| Library / Tipiṭaka / திபிடக • Tipiṭaka / மஹானித்³தே³ஸ-அட்ட²கதா² • Mahāniddesa-aṭṭhakathā |
5. பரமட்ட²கஸுத்தனித்³தே³ஸவண்ணனா
5. Paramaṭṭhakasuttaniddesavaṇṇanā
31. பஞ்சமே பரமட்ட²கஸுத்தே பரமந்தி தி³ட்டீ²ஸு பரிப்³ப³ஸானோதி இத³ங் பரமந்தி க³ஹெத்வா ஸகாய ஸகாய தி³ட்டி²யா வஸமானோ. யது³த்தரிங் குருதேதி யங் அத்தனோ ஸத்தா²ராதி³ங் ஸெட்ட²ங் கரோதி. ஹீனாதி அஞ்ஞே ததோ ஸப்³ப³மாஹாதி தங் அத்தனோ ஸத்தா²ராதி³ங் ட²பெத்வா ததோ அஞ்ஞே ஸப்³பே³ ‘‘ஹீனா இமே’’தி ஆஹ. தஸ்மா விவாதா³னி அவீதிவத்தோதி தேன காரணேன ஸோ தி³ட்டி²கலஹே அவீதிவத்தோவ ஹோதி.
31. Pañcame paramaṭṭhakasutte paramanti diṭṭhīsu paribbasānoti idaṃ paramanti gahetvā sakāya sakāya diṭṭhiyā vasamāno. Yaduttariṃ kuruteti yaṃ attano satthārādiṃ seṭṭhaṃ karoti. Hīnāti aññe tato sabbamāhāti taṃ attano satthārādiṃ ṭhapetvā tato aññe sabbe ‘‘hīnā ime’’ti āha. Tasmā vivādāni avītivattoti tena kāraṇena so diṭṭhikalahe avītivattova hoti.
வஸந்தீதி பட²முப்பன்னதி³ட்டி²வஸேன வஸந்தி. பவஸந்தீதி பவிஸித்வா வஸந்தி. ஆவஸந்தீதி விஸேஸேன வஸந்தி. பரிவஸந்தீதி ஸப்³ப³பா⁴கே³ன வஸந்தி. தங் உபமாய ஸாதெ⁴ந்தோ ‘‘யதா² ஆகா³ரிகா வா’’திஆதி³மாஹ. ஆகா³ரிகா வாதி க⁴ரஸாமிகா. க⁴ரேஸு வஸந்தீதி அத்தனோ க⁴ரேஸு ஆஸங்கவிரஹிதா ஹுத்வா நிவஸந்தி. ஸாபத்திகா வாதி ஆபத்திப³ஹுலா. ஸகிலேஸா வாதி ராகா³தி³கிலேஸப³ஹுலா. உத்தரிங் கரோதீதி அதிரேகங் கரோதி. அயங் ஸத்தா² ஸப்³ப³ஞ்ஞூதி ‘அயங் அம்ஹாகங் ஸத்தா² ஸப்³ப³ங் ஜானாதி’.
Vasantīti paṭhamuppannadiṭṭhivasena vasanti. Pavasantīti pavisitvā vasanti. Āvasantīti visesena vasanti. Parivasantīti sabbabhāgena vasanti. Taṃ upamāya sādhento ‘‘yathā āgārikā vā’’tiādimāha. Āgārikā vāti gharasāmikā. Gharesu vasantīti attano gharesu āsaṅkavirahitā hutvā nivasanti. Sāpattikā vāti āpattibahulā. Sakilesā vāti rāgādikilesabahulā. Uttariṃ karotīti atirekaṃ karoti. Ayaṃ satthā sabbaññūti ‘ayaṃ amhākaṃ satthā sabbaṃ jānāti’.
ஸப்³பே³ பரப்பவாதே³ கி²பதீதி ஸப்³பா³ பரலத்³தி⁴யோ ச²ட்³டே³தி. உக்கி²பதீதி நீஹரதி. பரிக்கி²பதீதி பரம்முகே² கரோதி. தி³ட்டி²மேத⁴கா³னீதி தி³ட்டி²விஹேஸகானி.
Sabbe parappavāde khipatīti sabbā paraladdhiyo chaḍḍeti. Ukkhipatīti nīharati. Parikkhipatīti parammukhe karoti. Diṭṭhimedhagānīti diṭṭhivihesakāni.
32. து³தியகா³தா²யத்தோ² – ஏவங் அவீதிவத்தோ ச யங் தி³ட்டே² ஸுதே ஸீலவதே முதேதி ஏதேஸு சதூஸு வத்தூ²ஸு உப்பன்னதி³ட்டி²ஸங்கா²தே அத்தனி புப்³பே³ வுத்தப்பகாரங் ஆனிஸங்ஸங் பஸ்ஸதி, ததே³வ ஸோ தத்த² ஸகாய தி³ட்டி²யா ஆனிஸங்ஸங் ‘‘இத³ங் ஸெட்ட²’’ந்தி அபி⁴னிவிஸித்வா அஞ்ஞங் ஸப்³ப³ங் பரஸத்தா²ராதி³கங் நிஹீனதோ பஸ்ஸதி.
32. Dutiyagāthāyattho – evaṃ avītivatto ca yaṃ diṭṭhe sute sīlavate muteti etesu catūsu vatthūsu uppannadiṭṭhisaṅkhāte attani pubbe vuttappakāraṃ ānisaṃsaṃ passati, tadeva so tattha sakāya diṭṭhiyā ānisaṃsaṃ ‘‘idaṃ seṭṭha’’nti abhinivisitvā aññaṃ sabbaṃ parasatthārādikaṃ nihīnato passati.
த்³வே ஆனிஸங்ஸே பஸ்ஸதீதி த்³வே கு³ணே ஓலோகேதி. தி³ட்ட²த⁴ம்மிகஞ்சாதி தி³ட்டே² பச்சக்கே² அத்தபா⁴வே விபச்சனகரணங். ஸம்பராயிகஞ்சாதி பரலோகே படிலபி⁴தப்³ப³கு³ணஞ்ச. யங்தி³ட்டி²கோ ஸத்தா²தி யங்லத்³தி⁴கோ தித்தா²யதனஸாமிகோ. அலங் நாக³த்தாய வாதி நாக³ராஜபா⁴வாய வா பரியத்தங். ஸுபண்ணத்தாதீ³ஸுபி ஏஸேவ நயோ. தே³வத்தாய வாதி ஸம்முதிதே³வாதி³பா⁴வாய. ஆயதிங் ப²லபாடிகங்கீ² ஹோதீதி அனாக³தே விபாகப²லங் பத்த²யானோ ஹோதி. தி³ட்ட²ஸுத்³தி⁴யாபி த்³வே ஆனிஸங்ஸே பஸ்ஸதீதி சக்கு²விஞ்ஞாணேன தி³ட்ட²ரூபாயதனஸ்ஸ வஸேன ஸுத்³தி⁴யா ஹேதுத்தாபி அத்தனோ க³ஹிதக³ஹணேன த்³வே கு³ணே ஓலோகேதி. ஸுதஸுத்³தி⁴யாதீ³ஸுபி ஏஸேவ நயோ.
Dve ānisaṃse passatīti dve guṇe oloketi. Diṭṭhadhammikañcāti diṭṭhe paccakkhe attabhāve vipaccanakaraṇaṃ. Samparāyikañcāti paraloke paṭilabhitabbaguṇañca. Yaṃdiṭṭhiko satthāti yaṃladdhiko titthāyatanasāmiko. Alaṃ nāgattāya vāti nāgarājabhāvāya vā pariyattaṃ. Supaṇṇattādīsupi eseva nayo. Devattāya vāti sammutidevādibhāvāya. Āyatiṃ phalapāṭikaṅkhī hotīti anāgate vipākaphalaṃ patthayāno hoti. Diṭṭhasuddhiyāpi dve ānisaṃse passatīti cakkhuviññāṇena diṭṭharūpāyatanassa vasena suddhiyā hetuttāpi attano gahitagahaṇena dve guṇe oloketi. Sutasuddhiyādīsupi eseva nayo.
33. ததியகா³தா²யத்தோ² – ஏவங் பஸ்ஸதோ ச யங் அத்தனோ ஸத்தா²ராதி³ங் நிஸ்ஸிதோ அஞ்ஞங் பரஸத்தா²ராதி³ங் ஹீனங் பஸ்ஸதி, தங் பன த³ஸ்ஸனங் க³ந்த²மேவ குஸலா வத³ந்தி, ப³ந்த⁴னந்தி வுத்தங் ஹோதி. யஸ்மா ஏததே³வ, தஸ்மா ஹி தி³ட்ட²ங் வ ஸுதங் முதங் வா, ஸீலப்³ப³தங் பி⁴க்கு² ந நிஸ்ஸயெய்ய, நாபி⁴னிவேஸெய்யாதி வுத்தங் ஹோதி.
33. Tatiyagāthāyattho – evaṃ passato ca yaṃ attano satthārādiṃ nissito aññaṃ parasatthārādiṃ hīnaṃ passati, taṃ pana dassanaṃ ganthameva kusalā vadanti, bandhananti vuttaṃ hoti. Yasmā etadeva, tasmā hi diṭṭhaṃ va sutaṃ mutaṃ vā, sīlabbataṃ bhikkhu na nissayeyya, nābhiniveseyyāti vuttaṃ hoti.
குஸலாதி க²ந்தா⁴தி³ஜானநே சே²கா. க²ந்த⁴குஸலாதி ரூபாதீ³ஸு பஞ்சஸு க²ந்தே⁴ஸு குஸலா. தா⁴துஆயதனபடிச்சஸமுப்பாத³ஸதிபட்டா²னஸம்மப்பதா⁴னஇத்³தி⁴பாத³இந்த்³ரியப³லபொ³ஜ்ஜ²ங்க³மக்³க³ப²லனிப்³பா³னேஸுபி ஏஸேவ நயோ. தத்த² மக்³க³குஸலாதி சதூஸு மக்³கே³ஸு. ப²லகுஸலாதி சதூஸு ப²லேஸு. நிப்³பா³னகுஸலாதி து³விதே⁴ நிப்³பா³னே சே²கா. தே குஸலாதி தே ஏதேஸு வுத்தப்பகாரேஸு சே²கா. ஏவங் வத³ந்தீதி ஏவங் கதெ²ந்தி. க³ந்தோ² ஏஸோதி பஸ்ஸதோ ச அத்தனோ ஸத்தா²ராதி³னிஸ்ஸிதஞ்ச அஞ்ஞங் பரஸத்தா²ராதி³ங் ஹீனதோ த³ஸ்ஸனஞ்ச க³ந்தோ² ப³ந்த⁴னோ ஏஸோதி வத³ந்தி. லக்³க³னங் ஏதந்தி ஏதங் வுத்தப்பகாரங் நாக³த³ந்தே லக்³கி³தங் விய அதோ⁴லம்ப³னங். ப³ந்த⁴னங் ஏதந்தி நிச்சி²ந்தி³துங் து³க்க²ட்டே²ன ஸங்க²லிகாதி³ப³ந்த⁴னங் விய ஏதங் ப³ந்த⁴னங். பலிபோ³தோ⁴ ஏஸோதி ஸங்ஸாரதோ நிக்க²மிதுங் அப்பதா³னட்டே²ன ஏஸோ பலிபோ³தோ⁴.
Kusalāti khandhādijānane chekā. Khandhakusalāti rūpādīsu pañcasu khandhesu kusalā. Dhātuāyatanapaṭiccasamuppādasatipaṭṭhānasammappadhānaiddhipādaindriyabalabojjhaṅgamaggaphalanibbānesupi eseva nayo. Tattha maggakusalāti catūsu maggesu. Phalakusalāti catūsu phalesu. Nibbānakusalāti duvidhe nibbāne chekā. Te kusalāti te etesu vuttappakāresu chekā. Evaṃ vadantīti evaṃ kathenti. Gantho esoti passato ca attano satthārādinissitañca aññaṃ parasatthārādiṃ hīnato dassanañca gantho bandhano esoti vadanti. Lagganaṃ etanti etaṃ vuttappakāraṃ nāgadante laggitaṃ viya adholambanaṃ. Bandhanaṃ etanti nicchindituṃ dukkhaṭṭhena saṅkhalikādibandhanaṃ viya etaṃ bandhanaṃ. Palibodho esoti saṃsārato nikkhamituṃ appadānaṭṭhena eso palibodho.
34. சதுத்த²கா³தா²யத்தோ² – ந கேவலங் தி³ட்ட²ஸுதாதீ³ஸு ந நிஸ்ஸயெய்ய, அபிச கோ² பன அஸஞ்ஜாதங் உபரூபரி தி³ட்டி²ம்பி லோகஸ்மிங் ந கப்பயெய்ய, ந ஜனெய்யாதி வுத்தங் ஹோதி. கீதி³ஸங்? ஞாணேன வா ஸீலவதேன வாபி, ஸமாபத்திஞாணாதி³ஞாணேன வா ஸீலவதேன வா யா கப்பியதி, ஏதங் தி³ட்டி²ங் ந கப்பெய்ய. ந கேவலஞ்ச தி³ட்டி²ங் ந கப்பயெய்ய, அபிச கோ² பன மானேனபி ஜாதிஆதீ³ஹி வத்தூ²ஹி ஸமோதி அத்தானமனூபனெய்ய, ஹீனோ ந மஞ்ஞேத² விஸேஸி வாபீதி.
34. Catutthagāthāyattho – na kevalaṃ diṭṭhasutādīsu na nissayeyya, apica kho pana asañjātaṃ uparūpari diṭṭhimpi lokasmiṃ na kappayeyya, na janeyyāti vuttaṃ hoti. Kīdisaṃ? Ñāṇena vā sīlavatena vāpi, samāpattiñāṇādiñāṇena vā sīlavatena vā yā kappiyati, etaṃ diṭṭhiṃ na kappeyya. Na kevalañca diṭṭhiṃ na kappayeyya, apica kho pana mānenapi jātiādīhi vatthūhi samoti attānamanūpaneyya, hīno na maññetha visesi vāpīti.
அட்ட²ஸமாபத்திஞாணேன வாதி பட²மஜ்ஜா²னாதீ³னங் அட்ட²ன்னங் ஸமாபத்தீனங் ஸம்பயுத்தபஞ்ஞாய வா. பஞ்சாபி⁴ஞ்ஞாஞாணேன வாதி லோகியானங் பஞ்சன்னங் அபி⁴ஞ்ஞானங் ஸம்பயுத்தபஞ்ஞாய வா. மிச்சா²ஞாணேன வாதி விபரீதஸபா⁴வேன பவத்தாய பஞ்ஞாய அமுத்தே முத்தங் பஸ்ஸாதி ஏவங் உப்பன்னேன மிச்சா²ஞாணேன வா.
Aṭṭhasamāpattiñāṇena vāti paṭhamajjhānādīnaṃ aṭṭhannaṃ samāpattīnaṃ sampayuttapaññāya vā. Pañcābhiññāñāṇena vāti lokiyānaṃ pañcannaṃ abhiññānaṃ sampayuttapaññāya vā. Micchāñāṇena vāti viparītasabhāvena pavattāya paññāya amutte muttaṃ passāti evaṃ uppannena micchāñāṇena vā.
35. பஞ்சமகா³தா²யத்தோ² – ஏவஞ்ஹி தி³ட்டி²ங் அகப்பெந்தோ அமஞ்ஞமானோ ச அத்தங் பஹாய அனுபாதி³யானோ யங் புப்³பே³ க³ஹிதங், தங் பஹாய பரங் அக்³க³ண்ஹந்தோ தஸ்மிம்பி வுத்தப்பகாரே ஞாணே து³வித⁴ங் நிஸ்ஸயங் நோ கரோதி, அகரொந்தோ ச ஸ வே வியத்தேஸு நானாதி³ட்டி²வஸேன பி⁴ன்னேஸு ஸத்தேஸு ந வக்³க³ஸாரீ ச²ந்தா³தி³வஸேன அக³ச்ச²னத⁴ம்மோ ஹுத்வா த்³வாஸட்டி²யா தி³ட்டீ²ஸு கிஞ்சி தி³ட்டி²ங் ந பச்சேதி, ந பச்சாக³ச்ச²தீதி வுத்தங் ஹோதி.
35. Pañcamagāthāyattho – evañhi diṭṭhiṃ akappento amaññamāno ca attaṃ pahāya anupādiyāno yaṃ pubbe gahitaṃ, taṃ pahāya paraṃ aggaṇhanto tasmimpi vuttappakāre ñāṇe duvidhaṃ nissayaṃ no karoti, akaronto ca sa ve viyattesu nānādiṭṭhivasena bhinnesu sattesu na vaggasārī chandādivasena agacchanadhammo hutvā dvāsaṭṭhiyā diṭṭhīsu kiñci diṭṭhiṃ na pacceti, na paccāgacchatīti vuttaṃ hoti.
சதூஹி உபாதா³னேஹீதி காமுபாதா³னாதீ³ஹி சதூஹி பு⁴ஸங் க³ஹணேஹி ஸ வே வியத்தேஸூதி ஸோ புக்³க³லோ நிச்சி²தேஸு. பி⁴ன்னேஸூதி த்³விதா⁴ பி⁴ன்னேஸு.
Catūhi upādānehīti kāmupādānādīhi catūhi bhusaṃ gahaṇehi sa ve viyattesūti so puggalo nicchitesu. Bhinnesūti dvidhā bhinnesu.
36. இதா³னி யோ ஸோ இமாய கா³தா²ய வுத்தோ கீ²ணாஸவோ, தஸ்ஸ வண்ணப⁴ணனத்த²ங் ‘‘யஸ்ஸூப⁴யந்தே’’திஆதி³கா திஸ்ஸோ கா³தா²யோ ஆஹ. தத்த² பட²மகா³தா²ய யஸ்ஸூப⁴யந்தேதி புப்³பே³ வுத்தே ப²ஸ்ஸாதி³பே⁴தே³. பணிதீ⁴தி தண்ஹா. ப⁴வாப⁴வாயாதி புனப்புனப⁴வாய . இத⁴ வா ஹுரங் வாதி ஸகத்தபா⁴வாதி³பே⁴தே³ இத⁴ வா பரத்தபா⁴வாதி³பே⁴தே³ பரத்த² வா.
36. Idāni yo so imāya gāthāya vutto khīṇāsavo, tassa vaṇṇabhaṇanatthaṃ ‘‘yassūbhayante’’tiādikā tisso gāthāyo āha. Tattha paṭhamagāthāya yassūbhayanteti pubbe vutte phassādibhede. Paṇidhīti taṇhā. Bhavābhavāyāti punappunabhavāya . Idha vā huraṃ vāti sakattabhāvādibhede idha vā parattabhāvādibhede parattha vā.
ப²ஸ்ஸோ ஏகோ அந்தோதி சக்கு²ஸம்ப²ஸ்ஸாதி³கோ ஏகோ கொட்டா²ஸோ. ப²ஸ்ஸஸமுத³யோதி வத்தா²ரம்மணோ. யதோ ஸமுதே³தி உப்பஜ்ஜதி, ஸோ ஸமுத³யோ. து³தியோ அந்தோதி து³தியோ கொட்டா²ஸோ. அதீதந்தி அதி இதங் அதீதங், அதிக்கந்தந்தி வுத்தங் ஹோதி. அனாக³தந்தி ந ஆக³தங், அனுப்பன்னந்தி வுத்தங் ஹோதி. ஸுகா² வேத³னாத³யோ விஸபா⁴க³வஸேன. நாமரூபது³கங் நமனருப்பனவஸேன. அஜ்ஜ²த்திகாத³யோ அஜ்ஜ²த்தபா³ஹிரவஸேன. ஸக்காயாத³யோ க²ந்த⁴பஞ்சகானங் பவத்திஸமுத³யவஸேன வுத்தாதி வேதி³தப்³பா³.
Phasso eko antoti cakkhusamphassādiko eko koṭṭhāso. Phassasamudayoti vatthārammaṇo. Yato samudeti uppajjati, so samudayo. Dutiyo antoti dutiyo koṭṭhāso. Atītanti ati itaṃ atītaṃ, atikkantanti vuttaṃ hoti. Anāgatanti na āgataṃ, anuppannanti vuttaṃ hoti. Sukhā vedanādayo visabhāgavasena. Nāmarūpadukaṃ namanaruppanavasena. Ajjhattikādayo ajjhattabāhiravasena. Sakkāyādayo khandhapañcakānaṃ pavattisamudayavasena vuttāti veditabbā.
ஸகத்தபா⁴வோதி அத்தனோ அத்தபா⁴வோ. பரத்தபா⁴வோதி பரஸ்ஸ அத்தபா⁴வோ.
Sakattabhāvoti attano attabhāvo. Parattabhāvoti parassa attabhāvo.
37. து³தியகா³தா²ய தி³ட்டே² வாதி தி³ட்ட²ஸுத்³தி⁴யா வா. ஏஸ நயோ ஸுதாதீ³ஸு. ஸஞ்ஞாதி ஸஞ்ஞாஸமுட்டா²பிகா தி³ட்டி².
37. Dutiyagāthāya diṭṭhe vāti diṭṭhasuddhiyā vā. Esa nayo sutādīsu. Saññāti saññāsamuṭṭhāpikā diṭṭhi.
அபராமஸந்தந்தி தண்ஹாமானதி³ட்டீ²ஹி ந பராமஸந்தங். அனபி⁴னிவேஸந்தந்தி தேஹேவ அனபி⁴னிவிஸந்தங்.
Aparāmasantanti taṇhāmānadiṭṭhīhi na parāmasantaṃ. Anabhinivesantanti teheva anabhinivisantaṃ.
‘‘வினிப³த்³தோ⁴’’தி வாதி மானேன வினிப³த்³தோ⁴தி வா. ‘‘பராமட்டோ²’’தி வாதி பரதோ நிச்சஸுக²ஸுபா⁴தீ³ஹி பராமட்டோ²தி வா. விக்கே²பக³தோதி உத்³த⁴ச்சவஸேன. அனிட்ட²ங்க³தோதி விசிகிச்சா²வஸேன. தா²மக³தோதி அனுஸயவஸேன. க³தியாதி க³ந்தப்³ப³வஸேன.
‘‘Vinibaddho’’ti vāti mānena vinibaddhoti vā. ‘‘Parāmaṭṭho’’ti vāti parato niccasukhasubhādīhi parāmaṭṭhoti vā. Vikkhepagatoti uddhaccavasena. Aniṭṭhaṅgatoti vicikicchāvasena. Thāmagatoti anusayavasena. Gatiyāti gantabbavasena.
38. ததியகா³தா²ய த⁴ம்மாபி தேஸங் ந படிச்சி²தாஸேதி த்³வாஸட்டி²தி³ட்டி²க³தத⁴ம்மாபி தேஸங் ‘‘இத³மேவ ஸச்சங், மோக⁴மஞ்ஞ’’ந்தி (உதா³॰ 54) ஏவங் ந படிச்சி²தா. பாரங்க³தோ ந பச்சேதி தாதீ³தி நிப்³பா³னபாரங் க³தோ தேன தேன மக்³கே³ன பஹீனே கிலேஸே புன நாக³ச்ச²தி பஞ்சஹி ச ஆகாரேஹி தாதீ³ ஹோதீதி. ஸேஸங் பாகடமேவ.
38. Tatiyagāthāya dhammāpi tesaṃ na paṭicchitāseti dvāsaṭṭhidiṭṭhigatadhammāpi tesaṃ ‘‘idameva saccaṃ, moghamañña’’nti (udā. 54) evaṃ na paṭicchitā. Pāraṅgato na pacceti tādīti nibbānapāraṃ gato tena tena maggena pahīne kilese puna nāgacchati pañcahi ca ākārehi tādī hotīti. Sesaṃ pākaṭameva.
வீஸதிவத்து²கா ஸக்காயதி³ட்டீ²தி ‘‘ரூபங் அத்ததோ ஸமனுபஸ்ஸதீ’’திஆதி³னா (படி॰ ம॰ 1.132) நயேன ஏகேகஸ்மிங் க²ந்தே⁴ சதூஹி சதூஹி ஆகாரேஹி பஞ்சக்க²ந்தே⁴ பதிட்ட²ங் கத்வா பவத்தா விஜ்ஜமானே காயே தி³ட்டி². த³ஸவத்து²கா மிச்சா²தி³ட்டீ²தி ‘‘நத்தி² தி³ன்ன’’ந்திஆதி³னயப்பவத்தா (த⁴॰ ஸ॰ 1221) தி³ட்டி². அந்தக்³கா³ஹிகாதி³ட்டீ²தி ‘‘ஸஸ்ஸதோ லோகோ இத³மேவ ஸச்சங், மோக⁴மஞ்ஞ’’ந்திஆதி³னயப்பவத்தா (ம॰ நி॰ 3.27) ஏகேகங் அந்தங் அத்தீ²தி க³ஹெத்வா பவத்தா தி³ட்டி². யா ஏவரூபா தி³ட்டீ²தி இதா³னி வுச்சமானானங் ஏகூனவீஸபதா³னங் ஸாதா⁴ரணங் மூலபத³ங். யா தி³ட்டி², ததே³வ தி³ட்டி²க³தங்; யா தி³ட்டி², ததே³வ தி³ட்டி²க³ஹனந்தி ஸப்³பே³ஸங் ஸம்ப³ந்தோ⁴ காதப்³போ³. யா அயாதா²வத³ஸ்ஸனட்டே²ன தி³ட்டி², ததே³வ தி³ட்டீ²ஸு க³தங் த³ஸ்ஸனங் த்³வாஸட்டி²தி³ட்டி²யா அந்தோக³தத்தாதி தி³ட்டி²க³தங். ஹெட்டா²பிஸ்ஸ அத்தோ² வுத்தோயேவ.
Vīsativatthukā sakkāyadiṭṭhīti ‘‘rūpaṃ attato samanupassatī’’tiādinā (paṭi. ma. 1.132) nayena ekekasmiṃ khandhe catūhi catūhi ākārehi pañcakkhandhe patiṭṭhaṃ katvā pavattā vijjamāne kāye diṭṭhi. Dasavatthukāmicchādiṭṭhīti ‘‘natthi dinna’’ntiādinayappavattā (dha. sa. 1221) diṭṭhi. Antaggāhikādiṭṭhīti ‘‘sassato loko idameva saccaṃ, moghamañña’’ntiādinayappavattā (ma. ni. 3.27) ekekaṃ antaṃ atthīti gahetvā pavattā diṭṭhi. Yā evarūpā diṭṭhīti idāni vuccamānānaṃ ekūnavīsapadānaṃ sādhāraṇaṃ mūlapadaṃ. Yā diṭṭhi, tadeva diṭṭhigataṃ; yā diṭṭhi, tadeva diṭṭhigahananti sabbesaṃ sambandho kātabbo. Yā ayāthāvadassanaṭṭhena diṭṭhi, tadeva diṭṭhīsu gataṃ dassanaṃ dvāsaṭṭhidiṭṭhiyā antogatattāti diṭṭhigataṃ. Heṭṭhāpissa attho vuttoyeva.
த்³வின்னங் அந்தானங் ஏகந்தக³தத்தாதிபி தி³ட்டி²க³தங். தத்த² ஸஸ்ஸதோதி நிச்சோ. லோகோதி அத்தா. ‘‘இத⁴ ஸரீரங்யேவ நஸ்ஸதி, அத்தா பன இத⁴ பரத்த² ச ஸோயேவா’’தி மஞ்ஞந்தி. ஸோ ஹி ஸாமஞ்ஞேவ ஆலோகேதீதி கத்வா லோகோதி மஞ்ஞதி. அஸஸ்ஸதோதி அனிச்சோ. அத்தா ஸரீரேனேவ ஸஹ நஸ்ஸதீதி மஞ்ஞந்தி. அந்தவாதி பரித்தே கஸிணே ஜா²னங் உப்பாதெ³த்வா தங் பரித்தகஸிணாரம்மணங் சேதனங் ‘‘ஸபரியந்தோ அத்தா’’தி மஞ்ஞந்தி. அனந்த வாதி ந அந்தவா அப்பமாணே கஸிணே ஜா²னங் உப்பாதெ³த்வா தங் அப்பமாணகஸிணாரம்மணங் சேதனங் ‘‘அபரியந்தோ அத்தா’’தி மஞ்ஞந்தி. தங் ஜீவங் தங் ஸரீரந்தி ஜீவோ ச ஸரீரஞ்ச தங்யேவ. ஜீவோதி அத்தா, லிங்க³விபல்லாஸேன நபுங்ஸகவசனங் கதங். ஸரீரந்தி ராஸட்டே²ன க²ந்த⁴பஞ்சகங். அஞ்ஞங் ஜீவங் அஞ்ஞங் ஸரீரந்தி அஞ்ஞோ ஜீவோ அஞ்ஞங் க²ந்த⁴பஞ்சகங் . ஹோதி ததா²க³தோ பரங் மரணாதி க²ந்தா⁴ இதே⁴வ வினஸ்ஸந்தி, ஸத்தோ மரணதோ பரங் ஹோதி விஜ்ஜதி ந நஸ்ஸதி, ததா²க³தோதி சேதங் ஸத்தாதி⁴வசனந்தி. கேசி பன ‘‘ததா²க³தோதி அரஹா’’தி வத³ந்தி. இமே ந ஹோதீதி பக்கே² தோ³ஸங் தி³ஸ்வா ஏவங் க³ண்ஹந்தி. ந ஹோதி ததா²க³தோ பரங் மரணாதி க²ந்தா⁴பி இதே⁴வ நஸ்ஸந்தி , ததா²க³தோ ச மரணதோ பரங் ந ஹோதி உச்சி²ஜ்ஜதி. இமே ஹோதீதி பக்கே² தோ³ஸங் தி³ஸ்வா ஏவங் க³ண்ஹந்தி. ஹோதி ச ந ச ஹோதீதி இமே ஏகேகபக்க²பரிக்³க³ஹே தோ³ஸங் தி³ஸ்வா உப⁴யபக்க²ங் க³ண்ஹந்தி. நேவ ஹோதி ந ந ஹோதீதி இமே உப⁴யபக்க²பரிக்³க³ஹே உப⁴யதோ³ஸாபத்திங் தி³ஸ்வா ‘‘ஹோதி ச ந ஹோதீ’’தி ச ‘‘நேவ ஹோதி ந ந ஹோதீ’’தி ச அமராவிக்கே²பபக்க²ங் க³ண்ஹந்தி.
Dvinnaṃ antānaṃ ekantagatattātipi diṭṭhigataṃ. Tattha sassatoti nicco. Lokoti attā. ‘‘Idha sarīraṃyeva nassati, attā pana idha parattha ca soyevā’’ti maññanti. So hi sāmaññeva āloketīti katvā lokoti maññati. Asassatoti anicco. Attā sarīreneva saha nassatīti maññanti. Antavāti paritte kasiṇe jhānaṃ uppādetvā taṃ parittakasiṇārammaṇaṃ cetanaṃ ‘‘sapariyanto attā’’ti maññanti. Ananta vāti na antavā appamāṇe kasiṇe jhānaṃ uppādetvā taṃ appamāṇakasiṇārammaṇaṃ cetanaṃ ‘‘apariyanto attā’’ti maññanti. Taṃ jīvaṃ taṃ sarīranti jīvo ca sarīrañca taṃyeva. Jīvoti attā, liṅgavipallāsena napuṃsakavacanaṃ kataṃ. Sarīranti rāsaṭṭhena khandhapañcakaṃ. Aññaṃ jīvaṃ aññaṃ sarīranti añño jīvo aññaṃ khandhapañcakaṃ . Hoti tathāgato paraṃ maraṇāti khandhā idheva vinassanti, satto maraṇato paraṃ hoti vijjati na nassati, tathāgatoti cetaṃ sattādhivacananti. Keci pana ‘‘tathāgatoti arahā’’ti vadanti. Ime na hotīti pakkhe dosaṃ disvā evaṃ gaṇhanti. Na hoti tathāgato paraṃ maraṇāti khandhāpi idheva nassanti , tathāgato ca maraṇato paraṃ na hoti ucchijjati. Ime hotīti pakkhe dosaṃ disvā evaṃ gaṇhanti. Hoti ca na ca hotīti ime ekekapakkhapariggahe dosaṃ disvā ubhayapakkhaṃ gaṇhanti. Neva hoti na na hotīti ime ubhayapakkhapariggahe ubhayadosāpattiṃ disvā ‘‘hoti ca na hotī’’ti ca ‘‘neva hoti na na hotī’’ti ca amarāvikkhepapakkhaṃ gaṇhanti.
அயங் பனெத்த² அட்ட²கதா²னயோ (படி॰ ம॰ அட்ட²॰ 2.1.113) – ‘‘ஸஸ்ஸதோ லோகோ’’தி வாதிஆதீ³ஹி த³ஸஹாகாரேஹி தி³ட்டி²பபே⁴தோ³வ வுத்தோ. தத்த² ஸஸ்ஸதோ லோகோதி ச க²ந்த⁴பஞ்சகங் லோகோதி க³ஹெத்வா ‘‘அயங் லோகோ நிச்சோ து⁴வோ ஸப்³ப³காலிகோ’’தி க³ண்ஹந்தஸ்ஸ ஸஸ்ஸதந்தி க³ஹணாகாரப்பவத்தா தி³ட்டி². அஸஸ்ஸதோதி தமேவ லோகங் ‘‘உச்சி²ஜ்ஜதி வினஸ்ஸதீ’’தி க³ண்ஹந்தஸ்ஸ உச்சே²த³க்³க³ஹணாகாரப்பவத்தா தி³ட்டி². அந்தவாதி பரித்தகஸிணலாபி⁴னோ ஸுப்பமத்தே வா ஸராவமத்தே வா கஸிணே ஸமாபன்னஸ்ஸ அந்தோஸமாபத்தியங் பவத்திதரூபாரூபத⁴ம்மே ‘‘லோகோ’’தி ச கஸிணபரிச்சே²த³ந்தேன ‘‘அந்தவா’’தி ச க³ண்ஹந்தஸ்ஸ ‘‘அந்தவா லோகோ’’தி க³ஹணாகாரப்பவத்தா தி³ட்டி². ஸா ஸஸ்ஸததி³ட்டி²பி ஹோதி உச்சே²த³தி³ட்டி²பி. விபுலகஸிணலாபி⁴னோ பன தஸ்மிங் கஸிணே ஸமாபன்னஸ்ஸ அந்தோஸமாபத்தியங் பவத்திதரூபாரூபத⁴ம்மே ‘‘லோகோ’’தி ச கஸிணபரிச்சே²த³ந்தேன ச ‘‘அனந்தோ’’தி க³ண்ஹந்தஸ்ஸ ‘‘அனந்தவா லோகோ’’தி க³ஹணாகாரப்பவத்தா தி³ட்டி². ஸா ஸஸ்ஸததி³ட்டி² ஹோதி, உச்சே²த³தி³ட்டி²பி. தங் ஜீவங் தங் ஸரீரந்தி பே⁴த³னத⁴ம்மஸ்ஸ ஸரீரஸ்ஸேவ ‘‘ஜீவ’’ந்தி க³ஹிதத்தா ‘‘ஸரீரே உச்சி²ஜ்ஜமானே ஜீவம்பி உச்சி²ஜ்ஜதீ’’தி உச்சே²த³க்³க³ஹணாகாரப்பவத்தா தி³ட்டி². து³தியபதே³ன ஸரீரதோ அஞ்ஞஸ்ஸ ஜீவஸ்ஸ க³ஹிதத்தா ‘‘ஸரீரே ச உச்சி²ஜ்ஜமானேபி ஜீவங் ந உச்சி²ஜ்ஜதீ’’தி ஸஸ்ஸதக³ஹணாகாரப்பவத்தா தி³ட்டி². ஹோதி ததா²க³தோதிஆதீ³ஸு ‘‘ஸத்தோ ததா²க³தோ நாம, ஸோ பரங் மரணா ஹோதீ’’தி க³ண்ஹதோ பட²மா ஸஸ்ஸததி³ட்டி². ‘‘ந ஹோதீ’’தி க³ண்ஹதோ து³தியா உச்சே²த³தி³ட்டி². ‘‘ஹோதி ச ந ச ஹோதீ’’தி க³ண்ஹதோ ததியா ஏகச்சஸஸ்ஸததி³ட்டி². ‘‘நேவ ஹோதி ந ந ஹோதீ’’தி க³ண்ஹதோ சதுத்தா² அமராவிக்கே²பதி³ட்டீ²தி வுத்தப்பகாரா த³ஸவிதா⁴ தி³ட்டி². யதா²யோக³ங் ப⁴வதி³ட்டி² ச விப⁴வதி³ட்டி² சாதி த்³விதா⁴ ஹோதி. தாஸு ஏகாபி தேஸங் கீ²ணாஸவானங் ந படிச்சி²தாதி அத்தோ².
Ayaṃ panettha aṭṭhakathānayo (paṭi. ma. aṭṭha. 2.1.113) – ‘‘sassato loko’’ti vātiādīhi dasahākārehi diṭṭhipabhedova vutto. Tattha sassatolokoti ca khandhapañcakaṃ lokoti gahetvā ‘‘ayaṃ loko nicco dhuvo sabbakāliko’’ti gaṇhantassa sassatanti gahaṇākārappavattā diṭṭhi. Asassatoti tameva lokaṃ ‘‘ucchijjati vinassatī’’ti gaṇhantassa ucchedaggahaṇākārappavattā diṭṭhi. Antavāti parittakasiṇalābhino suppamatte vā sarāvamatte vā kasiṇe samāpannassa antosamāpattiyaṃ pavattitarūpārūpadhamme ‘‘loko’’ti ca kasiṇaparicchedantena ‘‘antavā’’ti ca gaṇhantassa ‘‘antavā loko’’ti gahaṇākārappavattā diṭṭhi. Sā sassatadiṭṭhipi hoti ucchedadiṭṭhipi. Vipulakasiṇalābhino pana tasmiṃ kasiṇe samāpannassa antosamāpattiyaṃ pavattitarūpārūpadhamme ‘‘loko’’ti ca kasiṇaparicchedantena ca ‘‘ananto’’ti gaṇhantassa ‘‘anantavā loko’’ti gahaṇākārappavattā diṭṭhi. Sā sassatadiṭṭhi hoti, ucchedadiṭṭhipi. Taṃ jīvaṃ taṃ sarīranti bhedanadhammassa sarīrasseva ‘‘jīva’’nti gahitattā ‘‘sarīre ucchijjamāne jīvampi ucchijjatī’’ti ucchedaggahaṇākārappavattā diṭṭhi. Dutiyapadena sarīrato aññassa jīvassa gahitattā ‘‘sarīre ca ucchijjamānepi jīvaṃ na ucchijjatī’’ti sassatagahaṇākārappavattā diṭṭhi. Hoti tathāgatotiādīsu ‘‘satto tathāgato nāma, so paraṃ maraṇā hotī’’ti gaṇhato paṭhamā sassatadiṭṭhi. ‘‘Na hotī’’ti gaṇhato dutiyā ucchedadiṭṭhi. ‘‘Hoti ca na ca hotī’’ti gaṇhato tatiyā ekaccasassatadiṭṭhi. ‘‘Neva hoti na na hotī’’ti gaṇhato catutthā amarāvikkhepadiṭṭhīti vuttappakārā dasavidhā diṭṭhi. Yathāyogaṃ bhavadiṭṭhi ca vibhavadiṭṭhi cāti dvidhā hoti. Tāsu ekāpi tesaṃ khīṇāsavānaṃ na paṭicchitāti attho.
யே கிலேஸாதி யே கிலேஸா ஸோதாபத்திமக்³கே³ன பஹீனா, தே கிலேஸே . ந புனேதீதி ந புன ஏதி . ந பச்சேதீதி புன நிப்³ப³த்தெத்வா ந படிஏதி, ந பச்சாக³ச்ச²தீதி பச்சப⁴வே நாக³ச்ச²தி. பஞ்சஹாகாரேஹி தாதீ³தி பஞ்சஹி காரணேஹி கொட்டா²ஸேஹி வா ஸதி³ஸோ. இட்டா²னிட்டே² தாதீ³தி இட்டா²ரம்மணே ச அனிட்டா²ரம்மணே ச அனுனயபடிக⁴ங் முஞ்சித்வா டி²தத்தா த்³வீஸு ஸதி³ஸோ. சத்தாவீதி கிலேஸே சஜிதவா. திண்ணாவீதி ஸங்ஸாரங் அதிக்கமிதவா. முத்தாவீதி ராகா³தி³தோ முத்தவா. தங்னித்³தே³ஸா தாதீ³தி தேன தேன ஸீலஸத்³தா⁴தி³னா நித்³தி³ஸித்வா நித்³தி³ஸித்வா கதே²தப்³ப³தோ ஸதி³ஸோ.
Ye kilesāti ye kilesā sotāpattimaggena pahīnā, te kilese . Na punetīti na puna eti . Na paccetīti puna nibbattetvā na paṭieti, na paccāgacchatīti paccabhave nāgacchati. Pañcahākārehi tādīti pañcahi kāraṇehi koṭṭhāsehi vā sadiso. Iṭṭhāniṭṭhe tādīti iṭṭhārammaṇe ca aniṭṭhārammaṇe ca anunayapaṭighaṃ muñcitvā ṭhitattā dvīsu sadiso. Cattāvīti kilese cajitavā. Tiṇṇāvīti saṃsāraṃ atikkamitavā. Muttāvīti rāgādito muttavā. Taṃniddesā tādīti tena tena sīlasaddhādinā niddisitvā niddisitvā kathetabbato sadiso.
தங் பஞ்சவித⁴ங் வித்தா²ரெத்வா கதே²துகாமோ ‘‘கத²ங் அரஹா இட்டா²னிட்டே² தாதீ³’’திஆதி³மாஹ. தத்த² லாபே⁴பீதி சதுன்னங் பச்சயானங் லாபே⁴பி. அலாபே⁴பீதி தேஸங் அலாபே⁴பி. யஸேபீதி பரிவாரேபி. அயஸேபீதி பரிவாரவிபத்தியாபி. பஸங்ஸாயபீதி வண்ணப⁴ணனாயபி. நிந்தா³யபீதி க³ரஹாயபி. ஸுகே²பீதி காயிகஸுகே²பி. து³க்கே²பீதி காயிகது³க்கே²பி. ஏகஞ்சே பா³ஹங் க³ந்தே⁴ன லிம்பெய்யுந்தி ஸசே ஏகங் பா³ஹங் சதுஜாதியக³ந்தே⁴ன லேபங் உபரூபரி த³தெ³ய்யுங். வாஸியா தச்செ²ய்யுந்தி யதி³ ஏகங் பா³ஹங் வட்³ட⁴கீ வாஸியா தச்செ²த்வா தச்செ²த்வா தனுங் கரெய்யுங். அமுஸ்மிங் நத்தி² ராகோ³தி அமுஸ்மிங் க³ந்த⁴லேபனே ஸினேஹோ நத்தி² ந ஸங்விஜ்ஜதி. அமுஸ்மிங் நத்தி² படிக⁴ந்தி அமுஸ்மிங் வாஸியா தச்ச²னே படிஹனநஸங்கா²தங் படிக⁴ங் கோபங் நத்தி² ந ஸங்விஜ்ஜதி. அனுனயபடிக⁴விப்பஹீனோதி ஸினேஹஞ்ச கோபஞ்ச பஜஹித்வா டி²தோ. உக்³கா⁴தினிகா⁴திவீதிவத்தோதி அனுனயவஸேன அனுக்³க³ஹஞ்ச படிக⁴வஸேன நிக்³க³ஹஞ்ச அதிக்கமித்வா டி²தோ. அனுரோத⁴விரோத⁴ஸமதிக்கந்தோதி அனுனயஞ்ச படிக⁴ஞ்ச ஸம்மா அதிக்கந்தோ.
Taṃ pañcavidhaṃ vitthāretvā kathetukāmo ‘‘kathaṃ arahā iṭṭhāniṭṭhe tādī’’tiādimāha. Tattha lābhepīti catunnaṃ paccayānaṃ lābhepi. Alābhepīti tesaṃ alābhepi. Yasepīti parivārepi. Ayasepīti parivāravipattiyāpi. Pasaṃsāyapīti vaṇṇabhaṇanāyapi. Nindāyapīti garahāyapi. Sukhepīti kāyikasukhepi. Dukkhepīti kāyikadukkhepi. Ekañce bāhaṃ gandhena limpeyyunti sace ekaṃ bāhaṃ catujātiyagandhena lepaṃ uparūpari dadeyyuṃ. Vāsiyā taccheyyunti yadi ekaṃ bāhaṃ vaḍḍhakī vāsiyā tacchetvā tacchetvā tanuṃ kareyyuṃ. Amusmiṃ natthi rāgoti amusmiṃ gandhalepane sineho natthi na saṃvijjati. Amusmiṃ natthi paṭighanti amusmiṃ vāsiyā tacchane paṭihananasaṅkhātaṃ paṭighaṃ kopaṃ natthi na saṃvijjati. Anunayapaṭighavippahīnoti sinehañca kopañca pajahitvā ṭhito. Ugghātinighātivītivattoti anunayavasena anuggahañca paṭighavasena niggahañca atikkamitvā ṭhito. Anurodhavirodhasamatikkantoti anunayañca paṭighañca sammā atikkanto.
ஸீலே ஸதீதி ஸீலே ஸங்விஜ்ஜமானே. ஸீலவாதி ஸீலஸம்பன்னோ. தேன நித்³தே³ஸங் கத²னங் லப⁴தீதி தாதீ³. ஸத்³தா⁴ய ஸதி ஸத்³தோ⁴தி ஏவமாதீ³ஸுபி ஏஸேவ நயோ.
Sīle satīti sīle saṃvijjamāne. Sīlavāti sīlasampanno. Tena niddesaṃ kathanaṃ labhatīti tādī. Saddhāya sati saddhoti evamādīsupi eseva nayo.
ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய
Saddhammappajjotikāya mahāniddesaṭṭhakathāya
பரமட்ட²கஸுத்தனித்³தே³ஸவண்ணனா நிட்டி²தா.
Paramaṭṭhakasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / மஹானித்³தே³ஸபாளி • Mahāniddesapāḷi / 5. பரமட்ட²கஸுத்தனித்³தே³ஸோ • 5. Paramaṭṭhakasuttaniddeso
