| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
1. பாராஜிகனித்³தே³ஸவண்ணனா
1. Pārājikaniddesavaṇṇanā
1-2. இதா³னி தே த³ஸ்ஸேதுங் ‘‘மக்³க³த்தயே’’திஆதி³ ஆரத்³த⁴ங். ஏவமுபரிபி யதா²யோக³ங் யோஜேதப்³ப³ங். தத்த² மக்³க³த்தயேதி எத்த² மக்³கா³ ச நாம திங்ஸ மக்³கா³. மனுஸ்ஸாமனுஸ்ஸதிரச்சா²னக³தவஸேன ஹி திஸ்ஸோ இத்தி²யோ. தத்த² திரச்சா²னக³தாய அயங் பரிச்சே²தோ³ –
1-2. Idāni te dassetuṃ ‘‘maggattaye’’tiādi āraddhaṃ. Evamuparipi yathāyogaṃ yojetabbaṃ. Tattha maggattayeti ettha maggā ca nāma tiṃsa maggā. Manussāmanussatiracchānagatavasena hi tisso itthiyo. Tattha tiracchānagatāya ayaṃ paricchedo –
‘‘அபதா³னங் அஹீ மச்சா², த்³விபதா³னஞ்ச குக்குடீ;
‘‘Apadānaṃ ahī macchā, dvipadānañca kukkuṭī;
சதுப்பதா³னங் மஜ்ஜாரீ, வத்து² பாராஜிகஸ்ஸிமா’’தி. (பாரா॰ அட்ட²॰ 1.55);
Catuppadānaṃ majjārī, vatthu pārājikassimā’’ti. (pārā. aṭṭha. 1.55);
தாஸங் வச்சபஸ்ஸாவமுக²மக்³க³வஸேன தயோ தயோ கத்வா நவ மக்³கா³, ததா² உப⁴தொப்³யஞ்ஜனகானங், புரிஸானங் பன வச்சமுக²மக்³க³வஸேன த்³வே த்³வே கத்வா ச², ததா² பண்ட³கானந்தி திங்ஸ. தேஸங் தயே. கீதி³ஸேதி ஆஹ ‘‘ஸந்த²தஸந்த²தே’’தி. ஸந்த²தே அஸந்த²தேதி பத³ச்சே²தோ³. ந ஸந்த²தங் அஸந்த²தங். தஸ்மிங் அஸந்த²தே. ந-காரோ எத்த² ‘‘அப்³ராஹ்மணோ’’திஆதீ³ஸு விய பயிருதா³ஸே, தங் கிரியாயுத்தஸ்ஸ தாதி³ஸஸ்ஸ அஞ்ஞஸ்ஸ வத்து²னோ விதா⁴னேன ஸந்த²தஸ்ஸ வத்து²னோ பயிருதா³ஸனங் பரிச்சஜனங் பயிருதா³ஸோதி. ந பஸஜ்ஜப்படிஸேதே⁴, ஸந்த²தங் பஸஜ்ஜ பத்வா தஸ்ஸ ‘‘ப்³ராஹ்மணோ ந ப⁴விஸ்ஸதீ’’திஆதீ³ஸு விய ந நிஸேதோ⁴தி. வா-ஸத்³தோ³ பனெத்த² வசனயுத்திப³லேனேவ லப்³ப⁴தி, தஸ்ஸ பலிவேடெ²த்வா, அந்தோ வா பவேஸெத்வா வத்தா²தி³னா கேனசி படிச்ச²ன்னே வா அப்படிச்ச²ன்னே வாதி அத்தோ². ததா²பூ⁴தே அல்லோகாஸே பகதிவாதேன அஸம்பு²ட்டே² திந்தப்பதே³ஸே. நிமித்தந்தி அங்க³ஜாதங். ஸந்திஆதி³ தப்³பி³ஸேஸனங். ஸந்தி அத்தனியங். ஸங்-ஸத்³தோ³ ஹி அத்தனி அத்தனியே ச வத்ததி. ஸந்த²தங் அஸந்த²தந்தி யதா²வுத்தனயேன படிச்ச²ன்னங் வா அப்படிச்ச²ன்னங் வா. உபாதி³ண்ணந்தி அனட்ட²காயப்பஸாத³ங். கித்தகந்தி ஆஹ ‘‘திலமத்தம்பீ’’தி. திலஸ்ஸ மத்தங் ஸாகல்லங் யஸ்ஸ தங் திலமத்தங் . ‘‘மத்தங் ஸாகல்லங் நிச்ச²யே’’தி ஹி நிக⁴ண்டு³. எத்தா²பி அவயவேன விக்³க³ஹோ ஸமுதா³யோ ஸமாஸத்தோ², திலபீ³ஜப்பமாணம்பீதி வுத்தங் ஹோதி. கிங் தங்? நிமித்தங், பவேஸனங் வா. அபி-ஸத்³தோ³ ஸம்பா⁴வனே, ‘‘திலபீ³ஜமத்தம்பீ’’தி ஸம்பா⁴வீயதி, அதி⁴கே கா நாம கதா²தி இத³மெத்த² ஸம்பா⁴வனங், ஏவங்பூ⁴தங் ஸங் அங்க³ஜாதங் யதா²வுத்தே மக்³க³த்தயே திலமத்தம்பி பவேஸந்தோ பி⁴க்கு² சுதோ பரிப⁴ட்டோ², பாராஜிகோ நாம ஹோதி ஸாஸனதோதி விஞ்ஞாயதி க³ம்மமானத்த²ஸ்ஸ ஸத்³த³ஸ்ஸ பயோக³ங் பதி காமாசாரத்தா. கீதி³ஸோதி ஆஹ ‘‘அனிக்கி²த்தஸிக்கோ²’’தி. நிக்கி²த்தஸிக்கோ² பன அபி⁴க்கு²கத்தா பரிச்சத்தோ. தத்த² நிக்கி²த்தா ஓஹிதா பரிச்சத்தா பச்சக்கா²தா ஸிக்கா² ஏதேனாதி விக்³க³ஹோ. யதா²லக்க²ணங் ந நிக்கி²த்தஸிக்கோ² அனிக்கி²த்தஸிக்கோ². தத்த² சித்தகெ²த்தகாலப்பயோக³புக்³க³லவிஜானநவஸேன ஸிக்கா²பச்சக்கா²னங் ஞத்வா தத³பா⁴வேன அபச்சக்கா²னங் வேதி³தப்³ப³ங்.
Tāsaṃ vaccapassāvamukhamaggavasena tayo tayo katvā nava maggā, tathā ubhatobyañjanakānaṃ, purisānaṃ pana vaccamukhamaggavasena dve dve katvā cha, tathā paṇḍakānanti tiṃsa. Tesaṃ taye. Kīdiseti āha ‘‘santhatasanthate’’ti. Santhate asanthateti padacchedo. Na santhataṃ asanthataṃ. Tasmiṃ asanthate. Na-kāro ettha ‘‘abrāhmaṇo’’tiādīsu viya payirudāse, taṃ kiriyāyuttassa tādisassa aññassa vatthuno vidhānena santhatassa vatthuno payirudāsanaṃ pariccajanaṃ payirudāsoti. Na pasajjappaṭisedhe, santhataṃ pasajja patvā tassa ‘‘brāhmaṇo na bhavissatī’’tiādīsu viya na nisedhoti. Vā-saddo panettha vacanayuttibaleneva labbhati, tassa paliveṭhetvā, anto vā pavesetvā vatthādinā kenaci paṭicchanne vā appaṭicchanne vāti attho. Tathābhūte allokāse pakativātena asamphuṭṭhe tintappadese. Nimittanti aṅgajātaṃ. Santiādi tabbisesanaṃ. Santi attaniyaṃ. Saṃ-saddo hi attani attaniye ca vattati. Santhataṃ asanthatanti yathāvuttanayena paṭicchannaṃ vā appaṭicchannaṃ vā. Upādiṇṇanti anaṭṭhakāyappasādaṃ. Kittakanti āha ‘‘tilamattampī’’ti. Tilassa mattaṃ sākallaṃ yassa taṃ tilamattaṃ. ‘‘Mattaṃ sākallaṃ nicchaye’’ti hi nighaṇḍu. Etthāpi avayavena viggaho samudāyo samāsattho, tilabījappamāṇampīti vuttaṃ hoti. Kiṃ taṃ? Nimittaṃ, pavesanaṃ vā. Api-saddo sambhāvane, ‘‘tilabījamattampī’’ti sambhāvīyati, adhike kā nāma kathāti idamettha sambhāvanaṃ, evaṃbhūtaṃ saṃ aṅgajātaṃ yathāvutte maggattaye tilamattampi pavesanto bhikkhu cuto paribhaṭṭho, pārājiko nāma hoti sāsanatoti viññāyati gammamānatthassa saddassa payogaṃ pati kāmācārattā. Kīdisoti āha ‘‘anikkhittasikkho’’ti. Nikkhittasikkho pana abhikkhukattā pariccatto. Tattha nikkhittā ohitā pariccattā paccakkhātā sikkhā etenāti viggaho. Yathālakkhaṇaṃ na nikkhittasikkho anikkhittasikkho. Tattha cittakhettakālappayogapuggalavijānanavasena sikkhāpaccakkhānaṃ ñatvā tadabhāvena apaccakkhānaṃ veditabbaṃ.
தத்த² உபஸம்பன்னபா⁴வதோ சவிதுகாமதாசித்தங் சித்தங் நாம. ‘‘பு³த்³த⁴ங் பச்சக்கா²மீ’’திஆதீ³னி ‘‘கி³ஹீதி மங் தா⁴ரேஹி, உபாஸகோ, ஆராமிகோ, ஸாமணேரோதி மங் தா⁴ரேஹீ’’தி ‘‘அலங் மே பு³த்³தே⁴னா’’திஆதீ³னி ச² கெ²த்தபதா³னி கெ²த்தங் நாம. ‘‘பச்சக்கா²மீ’’திஆதி³னா வுத்தோ வத்தமானகாலோயேவ காலோ நாம. யாய காயசி பா⁴ஸாய வஸேன வாசஸிகப்பயோகோ³வ பயோகோ³ நாம. அனும்மத்தாதி³கோ பச்சக்கா²தோ ச மனுஸ்ஸஜாதிகோ ஸோவ புக்³க³லோ நாம. பச்சக்கா²தகஸ்ஸ வசனஸமனந்தரமேவ ‘‘அயங் உக்கண்டி²தோ’’தி வா ‘‘கி³ஹிபா⁴வங் பத்த²யதீ’’தி வா ஸோதுனோ ஜானநங் விஜானநங் நாமாதி வேதி³தப்³ப³ங்.
Tattha upasampannabhāvato cavitukāmatācittaṃ cittaṃ nāma. ‘‘Buddhaṃ paccakkhāmī’’tiādīni ‘‘gihīti maṃ dhārehi, upāsako, ārāmiko, sāmaṇeroti maṃ dhārehī’’ti ‘‘alaṃ me buddhenā’’tiādīni cha khettapadāni khettaṃ nāma. ‘‘Paccakkhāmī’’tiādinā vutto vattamānakāloyeva kālo nāma. Yāya kāyaci bhāsāya vasena vācasikappayogova payogo nāma. Anummattādiko paccakkhāto ca manussajātiko sova puggalo nāma. Paccakkhātakassa vacanasamanantarameva ‘‘ayaṃ ukkaṇṭhito’’ti vā ‘‘gihibhāvaṃ patthayatī’’ti vā sotuno jānanaṃ vijānanaṃ nāmāti veditabbaṃ.
தத்த² நட்ட²காயப்பஸாத³ங் பன பிளகங் வா சம்மகி²லங் வா லோமங் வா பவேஸந்தஸ்ஸ து³க்கடங். அக்கி²னாஸகண்ணச்சி²த்³த³வத்தி²கோஸேஸு, ஸத்த²காதீ³ஹி கதவணே வா மேது²னராகே³ன நிமித்தங் பவேஸந்தஸ்ஸ து²ல்லச்சயங். அவஸேஸஸரீரேஸு உபகச்ச²காதீ³ஸு து³க்கடங். திரச்சா²னக³தானங் ஹத்தி²அஸ்ஸகோ³க³த்³ரப⁴ஒட்ட²மஹிங்ஸாதீ³னங் நாஸாய து²ல்லச்சயங், வத்தி²கோஸே து²ல்லச்சயமேவ. ஸப்³பே³ஸம்பி திரச்சா²னக³தானங் அக்கி²கண்ணவணேஸு து³க்கடங். ததா² அவஸேஸஸரீரே காயஸங்ஸக்³க³ராகே³ன, மேது²னராகே³ன வா ஜீவமானகபுரிஸஸ்ஸ வத்தி²கோஸங் அப்பவேஸந்தோ நிமித்தேன நிமித்தங் சு²பதி, து³க்கடங். ப³ஹி நிக்க²ந்தத³ந்தேஸு வாயமந்தஸ்ஸ பன து²ல்லச்சயந்தி அயமெத்த² ஸவினிச்ச²யோ அத்த²வண்ணனக்கமோ.
Tattha naṭṭhakāyappasādaṃ pana piḷakaṃ vā cammakhilaṃ vā lomaṃ vā pavesantassa dukkaṭaṃ. Akkhināsakaṇṇacchiddavatthikosesu, satthakādīhi katavaṇe vā methunarāgena nimittaṃ pavesantassa thullaccayaṃ. Avasesasarīresu upakacchakādīsu dukkaṭaṃ. Tiracchānagatānaṃ hatthiassagogadrabhaoṭṭhamahiṃsādīnaṃ nāsāya thullaccayaṃ, vatthikose thullaccayameva. Sabbesampi tiracchānagatānaṃ akkhikaṇṇavaṇesu dukkaṭaṃ. Tathā avasesasarīre kāyasaṃsaggarāgena, methunarāgena vā jīvamānakapurisassa vatthikosaṃ appavesanto nimittena nimittaṃ chupati, dukkaṭaṃ. Bahi nikkhantadantesu vāyamantassa pana thullaccayanti ayamettha savinicchayo atthavaṇṇanakkamo.
இதா³னி பவேஸனங் நாம ந கேவலங் அத்துபக்கமேனேவ, பரூபக்கமேனாபி ஹோதி, தத்ராபி ஸாதி³யந்தோவ சுதோ ஹோதீதி த³ஸ்ஸேதுங் ‘‘அத² வா’’திஆதி³ வுத்தங். தத்த² அத² வாதி அயங் நிபாதோ, நிபாதஸமுதா³யோ வா பக்க²ந்தராரம்பே⁴. பவேஸனஞ்ச டி²தஞ்ச உத்³தா⁴ரோ ச பவிட்ட²ஞ்ச பவேஸன…பே॰… பவிட்டா²னி, இதரீதரயோக³த்³வந்தோ³. இதரீதரயோகோ³ நாம அஞ்ஞமஞ்ஞத்தோ²பாதா³னதாதி பவேஸனாதீ³னி டி²தாதி³அத்தா²னிபி ஹொந்தீதி பவிட்ட²-ஸத்³தோ³பி பவேஸனாதி³அத்தோ² ஹோதி, ததோயேவெத்த² தஸ்மா ப³ஹுவசனஸம்ப⁴வோ. அஞ்ஞதா² த்³வந்தே³ அவயவத்த²பதா⁴னத்தா ஏகத்த²வாசகாபி பவிட்ட²-ஸத்³தா³ கத²ங் ப³ஹுவசனப்பஸங்கோ³. ஸமாஹாரே வா த்³வந்தோ³. க²ணோதி காலவிஸேஸோ. ஸோ ச யோக³வந்தானங் க²ணந்தரவினிமுத்தோ நத்தீ²தி பவேஸன…பே॰…பவிட்டா²னியேவ க²ணோதி கம்மதா⁴ரயோ, அபே⁴தே³ பே⁴த³பரிகப்பனாய வா பவேஸன…பே॰… பவிட்டா²னங் க²ணோதி ச²ட்டீ²தப்புரிஸோ. தஸ்ஸ ஸாத³கோ, தஸ்மிங் வா ஸாத³கோ பவேஸன…பே॰… ஸாத³கோ. க²ண-ஸத்³தோ³ பனெத்த² பச்சேகங் யோஜேதப்³போ³ த்³வந்த³ஸமாஸத்தா, பவேஸனகாலங் டி²தகாலங் உத்³தா⁴ரகாலங் பவிட்ட²காலங், தஸ்மிங் வா ஸாதி³யந்தோதி ஏவமெத்த² அத்தோ² த³ட்ட²ப்³போ³. ஏவங் ஸேவனசித்தபச்சுபட்டா²னேன ஸாத³கோ பி⁴க்கு² சுதோதி யோஜேதப்³ப³ங். தத்த² யதா²வுத்தப்பதே³ஸஸ்ஸ அந்தோகரணங் பவேஸனங் நாம. யாவ உத்³த⁴ரணாரம்பா⁴ நிவத்தங் டி²தங் நாம. அட்ட²கதா²யங் (பாரா॰ அட்ட²॰ 1.58) பன மாதுகா³மஸ்ஸ ஸுக்கவிஸ்ஸட்டி²ங் பத்வா ஸப்³ப³தா² வாயமதோ ஓரமித்வா டி²தகாலங் ஸந்தா⁴ய ‘‘ஸுக்கவிஸ்ஸட்டி²ஸமயே’’தி வுத்தங். யாவ அக்³கா³ நீஹரணங் உத்³தா⁴ரோ நாம. யாவ பவேஸனாரஹட்டா²னா அந்தோகதங் பவிட்ட²ங் நாம.
Idāni pavesanaṃ nāma na kevalaṃ attupakkameneva, parūpakkamenāpi hoti, tatrāpi sādiyantova cuto hotīti dassetuṃ ‘‘atha vā’’tiādi vuttaṃ. Tattha atha vāti ayaṃ nipāto, nipātasamudāyo vā pakkhantarārambhe. Pavesanañca ṭhitañca uddhāro ca paviṭṭhañca pavesana…pe… paviṭṭhāni, itarītarayogadvando. Itarītarayogo nāma aññamaññatthopādānatāti pavesanādīni ṭhitādiatthānipi hontīti paviṭṭha-saddopi pavesanādiattho hoti, tatoyevettha tasmā bahuvacanasambhavo. Aññathā dvande avayavatthapadhānattā ekatthavācakāpi paviṭṭha-saddā kathaṃ bahuvacanappasaṅgo. Samāhāre vā dvando. Khaṇoti kālaviseso. So ca yogavantānaṃ khaṇantaravinimutto natthīti pavesana…pe…paviṭṭhāniyeva khaṇoti kammadhārayo, abhede bhedaparikappanāya vā pavesana…pe… paviṭṭhānaṃ khaṇoti chaṭṭhītappuriso. Tassa sādako, tasmiṃ vā sādako pavesana…pe… sādako. Khaṇa-saddo panettha paccekaṃ yojetabbo dvandasamāsattā, pavesanakālaṃ ṭhitakālaṃ uddhārakālaṃ paviṭṭhakālaṃ, tasmiṃ vā sādiyantoti evamettha attho daṭṭhabbo. Evaṃ sevanacittapaccupaṭṭhānena sādako bhikkhu cutoti yojetabbaṃ. Tattha yathāvuttappadesassa antokaraṇaṃ pavesanaṃ nāma. Yāva uddharaṇārambhā nivattaṃ ṭhitaṃ nāma. Aṭṭhakathāyaṃ (pārā. aṭṭha. 1.58) pana mātugāmassa sukkavissaṭṭhiṃ patvā sabbathā vāyamato oramitvā ṭhitakālaṃ sandhāya ‘‘sukkavissaṭṭhisamaye’’ti vuttaṃ. Yāva aggā nīharaṇaṃ uddhāro nāma. Yāva pavesanārahaṭṭhānā antokataṃ paviṭṭhaṃ nāma.
பட²மங்.
Paṭhamaṃ.
3-4. இதா³னி து³தியங் த³ஸ்ஸேதுங் ‘‘ஆதி³யெய்யா’’திஆதி³மாஹ. தத்த² அதி³ன்னங் தெ²ய்யசித்தேன ஆதி³யெய்ய…பே॰… ஸங்கேதங் வீதினாமயே, பாராஜிகோ ப⁴வேதி ஸம்ப³ந்தோ⁴. அதி³ன்னந்தி மனுஸ்ஸஸாமிகேஹி காயவாசாஹி ந தி³ன்னங். தெ²ய்யசித்தேனாதி தே²னோதி சோரோ, தஸ்ஸ பா⁴வோ தெ²ய்யங் ந-காரஸ்ஸ ய-காரங் கத்வா த்³வித்தேன. ப⁴வந்தி ஏதஸ்மா அபி⁴தா⁴னபு³த்³தீ⁴தி பா⁴வோ, ஸத்³த³ப்பவத்தினிமித்தங் ஜாதிகு³ணாதி³. இத⁴ பன அவஹரணசித்தஸங்கா²தங் த³ப்³ப³ங் தெ²ய்யங். தெ²ய்யஞ்ச தங் சித்தஞ்சாதி தெ²ய்யசித்தங், தேன. ஆதி³யெய்யாதி ஆராமாதி³ங் அபி⁴யுஞ்ஜித்வா க³ண்ஹெய்ய. ஹரெய்யாதி ஹரந்தோ க³ண்ஹெய்ய. அவஹரெய்யாதி உபனிக்கி²த்தங் ப⁴ண்ட³ங் ‘‘தே³ஹி மே ப⁴ண்ட³’’ந்தி வுச்சமானோ ‘‘ந மயா க³ஹித’’ந்திஆதீ³னி வத³ந்தோ க³ண்ஹெய்ய. இரியாபத²ங் கோபெய்யாதி ப⁴ண்ட³ஹாரகஸ்ஸ க³மனாதி³இரியாபத²ங் விச்சி²ந்தி³த்வா க³ண்ஹெய்ய. கோபங் கத்வா க³ண்ஹாதீதி ஹி ஏதஸ்மிங் அத்தே² ‘‘கோபீ’’தி நாமதா⁴து. டா²னா சாவெய்யாதி ட²பிதட்டா²னதோ சாவெய்ய. ஸங்கேதங் வீதினாமயேதி பரிகப்பிதட்டா²னங் வா ஸுங்ககா⁴தங் வா அதிக்காமெய்ய.
3-4. Idāni dutiyaṃ dassetuṃ ‘‘ādiyeyyā’’tiādimāha. Tattha adinnaṃ theyyacittena ādiyeyya…pe… saṅketaṃ vītināmaye, pārājiko bhaveti sambandho. Adinnanti manussasāmikehi kāyavācāhi na dinnaṃ. Theyyacittenāti thenoti coro, tassa bhāvo theyyaṃ na-kārassa ya-kāraṃ katvā dvittena. Bhavanti etasmā abhidhānabuddhīti bhāvo, saddappavattinimittaṃ jātiguṇādi. Idha pana avaharaṇacittasaṅkhātaṃ dabbaṃ theyyaṃ. Theyyañca taṃ cittañcāti theyyacittaṃ, tena. Ādiyeyyāti ārāmādiṃ abhiyuñjitvā gaṇheyya. Hareyyāti haranto gaṇheyya. Avahareyyāti upanikkhittaṃ bhaṇḍaṃ ‘‘dehi me bhaṇḍa’’nti vuccamāno ‘‘na mayā gahita’’ntiādīni vadanto gaṇheyya. Iriyāpathaṃ kopeyyāti bhaṇḍahārakassa gamanādiiriyāpathaṃ vicchinditvā gaṇheyya. Kopaṃ katvā gaṇhātīti hi etasmiṃ atthe ‘‘kopī’’ti nāmadhātu. Ṭhānā cāveyyāti ṭhapitaṭṭhānato cāveyya. Saṅketaṃ vītināmayeti parikappitaṭṭhānaṃ vā suṅkaghātaṃ vā atikkāmeyya.
எத்த² ச ஆராமாதி³அபி⁴யுஞ்ஜனே, ஸாமிகஸ்ஸ விமதுப்பாத³னது⁴ரனிக்கே²பே, ப⁴ண்ட³ஹாரகஸ்ஸ ஸீஸபா⁴ராமஸனப²ந்தா³பனக²ந்தோ⁴ரோபனே, உபனிக்கி²த்தே ‘‘தே³ஹி மே ப⁴ண்ட³’’ந்தி சோதி³யமானஸ்ஸ ‘‘நாஹங் க³ண்ஹாமீ’’தி ப⁴ணனவிமதுப்பாத³னது⁴ரனிக்கே²பே, த²லட்ட²ஸ்ஸ தெ²ய்யசித்தேனாமஸனப²ந்தா³பனடா²னாசாவனே சாதி சதூஸு பச்சேகங் யதா²க்கமங் து³க்கடது²ல்லச்சயபாராஜிகாயோ வேதி³தப்³பா³. ‘‘ஸஹப⁴ண்ட³ஹாரகங் நெஸ்ஸாமீ’’தி பட²மது³தியபாத³ஸங்காமனே, பரிகப்பிதஸுங்ககா⁴தட்டா²னதோ பட²மது³தியபாதா³திக்காமே சாதி த்³வீஸு பச்சேகங் கமேன து²ல்லச்சயபாராஜிகாயோ வேதி³தப்³பா³. அயமெத்த² ஸவிஞ்ஞாணகாவிஞ்ஞாணகமிஸ்ஸகத்தா நானாப⁴ண்ட³வஸேன யோஜனா. ஏகப⁴ண்ட³வஸேன பன ஸஸ்ஸாமிகஸ்ஸ தா³ஸஸ்ஸ வா திரச்சா²னக³தஸ்ஸ வா யதா²வுத்தேன அபி⁴யோகா³தி³னா நயேன ஆதி³யனஹரணாதி³வஸேன யோஜனா த³ட்ட²ப்³பா³.
Ettha ca ārāmādiabhiyuñjane, sāmikassa vimatuppādanadhuranikkhepe, bhaṇḍahārakassa sīsabhārāmasanaphandāpanakhandhoropane, upanikkhitte ‘‘dehi me bhaṇḍa’’nti codiyamānassa ‘‘nāhaṃ gaṇhāmī’’ti bhaṇanavimatuppādanadhuranikkhepe, thalaṭṭhassa theyyacittenāmasanaphandāpanaṭhānācāvane cāti catūsu paccekaṃ yathākkamaṃ dukkaṭathullaccayapārājikāyo veditabbā. ‘‘Sahabhaṇḍahārakaṃ nessāmī’’ti paṭhamadutiyapādasaṅkāmane, parikappitasuṅkaghātaṭṭhānato paṭhamadutiyapādātikkāme cāti dvīsu paccekaṃ kamena thullaccayapārājikāyo veditabbā. Ayamettha saviññāṇakāviññāṇakamissakattā nānābhaṇḍavasena yojanā. Ekabhaṇḍavasena pana sassāmikassa dāsassa vā tiracchānagatassa vā yathāvuttena abhiyogādinā nayena ādiyanaharaṇādivasena yojanā daṭṭhabbā.
அபிச இமானி ச² பதா³னி வண்ணயந்தேன நானாப⁴ண்ட³ஏகப⁴ண்ட³ஸாஹத்தி²கபுப்³ப³ப்பயோக³தெ²ய்யாவஹாரஸங்கா²தே பஞ்சபஞ்சகே ஸமோதா⁴னெத்வா பஞ்சவீஸதி அவஹாரா த³ஸ்ஸேதப்³பா³ ச²ப்பத³ந்தோக³த⁴த்தா ஸப்³பே³ஸம்பி அவஹாரானங். தே பன அவஹாரா யேன கேனசி அபி⁴யோகா³தி³ஆகாரனானத்தமத்தேன பி⁴ன்னாதி தங்வஸேன பஞ்சபஞ்சகங் நாம ஜாதங். ஏவங் ஸங்வண்ணிதஞ்ஹி இத³ங் அதி³ன்னாதா³னபாராஜிகங் ஸுவண்ணிதங் நாம ஹோதீதி த³ட்ட²ப்³ப³ங். தத்த² புரிமானி த்³வே பஞ்சகானி ‘‘ஆதி³யெய்யா’’திஆதீ³னங் பஞ்சன்னங் பதா³னங் வஸேன லப்³ப⁴ந்தி. யங் பனேதங் ‘‘ஸங்கேதங் வீதினாமயே’’தி ச²ட்ட²ங் பத³ங், தங் ததியபஞ்சமேஸு பஞ்சகேஸு நிஸ்ஸக்³கி³யபரிகப்பாவஹாரவஸேன யோஜேதப்³ப³ங்.
Apica imāni cha padāni vaṇṇayantena nānābhaṇḍaekabhaṇḍasāhatthikapubbappayogatheyyāvahārasaṅkhāte pañcapañcake samodhānetvā pañcavīsati avahārā dassetabbā chappadantogadhattā sabbesampi avahārānaṃ. Te pana avahārā yena kenaci abhiyogādiākāranānattamattena bhinnāti taṃvasena pañcapañcakaṃ nāma jātaṃ. Evaṃ saṃvaṇṇitañhi idaṃ adinnādānapārājikaṃ suvaṇṇitaṃ nāma hotīti daṭṭhabbaṃ. Tattha purimāni dve pañcakāni ‘‘ādiyeyyā’’tiādīnaṃ pañcannaṃ padānaṃ vasena labbhanti. Yaṃ panetaṃ ‘‘saṅketaṃ vītināmaye’’ti chaṭṭhaṃ padaṃ, taṃ tatiyapañcamesu pañcakesu nissaggiyaparikappāvahāravasena yojetabbaṃ.
தத்த² ஸாஹத்தி²க-ஸத்³தே³ன உபசாரதோ தங்ஸஹசரிதபஞ்சகங் க³ஹெத்வா ‘‘ஸாஹத்தி²கஞ்ச தங் பஞ்சகஞ்சா’’தி வா ‘‘ஸாஹத்தி²காதி³ பஞ்சக’’ந்தி மஜ்ஜே²பத³லோபவஸேன வா ஸாஹத்தி²கபஞ்சகங். ஏவமுபரிபி. தங் பன ஸாஹத்தி²கோ ஆணத்திகோ நிஸ்ஸக்³கி³யோ அத்த²ஸாத⁴கோ து⁴ரனிக்கே²போ சாதி. தத்த² ஸகோ ஹத்தோ² ஸஹத்தோ², ஸஹத்தே²ன நிப்³ப³த்தோ ஸாஹத்தி²கோ. ஏவங் ஆணத்திகோ. ஸுங்ககா⁴தபரிகப்பிதோகாஸானங் அந்தோ ட²த்வா ப³ஹி நிஸ்ஸஜ்ஜனங் நிஸ்ஸக்³கோ³, ஸோ ஏவ நிஸ்ஸக்³கி³யோ. காலங் அனியமெத்வா ஆணத்தஸ்ஸ ப⁴ண்ட³க்³க³ஹணதோ ச பரஸ்ஸ தேலகும்பி⁴யா பாத³க்³க⁴னகங் தேலங் அவஸ்ஸங் பிவனகானங் உபாஹனாதீ³னங் நிக்கி²த்தானங் தேலபாதனதோ ச புரேதரமேவ பாராஜிகஸங்கா²தங் அத்த²ங் ஸாதே⁴தீதி அத்த²ஸாத⁴கோ. ஸோ பன ஆணாபனப்பயோகோ³, உபாஹனாதீ³னங் நிக்கே²பப்பயோகோ³ ச. ஆராமாபி⁴யோகே³ ச உபனிக்கி²த்தப⁴ண்டே³ ச தாவகாலிகப⁴ண்ட³தெ³ய்யானமதா³னே ச து⁴ரஸ்ஸ நிக்கே²போ து⁴ரனிக்கே²போ.
Tattha sāhatthika-saddena upacārato taṃsahacaritapañcakaṃ gahetvā ‘‘sāhatthikañca taṃ pañcakañcā’’ti vā ‘‘sāhatthikādi pañcaka’’nti majjhepadalopavasena vā sāhatthikapañcakaṃ. Evamuparipi. Taṃ pana sāhatthiko āṇattiko nissaggiyo atthasādhako dhuranikkhepo cāti. Tattha sako hattho sahattho, sahatthena nibbatto sāhatthiko. Evaṃ āṇattiko. Suṅkaghātaparikappitokāsānaṃ anto ṭhatvā bahi nissajjanaṃ nissaggo, so eva nissaggiyo. Kālaṃ aniyametvā āṇattassa bhaṇḍaggahaṇato ca parassa telakumbhiyā pādagghanakaṃ telaṃ avassaṃ pivanakānaṃ upāhanādīnaṃ nikkhittānaṃ telapātanato ca puretarameva pārājikasaṅkhātaṃ atthaṃ sādhetīti atthasādhako. So pana āṇāpanappayogo, upāhanādīnaṃ nikkhepappayogo ca. Ārāmābhiyoge ca upanikkhittabhaṇḍe ca tāvakālikabhaṇḍadeyyānamadāne ca dhurassa nikkhepo dhuranikkhepo.
புப்³ப³ப்பயோக³பஞ்சகங் நாம புப்³ப³ப்பயோகோ³ ஸஹப்பயோகோ³ ஸங்விதா⁴வஹாரோ ஸங்கேதகம்மங் நிமித்தகம்மந்தி. தத்த² ஆணாபனங் ப⁴ண்ட³க்³க³ஹணதோ புப்³ப³த்தா புப்³ப³ப்பயோகோ³ நாம. டா²னாசாவனகி²லஸங்காமனப்பயோகே³ன ஸஹ வத்தமானோ ஸஹப்பயோகோ³. ஸங்விதா⁴ய ஸம்மந்தயித்வா க³தேஸு ஏகேனாபி ப⁴ண்டே³ டா²னா சாவிதே ஸப்³பே³ஸங் அவஹாரோ ஸங்விதா⁴வஹாரோ. ஸங்கேதகம்மந்தி புப்³ப³ண்ஹாதி³காலபரிச்சே²த³வஸேன ஸஞ்ஜானநகரணங். நிமித்தகம்மங் நாம ஸஞ்ஞுப்பாத³னத்த²ங் அக்கி²னிக²ணனாதி³கரணங்.
Pubbappayogapañcakaṃ nāma pubbappayogo sahappayogo saṃvidhāvahāro saṅketakammaṃ nimittakammanti. Tattha āṇāpanaṃ bhaṇḍaggahaṇato pubbattā pubbappayogo nāma. Ṭhānācāvanakhilasaṅkāmanappayogena saha vattamāno sahappayogo. Saṃvidhāya sammantayitvā gatesu ekenāpi bhaṇḍe ṭhānā cāvite sabbesaṃ avahāro saṃvidhāvahāro. Saṅketakammanti pubbaṇhādikālaparicchedavasena sañjānanakaraṇaṃ. Nimittakammaṃ nāma saññuppādanatthaṃ akkhinikhaṇanādikaraṇaṃ.
தெ²ய்யாவஹாரபஞ்சகங் பன ஸயமேவ த³ஸ்ஸேதுங் ‘‘அத² வா’’திஆதி³மாஹ. நனு ச ச²ப்பத³ந்தோக³த⁴த்தா ‘‘ஸப்³பே³ஸம்பி அவஹாரான’’ந்தி வுத்தங், ஏவங் ஸதி ‘‘அத² வா’’தி பக்க²ந்தரவஸேன விஸுங் விய இத³ங் பஞ்சகங் கஸ்மா வுத்தந்தி? நனு அவோசும்ஹா ‘‘யேன கேனசி அபி⁴யோகா³தி³ஆகாரனானத்தமத்தேன பி⁴ன்னா’’தி, ஏதாதி³ஸஸ்ஸ பே⁴த³ஸ்ஸ ஸம்ப⁴வதோ பக்க²ந்தரவஸேனாபி யுஜ்ஜதீதி ஏவங் வுத்தங். இமஸ்ஸ பஞ்சகஸ்ஸ விஸுங் உத்³த⁴ரித்வா வசனங் பன பஸித்³தி⁴வஸேனாதி த³ட்ட²ப்³ப³ங், குஸ-ஸத்³தே³ன குஸஸங்காமனமதி⁴ப்பேதங் அபே⁴தோ³பசாரேன. தெ²ய்யஞ்ச ப³லஞ்ச குஸோ ச ச²ன்னஞ்ச பரிகப்போ ச தெ²ய்யா…பே॰… பரிகப்பங், தீ³கோ⁴ ஸந்தி⁴வஸேன. தேன அவஹாரகோ பாராஜிகோ ப⁴வேதி ஸம்ப³ந்தோ⁴. யோ பன படிச்ச²ன்னேன அவஹாரகோ, ஸோ அத்த²தோ படிச்ச²ன்னஸ்ஸ அவஹாரகோ ஹோதீதி த்³வந்த³ஸமாஸந்தோக³த⁴த்தேபிசஸ்ஸ விரோதா⁴பா⁴வோபா⁴வஸாத⁴னோ சாயங் ச²ன்ன-ஸத்³தோ³ த³ட்ட²ப்³போ³. தத்த² ஸந்தி⁴ச்சே²த³னாதீ³னி கத்வா வா துலாகூடமானகூடகஹாபணகூடாதீ³ஹி வஞ்செத்வா வா க³ண்ஹந்தோ தெ²ய்யாவஹாரகோ. ப³லக்காரேன பரஸந்தகங் க³ண்ஹந்தோ ப³லாவஹாரகோ. குஸங் ஸங்காமெத்வா க³ண்ஹந்தோ குஸாவஹாரகோ. திணபண்ணாதீ³ஹி யங் கிஞ்சி படிச்சா²தெ³த்வா பச்சா² கஸ்ஸ படிச்ச²ன்னஸ்ஸ அவஹாரகோ படிச்ச²ன்னாவஹாரகோ. ஸாடகாதி³ப⁴ண்ட³வஸேன, க³ப்³ப⁴த்³வாராதி³ஓகாஸவஸேன வா பரிகப்பெத்வா க³ண்ஹந்தோ பரிகப்பாவஹாரகோ. எத்த² பன பரிகப்பிதப⁴ண்ட³க்³க³ஹணே பரிகப்பிதபரிச்சே²தா³திக்கமே ச பாராஜிகங் வேதி³தப்³ப³ங்.
Theyyāvahārapañcakaṃ pana sayameva dassetuṃ ‘‘atha vā’’tiādimāha. Nanu ca chappadantogadhattā ‘‘sabbesampi avahārāna’’nti vuttaṃ, evaṃ sati ‘‘atha vā’’ti pakkhantaravasena visuṃ viya idaṃ pañcakaṃ kasmā vuttanti? Nanu avocumhā ‘‘yena kenaci abhiyogādiākāranānattamattena bhinnā’’ti, etādisassa bhedassa sambhavato pakkhantaravasenāpi yujjatīti evaṃ vuttaṃ. Imassa pañcakassa visuṃ uddharitvā vacanaṃ pana pasiddhivasenāti daṭṭhabbaṃ, kusa-saddena kusasaṅkāmanamadhippetaṃ abhedopacārena. Theyyañca balañca kuso ca channañca parikappo ca theyyā…pe… parikappaṃ, dīgho sandhivasena. Tena avahārako pārājiko bhaveti sambandho. Yo pana paṭicchannena avahārako, so atthato paṭicchannassa avahārako hotīti dvandasamāsantogadhattepicassa virodhābhāvobhāvasādhano cāyaṃ channa-saddo daṭṭhabbo. Tattha sandhicchedanādīni katvā vā tulākūṭamānakūṭakahāpaṇakūṭādīhi vañcetvā vā gaṇhanto theyyāvahārako. Balakkārena parasantakaṃ gaṇhanto balāvahārako. Kusaṃ saṅkāmetvā gaṇhanto kusāvahārako. Tiṇapaṇṇādīhi yaṃ kiñci paṭicchādetvā pacchā kassa paṭicchannassa avahārako paṭicchannāvahārako. Sāṭakādibhaṇḍavasena, gabbhadvārādiokāsavasena vā parikappetvā gaṇhanto parikappāvahārako. Ettha pana parikappitabhaṇḍaggahaṇe parikappitaparicchedātikkame ca pārājikaṃ veditabbaṃ.
இதா³னி பனெத்த² வினிச்ச²யங் த³ஸ்ஸேதுங் ‘‘ப⁴ண்ட³காலக்³க⁴தே³ஸேஹீ’’திஆதி³ வுத்தங். எத்த² அதி³ன்னாதா³னே ப⁴ண்ட³ஞ்ச காலோ ச அக்³கோ⁴ ச தே³ஸோ ச தேஹி ச பரிபோ⁴கே³ன ச வினிச்ச²யோ காதப்³போ³தி அத்தோ² . தத்த² அவஹடப⁴ண்ட³ஸ்ஸ ஸஸ்ஸாமிகஸ்ஸாமிகபா⁴வங் ஸஸ்ஸாமிகேபி ஸாமிகானங் ஸாலயனிராலயபா⁴வஞ்ச உபபரிக்கி²த்வா ஸாலயகாலே சே அவஹடங், ப⁴ண்ட³ங் அக்³கா⁴பெத்வா காதப்³போ³ வினிச்ச²யோ ப⁴ண்டே³ன வினிச்ச²யோ. நிராலயகாலே சே அவஹடங், பாராஜிகங் நத்தி², ஸாமிகேஸு புன ஆஹராபெந்தேஸு தா³தப்³ப³ங். ததே³வ ஹி ப⁴ண்ட³ங் கதா³சி மஹக்³க⁴ங், கதா³சி அப்பக்³க⁴ங், தஸ்மா யஸ்மிங் காலே ப⁴ண்ட³ங் அவஹடங், தஸ்மிங்யேவ காலே யோ தஸ்ஸ அக்³கோ⁴, தேன காதப்³போ³ வினிச்ச²யோ காலேன வினிச்ச²யோ. நவப⁴ண்ட³ஸ்ஸ யோ அக்³கோ⁴, ஸோ பச்சா² பரிஹாயதி, தஸ்மா ஸப்³ப³தா³ பகதிஅக்³க⁴வஸேன அகத்வா காதப்³போ³ வினிச்ச²யோ அக்³கே⁴ன வினிச்ச²யோ. ப⁴ண்டு³ட்டா²னதே³ஸே ப⁴ண்ட³ங் அப்பக்³க⁴ங் ஹோதி, அஞ்ஞத்த² மஹக்³க⁴ங், தஸ்மா யஸ்மிங் தே³ஸே ப⁴ண்ட³ங் அவஹடங், தஸ்மிங்யேவ தே³ஸே அக்³கே⁴ன காதப்³போ³ வினிச்ச²யோ தே³ஸேன வினிச்ச²யோ. பரிபோ⁴கே³ன ஸாடகாதி³னோ ப⁴ண்ட³ஸ்ஸ அக்³கோ⁴ பரிஹாயதி, தஸ்மா தஸ்ஸ பரிபோ⁴க³வஸேன பரிஹீனாபரிஹீனபா⁴வங் உபபரிக்கி²த்வா காதப்³போ³ வினிச்ச²யோ பரிபோ⁴கே³ன வினிச்ச²யோ.
Idāni panettha vinicchayaṃ dassetuṃ ‘‘bhaṇḍakālagghadesehī’’tiādi vuttaṃ. Ettha adinnādāne bhaṇḍañca kālo ca aggho ca deso ca tehi ca paribhogena ca vinicchayo kātabboti attho . Tattha avahaṭabhaṇḍassa sassāmikassāmikabhāvaṃ sassāmikepi sāmikānaṃ sālayanirālayabhāvañca upaparikkhitvā sālayakāle ce avahaṭaṃ, bhaṇḍaṃ agghāpetvā kātabbo vinicchayo bhaṇḍena vinicchayo. Nirālayakāle ce avahaṭaṃ, pārājikaṃ natthi, sāmikesu puna āharāpentesu dātabbaṃ. Tadeva hi bhaṇḍaṃ kadāci mahagghaṃ, kadāci appagghaṃ, tasmā yasmiṃ kāle bhaṇḍaṃ avahaṭaṃ, tasmiṃyeva kāle yo tassa aggho, tena kātabbo vinicchayo kālena vinicchayo. Navabhaṇḍassa yo aggho, so pacchā parihāyati, tasmā sabbadā pakatiagghavasena akatvā kātabbo vinicchayo agghena vinicchayo. Bhaṇḍuṭṭhānadese bhaṇḍaṃ appagghaṃ hoti, aññattha mahagghaṃ, tasmā yasmiṃ dese bhaṇḍaṃ avahaṭaṃ, tasmiṃyeva dese agghena kātabbo vinicchayo desena vinicchayo. Paribhogena sāṭakādino bhaṇḍassa aggho parihāyati, tasmā tassa paribhogavasena parihīnāparihīnabhāvaṃ upaparikkhitvā kātabbo vinicchayo paribhogena vinicchayo.
து³தியங்.
Dutiyaṃ.
5-7. இதா³னி ததியங் த³ஸ்ஸேதுங் ‘‘மனுஸ்ஸவிக்³க³ஹ’’ந்திஆதி³ ஆரத்³த⁴ங். தத்த² மனுஸ்ஸவிக்³க³ஹங் கலலதோ பட்டா²ய ஜீவமானகமனுஸ்ஸஜாதிகானங் ஸரீரங். சிச்ச பாணோதி ஸஞ்ஞாய ஸத்³தி⁴ங்யேவ ‘‘வதா⁴மி ந’’ந்தி வத⁴கசேதனாய சேதெத்வா பகப்பெத்வா. ஜீவிதா வா வியோஜயேதி யோ பி⁴க்கு² ஜாதிஉண்ணங்ஸுனா ஸமுத்³த⁴டதேலபி³ந்து³மத்தங் கலலரூபகாலே தாபனாதீ³ஹி வா ததோ வா உத்³த⁴மபி தத³னுரூபேன உபக்கமேன ரூபஜீவிதிந்த்³ரியோபக்கமே ஸதி ததா³யத்தவுத்தினோ அரூபஜீவிதஸ்ஸாபி வோரோபனஸம்ப⁴வதோ உப⁴யஜீவிதா வோரோபெய்ய. வா-ஸத்³தோ³ விகப்பே. மரணசேதனோதி மரணே சேதனா யஸ்ஸ ஸோ மரணாதி⁴ப்பாயோ. ஸத்த²ஹாரகந்தி ஜீவிதங் ஹரதீதி ஹாரகங், ஸத்த²ஞ்ச தங் ஹாரகஞ்சாதி ஸத்த²ஹாரகங், தங். அஸ்ஸ மனுஸ்ஸவிக்³க³ஹஸ்ஸ. உபனிக்கி²பேதி ஸமீபே நிக்கி²பெய்ய வா. ஏதேன தா²வரப்பயோக³ங் த³ஸ்ஸேதி. கா³ஹெய்ய மரணூபாயந்தி ‘‘ஸத்த²ங் வா ஆஹர, விஸங் வா கா²தா³’’திஆதி³னா நயேன மரணத்தா²ய உபாயங் கா³ஹாபெய்ய வா. ஏதேன ஆணத்திப்பயோகோ³ த³ஸ்ஸிதோ. வதெ³ய்ய மரணே கு³ணந்தி காயவாசாதூ³தலேகா²ஹி ‘‘யோ ஏவங் மரதி, ஸோ த⁴னங் வா லப⁴தீ’’திஆதி³னா நயேன மரணே கு³ணங் பகாஸெய்ய வா. உப⁴யத்த² அதி⁴காரவஸேன வா-ஸத்³தோ³ ஆஹரிதப்³போ³. ஸோ பி⁴க்கு² சுதோதி ஸம்ப³ந்தோ⁴, ஸாஸனதோதி விஞ்ஞாயதி.
5-7. Idāni tatiyaṃ dassetuṃ ‘‘manussaviggaha’’ntiādi āraddhaṃ. Tattha manussaviggahaṃ kalalato paṭṭhāya jīvamānakamanussajātikānaṃ sarīraṃ. Cicca pāṇoti saññāya saddhiṃyeva ‘‘vadhāmi na’’nti vadhakacetanāya cetetvā pakappetvā. Jīvitā vā viyojayeti yo bhikkhu jātiuṇṇaṃsunā samuddhaṭatelabindumattaṃ kalalarūpakāle tāpanādīhi vā tato vā uddhamapi tadanurūpena upakkamena rūpajīvitindriyopakkame sati tadāyattavuttino arūpajīvitassāpi voropanasambhavato ubhayajīvitā voropeyya. Vā-saddo vikappe. Maraṇacetanoti maraṇe cetanā yassa so maraṇādhippāyo. Satthahārakanti jīvitaṃ haratīti hārakaṃ, satthañca taṃ hārakañcāti satthahārakaṃ, taṃ. Assa manussaviggahassa. Upanikkhipeti samīpe nikkhipeyya vā. Etena thāvarappayogaṃ dasseti. Gāheyya maraṇūpāyanti ‘‘satthaṃ vā āhara, visaṃ vā khādā’’tiādinā nayena maraṇatthāya upāyaṃ gāhāpeyya vā. Etena āṇattippayogo dassito. Vadeyya maraṇe guṇanti kāyavācādūtalekhāhi ‘‘yo evaṃ marati, so dhanaṃ vā labhatī’’tiādinā nayena maraṇe guṇaṃ pakāseyya vā. Ubhayattha adhikāravasena vā-saddo āharitabbo. So bhikkhu cutoti sambandho, sāsanatoti viññāyati.
இதா³னி பனஸ்ஸ ச²ப்³பி³தே⁴ பயோகே³த³ஸ்ஸேதுங் ‘‘பயோகா³’’திஆதி³மாஹ. தத்த² ஸாஹத்தி²…பே॰… இத்³தி⁴விஜ்ஜாமயா பயோகா³தி இமே ச² பயோகா³தி ஸம்ப³ந்தோ⁴. க-காரலோபேன பனெத்த² ‘‘ஸாஹத்தீ²’’தி வுத்தங். அத² வா அனேகத்தே² அனேகதத்³தி⁴தஸம்ப⁴வேன ஸஹத்த²ஸ்ஸாயங் பயோகோ³ ஸாஹத்தீ²தி பத³ஸித்³தி⁴ வேதி³தப்³பா³. ஸாஹத்தி² ச நிஸ்ஸக்³கோ³ ச ஆணத்தி ச தா²வரோ சாதி த்³வந்தோ³. இத்³தி⁴ ச விஜ்ஜா ச, தாஸமிமேதி இத்³தி⁴விஜ்ஜாமயா, இத்³தி⁴மயோ விஜ்ஜாமயோதி வுத்தங் ஹோதி. பயோகா³தி இமே ச²ப்பயோகா³ நாம ஹொந்தீதி அத்தோ². தத்த² ஸயங் மாரெந்தஸ்ஸ காயேன வா காயப்படிப³த்³தே⁴ன வா பஹரணங் ஸாஹத்தி²கோ பயோகோ³. தூ³ரே டி²தங் மாரேதுகாமஸ்ஸ காயாதீ³ஹி உஸுஸத்திஆதீ³னங் நிஸ்ஸஜ்ஜனங் நிஸ்ஸக்³கோ³. ‘‘அஸுகங் நாம மாரேஹீ’’திஆதி³னா ஆணாபெந்தஸ்ஸ ஆணாபனங் ஆணத்தி, ஓபாதக²ணனங் அபஸ்ஸேனஸங்விதா⁴னங் அஸிஆதீ³னங் உபனிக்கி²பனாதி³ தா²வரோ. மாரணத்த²ங் கம்மவிபாகஜாய இத்³தி⁴யா பயோஜனங் இத்³தி⁴மயோ. கம்மவிபாகஜித்³தி⁴ ச நாமேஸா ராஜாதீ³னங் ராஜித்³தி⁴ஆத³யோ. தத்த² பிதுரஞ்ஞோ ஸீஹளிந்த³ஸ்ஸ தா³டா²கோடனேன சூளஸுமனகுடும்பி³யமாரணே ராஜித்³தி⁴ த³ட்ட²ப்³பா³, தத³த்த²மேவ அத²ப்³ப³ணாதி³விஜ்ஜாய பரிஜப்பனங் விஜ்ஜாமயோ பயோகோ³.
Idāni panassa chabbidhe payogedassetuṃ ‘‘payogā’’tiādimāha. Tattha sāhatthi…pe… iddhivijjāmayā payogāti ime cha payogāti sambandho. Ka-kāralopena panettha ‘‘sāhatthī’’ti vuttaṃ. Atha vā anekatthe anekataddhitasambhavena sahatthassāyaṃ payogo sāhatthīti padasiddhi veditabbā. Sāhatthi ca nissaggo ca āṇatti ca thāvaro cāti dvando. Iddhi ca vijjā ca, tāsamimeti iddhivijjāmayā, iddhimayo vijjāmayoti vuttaṃ hoti. Payogāti ime chappayogā nāma hontīti attho. Tattha sayaṃ mārentassa kāyena vā kāyappaṭibaddhena vā paharaṇaṃ sāhatthiko payogo. Dūre ṭhitaṃ māretukāmassa kāyādīhi ususattiādīnaṃ nissajjanaṃ nissaggo. ‘‘Asukaṃ nāma mārehī’’tiādinā āṇāpentassa āṇāpanaṃ āṇatti, opātakhaṇanaṃ apassenasaṃvidhānaṃ asiādīnaṃ upanikkhipanādi thāvaro. Māraṇatthaṃ kammavipākajāya iddhiyā payojanaṃ iddhimayo. Kammavipākajiddhi ca nāmesā rājādīnaṃ rājiddhiādayo. Tattha piturañño sīhaḷindassa dāṭhākoṭanena cūḷasumanakuṭumbiyamāraṇe rājiddhi daṭṭhabbā, tadatthameva athabbaṇādivijjāya parijappanaṃ vijjāmayo payogo.
ஏவங் ச²ப்பயோகே³ த³ஸ்ஸெத்வா தேஸு ஆணத்திப்பயோக³ஸ்ஸ நியாமகே த³ஸ்ஸேதுங் ‘‘காலா’’திஆதி³ வுத்தங். தத்த² யதா²வுத்தங் ஆணத்திங் நியமெந்தி ஸங்கேதவிஸங்கேததாவஸேன பரிச்சி²ந்த³ந்தீதி ஆணத்தினியாமகா. தே பன காலோ ச வத்து² ச ஆவுத⁴ஞ்ச இரியாபதோ² சாதி சத்தாரோ, ததா² கிரியாவிஸேஸோ ஓகாஸோதி க³ணனபரிச்சே²த³வஸேன ச² ஹொந்தீதி அத்தோ². தத்த² காலோ புப்³ப³ண்ஹாதி³ யொப்³ப³னாதி³ ச. வத்து² மாரேதப்³போ³ ஸத்தோ. ஆவுத⁴ங் அஸிஆதி³. இரியாபதோ² மாரேதப்³ப³ஸ்ஸ க³மனாதி³. கிரியாவிஸேஸோ விஜ்ஜ²னாதி³. ஓகாஸோ கா³மாதி³. யோ ஹி ‘‘அஜ்ஜ, ஸ்வே’’தி அனியமெத்வா ‘‘புப்³ப³ண்ஹே மாரேஹீ’’தி வுத்தோ யதா³ கதா³சி புப்³ப³ண்ஹே மாரேதி, நத்தி² விஸங்கேதோ. யோ பன ‘‘புப்³ப³ண்ஹே’’தி வுத்தோ மஜ்ஜ²ன்ஹாதீ³ஸு மாரேதி, விஸங்கேதோ ஹோதி, ஆணாபகஸ்ஸ அனாபத்தி. ஏவங் காலஸ்ஸ ஸங்கேதவிஸங்கேததாவஸேன நியாமகதா வேதி³தப்³பா³. இமினாவ நயேன வத்து²ஆதீ³ஸுபி வினிச்ச²யோ வேதி³தப்³போ³தி.
Evaṃ chappayoge dassetvā tesu āṇattippayogassa niyāmake dassetuṃ ‘‘kālā’’tiādi vuttaṃ. Tattha yathāvuttaṃ āṇattiṃ niyamenti saṅketavisaṅketatāvasena paricchindantīti āṇattiniyāmakā. Te pana kālo ca vatthu ca āvudhañca iriyāpatho cāti cattāro, tathā kiriyāviseso okāsoti gaṇanaparicchedavasena cha hontīti attho. Tattha kālo pubbaṇhādi yobbanādi ca. Vatthu māretabbo satto. Āvudhaṃ asiādi. Iriyāpatho māretabbassa gamanādi. Kiriyāviseso vijjhanādi. Okāso gāmādi. Yo hi ‘‘ajja, sve’’ti aniyametvā ‘‘pubbaṇhe mārehī’’ti vutto yadā kadāci pubbaṇhe māreti, natthi visaṅketo. Yo pana ‘‘pubbaṇhe’’ti vutto majjhanhādīsu māreti, visaṅketo hoti, āṇāpakassa anāpatti. Evaṃ kālassa saṅketavisaṅketatāvasena niyāmakatā veditabbā. Imināva nayena vatthuādīsupi vinicchayo veditabboti.
ததியங்.
Tatiyaṃ.
8-9. இதா³னி சதுத்த²ங் த³ஸ்ஸேதுங் ‘‘ஜா²னாதி³பே⁴த³’’ந்திஆதி³மாஹ. தத்த² அத்தனி நோஸந்தங் அத்துபனாயிகஞ்ச பச்சுப்பன்னப⁴வஸ்ஸிதஞ்ச அஞ்ஞாபதே³ஸரஹிதஞ்ச ஜா²னாதி³பே⁴த³ங் கொட்டா²ஸங் கத்வா வா ஏகேகங் கத்வா வா காயேன வா வாசாய வா விஞ்ஞத்திபதே² தீ³பெந்தோ நாதி⁴மானிகோ ஞாதே சுதோ ப⁴வேதி ஸம்ப³ந்தோ⁴. தத்த² அத்தனி ஸகஸந்தானே நோஸந்தங் அனுப்பன்னத்தாயேவ அவிஜ்ஜமானங், எத்த² நோஸந்தோதி அத்தே² தப்புரிஸோ. ஜா²னாதி³பே⁴த³ந்தி ஜா²னங் ஆதி³ யஸ்ஸ ‘‘விமொக்க²ஸமாதி⁴ ஸமாபத்தி ஞாணத³ஸ்ஸன மக்³க³பா⁴வனா ப²லஸச்சி² கிரியாகிலேஸப்பஹானவினீவரணதாசித்தஸ்ஸ ஸுஞ்ஞாகா³ரே அபி⁴ரதீ’’தி (பாரா॰ 198) வுத்தஸ்ஸ ஸோ ஜா²னாதி³, ஸோவ பே⁴தோ³ விஸேஸோதி ஸமாஸோ. தங் ஜா²னாதி³பே⁴த³ங் உத்தரிமனுஸ்ஸத⁴ம்மங். அத்துபனாயிகந்தி ‘‘அயங் மயி அத்தீ²’’தி ஆரோசனவஸேன அத்தனி உபனீயதி, ‘‘அஹங் வா எத்த² ஸந்தி³ஸ்ஸாமீ’’தி அத்தா உபனீயதி எத்த² த⁴ம்மேதி வா அத்துபனாயிகோ, ஜா²னாதி³பே⁴தோ³, தங். பச்சுப்பன்னப⁴வஸ்ஸிதந்தி பச்சுப்பன்னப⁴வோ நாம இதா³னி வத்தமானோ அத்தபா⁴வோ, தன்னிஸ்ஸிதோதி ஸமாஸோ, ஸோ ச ஜா²னாதி³பே⁴தோ³யேவ, தங்.
8-9. Idāni catutthaṃ dassetuṃ ‘‘jhānādibheda’’ntiādimāha. Tattha attani nosantaṃ attupanāyikañca paccuppannabhavassitañca aññāpadesarahitañca jhānādibhedaṃ koṭṭhāsaṃ katvā vā ekekaṃ katvā vā kāyena vā vācāya vā viññattipathe dīpento nādhimāniko ñāte cuto bhaveti sambandho. Tattha attani sakasantāne nosantaṃ anuppannattāyeva avijjamānaṃ, ettha nosantoti atthe tappuriso. Jhānādibhedanti jhānaṃ ādi yassa ‘‘vimokkhasamādhi samāpatti ñāṇadassana maggabhāvanā phalasacchi kiriyākilesappahānavinīvaraṇatācittassa suññāgāre abhiratī’’ti (pārā. 198) vuttassa so jhānādi, sova bhedo visesoti samāso. Taṃ jhānādibhedaṃ uttarimanussadhammaṃ. Attupanāyikanti ‘‘ayaṃ mayi atthī’’ti ārocanavasena attani upanīyati, ‘‘ahaṃ vā ettha sandissāmī’’ti attā upanīyati ettha dhammeti vā attupanāyiko, jhānādibhedo, taṃ. Paccuppannabhavassitanti paccuppannabhavo nāma idāni vattamāno attabhāvo, tannissitoti samāso, so ca jhānādibhedoyeva, taṃ.
அஞ்ஞாபதே³ஸரஹிதந்தி ‘‘யோ தே விஹாரே வஸி, ஸோ பி⁴க்கு² பட²மங் ஜா²னங் ஸமாபஜ்ஜீ’’திஆதி³னா (பாரா॰ 220) நயேன அஞ்ஞஸ்ஸ அபதே³ஸோ, தேன ரஹிதோ சத்தோதி தப்புரிஸஸமாஸோ, ஸோ ரஹிதோ தேனாதி வா ப³ஹுப்³பீ³ஹி, ஜா²னாதி³பே⁴தோ³வ , தங். கொட்டா²ஸங் கத்வா வாதி ‘‘பட²மங் ஜா²னங் து³தியங் ஜா²னங் ஸமாபஜ்ஜிங், பட²மங் ஜா²னங் ததியங் ஜா²னங் ஸமாபஜ்ஜி’’ந்திஆதி³னா நயேன கொட்டா²ஸங் கத்வா வா. ஏகேகங் கத்வா வாதி ‘‘பட²மங் ஜா²னங் ஸமாபஜ்ஜிங், து³தியங் ஜா²னங் ஸமாபஜ்ஜி’’ந்திஆதி³னா நயேன ஏகேகங் கத்வா வா. எத்த² ச ஏகந்தி டி²தே விச்சா²யங் த்³வித்தங். எத்த² பன கத்வாதி கரணகிரியாய ஏகேகவஸேன பி⁴ன்னஸ்ஸ ஜா²னாதி³னோ அத்த²ஸ்ஸ ஸம்ப³ந்த⁴னிச்சா² விச்சா²தி வேதி³தப்³பா³. டீகாயங் பன ‘‘கொட்டா²ஸங் வாதி எத்த² ‘ஜா²னலாபீ⁴, விமொக்க²லாபீ⁴, ஸமாதி⁴லாபீ⁴, ஸமாபத்திலாபீ⁴ம்ஹீ’தி ஏவமாதி³னா நயேன கொட்டா²ஸதோ வாதி அத்தோ²’’தி ச ‘‘ஏகேகங் வாதி ‘பட²மஸ்ஸ ஜா²னஸ்ஸ லாபீ⁴, து³தியஸ்ஸ ஜா²னஸ்ஸ லாபீ⁴ம்ஹீ’தி ஏவமாதி³னா நயேன ஏகேகங் வாதி அத்தோ²’’தி ச வுத்தங். ஸோ பாளியங் அட்ட²கதா²யஞ்ச அவுத்தக்கமோதி வேதி³தப்³போ³. காயேன வாதி ஹத்த²முத்³தா³தி³வஸேன காயேன வா. வாசாதி எத்த² ய-காரோ லுத்தனித்³தி³ட்டோ² ‘‘அலஜ்ஜிதா’’திஆதீ³ஸு விய. விஞ்ஞத்திபதே²தி காயவசீவிஞ்ஞத்தீனங் க³ஹணயொக்³யே பதே³ஸே ட²த்வாதி அஜ்ஜா²ஹரிதப்³ப³ங். தீ³பெந்தோதி ‘‘இமினா ச இமினா ச காரணேன அயங் த⁴ம்மோ மயி அத்தீ²’’தி பகாஸெந்தோ. நாதி⁴மானிகோதி அப்பத்தே பத்தஸஞ்ஞிதாஸங்கா²தோ அதி⁴கோ மானோ, ஸோ நத்தி² ஏதஸ்ஸாதி நாதி⁴மானிகோ, பி⁴க்கு². ஞாதேதி விஞ்ஞுனா மனுஸ்ஸஜாதிகேன ஸிக்கா²பச்சக்கா²னே வுத்தனயேன விஞ்ஞாதே ஸதி சுதோ ப⁴வே ஸாஸனதோதி விஞ்ஞாயதி. அஞ்ஞாபதே³ஸேன தீ³பயதோ பன து²ல்லச்சயங். எத்த² ச –
Aññāpadesarahitanti ‘‘yo te vihāre vasi, so bhikkhu paṭhamaṃ jhānaṃ samāpajjī’’tiādinā (pārā. 220) nayena aññassa apadeso, tena rahito cattoti tappurisasamāso, so rahito tenāti vā bahubbīhi, jhānādibhedova , taṃ. Koṭṭhāsaṃ katvā vāti ‘‘paṭhamaṃ jhānaṃ dutiyaṃ jhānaṃ samāpajjiṃ, paṭhamaṃ jhānaṃ tatiyaṃ jhānaṃ samāpajji’’ntiādinā nayena koṭṭhāsaṃ katvā vā. Ekekaṃ katvā vāti ‘‘paṭhamaṃ jhānaṃ samāpajjiṃ, dutiyaṃ jhānaṃ samāpajji’’ntiādinā nayena ekekaṃ katvā vā. Ettha ca ekanti ṭhite vicchāyaṃ dvittaṃ. Ettha pana katvāti karaṇakiriyāya ekekavasena bhinnassa jhānādino atthassa sambandhanicchā vicchāti veditabbā. Ṭīkāyaṃ pana ‘‘koṭṭhāsaṃ vāti ettha ‘jhānalābhī, vimokkhalābhī, samādhilābhī, samāpattilābhīmhī’ti evamādinā nayena koṭṭhāsato vāti attho’’ti ca ‘‘ekekaṃ vāti ‘paṭhamassa jhānassa lābhī, dutiyassa jhānassa lābhīmhī’ti evamādinā nayena ekekaṃ vāti attho’’ti ca vuttaṃ. So pāḷiyaṃ aṭṭhakathāyañca avuttakkamoti veditabbo. Kāyena vāti hatthamuddādivasena kāyena vā. Vācāti ettha ya-kāro luttaniddiṭṭho ‘‘alajjitā’’tiādīsu viya. Viññattipatheti kāyavacīviññattīnaṃ gahaṇayogye padese ṭhatvāti ajjhāharitabbaṃ. Dīpentoti ‘‘iminā ca iminā ca kāraṇena ayaṃ dhammo mayi atthī’’ti pakāsento. Nādhimānikoti appatte pattasaññitāsaṅkhāto adhiko māno, so natthi etassāti nādhimāniko, bhikkhu. Ñāteti viññunā manussajātikena sikkhāpaccakkhāne vuttanayena viññāte sati cuto bhave sāsanatoti viññāyati. Aññāpadesena dīpayato pana thullaccayaṃ. Ettha ca –
து³க்கடங் பட²மஸ்ஸேவ, ஸாமந்தமிதி வண்ணிதங்;
Dukkaṭaṃ paṭhamasseva, sāmantamiti vaṇṇitaṃ;
ஸேஸானங் பன திண்ணம்பி, து²ல்லச்சயமுதீ³ரிதந்தி.
Sesānaṃ pana tiṇṇampi, thullaccayamudīritanti.
சதுத்த²ங்.
Catutthaṃ.
10. இதா³னி சதுன்னம்பி சேதேஸமஸங்வாஸதங் அப⁴ப்³ப³தஞ்ச தீ³பேதுங் ‘‘பாராஜிகேதே’’திஆதி³ ஆரத்³த⁴ங். ஏதே சத்தாரோ பாராஜிகா புக்³க³லா யதா² புரே புப்³பே³ கி³ஹிகாலே, அனுபஸம்பன்னகாலே ச விய அஸங்வாஸாதி ஸம்ப³ந்தோ⁴. ஸஹ வஸந்தி யஸ்மா ஸப்³பே³பி லஜ்ஜினோ ஏதேஸு கம்மாதீ³ஸு ந ஏகோபி ததோ ப³ஹித்³தா⁴ ஸந்தி³ஸ்ஸதீதி ஏககம்மங் ஏகுத்³தே³ஸோ ஸமஸிக்க²தாதி இமே தயோ ஸங்வாஸா நாம. தத்த² அபலோகனாதி³கங் சதுப்³பி³த⁴ம்பி ஸங்க⁴கம்மங் ஸீமாபரிச்சி²ன்னேஹி பகதத்தேஹி பி⁴க்கூ²ஹி ஏகதோ கத்தப்³ப³தா ஏககம்மங் நாம. ததா² பஞ்சவிதோ⁴பி பாதிமொக்கு²த்³தே³ஸோ ஏகதோ உத்³தி³ஸிதப்³ப³த்தா ஏகுத்³தே³ஸோ நாம. பஞ்ஞத்தங் பன ஸிக்கா²பத³ங் ஸப்³பே³ஹிபி லஜ்ஜீபுக்³க³லேஹி ஸமங் ஸிக்கி²தப்³ப³பா⁴வதோ ஸமஸிக்க²தா நாம. நத்தி² தே ஸங்வாஸா ஏதேஸந்தி அஸங்வாஸா. ‘‘அப⁴ப்³பா³’’திஆதீ³ஸு பி⁴க்கு²பா⁴வாயாதி துமத்தே² ஸம்பதா³னவசனங், தஸ்மா யதா² ஸீஸச்சி²ன்னோ ஜீவிதுங் அப⁴ப்³போ³, ஏவங் சத்தாரோமே புக்³க³லா பி⁴க்கு²பா⁴வாய பி⁴க்கூ² ப⁴விதுங் அப⁴ப்³பா³தி அத்தோ².
10. Idāni catunnampi cetesamasaṃvāsataṃ abhabbatañca dīpetuṃ ‘‘pārājikete’’tiādi āraddhaṃ. Ete cattāro pārājikā puggalā yathā pure pubbe gihikāle, anupasampannakāle ca viya asaṃvāsāti sambandho. Saha vasanti yasmā sabbepi lajjino etesu kammādīsu na ekopi tato bahiddhā sandissatīti ekakammaṃ ekuddeso samasikkhatāti ime tayo saṃvāsā nāma. Tattha apalokanādikaṃ catubbidhampi saṅghakammaṃ sīmāparicchinnehi pakatattehi bhikkhūhi ekato kattabbatā ekakammaṃ nāma. Tathā pañcavidhopi pātimokkhuddeso ekato uddisitabbattā ekuddeso nāma. Paññattaṃ pana sikkhāpadaṃ sabbehipi lajjīpuggalehi samaṃ sikkhitabbabhāvato samasikkhatā nāma. Natthi te saṃvāsā etesanti asaṃvāsā. ‘‘Abhabbā’’tiādīsu bhikkhubhāvāyāti tumatthe sampadānavacanaṃ, tasmā yathā sīsacchinno jīvituṃ abhabbo, evaṃ cattārome puggalā bhikkhubhāvāya bhikkhū bhavituṃ abhabbāti attho.
11. இதா³னி பரியாயாணத்தீஹி ஸம்ப⁴வந்தே த³ஸ்ஸேதுங் ‘‘பரியாயோ சா’’திஆதி³மாஹ. பரியாயோ ச ஆணத்தி ச ததியே மனுஸ்ஸவிக்³க³ஹே லப்³ப⁴தீதி ஸம்ப³ந்தோ⁴. தத்த² காயாதீ³ஹி யதா²வுத்தேஹி ‘‘யோ ஏவங் மரதி, ஸோ த⁴னங் வா லப⁴தீ’’தி ஏவமாதி³விஞ்ஞாபகோ ப்³யஞ்ஜனபூ⁴தோ காயவசீபயோகோ³ பரியாயோ. இமினா இத³ங் தீ³பேதி – யதா² அதி³ன்னாதா³னே ‘‘ஆதி³யெய்யா’’தி (பாரா॰ 92) வுத்தத்தா பாரியாயகதா²ய முச்சதி, ந இத⁴ ஏவங். ‘‘ஸங்வண்ணெய்யா’’தி (பாரா॰ 172) பரியாயகயாயபி ந முச்சதீதி. ‘‘து³தியே பனா’’திஆதீ³ஸு அத்தோ² பாகடோயேவ. ஏவமுபரிபி பாகடமுபெக்கி²ஸ்ஸாம.
11. Idāni pariyāyāṇattīhi sambhavante dassetuṃ ‘‘pariyāyo cā’’tiādimāha. Pariyāyo ca āṇatti ca tatiye manussaviggahe labbhatīti sambandho. Tattha kāyādīhi yathāvuttehi ‘‘yo evaṃ marati, so dhanaṃ vā labhatī’’ti evamādiviññāpako byañjanabhūto kāyavacīpayogo pariyāyo. Iminā idaṃ dīpeti – yathā adinnādāne ‘‘ādiyeyyā’’ti (pārā. 92) vuttattā pāriyāyakathāya muccati, na idha evaṃ. ‘‘Saṃvaṇṇeyyā’’ti (pārā. 172) pariyāyakayāyapi na muccatīti. ‘‘Dutiye panā’’tiādīsu attho pākaṭoyeva. Evamuparipi pākaṭamupekkhissāma.
12. இதா³னி மேது²னத⁴ம்மாதீ³னங் அங்கா³னி த³ஸ்ஸேதுங் ‘‘ஸேவேதூ’’திஆதி³மாஹ. ஸேவேதுகாமதாசித்தந்தி மேது²னங் ஸேவேதுங் காமேதீதி ஸேவேதுகாமோ, தஸ்ஸ பா⁴வோ நாம தண்ஹா, தாய ஸேவேதுகாமதாய ஸம்பயுத்தங் சித்தந்தி தப்புரிஸோ. மேது²னத⁴ம்மஸ்ஸாதி மிது²னானங் இத்தி²புரிஸானங் இத³ந்தி மேது²னங், தமேவ த⁴ம்மோதி மேது²னத⁴ம்மோ. இத⁴ பன உபசாரவஸேன பாராஜிகாபத்தி மேது²னத⁴ம்மோ நாம. அத² வா மேது²னேன ஜாதோ த⁴ம்மோ பாராஜிகாபத்தி மேது²னத⁴ம்மோ, தஸ்ஸ மேது²னத⁴ம்மஸ்ஸ மேது²னத⁴ம்மபாராஜிகாபத்தியா. அங்க³த்³வயந்தி அங்கா³னங் காரணானங் த்³வயங். பு³தா⁴தி வினயத⁴ரா விஞ்ஞுனோ.
12. Idāni methunadhammādīnaṃ aṅgāni dassetuṃ ‘‘sevetū’’tiādimāha. Sevetukāmatācittanti methunaṃ sevetuṃ kāmetīti sevetukāmo, tassa bhāvo nāma taṇhā, tāya sevetukāmatāya sampayuttaṃ cittanti tappuriso. Methunadhammassāti mithunānaṃ itthipurisānaṃ idanti methunaṃ, tameva dhammoti methunadhammo. Idha pana upacāravasena pārājikāpatti methunadhammo nāma. Atha vā methunena jāto dhammo pārājikāpatti methunadhammo, tassa methunadhammassa methunadhammapārājikāpattiyā. Aṅgadvayanti aṅgānaṃ kāraṇānaṃ dvayaṃ. Budhāti vinayadharā viññuno.
13. மனுஸ்ஸஸந்தி மனுஸ்ஸானங் ஸங் மனுஸ்ஸஸங், ததா³யத்தவத்து²கா ச. ஏதேன பேததிரச்சா²னக³தாயத்தங் நிவத்தேதி. ததா²ஸஞ்ஞீதி ததா² தாதி³ஸா ஸஞ்ஞா ததா²ஸஞ்ஞா, ஸா அஸ்ஸ அத்தீ²தி ததா²ஸஞ்ஞீ. பராயத்தஸஞ்ஞிதா சாதி அத்தோ². பா⁴வப்பதா⁴னா இமே நித்³தே³ஸா, பா⁴வபச்சயலோபோ வா ‘‘பு³த்³தே⁴ ரதன’’ந்திஆதீ³ஸு (கு²॰ பா॰ 6.3) விய. ஏவமுபரிபி ஈதி³ஸேஸு. தெ²ய்யசித்தந்தி தே²னபா⁴வஸங்கா²தங் சித்தஞ்ச. வத்து²னோ க³ருதாதி ப⁴ண்ட³ஸ்ஸ பாத³அதிரேகபாதா³ரஹபா⁴வேன க³ருதா ச. ஊனபஞ்சமாஸகே வா அதிரேகமாஸகே வா து²ல்லச்சயங். மாஸகே வா ஊனமாஸகே வா து³க்கடங். அவஹாரோதி பஞ்சவீஸதியா அவஹாரானங் அஞ்ஞதரேன அவஹரணஞ்சாதி இமே பஞ்ச அதி³ன்னாதா³னஹேதுயோ அதி³ன்னாதா³னபாராஜிகாபத்தியா அங்கா³னி.
13.Manussasanti manussānaṃ saṃ manussasaṃ, tadāyattavatthukā ca. Etena petatiracchānagatāyattaṃ nivatteti. Tathāsaññīti tathā tādisā saññā tathāsaññā, sā assa atthīti tathāsaññī. Parāyattasaññitā cāti attho. Bhāvappadhānā ime niddesā, bhāvapaccayalopo vā ‘‘buddhe ratana’’ntiādīsu (khu. pā. 6.3) viya. Evamuparipi īdisesu. Theyyacittanti thenabhāvasaṅkhātaṃ cittañca. Vatthuno garutāti bhaṇḍassa pādaatirekapādārahabhāvena garutā ca. Ūnapañcamāsake vā atirekamāsake vā thullaccayaṃ. Māsake vā ūnamāsake vā dukkaṭaṃ. Avahāroti pañcavīsatiyā avahārānaṃ aññatarena avaharaṇañcāti ime pañca adinnādānahetuyo adinnādānapārājikāpattiyā aṅgāni.
14. பாணோ மானுஸ்ஸகோதி மனுஸ்ஸஜாதிஸம்ப³ந்தோ⁴ பாணோ ச, பாணோதி ஹி வோஹாரதோ ஸத்தோ, பரமத்த²தோ பன ஜீவிதிந்த்³ரியங் வுச்சதி. பாணஸஞ்ஞிதாதி பாணோதி ஸஞ்ஞிதா ச, கா⁴தனங் கா⁴தோ, ஸோ ஏவ சேதனா கா⁴தசேதனா, ‘‘வதா⁴மி ந’’ந்தி ஏவங் பவத்தா ஸா ச, தங்ஸமுட்டி²தோ ஸாஹத்தி²காதீ³னங் ச²ன்னமஞ்ஞதரோ பயோகோ³ ச, தேன பயோகே³ன மரணஞ்சாதி ஏதே யதா²வுத்தா பஞ்ச வத⁴ஹேதுயோ பாணகா⁴தாபஜ்ஜிதப்³ப³ஆபத்தியா அங்கா³னீதி அத்தோ².
14.Pāṇo mānussakoti manussajātisambandho pāṇo ca, pāṇoti hi vohārato satto, paramatthato pana jīvitindriyaṃ vuccati. Pāṇasaññitāti pāṇoti saññitā ca, ghātanaṃ ghāto, so eva cetanā ghātacetanā, ‘‘vadhāmi na’’nti evaṃ pavattā sā ca, taṃsamuṭṭhito sāhatthikādīnaṃ channamaññataro payogo ca, tena payogena maraṇañcāti ete yathāvuttā pañca vadhahetuyo pāṇaghātāpajjitabbaāpattiyā aṅgānīti attho.
15. அத்தனி அஸந்ததாதி உத்தரிமனுஸ்ஸத⁴ம்மஸ்ஸ ஸந்தானே அவிஜ்ஜமானதா ச. பாபமிச்ச²தாயாரோசனாதி யா ஸா ‘‘இதே⁴கச்சோ து³ஸ்ஸீலோ ஸமானோ ‘ஸீலவாதி மங் ஜனோ ஜானாதூ’’திஆதி³னா (விப⁴॰ 851) நயேன வுத்தா பாபஇச்ச²தாய ஸமன்னாக³தா, தாய உத்தரிமனுஸ்ஸத⁴ம்மஸ்ஸ ஆரோசனா ச. தஸ்ஸாதி யஸ்ஸ ஆரோசேதி, தஸ்ஸ. மனுஸ்ஸஜாதிதாதி மனுஸ்ஸானங் ஜாதி யஸ்ஸ, தஸ்ஸ பா⁴வோ மனுஸ்ஸஜாதிதா, ஸா ச, நஞ்ஞாபதே³ஸோதி ந அஞ்ஞாபதே³ஸோ அஞ்ஞாபதே³ஸாபா⁴வோ ச, ததே³வ ஜானநந்தி தங்க²ணங்யேவ விஜானநஞ்சாதி இமானி பஞ்ச எத்த² அஸந்ததீ³பனே அஸ்மிங் ஸந்தானே அவிஜ்ஜமானஉத்தரிமனுஸ்ஸத⁴ம்மப்பகாஸனநிமித்தே பாராஜிகே அங்கா³னி ஹேதுயோதி அத்தோ².
15.Attaniasantatāti uttarimanussadhammassa santāne avijjamānatā ca. Pāpamicchatāyārocanāti yā sā ‘‘idhekacco dussīlo samāno ‘sīlavāti maṃ jano jānātū’’tiādinā (vibha. 851) nayena vuttā pāpaicchatāya samannāgatā, tāya uttarimanussadhammassa ārocanā ca. Tassāti yassa āroceti, tassa. Manussajātitāti manussānaṃ jāti yassa, tassa bhāvo manussajātitā, sā ca, naññāpadesoti na aññāpadeso aññāpadesābhāvo ca, tadeva jānananti taṅkhaṇaṃyeva vijānanañcāti imāni pañca ettha asantadīpane asmiṃ santāne avijjamānauttarimanussadhammappakāsananimitte pārājike aṅgāni hetuyoti attho.
16. ஏவங் தேஸமஸங்வாஸதாப⁴ப்³ப³தாதீ³னி த³ஸ்ஸெத்வா இதா³னி ந தே சத்தாரோவ, அத² கோ² ஸந்தஞ்ஞேபீதி தே ஸப்³பே³பி ஸமோதா⁴னெத்வா த³ஸ்ஸெந்தோ ‘‘அஸாதா⁴ரணா’’திஆதி³மாஹ. தத்த² அஸாதா⁴ரணாதி பாராஜிகா த⁴ம்மா அதி⁴ப்பேதா. தேனேவ செத்த² புல்லிங்க³னித்³தே³ஸோ. தஸ்மா பி⁴க்கு²னீனங் பி⁴க்கூ²ஹி அஸாதா⁴ரணா பாராஜிகா த⁴ம்மா சத்தாரோ சாதி ஏவமெத்த² அத்தோ² த³ட்ட²ப்³போ³. உபசாரவஸேன து உப்³ப⁴ஜாணுமண்ட³லிகாதி³கா பாராஜிகாபன்னா பரிக்³க³ய்ஹந்தி. தாஸு யா அவஸ்ஸுதா அவஸ்ஸுதஸ்ஸ மனுஸ்ஸபுரிஸஸ்ஸ அக்க²கானங் அதோ⁴ ஜாணுமண்ட³லானங் கப்பரானஞ்ச உபரி காயஸங்ஸக்³க³ங் ஸாதி³யதி, அயங் உப்³ப⁴ஜாணுமண்ட³லிகா. யா பன அஞ்ஞிஸ்ஸா பி⁴க்கு²னியா பாராஜிகங் படிச்சா²தே³தி, ஸா வஜ்ஜப்படிச்சா²தி³கா. யா உக்கி²த்தகங் பி⁴க்கு²ங் தஸ்ஸா தி³ட்டி²யா க³ஹணவஸேன அனுவத்ததி, ஸா உக்கி²த்தானுவத்திகா. காயஸங்ஸக்³க³ராகே³ன திந்தஸ்ஸ ஹத்த²க்³க³ஹணங் ஸங்கா⁴டிகண்ணக்³க³ஹணங் காயஸங்ஸக்³க³த்தா²ய புரிஸஸ்ஸ ஹத்த²பாஸே டா²னங் ட²த்வா ஸல்லபனங் ஸங்கேதக³மனங் புரிஸஸ்ஸாக³மனஸாதி³யனங் படிச்ச²ன்னோகாஸவவிஸனங் ஹத்த²பாஸே ட²த்வா காயோபஸங்ஹரணந்தி இமானி அட்ட² வத்தூ²னி யஸ்ஸா அவஸ்ஸுதாய, ஸா அட்ட²வத்து²கா நாம.
16. Evaṃ tesamasaṃvāsatābhabbatādīni dassetvā idāni na te cattārova, atha kho santaññepīti te sabbepi samodhānetvā dassento ‘‘asādhāraṇā’’tiādimāha. Tattha asādhāraṇāti pārājikā dhammā adhippetā. Teneva cettha pulliṅganiddeso. Tasmā bhikkhunīnaṃ bhikkhūhi asādhāraṇā pārājikā dhammā cattāro cāti evamettha attho daṭṭhabbo. Upacāravasena tu ubbhajāṇumaṇḍalikādikā pārājikāpannā pariggayhanti. Tāsu yā avassutā avassutassa manussapurisassa akkhakānaṃ adho jāṇumaṇḍalānaṃ kapparānañca upari kāyasaṃsaggaṃ sādiyati, ayaṃ ubbhajāṇumaṇḍalikā. Yā pana aññissā bhikkhuniyā pārājikaṃ paṭicchādeti, sā vajjappaṭicchādikā. Yā ukkhittakaṃ bhikkhuṃ tassā diṭṭhiyā gahaṇavasena anuvattati, sā ukkhittānuvattikā. Kāyasaṃsaggarāgena tintassa hatthaggahaṇaṃ saṅghāṭikaṇṇaggahaṇaṃ kāyasaṃsaggatthāya purisassa hatthapāse ṭhānaṃ ṭhatvā sallapanaṃ saṅketagamanaṃ purisassāgamanasādiyanaṃ paṭicchannokāsavavisanaṃ hatthapāse ṭhatvā kāyopasaṃharaṇanti imāni aṭṭha vatthūni yassā avassutāya, sā aṭṭhavatthukā nāma.
அப⁴ப்³ப³கா ஏகாத³ஸ சாதி எத்த² பண்ட³கோ தெ²ய்யஸங்வாஸகோ தித்தி²யபக்கந்தகோ திரச்சா²னக³தோ மாதுகா⁴தகோ பிதுகா⁴தகோ அரஹந்தகா⁴தகோ பி⁴க்கு²னிதூ³ஸகோ ஸங்க⁴பே⁴த³கோ லோஹிதுப்பாத³கோ உப⁴தொப்³யஞ்ஜனகோதி இமே அப⁴ப்³பா³ ஏகாத³ஸ ச. தேஸு பண்ட³கோதி ஓபக்கமிகனபுங்ஸகபண்ட³கா ச பண்ட³கபா⁴வபக்கே² பக்க²பண்ட³கோ ச இத⁴ அதி⁴ப்பேதா. ஆஸித்தஉஸூயபண்ட³கானங் பன பப்³ப³ஜ்ஜா ச உபஸம்பதா³ ச ந வாரிதா. தெ²ய்யஸங்வாஸகோ பன லிங்க³த்தே²னகாதி³வஸேன திவிதோ⁴. தத்த² ஸயங் பப்³ப³ஜிதத்தா லிங்க³மத்தங் தே²னேதீதி லிங்க³த்தே²னகோ. பி⁴க்கு²வஸ்ஸக³ணனாதி³கங் ஸங்வாஸங் தே²னேதீதி ஸங்வாஸத்தே²னகோ. ஸிக்க²ங் பச்சக்கா²ய ஏவங் படிபஜ்ஜந்தேபி ஏஸேவ நயோ. யதா²வுத்தமுப⁴யங் தே²னேதீதி உப⁴யத்தே²னகோ. ட²பெத்வா பன இமங் திவித⁴ங் –
Abhabbakā ekādasa cāti ettha paṇḍako theyyasaṃvāsako titthiyapakkantako tiracchānagato mātughātako pitughātako arahantaghātako bhikkhunidūsako saṅghabhedako lohituppādako ubhatobyañjanakoti ime abhabbā ekādasa ca. Tesu paṇḍakoti opakkamikanapuṃsakapaṇḍakā ca paṇḍakabhāvapakkhe pakkhapaṇḍako ca idha adhippetā. Āsittausūyapaṇḍakānaṃ pana pabbajjā ca upasampadā ca na vāritā. Theyyasaṃvāsako pana liṅgatthenakādivasena tividho. Tattha sayaṃ pabbajitattā liṅgamattaṃ thenetīti liṅgatthenako. Bhikkhuvassagaṇanādikaṃ saṃvāsaṃ thenetīti saṃvāsatthenako. Sikkhaṃ paccakkhāya evaṃ paṭipajjantepi eseva nayo. Yathāvuttamubhayaṃ thenetīti ubhayatthenako. Ṭhapetvā pana imaṃ tividhaṃ –
ராஜது³ப்³பி⁴க்க²கந்தார-ரோக³வேரிப⁴யேன வா;
Rājadubbhikkhakantāra-rogaveribhayena vā;
சீவராஹரணத்த²ங் வா, லிங்க³ங் ஆதி³யதீத⁴ யோ.
Cīvarāharaṇatthaṃ vā, liṅgaṃ ādiyatīdha yo.
ஸங்வாஸங் நாதி⁴வாஸேதி, யாவ ஸோ ஸுத்³த⁴மானஸோ;
Saṃvāsaṃ nādhivāseti, yāva so suddhamānaso;
தெ²ய்யஸங்வாஸகோ நாம, தாவ ஏஸ ந வுச்சதீதி. (மஹாவ॰ அட்ட²॰ 110; கங்கா²॰ அட்ட²॰ பட²மபாராஜிகவண்ணனா);
Theyyasaṃvāsako nāma, tāva esa na vuccatīti. (mahāva. aṭṭha. 110; kaṅkhā. aṭṭha. paṭhamapārājikavaṇṇanā);
தித்தி²யபக்கந்தகாத³யோ து தங்தங்வசனத்தா²னுஸாரேன வேதி³தப்³பா³. திரச்சா²னக³தோ பன ட²பெத்வா மனுஸ்ஸஜாதிகங் அவஸேஸோ ஸப்³போ³ வேதி³தப்³போ³. இமே ஏகாத³ஸ புக்³க³லா பி⁴க்கு²பா⁴வாய அப⁴ப்³ப³த்தா பாராஜிகாபன்னஸதி³ஸதாய ‘‘பாராஜிகா’’தி வுச்சந்தி. விப்³ப⁴ந்தா பி⁴க்கு²னீதி கி³ஹினிவாஸனநிவத்தா² பி⁴க்கு²னீ ச. ஸா ஹி எத்தாவதா பாராஜிகா. முது³கா பிட்டி² யஸ்ஸ, ஸோ ச. ஸோ ஹி அனபி⁴ரதியா பீளிதோ யதா³ அத்தனோ அங்க³ஜாதங் அத்தனோ வச்சமுக²மக்³கே³ஸு பவேஸேதி, ததா³ பாராஜிகோ ஹோதி.
Titthiyapakkantakādayo tu taṃtaṃvacanatthānusārena veditabbā. Tiracchānagato pana ṭhapetvā manussajātikaṃ avaseso sabbo veditabbo. Ime ekādasa puggalā bhikkhubhāvāya abhabbattā pārājikāpannasadisatāya ‘‘pārājikā’’ti vuccanti. Vibbhantā bhikkhunīti gihinivāsananivatthā bhikkhunī ca. Sā hi ettāvatā pārājikā. Mudukā piṭṭhi yassa, so ca. So hi anabhiratiyā pīḷito yadā attano aṅgajātaṃ attano vaccamukhamaggesu paveseti, tadā pārājiko hoti.
17-18. லம்ப³மானமங்க³ஜாதமேதஸ்ஸாதி லம்பீ³. ஸோ யதா²வுத்தேஸு பவேஸிதோ பாராஜிகோ. முகே²ன க³ண்ஹந்தோ அங்க³ஜாதங் பரஸ்ஸ சாதி யோ அனபி⁴ரதியா பீளிதோ பரஸ்ஸ ஸுத்தஸ்ஸ வா மதஸ்ஸ வா அங்க³ஜாதங் முகே²ன க³ண்ஹாதி, ஸோ பரஸ்ஸ அங்க³ஜாதங் முகே²ன க³ண்ஹந்தோ ச. தத்தே²வாபி⁴னிஸீத³ந்தோதி யோ அனபி⁴ரதியா பீளிதோ தத்தே²வ பரஸ்ஸ அங்க³ஜாதே வச்சமக்³கே³ன அபி⁴னிஸீத³தி, ஸோ சாதி ஏதே த்³வயங்த்³வயஸமாபத்தியா அபா⁴வேபி மக்³கே³ மக்³க³ப்பவேஸனஹேது மேது²னஸ்ஸ அனுலோமிகா சத்தாரோ ச. இதா⁴க³தா சத்தாரோதி இத⁴ கு²த்³த³ஸிக்கா²யங் யதா²வுத்தா மேது²னத⁴ம்மா பாராஜிகாத³யோ சத்தாரோ சாதி ஸமோதா⁴னா பிண்டீ³கரணவஸேன சதுவீஸதி பாராஜிகா ப⁴வந்தீதி ஸேஸோ. எத்த² ச கா³தா²ப³ந்த⁴வஸேன ரஸ்ஸங் கத்வா ‘‘பராஜிகா’’தி வுத்தங். எத்தா²ஹ – மாதுகா⁴தகாத³யோ ததியங் பாராஜிகங் ஆபன்னா, பி⁴க்கு²னிதூ³ஸகோ, முது³பிட்டி²காத³யோ சத்தாரோ ச பட²மபாராஜிகங் ஆபன்னா ஏவாதி குதோ சதுவீஸதீதி? வுச்சதே – மாதுகா⁴தகாத³யோ ஹி சத்தாரோ இத⁴ அனுபஸம்பன்னா ஏவ அதி⁴ப்பேதா. முது³பிட்டி²காத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா பன ஏகேன பரியாயேன மேது²னத⁴ம்மங் அப்படிஸேவினோ ஹொந்தி, தஸ்மா விஸுங் வுத்தாதி.
17-18. Lambamānamaṅgajātametassāti lambī. So yathāvuttesu pavesito pārājiko. Mukhena gaṇhanto aṅgajātaṃ parassa cāti yo anabhiratiyā pīḷito parassa suttassa vā matassa vā aṅgajātaṃ mukhena gaṇhāti, so parassa aṅgajātaṃ mukhena gaṇhanto ca. Tatthevābhinisīdantoti yo anabhiratiyā pīḷito tattheva parassa aṅgajāte vaccamaggena abhinisīdati, so cāti ete dvayaṃdvayasamāpattiyā abhāvepi magge maggappavesanahetu methunassa anulomikā cattāro ca. Idhāgatā cattāroti idha khuddasikkhāyaṃ yathāvuttā methunadhammā pārājikādayo cattāro cāti samodhānā piṇḍīkaraṇavasena catuvīsati pārājikā bhavantīti seso. Ettha ca gāthābandhavasena rassaṃ katvā ‘‘parājikā’’ti vuttaṃ. Etthāha – mātughātakādayo tatiyaṃ pārājikaṃ āpannā, bhikkhunidūsako, mudupiṭṭhikādayo cattāro ca paṭhamapārājikaṃ āpannā evāti kuto catuvīsatīti? Vuccate – mātughātakādayo hi cattāro idha anupasampannā eva adhippetā. Mudupiṭṭhikādayo cattāro kiñcāpi paṭhamapārājikena saṅgahitā, yasmā pana ekena pariyāyena methunadhammaṃ appaṭisevino honti, tasmā visuṃ vuttāti.
பாராஜிகனித்³தே³ஸவண்ணனா நிட்டி²தா.
Pārājikaniddesavaṇṇanā niṭṭhitā.
