| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
3. பரம்பரபோ⁴ஜனஸிக்கா²பத³வண்ணனா
3. Paramparabhojanasikkhāpadavaṇṇanā
221. ததியே குலபடிபாடியா அப்³பொ³ச்சி²ன்னங் கத்வா நிரந்தரங் தி³ய்யமானத்தா ‘‘ப⁴த்தபடிபாடி அட்டி²தா ஹோதீ’’தி பாளியங் வுத்தங், அந்தரா அட்ட²த்வா நிரந்தரங் பவத்தாதி வுத்தங் ஹோதி. உபசாரவஸேனாதி வோஹாரவஸேன. ந ஹி ஸோ ப³த³ரமத்தமேவ தே³தி, உபசாரவஸேன பன ஏவங் வத³தி. ப³த³ரசுண்ணஸக்க²ராதீ³ஹி பயோஜிதங் ‘‘ப³த³ரஸாளவ’’ந்தி வுச்சதி.
221. Tatiye kulapaṭipāṭiyā abbocchinnaṃ katvā nirantaraṃ diyyamānattā ‘‘bhattapaṭipāṭi aṭṭhitā hotī’’ti pāḷiyaṃ vuttaṃ, antarā aṭṭhatvā nirantaraṃ pavattāti vuttaṃ hoti. Upacāravasenāti vohāravasena. Na hi so badaramattameva deti, upacāravasena pana evaṃ vadati. Badaracuṇṇasakkharādīhi payojitaṃ ‘‘badarasāḷava’’nti vuccati.
226. விகப்பனாவஸேனேவ தங் ப⁴த்தங் அஸந்தங் நாம ஹோதீதி அனுபஞ்ஞத்திவஸேன விகப்பனங் அட்ட²பெத்வா யதா²பஞ்ஞத்தங் ஸிக்கா²பத³மேவ ட²பிதங். பரிவாரே பன விகப்பனாய அனுஜானநம்பி அனுபஞ்ஞத்திஸமானந்தி கத்வா ‘‘சதஸ்ஸோ அனுபஞ்ஞத்தியோ’’தி வுத்தங். மஹாபச்சரிஆதீ³ஸு வுத்தனயங் பச்சா² வத³ந்தோ பாளியா ஸங்ஸந்த³னதோ பரம்முகா²விகப்பனமேவ பதிட்டா²பேஸி. கேசி பன ‘‘ததா³ அத்தனோ ஸந்திகே ட²பெத்வா ப⁴க³வந்தங் அஞ்ஞஸ்ஸ அபா⁴வதோ தே²ரோ ஸம்முகா²விகப்பனங் நாகாஸி, ப⁴க³வதா ச விஸுங் ஸம்முகா²விகப்பனா ந வுத்தா, ததா²பி ஸம்முகா²விகப்பனாபி வட்டதீ’’தி வத³ந்தி. தேனேவ மாதிகாஅட்ட²கதா²யம்பி (கங்கா²॰ அட்ட²॰ பரம்பரபோ⁴ஜனஸிக்கா²பத³வண்ணனா) ‘‘யோ பி⁴க்கு² பஞ்சஸு ஸஹத⁴ம்மிகேஸு அஞ்ஞதரஸ்ஸ ‘மய்ஹங் ப⁴த்தபச்சாஸங் துய்ஹங் த³ம்மீ’தி வா ‘விகப்பேமீ’தி வா ஏவங் ஸம்முகா² வா ‘இத்த²ன்னாமஸ்ஸ த³ம்மீ’தி வா ‘விகப்பேமீ’தி வா ஏவங் பரம்முகா² வா பட²மனிமந்தனங் அவிகப்பெத்வா பச்சா² நிமந்திதகுலே லத்³த⁴பி⁴க்க²தோ ஏகஸித்த²ம்பி அஜ்ஜோ²ஹரதி, பாசித்திய’’ந்தி வுத்தங்.
226. Vikappanāvaseneva taṃ bhattaṃ asantaṃ nāma hotīti anupaññattivasena vikappanaṃ aṭṭhapetvā yathāpaññattaṃ sikkhāpadameva ṭhapitaṃ. Parivāre pana vikappanāya anujānanampi anupaññattisamānanti katvā ‘‘catasso anupaññattiyo’’ti vuttaṃ. Mahāpaccariādīsu vuttanayaṃ pacchā vadanto pāḷiyā saṃsandanato parammukhāvikappanameva patiṭṭhāpesi. Keci pana ‘‘tadā attano santike ṭhapetvā bhagavantaṃ aññassa abhāvato thero sammukhāvikappanaṃ nākāsi, bhagavatā ca visuṃ sammukhāvikappanā na vuttā, tathāpi sammukhāvikappanāpi vaṭṭatī’’ti vadanti. Teneva mātikāaṭṭhakathāyampi (kaṅkhā. aṭṭha. paramparabhojanasikkhāpadavaṇṇanā) ‘‘yo bhikkhu pañcasu sahadhammikesu aññatarassa ‘mayhaṃ bhattapaccāsaṃ tuyhaṃ dammī’ti vā ‘vikappemī’ti vā evaṃ sammukhā vā ‘itthannāmassa dammī’ti vā ‘vikappemī’ti vā evaṃ parammukhā vā paṭhamanimantanaṃ avikappetvā pacchā nimantitakule laddhabhikkhato ekasitthampi ajjhoharati, pācittiya’’nti vuttaṃ.
229. பஞ்சஹி போ⁴ஜனேஹி நிமந்திதஸ்ஸ யேன யேன பட²மங் நிமந்திதோ, தஸ்ஸ தஸ்ஸ போ⁴ஜனதோ உப்படிபாடியா அவிகப்பெத்வா வா பரஸ்ஸ பரஸ்ஸ போ⁴ஜனங் பரம்பரபோ⁴ஜனந்தி ஆஹ ‘‘ஸசே பன மூலனிமந்தனங் ஹெட்டா² ஹோதி, பச்சி²மங் பச்சி²மங் உபரி, தங் உபரிதோ பட்டா²ய பு⁴ஞ்ஜந்தஸ்ஸ ஆபத்தீ’’தி. ஹத்த²ங் அந்தோ பவேஸெத்வா ஸப்³ப³ஹெட்டி²மங் க³ண்ஹந்தஸ்ஸ மஜ்ஜே² டி²தம்பி அந்தோஹத்த²க³தங் ஹோதீதி ஆஹ ‘‘ஹத்த²ங் பன…பே॰… யதா² ததா² வா பு⁴ஞ்ஜந்தஸ்ஸ அனாபத்தீ’’தி. கீ²ரஸ்ஸ ரஸஸ்ஸ ச ப⁴த்தேன அமிஸ்ஸங் ஹுத்வா உபரி டி²தத்தா ‘‘கீ²ரங் வா ரஸங் வா பிவதோ அனாபத்தீ’’தி வுத்தங்.
229. Pañcahi bhojanehi nimantitassa yena yena paṭhamaṃ nimantito, tassa tassa bhojanato uppaṭipāṭiyā avikappetvā vā parassa parassa bhojanaṃ paramparabhojananti āha ‘‘sace pana mūlanimantanaṃ heṭṭhā hoti, pacchimaṃ pacchimaṃ upari, taṃ uparito paṭṭhāya bhuñjantassa āpattī’’ti. Hatthaṃ anto pavesetvā sabbaheṭṭhimaṃ gaṇhantassa majjhe ṭhitampi antohatthagataṃ hotīti āha ‘‘hatthaṃ pana…pe… yathā tathā vā bhuñjantassa anāpattī’’ti. Khīrassa rasassa ca bhattena amissaṃ hutvā upari ṭhitattā ‘‘khīraṃ vā rasaṃ vā pivato anāpattī’’ti vuttaṃ.
மஹாஉபாஸகோதி கே³ஹஸாமிகோ. ‘‘மஹாஅட்ட²கதா²யங் ‘ஆபத்தீ’தி வசனேன குருந்தி³யங் ‘வட்டதீ’தி வசனங் விருத்³த⁴ங் விய தி³ஸ்ஸதி, த்³வின்னம்பி அதி⁴ப்பாயோ மஹாபச்சரியங் விபா⁴விதோ’’தி மஹாக³ண்டி²பதே³ஸு வுத்தங். ஸப்³பே³ நிமந்தெந்தீதி அகப்பியனிமந்தனேன நிமந்தெந்தி. ‘‘பரம்பரபோ⁴ஜனங் நாம பஞ்சன்னங் போ⁴ஜனானங் அஞ்ஞதரேன போ⁴ஜனேன நிமந்திதோ, தங் ட²பெத்வா அஞ்ஞங் பஞ்சன்னங் போ⁴ஜனானங் அஞ்ஞதரங் போ⁴ஜனங் பு⁴ஞ்ஜதி, ஏதங் பரம்பரபோ⁴ஜனங் நாமா’’தி வுத்தத்தா ஸதிபி பி⁴க்கா²சரியாய பட²மங் லத்³த⁴பா⁴வே ‘‘பிண்டா³ய சரித்வா லத்³த⁴ப⁴த்தங் பு⁴ஞ்ஜதி, ஆபத்தீ’’தி வுத்தங். அவிகப்பவஸேன ‘‘வசீகம்ம’’ந்தி வுத்தங். ஸேஸமெத்த² உத்தானமேவ. பரம்பரபோ⁴ஜனதா, ஸமயாபா⁴வோ, அஜ்ஜோ²ஹரணந்தி இமானி பனெத்த² தீணி அங்கா³னி.
Mahāupāsakoti gehasāmiko. ‘‘Mahāaṭṭhakathāyaṃ ‘āpattī’ti vacanena kurundiyaṃ ‘vaṭṭatī’ti vacanaṃ viruddhaṃ viya dissati, dvinnampi adhippāyo mahāpaccariyaṃ vibhāvito’’ti mahāgaṇṭhipadesu vuttaṃ. Sabbe nimantentīti akappiyanimantanena nimantenti. ‘‘Paramparabhojanaṃ nāma pañcannaṃ bhojanānaṃ aññatarena bhojanena nimantito, taṃ ṭhapetvā aññaṃ pañcannaṃ bhojanānaṃ aññataraṃ bhojanaṃ bhuñjati, etaṃ paramparabhojanaṃ nāmā’’ti vuttattā satipi bhikkhācariyāya paṭhamaṃ laddhabhāve ‘‘piṇḍāya caritvā laddhabhattaṃ bhuñjati, āpattī’’ti vuttaṃ. Avikappavasena ‘‘vacīkamma’’nti vuttaṃ. Sesamettha uttānameva. Paramparabhojanatā, samayābhāvo, ajjhoharaṇanti imāni panettha tīṇi aṅgāni.
பரம்பரபோ⁴ஜனஸிக்கா²பத³வண்ணனா நிட்டி²தா.
Paramparabhojanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. பரம்பரபோ⁴ஜனஸிக்கா²பத³வண்ணனா • 3. Paramparabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. பரம்பரபோ⁴ஜனஸிக்கா²பத³வண்ணனா • 3. Paramparabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. பரம்பரபோ⁴ஜனஸிக்கா²பத³வண்ணனா • 3. Paramparabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. பரம்பரபோ⁴ஜனஸிக்கா²பத³ங் • 3. Paramparabhojanasikkhāpadaṃ
