| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
12. பரங்மரணஸுத்தங்
12. Paraṃmaraṇasuttaṃ
155. ஏகங் ஸமயங் ஆயஸ்மா ச மஹாகஸ்ஸபோ ஆயஸ்மா ச ஸாரிபுத்தோ பா³ராணஸியங் விஹரந்தி இஸிபதனே மிக³தா³யே. அத² கோ² ஆயஸ்மா ஸாரிபுத்தோ ஸாயன்ஹஸமயங் படிஸல்லானா வுட்டி²தோ யேனாயஸ்மா மஹாகஸ்ஸபோ தேனுபஸங்கமி; உபஸங்கமித்வா ஆயஸ்மதா மஹாகஸ்ஸபேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸாரிபுத்தோ ஆயஸ்மந்தங் மஹாகஸ்ஸபங் ஏதத³வோச – ‘‘கிங் நு கோ², ஆவுஸோ கஸ்ஸப, ஹோதி ததா²க³தோ பரங் மரணா’’தி? ‘‘அப்³யாகதங் கோ² ஏதங், ஆவுஸோ, ப⁴க³வதா – ‘ஹோதி ததா²க³தோ பரங் மரணா’’’தி. ‘‘கிங் பனாவுஸோ, ந ஹோதி ததா²க³தோ பரங் மரணா’’தி? ‘‘ஏவம்பி கோ², ஆவுஸோ, அப்³யாகதங் ப⁴க³வதா – ‘ந ஹோதி ததா²க³தோ பரங் மரணா’’’தி. ‘‘கிங் நு கோ², ஆவுஸோ, ஹோதி ச ந ச ஹோதி ததா²க³தோ பரங் மரணா’’தி? ‘‘அப்³யாகதங் கோ² ஏதங், ஆவுஸோ, ப⁴க³வதா – ‘ஹோதி ச ந ச ஹோதி ததா²க³தோ பரங் மரணா’’’தி. ‘‘கிங் பனாவுஸோ, நேவ ஹோதி, ந ந ஹோதி ததா²க³தோ பரங் மரணா’’தி? ‘‘ஏவம்பி கோ², ஆவுஸோ, அப்³யாகதங் ப⁴க³வதா – ‘நேவ ஹோதி ந ந ஹோதி ததா²க³தோ பரங் மரணா’’’தி. ‘‘கஸ்மா சேதங், ஆவுஸோ , அப்³யாகதங் ப⁴க³வதா’’தி? ‘‘ந ஹேதங், ஆவுஸோ, அத்த²ஸங்ஹிதங் நாதி³ப்³ரஹ்மசரியகங் ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி. தஸ்மா தங் அப்³யாகதங் ப⁴க³வதா’’தி.
155. Ekaṃ samayaṃ āyasmā ca mahākassapo āyasmā ca sāriputto bārāṇasiyaṃ viharanti isipatane migadāye. Atha kho āyasmā sāriputto sāyanhasamayaṃ paṭisallānā vuṭṭhito yenāyasmā mahākassapo tenupasaṅkami; upasaṅkamitvā āyasmatā mahākassapena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā sāriputto āyasmantaṃ mahākassapaṃ etadavoca – ‘‘kiṃ nu kho, āvuso kassapa, hoti tathāgato paraṃ maraṇā’’ti? ‘‘Abyākataṃ kho etaṃ, āvuso, bhagavatā – ‘hoti tathāgato paraṃ maraṇā’’’ti. ‘‘Kiṃ panāvuso, na hoti tathāgato paraṃ maraṇā’’ti? ‘‘Evampi kho, āvuso, abyākataṃ bhagavatā – ‘na hoti tathāgato paraṃ maraṇā’’’ti. ‘‘Kiṃ nu kho, āvuso, hoti ca na ca hoti tathāgato paraṃ maraṇā’’ti? ‘‘Abyākataṃ kho etaṃ, āvuso, bhagavatā – ‘hoti ca na ca hoti tathāgato paraṃ maraṇā’’’ti. ‘‘Kiṃ panāvuso, neva hoti, na na hoti tathāgato paraṃ maraṇā’’ti? ‘‘Evampi kho, āvuso, abyākataṃ bhagavatā – ‘neva hoti na na hoti tathāgato paraṃ maraṇā’’’ti. ‘‘Kasmā cetaṃ, āvuso , abyākataṃ bhagavatā’’ti? ‘‘Na hetaṃ, āvuso, atthasaṃhitaṃ nādibrahmacariyakaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Tasmā taṃ abyākataṃ bhagavatā’’ti.
‘‘அத² கிஞ்சரஹாவுஸோ, ப்³யாகதங் ப⁴க³வதா’’தி? ‘‘இத³ங் ‘து³க்க²’ந்தி கோ² , ஆவுஸோ, ப்³யாகதங் ப⁴க³வதா; அயங் ‘து³க்க²ஸமுத³யோ’தி ப்³யாகதங் ப⁴க³வதா; அயங் ‘து³க்க²னிரோதோ⁴’தி ப்³யாகதங் ப⁴க³வதா; அயங் ‘து³க்க²னிரோத⁴கா³மினீ படிபதா³’தி ப்³யாகதங் ப⁴க³வதா’’தி. ‘‘கஸ்மா சேதங், ஆவுஸோ, ப்³யாகதங் ப⁴க³வதா’’தி? ‘‘ஏதஞ்ஹி, ஆவுஸோ, அத்த²ஸங்ஹிதங் ஏதங் ஆதி³ப்³ரஹ்மசரியகங் ஏதங் நிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. தஸ்மா தங் ப்³யாகதங் ப⁴க³வதா’’தி. த்³வாத³ஸமங்.
‘‘Atha kiñcarahāvuso, byākataṃ bhagavatā’’ti? ‘‘Idaṃ ‘dukkha’nti kho , āvuso, byākataṃ bhagavatā; ayaṃ ‘dukkhasamudayo’ti byākataṃ bhagavatā; ayaṃ ‘dukkhanirodho’ti byākataṃ bhagavatā; ayaṃ ‘dukkhanirodhagāminī paṭipadā’ti byākataṃ bhagavatā’’ti. ‘‘Kasmā cetaṃ, āvuso, byākataṃ bhagavatā’’ti? ‘‘Etañhi, āvuso, atthasaṃhitaṃ etaṃ ādibrahmacariyakaṃ etaṃ nibbidāya virāgāya nirodhāya upasamāya abhiññāya sambodhāya nibbānāya saṃvattati. Tasmā taṃ byākataṃ bhagavatā’’ti. Dvādasamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 12. பரங்மரணஸுத்தவண்ணனா • 12. Paraṃmaraṇasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 12. பரங்மரணஸுத்தவண்ணனா • 12. Paraṃmaraṇasuttavaṇṇanā
