| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
ভিক্খুনিৰিভঙ্গো
Bhikkhunivibhaṅgo
১৯৬৪. এৰং ভিক্খুৰিভঙ্গপাল়িযা, অট্ঠকথায চ আগতং ৰিনিচ্ছযসারং নাতিসঙ্খেপৰিত্থারনযেন দস্সেত্ৰা ইদানি তদনন্তরায ভিক্খুনিৰিভঙ্গপাল়িযা, তদট্ঠকথায চ আগতৰিনিচ্ছযসারং দস্সেতুমারভন্তো আহ ‘‘ভিক্খুনীন’’ন্তিআদি। তস্মিং অপীতি এত্থ অপি-সদ্দো ৰুত্তাপেক্খাযং। ‘‘সমাসেনা’’তি ইদং গন্থৰসেন সঙ্খিপনং সন্ধায ৰুত্তং। ‘‘কিঞ্চিমত্ত’’ন্তি ইদং অত্থৰসেনাতি ৰেদিতব্বং।
1964. Evaṃ bhikkhuvibhaṅgapāḷiyā, aṭṭhakathāya ca āgataṃ vinicchayasāraṃ nātisaṅkhepavitthāranayena dassetvā idāni tadanantarāya bhikkhunivibhaṅgapāḷiyā, tadaṭṭhakathāya ca āgatavinicchayasāraṃ dassetumārabhanto āha ‘‘bhikkhunīna’’ntiādi. Tasmiṃ apīti ettha api-saddo vuttāpekkhāyaṃ. ‘‘Samāsenā’’ti idaṃ ganthavasena saṅkhipanaṃ sandhāya vuttaṃ. ‘‘Kiñcimatta’’nti idaṃ atthavasenāti veditabbaṃ.
পারাজিককথাৰণ্ণনা
Pārājikakathāvaṇṇanā
১৯৬৫. ছন্দসোতি মেথুনসেৰনরাগপটিসংযুত্তেন ছন্দেন। এতেন ‘‘ছন্দে পন অসতি বলক্কারেন পধংসিতায অনাপত্তী’’তি (কঙ্খা॰ অট্ঠ॰ মেথুনধম্মসিক্খাপদৰণ্ণনা) অট্ঠকথা সূচিতা হোতি। সা সমণী পারাজিকা নাম হোতীতি পৰুচ্চতীতি যোজনা।
1965.Chandasoti methunasevanarāgapaṭisaṃyuttena chandena. Etena ‘‘chande pana asati balakkārena padhaṃsitāya anāpattī’’ti (kaṅkhā. aṭṭha. methunadhammasikkhāpadavaṇṇanā) aṭṭhakathā sūcitā hoti. Sā samaṇī pārājikā nāma hotīti pavuccatīti yojanā.
১৯৬৬-৭. ‘‘সজীৰস্স অপি অজীৰস্সা’’তি পদচ্ছেদো। ‘‘সন্থতং ৰা অসন্থত’’ন্তি ইদং ‘‘অঙ্গজাত’’ন্তি ইমস্স ৰিসেসনং। অত্তনো তিৰিধে মগ্গেতি অত্তনো ৰচ্চপস্সাৰমুখমগ্গানং অঞ্ঞতরস্মিং মগ্গে। এত্থ ‘‘সন্থতে ৰা অসন্থতে ৰা’’তি সেসো, ‘‘অল্লোকাসে’’তি ইমিনা সম্বন্ধো। ‘‘যেভুয্যঅক্খাযিতাদিক’’ন্তি পদচ্ছেদো। আদি-সদ্দেন অক্খাযিতং সঙ্গণ্হাতি।
1966-7. ‘‘Sajīvassa api ajīvassā’’ti padacchedo. ‘‘Santhataṃ vā asanthata’’nti idaṃ ‘‘aṅgajāta’’nti imassa visesanaṃ. Attano tividhe maggeti attano vaccapassāvamukhamaggānaṃ aññatarasmiṃ magge. Ettha ‘‘santhate vā asanthate vā’’ti seso, ‘‘allokāse’’ti iminā sambandho. ‘‘Yebhuyyaakkhāyitādika’’nti padacchedo. Ādi-saddena akkhāyitaṃ saṅgaṇhāti.
মনুস্সপুরিসাদীনং নৰন্নং সজীৰস্সপি অজীৰস্সপি যস্স কস্সচি সন্থতং ৰা অসন্থতং ৰা যেভুয্যক্খাযিতাদিকং অঙ্গজাতং অত্তনো সন্থতে ৰা অসন্থতে ৰা তিৰিধে মগ্গে অল্লোকাসে তিলফলমত্তম্পি পৰেসেন্তী পরাজিতাতি যোজনা।
Manussapurisādīnaṃ navannaṃ sajīvassapi ajīvassapi yassa kassaci santhataṃ vā asanthataṃ vā yebhuyyakkhāyitādikaṃ aṅgajātaṃ attano santhate vā asanthate vā tividhe magge allokāse tilaphalamattampi pavesentī parājitāti yojanā.
১৯৬৮. সাধারণৰিনিচ্ছযন্তি ভিক্খুভিক্খুনীনং সাধারণসিক্খাপদৰিনিচ্ছযং।
1968.Sādhāraṇavinicchayanti bhikkhubhikkhunīnaṃ sādhāraṇasikkhāpadavinicchayaṃ.
১৯৬৯-৭০. অধক্খকন্তি এত্থ অক্খকানং অধোতি ৰিগ্গহো। উব্ভজাণুমণ্ডলন্তি জাণুমণ্ডলানং উব্ভন্তি ৰিগ্গহো। উব্ভ-সদ্দো উদ্ধং-সদ্দপরিযাযো। ইধ ‘‘অত্তনো’’তি সেসো। অৰস্সুতস্সাতি কাযসংসগ্গরাগেন তিন্তস্স। অৰস্সুতাতি এত্থাপি এসেৰ নযো। যাতি ৰুত্তত্তা ‘‘সা’’তি লব্ভতি। সরীরন্তি এত্থ ‘‘যং কিঞ্চী’’তি সেসো। পরোপক্কমমূলকং পারাজিকং দস্সেতুমাহ ‘‘তেন ৰা ফুট্ঠা’’তি। এত্থ ‘‘যথাপরিচ্ছিন্নে কাযে’’তি চ ‘‘সাদিযেয্যা’’তি চ ৰত্তব্বং।
1969-70.Adhakkhakanti ettha akkhakānaṃ adhoti viggaho. Ubbhajāṇumaṇḍalanti jāṇumaṇḍalānaṃ ubbhanti viggaho. Ubbha-saddo uddhaṃ-saddapariyāyo. Idha ‘‘attano’’ti seso. Avassutassāti kāyasaṃsaggarāgena tintassa. Avassutāti etthāpi eseva nayo. Yāti vuttattā ‘‘sā’’ti labbhati. Sarīranti ettha ‘‘yaṃ kiñcī’’ti seso. Paropakkamamūlakaṃ pārājikaṃ dassetumāha ‘‘tena vā phuṭṭhā’’ti. Ettha ‘‘yathāparicchinne kāye’’ti ca ‘‘sādiyeyyā’’ti ca vattabbaṃ.
যা পন ভিক্খুনী অৰস্সুতা অৰস্সুতস্স মনুস্সপুগ্গলস্স যং কিঞ্চি সরীরং অত্তনো অধক্খকং উব্ভজাণুমণ্ডলং যং সরীরকং, তেন সরীরকেন ছুপেয্য, তেন মনুস্সপুরিসেন যথাপরিচ্ছিন্নে কাযে ফুট্ঠা সাদিযেয্য ৰা, সা পারাজিকা সিযাতি যোজনা।
Yā pana bhikkhunī avassutā avassutassa manussapuggalassa yaṃ kiñci sarīraṃ attano adhakkhakaṃ ubbhajāṇumaṇḍalaṃ yaṃ sarīrakaṃ, tena sarīrakena chupeyya, tena manussapurisena yathāparicchinne kāye phuṭṭhā sādiyeyya vā, sā pārājikā siyāti yojanā.
১৯৭১-২. ‘‘গহিতং উব্ভজাণুনা’’তি ইমিনা কপ্পরতো উদ্ধং পারাজিকক্খেত্তমেৰাতি দীপেতি। অত্তনো যথাৰুত্তপ্পকারেন কাযেনাতি যোজনা, অত্তনো ‘‘অধক্খক’’ন্তিআদিৰুত্তপ্পকারেন কাযেনাতি অত্থো। তথা অৰস্সুতায অৰস্সুতস্স পুরিসস্স কাযপটিবদ্ধং ফুসন্তিযা থুল্লচ্চযং হোতি। অত্তনো যথাপরিচ্ছিন্নকাযপটিবদ্ধেন তথা অৰস্সুতায অৰস্সুতস্স পুরিসস্স কাযং ফুসন্তিযা থুল্লচ্চযং হোতি।
1971-2.‘‘Gahitaṃ ubbhajāṇunā’’ti iminā kapparato uddhaṃ pārājikakkhettamevāti dīpeti. Attano yathāvuttappakārena kāyenāti yojanā, attano ‘‘adhakkhaka’’ntiādivuttappakārena kāyenāti attho. Tathā avassutāya avassutassa purisassa kāyapaṭibaddhaṃ phusantiyā thullaccayaṃ hoti. Attano yathāparicchinnakāyapaṭibaddhena tathā avassutāya avassutassa purisassa kāyaṃ phusantiyā thullaccayaṃ hoti.
১৯৭৩. অত্তনো অৰসেসেন কাযেন অৰস্সুতায অৰস্সুতস্স পুরিসপুগ্গলস্স কাযং ফুসন্তিযা থুল্লচ্চযং হোতি। এৰং অত্তনো পযোগে চ পুরিসস্স পযোগে চ তস্সা ভিক্খুনিযাযেৰ থুল্লচ্চযং হোতীতি যোজনা।
1973. Attano avasesena kāyena avassutāya avassutassa purisapuggalassa kāyaṃ phusantiyā thullaccayaṃ hoti. Evaṃ attano payoge ca purisassa payoge ca tassā bhikkhuniyāyeva thullaccayaṃ hotīti yojanā.
১৯৭৪. যক্খপেততিরচ্ছানপণ্ডকানং কাযং ‘‘অধক্খকং উব্ভজাণুমণ্ডল’’ন্তি যথাপরিচ্ছিন্নং তথেৰ অত্তনো কাযেন উভতোঅৰস্সৰে সতি ফুসন্তিযা অস্সা ভিক্খুনিযা থুল্লচ্চযং, তথেৰ যক্খাদীনং পযোগেপি তস্সাযেৰ থুল্লচ্চযং হোতীতি যোজনা।
1974. Yakkhapetatiracchānapaṇḍakānaṃ kāyaṃ ‘‘adhakkhakaṃ ubbhajāṇumaṇḍala’’nti yathāparicchinnaṃ tatheva attano kāyena ubhatoavassave sati phusantiyā assā bhikkhuniyā thullaccayaṃ, tatheva yakkhādīnaṃ payogepi tassāyeva thullaccayaṃ hotīti yojanā.
১৯৭৫. একতোৰস্সৰে চাপীতি ভিক্খুনিযা ৰসেন একতোঅৰস্সৰে চাপি। থুল্লচ্চযমুদীরিতন্তি পারাজিকক্খেত্তভূতেন অত্তনো কাযেন মনুস্সপুরিসস্স কাযং ফুসন্তিযা থুল্লচ্চযং অট্ঠকথাযং (পাচি॰ অট্ঠ॰ ৬৬২) ৰুত্তন্তি অত্থো। অৰসেসে চ সব্বত্থাতি যথাৰুত্তপারাজিকক্খেত্ততো অৰসেসে থুল্লচ্চযক্খেত্তে সব্বত্থ একতোঅৰস্সৰে সতি দুক্কটং হোতীতি অত্থো। কাযপটিবদ্ধেন কাযপটিবদ্ধামসনাদীসু সব্বত্থ উভতোঅৰস্সৰে ৰা একতোঅৰস্সৰে ৰা দুক্কটমেৰ হোতি।
1975.Ekatovassave cāpīti bhikkhuniyā vasena ekatoavassave cāpi. Thullaccayamudīritanti pārājikakkhettabhūtena attano kāyena manussapurisassa kāyaṃ phusantiyā thullaccayaṃ aṭṭhakathāyaṃ (pāci. aṭṭha. 662) vuttanti attho. Avasese ca sabbatthāti yathāvuttapārājikakkhettato avasese thullaccayakkhette sabbattha ekatoavassave sati dukkaṭaṃ hotīti attho. Kāyapaṭibaddhena kāyapaṭibaddhāmasanādīsu sabbattha ubhatoavassave vā ekatoavassave vā dukkaṭameva hoti.
১৯৭৬. ‘‘উব্ভক্খকমধোজাণুমণ্ডল’’ন্তি যং অপারাজিকক্খেত্তং ইধ দস্সিতং, এত্থ একতোঅৰস্সৰে দুক্কটং হোতি। কপ্পরস্স চ হেট্ঠাপি এত্থেৰ অধোজাণুমণ্ডলে সঙ্গহং গতন্তি যোজনা।
1976.‘‘Ubbhakkhakamadhojāṇumaṇḍala’’nti yaṃ apārājikakkhettaṃ idha dassitaṃ, ettha ekatoavassave dukkaṭaṃ hoti. Kapparassa ca heṭṭhāpi ettheva adhojāṇumaṇḍale saṅgahaṃ gatanti yojanā.
১৯৭৭-৯. ভিক্খু ভিক্খুনিযা সদ্ধিং সচে কাযসংসগ্গং কেলাযতি সেৰতীতি যোজনা। ভিক্খুনিযা নাসো সিযাতি সীলৰিনাসো পারাজিকাপত্তি সিযাতি অত্থো। গেহপেমন্তি এত্থ ‘‘গেহসিতপেম’’ন্তি ৰত্তব্বে গাথাবন্ধৰসেন সিত-সদ্দলোপো, অত্থো পনস্স ভিক্খুৰিভঙ্গে ৰুত্তনযোৰ।
1977-9. Bhikkhu bhikkhuniyā saddhiṃ sace kāyasaṃsaggaṃ kelāyati sevatīti yojanā. Bhikkhuniyā nāso siyāti sīlavināso pārājikāpatti siyāti attho. Gehapemanti ettha ‘‘gehasitapema’’nti vattabbe gāthābandhavasena sita-saddalopo, attho panassa bhikkhuvibhaṅge vuttanayova.
১৯৮০. অৰিসেসেনাতি ‘‘ভিক্খুনিযা’’তি ৰা ‘‘ভিক্খুস্সা’’তি ৰা ৰিসেসং অকত্ৰা।
1980.Avisesenāti ‘‘bhikkhuniyā’’ti vā ‘‘bhikkhussā’’ti vā visesaṃ akatvā.
১৯৮১. যস্সাতি ভিক্খুস্স ৰা ভিক্খুনিযা ৰা। যত্থাতি ভিক্খুনিযং ৰা ভিক্খুস্মিং ৰা। মনোসুদ্ধন্তি কাযসংসগ্গাদিরাগরহিতং। তস্স ভিক্খুস্স ৰা ভিক্খুনিযা ৰা তত্থ ভিক্খুনিযং ৰা ভিক্খুস্মিং ৰা ৰিসযে নদোসতা অনাপত্তীতি অত্থো।
1981.Yassāti bhikkhussa vā bhikkhuniyā vā. Yatthāti bhikkhuniyaṃ vā bhikkhusmiṃ vā. Manosuddhanti kāyasaṃsaggādirāgarahitaṃ. Tassa bhikkhussa vā bhikkhuniyā vā tattha bhikkhuniyaṃ vā bhikkhusmiṃ vā visaye nadosatā anāpattīti attho.
১৯৮২. ভিন্দিত্ৰাতি সীলভেদং কত্ৰা। ভিক্খুনিযা অপকতত্তা আহ ‘‘নেৰ হোতি ভিক্খুনিদূসকো’’তি।
1982.Bhinditvāti sīlabhedaṃ katvā. Bhikkhuniyā apakatattā āha ‘‘neva hoti bhikkhunidūsako’’ti.
১৯৮৩. অথাতি ৰাক্যারম্ভে। ন হোতাপত্তি ভিক্খুনোতি এত্থ ভিক্খুনীহি কাযসংসগ্গসঙ্ঘাদিসেসমাহ।
1983.Athāti vākyārambhe. Na hotāpatti bhikkhunoti ettha bhikkhunīhi kāyasaṃsaggasaṅghādisesamāha.
১৯৮৪. ‘‘খেত্তে’’তি ৰক্খমানং ‘‘ফুট্ঠা’’তি ইমিনা যোজেত্ৰা ‘‘পারাজিক’’ন্তিআদীহি, ‘‘থুল্লচ্চযং খেত্তে’’তিআদীহি চ সম্বন্ধিতব্বং। ‘‘পারাজিক’’ন্তি ৰক্খমানত্তা ফুট্ঠাতি এত্থ ‘‘পারাজিকক্খেত্তে’’তি সেসো।
1984. ‘‘Khette’’ti vakkhamānaṃ ‘‘phuṭṭhā’’ti iminā yojetvā ‘‘pārājika’’ntiādīhi, ‘‘thullaccayaṃ khette’’tiādīhi ca sambandhitabbaṃ. ‘‘Pārājika’’nti vakkhamānattā phuṭṭhāti ettha ‘‘pārājikakkhette’’ti seso.
১৯৮৫. তথাতি নিচ্চলাপি সাদিযতি। খেত্তেতি থুল্লচ্চযাদীনং খেত্তে। কাযেন নিচ্চলাযপি চিত্তেন সাদিযন্তিযা আপত্তি কস্মা ৰুত্তাতি আহ ‘‘ৰুত্তত্তা…পে॰… সত্থুনা’’তি , ভিক্খুপাতিমোক্খে ৰিয ‘‘কাযসংসগ্গং সমাপজ্জেয্যা’’তি অৰত্ৰা ইধ ‘‘কাযসংসগ্গং সাদিযেয্যা’’তি ৰুত্তত্তাতি অধিপ্পাযো।
1985.Tathāti niccalāpi sādiyati. Khetteti thullaccayādīnaṃ khette. Kāyena niccalāyapi cittena sādiyantiyā āpatti kasmā vuttāti āha ‘‘vuttattā…pe… satthunā’’ti , bhikkhupātimokkhe viya ‘‘kāyasaṃsaggaṃ samāpajjeyyā’’ti avatvā idha ‘‘kāyasaṃsaggaṃ sādiyeyyā’’ti vuttattāti adhippāyo.
১৯৮৬. তস্সা আপত্তিযা। ক্রিযসমুট্ঠানন্তি কিরিযায সমুট্ঠানং। এৰং সতীতি সাদিযনমত্তেনেৰ আপজ্জিতব্বভাৰে সতি। ইদন্তি ‘‘কিরিযসমুট্ঠান’’মিতিৰিধানং। তব্বহুলেনেৰ নযেনাতি কিরিযসমুট্ঠানবাহুল্লেন নযেন খদিরৰনাদিৰোহারো ৰিযাতি দট্ঠব্বং।
1986.Tassā āpattiyā. Kriyasamuṭṭhānanti kiriyāya samuṭṭhānaṃ. Evaṃ satīti sādiyanamatteneva āpajjitabbabhāve sati. Idanti ‘‘kiriyasamuṭṭhāna’’mitividhānaṃ. Tabbahuleneva nayenāti kiriyasamuṭṭhānabāhullena nayena khadiravanādivohāro viyāti daṭṭhabbaṃ.
১৯৮৭. তস্সা ভিক্খুনিযা অসঞ্চিচ্চ ৰিরজ্ঝিত্ৰা আমসন্তিযা অনাপত্তি, ‘‘অযং পুরিসো’’তি ৰা ‘‘ইত্থী’’তি ৰা অজানিত্ৰা আমসন্তিযা অনাপত্তি, পুরিসস্স আমসনে সতি ফস্সং অসাদিযন্তিযা ৰা অনাপত্তীতি যোজনা।
1987.Tassā bhikkhuniyā asañcicca virajjhitvā āmasantiyā anāpatti, ‘‘ayaṃ puriso’’ti vā ‘‘itthī’’ti vā ajānitvā āmasantiyā anāpatti, purisassa āmasane sati phassaṃ asādiyantiyā vā anāpattīti yojanā.
১৯৮৮. খিত্তচিত্তাযাতি যক্খুম্মত্তায। উম্মত্তিকায ৰাতি পিত্তকোপেন উম্মাদপ্পত্তায। ইদঞ্চ ‘‘অসুচী’’তি ৰা ‘‘চন্দন’’ন্তি ৰা ৰিসেসতং অজাননমেৰ পমাণং।
1988.Khittacittāyāti yakkhummattāya. Ummattikāya vāti pittakopena ummādappattāya. Idañca ‘‘asucī’’ti vā ‘‘candana’’nti vā visesataṃ ajānanameva pamāṇaṃ.
উব্ভজাণুমণ্ডলকথাৰণ্ণনা।
Ubbhajāṇumaṇḍalakathāvaṇṇanā.
১৯৮৯-৯০. ‘‘পারাজিকত্তং জানন্তী’’তি ইমিনা অৰসেসাপত্তিং জানিত্ৰা ছাদেন্তিযা পারাজিকাভাৰং দীপেতি। সলিঙ্গে তু ঠিতাযাতি পব্বজ্জালিঙ্গেযেৰ ঠিতায। ইতি ধুরে নিক্খিত্তমত্তস্মিন্তি যোজনা। ইতি-সদ্দো নিদস্সনে। ইতরায পুব্বেযেৰ আপন্নত্তা তমপেক্খিত্ৰা ‘‘সা চা’’তি আহ।
1989-90.‘‘Pārājikattaṃ jānantī’’ti iminā avasesāpattiṃ jānitvā chādentiyā pārājikābhāvaṃ dīpeti. Saliṅge tu ṭhitāyāti pabbajjāliṅgeyeva ṭhitāya. Iti dhure nikkhittamattasminti yojanā. Iti-saddo nidassane. Itarāya pubbeyeva āpannattā tamapekkhitvā ‘‘sā cā’’ti āha.
১৯৯১. ৰুত্তাৰিসিট্ঠং সব্বং ৰিনিচ্ছযং সঙ্গহেতুমাহ ‘‘সেস’’ন্তিআদি। তত্থাতি দুট্ঠুল্লপটিচ্ছাদনে।
1991. Vuttāvisiṭṭhaṃ sabbaṃ vinicchayaṃ saṅgahetumāha ‘‘sesa’’ntiādi. Tatthāti duṭṭhullapaṭicchādane.
ৰজ্জপটিচ্ছাদিকথাৰণ্ণনা।
Vajjapaṭicchādikathāvaṇṇanā.
১৯৯২-৫. সঙ্ঘেনাতি সমগ্গেন সঙ্ঘেন। উক্খিত্তকোতি আপত্তিযা অদস্সনাদীসু উক্খিত্তকো। ‘‘উক্খেপনে ঠিতো’’তি ইমিনা উক্খেপনীযকম্মকতস্স অনোসারিতভাৰং দীপেতি। যা দিট্ঠি এতস্সাতি যংদিট্ঠিকো, সো উক্খিত্তকো ভিক্খু যায দিট্ঠিযা সমন্নাগতো হোতীতি অধিপ্পাযো । ‘‘তস্সা দিট্ঠিযা গহণেনা’’তি ইমিনা অনুৰত্তপ্পকারো দস্সিতো। তং উক্খিত্তকং ভিক্খুন্তি যোজনা। সা ভিক্খুনী অঞ্ঞাহি ভিক্খুনীহি ৰিসুম্পিচ সঙ্ঘমজ্ঝেপি ‘‘এসো খো অয্যে ভিক্খু সমগ্গেন সঙ্ঘেন উক্খিত্তো’’তিআদিনা (পাচি॰ ৬৬৯) নযেন তিক্খত্তুং ৰুচ্চমানাতি যোজনা। তং ৰত্থুং অচজন্তী গহেত্ৰা যদি তথেৰ তিট্ঠতীতি যোজনা। এত্থ ‘‘যাৰততিযং সমনুভাসিতব্বা’’তি সেসো। তস্স কম্মস্স ওসানেতি ততিযায কম্মৰাচায য্যকারপ্পত্তৰসেন অস্স সমনুভাসনকম্মস্স পরিযোসানে। অসাকিযধীতরাতি অসাকিযধীতা, পচ্চত্তে করণৰচনং। ‘‘পুন অপ্পটিসন্ধেযা’’তি ইমিনা পুন তেনেৰ চ অত্তভাৰেন ভিক্খুনিভাৰে পটিসন্ধাতুং অনরহতা ৰুত্তা।
1992-5.Saṅghenāti samaggena saṅghena. Ukkhittakoti āpattiyā adassanādīsu ukkhittako. ‘‘Ukkhepane ṭhito’’ti iminā ukkhepanīyakammakatassa anosāritabhāvaṃ dīpeti. Yā diṭṭhi etassāti yaṃdiṭṭhiko, so ukkhittako bhikkhu yāya diṭṭhiyā samannāgato hotīti adhippāyo . ‘‘Tassā diṭṭhiyā gahaṇenā’’ti iminā anuvattappakāro dassito. Taṃ ukkhittakaṃ bhikkhunti yojanā. Sā bhikkhunī aññāhi bhikkhunīhi visumpica saṅghamajjhepi ‘‘eso kho ayye bhikkhu samaggena saṅghena ukkhitto’’tiādinā (pāci. 669) nayena tikkhattuṃ vuccamānāti yojanā. Taṃ vatthuṃ acajantī gahetvā yadi tatheva tiṭṭhatīti yojanā. Ettha ‘‘yāvatatiyaṃ samanubhāsitabbā’’ti seso. Tassa kammassa osāneti tatiyāya kammavācāya yyakārappattavasena assa samanubhāsanakammassa pariyosāne. Asākiyadhītarāti asākiyadhītā, paccatte karaṇavacanaṃ. ‘‘Puna appaṭisandheyā’’ti iminā puna teneva ca attabhāvena bhikkhunibhāve paṭisandhātuṃ anarahatā vuttā.
১৯৯৬. তিকদুক্কটং নিদ্দিট্ঠন্তি অধম্মকম্মে অধম্মকম্মসঞ্ঞা, ৰেমতিকা, ধম্মকম্মসঞ্ঞাতি এতাসং ৰসেন তিকদুক্কটং ৰুত্তং। সমনুভাসনে ৰুত্তা সমুট্ঠানাদযো সব্বে ইধ ৰত্তব্বাতি যোজনা।
1996.Tikadukkaṭaṃ niddiṭṭhanti adhammakamme adhammakammasaññā, vematikā, dhammakammasaññāti etāsaṃ vasena tikadukkaṭaṃ vuttaṃ. Samanubhāsane vuttā samuṭṭhānādayo sabbe idha vattabbāti yojanā.
উক্খিত্তানুৰত্তিককথাৰণ্ণনা।
Ukkhittānuvattikakathāvaṇṇanā.
১৯৯৭. ‘‘হত্থগ্গহণং ৰা সাদিযেয্যাতি হত্থো নাম কপ্পরং উপাদায যাৰ অগ্গনখা। এতস্স অসদ্ধম্মস্স পটিসেৰনত্থায উব্ভক্খকং অধোজাণুমণ্ডলং গহণং সাদিযতি, আপত্তি থুল্লচ্চযস্সা’’তি (পাচি॰ ৬৭৬) ৰুত্তত্তা আহ ‘‘অপারাজিকখেত্তস্সা’’তিআদি। ‘‘ত’’ন্তি ৰক্খমানত্তা ‘‘য’’ন্তি লব্ভতি। অপারাজিকক্খেত্তস্স যস্স কস্সচি অঙ্গস্স যং গহণং, তং হত্থগ্গহণন্তি পৰুচ্চতীতি যোজনা। হত্থে গহণং হত্থগ্গহণং।
1997. ‘‘Hatthaggahaṇaṃ vā sādiyeyyāti hattho nāma kapparaṃ upādāya yāva agganakhā. Etassa asaddhammassa paṭisevanatthāya ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassā’’ti (pāci. 676) vuttattā āha ‘‘apārājikakhettassā’’tiādi. ‘‘Ta’’nti vakkhamānattā ‘‘ya’’nti labbhati. Apārājikakkhettassa yassa kassaci aṅgassa yaṃ gahaṇaṃ, taṃ hatthaggahaṇanti pavuccatīti yojanā. Hatthe gahaṇaṃ hatthaggahaṇaṃ.
১৯৯৮. যস্স কস্সচীতি ৰুত্তপ্পকারেন যস্স কস্সচি চীৰরস্স যং গহণন্তি যোজনা।
1998.Yassa kassacīti vuttappakārena yassa kassaci cīvarassa yaṃ gahaṇanti yojanā.
১৯৯৯. অসদ্ধম্ম-সদ্দেন মেথুনস্সাপি ৰুচ্চমানত্তা ততো ৰিসেসেতুমাহ ‘‘কাযসংসগ্গ …পে॰… কারণা’’তি। ভিক্খুনী কাযসংসগ্গসঙ্খাতস্স অসদ্ধম্মস্স কারণা পুরিসস্স হত্থপাসস্মিং তিট্ঠেয্য ৰাতি যোজনা।
1999. Asaddhamma-saddena methunassāpi vuccamānattā tato visesetumāha ‘‘kāyasaṃsagga…pe… kāraṇā’’ti. Bhikkhunī kāyasaṃsaggasaṅkhātassa asaddhammassa kāraṇā purisassa hatthapāsasmiṃ tiṭṭheyya vāti yojanā.
২০০০. ততোতি তস্স অসদ্ধম্মস্স কারণা। তত্থাতি হত্থপাসে। পুরিসেনাতি এত্থ ‘‘কত’’ন্তি সেসো, ‘‘সঙ্কেত’’ন্তি ইমিনা সম্বন্ধো। ‘‘আগমনং অস্সা’’তি পদচ্ছেদো। ইচ্ছেয্যাতি ৰুত্তেপি ন গমনিচ্ছামত্তেন, অথ খো ভিক্খুনিযা পুরিসস্স হত্থপাসং, পুরিসেন চ ভিক্খুনিযা হত্থপাসং ওক্কন্তকালেযেৰ ৰত্থুপূরণং দট্ঠব্বং। যথাহ ‘‘সঙ্কেতং ৰা গচ্ছেয্যাতি এতস্স অসদ্ধম্মস্স পটিসেৰনত্থায পুরিসেন ‘ইত্থন্নামং আগচ্ছা’তি ৰুত্তা গচ্ছতি, পদে পদে আপত্তি দুক্কটস্স। পুরিসস্স হত্থপাসং ওক্কন্তমত্তে আপত্তি থুল্লচ্চযস্সা’’তি (পাচি॰ ৬৭৬) চ ‘‘পুরিসস্স অব্ভাগমনং সাদিযতি, আপত্তি দুক্কটস্স। হত্থপাসং ওক্কন্তমত্তে আপত্তি থুল্লচ্চযস্সা’’তি (পাচি॰ ৬৭৬) চ। এত্থ চ ইত্থন্নামং আগচ্ছাতি ইত্থন্নামং ঠানং আগচ্ছাতি অত্থো।
2000.Tatoti tassa asaddhammassa kāraṇā. Tatthāti hatthapāse. Purisenāti ettha ‘‘kata’’nti seso, ‘‘saṅketa’’nti iminā sambandho. ‘‘Āgamanaṃ assā’’ti padacchedo. Iccheyyāti vuttepi na gamanicchāmattena, atha kho bhikkhuniyā purisassa hatthapāsaṃ, purisena ca bhikkhuniyā hatthapāsaṃ okkantakāleyeva vatthupūraṇaṃ daṭṭhabbaṃ. Yathāha ‘‘saṅketaṃ vā gaccheyyāti etassa asaddhammassa paṭisevanatthāya purisena ‘itthannāmaṃ āgacchā’ti vuttā gacchati, pade pade āpatti dukkaṭassa. Purisassa hatthapāsaṃ okkantamatte āpatti thullaccayassā’’ti (pāci. 676) ca ‘‘purisassa abbhāgamanaṃ sādiyati, āpatti dukkaṭassa. Hatthapāsaṃ okkantamatte āpatti thullaccayassā’’ti (pāci. 676) ca. Ettha ca itthannāmaṃ āgacchāti itthannāmaṃ ṭhānaṃ āgacchāti attho.
২০০১. তদত্থাযাতি তস্সেৰ কাযসংসগ্গসঙ্খাতঅসদ্ধম্মস্স সেৰনত্থায। পটিচ্ছন্নট্ঠানঞ্চাতি ৰত্থাদিনা যেন কেনচি পটিচ্ছন্নওকাসং। পুরিসস্স হত্থপাসে ঠিতা তদত্থায কাযং উপসংহরেয্য ৰাতি যোজনা।
2001.Tadatthāyāti tasseva kāyasaṃsaggasaṅkhātaasaddhammassa sevanatthāya. Paṭicchannaṭṭhānañcāti vatthādinā yena kenaci paṭicchannaokāsaṃ. Purisassa hatthapāse ṭhitā tadatthāya kāyaṃ upasaṃhareyya vāti yojanā.
২০০২. হত্থগ্গহণাদীনং ৰুত্তপ্পকারানং অট্ঠন্নং ৰত্থূনং পূরণেন ‘‘অট্ঠৰত্থুকা’’তি সঙ্খাতা অযং ভিক্খুনী ৰিনট্ঠা হোতি সীলৰিনাসেন, ততোযেৰ অস্সমণী হোতি অভিক্খুনী হোতীতি যোজনা।
2002. Hatthaggahaṇādīnaṃ vuttappakārānaṃ aṭṭhannaṃ vatthūnaṃ pūraṇena ‘‘aṭṭhavatthukā’’ti saṅkhātā ayaṃ bhikkhunī vinaṭṭhā hoti sīlavināsena, tatoyeva assamaṇī hoti abhikkhunī hotīti yojanā.
২০০৩. অনুলোমেন ৰাতি হত্থগ্গহণাদিপটিপাটিযা ৰা। পটিলোমেন ৰাতি তব্বিপরিযতো পটিলোমেন ৰা। একন্তরিকায ৰাতি একমেকং অন্তরিত্ৰা পুন তস্সাপি করণৰসেন একন্তরিকায ৰা। অনুলোমেন ৰা পটিলোমেন ৰা তথেকন্তরিকায ৰা অট্ঠমং ৰত্থুং পরিপূরেন্তী চুতাতি যোজনা।
2003.Anulomenavāti hatthaggahaṇādipaṭipāṭiyā vā. Paṭilomena vāti tabbipariyato paṭilomena vā. Ekantarikāya vāti ekamekaṃ antaritvā puna tassāpi karaṇavasena ekantarikāya vā. Anulomena vā paṭilomena vā tathekantarikāya vā aṭṭhamaṃ vatthuṃ paripūrentī cutāti yojanā.
২০০৪. এতদেৰ অত্থং ব্যতিরেকমুখেন সমত্থেতুমাহ ‘‘অথাদিতো’’তিআদি। সতক্খত্তুম্পীতি বহুক্খত্তুম্পি। সত-সদ্দো হেত্থ বহু-সদ্দপরিযাযো। পারাজিকা নেৰ সিযাতি যোজনা, ইমিনা তংতংৰত্থুমূলকং দুক্কটথুল্লচ্চযং আপজ্জতীতি ৰুত্তং হোতি।
2004. Etadeva atthaṃ byatirekamukhena samatthetumāha ‘‘athādito’’tiādi. Satakkhattumpīti bahukkhattumpi. Sata-saddo hettha bahu-saddapariyāyo. Pārājikā neva siyāti yojanā, iminā taṃtaṃvatthumūlakaṃ dukkaṭathullaccayaṃ āpajjatīti vuttaṃ hoti.
২০০৫. যা পন আপত্তিযো আপন্না, দেসেত্ৰা তাহি মুচ্চতীতি যোজনা। ধুরনিক্খেপনং কত্ৰাতি ‘‘ন পুনেৰং করিস্সামী’’তি ধুরং নিক্খিপিত্ৰা। দেসিতা গণনূপিকাতি দেসিতা দেসিতগণনমেৰ উপেতি, পারাজিকস্স অঙ্গং ন হোতীতি অত্থো। তস্মা যা একং আপন্না, ধুরনিক্খেপং কত্ৰা দেসেত্ৰা পুন কিলেসৰসেন আপজ্জতি, পুন দেসেতি, এৰং অট্ঠ ৰত্থূনি পূরেন্তীপি পারাজিকা ন হোতি।
2005. Yā pana āpattiyo āpannā, desetvā tāhi muccatīti yojanā. Dhuranikkhepanaṃ katvāti ‘‘na punevaṃ karissāmī’’ti dhuraṃ nikkhipitvā. Desitā gaṇanūpikāti desitā desitagaṇanameva upeti, pārājikassa aṅgaṃ na hotīti attho. Tasmā yā ekaṃ āpannā, dhuranikkhepaṃ katvā desetvā puna kilesavasena āpajjati, puna deseti, evaṃ aṭṭha vatthūni pūrentīpi pārājikā na hoti.
২০০৬. সউস্সাহায দেসিতাতি পুন আপজ্জনে অনিক্খিত্তধুরায ভিক্খুনিযা দেসিতাপি আপত্তি দেসনাগণনং ন উপেতি। কিং হোতীতি আহ ‘‘দেসিতাপি অদেসিতা’’তি, তস্মা পারাজিকাপত্তিযা অঙ্গমেৰ হোতীতি অধিপ্পাযো।
2006.Saussāhāya desitāti puna āpajjane anikkhittadhurāya bhikkhuniyā desitāpi āpatti desanāgaṇanaṃ na upeti. Kiṃ hotīti āha ‘‘desitāpi adesitā’’ti, tasmā pārājikāpattiyā aṅgameva hotīti adhippāyo.
২০০৮. অযং অত্থোতি ‘‘অসদ্ধম্মো নাম কাযসংসগ্গো’’তি অযং অত্থো। উদ্দিসিতোতি পকাসিতো।
2008.Ayaṃ atthoti ‘‘asaddhammo nāma kāyasaṃsaggo’’ti ayaṃ attho. Uddisitoti pakāsito.
২০০৯. অযমত্থো কেন ৰচনেন উদ্দিসিতোতি আহ ‘‘ৰিঞ্ঞূ…পে॰… সাধকং ৰচনং ইদ’’ন্তি। ইদং ৰচনন্তি ‘‘ৰিঞ্ঞূ পটিবলো কাযসংসগ্গং সমাপজ্জিতু’’ন্তি (পাচি॰ ৬৭৬) ইদং ৰচনং। সাধকং পমাণং।
2009. Ayamattho kena vacanena uddisitoti āha ‘‘viññū…pe… sādhakaṃ vacanaṃ ida’’nti. Idaṃ vacananti ‘‘viññū paṭibalo kāyasaṃsaggaṃ samāpajjitu’’nti (pāci. 676) idaṃ vacanaṃ. Sādhakaṃ pamāṇaṃ.
অট্ঠৰত্থুককথাৰণ্ণনা।
Aṭṭhavatthukakathāvaṇṇanā.
২০১০. অৰস্সুতা, ৰজ্জপটিচ্ছাদিকা, উক্খিত্তানুৰত্তিকা, অট্ঠৰত্থুকাতি ইমা চতস্সো পারাজিকাপত্তিযো মহেসিনা অসাধারণা ভিক্খুনীনমেৰ পঞ্ঞত্তাতি যোজনা।
2010. Avassutā, vajjapaṭicchādikā, ukkhittānuvattikā, aṭṭhavatthukāti imā catasso pārājikāpattiyo mahesinā asādhāraṇā bhikkhunīnameva paññattāti yojanā.
ইতি ৰিনযত্থসারসন্দীপনিযা
Iti vinayatthasārasandīpaniyā
ৰিনযৰিনিচ্ছযৰণ্ণনায
Vinayavinicchayavaṇṇanāya
পারাজিককথাৰণ্ণনা নিট্ঠিতা।
Pārājikakathāvaṇṇanā niṭṭhitā.
