| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
५. परमट्ठकसुत्तं
5. Paramaṭṭhakasuttaṃ
८०२.
802.
परमन्ति दिट्ठीसु परिब्बसानो, यदुत्तरि कुरुते जन्तु लोके।
Paramanti diṭṭhīsu paribbasāno, yaduttari kurute jantu loke;
हीनाति अञ्ञे ततो सब्बमाह, तस्मा विवादानि अवीतिवत्तो॥
Hīnāti aññe tato sabbamāha, tasmā vivādāni avītivatto.
८०३.
803.
यदत्तनी पस्सति आनिसंसं, दिट्ठे सुते सीलवते 1 मुते वा।
Yadattanī passati ānisaṃsaṃ, diṭṭhe sute sīlavate 2 mute vā;
तदेव सो तत्थ समुग्गहाय, निहीनतो पस्सति सब्बमञ्ञं॥
Tadeva so tattha samuggahāya, nihīnato passati sabbamaññaṃ.
८०४.
804.
तं वापि गन्थं कुसला वदन्ति, यं निस्सितो पस्सति हीनमञ्ञं।
Taṃ vāpi ganthaṃ kusalā vadanti, yaṃ nissito passati hīnamaññaṃ;
तस्मा हि दिट्ठं व सुतं मुतं वा, सीलब्बतं भिक्खु न निस्सयेय्य॥
Tasmā hi diṭṭhaṃ va sutaṃ mutaṃ vā, sīlabbataṃ bhikkhu na nissayeyya.
८०५.
805.
दिट्ठिम्पि लोकस्मिं न कप्पयेय्य, ञाणेन वा सीलवतेन वापि।
Diṭṭhimpi lokasmiṃ na kappayeyya, ñāṇena vā sīlavatena vāpi;
समोति अत्तानमनूपनेय्य, हीनो न मञ्ञेथ विसेसि वापि॥
Samoti attānamanūpaneyya, hīno na maññetha visesi vāpi.
८०६.
806.
अत्तं पहाय अनुपादियानो, ञाणेपि सो निस्सयं नो करोति।
Attaṃ pahāya anupādiyāno, ñāṇepi so nissayaṃ no karoti;
८०७.
807.
यस्सूभयन्ते पणिधीध नत्थि, भवाभवाय इध वा हुरं वा।
Yassūbhayante paṇidhīdha natthi, bhavābhavāya idha vā huraṃ vā;
निवेसना तस्स न सन्ति केचि, धम्मेसु निच्छेय्य समुग्गहीतं॥
Nivesanā tassa na santi keci, dhammesu niccheyya samuggahītaṃ.
८०८.
808.
तस्सीध दिट्ठे व सुते मुते वा, पकप्पिता नत्थि अणूपि सञ्ञा।
Tassīdha diṭṭhe va sute mute vā, pakappitā natthi aṇūpi saññā;
तं ब्राह्मणं दिट्ठिमनादियानं, केनीध लोकस्मिं विकप्पयेय्य॥
Taṃ brāhmaṇaṃ diṭṭhimanādiyānaṃ, kenīdha lokasmiṃ vikappayeyya.
८०९.
809.
न कप्पयन्ति न पुरेक्खरोन्ति, धम्मापि तेसं न पटिच्छितासे।
Na kappayanti na purekkharonti, dhammāpi tesaṃ na paṭicchitāse;
न ब्राह्मणो सीलवतेन नेय्यो, पारङ्गतो न पच्चेति तादीति॥
Na brāhmaṇo sīlavatena neyyo, pāraṅgato na pacceti tādīti.
परमट्ठकसुत्तं पञ्चमं निट्ठितं।
Paramaṭṭhakasuttaṃ pañcamaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ५. परमट्ठकसुत्तवण्णना • 5. Paramaṭṭhakasuttavaṇṇanā
