| Library / Tipiṭaka / ತಿಪಿಟಕ • Tipiṭaka / ವಿನಯವಿನಿಚ್ಛಯ-ಟೀಕಾ • Vinayavinicchaya-ṭīkā |
ಭಿಕ್ಖುನಿವಿಭಙ್ಗೋ
Bhikkhunivibhaṅgo
೧೯೬೪. ಏವಂ ಭಿಕ್ಖುವಿಭಙ್ಗಪಾಳಿಯಾ, ಅಟ್ಠಕಥಾಯ ಚ ಆಗತಂ ವಿನಿಚ್ಛಯಸಾರಂ ನಾತಿಸಙ್ಖೇಪವಿತ್ಥಾರನಯೇನ ದಸ್ಸೇತ್ವಾ ಇದಾನಿ ತದನನ್ತರಾಯ ಭಿಕ್ಖುನಿವಿಭಙ್ಗಪಾಳಿಯಾ, ತದಟ್ಠಕಥಾಯ ಚ ಆಗತವಿನಿಚ್ಛಯಸಾರಂ ದಸ್ಸೇತುಮಾರಭನ್ತೋ ಆಹ ‘‘ಭಿಕ್ಖುನೀನ’’ನ್ತಿಆದಿ। ತಸ್ಮಿಂ ಅಪೀತಿ ಏತ್ಥ ಅಪಿ-ಸದ್ದೋ ವುತ್ತಾಪೇಕ್ಖಾಯಂ। ‘‘ಸಮಾಸೇನಾ’’ತಿ ಇದಂ ಗನ್ಥವಸೇನ ಸಙ್ಖಿಪನಂ ಸನ್ಧಾಯ ವುತ್ತಂ। ‘‘ಕಿಞ್ಚಿಮತ್ತ’’ನ್ತಿ ಇದಂ ಅತ್ಥವಸೇನಾತಿ ವೇದಿತಬ್ಬಂ।
1964. Evaṃ bhikkhuvibhaṅgapāḷiyā, aṭṭhakathāya ca āgataṃ vinicchayasāraṃ nātisaṅkhepavitthāranayena dassetvā idāni tadanantarāya bhikkhunivibhaṅgapāḷiyā, tadaṭṭhakathāya ca āgatavinicchayasāraṃ dassetumārabhanto āha ‘‘bhikkhunīna’’ntiādi. Tasmiṃ apīti ettha api-saddo vuttāpekkhāyaṃ. ‘‘Samāsenā’’ti idaṃ ganthavasena saṅkhipanaṃ sandhāya vuttaṃ. ‘‘Kiñcimatta’’nti idaṃ atthavasenāti veditabbaṃ.
ಪಾರಾಜಿಕಕಥಾವಣ್ಣನಾ
Pārājikakathāvaṇṇanā
೧೯೬೫. ಛನ್ದಸೋತಿ ಮೇಥುನಸೇವನರಾಗಪಟಿಸಂಯುತ್ತೇನ ಛನ್ದೇನ। ಏತೇನ ‘‘ಛನ್ದೇ ಪನ ಅಸತಿ ಬಲಕ್ಕಾರೇನ ಪಧಂಸಿತಾಯ ಅನಾಪತ್ತೀ’’ತಿ (ಕಙ್ಖಾ॰ ಅಟ್ಠ॰ ಮೇಥುನಧಮ್ಮಸಿಕ್ಖಾಪದವಣ್ಣನಾ) ಅಟ್ಠಕಥಾ ಸೂಚಿತಾ ಹೋತಿ। ಸಾ ಸಮಣೀ ಪಾರಾಜಿಕಾ ನಾಮ ಹೋತೀತಿ ಪವುಚ್ಚತೀತಿ ಯೋಜನಾ।
1965.Chandasoti methunasevanarāgapaṭisaṃyuttena chandena. Etena ‘‘chande pana asati balakkārena padhaṃsitāya anāpattī’’ti (kaṅkhā. aṭṭha. methunadhammasikkhāpadavaṇṇanā) aṭṭhakathā sūcitā hoti. Sā samaṇī pārājikā nāma hotīti pavuccatīti yojanā.
೧೯೬೬-೭. ‘‘ಸಜೀವಸ್ಸ ಅಪಿ ಅಜೀವಸ್ಸಾ’’ತಿ ಪದಚ್ಛೇದೋ। ‘‘ಸನ್ಥತಂ ವಾ ಅಸನ್ಥತ’’ನ್ತಿ ಇದಂ ‘‘ಅಙ್ಗಜಾತ’’ನ್ತಿ ಇಮಸ್ಸ ವಿಸೇಸನಂ। ಅತ್ತನೋ ತಿವಿಧೇ ಮಗ್ಗೇತಿ ಅತ್ತನೋ ವಚ್ಚಪಸ್ಸಾವಮುಖಮಗ್ಗಾನಂ ಅಞ್ಞತರಸ್ಮಿಂ ಮಗ್ಗೇ। ಏತ್ಥ ‘‘ಸನ್ಥತೇ ವಾ ಅಸನ್ಥತೇ ವಾ’’ತಿ ಸೇಸೋ, ‘‘ಅಲ್ಲೋಕಾಸೇ’’ತಿ ಇಮಿನಾ ಸಮ್ಬನ್ಧೋ। ‘‘ಯೇಭುಯ್ಯಅಕ್ಖಾಯಿತಾದಿಕ’’ನ್ತಿ ಪದಚ್ಛೇದೋ। ಆದಿ-ಸದ್ದೇನ ಅಕ್ಖಾಯಿತಂ ಸಙ್ಗಣ್ಹಾತಿ।
1966-7. ‘‘Sajīvassa api ajīvassā’’ti padacchedo. ‘‘Santhataṃ vā asanthata’’nti idaṃ ‘‘aṅgajāta’’nti imassa visesanaṃ. Attano tividhe maggeti attano vaccapassāvamukhamaggānaṃ aññatarasmiṃ magge. Ettha ‘‘santhate vā asanthate vā’’ti seso, ‘‘allokāse’’ti iminā sambandho. ‘‘Yebhuyyaakkhāyitādika’’nti padacchedo. Ādi-saddena akkhāyitaṃ saṅgaṇhāti.
ಮನುಸ್ಸಪುರಿಸಾದೀನಂ ನವನ್ನಂ ಸಜೀವಸ್ಸಪಿ ಅಜೀವಸ್ಸಪಿ ಯಸ್ಸ ಕಸ್ಸಚಿ ಸನ್ಥತಂ ವಾ ಅಸನ್ಥತಂ ವಾ ಯೇಭುಯ್ಯಕ್ಖಾಯಿತಾದಿಕಂ ಅಙ್ಗಜಾತಂ ಅತ್ತನೋ ಸನ್ಥತೇ ವಾ ಅಸನ್ಥತೇ ವಾ ತಿವಿಧೇ ಮಗ್ಗೇ ಅಲ್ಲೋಕಾಸೇ ತಿಲಫಲಮತ್ತಮ್ಪಿ ಪವೇಸೇನ್ತೀ ಪರಾಜಿತಾತಿ ಯೋಜನಾ।
Manussapurisādīnaṃ navannaṃ sajīvassapi ajīvassapi yassa kassaci santhataṃ vā asanthataṃ vā yebhuyyakkhāyitādikaṃ aṅgajātaṃ attano santhate vā asanthate vā tividhe magge allokāse tilaphalamattampi pavesentī parājitāti yojanā.
೧೯೬೮. ಸಾಧಾರಣವಿನಿಚ್ಛಯನ್ತಿ ಭಿಕ್ಖುಭಿಕ್ಖುನೀನಂ ಸಾಧಾರಣಸಿಕ್ಖಾಪದವಿನಿಚ್ಛಯಂ।
1968.Sādhāraṇavinicchayanti bhikkhubhikkhunīnaṃ sādhāraṇasikkhāpadavinicchayaṃ.
೧೯೬೯-೭೦. ಅಧಕ್ಖಕನ್ತಿ ಏತ್ಥ ಅಕ್ಖಕಾನಂ ಅಧೋತಿ ವಿಗ್ಗಹೋ। ಉಬ್ಭಜಾಣುಮಣ್ಡಲನ್ತಿ ಜಾಣುಮಣ್ಡಲಾನಂ ಉಬ್ಭನ್ತಿ ವಿಗ್ಗಹೋ। ಉಬ್ಭ-ಸದ್ದೋ ಉದ್ಧಂ-ಸದ್ದಪರಿಯಾಯೋ। ಇಧ ‘‘ಅತ್ತನೋ’’ತಿ ಸೇಸೋ। ಅವಸ್ಸುತಸ್ಸಾತಿ ಕಾಯಸಂಸಗ್ಗರಾಗೇನ ತಿನ್ತಸ್ಸ। ಅವಸ್ಸುತಾತಿ ಏತ್ಥಾಪಿ ಏಸೇವ ನಯೋ। ಯಾತಿ ವುತ್ತತ್ತಾ ‘‘ಸಾ’’ತಿ ಲಬ್ಭತಿ। ಸರೀರನ್ತಿ ಏತ್ಥ ‘‘ಯಂ ಕಿಞ್ಚೀ’’ತಿ ಸೇಸೋ। ಪರೋಪಕ್ಕಮಮೂಲಕಂ ಪಾರಾಜಿಕಂ ದಸ್ಸೇತುಮಾಹ ‘‘ತೇನ ವಾ ಫುಟ್ಠಾ’’ತಿ। ಏತ್ಥ ‘‘ಯಥಾಪರಿಚ್ಛಿನ್ನೇ ಕಾಯೇ’’ತಿ ಚ ‘‘ಸಾದಿಯೇಯ್ಯಾ’’ತಿ ಚ ವತ್ತಬ್ಬಂ।
1969-70.Adhakkhakanti ettha akkhakānaṃ adhoti viggaho. Ubbhajāṇumaṇḍalanti jāṇumaṇḍalānaṃ ubbhanti viggaho. Ubbha-saddo uddhaṃ-saddapariyāyo. Idha ‘‘attano’’ti seso. Avassutassāti kāyasaṃsaggarāgena tintassa. Avassutāti etthāpi eseva nayo. Yāti vuttattā ‘‘sā’’ti labbhati. Sarīranti ettha ‘‘yaṃ kiñcī’’ti seso. Paropakkamamūlakaṃ pārājikaṃ dassetumāha ‘‘tena vā phuṭṭhā’’ti. Ettha ‘‘yathāparicchinne kāye’’ti ca ‘‘sādiyeyyā’’ti ca vattabbaṃ.
ಯಾ ಪನ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಮನುಸ್ಸಪುಗ್ಗಲಸ್ಸ ಯಂ ಕಿಞ್ಚಿ ಸರೀರಂ ಅತ್ತನೋ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಯಂ ಸರೀರಕಂ, ತೇನ ಸರೀರಕೇನ ಛುಪೇಯ್ಯ, ತೇನ ಮನುಸ್ಸಪುರಿಸೇನ ಯಥಾಪರಿಚ್ಛಿನ್ನೇ ಕಾಯೇ ಫುಟ್ಠಾ ಸಾದಿಯೇಯ್ಯ ವಾ, ಸಾ ಪಾರಾಜಿಕಾ ಸಿಯಾತಿ ಯೋಜನಾ।
Yā pana bhikkhunī avassutā avassutassa manussapuggalassa yaṃ kiñci sarīraṃ attano adhakkhakaṃ ubbhajāṇumaṇḍalaṃ yaṃ sarīrakaṃ, tena sarīrakena chupeyya, tena manussapurisena yathāparicchinne kāye phuṭṭhā sādiyeyya vā, sā pārājikā siyāti yojanā.
೧೯೭೧-೨. ‘‘ಗಹಿತಂ ಉಬ್ಭಜಾಣುನಾ’’ತಿ ಇಮಿನಾ ಕಪ್ಪರತೋ ಉದ್ಧಂ ಪಾರಾಜಿಕಕ್ಖೇತ್ತಮೇವಾತಿ ದೀಪೇತಿ। ಅತ್ತನೋ ಯಥಾವುತ್ತಪ್ಪಕಾರೇನ ಕಾಯೇನಾತಿ ಯೋಜನಾ, ಅತ್ತನೋ ‘‘ಅಧಕ್ಖಕ’’ನ್ತಿಆದಿವುತ್ತಪ್ಪಕಾರೇನ ಕಾಯೇನಾತಿ ಅತ್ಥೋ। ತಥಾ ಅವಸ್ಸುತಾಯ ಅವಸ್ಸುತಸ್ಸ ಪುರಿಸಸ್ಸ ಕಾಯಪಟಿಬದ್ಧಂ ಫುಸನ್ತಿಯಾ ಥುಲ್ಲಚ್ಚಯಂ ಹೋತಿ। ಅತ್ತನೋ ಯಥಾಪರಿಚ್ಛಿನ್ನಕಾಯಪಟಿಬದ್ಧೇನ ತಥಾ ಅವಸ್ಸುತಾಯ ಅವಸ್ಸುತಸ್ಸ ಪುರಿಸಸ್ಸ ಕಾಯಂ ಫುಸನ್ತಿಯಾ ಥುಲ್ಲಚ್ಚಯಂ ಹೋತಿ।
1971-2.‘‘Gahitaṃ ubbhajāṇunā’’ti iminā kapparato uddhaṃ pārājikakkhettamevāti dīpeti. Attano yathāvuttappakārena kāyenāti yojanā, attano ‘‘adhakkhaka’’ntiādivuttappakārena kāyenāti attho. Tathā avassutāya avassutassa purisassa kāyapaṭibaddhaṃ phusantiyā thullaccayaṃ hoti. Attano yathāparicchinnakāyapaṭibaddhena tathā avassutāya avassutassa purisassa kāyaṃ phusantiyā thullaccayaṃ hoti.
೧೯೭೩. ಅತ್ತನೋ ಅವಸೇಸೇನ ಕಾಯೇನ ಅವಸ್ಸುತಾಯ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಂ ಫುಸನ್ತಿಯಾ ಥುಲ್ಲಚ್ಚಯಂ ಹೋತಿ। ಏವಂ ಅತ್ತನೋ ಪಯೋಗೇ ಚ ಪುರಿಸಸ್ಸ ಪಯೋಗೇ ಚ ತಸ್ಸಾ ಭಿಕ್ಖುನಿಯಾಯೇವ ಥುಲ್ಲಚ್ಚಯಂ ಹೋತೀತಿ ಯೋಜನಾ।
1973. Attano avasesena kāyena avassutāya avassutassa purisapuggalassa kāyaṃ phusantiyā thullaccayaṃ hoti. Evaṃ attano payoge ca purisassa payoge ca tassā bhikkhuniyāyeva thullaccayaṃ hotīti yojanā.
೧೯೭೪. ಯಕ್ಖಪೇತತಿರಚ್ಛಾನಪಣ್ಡಕಾನಂ ಕಾಯಂ ‘‘ಅಧಕ್ಖಕಂ ಉಬ್ಭಜಾಣುಮಣ್ಡಲ’’ನ್ತಿ ಯಥಾಪರಿಚ್ಛಿನ್ನಂ ತಥೇವ ಅತ್ತನೋ ಕಾಯೇನ ಉಭತೋಅವಸ್ಸವೇ ಸತಿ ಫುಸನ್ತಿಯಾ ಅಸ್ಸಾ ಭಿಕ್ಖುನಿಯಾ ಥುಲ್ಲಚ್ಚಯಂ, ತಥೇವ ಯಕ್ಖಾದೀನಂ ಪಯೋಗೇಪಿ ತಸ್ಸಾಯೇವ ಥುಲ್ಲಚ್ಚಯಂ ಹೋತೀತಿ ಯೋಜನಾ।
1974. Yakkhapetatiracchānapaṇḍakānaṃ kāyaṃ ‘‘adhakkhakaṃ ubbhajāṇumaṇḍala’’nti yathāparicchinnaṃ tatheva attano kāyena ubhatoavassave sati phusantiyā assā bhikkhuniyā thullaccayaṃ, tatheva yakkhādīnaṃ payogepi tassāyeva thullaccayaṃ hotīti yojanā.
೧೯೭೫. ಏಕತೋವಸ್ಸವೇ ಚಾಪೀತಿ ಭಿಕ್ಖುನಿಯಾ ವಸೇನ ಏಕತೋಅವಸ್ಸವೇ ಚಾಪಿ। ಥುಲ್ಲಚ್ಚಯಮುದೀರಿತನ್ತಿ ಪಾರಾಜಿಕಕ್ಖೇತ್ತಭೂತೇನ ಅತ್ತನೋ ಕಾಯೇನ ಮನುಸ್ಸಪುರಿಸಸ್ಸ ಕಾಯಂ ಫುಸನ್ತಿಯಾ ಥುಲ್ಲಚ್ಚಯಂ ಅಟ್ಠಕಥಾಯಂ (ಪಾಚಿ॰ ಅಟ್ಠ॰ ೬೬೨) ವುತ್ತನ್ತಿ ಅತ್ಥೋ। ಅವಸೇಸೇ ಚ ಸಬ್ಬತ್ಥಾತಿ ಯಥಾವುತ್ತಪಾರಾಜಿಕಕ್ಖೇತ್ತತೋ ಅವಸೇಸೇ ಥುಲ್ಲಚ್ಚಯಕ್ಖೇತ್ತೇ ಸಬ್ಬತ್ಥ ಏಕತೋಅವಸ್ಸವೇ ಸತಿ ದುಕ್ಕಟಂ ಹೋತೀತಿ ಅತ್ಥೋ। ಕಾಯಪಟಿಬದ್ಧೇನ ಕಾಯಪಟಿಬದ್ಧಾಮಸನಾದೀಸು ಸಬ್ಬತ್ಥ ಉಭತೋಅವಸ್ಸವೇ ವಾ ಏಕತೋಅವಸ್ಸವೇ ವಾ ದುಕ್ಕಟಮೇವ ಹೋತಿ।
1975.Ekatovassave cāpīti bhikkhuniyā vasena ekatoavassave cāpi. Thullaccayamudīritanti pārājikakkhettabhūtena attano kāyena manussapurisassa kāyaṃ phusantiyā thullaccayaṃ aṭṭhakathāyaṃ (pāci. aṭṭha. 662) vuttanti attho. Avasese ca sabbatthāti yathāvuttapārājikakkhettato avasese thullaccayakkhette sabbattha ekatoavassave sati dukkaṭaṃ hotīti attho. Kāyapaṭibaddhena kāyapaṭibaddhāmasanādīsu sabbattha ubhatoavassave vā ekatoavassave vā dukkaṭameva hoti.
೧೯೭೬. ‘‘ಉಬ್ಭಕ್ಖಕಮಧೋಜಾಣುಮಣ್ಡಲ’’ನ್ತಿ ಯಂ ಅಪಾರಾಜಿಕಕ್ಖೇತ್ತಂ ಇಧ ದಸ್ಸಿತಂ, ಏತ್ಥ ಏಕತೋಅವಸ್ಸವೇ ದುಕ್ಕಟಂ ಹೋತಿ। ಕಪ್ಪರಸ್ಸ ಚ ಹೇಟ್ಠಾಪಿ ಏತ್ಥೇವ ಅಧೋಜಾಣುಮಣ್ಡಲೇ ಸಙ್ಗಹಂ ಗತನ್ತಿ ಯೋಜನಾ।
1976.‘‘Ubbhakkhakamadhojāṇumaṇḍala’’nti yaṃ apārājikakkhettaṃ idha dassitaṃ, ettha ekatoavassave dukkaṭaṃ hoti. Kapparassa ca heṭṭhāpi ettheva adhojāṇumaṇḍale saṅgahaṃ gatanti yojanā.
೧೯೭೭-೯. ಭಿಕ್ಖು ಭಿಕ್ಖುನಿಯಾ ಸದ್ಧಿಂ ಸಚೇ ಕಾಯಸಂಸಗ್ಗಂ ಕೇಲಾಯತಿ ಸೇವತೀತಿ ಯೋಜನಾ। ಭಿಕ್ಖುನಿಯಾ ನಾಸೋ ಸಿಯಾತಿ ಸೀಲವಿನಾಸೋ ಪಾರಾಜಿಕಾಪತ್ತಿ ಸಿಯಾತಿ ಅತ್ಥೋ। ಗೇಹಪೇಮನ್ತಿ ಏತ್ಥ ‘‘ಗೇಹಸಿತಪೇಮ’’ನ್ತಿ ವತ್ತಬ್ಬೇ ಗಾಥಾಬನ್ಧವಸೇನ ಸಿತ-ಸದ್ದಲೋಪೋ, ಅತ್ಥೋ ಪನಸ್ಸ ಭಿಕ್ಖುವಿಭಙ್ಗೇ ವುತ್ತನಯೋವ।
1977-9. Bhikkhu bhikkhuniyā saddhiṃ sace kāyasaṃsaggaṃ kelāyati sevatīti yojanā. Bhikkhuniyā nāso siyāti sīlavināso pārājikāpatti siyāti attho. Gehapemanti ettha ‘‘gehasitapema’’nti vattabbe gāthābandhavasena sita-saddalopo, attho panassa bhikkhuvibhaṅge vuttanayova.
೧೯೮೦. ಅವಿಸೇಸೇನಾತಿ ‘‘ಭಿಕ್ಖುನಿಯಾ’’ತಿ ವಾ ‘‘ಭಿಕ್ಖುಸ್ಸಾ’’ತಿ ವಾ ವಿಸೇಸಂ ಅಕತ್ವಾ।
1980.Avisesenāti ‘‘bhikkhuniyā’’ti vā ‘‘bhikkhussā’’ti vā visesaṃ akatvā.
೧೯೮೧. ಯಸ್ಸಾತಿ ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ। ಯತ್ಥಾತಿ ಭಿಕ್ಖುನಿಯಂ ವಾ ಭಿಕ್ಖುಸ್ಮಿಂ ವಾ। ಮನೋಸುದ್ಧನ್ತಿ ಕಾಯಸಂಸಗ್ಗಾದಿರಾಗರಹಿತಂ। ತಸ್ಸ ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ತತ್ಥ ಭಿಕ್ಖುನಿಯಂ ವಾ ಭಿಕ್ಖುಸ್ಮಿಂ ವಾ ವಿಸಯೇ ನದೋಸತಾ ಅನಾಪತ್ತೀತಿ ಅತ್ಥೋ।
1981.Yassāti bhikkhussa vā bhikkhuniyā vā. Yatthāti bhikkhuniyaṃ vā bhikkhusmiṃ vā. Manosuddhanti kāyasaṃsaggādirāgarahitaṃ. Tassa bhikkhussa vā bhikkhuniyā vā tattha bhikkhuniyaṃ vā bhikkhusmiṃ vā visaye nadosatā anāpattīti attho.
೧೯೮೨. ಭಿನ್ದಿತ್ವಾತಿ ಸೀಲಭೇದಂ ಕತ್ವಾ। ಭಿಕ್ಖುನಿಯಾ ಅಪಕತತ್ತಾ ಆಹ ‘‘ನೇವ ಹೋತಿ ಭಿಕ್ಖುನಿದೂಸಕೋ’’ತಿ।
1982.Bhinditvāti sīlabhedaṃ katvā. Bhikkhuniyā apakatattā āha ‘‘neva hoti bhikkhunidūsako’’ti.
೧೯೮೩. ಅಥಾತಿ ವಾಕ್ಯಾರಮ್ಭೇ। ನ ಹೋತಾಪತ್ತಿ ಭಿಕ್ಖುನೋತಿ ಏತ್ಥ ಭಿಕ್ಖುನೀಹಿ ಕಾಯಸಂಸಗ್ಗಸಙ್ಘಾದಿಸೇಸಮಾಹ।
1983.Athāti vākyārambhe. Na hotāpatti bhikkhunoti ettha bhikkhunīhi kāyasaṃsaggasaṅghādisesamāha.
೧೯೮೪. ‘‘ಖೇತ್ತೇ’’ತಿ ವಕ್ಖಮಾನಂ ‘‘ಫುಟ್ಠಾ’’ತಿ ಇಮಿನಾ ಯೋಜೇತ್ವಾ ‘‘ಪಾರಾಜಿಕ’’ನ್ತಿಆದೀಹಿ, ‘‘ಥುಲ್ಲಚ್ಚಯಂ ಖೇತ್ತೇ’’ತಿಆದೀಹಿ ಚ ಸಮ್ಬನ್ಧಿತಬ್ಬಂ। ‘‘ಪಾರಾಜಿಕ’’ನ್ತಿ ವಕ್ಖಮಾನತ್ತಾ ಫುಟ್ಠಾತಿ ಏತ್ಥ ‘‘ಪಾರಾಜಿಕಕ್ಖೇತ್ತೇ’’ತಿ ಸೇಸೋ।
1984. ‘‘Khette’’ti vakkhamānaṃ ‘‘phuṭṭhā’’ti iminā yojetvā ‘‘pārājika’’ntiādīhi, ‘‘thullaccayaṃ khette’’tiādīhi ca sambandhitabbaṃ. ‘‘Pārājika’’nti vakkhamānattā phuṭṭhāti ettha ‘‘pārājikakkhette’’ti seso.
೧೯೮೫. ತಥಾತಿ ನಿಚ್ಚಲಾಪಿ ಸಾದಿಯತಿ। ಖೇತ್ತೇತಿ ಥುಲ್ಲಚ್ಚಯಾದೀನಂ ಖೇತ್ತೇ। ಕಾಯೇನ ನಿಚ್ಚಲಾಯಪಿ ಚಿತ್ತೇನ ಸಾದಿಯನ್ತಿಯಾ ಆಪತ್ತಿ ಕಸ್ಮಾ ವುತ್ತಾತಿ ಆಹ ‘‘ವುತ್ತತ್ತಾ…ಪೇ॰… ಸತ್ಥುನಾ’’ತಿ , ಭಿಕ್ಖುಪಾತಿಮೋಕ್ಖೇ ವಿಯ ‘‘ಕಾಯಸಂಸಗ್ಗಂ ಸಮಾಪಜ್ಜೇಯ್ಯಾ’’ತಿ ಅವತ್ವಾ ಇಧ ‘‘ಕಾಯಸಂಸಗ್ಗಂ ಸಾದಿಯೇಯ್ಯಾ’’ತಿ ವುತ್ತತ್ತಾತಿ ಅಧಿಪ್ಪಾಯೋ।
1985.Tathāti niccalāpi sādiyati. Khetteti thullaccayādīnaṃ khette. Kāyena niccalāyapi cittena sādiyantiyā āpatti kasmā vuttāti āha ‘‘vuttattā…pe… satthunā’’ti , bhikkhupātimokkhe viya ‘‘kāyasaṃsaggaṃ samāpajjeyyā’’ti avatvā idha ‘‘kāyasaṃsaggaṃ sādiyeyyā’’ti vuttattāti adhippāyo.
೧೯೮೬. ತಸ್ಸಾ ಆಪತ್ತಿಯಾ। ಕ್ರಿಯಸಮುಟ್ಠಾನನ್ತಿ ಕಿರಿಯಾಯ ಸಮುಟ್ಠಾನಂ। ಏವಂ ಸತೀತಿ ಸಾದಿಯನಮತ್ತೇನೇವ ಆಪಜ್ಜಿತಬ್ಬಭಾವೇ ಸತಿ। ಇದನ್ತಿ ‘‘ಕಿರಿಯಸಮುಟ್ಠಾನ’’ಮಿತಿವಿಧಾನಂ। ತಬ್ಬಹುಲೇನೇವ ನಯೇನಾತಿ ಕಿರಿಯಸಮುಟ್ಠಾನಬಾಹುಲ್ಲೇನ ನಯೇನ ಖದಿರವನಾದಿವೋಹಾರೋ ವಿಯಾತಿ ದಟ್ಠಬ್ಬಂ।
1986.Tassā āpattiyā. Kriyasamuṭṭhānanti kiriyāya samuṭṭhānaṃ. Evaṃ satīti sādiyanamatteneva āpajjitabbabhāve sati. Idanti ‘‘kiriyasamuṭṭhāna’’mitividhānaṃ. Tabbahuleneva nayenāti kiriyasamuṭṭhānabāhullena nayena khadiravanādivohāro viyāti daṭṭhabbaṃ.
೧೯೮೭. ತಸ್ಸಾ ಭಿಕ್ಖುನಿಯಾ ಅಸಞ್ಚಿಚ್ಚ ವಿರಜ್ಝಿತ್ವಾ ಆಮಸನ್ತಿಯಾ ಅನಾಪತ್ತಿ, ‘‘ಅಯಂ ಪುರಿಸೋ’’ತಿ ವಾ ‘‘ಇತ್ಥೀ’’ತಿ ವಾ ಅಜಾನಿತ್ವಾ ಆಮಸನ್ತಿಯಾ ಅನಾಪತ್ತಿ, ಪುರಿಸಸ್ಸ ಆಮಸನೇ ಸತಿ ಫಸ್ಸಂ ಅಸಾದಿಯನ್ತಿಯಾ ವಾ ಅನಾಪತ್ತೀತಿ ಯೋಜನಾ।
1987.Tassā bhikkhuniyā asañcicca virajjhitvā āmasantiyā anāpatti, ‘‘ayaṃ puriso’’ti vā ‘‘itthī’’ti vā ajānitvā āmasantiyā anāpatti, purisassa āmasane sati phassaṃ asādiyantiyā vā anāpattīti yojanā.
೧೯೮೮. ಖಿತ್ತಚಿತ್ತಾಯಾತಿ ಯಕ್ಖುಮ್ಮತ್ತಾಯ। ಉಮ್ಮತ್ತಿಕಾಯ ವಾತಿ ಪಿತ್ತಕೋಪೇನ ಉಮ್ಮಾದಪ್ಪತ್ತಾಯ। ಇದಞ್ಚ ‘‘ಅಸುಚೀ’’ತಿ ವಾ ‘‘ಚನ್ದನ’’ನ್ತಿ ವಾ ವಿಸೇಸತಂ ಅಜಾನನಮೇವ ಪಮಾಣಂ।
1988.Khittacittāyāti yakkhummattāya. Ummattikāya vāti pittakopena ummādappattāya. Idañca ‘‘asucī’’ti vā ‘‘candana’’nti vā visesataṃ ajānanameva pamāṇaṃ.
ಉಬ್ಭಜಾಣುಮಣ್ಡಲಕಥಾವಣ್ಣನಾ।
Ubbhajāṇumaṇḍalakathāvaṇṇanā.
೧೯೮೯-೯೦. ‘‘ಪಾರಾಜಿಕತ್ತಂ ಜಾನನ್ತೀ’’ತಿ ಇಮಿನಾ ಅವಸೇಸಾಪತ್ತಿಂ ಜಾನಿತ್ವಾ ಛಾದೇನ್ತಿಯಾ ಪಾರಾಜಿಕಾಭಾವಂ ದೀಪೇತಿ। ಸಲಿಙ್ಗೇ ತು ಠಿತಾಯಾತಿ ಪಬ್ಬಜ್ಜಾಲಿಙ್ಗೇಯೇವ ಠಿತಾಯ। ಇತಿ ಧುರೇ ನಿಕ್ಖಿತ್ತಮತ್ತಸ್ಮಿನ್ತಿ ಯೋಜನಾ। ಇತಿ-ಸದ್ದೋ ನಿದಸ್ಸನೇ। ಇತರಾಯ ಪುಬ್ಬೇಯೇವ ಆಪನ್ನತ್ತಾ ತಮಪೇಕ್ಖಿತ್ವಾ ‘‘ಸಾ ಚಾ’’ತಿ ಆಹ।
1989-90.‘‘Pārājikattaṃ jānantī’’ti iminā avasesāpattiṃ jānitvā chādentiyā pārājikābhāvaṃ dīpeti. Saliṅge tu ṭhitāyāti pabbajjāliṅgeyeva ṭhitāya. Iti dhure nikkhittamattasminti yojanā. Iti-saddo nidassane. Itarāya pubbeyeva āpannattā tamapekkhitvā ‘‘sā cā’’ti āha.
೧೯೯೧. ವುತ್ತಾವಿಸಿಟ್ಠಂ ಸಬ್ಬಂ ವಿನಿಚ್ಛಯಂ ಸಙ್ಗಹೇತುಮಾಹ ‘‘ಸೇಸ’’ನ್ತಿಆದಿ। ತತ್ಥಾತಿ ದುಟ್ಠುಲ್ಲಪಟಿಚ್ಛಾದನೇ।
1991. Vuttāvisiṭṭhaṃ sabbaṃ vinicchayaṃ saṅgahetumāha ‘‘sesa’’ntiādi. Tatthāti duṭṭhullapaṭicchādane.
ವಜ್ಜಪಟಿಚ್ಛಾದಿಕಥಾವಣ್ಣನಾ।
Vajjapaṭicchādikathāvaṇṇanā.
೧೯೯೨-೫. ಸಙ್ಘೇನಾತಿ ಸಮಗ್ಗೇನ ಸಙ್ಘೇನ। ಉಕ್ಖಿತ್ತಕೋತಿ ಆಪತ್ತಿಯಾ ಅದಸ್ಸನಾದೀಸು ಉಕ್ಖಿತ್ತಕೋ। ‘‘ಉಕ್ಖೇಪನೇ ಠಿತೋ’’ತಿ ಇಮಿನಾ ಉಕ್ಖೇಪನೀಯಕಮ್ಮಕತಸ್ಸ ಅನೋಸಾರಿತಭಾವಂ ದೀಪೇತಿ। ಯಾ ದಿಟ್ಠಿ ಏತಸ್ಸಾತಿ ಯಂದಿಟ್ಠಿಕೋ, ಸೋ ಉಕ್ಖಿತ್ತಕೋ ಭಿಕ್ಖು ಯಾಯ ದಿಟ್ಠಿಯಾ ಸಮನ್ನಾಗತೋ ಹೋತೀತಿ ಅಧಿಪ್ಪಾಯೋ । ‘‘ತಸ್ಸಾ ದಿಟ್ಠಿಯಾ ಗಹಣೇನಾ’’ತಿ ಇಮಿನಾ ಅನುವತ್ತಪ್ಪಕಾರೋ ದಸ್ಸಿತೋ। ತಂ ಉಕ್ಖಿತ್ತಕಂ ಭಿಕ್ಖುನ್ತಿ ಯೋಜನಾ। ಸಾ ಭಿಕ್ಖುನೀ ಅಞ್ಞಾಹಿ ಭಿಕ್ಖುನೀಹಿ ವಿಸುಮ್ಪಿಚ ಸಙ್ಘಮಜ್ಝೇಪಿ ‘‘ಏಸೋ ಖೋ ಅಯ್ಯೇ ಭಿಕ್ಖು ಸಮಗ್ಗೇನ ಸಙ್ಘೇನ ಉಕ್ಖಿತ್ತೋ’’ತಿಆದಿನಾ (ಪಾಚಿ॰ ೬೬೯) ನಯೇನ ತಿಕ್ಖತ್ತುಂ ವುಚ್ಚಮಾನಾತಿ ಯೋಜನಾ। ತಂ ವತ್ಥುಂ ಅಚಜನ್ತೀ ಗಹೇತ್ವಾ ಯದಿ ತಥೇವ ತಿಟ್ಠತೀತಿ ಯೋಜನಾ। ಏತ್ಥ ‘‘ಯಾವತತಿಯಂ ಸಮನುಭಾಸಿತಬ್ಬಾ’’ತಿ ಸೇಸೋ। ತಸ್ಸ ಕಮ್ಮಸ್ಸ ಓಸಾನೇತಿ ತತಿಯಾಯ ಕಮ್ಮವಾಚಾಯ ಯ್ಯಕಾರಪ್ಪತ್ತವಸೇನ ಅಸ್ಸ ಸಮನುಭಾಸನಕಮ್ಮಸ್ಸ ಪರಿಯೋಸಾನೇ। ಅಸಾಕಿಯಧೀತರಾತಿ ಅಸಾಕಿಯಧೀತಾ, ಪಚ್ಚತ್ತೇ ಕರಣವಚನಂ। ‘‘ಪುನ ಅಪ್ಪಟಿಸನ್ಧೇಯಾ’’ತಿ ಇಮಿನಾ ಪುನ ತೇನೇವ ಚ ಅತ್ತಭಾವೇನ ಭಿಕ್ಖುನಿಭಾವೇ ಪಟಿಸನ್ಧಾತುಂ ಅನರಹತಾ ವುತ್ತಾ।
1992-5.Saṅghenāti samaggena saṅghena. Ukkhittakoti āpattiyā adassanādīsu ukkhittako. ‘‘Ukkhepane ṭhito’’ti iminā ukkhepanīyakammakatassa anosāritabhāvaṃ dīpeti. Yā diṭṭhi etassāti yaṃdiṭṭhiko, so ukkhittako bhikkhu yāya diṭṭhiyā samannāgato hotīti adhippāyo . ‘‘Tassā diṭṭhiyā gahaṇenā’’ti iminā anuvattappakāro dassito. Taṃ ukkhittakaṃ bhikkhunti yojanā. Sā bhikkhunī aññāhi bhikkhunīhi visumpica saṅghamajjhepi ‘‘eso kho ayye bhikkhu samaggena saṅghena ukkhitto’’tiādinā (pāci. 669) nayena tikkhattuṃ vuccamānāti yojanā. Taṃ vatthuṃ acajantī gahetvā yadi tatheva tiṭṭhatīti yojanā. Ettha ‘‘yāvatatiyaṃ samanubhāsitabbā’’ti seso. Tassa kammassa osāneti tatiyāya kammavācāya yyakārappattavasena assa samanubhāsanakammassa pariyosāne. Asākiyadhītarāti asākiyadhītā, paccatte karaṇavacanaṃ. ‘‘Puna appaṭisandheyā’’ti iminā puna teneva ca attabhāvena bhikkhunibhāve paṭisandhātuṃ anarahatā vuttā.
೧೯೯೬. ತಿಕದುಕ್ಕಟಂ ನಿದ್ದಿಟ್ಠನ್ತಿ ಅಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ, ವೇಮತಿಕಾ, ಧಮ್ಮಕಮ್ಮಸಞ್ಞಾತಿ ಏತಾಸಂ ವಸೇನ ತಿಕದುಕ್ಕಟಂ ವುತ್ತಂ। ಸಮನುಭಾಸನೇ ವುತ್ತಾ ಸಮುಟ್ಠಾನಾದಯೋ ಸಬ್ಬೇ ಇಧ ವತ್ತಬ್ಬಾತಿ ಯೋಜನಾ।
1996.Tikadukkaṭaṃ niddiṭṭhanti adhammakamme adhammakammasaññā, vematikā, dhammakammasaññāti etāsaṃ vasena tikadukkaṭaṃ vuttaṃ. Samanubhāsane vuttā samuṭṭhānādayo sabbe idha vattabbāti yojanā.
ಉಕ್ಖಿತ್ತಾನುವತ್ತಿಕಕಥಾವಣ್ಣನಾ।
Ukkhittānuvattikakathāvaṇṇanā.
೧೯೯೭. ‘‘ಹತ್ಥಗ್ಗಹಣಂ ವಾ ಸಾದಿಯೇಯ್ಯಾತಿ ಹತ್ಥೋ ನಾಮ ಕಪ್ಪರಂ ಉಪಾದಾಯ ಯಾವ ಅಗ್ಗನಖಾ। ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಉಬ್ಭಕ್ಖಕಂ ಅಧೋಜಾಣುಮಣ್ಡಲಂ ಗಹಣಂ ಸಾದಿಯತಿ, ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ (ಪಾಚಿ॰ ೬೭೬) ವುತ್ತತ್ತಾ ಆಹ ‘‘ಅಪಾರಾಜಿಕಖೇತ್ತಸ್ಸಾ’’ತಿಆದಿ। ‘‘ತ’’ನ್ತಿ ವಕ್ಖಮಾನತ್ತಾ ‘‘ಯ’’ನ್ತಿ ಲಬ್ಭತಿ। ಅಪಾರಾಜಿಕಕ್ಖೇತ್ತಸ್ಸ ಯಸ್ಸ ಕಸ್ಸಚಿ ಅಙ್ಗಸ್ಸ ಯಂ ಗಹಣಂ, ತಂ ಹತ್ಥಗ್ಗಹಣನ್ತಿ ಪವುಚ್ಚತೀತಿ ಯೋಜನಾ। ಹತ್ಥೇ ಗಹಣಂ ಹತ್ಥಗ್ಗಹಣಂ।
1997. ‘‘Hatthaggahaṇaṃ vā sādiyeyyāti hattho nāma kapparaṃ upādāya yāva agganakhā. Etassa asaddhammassa paṭisevanatthāya ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassā’’ti (pāci. 676) vuttattā āha ‘‘apārājikakhettassā’’tiādi. ‘‘Ta’’nti vakkhamānattā ‘‘ya’’nti labbhati. Apārājikakkhettassa yassa kassaci aṅgassa yaṃ gahaṇaṃ, taṃ hatthaggahaṇanti pavuccatīti yojanā. Hatthe gahaṇaṃ hatthaggahaṇaṃ.
೧೯೯೮. ಯಸ್ಸ ಕಸ್ಸಚೀತಿ ವುತ್ತಪ್ಪಕಾರೇನ ಯಸ್ಸ ಕಸ್ಸಚಿ ಚೀವರಸ್ಸ ಯಂ ಗಹಣನ್ತಿ ಯೋಜನಾ।
1998.Yassa kassacīti vuttappakārena yassa kassaci cīvarassa yaṃ gahaṇanti yojanā.
೧೯೯೯. ಅಸದ್ಧಮ್ಮ-ಸದ್ದೇನ ಮೇಥುನಸ್ಸಾಪಿ ವುಚ್ಚಮಾನತ್ತಾ ತತೋ ವಿಸೇಸೇತುಮಾಹ ‘‘ಕಾಯಸಂಸಗ್ಗ …ಪೇ॰… ಕಾರಣಾ’’ತಿ। ಭಿಕ್ಖುನೀ ಕಾಯಸಂಸಗ್ಗಸಙ್ಖಾತಸ್ಸ ಅಸದ್ಧಮ್ಮಸ್ಸ ಕಾರಣಾ ಪುರಿಸಸ್ಸ ಹತ್ಥಪಾಸಸ್ಮಿಂ ತಿಟ್ಠೇಯ್ಯ ವಾತಿ ಯೋಜನಾ।
1999. Asaddhamma-saddena methunassāpi vuccamānattā tato visesetumāha ‘‘kāyasaṃsagga…pe… kāraṇā’’ti. Bhikkhunī kāyasaṃsaggasaṅkhātassa asaddhammassa kāraṇā purisassa hatthapāsasmiṃ tiṭṭheyya vāti yojanā.
೨೦೦೦. ತತೋತಿ ತಸ್ಸ ಅಸದ್ಧಮ್ಮಸ್ಸ ಕಾರಣಾ। ತತ್ಥಾತಿ ಹತ್ಥಪಾಸೇ। ಪುರಿಸೇನಾತಿ ಏತ್ಥ ‘‘ಕತ’’ನ್ತಿ ಸೇಸೋ, ‘‘ಸಙ್ಕೇತ’’ನ್ತಿ ಇಮಿನಾ ಸಮ್ಬನ್ಧೋ। ‘‘ಆಗಮನಂ ಅಸ್ಸಾ’’ತಿ ಪದಚ್ಛೇದೋ। ಇಚ್ಛೇಯ್ಯಾತಿ ವುತ್ತೇಪಿ ನ ಗಮನಿಚ್ಛಾಮತ್ತೇನ, ಅಥ ಖೋ ಭಿಕ್ಖುನಿಯಾ ಪುರಿಸಸ್ಸ ಹತ್ಥಪಾಸಂ, ಪುರಿಸೇನ ಚ ಭಿಕ್ಖುನಿಯಾ ಹತ್ಥಪಾಸಂ ಓಕ್ಕನ್ತಕಾಲೇಯೇವ ವತ್ಥುಪೂರಣಂ ದಟ್ಠಬ್ಬಂ। ಯಥಾಹ ‘‘ಸಙ್ಕೇತಂ ವಾ ಗಚ್ಛೇಯ್ಯಾತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಪುರಿಸೇನ ‘ಇತ್ಥನ್ನಾಮಂ ಆಗಚ್ಛಾ’ತಿ ವುತ್ತಾ ಗಚ್ಛತಿ, ಪದೇ ಪದೇ ಆಪತ್ತಿ ದುಕ್ಕಟಸ್ಸ। ಪುರಿಸಸ್ಸ ಹತ್ಥಪಾಸಂ ಓಕ್ಕನ್ತಮತ್ತೇ ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ (ಪಾಚಿ॰ ೬೭೬) ಚ ‘‘ಪುರಿಸಸ್ಸ ಅಬ್ಭಾಗಮನಂ ಸಾದಿಯತಿ, ಆಪತ್ತಿ ದುಕ್ಕಟಸ್ಸ। ಹತ್ಥಪಾಸಂ ಓಕ್ಕನ್ತಮತ್ತೇ ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ (ಪಾಚಿ॰ ೬೭೬) ಚ। ಏತ್ಥ ಚ ಇತ್ಥನ್ನಾಮಂ ಆಗಚ್ಛಾತಿ ಇತ್ಥನ್ನಾಮಂ ಠಾನಂ ಆಗಚ್ಛಾತಿ ಅತ್ಥೋ।
2000.Tatoti tassa asaddhammassa kāraṇā. Tatthāti hatthapāse. Purisenāti ettha ‘‘kata’’nti seso, ‘‘saṅketa’’nti iminā sambandho. ‘‘Āgamanaṃ assā’’ti padacchedo. Iccheyyāti vuttepi na gamanicchāmattena, atha kho bhikkhuniyā purisassa hatthapāsaṃ, purisena ca bhikkhuniyā hatthapāsaṃ okkantakāleyeva vatthupūraṇaṃ daṭṭhabbaṃ. Yathāha ‘‘saṅketaṃ vā gaccheyyāti etassa asaddhammassa paṭisevanatthāya purisena ‘itthannāmaṃ āgacchā’ti vuttā gacchati, pade pade āpatti dukkaṭassa. Purisassa hatthapāsaṃ okkantamatte āpatti thullaccayassā’’ti (pāci. 676) ca ‘‘purisassa abbhāgamanaṃ sādiyati, āpatti dukkaṭassa. Hatthapāsaṃ okkantamatte āpatti thullaccayassā’’ti (pāci. 676) ca. Ettha ca itthannāmaṃ āgacchāti itthannāmaṃ ṭhānaṃ āgacchāti attho.
೨೦೦೧. ತದತ್ಥಾಯಾತಿ ತಸ್ಸೇವ ಕಾಯಸಂಸಗ್ಗಸಙ್ಖಾತಅಸದ್ಧಮ್ಮಸ್ಸ ಸೇವನತ್ಥಾಯ। ಪಟಿಚ್ಛನ್ನಟ್ಠಾನಞ್ಚಾತಿ ವತ್ಥಾದಿನಾ ಯೇನ ಕೇನಚಿ ಪಟಿಚ್ಛನ್ನಓಕಾಸಂ। ಪುರಿಸಸ್ಸ ಹತ್ಥಪಾಸೇ ಠಿತಾ ತದತ್ಥಾಯ ಕಾಯಂ ಉಪಸಂಹರೇಯ್ಯ ವಾತಿ ಯೋಜನಾ।
2001.Tadatthāyāti tasseva kāyasaṃsaggasaṅkhātaasaddhammassa sevanatthāya. Paṭicchannaṭṭhānañcāti vatthādinā yena kenaci paṭicchannaokāsaṃ. Purisassa hatthapāse ṭhitā tadatthāya kāyaṃ upasaṃhareyya vāti yojanā.
೨೦೦೨. ಹತ್ಥಗ್ಗಹಣಾದೀನಂ ವುತ್ತಪ್ಪಕಾರಾನಂ ಅಟ್ಠನ್ನಂ ವತ್ಥೂನಂ ಪೂರಣೇನ ‘‘ಅಟ್ಠವತ್ಥುಕಾ’’ತಿ ಸಙ್ಖಾತಾ ಅಯಂ ಭಿಕ್ಖುನೀ ವಿನಟ್ಠಾ ಹೋತಿ ಸೀಲವಿನಾಸೇನ, ತತೋಯೇವ ಅಸ್ಸಮಣೀ ಹೋತಿ ಅಭಿಕ್ಖುನೀ ಹೋತೀತಿ ಯೋಜನಾ।
2002. Hatthaggahaṇādīnaṃ vuttappakārānaṃ aṭṭhannaṃ vatthūnaṃ pūraṇena ‘‘aṭṭhavatthukā’’ti saṅkhātā ayaṃ bhikkhunī vinaṭṭhā hoti sīlavināsena, tatoyeva assamaṇī hoti abhikkhunī hotīti yojanā.
೨೦೦೩. ಅನುಲೋಮೇನ ವಾತಿ ಹತ್ಥಗ್ಗಹಣಾದಿಪಟಿಪಾಟಿಯಾ ವಾ। ಪಟಿಲೋಮೇನ ವಾತಿ ತಬ್ಬಿಪರಿಯತೋ ಪಟಿಲೋಮೇನ ವಾ। ಏಕನ್ತರಿಕಾಯ ವಾತಿ ಏಕಮೇಕಂ ಅನ್ತರಿತ್ವಾ ಪುನ ತಸ್ಸಾಪಿ ಕರಣವಸೇನ ಏಕನ್ತರಿಕಾಯ ವಾ। ಅನುಲೋಮೇನ ವಾ ಪಟಿಲೋಮೇನ ವಾ ತಥೇಕನ್ತರಿಕಾಯ ವಾ ಅಟ್ಠಮಂ ವತ್ಥುಂ ಪರಿಪೂರೇನ್ತೀ ಚುತಾತಿ ಯೋಜನಾ।
2003.Anulomenavāti hatthaggahaṇādipaṭipāṭiyā vā. Paṭilomena vāti tabbipariyato paṭilomena vā. Ekantarikāya vāti ekamekaṃ antaritvā puna tassāpi karaṇavasena ekantarikāya vā. Anulomena vā paṭilomena vā tathekantarikāya vā aṭṭhamaṃ vatthuṃ paripūrentī cutāti yojanā.
೨೦೦೪. ಏತದೇವ ಅತ್ಥಂ ಬ್ಯತಿರೇಕಮುಖೇನ ಸಮತ್ಥೇತುಮಾಹ ‘‘ಅಥಾದಿತೋ’’ತಿಆದಿ। ಸತಕ್ಖತ್ತುಮ್ಪೀತಿ ಬಹುಕ್ಖತ್ತುಮ್ಪಿ। ಸತ-ಸದ್ದೋ ಹೇತ್ಥ ಬಹು-ಸದ್ದಪರಿಯಾಯೋ। ಪಾರಾಜಿಕಾ ನೇವ ಸಿಯಾತಿ ಯೋಜನಾ, ಇಮಿನಾ ತಂತಂವತ್ಥುಮೂಲಕಂ ದುಕ್ಕಟಥುಲ್ಲಚ್ಚಯಂ ಆಪಜ್ಜತೀತಿ ವುತ್ತಂ ಹೋತಿ।
2004. Etadeva atthaṃ byatirekamukhena samatthetumāha ‘‘athādito’’tiādi. Satakkhattumpīti bahukkhattumpi. Sata-saddo hettha bahu-saddapariyāyo. Pārājikā neva siyāti yojanā, iminā taṃtaṃvatthumūlakaṃ dukkaṭathullaccayaṃ āpajjatīti vuttaṃ hoti.
೨೦೦೫. ಯಾ ಪನ ಆಪತ್ತಿಯೋ ಆಪನ್ನಾ, ದೇಸೇತ್ವಾ ತಾಹಿ ಮುಚ್ಚತೀತಿ ಯೋಜನಾ। ಧುರನಿಕ್ಖೇಪನಂ ಕತ್ವಾತಿ ‘‘ನ ಪುನೇವಂ ಕರಿಸ್ಸಾಮೀ’’ತಿ ಧುರಂ ನಿಕ್ಖಿಪಿತ್ವಾ। ದೇಸಿತಾ ಗಣನೂಪಿಕಾತಿ ದೇಸಿತಾ ದೇಸಿತಗಣನಮೇವ ಉಪೇತಿ, ಪಾರಾಜಿಕಸ್ಸ ಅಙ್ಗಂ ನ ಹೋತೀತಿ ಅತ್ಥೋ। ತಸ್ಮಾ ಯಾ ಏಕಂ ಆಪನ್ನಾ, ಧುರನಿಕ್ಖೇಪಂ ಕತ್ವಾ ದೇಸೇತ್ವಾ ಪುನ ಕಿಲೇಸವಸೇನ ಆಪಜ್ಜತಿ, ಪುನ ದೇಸೇತಿ, ಏವಂ ಅಟ್ಠ ವತ್ಥೂನಿ ಪೂರೇನ್ತೀಪಿ ಪಾರಾಜಿಕಾ ನ ಹೋತಿ।
2005. Yā pana āpattiyo āpannā, desetvā tāhi muccatīti yojanā. Dhuranikkhepanaṃ katvāti ‘‘na punevaṃ karissāmī’’ti dhuraṃ nikkhipitvā. Desitā gaṇanūpikāti desitā desitagaṇanameva upeti, pārājikassa aṅgaṃ na hotīti attho. Tasmā yā ekaṃ āpannā, dhuranikkhepaṃ katvā desetvā puna kilesavasena āpajjati, puna deseti, evaṃ aṭṭha vatthūni pūrentīpi pārājikā na hoti.
೨೦೦೬. ಸಉಸ್ಸಾಹಾಯ ದೇಸಿತಾತಿ ಪುನ ಆಪಜ್ಜನೇ ಅನಿಕ್ಖಿತ್ತಧುರಾಯ ಭಿಕ್ಖುನಿಯಾ ದೇಸಿತಾಪಿ ಆಪತ್ತಿ ದೇಸನಾಗಣನಂ ನ ಉಪೇತಿ। ಕಿಂ ಹೋತೀತಿ ಆಹ ‘‘ದೇಸಿತಾಪಿ ಅದೇಸಿತಾ’’ತಿ, ತಸ್ಮಾ ಪಾರಾಜಿಕಾಪತ್ತಿಯಾ ಅಙ್ಗಮೇವ ಹೋತೀತಿ ಅಧಿಪ್ಪಾಯೋ।
2006.Saussāhāya desitāti puna āpajjane anikkhittadhurāya bhikkhuniyā desitāpi āpatti desanāgaṇanaṃ na upeti. Kiṃ hotīti āha ‘‘desitāpi adesitā’’ti, tasmā pārājikāpattiyā aṅgameva hotīti adhippāyo.
೨೦೦೮. ಅಯಂ ಅತ್ಥೋತಿ ‘‘ಅಸದ್ಧಮ್ಮೋ ನಾಮ ಕಾಯಸಂಸಗ್ಗೋ’’ತಿ ಅಯಂ ಅತ್ಥೋ। ಉದ್ದಿಸಿತೋತಿ ಪಕಾಸಿತೋ।
2008.Ayaṃ atthoti ‘‘asaddhammo nāma kāyasaṃsaggo’’ti ayaṃ attho. Uddisitoti pakāsito.
೨೦೦೯. ಅಯಮತ್ಥೋ ಕೇನ ವಚನೇನ ಉದ್ದಿಸಿತೋತಿ ಆಹ ‘‘ವಿಞ್ಞೂ…ಪೇ॰… ಸಾಧಕಂ ವಚನಂ ಇದ’’ನ್ತಿ। ಇದಂ ವಚನನ್ತಿ ‘‘ವಿಞ್ಞೂ ಪಟಿಬಲೋ ಕಾಯಸಂಸಗ್ಗಂ ಸಮಾಪಜ್ಜಿತು’’ನ್ತಿ (ಪಾಚಿ॰ ೬೭೬) ಇದಂ ವಚನಂ। ಸಾಧಕಂ ಪಮಾಣಂ।
2009. Ayamattho kena vacanena uddisitoti āha ‘‘viññū…pe… sādhakaṃ vacanaṃ ida’’nti. Idaṃ vacananti ‘‘viññū paṭibalo kāyasaṃsaggaṃ samāpajjitu’’nti (pāci. 676) idaṃ vacanaṃ. Sādhakaṃ pamāṇaṃ.
ಅಟ್ಠವತ್ಥುಕಕಥಾವಣ್ಣನಾ।
Aṭṭhavatthukakathāvaṇṇanā.
೨೦೧೦. ಅವಸ್ಸುತಾ, ವಜ್ಜಪಟಿಚ್ಛಾದಿಕಾ, ಉಕ್ಖಿತ್ತಾನುವತ್ತಿಕಾ, ಅಟ್ಠವತ್ಥುಕಾತಿ ಇಮಾ ಚತಸ್ಸೋ ಪಾರಾಜಿಕಾಪತ್ತಿಯೋ ಮಹೇಸಿನಾ ಅಸಾಧಾರಣಾ ಭಿಕ್ಖುನೀನಮೇವ ಪಞ್ಞತ್ತಾತಿ ಯೋಜನಾ।
2010. Avassutā, vajjapaṭicchādikā, ukkhittānuvattikā, aṭṭhavatthukāti imā catasso pārājikāpattiyo mahesinā asādhāraṇā bhikkhunīnameva paññattāti yojanā.
ಇತಿ ವಿನಯತ್ಥಸಾರಸನ್ದೀಪನಿಯಾ
Iti vinayatthasārasandīpaniyā
ವಿನಯವಿನಿಚ್ಛಯವಣ್ಣನಾಯ
Vinayavinicchayavaṇṇanāya
ಪಾರಾಜಿಕಕಥಾವಣ್ಣನಾ ನಿಟ್ಠಿತಾ।
Pārājikakathāvaṇṇanā niṭṭhitā.
