| Library / Tipiṭaka / ਤਿਪਿਟਕ • Tipiṭaka / વਿਨਯવਿਨਿਚ੍ਛਯ-ਟੀਕਾ • Vinayavinicchaya-ṭīkā |
ਭਿਕ੍ਖੁਨਿવਿਭਙ੍ਗੋ
Bhikkhunivibhaṅgo
੧੯੬੪. ਏવਂ ਭਿਕ੍ਖੁવਿਭਙ੍ਗਪਾਲ਼ਿਯਾ, ਅਟ੍ਠਕਥਾਯ ਚ ਆਗਤਂ વਿਨਿਚ੍ਛਯਸਾਰਂ ਨਾਤਿਸਙ੍ਖੇਪવਿਤ੍ਥਾਰਨਯੇਨ ਦਸ੍ਸੇਤ੍વਾ ਇਦਾਨਿ ਤਦਨਨ੍ਤਰਾਯ ਭਿਕ੍ਖੁਨਿવਿਭਙ੍ਗਪਾਲ਼ਿਯਾ, ਤਦਟ੍ਠਕਥਾਯ ਚ ਆਗਤવਿਨਿਚ੍ਛਯਸਾਰਂ ਦਸ੍ਸੇਤੁਮਾਰਭਨ੍ਤੋ ਆਹ ‘‘ਭਿਕ੍ਖੁਨੀਨ’’ਨ੍ਤਿਆਦਿ। ਤਸ੍ਮਿਂ ਅਪੀਤਿ ਏਤ੍ਥ ਅਪਿ-ਸਦ੍ਦੋ વੁਤ੍ਤਾਪੇਕ੍ਖਾਯਂ। ‘‘ਸਮਾਸੇਨਾ’’ਤਿ ਇਦਂ ਗਨ੍ਥવਸੇਨ ਸਙ੍ਖਿਪਨਂ ਸਨ੍ਧਾਯ વੁਤ੍ਤਂ। ‘‘ਕਿਞ੍ਚਿਮਤ੍ਤ’’ਨ੍ਤਿ ਇਦਂ ਅਤ੍ਥવਸੇਨਾਤਿ વੇਦਿਤਬ੍ਬਂ।
1964. Evaṃ bhikkhuvibhaṅgapāḷiyā, aṭṭhakathāya ca āgataṃ vinicchayasāraṃ nātisaṅkhepavitthāranayena dassetvā idāni tadanantarāya bhikkhunivibhaṅgapāḷiyā, tadaṭṭhakathāya ca āgatavinicchayasāraṃ dassetumārabhanto āha ‘‘bhikkhunīna’’ntiādi. Tasmiṃ apīti ettha api-saddo vuttāpekkhāyaṃ. ‘‘Samāsenā’’ti idaṃ ganthavasena saṅkhipanaṃ sandhāya vuttaṃ. ‘‘Kiñcimatta’’nti idaṃ atthavasenāti veditabbaṃ.
ਪਾਰਾਜਿਕਕਥਾવਣ੍ਣਨਾ
Pārājikakathāvaṇṇanā
੧੯੬੫. ਛਨ੍ਦਸੋਤਿ ਮੇਥੁਨਸੇવਨਰਾਗਪਟਿਸਂਯੁਤ੍ਤੇਨ ਛਨ੍ਦੇਨ। ਏਤੇਨ ‘‘ਛਨ੍ਦੇ ਪਨ ਅਸਤਿ ਬਲਕ੍ਕਾਰੇਨ ਪਧਂਸਿਤਾਯ ਅਨਾਪਤ੍ਤੀ’’ਤਿ (ਕਙ੍ਖਾ॰ ਅਟ੍ਠ॰ ਮੇਥੁਨਧਮ੍ਮਸਿਕ੍ਖਾਪਦવਣ੍ਣਨਾ) ਅਟ੍ਠਕਥਾ ਸੂਚਿਤਾ ਹੋਤਿ। ਸਾ ਸਮਣੀ ਪਾਰਾਜਿਕਾ ਨਾਮ ਹੋਤੀਤਿ ਪવੁਚ੍ਚਤੀਤਿ ਯੋਜਨਾ।
1965.Chandasoti methunasevanarāgapaṭisaṃyuttena chandena. Etena ‘‘chande pana asati balakkārena padhaṃsitāya anāpattī’’ti (kaṅkhā. aṭṭha. methunadhammasikkhāpadavaṇṇanā) aṭṭhakathā sūcitā hoti. Sā samaṇī pārājikā nāma hotīti pavuccatīti yojanā.
੧੯੬੬-੭. ‘‘ਸਜੀવਸ੍ਸ ਅਪਿ ਅਜੀવਸ੍ਸਾ’’ਤਿ ਪਦਚ੍ਛੇਦੋ। ‘‘ਸਨ੍ਥਤਂ વਾ ਅਸਨ੍ਥਤ’’ਨ੍ਤਿ ਇਦਂ ‘‘ਅਙ੍ਗਜਾਤ’’ਨ੍ਤਿ ਇਮਸ੍ਸ વਿਸੇਸਨਂ। ਅਤ੍ਤਨੋ ਤਿવਿਧੇ ਮਗ੍ਗੇਤਿ ਅਤ੍ਤਨੋ વਚ੍ਚਪਸ੍ਸਾવਮੁਖਮਗ੍ਗਾਨਂ ਅਞ੍ਞਤਰਸ੍ਮਿਂ ਮਗ੍ਗੇ। ਏਤ੍ਥ ‘‘ਸਨ੍ਥਤੇ વਾ ਅਸਨ੍ਥਤੇ વਾ’’ਤਿ ਸੇਸੋ, ‘‘ਅਲ੍ਲੋਕਾਸੇ’’ਤਿ ਇਮਿਨਾ ਸਮ੍ਬਨ੍ਧੋ। ‘‘ਯੇਭੁਯ੍ਯਅਕ੍ਖਾਯਿਤਾਦਿਕ’’ਨ੍ਤਿ ਪਦਚ੍ਛੇਦੋ। ਆਦਿ-ਸਦ੍ਦੇਨ ਅਕ੍ਖਾਯਿਤਂ ਸਙ੍ਗਣ੍ਹਾਤਿ।
1966-7. ‘‘Sajīvassa api ajīvassā’’ti padacchedo. ‘‘Santhataṃ vā asanthata’’nti idaṃ ‘‘aṅgajāta’’nti imassa visesanaṃ. Attano tividhe maggeti attano vaccapassāvamukhamaggānaṃ aññatarasmiṃ magge. Ettha ‘‘santhate vā asanthate vā’’ti seso, ‘‘allokāse’’ti iminā sambandho. ‘‘Yebhuyyaakkhāyitādika’’nti padacchedo. Ādi-saddena akkhāyitaṃ saṅgaṇhāti.
ਮਨੁਸ੍ਸਪੁਰਿਸਾਦੀਨਂ ਨવਨ੍ਨਂ ਸਜੀવਸ੍ਸਪਿ ਅਜੀવਸ੍ਸਪਿ ਯਸ੍ਸ ਕਸ੍ਸਚਿ ਸਨ੍ਥਤਂ વਾ ਅਸਨ੍ਥਤਂ વਾ ਯੇਭੁਯ੍ਯਕ੍ਖਾਯਿਤਾਦਿਕਂ ਅਙ੍ਗਜਾਤਂ ਅਤ੍ਤਨੋ ਸਨ੍ਥਤੇ વਾ ਅਸਨ੍ਥਤੇ વਾ ਤਿવਿਧੇ ਮਗ੍ਗੇ ਅਲ੍ਲੋਕਾਸੇ ਤਿਲਫਲਮਤ੍ਤਮ੍ਪਿ ਪવੇਸੇਨ੍ਤੀ ਪਰਾਜਿਤਾਤਿ ਯੋਜਨਾ।
Manussapurisādīnaṃ navannaṃ sajīvassapi ajīvassapi yassa kassaci santhataṃ vā asanthataṃ vā yebhuyyakkhāyitādikaṃ aṅgajātaṃ attano santhate vā asanthate vā tividhe magge allokāse tilaphalamattampi pavesentī parājitāti yojanā.
੧੯੬੮. ਸਾਧਾਰਣવਿਨਿਚ੍ਛਯਨ੍ਤਿ ਭਿਕ੍ਖੁਭਿਕ੍ਖੁਨੀਨਂ ਸਾਧਾਰਣਸਿਕ੍ਖਾਪਦવਿਨਿਚ੍ਛਯਂ।
1968.Sādhāraṇavinicchayanti bhikkhubhikkhunīnaṃ sādhāraṇasikkhāpadavinicchayaṃ.
੧੯੬੯-੭੦. ਅਧਕ੍ਖਕਨ੍ਤਿ ਏਤ੍ਥ ਅਕ੍ਖਕਾਨਂ ਅਧੋਤਿ વਿਗ੍ਗਹੋ। ਉਬ੍ਭਜਾਣੁਮਣ੍ਡਲਨ੍ਤਿ ਜਾਣੁਮਣ੍ਡਲਾਨਂ ਉਬ੍ਭਨ੍ਤਿ વਿਗ੍ਗਹੋ। ਉਬ੍ਭ-ਸਦ੍ਦੋ ਉਦ੍ਧਂ-ਸਦ੍ਦਪਰਿਯਾਯੋ। ਇਧ ‘‘ਅਤ੍ਤਨੋ’’ਤਿ ਸੇਸੋ। ਅવਸ੍ਸੁਤਸ੍ਸਾਤਿ ਕਾਯਸਂਸਗ੍ਗਰਾਗੇਨ ਤਿਨ੍ਤਸ੍ਸ। ਅવਸ੍ਸੁਤਾਤਿ ਏਤ੍ਥਾਪਿ ਏਸੇવ ਨਯੋ। ਯਾਤਿ વੁਤ੍ਤਤ੍ਤਾ ‘‘ਸਾ’’ਤਿ ਲਬ੍ਭਤਿ। ਸਰੀਰਨ੍ਤਿ ਏਤ੍ਥ ‘‘ਯਂ ਕਿਞ੍ਚੀ’’ਤਿ ਸੇਸੋ। ਪਰੋਪਕ੍ਕਮਮੂਲਕਂ ਪਾਰਾਜਿਕਂ ਦਸ੍ਸੇਤੁਮਾਹ ‘‘ਤੇਨ વਾ ਫੁਟ੍ਠਾ’’ਤਿ। ਏਤ੍ਥ ‘‘ਯਥਾਪਰਿਚ੍ਛਿਨ੍ਨੇ ਕਾਯੇ’’ਤਿ ਚ ‘‘ਸਾਦਿਯੇਯ੍ਯਾ’’ਤਿ ਚ વਤ੍ਤਬ੍ਬਂ।
1969-70.Adhakkhakanti ettha akkhakānaṃ adhoti viggaho. Ubbhajāṇumaṇḍalanti jāṇumaṇḍalānaṃ ubbhanti viggaho. Ubbha-saddo uddhaṃ-saddapariyāyo. Idha ‘‘attano’’ti seso. Avassutassāti kāyasaṃsaggarāgena tintassa. Avassutāti etthāpi eseva nayo. Yāti vuttattā ‘‘sā’’ti labbhati. Sarīranti ettha ‘‘yaṃ kiñcī’’ti seso. Paropakkamamūlakaṃ pārājikaṃ dassetumāha ‘‘tena vā phuṭṭhā’’ti. Ettha ‘‘yathāparicchinne kāye’’ti ca ‘‘sādiyeyyā’’ti ca vattabbaṃ.
ਯਾ ਪਨ ਭਿਕ੍ਖੁਨੀ ਅવਸ੍ਸੁਤਾ ਅવਸ੍ਸੁਤਸ੍ਸ ਮਨੁਸ੍ਸਪੁਗ੍ਗਲਸ੍ਸ ਯਂ ਕਿਞ੍ਚਿ ਸਰੀਰਂ ਅਤ੍ਤਨੋ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਯਂ ਸਰੀਰਕਂ, ਤੇਨ ਸਰੀਰਕੇਨ ਛੁਪੇਯ੍ਯ, ਤੇਨ ਮਨੁਸ੍ਸਪੁਰਿਸੇਨ ਯਥਾਪਰਿਚ੍ਛਿਨ੍ਨੇ ਕਾਯੇ ਫੁਟ੍ਠਾ ਸਾਦਿਯੇਯ੍ਯ વਾ, ਸਾ ਪਾਰਾਜਿਕਾ ਸਿਯਾਤਿ ਯੋਜਨਾ।
Yā pana bhikkhunī avassutā avassutassa manussapuggalassa yaṃ kiñci sarīraṃ attano adhakkhakaṃ ubbhajāṇumaṇḍalaṃ yaṃ sarīrakaṃ, tena sarīrakena chupeyya, tena manussapurisena yathāparicchinne kāye phuṭṭhā sādiyeyya vā, sā pārājikā siyāti yojanā.
੧੯੭੧-੨. ‘‘ਗਹਿਤਂ ਉਬ੍ਭਜਾਣੁਨਾ’’ਤਿ ਇਮਿਨਾ ਕਪ੍ਪਰਤੋ ਉਦ੍ਧਂ ਪਾਰਾਜਿਕਕ੍ਖੇਤ੍ਤਮੇવਾਤਿ ਦੀਪੇਤਿ। ਅਤ੍ਤਨੋ ਯਥਾવੁਤ੍ਤਪ੍ਪਕਾਰੇਨ ਕਾਯੇਨਾਤਿ ਯੋਜਨਾ, ਅਤ੍ਤਨੋ ‘‘ਅਧਕ੍ਖਕ’’ਨ੍ਤਿਆਦਿવੁਤ੍ਤਪ੍ਪਕਾਰੇਨ ਕਾਯੇਨਾਤਿ ਅਤ੍ਥੋ। ਤਥਾ ਅવਸ੍ਸੁਤਾਯ ਅવਸ੍ਸੁਤਸ੍ਸ ਪੁਰਿਸਸ੍ਸ ਕਾਯਪਟਿਬਦ੍ਧਂ ਫੁਸਨ੍ਤਿਯਾ ਥੁਲ੍ਲਚ੍ਚਯਂ ਹੋਤਿ। ਅਤ੍ਤਨੋ ਯਥਾਪਰਿਚ੍ਛਿਨ੍ਨਕਾਯਪਟਿਬਦ੍ਧੇਨ ਤਥਾ ਅવਸ੍ਸੁਤਾਯ ਅવਸ੍ਸੁਤਸ੍ਸ ਪੁਰਿਸਸ੍ਸ ਕਾਯਂ ਫੁਸਨ੍ਤਿਯਾ ਥੁਲ੍ਲਚ੍ਚਯਂ ਹੋਤਿ।
1971-2.‘‘Gahitaṃ ubbhajāṇunā’’ti iminā kapparato uddhaṃ pārājikakkhettamevāti dīpeti. Attano yathāvuttappakārena kāyenāti yojanā, attano ‘‘adhakkhaka’’ntiādivuttappakārena kāyenāti attho. Tathā avassutāya avassutassa purisassa kāyapaṭibaddhaṃ phusantiyā thullaccayaṃ hoti. Attano yathāparicchinnakāyapaṭibaddhena tathā avassutāya avassutassa purisassa kāyaṃ phusantiyā thullaccayaṃ hoti.
੧੯੭੩. ਅਤ੍ਤਨੋ ਅવਸੇਸੇਨ ਕਾਯੇਨ ਅવਸ੍ਸੁਤਾਯ ਅવਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਂ ਫੁਸਨ੍ਤਿਯਾ ਥੁਲ੍ਲਚ੍ਚਯਂ ਹੋਤਿ। ਏવਂ ਅਤ੍ਤਨੋ ਪਯੋਗੇ ਚ ਪੁਰਿਸਸ੍ਸ ਪਯੋਗੇ ਚ ਤਸ੍ਸਾ ਭਿਕ੍ਖੁਨਿਯਾਯੇવ ਥੁਲ੍ਲਚ੍ਚਯਂ ਹੋਤੀਤਿ ਯੋਜਨਾ।
1973. Attano avasesena kāyena avassutāya avassutassa purisapuggalassa kāyaṃ phusantiyā thullaccayaṃ hoti. Evaṃ attano payoge ca purisassa payoge ca tassā bhikkhuniyāyeva thullaccayaṃ hotīti yojanā.
੧੯੭੪. ਯਕ੍ਖਪੇਤਤਿਰਚ੍ਛਾਨਪਣ੍ਡਕਾਨਂ ਕਾਯਂ ‘‘ਅਧਕ੍ਖਕਂ ਉਬ੍ਭਜਾਣੁਮਣ੍ਡਲ’’ਨ੍ਤਿ ਯਥਾਪਰਿਚ੍ਛਿਨ੍ਨਂ ਤਥੇવ ਅਤ੍ਤਨੋ ਕਾਯੇਨ ਉਭਤੋਅવਸ੍ਸવੇ ਸਤਿ ਫੁਸਨ੍ਤਿਯਾ ਅਸ੍ਸਾ ਭਿਕ੍ਖੁਨਿਯਾ ਥੁਲ੍ਲਚ੍ਚਯਂ, ਤਥੇવ ਯਕ੍ਖਾਦੀਨਂ ਪਯੋਗੇਪਿ ਤਸ੍ਸਾਯੇવ ਥੁਲ੍ਲਚ੍ਚਯਂ ਹੋਤੀਤਿ ਯੋਜਨਾ।
1974. Yakkhapetatiracchānapaṇḍakānaṃ kāyaṃ ‘‘adhakkhakaṃ ubbhajāṇumaṇḍala’’nti yathāparicchinnaṃ tatheva attano kāyena ubhatoavassave sati phusantiyā assā bhikkhuniyā thullaccayaṃ, tatheva yakkhādīnaṃ payogepi tassāyeva thullaccayaṃ hotīti yojanā.
੧੯੭੫. ਏਕਤੋવਸ੍ਸવੇ ਚਾਪੀਤਿ ਭਿਕ੍ਖੁਨਿਯਾ વਸੇਨ ਏਕਤੋਅવਸ੍ਸવੇ ਚਾਪਿ। ਥੁਲ੍ਲਚ੍ਚਯਮੁਦੀਰਿਤਨ੍ਤਿ ਪਾਰਾਜਿਕਕ੍ਖੇਤ੍ਤਭੂਤੇਨ ਅਤ੍ਤਨੋ ਕਾਯੇਨ ਮਨੁਸ੍ਸਪੁਰਿਸਸ੍ਸ ਕਾਯਂ ਫੁਸਨ੍ਤਿਯਾ ਥੁਲ੍ਲਚ੍ਚਯਂ ਅਟ੍ਠਕਥਾਯਂ (ਪਾਚਿ॰ ਅਟ੍ਠ॰ ੬੬੨) વੁਤ੍ਤਨ੍ਤਿ ਅਤ੍ਥੋ। ਅવਸੇਸੇ ਚ ਸਬ੍ਬਤ੍ਥਾਤਿ ਯਥਾવੁਤ੍ਤਪਾਰਾਜਿਕਕ੍ਖੇਤ੍ਤਤੋ ਅવਸੇਸੇ ਥੁਲ੍ਲਚ੍ਚਯਕ੍ਖੇਤ੍ਤੇ ਸਬ੍ਬਤ੍ਥ ਏਕਤੋਅવਸ੍ਸવੇ ਸਤਿ ਦੁਕ੍ਕਟਂ ਹੋਤੀਤਿ ਅਤ੍ਥੋ। ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਾਮਸਨਾਦੀਸੁ ਸਬ੍ਬਤ੍ਥ ਉਭਤੋਅવਸ੍ਸવੇ વਾ ਏਕਤੋਅવਸ੍ਸવੇ વਾ ਦੁਕ੍ਕਟਮੇવ ਹੋਤਿ।
1975.Ekatovassave cāpīti bhikkhuniyā vasena ekatoavassave cāpi. Thullaccayamudīritanti pārājikakkhettabhūtena attano kāyena manussapurisassa kāyaṃ phusantiyā thullaccayaṃ aṭṭhakathāyaṃ (pāci. aṭṭha. 662) vuttanti attho. Avasese ca sabbatthāti yathāvuttapārājikakkhettato avasese thullaccayakkhette sabbattha ekatoavassave sati dukkaṭaṃ hotīti attho. Kāyapaṭibaddhena kāyapaṭibaddhāmasanādīsu sabbattha ubhatoavassave vā ekatoavassave vā dukkaṭameva hoti.
੧੯੭੬. ‘‘ਉਬ੍ਭਕ੍ਖਕਮਧੋਜਾਣੁਮਣ੍ਡਲ’’ਨ੍ਤਿ ਯਂ ਅਪਾਰਾਜਿਕਕ੍ਖੇਤ੍ਤਂ ਇਧ ਦਸ੍ਸਿਤਂ, ਏਤ੍ਥ ਏਕਤੋਅવਸ੍ਸવੇ ਦੁਕ੍ਕਟਂ ਹੋਤਿ। ਕਪ੍ਪਰਸ੍ਸ ਚ ਹੇਟ੍ਠਾਪਿ ਏਤ੍ਥੇવ ਅਧੋਜਾਣੁਮਣ੍ਡਲੇ ਸਙ੍ਗਹਂ ਗਤਨ੍ਤਿ ਯੋਜਨਾ।
1976.‘‘Ubbhakkhakamadhojāṇumaṇḍala’’nti yaṃ apārājikakkhettaṃ idha dassitaṃ, ettha ekatoavassave dukkaṭaṃ hoti. Kapparassa ca heṭṭhāpi ettheva adhojāṇumaṇḍale saṅgahaṃ gatanti yojanā.
੧੯੭੭-੯. ਭਿਕ੍ਖੁ ਭਿਕ੍ਖੁਨਿਯਾ ਸਦ੍ਧਿਂ ਸਚੇ ਕਾਯਸਂਸਗ੍ਗਂ ਕੇਲਾਯਤਿ ਸੇવਤੀਤਿ ਯੋਜਨਾ। ਭਿਕ੍ਖੁਨਿਯਾ ਨਾਸੋ ਸਿਯਾਤਿ ਸੀਲવਿਨਾਸੋ ਪਾਰਾਜਿਕਾਪਤ੍ਤਿ ਸਿਯਾਤਿ ਅਤ੍ਥੋ। ਗੇਹਪੇਮਨ੍ਤਿ ਏਤ੍ਥ ‘‘ਗੇਹਸਿਤਪੇਮ’’ਨ੍ਤਿ વਤ੍ਤਬ੍ਬੇ ਗਾਥਾਬਨ੍ਧવਸੇਨ ਸਿਤ-ਸਦ੍ਦਲੋਪੋ, ਅਤ੍ਥੋ ਪਨਸ੍ਸ ਭਿਕ੍ਖੁવਿਭਙ੍ਗੇ વੁਤ੍ਤਨਯੋવ।
1977-9. Bhikkhu bhikkhuniyā saddhiṃ sace kāyasaṃsaggaṃ kelāyati sevatīti yojanā. Bhikkhuniyā nāso siyāti sīlavināso pārājikāpatti siyāti attho. Gehapemanti ettha ‘‘gehasitapema’’nti vattabbe gāthābandhavasena sita-saddalopo, attho panassa bhikkhuvibhaṅge vuttanayova.
੧੯੮੦. ਅવਿਸੇਸੇਨਾਤਿ ‘‘ਭਿਕ੍ਖੁਨਿਯਾ’’ਤਿ વਾ ‘‘ਭਿਕ੍ਖੁਸ੍ਸਾ’’ਤਿ વਾ વਿਸੇਸਂ ਅਕਤ੍વਾ।
1980.Avisesenāti ‘‘bhikkhuniyā’’ti vā ‘‘bhikkhussā’’ti vā visesaṃ akatvā.
੧੯੮੧. ਯਸ੍ਸਾਤਿ ਭਿਕ੍ਖੁਸ੍ਸ વਾ ਭਿਕ੍ਖੁਨਿਯਾ વਾ। ਯਤ੍ਥਾਤਿ ਭਿਕ੍ਖੁਨਿਯਂ વਾ ਭਿਕ੍ਖੁਸ੍ਮਿਂ વਾ। ਮਨੋਸੁਦ੍ਧਨ੍ਤਿ ਕਾਯਸਂਸਗ੍ਗਾਦਿਰਾਗਰਹਿਤਂ। ਤਸ੍ਸ ਭਿਕ੍ਖੁਸ੍ਸ વਾ ਭਿਕ੍ਖੁਨਿਯਾ વਾ ਤਤ੍ਥ ਭਿਕ੍ਖੁਨਿਯਂ વਾ ਭਿਕ੍ਖੁਸ੍ਮਿਂ વਾ વਿਸਯੇ ਨਦੋਸਤਾ ਅਨਾਪਤ੍ਤੀਤਿ ਅਤ੍ਥੋ।
1981.Yassāti bhikkhussa vā bhikkhuniyā vā. Yatthāti bhikkhuniyaṃ vā bhikkhusmiṃ vā. Manosuddhanti kāyasaṃsaggādirāgarahitaṃ. Tassa bhikkhussa vā bhikkhuniyā vā tattha bhikkhuniyaṃ vā bhikkhusmiṃ vā visaye nadosatā anāpattīti attho.
੧੯੮੨. ਭਿਨ੍ਦਿਤ੍વਾਤਿ ਸੀਲਭੇਦਂ ਕਤ੍વਾ। ਭਿਕ੍ਖੁਨਿਯਾ ਅਪਕਤਤ੍ਤਾ ਆਹ ‘‘ਨੇવ ਹੋਤਿ ਭਿਕ੍ਖੁਨਿਦੂਸਕੋ’’ਤਿ।
1982.Bhinditvāti sīlabhedaṃ katvā. Bhikkhuniyā apakatattā āha ‘‘neva hoti bhikkhunidūsako’’ti.
੧੯੮੩. ਅਥਾਤਿ વਾਕ੍ਯਾਰਮ੍ਭੇ। ਨ ਹੋਤਾਪਤ੍ਤਿ ਭਿਕ੍ਖੁਨੋਤਿ ਏਤ੍ਥ ਭਿਕ੍ਖੁਨੀਹਿ ਕਾਯਸਂਸਗ੍ਗਸਙ੍ਘਾਦਿਸੇਸਮਾਹ।
1983.Athāti vākyārambhe. Na hotāpatti bhikkhunoti ettha bhikkhunīhi kāyasaṃsaggasaṅghādisesamāha.
੧੯੮੪. ‘‘ਖੇਤ੍ਤੇ’’ਤਿ વਕ੍ਖਮਾਨਂ ‘‘ਫੁਟ੍ਠਾ’’ਤਿ ਇਮਿਨਾ ਯੋਜੇਤ੍વਾ ‘‘ਪਾਰਾਜਿਕ’’ਨ੍ਤਿਆਦੀਹਿ, ‘‘ਥੁਲ੍ਲਚ੍ਚਯਂ ਖੇਤ੍ਤੇ’’ਤਿਆਦੀਹਿ ਚ ਸਮ੍ਬਨ੍ਧਿਤਬ੍ਬਂ। ‘‘ਪਾਰਾਜਿਕ’’ਨ੍ਤਿ વਕ੍ਖਮਾਨਤ੍ਤਾ ਫੁਟ੍ਠਾਤਿ ਏਤ੍ਥ ‘‘ਪਾਰਾਜਿਕਕ੍ਖੇਤ੍ਤੇ’’ਤਿ ਸੇਸੋ।
1984. ‘‘Khette’’ti vakkhamānaṃ ‘‘phuṭṭhā’’ti iminā yojetvā ‘‘pārājika’’ntiādīhi, ‘‘thullaccayaṃ khette’’tiādīhi ca sambandhitabbaṃ. ‘‘Pārājika’’nti vakkhamānattā phuṭṭhāti ettha ‘‘pārājikakkhette’’ti seso.
੧੯੮੫. ਤਥਾਤਿ ਨਿਚ੍ਚਲਾਪਿ ਸਾਦਿਯਤਿ। ਖੇਤ੍ਤੇਤਿ ਥੁਲ੍ਲਚ੍ਚਯਾਦੀਨਂ ਖੇਤ੍ਤੇ। ਕਾਯੇਨ ਨਿਚ੍ਚਲਾਯਪਿ ਚਿਤ੍ਤੇਨ ਸਾਦਿਯਨ੍ਤਿਯਾ ਆਪਤ੍ਤਿ ਕਸ੍ਮਾ વੁਤ੍ਤਾਤਿ ਆਹ ‘‘વੁਤ੍ਤਤ੍ਤਾ…ਪੇ॰… ਸਤ੍ਥੁਨਾ’’ਤਿ , ਭਿਕ੍ਖੁਪਾਤਿਮੋਕ੍ਖੇ વਿਯ ‘‘ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯਾ’’ਤਿ ਅવਤ੍વਾ ਇਧ ‘‘ਕਾਯਸਂਸਗ੍ਗਂ ਸਾਦਿਯੇਯ੍ਯਾ’’ਤਿ વੁਤ੍ਤਤ੍ਤਾਤਿ ਅਧਿਪ੍ਪਾਯੋ।
1985.Tathāti niccalāpi sādiyati. Khetteti thullaccayādīnaṃ khette. Kāyena niccalāyapi cittena sādiyantiyā āpatti kasmā vuttāti āha ‘‘vuttattā…pe… satthunā’’ti , bhikkhupātimokkhe viya ‘‘kāyasaṃsaggaṃ samāpajjeyyā’’ti avatvā idha ‘‘kāyasaṃsaggaṃ sādiyeyyā’’ti vuttattāti adhippāyo.
੧੯੮੬. ਤਸ੍ਸਾ ਆਪਤ੍ਤਿਯਾ। ਕ੍ਰਿਯਸਮੁਟ੍ਠਾਨਨ੍ਤਿ ਕਿਰਿਯਾਯ ਸਮੁਟ੍ਠਾਨਂ। ਏવਂ ਸਤੀਤਿ ਸਾਦਿਯਨਮਤ੍ਤੇਨੇવ ਆਪਜ੍ਜਿਤਬ੍ਬਭਾવੇ ਸਤਿ। ਇਦਨ੍ਤਿ ‘‘ਕਿਰਿਯਸਮੁਟ੍ਠਾਨ’’ਮਿਤਿવਿਧਾਨਂ। ਤਬ੍ਬਹੁਲੇਨੇવ ਨਯੇਨਾਤਿ ਕਿਰਿਯਸਮੁਟ੍ਠਾਨਬਾਹੁਲ੍ਲੇਨ ਨਯੇਨ ਖਦਿਰવਨਾਦਿવੋਹਾਰੋ વਿਯਾਤਿ ਦਟ੍ਠਬ੍ਬਂ।
1986.Tassā āpattiyā. Kriyasamuṭṭhānanti kiriyāya samuṭṭhānaṃ. Evaṃ satīti sādiyanamatteneva āpajjitabbabhāve sati. Idanti ‘‘kiriyasamuṭṭhāna’’mitividhānaṃ. Tabbahuleneva nayenāti kiriyasamuṭṭhānabāhullena nayena khadiravanādivohāro viyāti daṭṭhabbaṃ.
੧੯੮੭. ਤਸ੍ਸਾ ਭਿਕ੍ਖੁਨਿਯਾ ਅਸਞ੍ਚਿਚ੍ਚ વਿਰਜ੍ਝਿਤ੍વਾ ਆਮਸਨ੍ਤਿਯਾ ਅਨਾਪਤ੍ਤਿ, ‘‘ਅਯਂ ਪੁਰਿਸੋ’’ਤਿ વਾ ‘‘ਇਤ੍ਥੀ’’ਤਿ વਾ ਅਜਾਨਿਤ੍વਾ ਆਮਸਨ੍ਤਿਯਾ ਅਨਾਪਤ੍ਤਿ, ਪੁਰਿਸਸ੍ਸ ਆਮਸਨੇ ਸਤਿ ਫਸ੍ਸਂ ਅਸਾਦਿਯਨ੍ਤਿਯਾ વਾ ਅਨਾਪਤ੍ਤੀਤਿ ਯੋਜਨਾ।
1987.Tassā bhikkhuniyā asañcicca virajjhitvā āmasantiyā anāpatti, ‘‘ayaṃ puriso’’ti vā ‘‘itthī’’ti vā ajānitvā āmasantiyā anāpatti, purisassa āmasane sati phassaṃ asādiyantiyā vā anāpattīti yojanā.
੧੯੮੮. ਖਿਤ੍ਤਚਿਤ੍ਤਾਯਾਤਿ ਯਕ੍ਖੁਮ੍ਮਤ੍ਤਾਯ। ਉਮ੍ਮਤ੍ਤਿਕਾਯ વਾਤਿ ਪਿਤ੍ਤਕੋਪੇਨ ਉਮ੍ਮਾਦਪ੍ਪਤ੍ਤਾਯ। ਇਦਞ੍ਚ ‘‘ਅਸੁਚੀ’’ਤਿ વਾ ‘‘ਚਨ੍ਦਨ’’ਨ੍ਤਿ વਾ વਿਸੇਸਤਂ ਅਜਾਨਨਮੇવ ਪਮਾਣਂ।
1988.Khittacittāyāti yakkhummattāya. Ummattikāya vāti pittakopena ummādappattāya. Idañca ‘‘asucī’’ti vā ‘‘candana’’nti vā visesataṃ ajānanameva pamāṇaṃ.
ਉਬ੍ਭਜਾਣੁਮਣ੍ਡਲਕਥਾવਣ੍ਣਨਾ।
Ubbhajāṇumaṇḍalakathāvaṇṇanā.
੧੯੮੯-੯੦. ‘‘ਪਾਰਾਜਿਕਤ੍ਤਂ ਜਾਨਨ੍ਤੀ’’ਤਿ ਇਮਿਨਾ ਅવਸੇਸਾਪਤ੍ਤਿਂ ਜਾਨਿਤ੍વਾ ਛਾਦੇਨ੍ਤਿਯਾ ਪਾਰਾਜਿਕਾਭਾવਂ ਦੀਪੇਤਿ। ਸਲਿਙ੍ਗੇ ਤੁ ਠਿਤਾਯਾਤਿ ਪਬ੍ਬਜ੍ਜਾਲਿਙ੍ਗੇਯੇવ ਠਿਤਾਯ। ਇਤਿ ਧੁਰੇ ਨਿਕ੍ਖਿਤ੍ਤਮਤ੍ਤਸ੍ਮਿਨ੍ਤਿ ਯੋਜਨਾ। ਇਤਿ-ਸਦ੍ਦੋ ਨਿਦਸ੍ਸਨੇ। ਇਤਰਾਯ ਪੁਬ੍ਬੇਯੇવ ਆਪਨ੍ਨਤ੍ਤਾ ਤਮਪੇਕ੍ਖਿਤ੍વਾ ‘‘ਸਾ ਚਾ’’ਤਿ ਆਹ।
1989-90.‘‘Pārājikattaṃ jānantī’’ti iminā avasesāpattiṃ jānitvā chādentiyā pārājikābhāvaṃ dīpeti. Saliṅge tu ṭhitāyāti pabbajjāliṅgeyeva ṭhitāya. Iti dhure nikkhittamattasminti yojanā. Iti-saddo nidassane. Itarāya pubbeyeva āpannattā tamapekkhitvā ‘‘sā cā’’ti āha.
੧੯੯੧. વੁਤ੍ਤਾવਿਸਿਟ੍ਠਂ ਸਬ੍ਬਂ વਿਨਿਚ੍ਛਯਂ ਸਙ੍ਗਹੇਤੁਮਾਹ ‘‘ਸੇਸ’’ਨ੍ਤਿਆਦਿ। ਤਤ੍ਥਾਤਿ ਦੁਟ੍ਠੁਲ੍ਲਪਟਿਚ੍ਛਾਦਨੇ।
1991. Vuttāvisiṭṭhaṃ sabbaṃ vinicchayaṃ saṅgahetumāha ‘‘sesa’’ntiādi. Tatthāti duṭṭhullapaṭicchādane.
વਜ੍ਜਪਟਿਚ੍ਛਾਦਿਕਥਾવਣ੍ਣਨਾ।
Vajjapaṭicchādikathāvaṇṇanā.
੧੯੯੨-੫. ਸਙ੍ਘੇਨਾਤਿ ਸਮਗ੍ਗੇਨ ਸਙ੍ਘੇਨ। ਉਕ੍ਖਿਤ੍ਤਕੋਤਿ ਆਪਤ੍ਤਿਯਾ ਅਦਸ੍ਸਨਾਦੀਸੁ ਉਕ੍ਖਿਤ੍ਤਕੋ। ‘‘ਉਕ੍ਖੇਪਨੇ ਠਿਤੋ’’ਤਿ ਇਮਿਨਾ ਉਕ੍ਖੇਪਨੀਯਕਮ੍ਮਕਤਸ੍ਸ ਅਨੋਸਾਰਿਤਭਾવਂ ਦੀਪੇਤਿ। ਯਾ ਦਿਟ੍ਠਿ ਏਤਸ੍ਸਾਤਿ ਯਂਦਿਟ੍ਠਿਕੋ, ਸੋ ਉਕ੍ਖਿਤ੍ਤਕੋ ਭਿਕ੍ਖੁ ਯਾਯ ਦਿਟ੍ਠਿਯਾ ਸਮਨ੍ਨਾਗਤੋ ਹੋਤੀਤਿ ਅਧਿਪ੍ਪਾਯੋ । ‘‘ਤਸ੍ਸਾ ਦਿਟ੍ਠਿਯਾ ਗਹਣੇਨਾ’’ਤਿ ਇਮਿਨਾ ਅਨੁવਤ੍ਤਪ੍ਪਕਾਰੋ ਦਸ੍ਸਿਤੋ। ਤਂ ਉਕ੍ਖਿਤ੍ਤਕਂ ਭਿਕ੍ਖੁਨ੍ਤਿ ਯੋਜਨਾ। ਸਾ ਭਿਕ੍ਖੁਨੀ ਅਞ੍ਞਾਹਿ ਭਿਕ੍ਖੁਨੀਹਿ વਿਸੁਮ੍ਪਿਚ ਸਙ੍ਘਮਜ੍ਝੇਪਿ ‘‘ਏਸੋ ਖੋ ਅਯ੍ਯੇ ਭਿਕ੍ਖੁ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤੋ’’ਤਿਆਦਿਨਾ (ਪਾਚਿ॰ ੬੬੯) ਨਯੇਨ ਤਿਕ੍ਖਤ੍ਤੁਂ વੁਚ੍ਚਮਾਨਾਤਿ ਯੋਜਨਾ। ਤਂ વਤ੍ਥੁਂ ਅਚਜਨ੍ਤੀ ਗਹੇਤ੍વਾ ਯਦਿ ਤਥੇવ ਤਿਟ੍ਠਤੀਤਿ ਯੋਜਨਾ। ਏਤ੍ਥ ‘‘ਯਾવਤਤਿਯਂ ਸਮਨੁਭਾਸਿਤਬ੍ਬਾ’’ਤਿ ਸੇਸੋ। ਤਸ੍ਸ ਕਮ੍ਮਸ੍ਸ ਓਸਾਨੇਤਿ ਤਤਿਯਾਯ ਕਮ੍ਮવਾਚਾਯ ਯ੍ਯਕਾਰਪ੍ਪਤ੍ਤવਸੇਨ ਅਸ੍ਸ ਸਮਨੁਭਾਸਨਕਮ੍ਮਸ੍ਸ ਪਰਿਯੋਸਾਨੇ। ਅਸਾਕਿਯਧੀਤਰਾਤਿ ਅਸਾਕਿਯਧੀਤਾ, ਪਚ੍ਚਤ੍ਤੇ ਕਰਣવਚਨਂ। ‘‘ਪੁਨ ਅਪ੍ਪਟਿਸਨ੍ਧੇਯਾ’’ਤਿ ਇਮਿਨਾ ਪੁਨ ਤੇਨੇવ ਚ ਅਤ੍ਤਭਾવੇਨ ਭਿਕ੍ਖੁਨਿਭਾવੇ ਪਟਿਸਨ੍ਧਾਤੁਂ ਅਨਰਹਤਾ વੁਤ੍ਤਾ।
1992-5.Saṅghenāti samaggena saṅghena. Ukkhittakoti āpattiyā adassanādīsu ukkhittako. ‘‘Ukkhepane ṭhito’’ti iminā ukkhepanīyakammakatassa anosāritabhāvaṃ dīpeti. Yā diṭṭhi etassāti yaṃdiṭṭhiko, so ukkhittako bhikkhu yāya diṭṭhiyā samannāgato hotīti adhippāyo . ‘‘Tassā diṭṭhiyā gahaṇenā’’ti iminā anuvattappakāro dassito. Taṃ ukkhittakaṃ bhikkhunti yojanā. Sā bhikkhunī aññāhi bhikkhunīhi visumpica saṅghamajjhepi ‘‘eso kho ayye bhikkhu samaggena saṅghena ukkhitto’’tiādinā (pāci. 669) nayena tikkhattuṃ vuccamānāti yojanā. Taṃ vatthuṃ acajantī gahetvā yadi tatheva tiṭṭhatīti yojanā. Ettha ‘‘yāvatatiyaṃ samanubhāsitabbā’’ti seso. Tassa kammassa osāneti tatiyāya kammavācāya yyakārappattavasena assa samanubhāsanakammassa pariyosāne. Asākiyadhītarāti asākiyadhītā, paccatte karaṇavacanaṃ. ‘‘Puna appaṭisandheyā’’ti iminā puna teneva ca attabhāvena bhikkhunibhāve paṭisandhātuṃ anarahatā vuttā.
੧੯੯੬. ਤਿਕਦੁਕ੍ਕਟਂ ਨਿਦ੍ਦਿਟ੍ਠਨ੍ਤਿ ਅਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਾ, વੇਮਤਿਕਾ, ਧਮ੍ਮਕਮ੍ਮਸਞ੍ਞਾਤਿ ਏਤਾਸਂ વਸੇਨ ਤਿਕਦੁਕ੍ਕਟਂ વੁਤ੍ਤਂ। ਸਮਨੁਭਾਸਨੇ વੁਤ੍ਤਾ ਸਮੁਟ੍ਠਾਨਾਦਯੋ ਸਬ੍ਬੇ ਇਧ વਤ੍ਤਬ੍ਬਾਤਿ ਯੋਜਨਾ।
1996.Tikadukkaṭaṃ niddiṭṭhanti adhammakamme adhammakammasaññā, vematikā, dhammakammasaññāti etāsaṃ vasena tikadukkaṭaṃ vuttaṃ. Samanubhāsane vuttā samuṭṭhānādayo sabbe idha vattabbāti yojanā.
ਉਕ੍ਖਿਤ੍ਤਾਨੁવਤ੍ਤਿਕਕਥਾવਣ੍ਣਨਾ।
Ukkhittānuvattikakathāvaṇṇanā.
੧੯੯੭. ‘‘ਹਤ੍ਥਗ੍ਗਹਣਂ વਾ ਸਾਦਿਯੇਯ੍ਯਾਤਿ ਹਤ੍ਥੋ ਨਾਮ ਕਪ੍ਪਰਂ ਉਪਾਦਾਯ ਯਾવ ਅਗ੍ਗਨਖਾ। ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇવਨਤ੍ਥਾਯ ਉਬ੍ਭਕ੍ਖਕਂ ਅਧੋਜਾਣੁਮਣ੍ਡਲਂ ਗਹਣਂ ਸਾਦਿਯਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਚਿ॰ ੬੭੬) વੁਤ੍ਤਤ੍ਤਾ ਆਹ ‘‘ਅਪਾਰਾਜਿਕਖੇਤ੍ਤਸ੍ਸਾ’’ਤਿਆਦਿ। ‘‘ਤ’’ਨ੍ਤਿ વਕ੍ਖਮਾਨਤ੍ਤਾ ‘‘ਯ’’ਨ੍ਤਿ ਲਬ੍ਭਤਿ। ਅਪਾਰਾਜਿਕਕ੍ਖੇਤ੍ਤਸ੍ਸ ਯਸ੍ਸ ਕਸ੍ਸਚਿ ਅਙ੍ਗਸ੍ਸ ਯਂ ਗਹਣਂ, ਤਂ ਹਤ੍ਥਗ੍ਗਹਣਨ੍ਤਿ ਪવੁਚ੍ਚਤੀਤਿ ਯੋਜਨਾ। ਹਤ੍ਥੇ ਗਹਣਂ ਹਤ੍ਥਗ੍ਗਹਣਂ।
1997. ‘‘Hatthaggahaṇaṃ vā sādiyeyyāti hattho nāma kapparaṃ upādāya yāva agganakhā. Etassa asaddhammassa paṭisevanatthāya ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassā’’ti (pāci. 676) vuttattā āha ‘‘apārājikakhettassā’’tiādi. ‘‘Ta’’nti vakkhamānattā ‘‘ya’’nti labbhati. Apārājikakkhettassa yassa kassaci aṅgassa yaṃ gahaṇaṃ, taṃ hatthaggahaṇanti pavuccatīti yojanā. Hatthe gahaṇaṃ hatthaggahaṇaṃ.
੧੯੯੮. ਯਸ੍ਸ ਕਸ੍ਸਚੀਤਿ વੁਤ੍ਤਪ੍ਪਕਾਰੇਨ ਯਸ੍ਸ ਕਸ੍ਸਚਿ ਚੀવਰਸ੍ਸ ਯਂ ਗਹਣਨ੍ਤਿ ਯੋਜਨਾ।
1998.Yassa kassacīti vuttappakārena yassa kassaci cīvarassa yaṃ gahaṇanti yojanā.
੧੯੯੯. ਅਸਦ੍ਧਮ੍ਮ-ਸਦ੍ਦੇਨ ਮੇਥੁਨਸ੍ਸਾਪਿ વੁਚ੍ਚਮਾਨਤ੍ਤਾ ਤਤੋ વਿਸੇਸੇਤੁਮਾਹ ‘‘ਕਾਯਸਂਸਗ੍ਗ …ਪੇ॰… ਕਾਰਣਾ’’ਤਿ। ਭਿਕ੍ਖੁਨੀ ਕਾਯਸਂਸਗ੍ਗਸਙ੍ਖਾਤਸ੍ਸ ਅਸਦ੍ਧਮ੍ਮਸ੍ਸ ਕਾਰਣਾ ਪੁਰਿਸਸ੍ਸ ਹਤ੍ਥਪਾਸਸ੍ਮਿਂ ਤਿਟ੍ਠੇਯ੍ਯ વਾਤਿ ਯੋਜਨਾ।
1999. Asaddhamma-saddena methunassāpi vuccamānattā tato visesetumāha ‘‘kāyasaṃsagga…pe… kāraṇā’’ti. Bhikkhunī kāyasaṃsaggasaṅkhātassa asaddhammassa kāraṇā purisassa hatthapāsasmiṃ tiṭṭheyya vāti yojanā.
੨੦੦੦. ਤਤੋਤਿ ਤਸ੍ਸ ਅਸਦ੍ਧਮ੍ਮਸ੍ਸ ਕਾਰਣਾ। ਤਤ੍ਥਾਤਿ ਹਤ੍ਥਪਾਸੇ। ਪੁਰਿਸੇਨਾਤਿ ਏਤ੍ਥ ‘‘ਕਤ’’ਨ੍ਤਿ ਸੇਸੋ, ‘‘ਸਙ੍ਕੇਤ’’ਨ੍ਤਿ ਇਮਿਨਾ ਸਮ੍ਬਨ੍ਧੋ। ‘‘ਆਗਮਨਂ ਅਸ੍ਸਾ’’ਤਿ ਪਦਚ੍ਛੇਦੋ। ਇਚ੍ਛੇਯ੍ਯਾਤਿ વੁਤ੍ਤੇਪਿ ਨ ਗਮਨਿਚ੍ਛਾਮਤ੍ਤੇਨ, ਅਥ ਖੋ ਭਿਕ੍ਖੁਨਿਯਾ ਪੁਰਿਸਸ੍ਸ ਹਤ੍ਥਪਾਸਂ, ਪੁਰਿਸੇਨ ਚ ਭਿਕ੍ਖੁਨਿਯਾ ਹਤ੍ਥਪਾਸਂ ਓਕ੍ਕਨ੍ਤਕਾਲੇਯੇવ વਤ੍ਥੁਪੂਰਣਂ ਦਟ੍ਠਬ੍ਬਂ। ਯਥਾਹ ‘‘ਸਙ੍ਕੇਤਂ વਾ ਗਚ੍ਛੇਯ੍ਯਾਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇવਨਤ੍ਥਾਯ ਪੁਰਿਸੇਨ ‘ਇਤ੍ਥਨ੍ਨਾਮਂ ਆਗਚ੍ਛਾ’ਤਿ વੁਤ੍ਤਾ ਗਚ੍ਛਤਿ, ਪਦੇ ਪਦੇ ਆਪਤ੍ਤਿ ਦੁਕ੍ਕਟਸ੍ਸ। ਪੁਰਿਸਸ੍ਸ ਹਤ੍ਥਪਾਸਂ ਓਕ੍ਕਨ੍ਤਮਤ੍ਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਚਿ॰ ੬੭੬) ਚ ‘‘ਪੁਰਿਸਸ੍ਸ ਅਬ੍ਭਾਗਮਨਂ ਸਾਦਿਯਤਿ, ਆਪਤ੍ਤਿ ਦੁਕ੍ਕਟਸ੍ਸ। ਹਤ੍ਥਪਾਸਂ ਓਕ੍ਕਨ੍ਤਮਤ੍ਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਚਿ॰ ੬੭੬) ਚ। ਏਤ੍ਥ ਚ ਇਤ੍ਥਨ੍ਨਾਮਂ ਆਗਚ੍ਛਾਤਿ ਇਤ੍ਥਨ੍ਨਾਮਂ ਠਾਨਂ ਆਗਚ੍ਛਾਤਿ ਅਤ੍ਥੋ।
2000.Tatoti tassa asaddhammassa kāraṇā. Tatthāti hatthapāse. Purisenāti ettha ‘‘kata’’nti seso, ‘‘saṅketa’’nti iminā sambandho. ‘‘Āgamanaṃ assā’’ti padacchedo. Iccheyyāti vuttepi na gamanicchāmattena, atha kho bhikkhuniyā purisassa hatthapāsaṃ, purisena ca bhikkhuniyā hatthapāsaṃ okkantakāleyeva vatthupūraṇaṃ daṭṭhabbaṃ. Yathāha ‘‘saṅketaṃ vā gaccheyyāti etassa asaddhammassa paṭisevanatthāya purisena ‘itthannāmaṃ āgacchā’ti vuttā gacchati, pade pade āpatti dukkaṭassa. Purisassa hatthapāsaṃ okkantamatte āpatti thullaccayassā’’ti (pāci. 676) ca ‘‘purisassa abbhāgamanaṃ sādiyati, āpatti dukkaṭassa. Hatthapāsaṃ okkantamatte āpatti thullaccayassā’’ti (pāci. 676) ca. Ettha ca itthannāmaṃ āgacchāti itthannāmaṃ ṭhānaṃ āgacchāti attho.
੨੦੦੧. ਤਦਤ੍ਥਾਯਾਤਿ ਤਸ੍ਸੇવ ਕਾਯਸਂਸਗ੍ਗਸਙ੍ਖਾਤਅਸਦ੍ਧਮ੍ਮਸ੍ਸ ਸੇવਨਤ੍ਥਾਯ। ਪਟਿਚ੍ਛਨ੍ਨਟ੍ਠਾਨਞ੍ਚਾਤਿ વਤ੍ਥਾਦਿਨਾ ਯੇਨ ਕੇਨਚਿ ਪਟਿਚ੍ਛਨ੍ਨਓਕਾਸਂ। ਪੁਰਿਸਸ੍ਸ ਹਤ੍ਥਪਾਸੇ ਠਿਤਾ ਤਦਤ੍ਥਾਯ ਕਾਯਂ ਉਪਸਂਹਰੇਯ੍ਯ વਾਤਿ ਯੋਜਨਾ।
2001.Tadatthāyāti tasseva kāyasaṃsaggasaṅkhātaasaddhammassa sevanatthāya. Paṭicchannaṭṭhānañcāti vatthādinā yena kenaci paṭicchannaokāsaṃ. Purisassa hatthapāse ṭhitā tadatthāya kāyaṃ upasaṃhareyya vāti yojanā.
੨੦੦੨. ਹਤ੍ਥਗ੍ਗਹਣਾਦੀਨਂ વੁਤ੍ਤਪ੍ਪਕਾਰਾਨਂ ਅਟ੍ਠਨ੍ਨਂ વਤ੍ਥੂਨਂ ਪੂਰਣੇਨ ‘‘ਅਟ੍ਠવਤ੍ਥੁਕਾ’’ਤਿ ਸਙ੍ਖਾਤਾ ਅਯਂ ਭਿਕ੍ਖੁਨੀ વਿਨਟ੍ਠਾ ਹੋਤਿ ਸੀਲવਿਨਾਸੇਨ, ਤਤੋਯੇવ ਅਸ੍ਸਮਣੀ ਹੋਤਿ ਅਭਿਕ੍ਖੁਨੀ ਹੋਤੀਤਿ ਯੋਜਨਾ।
2002. Hatthaggahaṇādīnaṃ vuttappakārānaṃ aṭṭhannaṃ vatthūnaṃ pūraṇena ‘‘aṭṭhavatthukā’’ti saṅkhātā ayaṃ bhikkhunī vinaṭṭhā hoti sīlavināsena, tatoyeva assamaṇī hoti abhikkhunī hotīti yojanā.
੨੦੦੩. ਅਨੁਲੋਮੇਨ વਾਤਿ ਹਤ੍ਥਗ੍ਗਹਣਾਦਿਪਟਿਪਾਟਿਯਾ વਾ। ਪਟਿਲੋਮੇਨ વਾਤਿ ਤਬ੍ਬਿਪਰਿਯਤੋ ਪਟਿਲੋਮੇਨ વਾ। ਏਕਨ੍ਤਰਿਕਾਯ વਾਤਿ ਏਕਮੇਕਂ ਅਨ੍ਤਰਿਤ੍વਾ ਪੁਨ ਤਸ੍ਸਾਪਿ ਕਰਣવਸੇਨ ਏਕਨ੍ਤਰਿਕਾਯ વਾ। ਅਨੁਲੋਮੇਨ વਾ ਪਟਿਲੋਮੇਨ વਾ ਤਥੇਕਨ੍ਤਰਿਕਾਯ વਾ ਅਟ੍ਠਮਂ વਤ੍ਥੁਂ ਪਰਿਪੂਰੇਨ੍ਤੀ ਚੁਤਾਤਿ ਯੋਜਨਾ।
2003.Anulomenavāti hatthaggahaṇādipaṭipāṭiyā vā. Paṭilomena vāti tabbipariyato paṭilomena vā. Ekantarikāya vāti ekamekaṃ antaritvā puna tassāpi karaṇavasena ekantarikāya vā. Anulomena vā paṭilomena vā tathekantarikāya vā aṭṭhamaṃ vatthuṃ paripūrentī cutāti yojanā.
੨੦੦੪. ਏਤਦੇવ ਅਤ੍ਥਂ ਬ੍ਯਤਿਰੇਕਮੁਖੇਨ ਸਮਤ੍ਥੇਤੁਮਾਹ ‘‘ਅਥਾਦਿਤੋ’’ਤਿਆਦਿ। ਸਤਕ੍ਖਤ੍ਤੁਮ੍ਪੀਤਿ ਬਹੁਕ੍ਖਤ੍ਤੁਮ੍ਪਿ। ਸਤ-ਸਦ੍ਦੋ ਹੇਤ੍ਥ ਬਹੁ-ਸਦ੍ਦਪਰਿਯਾਯੋ। ਪਾਰਾਜਿਕਾ ਨੇવ ਸਿਯਾਤਿ ਯੋਜਨਾ, ਇਮਿਨਾ ਤਂਤਂવਤ੍ਥੁਮੂਲਕਂ ਦੁਕ੍ਕਟਥੁਲ੍ਲਚ੍ਚਯਂ ਆਪਜ੍ਜਤੀਤਿ વੁਤ੍ਤਂ ਹੋਤਿ।
2004. Etadeva atthaṃ byatirekamukhena samatthetumāha ‘‘athādito’’tiādi. Satakkhattumpīti bahukkhattumpi. Sata-saddo hettha bahu-saddapariyāyo. Pārājikā neva siyāti yojanā, iminā taṃtaṃvatthumūlakaṃ dukkaṭathullaccayaṃ āpajjatīti vuttaṃ hoti.
੨੦੦੫. ਯਾ ਪਨ ਆਪਤ੍ਤਿਯੋ ਆਪਨ੍ਨਾ, ਦੇਸੇਤ੍વਾ ਤਾਹਿ ਮੁਚ੍ਚਤੀਤਿ ਯੋਜਨਾ। ਧੁਰਨਿਕ੍ਖੇਪਨਂ ਕਤ੍વਾਤਿ ‘‘ਨ ਪੁਨੇવਂ ਕਰਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਪਿਤ੍વਾ। ਦੇਸਿਤਾ ਗਣਨੂਪਿਕਾਤਿ ਦੇਸਿਤਾ ਦੇਸਿਤਗਣਨਮੇવ ਉਪੇਤਿ, ਪਾਰਾਜਿਕਸ੍ਸ ਅਙ੍ਗਂ ਨ ਹੋਤੀਤਿ ਅਤ੍ਥੋ। ਤਸ੍ਮਾ ਯਾ ਏਕਂ ਆਪਨ੍ਨਾ, ਧੁਰਨਿਕ੍ਖੇਪਂ ਕਤ੍વਾ ਦੇਸੇਤ੍વਾ ਪੁਨ ਕਿਲੇਸવਸੇਨ ਆਪਜ੍ਜਤਿ, ਪੁਨ ਦੇਸੇਤਿ, ਏવਂ ਅਟ੍ਠ વਤ੍ਥੂਨਿ ਪੂਰੇਨ੍ਤੀਪਿ ਪਾਰਾਜਿਕਾ ਨ ਹੋਤਿ।
2005. Yā pana āpattiyo āpannā, desetvā tāhi muccatīti yojanā. Dhuranikkhepanaṃ katvāti ‘‘na punevaṃ karissāmī’’ti dhuraṃ nikkhipitvā. Desitā gaṇanūpikāti desitā desitagaṇanameva upeti, pārājikassa aṅgaṃ na hotīti attho. Tasmā yā ekaṃ āpannā, dhuranikkhepaṃ katvā desetvā puna kilesavasena āpajjati, puna deseti, evaṃ aṭṭha vatthūni pūrentīpi pārājikā na hoti.
੨੦੦੬. ਸਉਸ੍ਸਾਹਾਯ ਦੇਸਿਤਾਤਿ ਪੁਨ ਆਪਜ੍ਜਨੇ ਅਨਿਕ੍ਖਿਤ੍ਤਧੁਰਾਯ ਭਿਕ੍ਖੁਨਿਯਾ ਦੇਸਿਤਾਪਿ ਆਪਤ੍ਤਿ ਦੇਸਨਾਗਣਨਂ ਨ ਉਪੇਤਿ। ਕਿਂ ਹੋਤੀਤਿ ਆਹ ‘‘ਦੇਸਿਤਾਪਿ ਅਦੇਸਿਤਾ’’ਤਿ, ਤਸ੍ਮਾ ਪਾਰਾਜਿਕਾਪਤ੍ਤਿਯਾ ਅਙ੍ਗਮੇવ ਹੋਤੀਤਿ ਅਧਿਪ੍ਪਾਯੋ।
2006.Saussāhāya desitāti puna āpajjane anikkhittadhurāya bhikkhuniyā desitāpi āpatti desanāgaṇanaṃ na upeti. Kiṃ hotīti āha ‘‘desitāpi adesitā’’ti, tasmā pārājikāpattiyā aṅgameva hotīti adhippāyo.
੨੦੦੮. ਅਯਂ ਅਤ੍ਥੋਤਿ ‘‘ਅਸਦ੍ਧਮ੍ਮੋ ਨਾਮ ਕਾਯਸਂਸਗ੍ਗੋ’’ਤਿ ਅਯਂ ਅਤ੍ਥੋ। ਉਦ੍ਦਿਸਿਤੋਤਿ ਪਕਾਸਿਤੋ।
2008.Ayaṃ atthoti ‘‘asaddhammo nāma kāyasaṃsaggo’’ti ayaṃ attho. Uddisitoti pakāsito.
੨੦੦੯. ਅਯਮਤ੍ਥੋ ਕੇਨ વਚਨੇਨ ਉਦ੍ਦਿਸਿਤੋਤਿ ਆਹ ‘‘વਿਞ੍ਞੂ…ਪੇ॰… ਸਾਧਕਂ વਚਨਂ ਇਦ’’ਨ੍ਤਿ। ਇਦਂ વਚਨਨ੍ਤਿ ‘‘વਿਞ੍ਞੂ ਪਟਿਬਲੋ ਕਾਯਸਂਸਗ੍ਗਂ ਸਮਾਪਜ੍ਜਿਤੁ’’ਨ੍ਤਿ (ਪਾਚਿ॰ ੬੭੬) ਇਦਂ વਚਨਂ। ਸਾਧਕਂ ਪਮਾਣਂ।
2009. Ayamattho kena vacanena uddisitoti āha ‘‘viññū…pe… sādhakaṃ vacanaṃ ida’’nti. Idaṃ vacananti ‘‘viññū paṭibalo kāyasaṃsaggaṃ samāpajjitu’’nti (pāci. 676) idaṃ vacanaṃ. Sādhakaṃ pamāṇaṃ.
ਅਟ੍ਠવਤ੍ਥੁਕਕਥਾવਣ੍ਣਨਾ।
Aṭṭhavatthukakathāvaṇṇanā.
੨੦੧੦. ਅવਸ੍ਸੁਤਾ, વਜ੍ਜਪਟਿਚ੍ਛਾਦਿਕਾ, ਉਕ੍ਖਿਤ੍ਤਾਨੁવਤ੍ਤਿਕਾ, ਅਟ੍ਠવਤ੍ਥੁਕਾਤਿ ਇਮਾ ਚਤਸ੍ਸੋ ਪਾਰਾਜਿਕਾਪਤ੍ਤਿਯੋ ਮਹੇਸਿਨਾ ਅਸਾਧਾਰਣਾ ਭਿਕ੍ਖੁਨੀਨਮੇવ ਪਞ੍ਞਤ੍ਤਾਤਿ ਯੋਜਨਾ।
2010. Avassutā, vajjapaṭicchādikā, ukkhittānuvattikā, aṭṭhavatthukāti imā catasso pārājikāpattiyo mahesinā asādhāraṇā bhikkhunīnameva paññattāti yojanā.
ਇਤਿ વਿਨਯਤ੍ਥਸਾਰਸਨ੍ਦੀਪਨਿਯਾ
Iti vinayatthasārasandīpaniyā
વਿਨਯવਿਨਿਚ੍ਛਯવਣ੍ਣਨਾਯ
Vinayavinicchayavaṇṇanāya
ਪਾਰਾਜਿਕਕਥਾવਣ੍ਣਨਾ ਨਿਟ੍ਠਿਤਾ।
Pārājikakathāvaṇṇanā niṭṭhitā.
