanaṃ sādiyati, āsanena paṭibāhati, bhikkhuvassāni gaṇeti, uposathādīsu sandissati, ayaṃ liṅgassa ceva saṃvāsassa ca thenitattā ubhayatthenako nāma. Dhuranikkhepavasena kāsāyāni apanetvā antimavatthuṃ ajjhāpajjitvā puna tāni acchādetvā evaṃ paṭipajjantepi eseva nayo, ayaṃ tividhopi theyyasaṃvāsako idha adhippeto. Ṭhapetvā pana imaṃ tividhaṃ.

    ‘‘ராஜ து³ப்³பி⁴க்க² கந்தார-ரோக³ வேரீ ப⁴யேன வா;

    ‘‘Rāja dubbhikkha kantāra-roga verī bhayena vā;

    சீவராஹரணத்த²ங் வா, லிங்க³ங் ஆதி³யதீத⁴ யோ.

    Cīvarāharaṇatthaṃ vā, liṅgaṃ ādiyatīdha yo.

    ‘‘ஸங்வாஸங் நாதி⁴வாஸேதி, யாவ ஸோ ஸுத்³த⁴மானஸோ;

    ‘‘Saṃvāsaṃ nādhivāseti, yāva so suddhamānaso;

    தெ²ய்யஸங்வாஸகோ நாம, தாவ ஏஸ ந வுச்சதீ’’தி. (மஹாவ॰ அட்ட²॰ 110);

    Theyyasaṃvāsako nāma, tāva esa na vuccatī’’ti. (mahāva. aṭṭha. 110);

    யோ பன உபஸம்பன்னோ தித்தி²யபா⁴வங் பத்த²யமானோ ஸயங் வா குஸசீராதி³கங் தித்தி²யலிங்க³ங் ஆதி³யதி, தேஸங் வா ஸந்திகே பப்³ப³ஜதி, நக்³கோ³ வா ஹுத்வா ஆஜீவகானங் ஸந்திகங் க³ந்த்வா தேஸங் வதானி ஆதி³யதி, அயங் தித்தி²யபக்கந்தகோ நாம. ட²பெத்வா பன மனுஸ்ஸஜாதிகங் அவஸேஸோ ஸப்³போ³பி திரச்சா²னக³தோ நாம. யேன மனுஸ்ஸஜாதிகா ஜனெத்தி ஸயம்பி மனுஸ்ஸபூ⁴தேனேவ ஸஞ்சிச்ச ஜீவிதா வோரோபிதா, அயங் மாதுகா⁴தகோ நாம. பிதுகா⁴தகேபி ஏஸேவ நயோ. யேன அந்தமஸோ கி³ஹிலிங்கே³ டி²தோபி மனுஸ்ஸஜாதிகோ கீ²ணாஸவோ ஸஞ்சிச்ச ஜீவிதா வோரோபிதோ, அயங் அரஹந்தகா⁴தகோ நாம. யோ பன பகதத்தங் பி⁴க்கு²னிங் திண்ணங் மக்³கா³னங் அஞ்ஞதரஸ்மிங் மக்³கே³ தூ³ஸேதி , அயங் பி⁴க்கு²னிதூ³ஸகோ நாம. யோ தே³வத³த்தோ விய ஸாஸனங் உத்³த⁴ம்மங் உப்³பி³னயங் கத்வா சதுன்னங் கம்மானங் அஞ்ஞதரவஸேன ஸங்க⁴ங் பி⁴ந்த³தி, அயங் ஸங்க⁴பே⁴த³கோ நாம. யோ தே³வத³த்தோ விய து³ட்ட²சித்தேன வத⁴கசித்தேன ததா²க³தஸ்ஸ ஜீவமானகஸரீரே கு²த்³த³கமக்கி²காய பிவனமத்தம்பி லோஹிதங் உப்பாதே³தி, அயங் லோஹிதுப்பாத³கோ நாம. யஸ்ஸ இத்தி²னிமித்துப்பாத³னகம்மதோ ச புரிஸனிமித்துப்பாத³னகம்மதோ ச உப⁴தோ து³வித⁴ம்பி ப்³யஞ்ஜனங் அத்தி², அயங் உப⁴தொப்³யஞ்ஜனகோ நாம. இதி இமே தேரஸ புக்³க³லா உபஸம்பதா³ய அவத்தூ², இமே பன ட²பெத்வா அஞ்ஞஸ்மிங் உபஸம்பதா³பெக்கே² ஸதி உபஸம்பதா³கம்மங் வத்து²ஸம்பத்திவஸேன அகுப்பங் ஹோதி.

    Yo pana upasampanno titthiyabhāvaṃ patthayamāno sayaṃ vā kusacīrādikaṃ titthiyaliṅgaṃ ādiyati, tesaṃ vā santike pabbajati, naggo vā hutvā ājīvakānaṃ santikaṃ gantvā tesaṃ vatāni ādiyati, ayaṃ titthiyapakkantako nāma. Ṭhapetvā pana manussajātikaṃ avaseso sabbopi tiracchānagato nāma. Yena manussajātikā janetti sayampi manussabhūteneva sañcicca jīvitā voropitā, ayaṃ mātughātako nāma. Pitughātakepi eseva nayo. Yena antamaso gihiliṅge ṭhitopi manussajātiko khīṇāsavo sañcicca jīvitā voropito, ayaṃ arahantaghātako nāma. Yo pana pakatattaṃ bhikkhuniṃ tiṇṇaṃ maggānaṃ aññatarasmiṃ magge dūseti , ayaṃ bhikkhunidūsako nāma. Yo devadatto viya sāsanaṃ uddhammaṃ ubbinayaṃ katvā catunnaṃ kammānaṃ aññataravasena saṅghaṃ bhindati, ayaṃ saṅghabhedako nāma. Yo devadatto viya duṭṭhacittena vadhakacittena tathāgatassa jīvamānakasarīre khuddakamakkhikāya pivanamattampi lohitaṃ uppādeti, ayaṃ lohituppādako nāma. Yassa itthinimittuppādanakammato ca purisanimittuppādanakammato ca ubhato duvidhampi byañjanaṃ atthi, ayaṃ ubhatobyañjanako nāma. Iti ime terasa puggalā upasampadāya avatthū, ime pana ṭhapetvā aññasmiṃ upasampadāpekkhe sati upasampadākammaṃ vatthusampattivasena akuppaṃ hoti.

    கத²ங் ஞத்திஸம்பத்திவஸேன அகுப்பங் ஹோதி? வத்து²ஸங்க⁴புக்³க³லஞத்தீனங் அபராமஸனானி, பச்சா² ஞத்திட்ட²பனஞ்சாதி இமே தாவ பஞ்ச ஞத்திதோ³ஸா. தத்த² ‘‘அயங் இத்த²ன்னாமோ’’தி உபஸம்பதா³பெக்க²ஸ்ஸ அகித்தனங் வத்து²அபராமஸனங் நாம. ‘‘ஸுணாது மே, ப⁴ந்தே, ஸங்கோ⁴’’திஎத்த² ‘‘ஸுணாது மே, ப⁴ந்தே’’தி வத்வா ‘‘ஸங்கோ⁴’’தி அப⁴ணனங் ஸங்க⁴அபராமஸனங் நாம. ‘‘இத்த²ன்னாமஸ்ஸ உபஸம்பதா³பெக்கோ²’’தி உபஜ்ஜா²யஸ்ஸ அகித்தனங் புக்³க³லஅபராமஸனங் நாம. ஸப்³பே³ன ஸப்³ப³ங் ஞத்தியா அனுச்சாரணங் ஞத்திஅபராமஸனங் நாம. பட²மங் கம்மவாசங் நிட்டா²பெத்வா ‘‘ஏஸா ஞத்தீ’’தி வத்வா ‘‘க²மதி ஸங்க⁴ஸ்ஸா’’தி ஏவங் ஞத்திகித்தனங் பச்சா² ஞத்திட்ட²பனங் நாம. இதி இமேஹி தோ³ஸேஹி விமுத்தாய ஞத்தியா ஸம்பன்னங் ஞத்திஸம்பத்திவஸேன அகுப்பங் ஹோதி.

    Kathaṃ ñattisampattivasena akuppaṃ hoti? Vatthusaṅghapuggalañattīnaṃ aparāmasanāni, pacchā ñattiṭṭhapanañcāti ime tāva pañca ñattidosā. Tattha ‘‘ayaṃ itthannāmo’’ti upasampadāpekkhassa akittanaṃ vatthuaparāmasanaṃ nāma. ‘‘Suṇātu me, bhante, saṅgho’’tiettha ‘‘suṇātu me, bhante’’ti vatvā ‘‘saṅgho’’ti abhaṇanaṃ saṅghaaparāmasanaṃ nāma. ‘‘Itthannāmassa upasampadāpekkho’’ti upajjhāyassa akittanaṃ puggalaaparāmasanaṃ nāma. Sabbena sabbaṃ ñattiyā anuccāraṇaṃ ñattiaparāmasanaṃ nāma. Paṭhamaṃ kammavācaṃ niṭṭhāpetvā ‘‘esā ñattī’’ti vatvā ‘‘khamati saṅghassā’’ti evaṃ ñattikittanaṃ pacchā ñattiṭṭhapanaṃ nāma. Iti imehi dosehi vimuttāya ñattiyā sampannaṃ ñattisampattivasena akuppaṃ hoti.

    அனுஸ்ஸாவனவஸேன அகுப்பதாயபி வத்து²ஸங்க⁴புக்³க³லானங் அபராமஸனானி, ஸாவனாய ஹாபனங், அகாலே ஸாவனந்தி இமே பஞ்ச அனுஸ்ஸாவனதோ³ஸா. தத்த² வத்தா²தீ³னங் அபராமஸனானி ஞத்தியங் வுத்தஸதி³ஸானேவ. தீஸு பன அனுஸ்ஸாவனாஸு யத்த² கத்த²சி ஏதேஸங் அபராமஸனங் அபராமஸனமேவ. ஸப்³பே³ன ஸப்³ப³ங் பன கம்மவாசங் அவத்வா சதுக்க²த்துங் ஞத்திகித்தனமேவ, அத² வா பன கம்மவாசாப்³ப⁴ந்தரே அக்க²ரஸ்ஸ வா பத³ஸ்ஸ வா அனுச்சாரணங் வா து³ருச்சாரணங் வா ஸாவனாய ஹாபனங் நாம. ஸாவனாய அனோகாஸே பட²மங் ஞத்திங் அட்ட²பெத்வா அனுஸ்ஸாவனகரணங் அகாலே ஸாவனங் நாம. இதி இமேஹி தோ³ஸேஹி விமுத்தாய அனுஸ்ஸாவனாய ஸம்பன்னங் அனுஸ்ஸாவனஸம்பத்திவஸேன அகுப்பங் ஹோதி.

    Anussāvanavasena akuppatāyapi vatthusaṅghapuggalānaṃ aparāmasanāni, sāvanāya hāpanaṃ, akāle sāvananti ime pañca anussāvanadosā. Tattha vatthādīnaṃ aparāmasanāni ñattiyaṃ vuttasadisāneva. Tīsu pana anussāvanāsu yattha katthaci etesaṃ aparāmasanaṃ aparāmasanameva. Sabbena sabbaṃ pana kammavācaṃ avatvā catukkhattuṃ ñattikittanameva, atha vā pana kammavācābbhantare akkharassa vā padassa vā anuccāraṇaṃ vā duruccāraṇaṃ vā sāvanāya hāpanaṃ nāma. Sāvanāya anokāse paṭhamaṃ ñattiṃ aṭṭhapetvā anussāvanakaraṇaṃ akāle sāvanaṃ nāma. Iti imehi dosehi vimuttāya anussāvanāya sampannaṃ anussāvanasampattivasena akuppaṃ hoti.

    புப்³பே³ வுத்தங் விபத்திஸீமாலக்க²ணங் ஸமதிக்கந்தாய பன ஸீமாய கதங் ஸீமாஸம்பத்திவஸேன அகுப்பங் ஹோதி. யாவதிகா பி⁴க்கூ² கம்மப்பத்தா, தேஸங் அனாக³மனங், ச²ந்தா³ரஹானங் ச²ந்த³ஸ்ஸ அனாஹரணங், ஸம்முகீ²பூ⁴தானங் படிக்கோஸனந்தி இமே பன தயோ பரிஸாதோ³ஸா, தேஹி விமுத்தாய பரிஸாய கதங் பரிஸாஸம்பத்திவஸேன அகுப்பங் ஹோதி. காரணாரஹத்தா பன ஸத்து² ஸாஸனாரஹத்தா டா²னாரஹங் நாம ஹோதி. இதி யோ இமினா ஏவங் அகுப்பேன டா²னாரஹேன ஞத்திசதுத்தே²ன உபஸம்பதா³கம்மேன உபஸம்பன்னோ, அயங் இத⁴ ‘‘பி⁴க்கூ²’’தி அதி⁴ப்பேதோ. பண்ணத்திவஜ்ஜேஸு பன அஞ்ஞேபி ஸங்க³ஹங் க³ச்ச²ந்தி.

    Pubbe vuttaṃ vipattisīmālakkhaṇaṃ samatikkantāya pana sīmāya kataṃ sīmāsampattivasena akuppaṃ hoti. Yāvatikā bhikkhū kammappattā, tesaṃ anāgamanaṃ, chandārahānaṃ chandassa anāharaṇaṃ, sammukhībhūtānaṃ paṭikkosananti ime pana tayo parisādosā, tehi vimuttāya parisāya kataṃ parisāsampattivasena akuppaṃ hoti. Kāraṇārahattā pana satthu sāsanārahattā ṭhānārahaṃ nāma hoti. Iti yo iminā evaṃ akuppena ṭhānārahena ñatticatutthena upasampadākammena upasampanno, ayaṃ idha ‘‘bhikkhū’’ti adhippeto. Paṇṇattivajjesu pana aññepi saṅgahaṃ gacchanti.

    பி⁴க்கூ²னங் ஸிக்கா²ஸாஜீவஸமாபன்னோதி யா பி⁴க்கூ²னங் அதி⁴ஸீலஸங்கா²தா ஸிக்கா², தஞ்ச, யத்த² சேதே ஸஹ ஜீவந்தி, ஏகஜீவிகா ஸபா⁴க³வுத்தினோ ஹொந்தி, தங் ப⁴க³வதா பஞ்ஞத்தங் ஸிக்கா²பத³ஸங்கா²தங் ஸாஜீவஞ்ச, தத்த² ஸிக்க²னபா⁴வேன ஸமாபன்னோதி பி⁴க்கூ²னங் ஸிக்கா²ஸாஜீவஸமஆபன்னோ. ஸமாபன்னோதி ஸிக்க²ஞ்ச பரிபூரெந்தோ ஸாஜீவஞ்ச அவீதிக்கமந்தோ ஹுத்வா தது³ப⁴யங் உபக³தோதி அத்தோ². ஸிக்க²ங் அபச்சக்கா²ய து³ப்³ப³ல்யங் அனாவிகத்வாதி யங் ஸிக்க²ங் ஸமாபன்னோ, தங் அபடிக்கி²பித்வா, யஞ்ச ஸாஜீவங் ஸமாபன்னோ, தஸ்மிங் து³ப்³ப³லபா⁴வங் அப்பகாஸெத்வா. தத்த² சித்தகெ²த்தகாலபயோக³புக்³க³லவிஜானநவஸேன ஸிக்கா²ய பச்சக்கா²னங் ஞத்வா தத³பா⁴வேன அபச்சக்கா²னங் வேதி³தப்³ப³ங். கத²ங்? உபஸம்பன்னபா⁴வதோ சவிதுகாமதாசித்தேனேவ ஹி ஸிக்கா²பச்சக்கா²னங் ஹோதி, ந த³வா வா ரவா வா ப⁴ணந்தஸ்ஸ. ஏவங் சித்தவஸேன ஸிக்கா²பச்சக்கா²னங் ஹோதி, ந தத³பா⁴வேன. ததா² ‘‘பு³த்³த⁴ங் பச்சக்கா²மி, த⁴ம்மங் பச்சக்கா²மி, ஸங்க⁴ங் பச்சக்கா²மி, ஸிக்க²ங், வினயங், பாதிமொக்க²ங், உத்³தே³ஸங், உபஜ்ஜா²யங், ஆசரியங், ஸத்³தி⁴விஹாரிகங், அந்தேவாஸிகங், ஸமானுபஜ்ஜா²யகங், ஸமானாசரியகங், ஸப்³ரஹ்மசாரிங் பச்சக்கா²மீ’’தி ஏவங் வுத்தானங் பு³த்³தா⁴தீ³னங் சுத்³த³ஸன்னங், ‘‘கி³ஹீதி மங் தா⁴ரேஹி, உபாஸகோ, ஆராமிகோ, ஸாமணேரோ, தித்தி²யோ, தித்தி²யஸாவகோ, அஸமணோ, ‘அஸக்யபுத்தியோ’தி மங் தா⁴ரேஹீ’’தி ஏவங் வுத்தானங் கி³ஹிஆதீ³னங் அட்ட²ன்னஞ்சாதி இமேஸங் த்³வாவீஸதியா கெ²த்தபதா³னங் யஸ்ஸ கஸ்ஸசி ஸவேவசனஸ்ஸ வஸேன தேஸு யங்கிஞ்சி வத்துகாமஸ்ஸ யங்கிஞ்சி வத³தோ ஸிக்கா²பச்சக்கா²னங் ஹோதி, ந ருக்கா²தீ³னங் அஞ்ஞதரஸ்ஸ நாமங் க³ஹெத்வா பச்சாசிக்க²ந்தஸ்ஸ. ஏவங் கெ²த்தவஸேன பச்சக்கா²னங் ஹோதி, ந தத³பா⁴வேன.

    Bhikkhūnaṃ sikkhāsājīvasamāpannoti yā bhikkhūnaṃ adhisīlasaṅkhātā sikkhā, tañca, yattha cete saha jīvanti, ekajīvikā sabhāgavuttino honti, taṃ bhagavatā paññattaṃ sikkhāpadasaṅkhātaṃ sājīvañca, tattha sikkhanabhāvena samāpannoti bhikkhūnaṃ sikkhāsājīvasamaāpanno. Samāpannoti sikkhañca paripūrento sājīvañca avītikkamanto hutvā tadubhayaṃ upagatoti attho. Sikkhaṃ apaccakkhāya dubbalyaṃ anāvikatvāti yaṃ sikkhaṃ samāpanno, taṃ apaṭikkhipitvā, yañca sājīvaṃ samāpanno, tasmiṃ dubbalabhāvaṃ appakāsetvā. Tattha cittakhettakālapayogapuggalavijānanavasena sikkhāya paccakkhānaṃ ñatvā tadabhāvena apaccakkhānaṃ veditabbaṃ. Kathaṃ? Upasampannabhāvato cavitukāmatācitteneva hi sikkhāpaccakkhānaṃ hoti, na davā vā ravā vā bhaṇantassa. Evaṃ cittavasena sikkhāpaccakkhānaṃ hoti, na tadabhāvena. Tathā ‘‘buddhaṃ paccakkhāmi, dhammaṃ paccakkhāmi, saṅghaṃ paccakkhāmi, sikkhaṃ, vinayaṃ, pātimokkhaṃ, uddesaṃ, upajjhāyaṃ, ācariyaṃ, saddhivihārikaṃ, antevāsikaṃ, samānupajjhāyakaṃ, samānācariyakaṃ, sabrahmacāriṃ paccakkhāmī’’ti evaṃ vuttānaṃ buddhādīnaṃ cuddasannaṃ, ‘‘gihīti maṃ dhārehi, upāsako, ārāmiko, sāmaṇero, titthiyo, titthiyasāvako, asamaṇo, ‘asakyaputtiyo’ti maṃ dhārehī’’ti evaṃ vuttānaṃ gihiādīnaṃ aṭṭhannañcāti imesaṃ dvāvīsatiyā khettapadānaṃ yassa kassaci savevacanassa vasena tesu yaṃkiñci vattukāmassa yaṃkiñci vadato sikkhāpaccakkhānaṃ hoti, na rukkhādīnaṃ aññatarassa nāmaṃ gahetvā paccācikkhantassa. Evaṃ khettavasena paccakkhānaṃ hoti, na tadabhāvena.

    தத்த² யதே³தங் ‘‘பச்சக்கா²மீ’’தி ச, ‘‘மங் தா⁴ரேஹீ’’தி (பாரா॰ 51) ச வுத்தங் வத்தமானகாலவசனங், யானி ச ‘‘அலங் மே பு³த்³தே⁴ன, கிங் நு மே பு³த்³தே⁴ன, ந மமத்தோ² பு³த்³தே⁴ன , ஸுமுத்தாஹங் பு³த்³தே⁴னா’’திஆதி³னா (பாரா॰ 52) நயேன ஆக்²யாதவஸேன காலங் அனாமஸித்வா புரிமேஹி சுத்³த³ஸஹி பதே³ஹி ஸத்³தி⁴ங் யோஜெத்வா வுத்தானி ‘‘அலங் மே’’திஆதீ³னி சத்தாரி பதா³னி, தேஸங்யேவ ச ஸவேவசனானங் வஸேன பச்சக்கா²னங் ஹோதி, ந ‘‘பச்சக்கா²ஸி’’ந்தி வா ‘‘பச்சக்கி²ஸ்ஸ’’ந்தி வா ‘‘மங் தா⁴ரேஸீ’’தி வா ‘‘மங் தா⁴ரெஸ்ஸதீ’’தி வா ‘‘யங்னூனாஹங் பச்சக்கெ²ய்ய’’ந்தி (பாரா॰ 45) வாதிஆதீ³னி அதீதானாக³தபரிகப்பவசனானி ப⁴ணந்தஸ்ஸ. ஏவங் வத்தமான காலவஸேன சேவ அனாமட்ட²காலவஸேன ச பச்சக்கா²னங் ஹோதி, ந தத³பா⁴வேன.

    Tattha yadetaṃ ‘‘paccakkhāmī’’ti ca, ‘‘maṃ dhārehī’’ti (pārā. 51) ca vuttaṃ vattamānakālavacanaṃ, yāni ca ‘‘alaṃ me buddhena, kiṃ nu me buddhena, na mamattho buddhena , sumuttāhaṃ buddhenā’’tiādinā (pārā. 52) nayena ākhyātavasena kālaṃ anāmasitvā purimehi cuddasahi padehi saddhiṃ yojetvā vuttāni ‘‘alaṃ me’’tiādīni cattāri padāni, tesaṃyeva ca savevacanānaṃ vasena paccakkhānaṃ hoti, na ‘‘paccakkhāsi’’nti vā ‘‘paccakkhissa’’nti vā ‘‘maṃ dhāresī’’ti vā ‘‘maṃ dhāressatī’’ti vā ‘‘yaṃnūnāhaṃ paccakkheyya’’nti (pārā. 45) vātiādīni atītānāgataparikappavacanāni bhaṇantassa. Evaṃ vattamāna kālavasena ceva anāmaṭṭhakālavasena ca paccakkhānaṃ hoti, na tadabhāvena.

    பயோகோ³ பன து³விதோ⁴ காயிகோ ச வாசஸிகோ ச. தத்த² ‘‘பு³த்³த⁴ங் பச்சக்கா²மீ’’திஆதி³னா (பாரா॰ 51) நயேன யாய காயசி பா⁴ஸாய வசீபே⁴த³ங் கத்வா வாசஸிகப்பயோகே³னேவ பச்சக்கா²னங் ஹோதி, ந அக்க²ரலிக²னங் வா ஹத்த²முத்³தா³தி³த³ஸ்ஸனங் வா காயப்பயோக³ங் கரொந்தஸ்ஸ. ஏவங் வாசஸிகப்பயோகே³னேவ பச்சக்கா²னங் ஹோதி, ந தத³பா⁴வேன.

    Payogo pana duvidho kāyiko ca vācasiko ca. Tattha ‘‘buddhaṃ paccakkhāmī’’tiādinā (pārā. 51) nayena yāya kāyaci bhāsāya vacībhedaṃ katvā vācasikappayogeneva paccakkhānaṃ hoti, na akkharalikhanaṃ vā hatthamuddādidassanaṃ vā kāyappayogaṃ karontassa. Evaṃ vācasikappayogeneva paccakkhānaṃ hoti, na tadabhāvena.

    புக்³க³லோ பன து³விதோ⁴ – யோ ச பச்சக்கா²தி, யஸ்ஸ ச பச்சக்கா²தி. தத்த² யோ பச்சக்கா²தி, ஸோ ஸசே உம்மத்தககி²த்தசித்தவேத³னாட்டானங் அஞ்ஞதரோ ந ஹோதி. யஸ்ஸ பன பச்சக்கா²தி, ஸோ ஸசே மனுஸ்ஸஜாதிகோ ஹோதி, ந ச உம்மத்தகாதீ³னங் அஞ்ஞதரோ, ஸம்முகீ²பூ⁴தோ ச ஸிக்கா²பச்சக்கா²னங் ஹோதி. ந ஹி அஸம்முகீ²பூ⁴தஸ்ஸ தூ³தேன வா பண்ணேன வா ஆரோசனங் ருஹதி. ஏவங் யதா²வுத்தபுக்³க³லவஸேன பச்சக்கா²னங் ஹோதி, ந தத³பா⁴வேன.

    Puggalo pana duvidho – yo ca paccakkhāti, yassa ca paccakkhāti. Tattha yo paccakkhāti, so sace ummattakakhittacittavedanāṭṭānaṃ aññataro na hoti. Yassa pana paccakkhāti, so sace manussajātiko hoti, na ca ummattakādīnaṃ aññataro, sammukhībhūto ca sikkhāpaccakkhānaṃ hoti. Na hi asammukhībhūtassa dūtena vā paṇṇena vā ārocanaṃ ruhati. Evaṃ yathāvuttapuggalavasena paccakkhānaṃ hoti, na tadabhāvena.

    விஜானநம்பி நியமிதானியமிதவஸேன து³வித⁴ங். தத்த² யஸ்ஸ யேஸங் வா நியமெத்வா ‘‘இமஸ்ஸ, இமேஸங் வா ஆரோசேமீ’’தி வத³தி, ஸசே தே யதா² பகதியா லோகே மனுஸ்ஸா வசனங் ஸுத்வா ஆவஜ்ஜனஸமயே ஜானந்தி, ஏவங் தஸ்ஸ வசனானந்தரமேவ தஸ்ஸ ‘‘அயங் உக்கண்டி²தோ’’தி வா ‘‘கி³ஹிபா⁴வங் பத்த²யதீ’’தி வா யேன கேனசி ஆகாரேன ஸிக்கா²பச்சக்கா²னபா⁴வங் ஜானந்தி, பச்சக்கா²தாவ ஹோதி ஸிக்கா². அத² அபரபா⁴கே³ ‘‘கிங் இமினா வுத்த’’ந்தி சிந்தெத்வா ஜானந்தி, அஞ்ஞே வா ஜானந்தி, அபச்சக்கா²தாவ ஹோதி ஸிக்கா². அனியமெத்வா ஆரோசெந்தஸ்ஸ பன ஸசே வுத்தனயேன யோ கோசி மனுஸ்ஸஜாதிகோ வசனத்த²ங் ஜானாதி, பச்சக்கா²தாவ ஹோதி ஸிக்கா². ஏவங் விஜானநவஸேன பச்சக்கா²னங் ஹோதி, ந தத³பா⁴வேன. யோ பன அந்தமஸோ த³வாயபி பச்சக்கா²தி, தேன அபச்சக்கா²தாவ ஹோதி ஸிக்கா². இதி இமேஸங் வுத்தப்பகாரானங் சித்தாதீ³னங் வா வஸேன, ஸப்³ப³ஸோ வா பன அபச்சக்கா²னேன ஸிக்க²ங் அபச்சக்கா²ய ஸிக்கா²பச்சக்கா²னஸ்ஸேவ ச அத்த²பூ⁴தங் ஏகச்சங் து³ப்³ப³ல்யங் அனாவிகத்வா.

    Vijānanampi niyamitāniyamitavasena duvidhaṃ. Tattha yassa yesaṃ vā niyametvā ‘‘imassa, imesaṃ vā ārocemī’’ti vadati, sace te yathā pakatiyā loke manussā vacanaṃ sutvā āvajjanasamaye jānanti, evaṃ tassa vacanānantarameva tassa ‘‘ayaṃ ukkaṇṭhito’’ti vā ‘‘gihibhāvaṃ patthayatī’’ti vā yena kenaci ākārena sikkhāpaccakkhānabhāvaṃ jānanti, paccakkhātāva hoti sikkhā. Atha aparabhāge ‘‘kiṃ iminā vutta’’nti cintetvā jānanti, aññe vā jānanti, apaccakkhātāva hoti sikkhā. Aniyametvā ārocentassa pana sace vuttanayena yo koci manussajātiko vacanatthaṃ jānāti, paccakkhātāva hoti sikkhā. Evaṃ vijānanavasena paccakkhānaṃ hoti, na tadabhāvena. Yo pana antamaso davāyapi paccakkhāti, tena apaccakkhātāva hoti sikkhā. Iti imesaṃ vuttappakārānaṃ cittādīnaṃ vā vasena, sabbaso vā pana apaccakkhānena sikkhaṃ apaccakkhāya sikkhāpaccakkhānasseva ca atthabhūtaṃ ekaccaṃ dubbalyaṃ anāvikatvā.

    மேது²னங் த⁴ம்மங் படிஸேவெய்யாதி எத்த² மேது²னங் த⁴ம்மந்தி ராக³பரியுட்டா²னேன ஸதி³ஸானங் உபி⁴ன்னங் த⁴ம்மங். படிஸேவெய்யாதி படிஸேவெய்ய அஜ்ஜா²பஜ்ஜெய்ய. அந்தமஸோதி ஸப்³ப³ந்திமேன பரிச்சே²தே³ன. திரச்சா²னக³தாயபீதி படிஸந்தி⁴வஸேன திரச்சா²னேஸு க³தாயபி, அயமெத்த² அனுபஞ்ஞத்தி. பாராஜிகோ ஹோதீதி பராஜிதோ ஹோதி, பராஜயங் ஆபன்னோ. அஸங்வாஸோதி பகதத்தா பி⁴க்கூ² ஸஹ வஸந்தி எத்தா²தி ஏககம்மாதி³கோவ திவிதோ⁴பி விதி⁴ ஸங்வாஸோ நாம, ஸோ தேன ஸத்³தி⁴ங் நத்தீ²தி அஸங்வாஸோ. ஸங்க⁴கம்மேஸு ஹி ஏஸ க³ணபூரகோபி ந ஹோதி, அயங் தாவ பத³வண்ணனா.

    Methunaṃ dhammaṃ paṭiseveyyāti ettha methunaṃ dhammanti rāgapariyuṭṭhānena sadisānaṃ ubhinnaṃ dhammaṃ. Paṭiseveyyāti paṭiseveyya ajjhāpajjeyya. Antamasoti sabbantimena paricchedena. Tiracchānagatāyapīti paṭisandhivasena tiracchānesu gatāyapi, ayamettha anupaññatti. Pārājiko hotīti parājito hoti, parājayaṃ āpanno. Asaṃvāsoti pakatattā bhikkhū saha vasanti etthāti ekakammādikova tividhopi vidhi saṃvāso nāma, so tena saddhiṃ natthīti asaṃvāso. Saṅghakammesu hi esa gaṇapūrakopi na hoti, ayaṃ tāva padavaṇṇanā.

    அயங் பனெத்த² வினிச்ச²யோ – மனுஸ்ஸாமனுஸ்ஸதிரச்சா²னக³தவஸேன ஹி திஸ்ஸோ இத்தி²யோ, தாஸங் வச்சமக்³க³பஸ்ஸாவமக்³க³முக²மக்³க³வஸேன தயோ தயோ கத்வா நவ மக்³கா³, ததா² உப⁴தொப்³யஞ்ஜனகானங். புரிஸானங் பன வச்சமக்³க³முக²மக்³க³வஸேன த்³வே த்³வே கத்வா ச² மக்³கா³, ததா² பண்ட³கானந்தி ஏவங் திங்ஸ மக்³கா³. தேஸு அத்தனோ வா பரேஸங் வா யஸ்ஸ கஸ்ஸசி மக்³க³ஸ்ஸ ஸந்த²தஸ்ஸ வா அஸந்த²தஸ்ஸ வா, பரேஸங் பன மதானம்பி அக்கா²யிதஸ்ஸ வா யேபு⁴ய்யேன அக்கா²யிதஸ்ஸ வா பகதிவாதேன அஸங்பு²ட்டே² அல்லோகாஸே யோ பி⁴க்கு² ஏகதிலபீ³ஜமத்தம்பி அத்தனோ அங்க³ஜாதங் ஸந்த²தங் வா அஸந்த²தங் வா ஸேவனசித்தேன பவேஸேதி, பரேன வா பவேஸியமானே பவேஸனபவிட்ட²ட்டி²தஉத்³த⁴ரணேஸு யங்கிஞ்சி ஸாதி³யதி, அயங் பாராஜிகாபத்திங் ஆபன்னோ நாம ஹோதி, அயங் தாவெத்த² அஸாதா⁴ரணவினிச்ச²யோ. ஸப்³ப³ஸிக்கா²பதா³னங் பன ஸாதா⁴ரணவினிச்ச²யத்த²ங் அயங் மாதிகா –

    Ayaṃ panettha vinicchayo – manussāmanussatiracchānagatavasena hi tisso itthiyo, tāsaṃ vaccamaggapassāvamaggamukhamaggavasena tayo tayo katvā nava maggā, tathā ubhatobyañjanakānaṃ. Purisānaṃ pana vaccamaggamukhamaggavasena dve dve katvā cha maggā, tathā paṇḍakānanti evaṃ tiṃsa maggā. Tesu attano vā paresaṃ vā yassa kassaci maggassa santhatassa vā asanthatassa vā, paresaṃ pana matānampi akkhāyitassa vā yebhuyyena akkhāyitassa vā pakativātena asaṃphuṭṭhe allokāse yo bhikkhu ekatilabījamattampi attano aṅgajātaṃ santhataṃ vā asanthataṃ vā sevanacittena paveseti, parena vā pavesiyamāne pavesanapaviṭṭhaṭṭhitauddharaṇesu yaṃkiñci sādiyati, ayaṃ pārājikāpattiṃ āpanno nāma hoti, ayaṃ tāvettha asādhāraṇavinicchayo. Sabbasikkhāpadānaṃ pana sādhāraṇavinicchayatthaṃ ayaṃ mātikā –

    நிதா³னங் புக்³க³லங் வத்து²ங், பஞ்ஞத்திவிதி⁴மேவ ச;

    Nidānaṃ puggalaṃ vatthuṃ, paññattividhimeva ca;

    ஆணத்தாபத்தினாபத்தி-விபத்திங் அங்க³மேவ ச.

    Āṇattāpattināpatti-vipattiṃ aṅgameva ca.

    ஸமுட்டா²னவிதி⁴ங் கிரியா-ஸஞ்ஞாசித்தேஹி நானத்தங்;

    Samuṭṭhānavidhiṃ kiriyā-saññācittehi nānattaṃ;

    வஜ்ஜகம்மப்பபே⁴த³ஞ்ச, திகத்³வயவிதி⁴ங் ததா².

    Vajjakammappabhedañca, tikadvayavidhiṃ tathā.

    லக்க²ணங் ஸத்தரஸதா⁴, டி²தங் ஸாதா⁴ரணங் இத³ங்;

    Lakkhaṇaṃ sattarasadhā, ṭhitaṃ sādhāraṇaṃ idaṃ;

    ஞத்வா யோஜெய்ய மேதா⁴வீ, தத்த² தத்த² யதா²ரஹந்தி.

    Ñatvā yojeyya medhāvī, tattha tattha yathārahanti.

    தத்த² நிதா³னங் நாம வேஸாலி-ராஜக³ஹ-ஸாவத்தி²-ஆளவி-கோஸம்பி³-ஸக்³க³-ப⁴க்³கா³னங் வஸேன ஸத்தவித⁴ங் பஞ்ஞத்திட்டா²னங், இத³ஞ்ஹி ஸப்³ப³ஸிக்கா²பதா³னங் நிதா³னங். புக்³க³லோ நாம யங் யங் ஆரப்³ப⁴ தங் தங் ஸிக்கா²பத³ங் பஞ்ஞத்தங். வத்து² நாம தஸ்ஸ தஸ்ஸ புக்³க³லஸ்ஸ அஜ்ஜா²சாரோ வுச்சதி. பஞ்ஞத்திவிதி⁴ந்தி பஞ்ஞத்திஅனுபஞ்ஞத்திஅனுப்பன்னபஞ்ஞத்திஸப்³ப³த்த²பஞ்ஞத்திபதே³ஸபஞ்ஞத்திஸாதா⁴ரணபஞ்ஞத்தி அஸாதா⁴ரணபஞ்ஞத்திஏகதோபஞ்ஞத்திஉப⁴தோபஞ்ஞத்திவஸேன நவவிதா⁴ பஞ்ஞத்தி. தத்த² அனுப்பன்னபஞ்ஞத்தி நாம அனுப்பன்னே தோ³ஸே பஞ்ஞத்தா, ஸா அட்ட²க³ருத⁴ம்மப்படிக்³க³ஹணவஸேன (சூளவ॰ 403) பி⁴க்கு²னீனங்யேவ ஆக³தா, அஞ்ஞத்ர நத்தி². வினயத⁴ரபஞ்சமேன (மஹாவ॰ 259) க³ணேன உபஸம்பதா³, க³ணங்க³ணூபாஹனா (மஹாவ॰ 259) து⁴வன்ஹானங் சம்மத்த²ரணந்தி ஏதேஸங் வஸேன சதுப்³பி³தா⁴ பதே³ஸபஞ்ஞத்தி நாம. மஜ்ஜி²மதே³ஸேயேவ ஹி ஏதேஹி ஆபத்தி ஹோதி, தேஸுபி து⁴வன்ஹானங் படிக்கே²பமத்தமேவ பாதிமொக்கே² ஆக³தங், ததோ அஞ்ஞா பதே³ஸபஞ்ஞத்தி நாம நத்தி². ஸப்³பா³னி ஸப்³ப³த்த²பஞ்ஞத்தியேவ ஹொந்தி, ஸாதா⁴ரணபஞ்ஞத்திது³கஞ்ச ஏகதோபஞ்ஞத்திது³கஞ்ச அத்த²தோ ஏகங், தஸ்மா அனுப்பன்னபஞ்ஞத்திஞ்ச ஸப்³ப³த்த²பஞ்ஞத்திது³கஞ்ச ஏகதோபஞ்ஞத்திது³கஞ்ச ட²பெத்வா ஸேஸானங் சதஸ்ஸன்னங் பஞ்ஞத்தீனங் வஸேன ஸப்³ப³த்த² வினிச்ச²யோ வேதி³தப்³போ³. ஆணத்தாபத்தினாபத்திவிபத்திந்திஎத்த² ஆணத்தீதிஆணாபனா வுச்சதி. ஆபத்தீதி புப்³ப³ப்பயோகா³தி³வஸேன ஆபத்திபே⁴தோ³. அனாபத்தீதி அஜானநாதி³வஸேன அனாபத்தி. விபத்தீதி ஸீலஆசாரதி³ட்டி²ஆஜீவவிபத்தீனங் அஞ்ஞதரா. இதி இமாஸங் ஆணத்தாதீ³னம்பி வஸேன ஸப்³ப³த்த² வினிச்ச²யோ வேதி³தப்³போ³. அங்க³ந்தி ஸப்³ப³ஸிக்கா²பதே³ஸு ஆபத்தீனங் அங்க³ங் வேதி³தப்³ப³ங்.

    Tattha nidānaṃ nāma vesāli-rājagaha-sāvatthi-āḷavi-kosambi-sagga-bhaggānaṃ vasena sattavidhaṃ paññattiṭṭhānaṃ, idañhi sabbasikkhāpadānaṃ nidānaṃ. Puggalo nāma yaṃ yaṃ ārabbha taṃ taṃ sikkhāpadaṃ paññattaṃ. Vatthu nāma tassa tassa puggalassa ajjhācāro vuccati. Paññattividhinti paññattianupaññattianuppannapaññattisabbatthapaññattipadesapaññattisādhāraṇapaññatti asādhāraṇapaññattiekatopaññattiubhatopaññattivasena navavidhā paññatti. Tattha anuppannapaññatti nāma anuppanne dose paññattā, sā aṭṭhagarudhammappaṭiggahaṇavasena (cūḷava. 403) bhikkhunīnaṃyeva āgatā, aññatra natthi. Vinayadharapañcamena (mahāva. 259) gaṇena upasampadā, gaṇaṅgaṇūpāhanā (mahāva. 259) dhuvanhānaṃ cammattharaṇanti etesaṃ vasena catubbidhā padesapaññatti nāma. Majjhimadeseyeva hi etehi āpatti hoti, tesupi dhuvanhānaṃ paṭikkhepamattameva pātimokkhe āgataṃ, tato aññā padesapaññatti nāma natthi. Sabbāni sabbatthapaññattiyeva honti, sādhāraṇapaññattidukañca ekatopaññattidukañca atthato ekaṃ, tasmā anuppannapaññattiñca sabbatthapaññattidukañca ekatopaññattidukañca ṭhapetvā sesānaṃ catassannaṃ paññattīnaṃ vasena sabbattha vinicchayo veditabbo. Āṇattāpattināpattivipattintiettha āṇattītiāṇāpanā vuccati. Āpattīti pubbappayogādivasena āpattibhedo. Anāpattīti ajānanādivasena anāpatti. Vipattīti sīlaācāradiṭṭhiājīvavipattīnaṃ aññatarā. Iti imāsaṃ āṇattādīnampi vasena sabbattha vinicchayo veditabbo. Aṅganti sabbasikkhāpadesu āpattīnaṃ aṅgaṃ veditabbaṃ.

    ஸமுட்டா²னவிதி⁴ந்தி ஸப்³பா³பத்தீனங் காயோ வாசா காயவாசா காயசித்தங் வாசாசித்தங் காயவாசாசித்தந்தி இமானி ஏகங்கி³கத்³வங்கி³கதிவங்கி³கானி. ச² ஸமுட்டா²னானி நாம யானி ‘‘ஸிக்கா²பத³ஸமஉட்டா²னானீ’’திபி வுச்சந்தி. தத்த² புரிமானி தீணி அசித்தகானி, பச்சி²மானி ஸசித்தகானி. தேஸு ஏகேன வா த்³வீஹி வா தீஹி வா சதூஹி வா ச²ஹி வா ஸமுட்டா²னேஹி ஆபத்தியோ ஸமுட்ட²ஹந்தி, பஞ்சஸமுட்டா²னா நாம நத்தி². தத்த² ஏகஸமுட்டா²னா நாம சதுத்தே²ன ச பஞ்சமேன ச ச²ட்டே²ன ச ஸமுட்டா²னேன ஸமுட்டா²தி, ந அஞ்ஞேன. த்³விஸமுட்டா²னா நாம பட²மசதுத்தே²ஹி ச து³தியபஞ்சமேஹி ச ததியச²ட்டே²ஹி ச சதுத்த²ச²ட்டே²ஹி ச பஞ்சமச²ட்டே²ஹி ச ஸமுட்டா²னேஹி, ஸமுட்டா²தி, ந அஞ்ஞேஹி. திஸமுட்டா²னா நாம பட²மேஹி ச தீஹி, பச்சி²மேஹி ச தீஹி ஸமுட்டா²னேஹி ஸமுட்டா²தி, ந அஞ்ஞேஹி. சதுஸமுட்டா²னா நாம பட²மததியசதுத்த²ச²ட்டே²ஹி ச து³தியததியபஞ்சமச²ட்டே²ஹி ச ஸமுட்டா²னேஹி ஸமுட்டா²தி, ந அஞ்ஞேஹி. ச² ஸமுட்டா²னா நாம ச²ஹிபி ஸமுட்டா²தி.

    Samuṭṭhānavidhinti sabbāpattīnaṃ kāyo vācā kāyavācā kāyacittaṃ vācācittaṃ kāyavācācittanti imāni ekaṅgikadvaṅgikativaṅgikāni. Cha samuṭṭhānāni nāma yāni ‘‘sikkhāpadasamauṭṭhānānī’’tipi vuccanti. Tattha purimāni tīṇi acittakāni, pacchimāni sacittakāni. Tesu ekena vā dvīhi vā tīhi vā catūhi vā chahi vā samuṭṭhānehi āpattiyo samuṭṭhahanti, pañcasamuṭṭhānā nāma natthi. Tattha ekasamuṭṭhānā nāma catutthena ca pañcamena ca chaṭṭhena ca samuṭṭhānena samuṭṭhāti, na aññena. Dvisamuṭṭhānā nāma paṭhamacatutthehi ca dutiyapañcamehi ca tatiyachaṭṭhehi ca catutthachaṭṭhehi ca pañcamachaṭṭhehi ca samuṭṭhānehi, samuṭṭhāti, na aññehi. Tisamuṭṭhānā nāma paṭhamehi ca tīhi, pacchimehi ca tīhi samuṭṭhānehi samuṭṭhāti, na aññehi. Catusamuṭṭhānā nāma paṭhamatatiyacatutthachaṭṭhehi ca dutiyatatiyapañcamachaṭṭhehi ca samuṭṭhānehi samuṭṭhāti, na aññehi. Cha samuṭṭhānā nāma chahipi samuṭṭhāti.

    ஏவங் –

    Evaṃ –

    திதா⁴ ஏகஸமுட்டா²னா, பஞ்சதா⁴ த்³விஸமுட்டி²தா;

    Tidhā ekasamuṭṭhānā, pañcadhā dvisamuṭṭhitā;

    த்³விதா⁴ திசதுரோ டா²னா, ஏகதா⁴ ச²ஸமுட்டி²தாதி.

    Dvidhā ticaturo ṭhānā, ekadhā chasamuṭṭhitāti.

    ஸமுட்டா²னவஸேன ஸப்³பா³வ தேரஸ ஆபத்தியோ ஹொந்தி (சூளவ॰ 165 ஆத³யோ), தா பட²மபஞ்ஞத்திஸிக்கா²பத³வஸேன ஸமுட்டா²னதோ தேரஸ நாமானி லப⁴ந்தி பட²மபாராஜிகஸமுட்டா²னா, அதி³ன்னாதா³ன-ஸஞ்சரித்த-ஸமனுபா⁴ஸன-கதி²ன-ஏளகலோம-பத³ஸோத⁴ம்ம-அத்³தா⁴ன-தெ²ய்யஸத்த²-த⁴ம்மதே³ஸனாபூ⁴தாரோசன-சோரிவுட்டா²பன-அனநுஞ்ஞாதஸமுட்டா²னாதி. தத்த² யா காயசித்ததோ ஸமுட்டா²தி, அயங் பட²மபாராஜிகஸமுட்டா²னா நாம. யா ஸசித்தகேஹி தீஹி ஸமுட்டா²னேஹி ஸமுட்டா²தி, அயங் அதி³ன்னாதா³னஸமுட்டா²னா நாம. யா ச²ஹிபி ஸமுட்டா²தி, அயங் ஸஞ்சரித்தஸமுட்டா²னா நாம. யா ச²ட்டே²னேவ ஸமுட்டா²தி, அயங் ஸமனுபா⁴ஸனஸமுட்டா²னா நாம. யா ததியச²ட்டே²ஹி ஸமுட்டா²தி, அயங் கதி²னஸமுட்டா²னா நாம. யா பட²மசதுத்தே²ஹி ஸமுட்டா²தி, அயங் ஏளகலோமஸமுட்டா²னா நாம. யா து³தியபஞ்சமேஹி ஸமுட்டா²தி , அயங் பத³ஸோத⁴ம்மஸமுட்டா²னா நாம. யா பட²மததியசதுத்த²ச²ட்டே²ஹி ஸமுட்டா²தி, அயங் அத்³தா⁴னஸமுட்டா²னா நாம. யா சதுத்த²ச²ட்டே²ஹி ஸமுட்டா²தி, அயங் தெ²ய்யஸத்த²ஸமுட்டா²னா நாம. யா பஞ்சமேனேவ ஸமுட்டா²தி, அயங் த⁴ம்மதே³ஸனாஸமுட்டா²னா நாம. யா அசித்தகேஹி தீஹி ஸமுட்டா²னேஹி ஸமுட்டா²தி, அயங் பூ⁴தாரோசனஸமுட்டா²னா நாம. யா பஞ்சமச²ட்டே²ஹி ஸமுட்டா²தி, அயங் சோரிவுட்டா²பனஸமுட்டா²னா நாம. யா து³தியததியபஞ்சமச²ட்டே²ஹி ஸமுட்டா²தி, அயங் அனநுஞ்ஞாதஸமுட்டா²னா நாமாதி. இதி இமஸ்ஸ ஸமுட்டா²னவிதி⁴னோபி வஸேன ஸப்³ப³த்த² வினிச்ச²யோ வேதி³தப்³போ³.

    Samuṭṭhānavasena sabbāva terasa āpattiyo honti (cūḷava. 165 ādayo), tā paṭhamapaññattisikkhāpadavasena samuṭṭhānato terasa nāmāni labhanti paṭhamapārājikasamuṭṭhānā, adinnādāna-sañcaritta-samanubhāsana-kathina-eḷakaloma-padasodhamma-addhāna-theyyasattha-dhammadesanābhūtārocana-corivuṭṭhāpana-ananuññātasamuṭṭhānāti. Tattha yā kāyacittato samuṭṭhāti, ayaṃ paṭhamapārājikasamuṭṭhānā nāma. Yā sacittakehi tīhi samuṭṭhānehi samuṭṭhāti, ayaṃ adinnādānasamuṭṭhānā nāma. Yā chahipi samuṭṭhāti, ayaṃ sañcarittasamuṭṭhānā nāma. Yā chaṭṭheneva samuṭṭhāti, ayaṃ samanubhāsanasamuṭṭhānā nāma. Yā tatiyachaṭṭhehi samuṭṭhāti, ayaṃ kathinasamuṭṭhānā nāma. Yā paṭhamacatutthehi samuṭṭhāti, ayaṃ eḷakalomasamuṭṭhānā nāma. Yā dutiyapañcamehi samuṭṭhāti , ayaṃ padasodhammasamuṭṭhānā nāma. Yā paṭhamatatiyacatutthachaṭṭhehi samuṭṭhāti, ayaṃ addhānasamuṭṭhānā nāma. Yā catutthachaṭṭhehi samuṭṭhāti, ayaṃ theyyasatthasamuṭṭhānā nāma. Yā pañcameneva samuṭṭhāti, ayaṃ dhammadesanāsamuṭṭhānā nāma. Yā acittakehi tīhi samuṭṭhānehi samuṭṭhāti, ayaṃ bhūtārocanasamuṭṭhānā nāma. Yā pañcamachaṭṭhehi samuṭṭhāti, ayaṃ corivuṭṭhāpanasamuṭṭhānā nāma. Yā dutiyatatiyapañcamachaṭṭhehi samuṭṭhāti, ayaṃ ananuññātasamuṭṭhānā nāmāti. Iti imassa samuṭṭhānavidhinopi vasena sabbattha vinicchayo veditabbo.

    கிரியாஸஞ்ஞாசித்தேஹி நானத்தந்தி ஏதேஹி கிரியாதீ³ஹி ஸப்³பா³பத்தீனங் நானாபா⁴வங் ஞத்வா ஸப்³ப³த்த² வினிச்ச²யோ வேதி³தப்³போ³. ஸப்³பா³பத்தியோ ஹி கிரியாவஸேன பஞ்சவிதா⁴ ஹொந்தி, ஸெய்யதி²த³ங் – அத்தா²பத்தி கிரியதோ ஸமுட்டா²தி , அத்தி² அகிரியதோ, அத்தி² கிரியாகிரியதோ, அத்தி² ஸியா கிரியதோ ஸியா அகிரியதோ, அத்தி² ஸியா கிரியதோ ஸியா கிரியாகிரியதோதி. தத்த² யா காயேன வா வாசாய வா பத²விக²ணனாதீ³ஸு (பசி॰ 84) விய வீதிக்கமங் கரொந்தஸ்ஸ ஹோதி, அயங் கிரியதோ ஸமுட்டா²தி நாம. யா காயவாசாஹி கத்தப்³ப³ங் அகரொந்தஸ்ஸ ஹோதி பட²மகதி²னாபத்தி (பாரா॰ 459 ஆத³யோ) விய, அயங் அகிரியதோ ஸமுட்டா²தி நாம. யா கரொந்தஸ்ஸ ச அகரொந்தஸ்ஸ ச ஹோதி அஞ்ஞாதிகாய பி⁴க்கு²னியா ஹத்த²தோ சீவரப்படிக்³க³ஹணாபத்தி (பாரா॰ 508-511) விய, அயங் கிரியாகிரியதோ ஸமுட்டா²தி நாம. யா ஸியா கரொந்தஸ்ஸ ச, ஸியா அகரொந்தஸ்ஸ ச ஹோதி ரூபியப்படிக்³க³ஹணாபத்தி (பாரா॰ 582) விய, அயங் ஸியா கிரியதோ ஸியா அகிரியதோ ஸமுட்டா²தி நாம. யா ஸியா கரொந்தஸ்ஸ ச ஸியா கரொந்தாகரொந்தஸ்ஸ ச ஹோதி குடிகாராபத்தி (பாரா॰ 342 ஆத³யோ) விய, அயங் ஸியா கிரியதோ ஸியா கிரியாகிரியதோ ஸமுட்டா²தி நாம.

    Kiriyāsaññācittehi nānattanti etehi kiriyādīhi sabbāpattīnaṃ nānābhāvaṃ ñatvā sabbattha vinicchayo veditabbo. Sabbāpattiyo hi kiriyāvasena pañcavidhā honti, seyyathidaṃ – atthāpatti kiriyato samuṭṭhāti , atthi akiriyato, atthi kiriyākiriyato, atthi siyā kiriyato siyā akiriyato, atthi siyā kiriyato siyā kiriyākiriyatoti. Tattha yā kāyena vā vācāya vā pathavikhaṇanādīsu (paci. 84) viya vītikkamaṃ karontassa hoti, ayaṃ kiriyato samuṭṭhāti nāma. Yā kāyavācāhi kattabbaṃ akarontassa hoti paṭhamakathināpatti (pārā. 459 ādayo) viya, ayaṃ akiriyato samuṭṭhāti nāma. Yā karontassa ca akarontassa ca hoti aññātikāya bhikkhuniyā hatthato cīvarappaṭiggahaṇāpatti (pārā. 508-511) viya, ayaṃ kiriyākiriyatosamuṭṭhāti nāma. Yā siyā karontassa ca, siyā akarontassa ca hoti rūpiyappaṭiggahaṇāpatti (pārā. 582) viya, ayaṃ siyā kiriyato siyā akiriyato samuṭṭhāti nāma. Yā siyā karontassa ca siyā karontākarontassa ca hoti kuṭikārāpatti (pārā. 342 ādayo) viya, ayaṃ siyā kiriyato siyā kiriyākiriyato samuṭṭhāti nāma.

    ஸப்³பா³பத்தியோ ச ஸஞ்ஞாவஸேன து³விதா⁴ ஹொந்தி ஸஞ்ஞாவிமொக்கா² நோஸஞ்ஞாவிமொக்கா²தி. தத்த² யதோ வீதிக்கமஸஞ்ஞாய அபா⁴வேன முச்சதி, அயங் ஸஞ்ஞாவிமொக்கா², இதரா நோஸஞ்ஞாவிமொக்கா². புன ச ஸப்³பா³பி சித்தவஸேன து³விதா⁴ ஹொந்தி ஸசித்தகா அசித்தகா சாதி. தத்த² யா ஸசித்தகஸமுட்டா²னவஸேனேவ ஸமுட்டா²தி அயங் ஸசித்தகா. யா அசித்தகேன வா ஸசித்தகமிஸ்ஸகேன வா ஸமுட்டா²தி அயங் அசித்தகா.

    Sabbāpattiyo ca saññāvasena duvidhā honti saññāvimokkhā nosaññāvimokkhāti. Tattha yato vītikkamasaññāya abhāvena muccati, ayaṃ saññāvimokkhā, itarā nosaññāvimokkhā. Puna ca sabbāpi cittavasena duvidhā honti sacittakā acittakā cāti. Tattha yā sacittakasamuṭṭhānavaseneva samuṭṭhāti ayaṃ sacittakā. Yā acittakena vā sacittakamissakena vā samuṭṭhāti ayaṃ acittakā.

    வஜ்ஜகம்மப்பபே⁴த³ந்தி எத்த² ஸப்³பா³பத்தியோ வஜ்ஜவஸேன து³விதா⁴ ஹொந்தி லோகவஜ்ஜா பண்ணத்திவஜ்ஜா சாதி. தத்த² யஸ்ஸா ஸசித்தகபக்கே² சித்தங் அகுஸலமேவ ஹோதி, அயங் லோகவஜ்ஜா, ஸேஸா பண்ணத்திவஜ்ஜா. ஸப்³பா³ ச காயகம்மவசீகம்மதது³ப⁴யவஸேன திவிதா⁴ ஹொந்தி. தத்த² காயத்³வாரே ஆபஜ்ஜிதப்³பா³ காயகம்மந்தி வுச்சதி, வசீத்³வாரே ஆபஜ்ஜிதப்³பா³ வசீகம்மந்தி வுச்சதி, உப⁴யத்த² ஆபஜ்ஜிதப்³பா³ காயகம்மங் வசீகம்மஞ்சாதி, மனொத்³வாரே ஆபத்தி நாம நத்தி². இதி இமினா வஜ்ஜகம்மப்பபே⁴தே³னாபி ஸப்³ப³த்த² வினிச்ச²யோ வேதி³தப்³போ³.

    Vajjakammappabhedanti ettha sabbāpattiyo vajjavasena duvidhā honti lokavajjā paṇṇattivajjā cāti. Tattha yassā sacittakapakkhe cittaṃ akusalameva hoti, ayaṃ lokavajjā, sesā paṇṇattivajjā. Sabbā ca kāyakammavacīkammatadubhayavasena tividhā honti. Tattha kāyadvāre āpajjitabbā kāyakammanti vuccati, vacīdvāre āpajjitabbā vacīkammanti vuccati, ubhayattha āpajjitabbā kāyakammaṃ vacīkammañcāti, manodvāre āpatti nāma natthi. Iti iminā vajjakammappabhedenāpi sabbattha vinicchayo veditabbo.

    திகத்³வயவிதி⁴ந்தி குஸலத்திகவேத³னாத்திகவிதி⁴ங். ஆபத்திங் ஆபஜ்ஜமானோ ஹி அகுஸலசித்தோ வா ஆபஜ்ஜதி குஸலாப்³யாகதசித்தோ வா, ததா² து³க்க²வேத³னாஸமங்கீ³ வா இதரவேத³னாத்³வயஸமங்கீ³ வா. ஏவங் ஸந்தேபி ஸப்³ப³ஸிக்கா²பதே³ஸு அகுஸலசித்தவஸேன ஏகங் சித்தங், குஸலாப்³யாகதசித்தவஸேன த்³வே சித்தானி, ஸப்³பே³ஸங் வஸேன தீணி சித்தானி. து³க்க²வேத³னாவஸேன ஏகா வேத³னா, ஸுக²உபெக்கா²வஸேன த்³வே, ஸப்³பா³ஸங் வஸேன திஸ்ஸோ வேத³னாதி. அயமேவ பபே⁴தோ³ லப்³ப⁴தி, ந அஞ்ஞோ.

    Tikadvayavidhinti kusalattikavedanāttikavidhiṃ. Āpattiṃ āpajjamāno hi akusalacitto vā āpajjati kusalābyākatacitto vā, tathā dukkhavedanāsamaṅgī vā itaravedanādvayasamaṅgī vā. Evaṃ santepi sabbasikkhāpadesu akusalacittavasena ekaṃ cittaṃ, kusalābyākatacittavasena dve cittāni, sabbesaṃ vasena tīṇi cittāni. Dukkhavedanāvasena ekā vedanā, sukhaupekkhāvasena dve, sabbāsaṃ vasena tisso vedanāti. Ayameva pabhedo labbhati, na añño.

    லக்க²ணங் ஸத்தரஸதா⁴, டி²தங் ஸாதா⁴ரணங் இத³ங், ஞத்வாதி இத³ங் நிதா³னாதி³வேத³னாத்திகபரியோஸானங் ஸத்தரஸப்பகாரங் லக்க²ணங் ஜானித்வா யோஜெய்ய மேதா⁴வீ. தத்த² தத்த² யதா²ரஹந்தி பண்டி³தோ பி⁴க்கு² தஸ்மிங் தஸ்மிங் ஸிக்கா²பதே³ இத³ங் லக்க²ணங் யதா²னுரூபங் யோஜெய்யாதி அத்தோ². தங் பன அயோஜிதங் து³ப்³பி³ஜானங் ஹோதி, தஸ்மா நங் ஸப்³ப³ஸிக்கா²பதா³னங் அஸாதா⁴ரணவினிச்ச²யபரியோஸானே இமங் மாதிகங் அனுத்³த⁴ரித்வாவ யோஜெத்வா த³ஸ்ஸயிஸ்ஸாம.

    Lakkhaṇaṃ sattarasadhā, ṭhitaṃ sādhāraṇaṃ idaṃ, ñatvāti idaṃ nidānādivedanāttikapariyosānaṃ sattarasappakāraṃ lakkhaṇaṃ jānitvā yojeyya medhāvī. Tattha tattha yathārahanti paṇḍito bhikkhu tasmiṃ tasmiṃ sikkhāpade idaṃ lakkhaṇaṃ yathānurūpaṃ yojeyyāti attho. Taṃ pana ayojitaṃ dubbijānaṃ hoti, tasmā naṃ sabbasikkhāpadānaṃ asādhāraṇavinicchayapariyosāne imaṃ mātikaṃ anuddharitvāva yojetvā dassayissāma.

    இத⁴ பனஸ்ஸ அயங் யோஜனா – இத³ங் வேஸாலியங் ஸுதி³ன்னத்தே²ரங் ஆரப்³ப⁴ மேது²னவீதிக்கமவத்து²ஸ்மிங் பஞ்ஞத்தங். ‘‘மேது²னங் த⁴ம்மங் படிஸேவெய்யா’’தி அயமெத்த² பஞ்ஞத்தி, ‘‘ஸிக்க²ங் அபச்சக்கா²யா’’தி ச ‘‘அந்தமஸோ திரச்சா²னக³தாயபீ’’தி ச த்³வே அனுபஞ்ஞத்தியோ. அனுபஞ்ஞத்தி ச நாமேஸா ஆபத்திகரா ச ஹோதி அஞ்ஞவாத³கஸிக்கா²பதா³தீ³ஸு (பாசி॰ 95 ஆத³யோ) விய, அனாபத்திகரா ச அஞ்ஞத்ர ஸுபினந்தாதிஆதீ³ஸு (பாரா॰ 236-237) விய, ஆபத்திஉபத்த²ம்ப⁴கரா ச அதி³ன்னாதா³னாதீ³ஸு (பாரா॰ 91) விய , இத⁴ பன உபத்த²ம்ப⁴கராதி வேதி³தப்³பா³. இதோ பரங் பன யத்த² அனுபஞ்ஞத்தி அத்தி², தத்த² ‘‘அயங் அனுபஞ்ஞத்தீ’’தி எத்தகமேவ த³ஸ்ஸயிஸ்ஸாம. ட²பெத்வா பன அனுபஞ்ஞத்திங் அவஸேஸா பஞ்ஞத்தியேவாதி ஸப்³ப³த்த² வினிச்ச²யோ வேதி³தப்³போ³. பி⁴க்கு²ங் ஆரப்³ப⁴ உப்பன்னவத்து²ஸ்மிங்யேவ ‘‘யா பன பி⁴க்கு²னீ ச²ந்த³ஸோ மேது²னங் த⁴ம்மங் படிஸேவெய்யா’’தி ஏவங் பி⁴க்கு²னீனம்பி பஞ்ஞத்திதோ ஸாதா⁴ரணபஞ்ஞத்தி. ஆணத்தியா அனாபஜ்ஜனதோ அனாணத்திகங். பி⁴க்கு²ங் பன ஆணாபெந்தோ அகப்பியஸமாதா³னாபத்திதோ ந முச்சதி, மேது²னராகே³ன காயஸங்ஸக்³கே³ து³க்கடங், ஜீவமானகஸரீரஸ்ஸ வுத்தப்பகாரே மக்³கே³ ஸசேபி தசாதீ³னி அனவஸேஸெத்வா ஸப்³ப³ஸோ சி²ன்னே நிமித்தஸண்டா²னமத்தங் பஞ்ஞாயதி, தத்த² அந்தமஸோ அங்க³ஜாதே உட்டி²தங் அனட்ட²காயப்பஸாத³ங் பீளகங் வா சம்மகி²லங் வா பவேஸெந்தஸ்ஸாபி ஸேவனசித்தே ஸதி பாராஜிகங், நட்ட²காயப்பஸாத³ங் ஸுக்க²பீளகங் வா மதசம்மங் வா லோமங் வா பவேஸெந்தஸ்ஸ து³க்கடங், ஸசே நிமித்தஸண்டா²னமத்தம்பி அனவஸேஸெத்வா ஸப்³ப³ஸோ மக்³கோ³ உப்பாடிதோ, தத்த² உபக்கமதோ வணஸங்கே²பவஸேன து²ல்லச்சயங், ததா² மனுஸ்ஸானங் அக்கி²னாஸாகண்ணச்சி²த்³த³வத்தி²கோஸேஸு ஸத்த²கேன கதவணே வா, ஹத்தி²அஸ்ஸாதீ³னஞ்ச திரச்சா²னானங் வத்தி²கோஸனாஸாபுடேஸு து²ல்லச்சயங். திரச்சா²னானங் பன அக்கி²கண்ணனாஸாவணேஸு அஹிமச்சா²தீ³னங் பவேஸனப்பமாணவிரஹிதே அணுனிமித்தே ஸப்³பே³ஸஞ்ச உபகச்ச²காதீ³ஸு ஸேஸஸரீரேஸு து³க்கடங். மதஸரீரே நிமித்தே உபட்³ட⁴க்கா²யிததோ பட்டா²ய யாவ ந குதி²தங் ஹோதி, தாவ து²ல்லச்சயங். குதி²தே து³க்கடங், ததா² வட்டகதே முகே² அச்சு²பந்தங் அங்க³ஜாதங் பவேஸெந்தஸ்ஸ து³க்கடங். ஒட்ட²தோ ப³ஹி நிக்க²ந்தஜிவ்ஹாய வா த³ந்தேஸு வா து²ல்லச்சயங். நிமித்ததோ ப³ஹி பதிதமங்ஸபேஸியங் து³க்கடந்தி அயமெத்த² ஆபத்திபே⁴தோ³.

    Idha panassa ayaṃ yojanā – idaṃ vesāliyaṃ sudinnattheraṃ ārabbha methunavītikkamavatthusmiṃ paññattaṃ. ‘‘Methunaṃ dhammaṃ paṭiseveyyā’’ti ayamettha paññatti, ‘‘sikkhaṃ apaccakkhāyā’’ti ca ‘‘antamaso tiracchānagatāyapī’’ti ca dve anupaññattiyo. Anupaññatti ca nāmesā āpattikarā ca hoti aññavādakasikkhāpadādīsu (pāci. 95 ādayo) viya, anāpattikarā ca aññatra supinantātiādīsu (pārā. 236-237) viya, āpattiupatthambhakarā ca adinnādānādīsu (pārā. 91) viya , idha pana upatthambhakarāti veditabbā. Ito paraṃ pana yattha anupaññatti atthi, tattha ‘‘ayaṃ anupaññattī’’ti ettakameva dassayissāma. Ṭhapetvā pana anupaññattiṃ avasesā paññattiyevāti sabbattha vinicchayo veditabbo. Bhikkhuṃ ārabbha uppannavatthusmiṃyeva ‘‘yā pana bhikkhunī chandaso methunaṃ dhammaṃ paṭiseveyyā’’ti evaṃ bhikkhunīnampi paññattito sādhāraṇapaññatti. Āṇattiyā anāpajjanato anāṇattikaṃ. Bhikkhuṃ pana āṇāpento akappiyasamādānāpattito na muccati, methunarāgena kāyasaṃsagge dukkaṭaṃ, jīvamānakasarīrassa vuttappakāre magge sacepi tacādīni anavasesetvā sabbaso chinne nimittasaṇṭhānamattaṃ paññāyati, tattha antamaso aṅgajāte uṭṭhitaṃ anaṭṭhakāyappasādaṃ pīḷakaṃ vā cammakhilaṃ vā pavesentassāpi sevanacitte sati pārājikaṃ, naṭṭhakāyappasādaṃ sukkhapīḷakaṃ vā matacammaṃ vā lomaṃ vā pavesentassa dukkaṭaṃ, sace nimittasaṇṭhānamattampi anavasesetvā sabbaso maggo uppāṭito, tattha upakkamato vaṇasaṅkhepavasena thullaccayaṃ, tathā manussānaṃ akkhināsākaṇṇacchiddavatthikosesu satthakena katavaṇe vā, hatthiassādīnañca tiracchānānaṃ vatthikosanāsāpuṭesu thullaccayaṃ. Tiracchānānaṃ pana akkhikaṇṇanāsāvaṇesu ahimacchādīnaṃ pavesanappamāṇavirahite aṇunimitte sabbesañca upakacchakādīsu sesasarīresu dukkaṭaṃ. Matasarīre nimitte upaḍḍhakkhāyitato paṭṭhāya yāva na kuthitaṃ hoti, tāva thullaccayaṃ. Kuthite dukkaṭaṃ, tathā vaṭṭakate mukhe acchupantaṃ aṅgajātaṃ pavesentassa dukkaṭaṃ. Oṭṭhato bahi nikkhantajivhāya vā dantesu vā thullaccayaṃ. Nimittato bahi patitamaṃsapesiyaṃ dukkaṭanti ayamettha āpattibhedo.

    அஜானந்தஸ்ஸ அஸாதி³யந்தஸ்ஸ உம்மத்தகஸ்ஸ கி²த்தசித்தஸ்ஸ வேத³னாட்டஸ்ஸ ஆதி³கம்மிகானஞ்ச அனாபத்தி. எத்த² பன யோ நித்³த³ங் ஓக்கந்தத்தா பரேன கதம்பி உபக்கமங் ந ஜானாதி, ஸோ அஜானந்தோ. யோ ஜானித்வாபி ந ஸாதி³யதி, ஸோ அஸாதி³யந்தோ. யோ பித்தவஸேன அதேகிச்ச²ங் உம்மாத³ங் பத்தோ, ஸோ உம்மத்தகோ. யக்கே²ஹி கதசித்தவிக்கே²போ கி²த்தசித்தோ. த்³வின்னம்பி ச ஏதேஸங் அக்³கி³ஸுவண்ணகூ³த²சந்த³னாதீ³ஸு ஸமப்பவத்திபா⁴வேன அஜானநபா⁴வோவ பமாணங். யோ அதி⁴மத்தவேத³னாய ஆதுரத்தா கிஞ்சி ந ஜானாதி, ஸோ வேத³னாட்டோ. யோ தஸ்மிங் தஸ்மிங் வத்து²ஸ்மிங் ஆதி³பூ⁴தோ, ஸோ ஆதி³கம்மிகோ. அயங் பன அனாபத்தி. சதூஸு விபத்தீஸு ஸீலவிபத்தி. தஸ்ஸா த்³வே அங்கா³னி ஸேவனசித்தஞ்ச மக்³கே³ன மக்³க³படிபாத³னஞ்சாதி. ஸமுட்டா²னாதி³தோ இத³ங் ஸிக்கா²பத³ங் பட²மபாராஜிகஸமுட்டா²னங், கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், அகுஸலசித்தங், த்³விவேத³னந்தி, இமானி ச ஸமுட்டா²னாதீ³னி நாம ஆபத்தியா ஹொந்தி, ந ஸிக்கா²பத³ஸ்ஸ. வோஹாரஸுக²த்த²ங் பன ஸப்³ப³ட்ட²கதா²ஸு ஸிக்கா²பத³ஸீஸேன தே³ஸனா ஆக³தா, தஸ்மா அஞ்ஞேஸுபி ஏவரூபேஸு டா²னேஸு ப்³யஞ்ஜனே ஆத³ரங் அகத்வா அதி⁴ப்பேதமேவ க³ஹேதப்³ப³ங்.

    Ajānantassa asādiyantassa ummattakassa khittacittassa vedanāṭṭassa ādikammikānañca anāpatti. Ettha pana yo niddaṃ okkantattā parena katampi upakkamaṃ na jānāti, so ajānanto. Yo jānitvāpi na sādiyati, so asādiyanto. Yo pittavasena atekicchaṃ ummādaṃ patto, so ummattako. Yakkhehi katacittavikkhepo khittacitto. Dvinnampi ca etesaṃ aggisuvaṇṇagūthacandanādīsu samappavattibhāvena ajānanabhāvova pamāṇaṃ. Yo adhimattavedanāya āturattā kiñci na jānāti, so vedanāṭṭo. Yo tasmiṃ tasmiṃ vatthusmiṃ ādibhūto, so ādikammiko. Ayaṃ pana anāpatti. Catūsu vipattīsu sīlavipatti. Tassā dve aṅgāni sevanacittañca maggena maggapaṭipādanañcāti. Samuṭṭhānādito idaṃ sikkhāpadaṃ paṭhamapārājikasamuṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, dvivedananti, imāni ca samuṭṭhānādīni nāma āpattiyā honti, na sikkhāpadassa. Vohārasukhatthaṃ pana sabbaṭṭhakathāsu sikkhāpadasīsena desanā āgatā, tasmā aññesupi evarūpesu ṭhānesu byañjane ādaraṃ akatvā adhippetameva gahetabbaṃ.

    அத்த²ஞ்ஹி நாதோ² ஸரணங் அவோச;

    Atthañhi nātho saraṇaṃ avoca;

    ந ப்³யஞ்ஜனங் லோகஹிதோ மஹேஸீ.

    Na byañjanaṃ lokahito mahesī.

    தஸ்மா அகத்வா ரதிமக்க²ரேஸு;

    Tasmā akatvā ratimakkharesu;

    அத்தே² நிவேஸெய்ய மதிங் முதீமாதி.

    Atthe niveseyya matiṃ mutīmāti.

    பட²மபாராஜிகவண்ணனா நிட்டி²தா.

    Paṭhamapārājikavaṇṇanā niṭṭhitā.

    2. து³தியபாராஜிகவண்ணனா

    2. Dutiyapārājikavaṇṇanā

    து³தியே கா³மா வா அரஞ்ஞாவாதி எத்த² ஸப்³போ³பி ஏககுடிகாதி³பே⁴தோ³ பரிக்கி²த்தோ வா அபரிக்கி²த்தோ வா ஸமனுஸ்ஸோ வா அமனுஸ்ஸோ வா அந்தமஸோ அதிரேகசாதுமாஸனிவிட்டோ² யோ கோசி ஸத்தோ²பி ‘‘கா³மோ’’தி வேதி³தப்³போ³. ட²பெத்வா கா³மஞ்ச கா³மூபசாரஞ்ச அவஸேஸங் அரஞ்ஞங் நாம. தத்த² அஸம்மோஹத்த²ங் க⁴ரங் க⁴ரூபசாரோ கா³மோ கா³மூபசாரோதி அயங் விபா⁴கோ³ வேதி³தப்³போ³. நிப்³ப³கோஸஸ்ஸ ஹி உத³கபதனட்டா²னப்³ப⁴ந்தரங் க⁴ரங் நாம. யங் பன த்³வாரே டி²தோ மாதுகா³மோ பா⁴ஜனதோ⁴வனஉத³கங் ச²ட்³டே³தி, தஸ்ஸ பதனட்டா²னஞ்ச மாதுகா³மேனேவ அந்தோகே³ஹே டி²தேன பகதியா ப³ஹி கி²த்தஸ்ஸ ஸுப்பஸ்ஸ வா ஸங்முஞ்ஜனியா வா பதனட்டா²னஞ்ச க⁴ரஸ்ஸ புரதோ த்³வீஸு கோணேஸு ஸம்ப³ந்தி⁴த்வா மஜ்ஜே² ருக்க²ஸூசித்³வாரங் ட²பெத்வா கோ³ரூபானங் பவேஸனநிவாரணத்த²ங் கதபரிக்கே²போ ச அயங் ஸப்³போ³பி க⁴ரூபசாரோ நாம. யங் பன ஸப்³ப³ந்திமங் க⁴ரங் ஹோதி, தஸ்ஸ க⁴ரஸ்ஸ தாதி³ஸே க⁴ரூபசாரே டி²தஸ்ஸ தா²மமஜ்ஜி²மஸ்ஸ புரிஸஸ்ஸ யதா² தருணமனுஸ்ஸா அத்தனோ ப³லங் த³ஸ்ஸெந்தோ பா³ஹுங் பஸாரெத்வா லெட்³டு³ங் கி²பந்தி, ஏவங் கி²த்தஸ்ஸ லெட்³டு³ஸ்ஸ பதனட்டா²னப்³ப⁴ந்தரங் கா³மோ நாம. ததோ அஞ்ஞஸ்ஸ லெட்³டு³பாதஸ்ஸ அப்³ப⁴ந்தரங் கா³மூபசாரோ நாம. பதிதஸ்ஸ பன லெட்³டு³னோ பவத்தித்வா க³தட்டா²னங் ந க³ஹேதப்³ப³ங். பரிக்கி²த்தஸ்ஸ பன கா³மஸ்ஸ பரிக்கே²போயேவ கா³மஸ்ஸ பரிச்சே²தோ³, தஸ்ஸ ஸசே த்³வே இந்த³கி²லா ஹொந்தி அப்³ப⁴ந்தரிமே இந்த³கி²லே டி²தஸ்ஸ லெட்³டு³பாதப்³ப⁴ந்தரங் கா³மூபசாரோ நாம. பத³பா⁴ஜனேபி (பாரா॰ 92) ஹி இமினாவ நயேன அத்தோ² வேதி³தப்³போ³. தத்த² ய்வாயங் அபரிக்கி²த்தஸ்ஸ கா³மஸ்ஸ உபசாரோ த³ஸ்ஸிதோ, தஸ்ஸ வஸேன விகாலே கா³மப்பவேஸனாதீ³ஸு ஆபத்தி பரிச்சி²ந்தி³தப்³பா³. இதி இமங் ட²பெத்வா கா³மஞ்ச கா³மூபசாரஞ்ச அவஸேஸங் இமஸ்மிங் ஸிக்கா²பதே³ அரஞ்ஞங் நாம. தே³ஸனாமத்தமேவ சேதங் ‘‘கா³மா வா அரஞ்ஞாவா’’தி. யே பன இமேஸங் பரிச்சே²த³த³ஸ்ஸனத்த²ங் க⁴ரக⁴ரூபசாரகா³மூபசாரா வுத்தா, ததோபி பாராஜிகவத்து²ங் அவஹரந்தஸ்ஸ பாராஜிகங் ஹோதியேவ.

    Dutiye gāmā vā araññāvāti ettha sabbopi ekakuṭikādibhedo parikkhitto vā aparikkhitto vā samanusso vā amanusso vā antamaso atirekacātumāsaniviṭṭho yo koci satthopi ‘‘gāmo’’ti veditabbo. Ṭhapetvā gāmañca gāmūpacārañca avasesaṃ araññaṃ nāma. Tattha asammohatthaṃ gharaṃ gharūpacāro gāmo gāmūpacāroti ayaṃ vibhāgo veditabbo. Nibbakosassa hi udakapatanaṭṭhānabbhantaraṃ gharaṃ nāma. Yaṃ pana dvāre ṭhito mātugāmo bhājanadhovanaudakaṃ chaḍḍeti, tassa patanaṭṭhānañca mātugāmeneva antogehe ṭhitena pakatiyā bahi khittassa suppassa vā saṃmuñjaniyā vā patanaṭṭhānañca gharassa purato dvīsu koṇesu sambandhitvā majjhe rukkhasūcidvāraṃ ṭhapetvā gorūpānaṃ pavesananivāraṇatthaṃ kataparikkhepo ca ayaṃ sabbopi gharūpacāro nāma. Yaṃ pana sabbantimaṃ gharaṃ hoti, tassa gharassa tādise gharūpacāre ṭhitassa thāmamajjhimassa purisassa yathā taruṇamanussā attano balaṃ dassento bāhuṃ pasāretvā leḍḍuṃ khipanti, evaṃ khittassa leḍḍussa patanaṭṭhānabbhantaraṃ gāmo nāma. Tato aññassa leḍḍupātassa abbhantaraṃ gāmūpacāro nāma. Patitassa pana leḍḍuno pavattitvā gataṭṭhānaṃ na gahetabbaṃ. Parikkhittassa pana gāmassa parikkhepoyeva gāmassa paricchedo, tassa sace dve indakhilā honti abbhantarime indakhile ṭhitassa leḍḍupātabbhantaraṃ gāmūpacāro nāma. Padabhājanepi (pārā. 92) hi imināva nayena attho veditabbo. Tattha yvāyaṃ aparikkhittassa gāmassa upacāro dassito, tassa vasena vikāle gāmappavesanādīsu āpatti paricchinditabbā. Iti imaṃ ṭhapetvā gāmañca gāmūpacārañca avasesaṃ imasmiṃ sikkhāpade araññaṃ nāma. Desanāmattameva cetaṃ ‘‘gāmā vā araññāvā’’ti. Ye pana imesaṃ paricchedadassanatthaṃ gharagharūpacāragāmūpacārā vuttā, tatopi pārājikavatthuṃ avaharantassa pārājikaṃ hotiyeva.

    அதி³ன்னந்தி அஞ்ஞஸ்ஸ மனுஸ்ஸஜாதிகஸ்ஸ ஸந்தகங். தெ²ய்யஸங்கா²தந்தி எத்த² தே²னோதி சோரோ, தே²னஸ்ஸ பா⁴வோ தெ²ய்யங், அவஹரணசித்தஸ்ஸேதங் நாமங். ஸங்கா² ஸங்கா²தந்தி அத்த²தோ ஏகங், கொட்டா²ஸஸ்ஸேதங் நாமங் ‘‘ஸஞ்ஞானிதா³னா ஹி பபஞ்சஸங்கா²’’திஆதீ³ஸு (ஸு॰ நி॰ 880; மஹானி॰ 109) விய. தெ²ய்யஞ்ச தங் ஸங்கா²தஞ்சாதி தெ²ய்யஸங்கா²தங், தெ²ய்யசித்தஸங்கா²தோ ஏகோ சித்தகொட்டா²ஸோதி அத்தோ². கரணத்தே² சேதங் பச்சத்தவசனங், தஸ்மா தெ²ய்யஸங்கா²தேனாதி அத்த²தோ த³ட்ட²ப்³ப³ங். யோ ச தெ²ய்யஸங்கா²தேன ஆதி³யதி, ஸோ யஸ்மா தெ²ய்யசித்தோ ஹோதி, தஸ்மா ப்³யஞ்ஜனங் அனாதி³யித்வா அத்த²மேவ த³ஸ்ஸேதுங் ‘‘தெ²ய்யசித்தோ அவஹரணசித்தோ’’தி (பாரா॰ 92) ஏவமஸ்ஸ பத³பா⁴ஜனங் வுத்தந்தி வேதி³தப்³ப³ங்.

    Adinnanti aññassa manussajātikassa santakaṃ. Theyyasaṅkhātanti ettha thenoti coro, thenassa bhāvo theyyaṃ, avaharaṇacittassetaṃ nāmaṃ. Saṅkhā saṅkhātanti atthato ekaṃ, koṭṭhāsassetaṃ nāmaṃ ‘‘saññānidānā hi papañcasaṅkhā’’tiādīsu (su. ni. 880; mahāni. 109) viya. Theyyañca taṃ saṅkhātañcāti theyyasaṅkhātaṃ, theyyacittasaṅkhāto eko cittakoṭṭhāsoti attho. Karaṇatthe cetaṃ paccattavacanaṃ, tasmā theyyasaṅkhātenāti atthato daṭṭhabbaṃ. Yo ca theyyasaṅkhātena ādiyati, so yasmā theyyacitto hoti, tasmā byañjanaṃ anādiyitvā atthameva dassetuṃ ‘‘theyyacitto avaharaṇacitto’’ti (pārā. 92) evamassa padabhājanaṃ vuttanti veditabbaṃ.

    ஆதி³யெய்யாதி பஞ்சவீஸதியா அவஹாரானங் அஞ்ஞதரவஸேன ஹரெய்ய. தே பன அவஹாரா பஞ்ச பஞ்சகானி ஸமோதா⁴னெத்வா ஸாது⁴கங் ஸல்லக்கே²தப்³பா³. பஞ்ச பஞ்சகானி நாம நானாப⁴ண்ட³பஞ்சகங் ஏகப⁴ண்ட³பஞ்சகங் ஸாஹத்தி²கபஞ்சகங் புப்³ப³பயோக³பஞ்சகங் தெ²ய்யாவஹாரபஞ்சகந்தி. தத்த² புரிமானி த்³வே பஞ்சகானி ஏதஸ்ஸேவ பத³ஸ்ஸ பத³பா⁴ஜனே வுத்தானங் ‘‘ஆதி³யெய்ய ஹரெய்ய அவஹரெய்ய இரியாபத²ங் விகோபெய்ய டா²னா சாவெய்யா’’தி இமேஸங் பதா³னங் வஸேன லப்³ப⁴ந்தி. தத்த² நானாப⁴ண்ட³பஞ்சகங் ஸவிஞ்ஞாணகாவிஞ்ஞாணகவஸேன த³ட்ட²ப்³ப³ங், இதரங் ஸவிஞ்ஞாணகவஸேனேவ. கத²ங்? ஆதி³யெய்யாதி ஆராமங் அபி⁴யுஞ்ஜதி, ஆபத்தி து³க்கடஸ்ஸ. ஸாமிகஸ்ஸ விமதிங் உப்பாதே³தி, ஆபத்தி து²ல்லச்சயஸ்ஸ. ஸாமிகோ ‘‘ந மய்ஹங் ப⁴விஸ்ஸதீ’’தி து⁴ரங் நிக்கி²பதி, ஆபத்தி பாராஜிகஸ்ஸ. ஹரெய்யாதி அஞ்ஞஸ்ஸ ப⁴ண்ட³ங் ஹரந்தோ ஸீஸே பா⁴ரங் தெ²ய்யசித்தோ ஆமஸதி, து³க்கடங். ப²ந்தா³பேதி, து²ல்லச்சயங். க²ந்த⁴ங் ஓரோபேதி, பாராஜிகங். அவஹரெய்யாதி உபனிக்கி²த்தங் ப⁴ண்ட³ங் ‘‘தே³ஹி மே ப⁴ண்ட³’’ந்தி வுச்சமானோ ‘‘நாஹங் க³ண்ஹாமீ’’தி ப⁴ணதி, து³க்கடங். ஸாமிகஸ்ஸ விமதிங் உப்பாதே³தி, து²ல்லச்சயங். ஸாமிகோ ‘‘ந மய்ஹங் ப⁴விஸ்ஸதீ’’தி து⁴ரங் நிக்கி²பதி, பாராஜிகங். இரியாபத²ங் விகோபெய்யாதி ‘‘ஸஹ ப⁴ண்ட³ஹாரகங் நெஸ்ஸாமீ’’தி பட²மங் பாத³ங் அதிக்காமேதி, து²ல்லச்சயங். து³தியங் பாத³ங் அதிக்காமேதி, பாராஜிகங். டா²னா சாவெய்யாதி த²லட்ட²ங் ப⁴ண்ட³ங் தெ²ய்யசித்தோ ஆமஸதி, து³க்கடங். ப²ந்தா³பேதி, து²ல்லச்சயங். டா²னா சாவேதி, பாராஜிகங். ஏவங் தாவ நானாப⁴ண்ட³பஞ்சகங் வேதி³தப்³ப³ங். ஸஸாமிகஸ்ஸ பன தா³ஸஸ்ஸ வா திரச்சா²னக³தஸ்ஸ வா யதா²வுத்தேன அபி⁴யோகா³தி³னா நயேன ஆதி³யனஹரணஅவஹரணஇரியாபத²விகோபனடா²னாசாவனவஸேன ஏகப⁴ண்ட³பஞ்சகங் வேதி³தப்³ப³ங்.

    Ādiyeyyāti pañcavīsatiyā avahārānaṃ aññataravasena hareyya. Te pana avahārā pañca pañcakāni samodhānetvā sādhukaṃ sallakkhetabbā. Pañca pañcakāni nāma nānābhaṇḍapañcakaṃ ekabhaṇḍapañcakaṃ sāhatthikapañcakaṃ pubbapayogapañcakaṃ theyyāvahārapañcakanti. Tattha purimāni dve pañcakāni etasseva padassa padabhājane vuttānaṃ ‘‘ādiyeyya hareyya avahareyya iriyāpathaṃ vikopeyya ṭhānā cāveyyā’’ti imesaṃ padānaṃ vasena labbhanti. Tattha nānābhaṇḍapañcakaṃ saviññāṇakāviññāṇakavasena daṭṭhabbaṃ, itaraṃ saviññāṇakavaseneva. Kathaṃ? Ādiyeyyāti ārāmaṃ abhiyuñjati, āpatti dukkaṭassa. Sāmikassa vimatiṃ uppādeti, āpatti thullaccayassa. Sāmiko ‘‘na mayhaṃ bhavissatī’’ti dhuraṃ nikkhipati, āpatti pārājikassa. Hareyyāti aññassa bhaṇḍaṃ haranto sīse bhāraṃ theyyacitto āmasati, dukkaṭaṃ. Phandāpeti, thullaccayaṃ. Khandhaṃ oropeti, pārājikaṃ. Avahareyyāti upanikkhittaṃ bhaṇḍaṃ ‘‘dehi me bhaṇḍa’’nti vuccamāno ‘‘nāhaṃ gaṇhāmī’’ti bhaṇati, dukkaṭaṃ. Sāmikassa vimatiṃ uppādeti, thullaccayaṃ. Sāmiko ‘‘na mayhaṃ bhavissatī’’ti dhuraṃ nikkhipati, pārājikaṃ. Iriyāpathaṃ vikopeyyāti ‘‘saha bhaṇḍahārakaṃ nessāmī’’ti paṭhamaṃ pādaṃ atikkāmeti, thullaccayaṃ. Dutiyaṃ pādaṃ atikkāmeti, pārājikaṃ. Ṭhānā cāveyyāti thalaṭṭhaṃ bhaṇḍaṃ theyyacitto āmasati, dukkaṭaṃ. Phandāpeti, thullaccayaṃ. Ṭhānā cāveti, pārājikaṃ. Evaṃ tāva nānābhaṇḍapañcakaṃ veditabbaṃ. Sasāmikassa pana dāsassa vā tiracchānagatassa vā yathāvuttena abhiyogādinā nayena ādiyanaharaṇaavaharaṇairiyāpathavikopanaṭhānācāvanavasena ekabhaṇḍapañcakaṃ veditabbaṃ.

    கதமங் ஸாஹத்தி²கபஞ்சகங்? ஸாஹத்தி²கோ ஆணத்திகோ நிஸ்ஸக்³கி³யோ அத்த²ஸாத⁴கோ து⁴ரனிக்கே²போதி. தத்த² ஸாஹத்தி²கோ நாம பரஸ்ஸ ப⁴ண்ட³ங் ஸஹத்தா² அவஹரதி. ஆணத்திகோ நாம ‘‘அஸுகஸ்ஸ ப⁴ண்ட³ங் அவஹரா’’தி அஞ்ஞங் ஆணாபேதி. நிஸ்ஸக்³கி³யோ நாம ஸுங்ககா⁴தகபரிகப்பிதோகாஸானங் அந்தோ ட²த்வா ப³ஹி பாதனங். அத்த²ஸாத⁴கோ நாம ‘‘அஸுகஸ்ஸ ப⁴ண்ட³ங் யதா³ ஸக்கோதி, ததா³ தங் அவஹரா’’தி அஞ்ஞங் ஆணாபேதி. தத்த² ஸசே பரோ அனந்தராயிகோ ஹுத்வா தங் அவஹரதி, ஆணாபகஸ்ஸ ஆணத்திக்க²ணேயேவ பாராஜிகங். பரஸ்ஸ வா பன தேலகும்பி⁴யா பாத³க்³க⁴னகதேலங் அவஸ்ஸங் பிவனகானி உபாஹனாதீ³னி பக்கி²பதி, ஹத்த²தோ முத்தமத்தேயேவ பாராஜிகங். து⁴ரனிக்கே²போ பன ஆராமாபி⁴யோக³உபனிக்கி²த்தப⁴ண்ட³வஸேன வேதி³தப்³போ³. தாவகாலிகப⁴ண்ட³தெ³ய்யானி அதெ³ந்தஸ்ஸாபி ஏஸேவனயோதி இத³ங் ஸாஹத்தி²கபஞ்சகங்.

    Katamaṃ sāhatthikapañcakaṃ? Sāhatthiko āṇattiko nissaggiyo atthasādhako dhuranikkhepoti. Tattha sāhatthiko nāma parassa bhaṇḍaṃ sahatthā avaharati. Āṇattiko nāma ‘‘asukassa bhaṇḍaṃ avaharā’’ti aññaṃ āṇāpeti. Nissaggiyo nāma suṅkaghātakaparikappitokāsānaṃ anto ṭhatvā bahi pātanaṃ. Atthasādhako nāma ‘‘asukassa bhaṇḍaṃ yadā sakkoti, tadā taṃ avaharā’’ti aññaṃ āṇāpeti. Tattha sace paro anantarāyiko hutvā taṃ avaharati, āṇāpakassa āṇattikkhaṇeyeva pārājikaṃ. Parassa vā pana telakumbhiyā pādagghanakatelaṃ avassaṃ pivanakāni upāhanādīni pakkhipati, hatthato muttamatteyeva pārājikaṃ. Dhuranikkhepo pana ārāmābhiyogaupanikkhittabhaṇḍavasena veditabbo. Tāvakālikabhaṇḍadeyyāni adentassāpi esevanayoti idaṃ sāhatthikapañcakaṃ.

    கதமங் புப்³ப³பயோக³பஞ்சகங்? புப்³ப³பயோகோ³ ஸஹபயோகோ³ ஸங்விதா⁴வஹாரோ ஸங்கேதகம்மங் நிமித்தகம்மந்தி . தத்த² ஆணத்திவஸேன புப்³ப³பயோகோ³ வேதி³தப்³போ³. டா²னா சாவனவஸேன, கி²லாதீ³னி ஸங்காமெத்வா கெ²த்தாதி³க்³க³ஹணவஸேன ச ஸஹபயோகோ³ வேதி³தப்³போ³. ஸங்விதா⁴வஹாரோ நாம ‘‘அஸுகங் நாம ப⁴ண்ட³ங் அவஹரிஸ்ஸாமா’’தி ஸங்வித³ஹித்வா ஸங்மந்தயித்வா அவஹரணங். ஏவங் ஸங்வித³ஹித்வா க³தேஸு ஹி ஏகேனாபி தஸ்மிங் ப⁴ண்டே³ டா²னா சாவிதே ஸப்³பே³ஸங் அவஹாரா ஹொந்தி. ஸங்கேதகம்மங் நாம ஸஞ்ஜானநகம்மங். ஸசே ஹி புரேப⁴த்தாதீ³ஸு யங்கிஞ்சி காலங் பரிச்சி²ந்தி³த்வா ‘‘அஸுகஸ்மிங் காலே இத்த²ன்னாமங் ப⁴ண்ட³ங் அவஹரா’’தி வுத்தோ ஸங்கேததோ அபச்சா² அபுரே தங் அவஹரதி, ஸங்கேதகாரகஸ்ஸ ஸங்கேதகரணக்க²ணேயேவ அவஹாரோ. நிமித்தகம்மங் நாம ஸஞ்ஞுப்பாத³னத்த²ங் அக்கி²னிக்க²ணாதி³னிமித்தகரணங். ஸசே ஹி ஏவங் கதனிமித்ததோ அபச்சா² அபுரே ‘‘யங் அவஹரா’’தி வுத்தோ, தங் அவஹரதி, நிமித்தகாரகஸ்ஸ நிமித்தகரணக்க²ணேயேவ அவஹாரோதி இத³ங் புப்³ப³பயோக³பஞ்சகங்.

    Katamaṃ pubbapayogapañcakaṃ? Pubbapayogo sahapayogo saṃvidhāvahāro saṅketakammaṃ nimittakammanti . Tattha āṇattivasena pubbapayogo veditabbo. Ṭhānā cāvanavasena, khilādīni saṅkāmetvā khettādiggahaṇavasena ca sahapayogo veditabbo. Saṃvidhāvahāro nāma ‘‘asukaṃ nāma bhaṇḍaṃ avaharissāmā’’ti saṃvidahitvā saṃmantayitvā avaharaṇaṃ. Evaṃ saṃvidahitvā gatesu hi ekenāpi tasmiṃ bhaṇḍe ṭhānā cāvite sabbesaṃ avahārā honti. Saṅketakammaṃ nāma sañjānanakammaṃ. Sace hi purebhattādīsu yaṃkiñci kālaṃ paricchinditvā ‘‘asukasmiṃ kāle itthannāmaṃ bhaṇḍaṃ avaharā’’ti vutto saṅketato apacchā apure taṃ avaharati, saṅketakārakassa saṅketakaraṇakkhaṇeyeva avahāro. Nimittakammaṃ nāma saññuppādanatthaṃ akkhinikkhaṇādinimittakaraṇaṃ. Sace hi evaṃ katanimittato apacchā apure ‘‘yaṃ avaharā’’ti vutto, taṃ avaharati, nimittakārakassa nimittakaraṇakkhaṇeyeva avahāroti idaṃ pubbapayogapañcakaṃ.

    கதமங் தெ²ய்யாவஹாரபஞ்சகங்? தெ²ய்யாவஹாரோ பஸய்ஹாவஹாரோ பரிகப்பாவஹாரோ படிச்ச²ன்னாவஹாரோ குஸாவஹாரோதி. தத்த² யோ ஸந்தி⁴ச்சே²தா³தீ³னி கத்வா அதி³ஸ்ஸமானோ அவஹரதி, கூடமானகூடகஹாபணாதீ³ஹி வா வஞ்செத்வா க³ண்ஹாதி, தஸ்ஸேவங் க³ண்ஹதோ அவஹாரோ தெ²ய்யாவஹாரோதி வேதி³தப்³போ³. யோ பன பஸய்ஹ ப³லக்காரேன பரேஸங் ஸந்தகங் க³ண்ஹாதி கா³மகா⁴தகாத³யோ விய, அத்தனோ பத்தப³லிதோ வா வுத்தனயேனேவ அதி⁴கங் க³ண்ஹாதி ராஜப⁴டாத³யோ விய, தஸ்ஸேவங் க³ண்ஹதோ அவஹாரோ பஸய்ஹாவஹாரோதி வேதி³தப்³போ³. பரிகப்பெத்வா க³ஹணங் பன பரிகப்பாவஹாரோ நாம. ஸோ ப⁴ண்டோ³காஸவஸேன து³விதோ⁴. தத்ராயங் ப⁴ண்ட³பரிகப்போ – ஸாடகத்தி²கோ அந்தோக³ப்³ப⁴ங் பவிஸித்வா ‘‘ஸசே ஸாடகோ ப⁴விஸ்ஸதி, க³ண்ஹிஸ்ஸாமி, ஸசே ஸுத்தங், ந க³ண்ஹிஸ்ஸாமீ’’தி பரிகப்பெத்வா அந்த⁴காரே பஸிப்³ப³கங் க³ண்ஹாதி, தத்ர சே ஸாடகோ ஹோதி, உத்³தா⁴ரேயேவ பாராஜிகங். ஸுத்தங் சே ஹோதி, ரக்க²தி. ப³ஹி நீஹரித்வா முஞ்சித்வா ‘‘ஸுத்த’’ந்தி ஞத்வா புன ஆஹரித்வா ட²பேதி, ரக்க²தியேவ. ‘‘ஸுத்த’’ந்தி ஞத்வாபி ‘‘யங் லத்³த⁴ங், தங் க³ஹேதப்³ப³’’ந்தி க³ச்ச²தி, பத³வாரேன காரேதப்³போ³. பூ⁴மியங் ட²பெத்வா க³ண்ஹாதி, உத்³தா⁴ரே பாராஜிகங். ‘‘சோரோ சோரோ’’தி அனுப³ந்தோ⁴ ச²ட்டெத்வா பலாயதி, ரக்க²தி. ஸாமிகா தி³ஸ்வா க³ண்ஹந்தி, ரக்க²தி யேவ. அஞ்ஞோ சே கோசி க³ண்ஹாதி, ப⁴ண்ட³தெ³ய்யங். ஸாமிகேஸு நிவத்தேஸு ஸயங் தி³ஸ்வா பங்ஸுகூலஸஞ்ஞாய ‘‘பகே³வேதங் மயா க³ஹிதங், மம தா³னி ஸந்தக’’ந்தி க³ண்ஹந்தஸ்ஸாபி ப⁴ண்ட³தெ³ய்யமேவ. தத்த² ய்வாயங் ‘‘ஸசே ஸாடகோ ப⁴விஸ்ஸதி, க³ண்ஹிஸ்ஸாமீ’’திஆதி³னா நயேன பவத்தோ பரிகப்போ, அயங் ப⁴ண்ட³பரிகப்போ நாம.

    Katamaṃ theyyāvahārapañcakaṃ? Theyyāvahāro pasayhāvahāro parikappāvahāro paṭicchannāvahāro kusāvahāroti. Tattha yo sandhicchedādīni katvā adissamāno avaharati, kūṭamānakūṭakahāpaṇādīhi vā vañcetvā gaṇhāti, tassevaṃ gaṇhato avahāro theyyāvahāroti veditabbo. Yo pana pasayha balakkārena paresaṃ santakaṃ gaṇhāti gāmaghātakādayo viya, attano pattabalito vā vuttanayeneva adhikaṃ gaṇhāti rājabhaṭādayo viya, tassevaṃ gaṇhato avahāro pasayhāvahāroti veditabbo. Parikappetvā gahaṇaṃ pana parikappāvahāro nāma. So bhaṇḍokāsavasena duvidho. Tatrāyaṃ bhaṇḍaparikappo – sāṭakatthiko antogabbhaṃ pavisitvā ‘‘sace sāṭako bhavissati, gaṇhissāmi, sace suttaṃ, na gaṇhissāmī’’ti parikappetvā andhakāre pasibbakaṃ gaṇhāti, tatra ce sāṭako hoti, uddhāreyeva pārājikaṃ. Suttaṃ ce hoti, rakkhati. Bahi nīharitvā muñcitvā ‘‘sutta’’nti ñatvā puna āharitvā ṭhapeti, rakkhatiyeva. ‘‘Sutta’’nti ñatvāpi ‘‘yaṃ laddhaṃ, taṃ gahetabba’’nti gacchati, padavārena kāretabbo. Bhūmiyaṃ ṭhapetvā gaṇhāti, uddhāre pārājikaṃ. ‘‘Coro coro’’ti anubandho chaṭṭetvā palāyati, rakkhati. Sāmikā disvā gaṇhanti, rakkhati yeva. Añño ce koci gaṇhāti, bhaṇḍadeyyaṃ. Sāmikesu nivattesu sayaṃ disvā paṃsukūlasaññāya ‘‘pagevetaṃ mayā gahitaṃ, mama dāni santaka’’nti gaṇhantassāpi bhaṇḍadeyyameva. Tattha yvāyaṃ ‘‘sace sāṭako bhavissati, gaṇhissāmī’’tiādinā nayena pavatto parikappo, ayaṃ bhaṇḍaparikappo nāma.

    ஓகாஸபரிகப்போ பன ஏவங் வேதி³தப்³போ³ – ஏகச்சோ பன பரபரிவேணாதீ³னி பவிட்டோ² கிஞ்சி லோப⁴னெய்யங் ப⁴ண்ட³ங் தி³ஸ்வா க³ப்³ப⁴த்³வாரபமுக²ஹெட்டா²பாஸாத³த்³வாரகொட்ட²கருக்க²மூலாதி³வஸேன பரிச்சே²த³ங் கத்வா ‘‘ஸசே மங் எத்த²ந்தரே பஸ்ஸிஸ்ஸந்தி, த³ட்டு²காமதாய க³ஹெத்வா விசரந்தோ விய த³ஸ்ஸாமி, நோ சே பஸ்ஸிஸ்ஸந்தி, ஹரிஸ்ஸாமீ’’தி பரிகப்பேதி, தஸ்ஸ தங் ஆதா³ய பரிகப்பிதபரிச்சே²த³ங் அதிக்கந்தமத்தே அவஹாரோ ஹோதி. இதி ய்வாயங் வுத்தனயேனேவ பவத்தோ பரிகப்போ, அயங் ஓகாஸபரிகப்போ நாம. ஏவமிமேஸங் த்³வின்னம்பி பரிகப்பானங் வஸேன பரிகப்பெத்வா க³ண்ஹதோ அவஹாரோ ‘‘பரிகப்பாவஹாரோ’’தி வேதி³தப்³போ³.

    Okāsaparikappo pana evaṃ veditabbo – ekacco pana parapariveṇādīni paviṭṭho kiñci lobhaneyyaṃ bhaṇḍaṃ disvā gabbhadvārapamukhaheṭṭhāpāsādadvārakoṭṭhakarukkhamūlādivasena paricchedaṃ katvā ‘‘sace maṃ etthantare passissanti, daṭṭhukāmatāya gahetvā vicaranto viya dassāmi, no ce passissanti, harissāmī’’ti parikappeti, tassa taṃ ādāya parikappitaparicchedaṃ atikkantamatte avahāro hoti. Iti yvāyaṃ vuttanayeneva pavatto parikappo, ayaṃ okāsaparikappo nāma. Evamimesaṃ dvinnampi parikappānaṃ vasena parikappetvā gaṇhato avahāro ‘‘parikappāvahāro’’ti veditabbo.

    படிச்சா²தெ³த்வா பன அவஹரணங் படிச்ச²ன்னாவஹாரோ நாம. ஸோ ஏவங் வேதி³தப்³போ³ – யோ பி⁴க்கு² உய்யானாதீ³ஸு பரேஸங் ஓமுஞ்சித்வா ட²பிதஅங்கு³லிமுத்³தி³காதீ³னி தி³ஸ்வா ‘‘பச்சா² க³ண்ஹிஸ்ஸாமீ’’தி பங்ஸுனா வா பண்ணேன வா படிச்சா²தே³தி, தஸ்ஸ எத்தாவதா உத்³தா⁴ரோ நத்தீ²தி ந தாவ அவஹாரோ ஹோதி . யதா³ பன ஸாமிகா விசினந்தா அபஸ்ஸித்வா ‘‘ஸ்வே ஜானிஸ்ஸாமா’’தி ஸாலயாவ க³தா ஹொந்தி, அத²ஸ்ஸ தங் உத்³த⁴ரதோ உத்³தா⁴ரே அவஹாரோ. படிச்ச²ன்னகாலேயேவ ‘‘ஏதங் மம ஸந்தக’’ந்தி ஸகஸஞ்ஞாய வா ‘‘க³தா தா³னி தே, ச²ட்டிதப⁴ண்ட³ங் இத³’’ந்தி பங்ஸுகூலஸஞ்ஞாய வா க³ண்ஹந்தஸ்ஸ பன ப⁴ண்ட³தெ³ய்யங். தேஸு து³தியததியதி³வஸே ஆக³ந்த்வா விசினித்வா அதி³ஸ்வா து⁴ரனிக்கே²பங் கத்வா க³தேஸுபி க³ஹிதங் ப⁴ண்ட³தெ³ய்யமேவ. பச்சா² ஞத்வா சோதி³யமானஸ்ஸ அத³த³தோ ஸாமிகானங் து⁴ரனிக்கே²பே அவஹாரோ ஹோதி. கஸ்மா? யஸ்மா தஸ்ஸ பயோகே³ன தேஹி ந தி³ட்ட²ங். யோ பன ததா²ரூபங் ப⁴ண்ட³ங் யதா²டா²னே டி²தங்யேவ அப்படிச்சா²தெ³த்வா தெ²ய்யசித்தோ பாதே³ன அக்கமித்வா கத்³த³மே வா வாலுகாய வா பவேஸேதி, தஸ்ஸ பவேஸிதமத்தேயேவ அவஹாரோ.

    Paṭicchādetvā pana avaharaṇaṃ paṭicchannāvahāro nāma. So evaṃ veditabbo – yo bhikkhu uyyānādīsu paresaṃ omuñcitvā ṭhapitaaṅgulimuddikādīni disvā ‘‘pacchā gaṇhissāmī’’ti paṃsunā vā paṇṇena vā paṭicchādeti, tassa ettāvatā uddhāro natthīti na tāva avahāro hoti . Yadā pana sāmikā vicinantā apassitvā ‘‘sve jānissāmā’’ti sālayāva gatā honti, athassa taṃ uddharato uddhāre avahāro. Paṭicchannakāleyeva ‘‘etaṃ mama santaka’’nti sakasaññāya vā ‘‘gatā dāni te, chaṭṭitabhaṇḍaṃ ida’’nti paṃsukūlasaññāya vā gaṇhantassa pana bhaṇḍadeyyaṃ. Tesu dutiyatatiyadivase āgantvā vicinitvā adisvā dhuranikkhepaṃ katvā gatesupi gahitaṃ bhaṇḍadeyyameva. Pacchā ñatvā codiyamānassa adadato sāmikānaṃ dhuranikkhepe avahāro hoti. Kasmā? Yasmā tassa payogena tehi na diṭṭhaṃ. Yo pana tathārūpaṃ bhaṇḍaṃ yathāṭhāne ṭhitaṃyeva appaṭicchādetvā theyyacitto pādena akkamitvā kaddame vā vālukāya vā paveseti, tassa pavesitamatteyeva avahāro.

    குஸங் ஸங்காமெத்வா பன அவஹரணங் குஸாவஹாரோ நாம. ஸோபி ஏவங் வேதி³தப்³போ³ – யோ பி⁴க்கு² விலீவமயங் வா தாலபண்ணமயங் வா கதஸஞ்ஞாணங் யங்கிஞ்சி குஸங் பாதெத்வா சீவரே பா⁴ஜீயமானே அத்தனோ கொட்டா²ஸஸ்ஸ ஸமீபே டி²தங் அப்பக்³க⁴தரங் வா மஹக்³க⁴தரங் வா ஸமஸமங் வா அக்³கே⁴ன பரஸ்ஸ கொட்டா²ஸங் ஹரிதுகாமோ அத்தனோ கொட்டா²ஸே பதிதங் குஸங் பரஸ்ஸ கொட்டா²ஸே பாதேதுகாமதாய உத்³த⁴ரதி, ரக்க²தி தாவ. பரஸ்ஸ கொட்டா²ஸே பாதிதே ரக்க²தேவ. யதா³ பன தஸ்மிங் பதிதே பரஸ்ஸ கொட்டா²ஸதோ பரஸ்ஸ குஸங் உத்³த⁴ரதி, உத்³த⁴தமத்தே அவஹாரோ. ஸசே பட²மதரங் பரகொட்டா²ஸதோ பரஸ்ஸ குஸங் உத்³த⁴ரதி, அத்தனோ கொட்டா²ஸே பாதேதுகாமதாய உத்³தா⁴ரே ரக்க²தி, பாதனேபி ரக்க²தி, அத்தனோ கொட்டா²ஸதோ பன அத்தனோ குஸங் உத்³த⁴ரதோ உத்³தா⁴ரேயேவ ரக்க²தி, தங் உத்³த⁴ரித்வா பரகொட்டா²ஸே பாதெந்தஸ்ஸ ஹத்த²தோ முத்தமத்தே அவஹாரோ. அயங் குஸாவஹாரோ. இதி யங் வுத்தங் ‘‘ஆதி³யெய்யாதி பஞ்சவீஸதியா அவஹாரானங் அஞ்ஞதரவஸேன ஹரெய்யா’’தி, தஸ்ஸத்தோ² பகாஸிதோ ஹோதி.

    Kusaṃ saṅkāmetvā pana avaharaṇaṃ kusāvahāro nāma. Sopi evaṃ veditabbo – yo bhikkhu vilīvamayaṃ vā tālapaṇṇamayaṃ vā katasaññāṇaṃ yaṃkiñci kusaṃ pātetvā cīvare bhājīyamāne attano koṭṭhāsassa samīpe ṭhitaṃ appagghataraṃ vā mahagghataraṃ vā samasamaṃ vā agghena parassa koṭṭhāsaṃ haritukāmo attano koṭṭhāse patitaṃ kusaṃ parassa koṭṭhāse pātetukāmatāya uddharati, rakkhati tāva. Parassa koṭṭhāse pātite rakkhateva. Yadā pana tasmiṃ patite parassa koṭṭhāsato parassa kusaṃ uddharati, uddhatamatte avahāro. Sace paṭhamataraṃ parakoṭṭhāsato parassa kusaṃ uddharati, attano koṭṭhāse pātetukāmatāya uddhāre rakkhati, pātanepi rakkhati, attano koṭṭhāsato pana attano kusaṃ uddharato uddhāreyeva rakkhati, taṃ uddharitvā parakoṭṭhāse pātentassa hatthato muttamatte avahāro. Ayaṃ kusāvahāro. Iti yaṃ vuttaṃ ‘‘ādiyeyyāti pañcavīsatiyā avahārānaṃ aññataravasena hareyyā’’ti, tassattho pakāsito hoti.

    யதா²ரூபேதி யாதி³ஸே. அதி³ன்னாதா³னேதி அதி³ன்னஸ்ஸ பரஸந்தகஸ்ஸ க³ஹணே. ராஜானோதிஇத³ங் பி³ம்பி³ஸாரங்யேவ ஸந்தா⁴ய வுத்தங், அஞ்ஞே பன ததா² கரெய்யுங் வா ந கரெய்யுங் வாதி தே நப்பமாணங். ஹனெய்யுங் வாதி ஹத்தா²தீ³ஹி வா போதெ²ய்யுங், ஸத்தே²ன வா சி²ந்தெ³ய்யுங். ப³ந்தெ⁴ய்யுங் வாதி ரஜ்ஜுப³ந்த⁴னாதீ³ஹி ப³ந்தெ⁴ய்யுங் வா. பப்³பா³ஜெய்யுங் வாதி நீஹரெய்யுங் வா. சோரோஸி பா³லோஸி மூள்ஹோஸி தே²னோஸீதி இமேஹி வசனேஹி பரிபா⁴ஸெய்யுங். கீதி³ஸஸ்ஸ பன அதி³ன்னஸ்ஸ ஆதா³னே ராஜானோ ஏவங் கரொந்தி? பாத³ஸ்ஸ வா பாதா³ரஹஸ்ஸ வா. ததா²ரூபங் பி⁴க்கு² அதி³ன்னங் ஆதி³யமானோதி தாதி³ஸங் பி⁴க்கு² போராணகஸ்ஸ கஹாபணஸ்ஸ பாத³ங் வா பாதா³ரஹங் வா ப⁴ண்ட³ங் அதி³ன்னங் பூ⁴மிஆதீ³ஸு யத்த² கத்த²சி டி²தங் யங்கிஞ்சி ஸஜீவனிஜ்ஜீவங் வுத்தப்பகாரானங் அவஹாரானங் யேன கேனசி அவஹாரேன அவஹரந்தோ பாராஜிகோ ஹோதி, கோ பன வாதோ³ ததோ அதிரேகதரஸ்மிந்தி.

    Yathārūpeti yādise. Adinnādāneti adinnassa parasantakassa gahaṇe. Rājānotiidaṃ bimbisāraṃyeva sandhāya vuttaṃ, aññe pana tathā kareyyuṃ vā na kareyyuṃ vāti te nappamāṇaṃ. Haneyyuṃvāti hatthādīhi vā potheyyuṃ, satthena vā chindeyyuṃ. Bandheyyuṃ vāti rajjubandhanādīhi bandheyyuṃ vā. Pabbājeyyuṃ vāti nīhareyyuṃ vā. Corosi bālosi mūḷhosi thenosīti imehi vacanehi paribhāseyyuṃ. Kīdisassa pana adinnassa ādāne rājāno evaṃ karonti? Pādassa vā pādārahassa vā. Tathārūpaṃ bhikkhu adinnaṃ ādiyamānoti tādisaṃ bhikkhu porāṇakassa kahāpaṇassa pādaṃ vā pādārahaṃ vā bhaṇḍaṃ adinnaṃ bhūmiādīsu yattha katthaci ṭhitaṃ yaṃkiñci sajīvanijjīvaṃ vuttappakārānaṃ avahārānaṃ yena kenaci avahārena avaharanto pārājiko hoti, ko pana vādo tato atirekatarasminti.

    ராஜக³ஹே த⁴னியத்தே²ரங் ஆரப்³ப⁴ ரஞ்ஞோ தா³ரூனி அதி³ன்னங் ஆதி³யனவத்து²ஸ்மிங் பஞ்ஞத்தங், ‘‘கா³மா வா அரஞ்ஞா வா’’தி அயமெத்த² அனுபஞ்ஞத்தி, ஸாதா⁴ரணபஞ்ஞத்தி, ஸாணத்திகங், ஹரணத்தா²ய க³மனாதி³கே புப்³ப³ப்பயோகே³ து³க்கடங், ஆமஸனே து³க்கடங், பாராஜிகவத்து²னோ ப²ந்தா³பனே து²ல்லச்சயங். ஆதி³யந்தஸ்ஸ மாஸகே வா ஊனமாஸகே வா து³க்கடங், அதிரேகமாஸகே வா ஊனபஞ்சமாஸகே வா து²ல்லச்சயங், பஞ்சமாஸகே வா அதிரேகபஞ்சமாஸகே வா பாராஜிகங். ஸப்³ப³த்த² க³ஹணகாலவஸேன ச க³ஹணதே³ஸவஸேன ச பரிபோ⁴க³பா⁴ஜனபரிவத்தனாதீ³ஹி ச பரிஹீனாபரிஹீனவஸேன வினிச்ச²யோ வேதி³தப்³போ³. ஸகஸஞ்ஞிஸ்ஸ, விஸ்ஸாஸக்³கா³ஹே, தாவகாலிகே, பேதபரிக்³க³ஹே, திரச்சா²னக³தபரிக்³க³ஹே, பங்ஸுகூலஸஞ்ஞிஸ்ஸ, உம்மத்தகாதீ³னஞ்ச அனாபத்தி. ஸீலவிபத்தி, அஞ்ஞஸ்ஸ மனுஸ்ஸஜாதிகஸ்ஸ வஸேன பரபரிக்³க³ஹிதங், பரபரிக்³க³ஹிதஸஞ்ஞிதா, க³ருபரிக்கா²ரோ, தெ²ய்யசித்தங், வுத்தப்பகாரானங் அவஹாரானங் வஸேன அவஹரணஞ்சாதி இமானெத்த² பஞ்ச அங்கா³னி. அதி³ன்னாதா³னஸமுட்டா²னங், கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், திவேத³னந்தி.

    Rājagahe dhaniyattheraṃ ārabbha rañño dārūni adinnaṃ ādiyanavatthusmiṃ paññattaṃ, ‘‘gāmā vā araññā vā’’ti ayamettha anupaññatti, sādhāraṇapaññatti, sāṇattikaṃ, haraṇatthāya gamanādike pubbappayoge dukkaṭaṃ, āmasane dukkaṭaṃ, pārājikavatthuno phandāpane thullaccayaṃ. Ādiyantassa māsake vā ūnamāsake vā dukkaṭaṃ, atirekamāsake vā ūnapañcamāsake vā thullaccayaṃ, pañcamāsake vā atirekapañcamāsake vā pārājikaṃ. Sabbattha gahaṇakālavasena ca gahaṇadesavasena ca paribhogabhājanaparivattanādīhi ca parihīnāparihīnavasena vinicchayo veditabbo. Sakasaññissa, vissāsaggāhe, tāvakālike, petapariggahe, tiracchānagatapariggahe, paṃsukūlasaññissa, ummattakādīnañca anāpatti. Sīlavipatti, aññassa manussajātikassa vasena parapariggahitaṃ, parapariggahitasaññitā, garuparikkhāro, theyyacittaṃ, vuttappakārānaṃ avahārānaṃ vasena avaharaṇañcāti imānettha pañca aṅgāni. Adinnādānasamuṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.

    து³தியபாராஜிகவண்ணனா நிட்டி²தா.

    Dutiyapārājikavaṇṇanā niṭṭhitā.

    3. ததியபாராஜிகவண்ணனா

    3. Tatiyapārājikavaṇṇanā

    ததியே ஸஞ்சிச்சாதி ஸங்சேதெத்வா ஸத்³தி⁴ங் சேதெத்வா. ‘‘பாணோ’’திஸஞ்ஞாய ஸத்³தி⁴ங்யேவ ‘‘வதா⁴மி ந’’ந்தி வத⁴கசேதனாய சேதெத்வா பகப்பெத்வா. மனுஸ்ஸவிக்³க³ஹந்தி கலலதோ பட்டா²ய ஜீவமானகமனுஸ்ஸஜாதிகஸரீரங். ஜீவிதா வோரோபெய்யாதி கலலகாலேபி தாபனமத்³த³னேஹி வா பே⁴ஸஜ்ஜஸம்பதா³னேன வா ததோ வா உத்³த⁴ம்பி தத³னுரூபேன உபக்கமேன ஜீவிதா வியோஜெய்ய. இமஸ்ஸ பனத்த²ஸ்ஸ ஆவிபா⁴வத்த²ங் பாணோ வேதி³தப்³போ³, பாணாதிபாதோ வேதி³தப்³போ³, பாணாதிபாதீ வேதி³தப்³போ³, பாணாதிபாதஸ்ஸ பயோகோ³ வேதி³தப்³போ³. தத்த² பாணோதி வோஹாரதோ ஸத்தோ, பரமத்த²தோ ஜீவிதிந்த்³ரியங். பாணாதிபாதோதி யாய சேதனாய ஜீவிதிந்த்³ரியுபச்சே²த³கபயோக³ங் ஸமுட்டா²பேதி, ஸா சேதனா. பாணாதிபாதீதி வுத்தசேதனாய ஸமங்கி³புக்³க³லோ. பாணாதிபாதஸ்ஸ பயோகோ³தி பாணாதிபாதஸ்ஸ ச² பயோகா³ ஸாஹத்தி²கோ நிஸ்ஸக்³கி³யோ ஆணத்திகோ தா²வரோ விஜ்ஜாமயோ இத்³தி⁴மயோதி . தத்த² ஸாஹத்தி²கோதி ஸயங் மாரெந்தஸ்ஸ காயேன வா காயப்படிப³த்³தே⁴ன வா பஹரணங். நிஸ்ஸக்³கி³யோதி தூ³ரே டி²தங் மாரேதுகாமஸ்ஸ காயேன வா காயப்படிப³த்³தே⁴ன வா உஸுஸத்தியந்தபாஸாணாதீ³னங் நிஸ்ஸஜ்ஜனங். தத்த² ஏகேகோ உத்³தி³ஸ்ஸானுத்³தி³ஸ்ஸபே⁴த³தோ து³விதோ⁴. தத்த² உத்³தி³ஸ்ஸகே யங் உத்³தி³ஸ்ஸ பஹரதி, தஸ்ஸேவ மரணேன கம்மப³த்³தோ⁴. ‘‘யோ கோசி மரதூ’’தி ஏவங் அனுத்³தி³ஸ்ஸகே பஹாரப்பச்சயா யஸ்ஸ கஸ்ஸசி மரணேன கம்மப³த்³தோ⁴. உப⁴யத்தா²பி ச பஹரிதமத்தே வா மரது, பச்சா² வா தேனேவ ரோகே³ன, பஹரிதக்க²ணேயேவ கம்மப³த்³தோ⁴. ஆணத்திகோதி ‘‘அஸுகங் நாம மாரேஹீ’’தி அஞ்ஞங் ஆணாபெந்தஸ்ஸ ஆணாபனங்.

    Tatiye sañciccāti saṃcetetvā saddhiṃ cetetvā. ‘‘Pāṇo’’tisaññāya saddhiṃyeva ‘‘vadhāmi na’’nti vadhakacetanāya cetetvā pakappetvā. Manussaviggahanti kalalato paṭṭhāya jīvamānakamanussajātikasarīraṃ. Jīvitāvoropeyyāti kalalakālepi tāpanamaddanehi vā bhesajjasampadānena vā tato vā uddhampi tadanurūpena upakkamena jīvitā viyojeyya. Imassa panatthassa āvibhāvatthaṃ pāṇo veditabbo, pāṇātipāto veditabbo, pāṇātipātī veditabbo, pāṇātipātassa payogo veditabbo. Tattha pāṇoti vohārato satto, paramatthato jīvitindriyaṃ. Pāṇātipātoti yāya cetanāya jīvitindriyupacchedakapayogaṃ samuṭṭhāpeti, sā cetanā. Pāṇātipātīti vuttacetanāya samaṅgipuggalo. Pāṇātipātassa payogoti pāṇātipātassa cha payogā sāhatthiko nissaggiyo āṇattiko thāvaro vijjāmayo iddhimayoti . Tattha sāhatthikoti sayaṃ mārentassa kāyena vā kāyappaṭibaddhena vā paharaṇaṃ. Nissaggiyoti dūre ṭhitaṃ māretukāmassa kāyena vā kāyappaṭibaddhena vā ususattiyantapāsāṇādīnaṃ nissajjanaṃ. Tattha ekeko uddissānuddissabhedato duvidho. Tattha uddissake yaṃ uddissa paharati, tasseva maraṇena kammabaddho. ‘‘Yo koci maratū’’ti evaṃ anuddissake pahārappaccayā yassa kassaci maraṇena kammabaddho. Ubhayatthāpi ca paharitamatte vā maratu, pacchā vā teneva rogena, paharitakkhaṇeyeva kammabaddho. Āṇattikoti ‘‘asukaṃ nāma mārehī’’ti aññaṃ āṇāpentassa āṇāpanaṃ.

    தத்த² –

    Tattha –

    வத்து² காலோ ச ஓகாஸோ, ஆவுத⁴ங் இரியாபதோ²;

    Vatthu kālo ca okāso, āvudhaṃ iriyāpatho;

    க்ரியாவிஸேஸோதி இமே, ச² ஆணத்தி நியாமகா.

    Kriyāvisesoti ime, cha āṇatti niyāmakā.

    தத்த² வத்தூ²தி புக்³க³லோ. யஞ்ஹி புக்³க³லங் ‘‘மாரேஹீ’’தி ஆணத்தோ ஸசே தமேவ மாரேதி, ஆணாபகஸ்ஸ ஆபத்தி. அத² அஞ்ஞங் மாரேதி, தங்மஞ்ஞமானோ வா அஞ்ஞங் மாரேதி, ஆணாபகோ முச்சதி. ‘‘இமங் மாரேஹீ’’தி ஆணத்தே பன ஆணாபகஸ்ஸ து³க்கடங். காலோதி புரேப⁴த்தாதி³காலோ. ஸசே ஹி ‘‘புரேப⁴த்தங் மாரேஹீ’’தி ஆணத்தோ புரேப⁴த்தமேவ மாரேதி, ஆணாபகஸ்ஸ ஆபத்தி. அத² யங் புரேப⁴த்தங் நியாமிதங், ததோ பச்சா² வா புரே வா மாரேதி, ஆணாபகோ முச்சதி. இமினா நயேன ஸப்³ப³த்த² வினிச்ச²யோ வேதி³தப்³போ³. தா²வரோதி அஸங்ஹாரிமேன உபகரணேன மாரேதுகாமஸ்ஸ ஓபாதக்க²ணனங் அபஸ்ஸேனஸங்விதா⁴னங் அஸிஆதீ³னங் உபனிக்கி²பனங் தளாகாதீ³ஸு விஸஸம்பயோஜனங் ரூபூபஹாரோதிஏவமாதி³. வுத்தனயேனேவ செத்தா²பி உத்³தி³ஸ்ஸானுத்³தி³ஸ்ஸபே⁴தோ³ வேதி³தப்³போ³. விஜ்ஜாமயோதி மாரணத்த²ங் விஜ்ஜாபரிஜப்பனங். இத்³தி⁴மயோதி கம்மவிபாகஜாய இத்³தி⁴யா பயோஜனங்.

    Tattha vatthūti puggalo. Yañhi puggalaṃ ‘‘mārehī’’ti āṇatto sace tameva māreti, āṇāpakassa āpatti. Atha aññaṃ māreti, taṃmaññamāno vā aññaṃ māreti, āṇāpako muccati. ‘‘Imaṃ mārehī’’ti āṇatte pana āṇāpakassa dukkaṭaṃ. Kāloti purebhattādikālo. Sace hi ‘‘purebhattaṃ mārehī’’ti āṇatto purebhattameva māreti, āṇāpakassa āpatti. Atha yaṃ purebhattaṃ niyāmitaṃ, tato pacchā vā pure vā māreti, āṇāpako muccati. Iminā nayena sabbattha vinicchayo veditabbo. Thāvaroti asaṃhārimena upakaraṇena māretukāmassa opātakkhaṇanaṃ apassenasaṃvidhānaṃ asiādīnaṃ upanikkhipanaṃ taḷākādīsu visasampayojanaṃ rūpūpahārotievamādi. Vuttanayeneva cetthāpi uddissānuddissabhedo veditabbo. Vijjāmayoti māraṇatthaṃ vijjāparijappanaṃ. Iddhimayoti kammavipākajāya iddhiyā payojanaṃ.

    ஸத்த²ஹாரகங் வாஸ்ஸ பரியேஸெய்யாதி எத்த² ஹரதீதி ஹாரகங், கிங் ஹரதி? ஜீவிதங். அத² வா ஹரிதப்³ப³ந்தி ஹாரகங், உபனிக்கி²பிதப்³ப³ந்தி அத்தோ². ஸத்த²ஞ்ச தங் ஹாரகஞ்சாதி ஸத்த²ஹாரகங். அஸ்ஸாதி மனுஸ்ஸவிக்³க³ஹஸ்ஸ. பரியேஸெய்யாதி யதா² லப⁴தி, ததா² கரெய்ய, உபனிக்கி²பெய்யாதி அத்தோ². ஏதேன தா²வரபயோக³ங் த³ஸ்ஸேதி. இதரதா² ஹி பரியிட்டி²மத்தேயேவ பாராஜிகோ ப⁴வெய்ய, ந சேதங் யுத்தங். பத³பா⁴ஜனே பனஸ்ஸ ப்³யஞ்ஜனங் அனாதி³யித்வா யங் எத்த² தா²வரபயோக³ஸங்க³ஹிதங் ஸத்த²ங், ததே³வ த³ஸ்ஸேதுங் ‘‘அஸிங் வா’’திஆதி³ வுத்தங். மரணவண்ணங் வா ஸங்வண்ணெய்யாதி வாசாய வா தாலபண்ணாதீ³ஸு லிகி²த்வா வா ‘‘யோ ஏவங் மரதி, ஸோ த⁴னங் வா லப⁴தீ’’திஆதி³னா நயேன மரணே கு³ணங் பகாஸெய்ய. ஏதேன யதா² ‘‘அதி³ன்னாதா³னே ஆதி³யெய்யா’’தி வுத்தத்தா பரியாயகதா²ய முச்சதி, நயித⁴, ஏவங் ‘‘ஸங்வண்ணெய்யா’’தி வசனதோ பன இத⁴ பரியாயகதா²யபி ந முச்சதீதி அயமத்தோ² வேதி³தப்³போ³. மரணாய வா ஸமாத³பெய்யாதி ‘‘ஸத்த²ங் வா ஆஹரா’’திஆதி³னா (பாரா॰ 172) நயேன மரணத்தா²ய உபாயங் கா³ஹாபெய்ய. ஏதேன ஆணத்திகப்பயோக³ங் த³ஸ்ஸேதி. அம்போ⁴ புரிஸாதி ஆலபனமேதங். கிங் துய்ஹிமினாதிஆதி³ ஸங்வண்ணனாகாரனித³ஸ்ஸனங். இதி சித்தமனோதி இதி சித்தோ இதி மனோ. ‘‘மதங் தே ஜீவிதா ஸெய்யோ’’திஎத்த² வுத்தமரணசித்தோ மரணமனோதி அத்தோ². எத்த² ச ‘‘மனோ’’திஇத³ங் சித்தஸ்ஸ அத்த²தீ³பனத்த²ங் வுத்தங். தேனேவஸ்ஸ பத³பா⁴ஜனே ‘‘யங் சித்தங் தங் மனோ’’தி (பாரா॰ 172) ஆஹ. சித்தஸங்கப்போதி விசித்தஸங்கப்போ. எத்தா²பி இதி-ஸத்³தோ³ ஆஹரிதப்³போ³. ‘‘ஸங்கப்போ’’தி ச ஸங்வித³ஹனமத்தஸ்ஸேதங் நாமங், ந விதக்கஸ்ஸேவ. தஞ்ச ஸங்வித³ஹனங் இமஸ்மிங் அத்தே² ஸஞ்ஞாசேதனாதி⁴ப்பாயேஹி ஸங்க³ஹங் க³ச்ச²தி, தஸ்மா ‘‘இதி சித்தஸங்கப்போ’’தி ‘‘மதங் தே ஜீவிதா ஸெய்யோ’’திஎத்த² வுத்தமரணஸஞ்ஞீ மரணசேதனோ மரணாதி⁴ப்பாயோதி ஏவமெத்த² அத்தோ² த³ட்ட²ப்³போ³. பத³பா⁴ஜனேபி ஹி அயமேவ நயோ த³ஸ்ஸிதோ . ஏதேன மரணசித்தாதீ³ஹி வினா ‘‘ஏகாஹங் ஜீவிதங் ஸெய்யோ, வீரியமாரப⁴தோ த³ள்ஹ’’ந்திஆதி³னா (த⁴॰ ப॰ 112) நயேன த⁴ம்மங் பா⁴ஸந்தஸ்ஸ ஸங்வண்ணனா நாம ந ஹோதீதி த³ஸ்ஸேதி. அனேகபரியாயேனாதி நானப்பகாரேன உச்சாவசேன காரணேன. புன மரணவண்ணந்திஆதி³ நிக³மனவசனங். பாராஜிகோ ஹோதீதி தங்க²ணூபபன்னம்பி மனுஸ்ஸவிக்³க³ஹங் வுத்தனயேன ஜீவிதா வோரோபெந்தோ பாராஜிகோ ஹோதீதி.

    Satthahārakaṃ vāssa pariyeseyyāti ettha haratīti hārakaṃ, kiṃ harati? Jīvitaṃ. Atha vā haritabbanti hārakaṃ, upanikkhipitabbanti attho. Satthañca taṃ hārakañcāti satthahārakaṃ. Assāti manussaviggahassa. Pariyeseyyāti yathā labhati, tathā kareyya, upanikkhipeyyāti attho. Etena thāvarapayogaṃ dasseti. Itarathā hi pariyiṭṭhimatteyeva pārājiko bhaveyya, na cetaṃ yuttaṃ. Padabhājane panassa byañjanaṃ anādiyitvā yaṃ ettha thāvarapayogasaṅgahitaṃ satthaṃ, tadeva dassetuṃ ‘‘asiṃ vā’’tiādi vuttaṃ. Maraṇavaṇṇaṃ vā saṃvaṇṇeyyāti vācāya vā tālapaṇṇādīsu likhitvā vā ‘‘yo evaṃ marati, so dhanaṃ vā labhatī’’tiādinā nayena maraṇe guṇaṃ pakāseyya. Etena yathā ‘‘adinnādāne ādiyeyyā’’ti vuttattā pariyāyakathāya muccati, nayidha, evaṃ ‘‘saṃvaṇṇeyyā’’ti vacanato pana idha pariyāyakathāyapi na muccatīti ayamattho veditabbo. Maraṇāya vā samādapeyyāti ‘‘satthaṃ vā āharā’’tiādinā (pārā. 172) nayena maraṇatthāya upāyaṃ gāhāpeyya. Etena āṇattikappayogaṃ dasseti. Ambho purisāti ālapanametaṃ. Kiṃ tuyhiminātiādi saṃvaṇṇanākāranidassanaṃ. Iti cittamanoti iti citto iti mano. ‘‘Mataṃ te jīvitā seyyo’’tiettha vuttamaraṇacitto maraṇamanoti attho. Ettha ca ‘‘mano’’tiidaṃ cittassa atthadīpanatthaṃ vuttaṃ. Tenevassa padabhājane ‘‘yaṃ cittaṃ taṃ mano’’ti (pārā. 172) āha. Cittasaṅkappoti vicittasaṅkappo. Etthāpi iti-saddo āharitabbo. ‘‘Saṅkappo’’ti ca saṃvidahanamattassetaṃ nāmaṃ, na vitakkasseva. Tañca saṃvidahanaṃ imasmiṃ atthe saññācetanādhippāyehi saṅgahaṃ gacchati, tasmā ‘‘iti cittasaṅkappo’’ti ‘‘mataṃ te jīvitā seyyo’’tiettha vuttamaraṇasaññī maraṇacetano maraṇādhippāyoti evamettha attho daṭṭhabbo. Padabhājanepi hi ayameva nayo dassito . Etena maraṇacittādīhi vinā ‘‘ekāhaṃ jīvitaṃ seyyo, vīriyamārabhato daḷha’’ntiādinā (dha. pa. 112) nayena dhammaṃ bhāsantassa saṃvaṇṇanā nāma na hotīti dasseti. Anekapariyāyenāti nānappakārena uccāvacena kāraṇena. Puna maraṇavaṇṇantiādi nigamanavacanaṃ. Pārājiko hotīti taṅkhaṇūpapannampi manussaviggahaṃ vuttanayena jīvitā voropento pārājiko hotīti.

    வேஸாலியங் ஸம்ப³ஹுலே பி⁴க்கூ² ஆரப்³ப⁴ அஞ்ஞமஞ்ஞங் ஜீவிதா வோரோபனவத்து²ஸ்மிங் பஞ்ஞத்தங், ‘‘மரணவண்ணங் வா’’தி அயமெத்த² அனுபஞ்ஞத்தி, ஸாதா⁴ரணபஞ்ஞத்தி, ஸாணத்திகங், மாரணத்தா²ய ஓபாதக்க²ணனாதீ³ஸு து³க்கடங், அனோதி³ஸ்ஸ க²தே ஓபாதே யஸ்ஸ கஸ்ஸசி பதனேபி து³க்கடங், யக்க²பேததிரச்சா²னக³தமனுஸ்ஸவிக்³க³ஹானங் திரச்சா²னக³தஸ்ஸ ச து³க்கு²ப்பத்தியங் து³க்கடமேவ, மனுஸ்ஸஜாதிகஸ்ஸ து³க்கு²ப்பத்தியங் து²ல்லச்சயங், ததா² யக்கா²தீ³னங் மரணே, திரச்சா²னக³தமரணே பன பாசித்தியங், மனுஸ்ஸமரணே பாராஜிகந்தி. இமினா நயேன ஸப்³ப³த்த² பயோக³பே⁴த³வஸேன ஆபத்திபே⁴தோ³ வேதி³தப்³போ³. அஸஞ்சிச்ச மாரெந்தஸ்ஸ அஜானந்தஸ்ஸ நமரணாதி⁴ப்பாயஸ்ஸ உம்மத்தகாதீ³னஞ்ச அனாபத்தி. தத்த² அஸஞ்சிச்சாதி ‘‘இமினா உபக்கமேன இமங் மாரேமீ’’தி அசேதெத்வா கதேன உபக்கமேன முஸலுஸ்ஸாபனவத்து²ஸ்மிங் (பாரா॰ 180 ஆத³யோ) விய பரே மதேபி அனாபத்தி. அஜானந்தஸ்ஸாதி ‘‘இமினா அயங் மரிஸ்ஸதீ’’தி அஜானந்தஸ்ஸ உபக்கமேன விஸக³தபிண்ட³பாதவத்து²ஸ்மிங் (பாரா॰ 181) விய பரே மதேபி அனாபத்தி. நமரணாதி⁴ப்பாயஸ்ஸாதி மரணங் அனிச்ச²ந்தஸ்ஸ உபக்கமேன பே⁴ஸஜ்ஜவத்து²ஸ்மிங் (பாரா॰ 187) விய பரே மதேபி அனாபத்தி. ஏவங் அஸஞ்சிச்சாதிஆதீ³ஸு வினிச்ச²யோ வேதி³தப்³போ³. ஸீலவிபத்தி, மனுஸ்ஸஜாதிகபாணோ, பாணஸஞ்ஞிதா, வத⁴கசித்தங், உபக்கமோ, தேன மரணந்தி இமானெத்த² பஞ்ச அங்கா³னி. அதி³ன்னாதா³னஸமஉட்டா²னங், கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.

    Vesāliyaṃ sambahule bhikkhū ārabbha aññamaññaṃ jīvitā voropanavatthusmiṃ paññattaṃ, ‘‘maraṇavaṇṇaṃ vā’’ti ayamettha anupaññatti, sādhāraṇapaññatti, sāṇattikaṃ, māraṇatthāya opātakkhaṇanādīsu dukkaṭaṃ, anodissa khate opāte yassa kassaci patanepi dukkaṭaṃ, yakkhapetatiracchānagatamanussaviggahānaṃ tiracchānagatassa ca dukkhuppattiyaṃ dukkaṭameva, manussajātikassa dukkhuppattiyaṃ thullaccayaṃ, tathā yakkhādīnaṃ maraṇe, tiracchānagatamaraṇe pana pācittiyaṃ, manussamaraṇe pārājikanti. Iminā nayena sabbattha payogabhedavasena āpattibhedo veditabbo. Asañcicca mārentassa ajānantassa namaraṇādhippāyassa ummattakādīnañca anāpatti. Tattha asañciccāti ‘‘iminā upakkamena imaṃ māremī’’ti acetetvā katena upakkamena musalussāpanavatthusmiṃ (pārā. 180 ādayo) viya pare matepi anāpatti. Ajānantassāti ‘‘iminā ayaṃ marissatī’’ti ajānantassa upakkamena visagatapiṇḍapātavatthusmiṃ (pārā. 181) viya pare matepi anāpatti. Namaraṇādhippāyassāti maraṇaṃ anicchantassa upakkamena bhesajjavatthusmiṃ (pārā. 187) viya pare matepi anāpatti. Evaṃ asañciccātiādīsu vinicchayo veditabbo. Sīlavipatti, manussajātikapāṇo, pāṇasaññitā, vadhakacittaṃ, upakkamo, tena maraṇanti imānettha pañca aṅgāni. Adinnādānasamauṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.

    ததியபாராஜிகவண்ணனா நிட்டி²தா.

    Tatiyapārājikavaṇṇanā niṭṭhitā.

    4. சதுத்த²பாராஜிகவண்ணனா

    4. Catutthapārājikavaṇṇanā

    சதுத்தே² அனபி⁴ஜானந்தி ஸகஸந்தானே அனுப்பன்னத்தா அத்தனி அத்தி²பா⁴வங் அஜானந்தோ. உத்தரிமனுஸ்ஸத⁴ம்மந்தி உத்தரிமனுஸ்ஸானங் ஜா²யீனஞ்சேவ அரியானஞ்ச த⁴ம்மங். அத்துபனாயிகந்தி அத்தனி தங் உபனேதி ‘‘மயி அத்தீ²’’தி ஸமுதா³சரந்தோ, அத்தானங் வா தத்த² உபனேதி ‘‘அஹங் எத்த² ஸந்தி³ஸ்ஸாமீ’’தி ஸமுதா³சரந்தோதி அத்துபனாயிகோ, தங் அத்துபனாயிகங். ஏவங் கத்வா ஸமுதா³சரெய்யாதி ஸம்ப³ந்தோ⁴. அலமரியஞாணத³ஸ்ஸனந்திஎத்த² மஹக்³க³தலோகுத்தரபஞ்ஞா ஜானநட்டே²ன ஞாணங், சக்கு²னா ச தி³ட்ட²மிவ த⁴ம்மங் பச்சக்க²கரணதோ த³ஸ்ஸனத்தே²ன த³ஸ்ஸனந்தி ஞாணத³ஸ்ஸனங், அரியங் விஸுத்³த⁴ங் உத்தமங் ஞாணத³ஸ்ஸனந்தி அரியஞாணத³ஸ்ஸனங், அலங் பரியத்தங் கிலேஸவித்³த⁴ங்ஸனஸமத்த²ங் அரியஞாணத³ஸ்ஸனமெத்த² ஜா²னாதி³பே⁴தே³ உத்தரிமனுஸ்ஸத⁴ம்மே, அலங் வா அரியஞாணத³ஸ்ஸனமஸ்ஸாதி அலமரியஞாணத³ஸ்ஸனோ, தங் அலமரியஞாணத³ஸ்ஸனங். ஸமுதா³சரெய்யாதி வுத்தப்பகாரமேதங் உத்தரிமனுஸ்ஸத⁴ம்மங் அத்துபனாயிகங் கத்வா காயேன வா வாசாய வா தது³ப⁴யேன வா விஞ்ஞுஸ்ஸ மனுஸ்ஸஜாதிகஸ்ஸ ஆரோசெய்ய. இதி ஜானாமி இதி பஸ்ஸாமீதி ஸமுதா³சரணாகாரத³ஸ்ஸனமேதங், அத்துபனாயிகஞ்ஹி கத்வா வினா அஞ்ஞாபதே³ஸேன ஸமுதா³சரந்தோ ஏவங் ஸமுதா³சரதி, தஸ்மா ய்வாயங் பத³பா⁴ஜனே (பாரா॰ 209) ‘‘பட²மங் ஜா²னங் ஸமாபஜ்ஜிங், ஸமாபஜ்ஜாமி, ஸமாபன்னோ’’திஆதி³பே⁴தோ³ வுத்தோ, ஸோ ஸப்³போ³ இதே⁴வ ஸங்க³ஹங் க³ச்ச²தீதி வேதி³தப்³போ³. ‘‘இதி ஜானாமி இதி பஸ்ஸாமீ’’தி ஹி வத³ந்தோ ந யித³ங் வசனமத்தமேவ வத³தி, அத² கோ² ‘‘இமினா ச இமினா ச காரணேன அயங் த⁴ம்மோ மயி அத்தீ²’’தி தீ³பேதி, ‘‘ஸமாபஜ்ஜி’’ந்திஆதீ³னி ச வத³ந்தேன ஹி ஸமாபஜ்ஜனாதீ³ஹி காரணேஹி அத்தி²தா தீ³பிதா ஹோதி, தேன வுத்தங் ‘‘ய்வாயங் பத³பா⁴ஜனே பட²மங் ஜா²னங் ஸமாபஜ்ஜிங், ஸமாபஜ்ஜாமி, ஸமாபன்னோதிஆதி³பே⁴தோ³ வுத்தோ, ஸோ ஸப்³போ³ இதே⁴வ ஸங்க³ஹங் க³ச்ச²தீ’’தி. ததோ அபரேன ஸமயேனாதி ததோ ஆரோசிதகாலதோ அஞ்ஞதரஸ்மிங் காலே. இதி ஆபத்திபடிஜானநகாலத³ஸ்ஸனமேதங், அயங் பன ஆரோசிதக்க²ணேவ ஆபத்திங் ஆபஜ்ஜதி. ஆபத்திங் பன ஆபன்னோ யஸ்மா பரேன சோதி³தோ வா அசோதி³தோ வா படிஜானாதி, தஸ்மா ‘‘ஸமனுக்³கா³ஹீயமானோ வா அஸமனுக்³கா³ஹீயமானோ வா’’தி வுத்தங். ஆபன்னோதி ஆரோசிதக்க²ணேயேவ பாராஜிகங் ஆபன்னோ. விஸுத்³தா⁴பெக்கோ²தி அத்தனோ கி³ஹிபா⁴வாதி³கங் விஸுத்³தி⁴ங் அபெக்க²மானோ இச்ச²மானோ. அயஞ்ஹி யஸ்மா பாராஜிகங் ஆபன்னோ, தஸ்மா பி⁴க்கு²பா⁴வே ட²த்வா அப⁴ப்³போ³ ஜா²னாதீ³னி அதி⁴க³ந்துங், இச்சஸ்ஸ பி⁴க்கு²பா⁴வோ விஸுத்³தி⁴ நாம ந ஹோதி. யஸ்மா பன கி³ஹி வா உபாஸகாராமிகஸாமணேரானங் வா அஞ்ஞதரோ ஹுத்வா தா³னாதீ³ஹி ஸக்³க³மக்³க³ங் வா ஜா²னாதீ³ஹி மொக்க²மக்³க³ங் வா ஆராதே⁴துங் ப⁴ப்³போ³ ஹோதி, தஸ்மாஸ்ஸ கி³ஹிஆதி³பா⁴வோ விஸுத்³தி⁴ நாம ஹோதி. தேன வுத்தங் ‘‘கி³ஹிபா⁴வாதி³கங் விஸுத்³தி⁴ங் அபெக்க²மானோ’’தி. ஏவங் வதெ³ய்யாதி ஏவங் ப⁴ணெய்ய, கத²ங்? ‘‘அஜானமேவங், ஆவுஸோ’’திஆதி³ங். தத்த² அஜானந்தி அஜானந்தோ. அபஸ்ஸந்தி அபஸ்ஸந்தோ. துச்ச²ங் முஸா விலபிந்தி அஹங் வசனத்த²விரஹதோ துச்ச²ங், வஞ்சனாதி⁴ப்பாயதோ முஸா விலபிங் அப⁴ணிந்தி வுத்தங் ஹோதி. அஞ்ஞத்ர அதி⁴மானாதி ய்வாயங் திலக்க²ணங் ஆரோபெத்வா ஸங்கா²ரே ஸம்மஸந்தஸ்ஸ ஆரத்³த⁴விபஸ்ஸகஸ்ஸ அபத்தே பத்தஸஞ்ஞிதாஸங்கா²தோ அதி⁴மானோ உப்பஜ்ஜதி, தங் அதி⁴மானங் ட²பெத்வா கேவலங் பாபிச்ச²தாய யோ ஸமுதா³சரெய்ய, அயம்பி பாராஜிகோ ஹோதீதி அத்தோ².

    Catutthe anabhijānanti sakasantāne anuppannattā attani atthibhāvaṃ ajānanto. Uttarimanussadhammanti uttarimanussānaṃ jhāyīnañceva ariyānañca dhammaṃ. Attupanāyikanti attani taṃ upaneti ‘‘mayi atthī’’ti samudācaranto, attānaṃ vā tattha upaneti ‘‘ahaṃ ettha sandissāmī’’ti samudācarantoti attupanāyiko, taṃ attupanāyikaṃ. Evaṃ katvā samudācareyyāti sambandho. Alamariyañāṇadassanantiettha mahaggatalokuttarapaññā jānanaṭṭhena ñāṇaṃ, cakkhunā ca diṭṭhamiva dhammaṃ paccakkhakaraṇato dassanatthena dassananti ñāṇadassanaṃ, ariyaṃ visuddhaṃ uttamaṃ ñāṇadassananti ariyañāṇadassanaṃ, alaṃ pariyattaṃ kilesaviddhaṃsanasamatthaṃ ariyañāṇadassanamettha jhānādibhede uttarimanussadhamme, alaṃ vā ariyañāṇadassanamassāti alamariyañāṇadassano, taṃ alamariyañāṇadassanaṃ. Samudācareyyāti vuttappakārametaṃ uttarimanussadhammaṃ attupanāyikaṃ katvā kāyena vā vācāya vā tadubhayena vā viññussa manussajātikassa āroceyya. Iti jānāmi iti passāmīti samudācaraṇākāradassanametaṃ, attupanāyikañhi katvā vinā aññāpadesena samudācaranto evaṃ samudācarati, tasmā yvāyaṃ padabhājane (pārā. 209) ‘‘paṭhamaṃ jhānaṃ samāpajjiṃ, samāpajjāmi, samāpanno’’tiādibhedo vutto, so sabbo idheva saṅgahaṃ gacchatīti veditabbo. ‘‘Iti jānāmi iti passāmī’’ti hi vadanto na yidaṃ vacanamattameva vadati, atha kho ‘‘iminā ca iminā ca kāraṇena ayaṃ dhammo mayi atthī’’ti dīpeti, ‘‘samāpajji’’ntiādīni ca vadantena hi samāpajjanādīhi kāraṇehi atthitā dīpitā hoti, tena vuttaṃ ‘‘yvāyaṃ padabhājane paṭhamaṃ jhānaṃ samāpajjiṃ, samāpajjāmi, samāpannotiādibhedo vutto, so sabbo idheva saṅgahaṃ gacchatī’’ti. Tato aparena samayenāti tato ārocitakālato aññatarasmiṃ kāle. Iti āpattipaṭijānanakāladassanametaṃ, ayaṃ pana ārocitakkhaṇeva āpattiṃ āpajjati. Āpattiṃ pana āpanno yasmā parena codito vā acodito vā paṭijānāti, tasmā ‘‘samanuggāhīyamāno vā asamanuggāhīyamāno vā’’ti vuttaṃ. Āpannoti ārocitakkhaṇeyeva pārājikaṃ āpanno. Visuddhāpekkhoti attano gihibhāvādikaṃ visuddhiṃ apekkhamāno icchamāno. Ayañhi yasmā pārājikaṃ āpanno, tasmā bhikkhubhāve ṭhatvā abhabbo jhānādīni adhigantuṃ, iccassa bhikkhubhāvo visuddhi nāma na hoti. Yasmā pana gihi vā upāsakārāmikasāmaṇerānaṃ vā aññataro hutvā dānādīhi saggamaggaṃ vā jhānādīhi mokkhamaggaṃ vā ārādhetuṃ bhabbo hoti, tasmāssa gihiādibhāvo visuddhi nāma hoti. Tena vuttaṃ ‘‘gihibhāvādikaṃ visuddhiṃ apekkhamāno’’ti. Evaṃ vadeyyāti evaṃ bhaṇeyya, kathaṃ? ‘‘Ajānamevaṃ, āvuso’’tiādiṃ. Tattha ajānanti ajānanto. Apassanti apassanto. Tucchaṃ musā vilapinti ahaṃ vacanatthavirahato tucchaṃ, vañcanādhippāyato musā vilapiṃ abhaṇinti vuttaṃ hoti. Aññatra adhimānāti yvāyaṃ tilakkhaṇaṃ āropetvā saṅkhāre sammasantassa āraddhavipassakassa apatte pattasaññitāsaṅkhāto adhimāno uppajjati, taṃ adhimānaṃ ṭhapetvā kevalaṃ pāpicchatāya yo samudācareyya, ayampi pārājiko hotīti attho.

    வேஸாலியங் வக்³கு³முதா³தீரியே பி⁴க்கூ² ஆரப்³ப⁴ தேஸங் உத்தரிமனுஸ்ஸத⁴ம்மாரோசனவத்து²ஸ்மிங் பஞ்ஞத்தங், ‘‘அஞ்ஞத்ர அதி⁴மானா’’தி அயமெத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகங், ‘‘பட²மங் ஜா²னங் ஸமாபஜ்ஜி’’ந்திஆதி³னா நயேன வுத்தப்பகாரங் அஸந்தங் ஜா²னாதி³த⁴ம்மங் ஆரோசெந்தஸ்ஸ ஸசே யஸ்ஸ கஸ்ஸசி ஆரோசேதி, ஸோ மனுஸ்ஸஜாதிகோ ஹோதி, அனந்தரமேவ ‘‘அயங் ஜா²னலாபீ⁴’’தி வா ‘‘அரியோ’’தி வா யேன கேனசி ஆகாரேன தமத்த²ங் ஜானாதி, பாராஜிகங். ஸசே ந ஜானாதி, து²ல்லச்சயங். ஸசே பன ‘‘யோ தே விஹாரே வஸி, ஸோ பி⁴க்கு² பட²மங் ஜா²னங் ஸமாபஜ்ஜீ’’திஆதி³னா (பாரா॰ 220) நயேன அஞ்ஞாபதே³ஸேன ஆரோசெந்தஸ்ஸ ஜானாதி, து²ல்லச்சயங். ஸசே ந ஜானாதி, து³க்கடங். அதி⁴மானேன ஆரோசெந்தஸ்ஸ, அனுல்லபனாதி⁴ப்பாயஸ்ஸ, உம்மத்தகாதீ³னஞ்ச அனாபத்தி. ஸீலவிபத்தி, உத்தரிமனுஸ்ஸத⁴ம்மஸ்ஸ அத்தனி அஸந்ததா, பாபிச்ச²தாய தஸ்ஸ ஆரோசனங், அனஞ்ஞாபதே³ஸோ, யஸ்ஸ ஆரோசேதி, தஸ்ஸ மனுஸ்ஸஜாதிகதா, தங்க²ணவிஜானநந்தி இமானெத்த² பஞ்ச அங்கா³னி. ஸமுட்டா²னாதீ³னி அதி³ன்னாதா³னே வுத்தஸதி³ஸானேவாதி.

    Vesāliyaṃ vaggumudātīriye bhikkhū ārabbha tesaṃ uttarimanussadhammārocanavatthusmiṃ paññattaṃ, ‘‘aññatra adhimānā’’ti ayamettha anupaññatti, sādhāraṇapaññatti, anāṇattikaṃ, ‘‘paṭhamaṃ jhānaṃ samāpajji’’ntiādinā nayena vuttappakāraṃ asantaṃ jhānādidhammaṃ ārocentassa sace yassa kassaci āroceti, so manussajātiko hoti, anantarameva ‘‘ayaṃ jhānalābhī’’ti vā ‘‘ariyo’’ti vā yena kenaci ākārena tamatthaṃ jānāti, pārājikaṃ. Sace na jānāti, thullaccayaṃ. Sace pana ‘‘yo te vihāre vasi, so bhikkhu paṭhamaṃ jhānaṃ samāpajjī’’tiādinā (pārā. 220) nayena aññāpadesena ārocentassa jānāti, thullaccayaṃ. Sace na jānāti, dukkaṭaṃ. Adhimānena ārocentassa, anullapanādhippāyassa, ummattakādīnañca anāpatti. Sīlavipatti, uttarimanussadhammassa attani asantatā, pāpicchatāya tassa ārocanaṃ, anaññāpadeso, yassa āroceti, tassa manussajātikatā, taṅkhaṇavijānananti imānettha pañca aṅgāni. Samuṭṭhānādīni adinnādāne vuttasadisānevāti.

    சதுத்த²பாராஜிகவண்ணனா நிட்டி²தா.

    Catutthapārājikavaṇṇanā niṭṭhitā.

    உத்³தி³ட்டா² கோ² ஆயஸ்மந்தோ சத்தாரோ பாராஜிகா த⁴ம்மாதிஇத³ங் இத⁴ உத்³தி³ட்ட²பாராஜிகபரிதீ³பனமேவ. ஸமோதா⁴னெத்வா பன ஸப்³பா³னேவ சதுவீஸதி பாராஜிகானி வேதி³தப்³பா³னி . கதமானி சதுவீஸதி? பாளியங் ஆக³தானி தாவ பி⁴க்கூ²னங் சத்தாரி பி⁴க்கு²னீனங் அஸாதா⁴ரணானி சத்தாரீதி அட்ட², தானி ஏகாத³ஸன்னங் பண்ட³காதீ³னங் அப⁴ப்³ப³பா⁴வஸங்கா²தேஹி ஏகாத³ஸஹி பாராஜிகேஹி ஸத்³தி⁴ங் ஏகூனவீஸதி, கி³ஹிபா⁴வங் பத்த²யமானாய பி⁴க்கு²னியா விப்³ப⁴ந்தபா⁴வபாராஜிகேன ஸத்³தி⁴ங் வீஸதி, அபரானிபி லம்பீ³, முது³பிட்டி²கோ, பரஸ்ஸ அங்க³ஜாதங் முகே²ன க³ண்ஹாதி, பரஸ்ஸ அங்க³ஜாதே அபி⁴னிஸீத³தீதி இமேஸங் சதுன்னங் வஸேன ‘‘சத்தாரி அனுலோமபாராஜிகானீ’’தி வத³ந்தி, இதி இமானி ச சத்தாரி, புரிமானி ச வீஸதீதி ஸமோதா⁴னெத்வா ஸப்³பா³னேவ சதுவீஸதி பாராஜிகானி வேதி³தப்³பா³னி. ந லப⁴தி பி⁴க்கூ²ஹி ஸத்³தி⁴ங் ஸங்வாஸந்தி உபோஸதா²தி³பே⁴த³ங் ஸங்வாஸங் பி⁴க்கூ²ஹி ஸத்³தி⁴ங் ந லப⁴தி. யதா² புரே, ததா² பச்சா²தி யதா² புப்³பே³ கி³ஹிகாலே அனுபஸம்பன்னகாலே ச, பச்சா² பாராஜிகங் ஆபன்னோபி ததே²வ அஸங்வாஸோ ஹோதி, நத்தி² தஸ்ஸ பி⁴க்கூ²ஹி ஸத்³தி⁴ங் உபோஸதா²தி³பே⁴தோ³ ஸங்வாஸோதி. தத்தா²யஸ்மந்தே புச்சா²மீதி தேஸு சதூஸு பாராஜிகேஸு ஆயஸ்மந்தே ‘‘கச்சித்த² பரிஸுத்³தா⁴’’தி புச்சா²மி. கச்சித்தா²தி கச்சி எத்த², ஏதேஸு சதூஸு பாராஜிகேஸு கச்சி பரிஸுத்³தா⁴தி அத்தோ². அத² வா கச்சித்த² பரிஸுத்³தா⁴தி கச்சி பரிஸுத்³தா⁴ அத்த², ப⁴வதா²தி அத்தோ². ஸேஸங் ஸப்³ப³த்த² உத்தானமேவாதி.

    Uddiṭṭhākho āyasmanto cattāro pārājikā dhammātiidaṃ idha uddiṭṭhapārājikaparidīpanameva. Samodhānetvā pana sabbāneva catuvīsati pārājikāni veditabbāni . Katamāni catuvīsati? Pāḷiyaṃ āgatāni tāva bhikkhūnaṃ cattāri bhikkhunīnaṃ asādhāraṇāni cattārīti aṭṭha, tāni ekādasannaṃ paṇḍakādīnaṃ abhabbabhāvasaṅkhātehi ekādasahi pārājikehi saddhiṃ ekūnavīsati, gihibhāvaṃ patthayamānāya bhikkhuniyā vibbhantabhāvapārājikena saddhiṃ vīsati, aparānipi lambī, mudupiṭṭhiko, parassa aṅgajātaṃ mukhena gaṇhāti, parassa aṅgajāte abhinisīdatīti imesaṃ catunnaṃ vasena ‘‘cattāri anulomapārājikānī’’ti vadanti, iti imāni ca cattāri, purimāni ca vīsatīti samodhānetvā sabbāneva catuvīsati pārājikāni veditabbāni. Na labhati bhikkhūhi saddhiṃ saṃvāsanti uposathādibhedaṃ saṃvāsaṃ bhikkhūhi saddhiṃ na labhati. Yathā pure, tathā pacchāti yathā pubbe gihikāle anupasampannakāle ca, pacchā pārājikaṃ āpannopi tatheva asaṃvāso hoti, natthi tassa bhikkhūhi saddhiṃ uposathādibhedo saṃvāsoti. Tatthāyasmante pucchāmīti tesu catūsu pārājikesu āyasmante ‘‘kaccittha parisuddhā’’ti pucchāmi. Kaccitthāti kacci ettha, etesu catūsu pārājikesu kacci parisuddhāti attho. Atha vā kaccittha parisuddhāti kacci parisuddhā attha, bhavathāti attho. Sesaṃ sabbattha uttānamevāti.

    கங்கா²விதரணியா பாதிமொக்க²வண்ணனாய

    Kaṅkhāvitaraṇiyā pātimokkhavaṇṇanāya

    பாராஜிகவண்ணனா நிட்டி²தா.

    Pārājikavaṇṇanā niṭṭhitā.




    Next: ஸங்கா⁴தி³ஸேஸகண்டோ³ • Saṅghādisesakaṇḍo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact