| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
3. பரம்பரபோ⁴ஜனஸிக்கா²பத³வண்ணனா
3. Paramparabhojanasikkhāpadavaṇṇanā
க³ணபோ⁴ஜனே வுத்தனயேனேவாதி பி⁴க்கு²ங் உபஸங்கமித்வா ‘‘தும்ஹே, ப⁴ந்தே, ஓத³னேன நிமந்தேமி, ஓத³னங் மே க³ண்ஹதா²’’திஆதி³னா (பாசி॰ அட்ட²॰ 217-218) நயேன யேன கேனசி வேவசனேன வா பா⁴ஸந்தரேன வா பஞ்சன்னங் போ⁴ஜனானங் அஞ்ஞதரஸ்ஸ நாமங் க³ஹெத்வா நிமந்தேதீதி வுத்தேனேவ நயேன . நிமந்திதஸ்ஸாதி அகப்பியனிமந்தனேன நிமந்திதஸ்ஸ. அவிகப்பெத்வாதி ஸம்முகா²ஸம்முக²வஸேன அவிகப்பெத்வா, அபரிச்சஜித்வாதி அத்தோ². அயஞ்ஹி ப⁴த்தவிகப்பனா நாம ஸம்முகா²பரம்முகா²பி வட்டதி. தேனாஹ ‘‘யோ பி⁴க்கு² பஞ்சஸு ஸஹத⁴ம்மிகேஸூ’’திஆதி³.
Gaṇabhojane vuttanayenevāti bhikkhuṃ upasaṅkamitvā ‘‘tumhe, bhante, odanena nimantemi, odanaṃ me gaṇhathā’’tiādinā (pāci. aṭṭha. 217-218) nayena yena kenaci vevacanena vā bhāsantarena vā pañcannaṃ bhojanānaṃ aññatarassa nāmaṃ gahetvā nimantetīti vutteneva nayena . Nimantitassāti akappiyanimantanena nimantitassa. Avikappetvāti sammukhāsammukhavasena avikappetvā, apariccajitvāti attho. Ayañhi bhattavikappanā nāma sammukhāparammukhāpi vaṭṭati. Tenāha ‘‘yo bhikkhu pañcasu sahadhammikesū’’tiādi.
அஞ்ஞத்ர நிமந்தனபோ⁴ஜனவத்து²ஸ்மிந்தி அஞ்ஞத்ர பட²மங் நிமந்திதா ஹுத்வா அஞ்ஞஸ்மிங் நிமந்தனே பு⁴ஞ்ஜனவத்து²ஸ்மிங். யதி³ திவிதா⁴ அனுபஞ்ஞத்தி, அத² கஸ்மா பரிவாரே ‘‘சதஸ்ஸோ அனுபஞ்ஞத்தியோ’’தி வுத்தந்தி ஆஹ ‘‘பரிவாரே பனா’’திஆதி³. விகப்பனம்பி க³ஹெத்வாதி விகப்பனானுஜானநம்பி அனுபஞ்ஞத்திஸமானந்தி அனுபஞ்ஞத்திபா⁴வேன க³ஹெத்வா. ஏகஸங்ஸட்டா²னீதி ஏகஸ்மிங் மிஸ்ஸிதானி. இத³ங் வுத்தங் ஹோதி (பாசி॰ அட்ட²॰ 229) – த்³வே தீணி குலானி நிமந்தெத்வா ஏகஸ்மிங் டா²னே நிஸீதா³பெத்வா இதோ சிதோ ச ஆஹரித்வா ப⁴த்தங் ஆகிரந்தி, ஸூபப்³யஞ்ஜனங் ஆகிரந்தி, ஏகமிஸ்ஸகங் ஹோதி, எத்த² அனாபத்தீதி. ஸசே பன மூலனிமந்தனங் ஹெட்டா² ஹோதி, பச்சி²மங் பச்சி²மங் உபரி, தங் உபரிதோ பட்டா²ய பு⁴ஞ்ஜந்தஸ்ஸ ஆபத்தி. ஹத்த²ங் பன அந்தோ பவேஸெத்வா பட²மனிமந்தனதோ ஏகம்பி கப³ளங் உத்³த⁴ரித்வா பு⁴த்தகாலதோ பட்டா²ய யதா² ததா² வா பு⁴ஞ்ஜந்தஸ்ஸ அனாபத்தி. த்³வே தீணி நிமந்தனானி ஏகதோ வா கத்வா பு⁴ஞ்ஜதீதி த்³வே தீணி நிமந்தனானி ஏகதோ பக்கி²பித்வா மிஸ்ஸெத்வா ஏகங் கத்வா பு⁴ஞ்ஜதீதி அத்தோ². ‘‘ஸகலேன கா³மேன வா’’திஆதீ³ஸு ஸகலேன கா³மேன ஏகதோ ஹுத்வா நிமந்திதஸ்ஸேவ யத்த² கத்த²சி பு⁴ஞ்ஜதோ அனாபத்தி. பூகே³பி ஏஸேவ நயோ. நிமந்தியமானோ வா ‘‘பி⁴க்க²ங் க³ஹெஸ்ஸாமீ’’தி வத³தீதி ‘‘ப⁴த்தங் க³ண்ஹா’’தி நிமந்தியமானோ ‘‘ந மய்ஹங் தவ ப⁴த்தேன அத்தோ², பி⁴க்க²ங் க³ஹெஸ்ஸாமீ’’தி ப⁴ணதி. கிரியாகிரியந்தி எத்த² போ⁴ஜனங் கிரியங், அவிகப்பனங் அகிரியங்.
Aññatra nimantanabhojanavatthusminti aññatra paṭhamaṃ nimantitā hutvā aññasmiṃ nimantane bhuñjanavatthusmiṃ. Yadi tividhā anupaññatti, atha kasmā parivāre ‘‘catasso anupaññattiyo’’ti vuttanti āha ‘‘parivāre panā’’tiādi. Vikappanampi gahetvāti vikappanānujānanampi anupaññattisamānanti anupaññattibhāvena gahetvā. Ekasaṃsaṭṭhānīti ekasmiṃ missitāni. Idaṃ vuttaṃ hoti (pāci. aṭṭha. 229) – dve tīṇi kulāni nimantetvā ekasmiṃ ṭhāne nisīdāpetvā ito cito ca āharitvā bhattaṃ ākiranti, sūpabyañjanaṃ ākiranti, ekamissakaṃ hoti, ettha anāpattīti. Sace pana mūlanimantanaṃ heṭṭhā hoti, pacchimaṃ pacchimaṃ upari, taṃ uparito paṭṭhāya bhuñjantassa āpatti. Hatthaṃ pana anto pavesetvā paṭhamanimantanato ekampi kabaḷaṃ uddharitvā bhuttakālato paṭṭhāya yathā tathā vā bhuñjantassa anāpatti. Dve tīṇi nimantanāni ekato vā katvā bhuñjatīti dve tīṇi nimantanāni ekato pakkhipitvā missetvā ekaṃ katvā bhuñjatīti attho. ‘‘Sakalena gāmena vā’’tiādīsu sakalena gāmena ekato hutvā nimantitasseva yattha katthaci bhuñjato anāpatti. Pūgepi eseva nayo. Nimantiyamāno vā ‘‘bhikkhaṃ gahessāmī’’ti vadatīti ‘‘bhattaṃ gaṇhā’’ti nimantiyamāno ‘‘na mayhaṃ tava bhattena attho, bhikkhaṃ gahessāmī’’ti bhaṇati. Kiriyākiriyanti ettha bhojanaṃ kiriyaṃ, avikappanaṃ akiriyaṃ.
பரம்பரபோ⁴ஜனஸிக்கா²பத³வண்ணனா நிட்டி²தா.
Paramparabhojanasikkhāpadavaṇṇanā niṭṭhitā.
