| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
1. பாராஜிகனித்³தே³ஸவண்ணனா
1. Pārājikaniddesavaṇṇanā
1. இதா³னி ஸப்³ப³ஸிக்கா²னங் பன மூலபூ⁴தத்தா அதி⁴ஸீலஸிக்கா²வ பட²மங் வுத்தா, தத்ராபி மஹாஸாவஜ்ஜத்தா, மூலச்சே²ஜ்ஜவஸேன பவத்தனதோ ச ஸப்³ப³பட²மங் பாராஜிகங் ஜானிதப்³ப³ந்தி த³ஸ்ஸெந்தோ ‘‘ஸங் நிமித்த’’ந்த்யாதி³மாஹ. தத்த² மக்³க³த்தயே ஸங் நிமித்தங் பவேஸந்தோ பி⁴க்கு² சுதோதி அத்தோ². ஸங் நிமித்தந்தி அத்தனோ அங்க³ஜாதங், ஸப்³ப³ந்திமேன பரிச்சே²தே³ன ஏகதிலபீ³ஜமத்தம்பி அத்தனோ அங்க³ஜாதந்தி வுத்தங் ஹோதி. பி⁴க்கூ²தி அனிக்கி²த்தஸிக்கோ². மக்³க³த்தயேதி எத்த² மனுஸ்ஸாமனுஸ்ஸதிரச்சா²னக³தானங் வஸேன திஸ்ஸோ இத்தி²யோ, தயோ உப⁴தொப்³யஞ்ஜனகா, தயோ பண்ட³கா, தயோ புரிஸாதி பாராஜிகவத்து²பூ⁴தானங் நிமித்தானங் நிஸ்ஸயா த்³வாத³ஸ ஸத்தா ஹொந்தி. தேஸங் வச்சபஸ்ஸாவமுக²மக்³க³வஸேன தயோ மக்³கா³. தத்த² மனுஸ்ஸித்தி²யா தயோ, அமனுஸ்ஸித்தி²யா தயோ, திரச்சா²னக³தித்தி²யா தயோதி நவ , ததா² மனுஸ்ஸுப⁴தொப்³யஞ்ஜனகாதீ³னங். மனுஸ்ஸபண்ட³காதீ³னங் பன வச்சமுக²மக்³க³வஸேன த்³வே த்³வேதி ச², ததா² மனுஸ்ஸபுரிஸாதீ³னந்தி ஸப்³பே³ஸங் வஸேன திங்ஸ மக்³கா³ ஹொந்தி. தே ஸப்³பே³ பரிக்³க³ஹெத்வா இத⁴ ‘‘மக்³க³த்தயே’’தி வுத்தங், தஸ்மிங் மக்³க³த்தயே, த்³வாத³ஸன்னங் ஸத்தானங் தீஸு மக்³கே³ஸு யத்த² கத்த²சி மக்³கே³தி அத்தோ². சுதோதி ஸக்கத்தா வா ப்³ரஹ்மத்தா வா சுதஸத்தோ விய ஸாஸனதோ சுதோ ஹோதி, பாராஜிகோ ஹோதீதி அத்தோ².
1. Idāni sabbasikkhānaṃ pana mūlabhūtattā adhisīlasikkhāva paṭhamaṃ vuttā, tatrāpi mahāsāvajjattā, mūlacchejjavasena pavattanato ca sabbapaṭhamaṃ pārājikaṃ jānitabbanti dassento ‘‘saṃ nimitta’’ntyādimāha. Tattha maggattaye saṃ nimittaṃ pavesanto bhikkhu cutoti attho. Saṃ nimittanti attano aṅgajātaṃ, sabbantimena paricchedena ekatilabījamattampi attano aṅgajātanti vuttaṃ hoti. Bhikkhūti anikkhittasikkho. Maggattayeti ettha manussāmanussatiracchānagatānaṃ vasena tisso itthiyo, tayo ubhatobyañjanakā, tayo paṇḍakā, tayo purisāti pārājikavatthubhūtānaṃ nimittānaṃ nissayā dvādasa sattā honti. Tesaṃ vaccapassāvamukhamaggavasena tayo maggā. Tattha manussitthiyā tayo, amanussitthiyā tayo, tiracchānagatitthiyā tayoti nava , tathā manussubhatobyañjanakādīnaṃ. Manussapaṇḍakādīnaṃ pana vaccamukhamaggavasena dve dveti cha, tathā manussapurisādīnanti sabbesaṃ vasena tiṃsa maggā honti. Te sabbe pariggahetvā idha ‘‘maggattaye’’ti vuttaṃ, tasmiṃ maggattaye, dvādasannaṃ sattānaṃ tīsu maggesu yattha katthaci maggeti attho. Cutoti sakkattā vā brahmattā vā cutasatto viya sāsanato cuto hoti, pārājiko hotīti attho.
இதா³னி பவேஸனங் நாம ந கேவலங் அத்துபக்கமேனேவ ஹோதி, பரூபக்கமேனாபி ஹோதி, தத்தா²பி ஸேவனசித்தே ஸதி பாராஜிகோ ஹோதீதி த³ஸ்ஸனத்த²ங் ‘‘பவேஸனா’’த்யாதி³ வுத்தங். தஸ்ஸத்தோ² – யோ பி⁴க்கு² பவேஸனட்டி²தஉத்³த⁴ரணபவிட்ட²க்க²ணேஸு அஞ்ஞதரங் க²ணங் சேபி ஸாதி³யங் ஸாதி³யந்தோ ஸசேபி தஸ்மிங் க²ணே ஸேவனசித்தங் உபட்டா²பெந்தோ, சுதோ பாராஜிகோ ஹோதி. யோ பன ஸப்³ப³ஸோ அஸாதி³யந்தோ ஆஸீவிஸமுக²ங் அங்கா³ரகாஸுங் பவிட்ட²ங் விய ச மஞ்ஞதி, ஸோ நிப்பராதோ⁴ ஹோதி. எத்த² பன டி²தங் நாம ஸுக்கவிஸ்ஸட்டி²ஸமயப்பத்தங். பட²மபாராஜிகங்.
Idāni pavesanaṃ nāma na kevalaṃ attupakkameneva hoti, parūpakkamenāpi hoti, tatthāpi sevanacitte sati pārājiko hotīti dassanatthaṃ ‘‘pavesanā’’tyādi vuttaṃ. Tassattho – yo bhikkhu pavesanaṭṭhitauddharaṇapaviṭṭhakkhaṇesu aññataraṃ khaṇaṃ cepi sādiyaṃ sādiyanto sacepi tasmiṃ khaṇe sevanacittaṃ upaṭṭhāpento, cuto pārājiko hoti. Yo pana sabbaso asādiyanto āsīvisamukhaṃ aṅgārakāsuṃ paviṭṭhaṃ viya ca maññati, so nipparādho hoti. Ettha pana ṭhitaṃ nāma sukkavissaṭṭhisamayappattaṃ. Paṭhamapārājikaṃ.
2-7. இதா³னி து³தியங் த³ஸ்ஸேதுங் ‘‘அதி³ன்னங் மானுஸங் ப⁴ண்ட³’’ந்த்யாதி³மாஹ. தத்த² யோ பி⁴க்கு² அதி³ன்னங் மானுஸங் க³ருகங் ப⁴ண்ட³ங் பஞ்சவீஸாவஹாரேஸு யேன கேனசி அவஹாரேன ஆதி³யந்தோ சுதோ ப⁴வேதி ஸம்ப³ந்தோ⁴. அதி³ன்னந்தி யங் கிஞ்சி பரபரிக்³க³ஹிதங் ஸஸ்ஸாமிகங் ப⁴ண்ட³ங், தங் தேஹி ஸாமிகேஹி காயேன வா வாசாய வா ந தி³ன்னந்தி அதி³ன்னங், அனிஸ்ஸட்ட²ங் அபரிச்சத்தங் ரக்கி²தங் கோ³பிதங் மமாயிதங் பரபரிக்³க³ஹிதங். மனுஸ்ஸஸ்ஸ இத³ந்தி மானுஸங், மனுஸ்ஸஸந்தகங், ‘‘ப⁴ண்ட³’’ந்திமினா துல்யாதி⁴கரணங் . தெ²ய்யாயேகேனாதி தெ²ய்யாய ஏகேன, ஏகேன அவஹாரேனாதி அத்தோ². லிங்க³பே⁴த³ங் கத்வா வுத்தங். ‘‘தெ²ய்யா கேனசீ’’தி வா பாடோ². தத்த² தே²னோதி சோரோ, தே²னஸ்ஸ பா⁴வோ தெ²ய்யா, கரணத்தே² சேதங் பச்சத்தவசனங், தஸ்மா கேனசி தெ²ய்யேன அவஹாரேனாதி அத்தோ². ஆதி³யந்தி ஆதி³யந்தோ க³ண்ஹந்தோ. பஞ்சவீஸாவஹாரேஸூதி பஞ்சபஞ்சகே ஸமோதா⁴னெத்வா பஞ்சவீஸதி அவஹாரா. தத்த² பஞ்சபஞ்சகானி நாம நானாப⁴ண்ட³பஞ்சகங் ஏகப⁴ண்ட³பஞ்சகங் ஸாஹத்தி²கபஞ்சகங் புப்³ப³ப்பயோக³பஞ்சகங் தெ²ய்யாவஹாரபஞ்சகந்தி.
2-7. Idāni dutiyaṃ dassetuṃ ‘‘adinnaṃ mānusaṃ bhaṇḍa’’ntyādimāha. Tattha yo bhikkhu adinnaṃ mānusaṃ garukaṃ bhaṇḍaṃ pañcavīsāvahāresu yena kenaci avahārena ādiyanto cuto bhaveti sambandho. Adinnanti yaṃ kiñci parapariggahitaṃ sassāmikaṃ bhaṇḍaṃ, taṃ tehi sāmikehi kāyena vā vācāya vā na dinnanti adinnaṃ, anissaṭṭhaṃ apariccattaṃ rakkhitaṃ gopitaṃ mamāyitaṃ parapariggahitaṃ. Manussassa idanti mānusaṃ, manussasantakaṃ, ‘‘bhaṇḍa’’ntiminā tulyādhikaraṇaṃ . Theyyāyekenāti theyyāya ekena, ekena avahārenāti attho. Liṅgabhedaṃ katvā vuttaṃ. ‘‘Theyyā kenacī’’ti vā pāṭho. Tattha thenoti coro, thenassa bhāvo theyyā, karaṇatthe cetaṃ paccattavacanaṃ, tasmā kenaci theyyena avahārenāti attho. Ādiyanti ādiyanto gaṇhanto. Pañcavīsāvahāresūti pañcapañcake samodhānetvā pañcavīsati avahārā. Tattha pañcapañcakāni nāma nānābhaṇḍapañcakaṃ ekabhaṇḍapañcakaṃ sāhatthikapañcakaṃ pubbappayogapañcakaṃ theyyāvahārapañcakanti.
தத்த² ஸவிஞ்ஞாணகாவிஞ்ஞாணகமிஸ்ஸகப⁴ண்ட³வஸேன நானாப⁴ண்ட³பஞ்சகங், ஸவிஞ்ஞாணகப⁴ண்ட³வஸேன ஏகப⁴ண்ட³பஞ்சகங். தத்த² நானாப⁴ண்ட³வஸேன தாவ ஏவங் வேதி³தப்³போ³ – யோ ஆராமங் அபி⁴யுஞ்ஜதி, ஆபத்தி து³க்கடஸ்ஸ. ஸாமிகஸ்ஸ விமதிங் உப்பாதே³தி, ஆபத்தி து²ல்லச்சயஸ்ஸ. ஸாமிகோ ‘‘ந மய்ஹங் ப⁴விஸ்ஸதீ’’தி து⁴ரங் நிக்கி²பதி, ஆபத்தி பாராஜிகஸ்ஸ. அஞ்ஞஸ்ஸ ப⁴ண்ட³ங் ஹரந்தோ ஸீஸே பா⁴ரங் தெ²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. க²ந்த⁴ங் ஓரோபேதி, ஆபத்தி பாராஜிகஸ்ஸ. உபனிக்கி²த்தங் ப⁴ண்ட³ங் ‘‘தே³ஹி மே ப⁴ண்ட³’’ந்தி வுச்சமானோ ‘‘நாஹங் க³ண்ஹாமீ’’தி ப⁴ணதி, ஆபத்தி து³க்கடஸ்ஸ. ஸாமிகஸ்ஸ விமதிங் உப்பாதே³தி, ஆபத்தி து²ல்லச்சயஸ்ஸ. ஸாமிகோ ‘‘ந மய்ஹங் த³ஸ்ஸதீ’’தி து⁴ரங் நிக்கி²பதி, ஆபத்தி பாராஜிகஸ்ஸ. ‘‘ஸஹப⁴ண்ட³ஹாரகங் நெஸ்ஸாமீ’’தி பட²மங் பாத³ங் ஸங்காமேதி, ஆபத்தி து²ல்லச்சயஸ்ஸ. து³தியங் பாத³ங் ஸங்காமேதி, ஆபத்தி பாராஜிகஸ்ஸ. த²லட்ட²ங் ப⁴ண்ட³ங் தெ²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. அயமெத்த² நானாப⁴ண்ட³வஸேன யோஜனா. ஏகப⁴ண்ட³வஸேன பன ஸஸ்ஸாமிகங் தா³ஸங் வா திரச்சா²னங் வா யதா²வுத்தேன அபி⁴யோகா³தி³னா நயேன ஆதி³யதி வா ஹரதி வா அவஹரதி வா இரியாபத²ங் கோபேதி வா டா²னா சாவேதி வாதி. அயமெத்த² ஏகப⁴ண்ட³வஸேன யோஜனா.
Tattha saviññāṇakāviññāṇakamissakabhaṇḍavasena nānābhaṇḍapañcakaṃ, saviññāṇakabhaṇḍavasena ekabhaṇḍapañcakaṃ. Tattha nānābhaṇḍavasena tāva evaṃ veditabbo – yo ārāmaṃ abhiyuñjati, āpatti dukkaṭassa. Sāmikassa vimatiṃ uppādeti, āpatti thullaccayassa. Sāmiko ‘‘na mayhaṃ bhavissatī’’ti dhuraṃ nikkhipati, āpatti pārājikassa. Aññassa bhaṇḍaṃ haranto sīse bhāraṃ theyyacitto āmasati, āpatti dukkaṭassa. Phandāpeti, āpatti thullaccayassa. Khandhaṃ oropeti, āpatti pārājikassa. Upanikkhittaṃ bhaṇḍaṃ ‘‘dehi me bhaṇḍa’’nti vuccamāno ‘‘nāhaṃ gaṇhāmī’’ti bhaṇati, āpatti dukkaṭassa. Sāmikassa vimatiṃ uppādeti, āpatti thullaccayassa. Sāmiko ‘‘na mayhaṃ dassatī’’ti dhuraṃ nikkhipati, āpatti pārājikassa. ‘‘Sahabhaṇḍahārakaṃ nessāmī’’ti paṭhamaṃ pādaṃ saṅkāmeti, āpatti thullaccayassa. Dutiyaṃ pādaṃ saṅkāmeti, āpatti pārājikassa. Thalaṭṭhaṃ bhaṇḍaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Ayamettha nānābhaṇḍavasena yojanā. Ekabhaṇḍavasena pana sassāmikaṃ dāsaṃ vā tiracchānaṃ vā yathāvuttena abhiyogādinā nayena ādiyati vā harati vā avaharati vā iriyāpathaṃ kopeti vā ṭhānā cāveti vāti. Ayamettha ekabhaṇḍavasena yojanā.
பஞ்ச அவஹாரா ஸாஹத்தி²கோ ஆணத்திகோ நிஸ்ஸக்³கி³யோ அத்த²ஸாத⁴கோ து⁴ரனிக்கே²போதி. தத்த² ஸாஹத்தி²கோ நாம பரஸ்ஸ ப⁴ண்ட³ங் ஸஹத்தா² அவஹரதி. ஆணத்திகோ நாம ‘‘அஸுகஸ்ஸ ப⁴ண்ட³ங் அவஹரா’’தி அஞ்ஞங் ஆணாபேதி. நிஸ்ஸக்³கி³யோ நாம அந்தோஸுங்ககா⁴தே டி²தோ ப³ஹிஸுங்ககா⁴தங் பாதேதி, ஆபத்தி பாராஜிகஸ்ஸ. அத்த²ஸாத⁴கோ நாம ‘‘அஸுகங் ப⁴ண்ட³ங் யதா³ ஸக்கோஸி, ததா³ அவஹரா’’தி ஆணாபேதி. தத்த² ஸசே பரோ அனந்தராயிகோ ஹுத்வா தங் அவஹரதி, ஆணாபகோ ஆணத்திக்க²ணேயேவ பாராஜிகோ ஹோதி, அவஹாரகோ பன அவஹடகாலே, அயங் அத்த²ஸாத⁴கோ. து⁴ரனிக்கே²போ பன உபனிக்கி²த்தப⁴ண்ட³வஸேன வேதி³தப்³போ³தி இத³ங் ஸாஹத்தி²கபஞ்சகங்.
Pañca avahārā sāhatthiko āṇattiko nissaggiyo atthasādhako dhuranikkhepoti. Tattha sāhatthiko nāma parassa bhaṇḍaṃ sahatthā avaharati. Āṇattiko nāma ‘‘asukassa bhaṇḍaṃ avaharā’’ti aññaṃ āṇāpeti. Nissaggiyo nāma antosuṅkaghāte ṭhito bahisuṅkaghātaṃ pāteti, āpatti pārājikassa. Atthasādhako nāma ‘‘asukaṃ bhaṇḍaṃ yadā sakkosi, tadā avaharā’’ti āṇāpeti. Tattha sace paro anantarāyiko hutvā taṃ avaharati, āṇāpako āṇattikkhaṇeyeva pārājiko hoti, avahārako pana avahaṭakāle, ayaṃ atthasādhako. Dhuranikkhepo pana upanikkhittabhaṇḍavasena veditabboti idaṃ sāhatthikapañcakaṃ.
அபரேபி பஞ்ச அவஹாரா புப்³ப³ப்பயோகோ³ ஸஹப்பயோகோ³ ஸங்விதா⁴வஹாரோ ஸங்கேதகம்மங் நிமித்தகம்மந்தி. தத்த² ஆணத்திவஸேன புப்³ப³ப்பயோகோ³ வேதி³தப்³போ³, டா²னாசாவனவஸேன ஸஹப்பயோகோ³. ஸங்விதா⁴வஹாரோ நாம ஸம்ப³ஹுலா பி⁴க்கூ² ‘‘அமுகங் நாம கே³ஹங் க³ந்த்வா, ச²த³னங் வா பி⁴ந்தி³த்வா, ஸந்தி⁴ங் வா சி²ந்தி³த்வா ப⁴ண்ட³ங் ஹரிஸ்ஸாமா’’தி ஸங்வித³ஹித்வா க³ச்ச²ந்தி, தேஸு ஏகோ ப⁴ண்ட³ங் அவஹரதி, தஸ்ஸுத்³தா⁴ரே ஸப்³பே³ஸங் பாராஜிகங். ஸங்கேதகம்மங் நாம ஸஞ்ஜானநகம்மங் காலபரிச்சே²த³வஸேன ஸஞ்ஞாகரணங். எத்த² ச ‘‘புரேப⁴த்தங் அவஹரா’’தி வுத்தே அஜ்ஜ வா புரேப⁴த்தங் அவஹரது, ஸ்வே வா அனாக³தே ஸங்வச்ச²ரே வா, நத்தி² விஸங்கேதோ, ஸங்கேதகாரகஸ்ஸ ஆணத்திக்க²ணே, இதரஸ்ஸ டா²னா சாவனேதி ஏவங் ஆபத்தி உபி⁴ன்னங் பாராஜிகஸ்ஸ. நிமித்தகம்மங் நாம ஸஞ்ஞுப்பாத³னத்த²ங் கஸ்ஸசி நிமித்தஸ்ஸ கரணங் அக்கி²னிக²ணனஹத்தா²லங்க⁴னபாணிப்பஹாரஅங்கு³லிபோ²டனகீ³வுன்னாமனஉக்காஸனாதி³னா அனேகப்பகாரங். அவஹாரகோ ஆணாபகேன யங் நிமித்தஸஞ்ஞங் கத்வா வுத்தங், தங் ‘‘ஏத’’ந்தி மஞ்ஞமானோ தமேவ அவஹரதி, உபி⁴ன்னங் பாராஜிகங். யங் ‘‘அவஹரா’’தி வுத்தங், தங் ‘‘ஏத’’ந்தி மஞ்ஞமானோ அஞ்ஞங் தஸ்மிங்யேவ டா²னே ட²பிதங் அவஹரதி, மூலட்ட²ஸ்ஸ அனாபத்தி. இத³ங் புப்³ப³ப்பயோக³பஞ்சகங்.
Aparepi pañca avahārā pubbappayogo sahappayogo saṃvidhāvahāro saṅketakammaṃ nimittakammanti. Tattha āṇattivasena pubbappayogo veditabbo, ṭhānācāvanavasena sahappayogo. Saṃvidhāvahāro nāma sambahulā bhikkhū ‘‘amukaṃ nāma gehaṃ gantvā, chadanaṃ vā bhinditvā, sandhiṃ vā chinditvā bhaṇḍaṃ harissāmā’’ti saṃvidahitvā gacchanti, tesu eko bhaṇḍaṃ avaharati, tassuddhāre sabbesaṃ pārājikaṃ. Saṅketakammaṃ nāma sañjānanakammaṃ kālaparicchedavasena saññākaraṇaṃ. Ettha ca ‘‘purebhattaṃ avaharā’’ti vutte ajja vā purebhattaṃ avaharatu, sve vā anāgate saṃvacchare vā, natthi visaṅketo, saṅketakārakassa āṇattikkhaṇe, itarassa ṭhānā cāvaneti evaṃ āpatti ubhinnaṃ pārājikassa. Nimittakammaṃ nāma saññuppādanatthaṃ kassaci nimittassa karaṇaṃ akkhinikhaṇanahatthālaṅghanapāṇippahāraaṅguliphoṭanagīvunnāmanaukkāsanādinā anekappakāraṃ. Avahārako āṇāpakena yaṃ nimittasaññaṃ katvā vuttaṃ, taṃ ‘‘eta’’nti maññamāno tameva avaharati, ubhinnaṃ pārājikaṃ. Yaṃ ‘‘avaharā’’ti vuttaṃ, taṃ ‘‘eta’’nti maññamāno aññaṃ tasmiṃyeva ṭhāne ṭhapitaṃ avaharati, mūlaṭṭhassa anāpatti. Idaṃ pubbappayogapañcakaṃ.
அபரேபி பஞ்ச அவஹாரா தெ²ய்யாவஹாரோ பஸய்ஹாவஹாரோ பரிகப்பாவஹாரோ படிச்ச²ன்னாவஹாரோ குஸாவஹாரோதி. தத்த² யோ கூடமானகூடகஹாபணாதீ³ஹி வஞ்செத்வா க³ண்ஹாதி, தஸ்ஸேவங் க³ண்ஹதோ அவஹாரோ தெ²ய்யாவஹாரோ. யோ ஸந்தஜ்ஜெத்வா ஸயங் த³ஸ்ஸெத்வா தேஸங் ஸந்தகங் க³ண்ஹாதி, யோ வா அத்தனோ பத்தப³லிதோ ச அதி⁴கங் ப³லக்காரேன க³ண்ஹாதி ராஜராஜமஹாமத்தாத³யோ விய, தஸ்ஸேவங் க³ண்ஹதோ அவஹாரோ பஸய்ஹாவஹாரோ. பரிகப்பெத்வா க³ண்ஹதோ பனாவஹாரோ பரிகப்பாவஹாரோ. ஸோ து³விதோ⁴ ப⁴ண்டோ³காஸபரிகப்பவஸேன. தத்ர யோ ‘‘ஸாடகோ சே, க³ண்ஹிஸ்ஸாமி, ஸுத்தங் சே, ந க³ண்ஹிஸ்ஸாமீ’’தி பரிகப்பெத்வா அந்த⁴காரே பஸிப்³ப³கங் க³ண்ஹாதி, தத்ர ஸாடகோ சே, உத்³தா⁴ரேயேவ பாராஜிகங், ஸுத்தங் சே ஹோதி, ரக்க²தி. அயங் ப⁴ண்ட³பரிகப்போ நாம. யோ டா²னங் பரிகப்பெத்வா ப⁴ண்ட³ங் க³ண்ஹாதி, தஸ்ஸ தங் பரிகப்பிதபரிச்சே²த³ங் அதிக்கந்தமத்தே பாராஜிகங். அயங் ஓகாஸபரிகப்போ நாம. ஏவமிமேஸங் த்³வின்னங் பரிகப்பானங் வஸேன பரிகப்பெத்வா க³ண்ஹதோ அவஹாரோ பரிகப்பாவஹாரோ. படிச்சா²தெ³த்வா பரஸ்ஸ ப⁴ண்ட³ங் க³ண்ஹதோ அவஹாரோ படிச்ச²ன்னாவஹாரோ நாம. குஸங் ஸங்காமெத்வா அவஹரணங் குஸாவஹாரோ. யோ குஸங் பாதெத்வா சீவரே பா⁴ஜியமானே அத்தனோ கொட்டா²ஸஸ்ஸ ஸமீபே டி²தங் அப்பக்³க⁴தரங் வா மஹக்³க⁴தரங் வா ஸமஸமங் வா பரஸ்ஸ கொட்டா²ஸங் தி³ஸ்வா ஸசே பட²மதரங் பரகொட்டா²ஸதோ குஸத³ண்ட³கங் உத்³த⁴ரதி, அத்தனோ கொட்டா²ஸே பாதேதுகாமதாய உத்³தா⁴ரே ரக்க²தி, பாதனேபி ரக்க²தி, அத்தனோ கொட்டா²ஸதோ பன குஸத³ண்ட³ங் உத்³த⁴ரதி, உத்³தா⁴ரே ரக்க²தி, தங் உத்³த⁴ரித்வா பரகொட்டா²ஸே பாதெந்தஸ்ஸ ஹத்த²தோ முத்தமத்தே பாராஜிகங். அயங் குஸாவஹாரோ நாமாதி இமேஸு பஞ்சவீஸாவஹாரேஸு யேன கேனசி அவஹாரேன க³ண்ஹந்தோ பாராஜிகோ ப⁴வேதி அத்தோ².
Aparepi pañca avahārā theyyāvahāro pasayhāvahāro parikappāvahāro paṭicchannāvahāro kusāvahāroti. Tattha yo kūṭamānakūṭakahāpaṇādīhi vañcetvā gaṇhāti, tassevaṃ gaṇhato avahāro theyyāvahāro. Yo santajjetvā sayaṃ dassetvā tesaṃ santakaṃ gaṇhāti, yo vā attano pattabalito ca adhikaṃ balakkārena gaṇhāti rājarājamahāmattādayo viya, tassevaṃ gaṇhato avahāro pasayhāvahāro. Parikappetvā gaṇhato panāvahāro parikappāvahāro. So duvidho bhaṇḍokāsaparikappavasena. Tatra yo ‘‘sāṭako ce, gaṇhissāmi, suttaṃ ce, na gaṇhissāmī’’ti parikappetvā andhakāre pasibbakaṃ gaṇhāti, tatra sāṭako ce, uddhāreyeva pārājikaṃ, suttaṃ ce hoti, rakkhati. Ayaṃ bhaṇḍaparikappo nāma. Yo ṭhānaṃ parikappetvā bhaṇḍaṃ gaṇhāti, tassa taṃ parikappitaparicchedaṃ atikkantamatte pārājikaṃ. Ayaṃ okāsaparikappo nāma. Evamimesaṃ dvinnaṃ parikappānaṃ vasena parikappetvā gaṇhato avahāro parikappāvahāro. Paṭicchādetvā parassa bhaṇḍaṃ gaṇhato avahāro paṭicchannāvahāro nāma. Kusaṃ saṅkāmetvā avaharaṇaṃ kusāvahāro. Yo kusaṃ pātetvā cīvare bhājiyamāne attano koṭṭhāsassa samīpe ṭhitaṃ appagghataraṃ vā mahagghataraṃ vā samasamaṃ vā parassa koṭṭhāsaṃ disvā sace paṭhamataraṃ parakoṭṭhāsato kusadaṇḍakaṃ uddharati, attano koṭṭhāse pātetukāmatāya uddhāre rakkhati, pātanepi rakkhati, attano koṭṭhāsato pana kusadaṇḍaṃ uddharati, uddhāre rakkhati, taṃ uddharitvā parakoṭṭhāse pātentassa hatthato muttamatte pārājikaṃ. Ayaṃ kusāvahāro nāmāti imesu pañcavīsāvahāresu yena kenaci avahārena gaṇhanto pārājiko bhaveti attho.
க³ருகந்தி பஞ்சமாஸகங். வீஸதிமாஸகோ ஹி கஹாபணோ, கஹாபணஸ்ஸ சதுத்தோ² பா⁴கோ³ பாதோ³ நாம, தஸ்மா பஞ்சமாஸகங் வா பாத³ங் வா க³ருகந்தி வேதி³தப்³ப³ங். தத்த² ‘‘சத்தாரோ வீஹயோ கு³ஞ்ஜா, த்³வே கு³ஞ்ஜா மாஸகோ ப⁴வே’’தி வசனதோ வீஹிவஸேன சத்தாலீஸ வீஹயோ த³ஸ கு³ஞ்ஜா பஞ்சமாஸகோதி வேதி³தப்³போ³. யங் பன ஸாமணேரஸிக்கா²யங் ‘‘வீஸதிவீஹீ’’தி வுத்தங், தங் நேவ பாளியங், ந அட்ட²கதா²யங் அத்தி², வீமங்ஸிதப்³ப³மேதங். து³தியபாராஜிகங்.
Garukanti pañcamāsakaṃ. Vīsatimāsako hi kahāpaṇo, kahāpaṇassa catuttho bhāgo pādo nāma, tasmā pañcamāsakaṃ vā pādaṃ vā garukanti veditabbaṃ. Tattha ‘‘cattāro vīhayo guñjā, dve guñjā māsako bhave’’ti vacanato vīhivasena cattālīsa vīhayo dasa guñjā pañcamāsakoti veditabbo. Yaṃ pana sāmaṇerasikkhāyaṃ ‘‘vīsativīhī’’ti vuttaṃ, taṃ neva pāḷiyaṃ, na aṭṭhakathāyaṃ atthi, vīmaṃsitabbametaṃ. Dutiyapārājikaṃ.
8. இதா³னி ததியங் த³ஸ்ஸேதுங் ‘‘மனுஸ்ஸபாணங் பாணோ’’த்யாதி³ வுத்தங். தத்த² யோ பி⁴க்கு² ‘‘மனுஸ்ஸபாணோ’’ இதி ஜானந்தோ வத⁴கசித்தேன மனுஸ்ஸபாணங் ஜீவிதா வியோஜேதி, ஸோ பி⁴க்கு² ஸாஸனா பாராஜிகோ ஹோதீதி ஸமுதா³யத்தோ².
8. Idāni tatiyaṃ dassetuṃ ‘‘manussapāṇaṃ pāṇo’’tyādi vuttaṃ. Tattha yo bhikkhu ‘‘manussapāṇo’’ iti jānanto vadhakacittena manussapāṇaṃ jīvitā viyojeti, so bhikkhu sāsanā pārājiko hotīti samudāyattho.
மனுஸ்ஸபாணந்தி மாதுகுச்சி²ஸ்மிங் படிஸந்தி⁴சித்தேன ஸஹுப்பன்னங் அதிபரித்தங் கலலரூபங் ஆதி³ங் கத்வா பகதியா வீஸவஸ்ஸஸதாயுகஸ்ஸ ஸத்தஸ்ஸ யாவ மரணகாலா எத்த²ந்தரே அனுபுப்³பே³ன வுத்³தி⁴ப்பத்தோ அத்தபா⁴வோ, ஏஸோ மனுஸ்ஸபாணோ நாம, ஏவரூபங் மனுஸ்ஸபாணந்தி அத்தோ². பாணோதி ஜானந்தி ‘‘பாணோ’’ இதி ஜானந்தோ ‘‘தங் ஜீவிதா வோரோபேமீ’’தி ஜானந்தோ. வத⁴கசேதஸாதி வத⁴கசித்தேன, இத்த²ம்பூ⁴தே கரணவசனங், வத⁴கசித்தோ ஹுத்வா மரணாதி⁴ப்பாயோ ஹுத்வாதி வுத்தங் ஹோதி. ஜீவிதாதி ஜீவிதிந்த்³ரியதோ. யோதி அனியமவசனங். ஸோதி ஏதேன நியமனங் வேதி³தப்³ப³ங். வியோஜேதீதி வுத்தப்பகாரங் மனுஸ்ஸவிக்³க³ஹங் கலலகாலேபி தாபனமத்³த³னேஹி வா பே⁴ஸஜ்ஜஸம்பதா³னேன வா ததோ வா உத்³த⁴ம்பி தத³னுரூபேன உபக்கமேன ஜீவிதா வியோஜேதீதி அத்தோ². ஸாஸனாதி பராபுப்³ப³ஜிதா⁴துப்பயோகே³ நிஸ்ஸக்கவசனங், தேன ஸத்து²ஸாஸனதோதி அத்தோ². பராஜிதோதி பராஜயமாபன்னோ. ஹோதீதி பாட²ஸேஸோ. ததியபாராஜிகங்.
Manussapāṇanti mātukucchismiṃ paṭisandhicittena sahuppannaṃ atiparittaṃ kalalarūpaṃ ādiṃ katvā pakatiyā vīsavassasatāyukassa sattassa yāva maraṇakālā etthantare anupubbena vuddhippatto attabhāvo, eso manussapāṇo nāma, evarūpaṃ manussapāṇanti attho. Pāṇoti jānanti ‘‘pāṇo’’ iti jānanto ‘‘taṃ jīvitā voropemī’’ti jānanto. Vadhakacetasāti vadhakacittena, itthambhūte karaṇavacanaṃ, vadhakacitto hutvā maraṇādhippāyo hutvāti vuttaṃ hoti. Jīvitāti jīvitindriyato. Yoti aniyamavacanaṃ. Soti etena niyamanaṃ veditabbaṃ. Viyojetīti vuttappakāraṃ manussaviggahaṃ kalalakālepi tāpanamaddanehi vā bhesajjasampadānena vā tato vā uddhampi tadanurūpena upakkamena jīvitā viyojetīti attho. Sāsanāti parāpubbajidhātuppayoge nissakkavacanaṃ, tena satthusāsanatoti attho. Parājitoti parājayamāpanno. Hotīti pāṭhaseso. Tatiyapārājikaṃ.
9. இதா³னி சதுத்த²ங் த³ஸ்ஸேதுங் ‘‘ஜா²னாதி³பே⁴த³’’ந்த்யாதி³ வுத்தங். தத்த² யோ பி⁴க்கு² அஞ்ஞாபதே³ஸஞ்ச அதி⁴மானஞ்ச வஜ்ஜெத்வா ஹத³யே அஸந்தங் ஜா²னாதி³பே⁴த³ங் த⁴ம்மங் மனுஸ்ஸஜாதிகஸ்ஸ ஸத்தஸ்ஸ வதெ³ய்ய, தஸ்மிங் க²ணே ஞாதே ஸோ ததோ ஸாஸனா பாராஜிகோ ஏவ ஹோதீதி அத்தோ².
9. Idāni catutthaṃ dassetuṃ ‘‘jhānādibheda’’ntyādi vuttaṃ. Tattha yo bhikkhu aññāpadesañca adhimānañca vajjetvā hadaye asantaṃ jhānādibhedaṃ dhammaṃ manussajātikassa sattassa vadeyya, tasmiṃ khaṇe ñāte so tato sāsanā pārājiko eva hotīti attho.
ஜா²னாதி³பே⁴த³ந்தி ‘‘ஜா²னங் விமொக்கோ² ஸமாதி⁴ ஸமாபத்தி ஞாணத³ஸ்ஸனங் மக்³க³பா⁴வனா ப²லஸச்சி²கிரியா கிலேஸப்பஹானங் வினீவரணதா சித்தஸ்ஸ ஸுஞ்ஞாகா³ரே அபி⁴ரதீ’’தி (பாரா॰ 198) ஏவங் வுத்தங் ஜா²னாதி³பே⁴த³ங் உத்தரிமனுஸ்ஸத⁴ம்மங். ஹத³யேதி சித்தே. அஸந்தந்தி அஸங்விஜ்ஜமானங். அஞ்ஞாபதே³ஸந்தி ‘‘யோ தே விஹாரே வஸி, ஸோ பி⁴க்கு² பட²மஸ்ஸ ஜா²னஸ்ஸ லாபீ⁴’’திஆதி³னா நயேன அஞ்ஞாபதே³ஸங் வஜ்ஜெத்வாதி அத்தோ². வினாதி வஜ்ஜனத்தே² நிபாதோ, தஸ்ஸ வஜ்ஜெத்வாதி அத்தோ². அதி⁴மானந்தி ‘‘அதி⁴க³தா மயா’’தி ஏவங் உப்பன்னங் மானந்தி அத்தோ². அதி⁴க³தோ மானோதி விக்³க³ஹோ, தங் அதி⁴மானங் வஜ்ஜெத்வாதி அத்தோ². மனுஸ்ஸஜாதிஸ்ஸாதி மனுஸ்ஸஜாதிகஸ்ஸ, ந தே³வப்³ரஹ்மாதீ³ஸு அஞ்ஞதரஸ்ஸாதி அத்தோ². வதெ³ய்யாதி ஆரோசெய்ய. ஞாதக்க²ணேதி ஞாதே க²ணேதி சே²தோ³, தஸ்மிங் தேனாரோசிதக்க²ணே மனுஸ்ஸஜாதிகேன ஞாதேதி அத்தோ². தேனாதி நிஸ்ஸக்கே கரணவசனங், ததோ ஸாஸனதோ பாராஜிகோதி அத்தோ². சதுத்த²பாராஜிகங்.
Jhānādibhedanti ‘‘jhānaṃ vimokkho samādhi samāpatti ñāṇadassanaṃ maggabhāvanā phalasacchikiriyā kilesappahānaṃ vinīvaraṇatā cittassa suññāgāre abhiratī’’ti (pārā. 198) evaṃ vuttaṃ jhānādibhedaṃ uttarimanussadhammaṃ. Hadayeti citte. Asantanti asaṃvijjamānaṃ. Aññāpadesanti ‘‘yo te vihāre vasi, so bhikkhu paṭhamassa jhānassa lābhī’’tiādinā nayena aññāpadesaṃ vajjetvāti attho. Vināti vajjanatthe nipāto, tassa vajjetvāti attho. Adhimānanti ‘‘adhigatā mayā’’ti evaṃ uppannaṃ mānanti attho. Adhigato mānoti viggaho, taṃ adhimānaṃ vajjetvāti attho. Manussajātissāti manussajātikassa, na devabrahmādīsu aññatarassāti attho. Vadeyyāti āroceyya. Ñātakkhaṇeti ñāte khaṇeti chedo, tasmiṃ tenārocitakkhaṇe manussajātikena ñāteti attho. Tenāti nissakke karaṇavacanaṃ, tato sāsanato pārājikoti attho. Catutthapārājikaṃ.
பாராஜிகனித்³தே³ஸவண்ணனா நிட்டி²தா.
Pārājikaniddesavaṇṇanā niṭṭhitā.
