| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৩. পরম্পরভোজনসিক্খাপদৰণ্ণনা
3. Paramparabhojanasikkhāpadavaṇṇanā
গণভোজনে ৰুত্তনযেনেৰাতি ভিক্খুং উপসঙ্কমিত্ৰা ‘‘তুম্হে, ভন্তে, ওদনেন নিমন্তেমি, ওদনং মে গণ্হথা’’তিআদিনা (পাচি॰ অট্ঠ॰ ২১৭-২১৮) নযেন যেন কেনচি ৰেৰচনেন ৰা ভাসন্তরেন ৰা পঞ্চন্নং ভোজনানং অঞ্ঞতরস্স নামং গহেত্ৰা নিমন্তেতীতি ৰুত্তেনেৰ নযেন । নিমন্তিতস্সাতি অকপ্পিযনিমন্তনেন নিমন্তিতস্স। অৰিকপ্পেত্ৰাতি সম্মুখাসম্মুখৰসেন অৰিকপ্পেত্ৰা, অপরিচ্চজিত্ৰাতি অত্থো। অযঞ্হি ভত্তৰিকপ্পনা নাম সম্মুখাপরম্মুখাপি ৰট্টতি। তেনাহ ‘‘যো ভিক্খু পঞ্চসু সহধম্মিকেসূ’’তিআদি।
Gaṇabhojane vuttanayenevāti bhikkhuṃ upasaṅkamitvā ‘‘tumhe, bhante, odanena nimantemi, odanaṃ me gaṇhathā’’tiādinā (pāci. aṭṭha. 217-218) nayena yena kenaci vevacanena vā bhāsantarena vā pañcannaṃ bhojanānaṃ aññatarassa nāmaṃ gahetvā nimantetīti vutteneva nayena . Nimantitassāti akappiyanimantanena nimantitassa. Avikappetvāti sammukhāsammukhavasena avikappetvā, apariccajitvāti attho. Ayañhi bhattavikappanā nāma sammukhāparammukhāpi vaṭṭati. Tenāha ‘‘yo bhikkhu pañcasu sahadhammikesū’’tiādi.
অঞ্ঞত্র নিমন্তনভোজনৰত্থুস্মিন্তি অঞ্ঞত্র পঠমং নিমন্তিতা হুত্ৰা অঞ্ঞস্মিং নিমন্তনে ভুঞ্জনৰত্থুস্মিং। যদি তিৰিধা অনুপঞ্ঞত্তি, অথ কস্মা পরিৰারে ‘‘চতস্সো অনুপঞ্ঞত্তিযো’’তি ৰুত্তন্তি আহ ‘‘পরিৰারে পনা’’তিআদি। ৰিকপ্পনম্পি গহেত্ৰাতি ৰিকপ্পনানুজাননম্পি অনুপঞ্ঞত্তিসমানন্তি অনুপঞ্ঞত্তিভাৰেন গহেত্ৰা। একসংসট্ঠানীতি একস্মিং মিস্সিতানি। ইদং ৰুত্তং হোতি (পাচি॰ অট্ঠ॰ ২২৯) – দ্ৰে তীণি কুলানি নিমন্তেত্ৰা একস্মিং ঠানে নিসীদাপেত্ৰা ইতো চিতো চ আহরিত্ৰা ভত্তং আকিরন্তি, সূপব্যঞ্জনং আকিরন্তি, একমিস্সকং হোতি, এত্থ অনাপত্তীতি। সচে পন মূলনিমন্তনং হেট্ঠা হোতি, পচ্ছিমং পচ্ছিমং উপরি, তং উপরিতো পট্ঠায ভুঞ্জন্তস্স আপত্তি। হত্থং পন অন্তো পৰেসেত্ৰা পঠমনিমন্তনতো একম্পি কবল়ং উদ্ধরিত্ৰা ভুত্তকালতো পট্ঠায যথা তথা ৰা ভুঞ্জন্তস্স অনাপত্তি। দ্ৰে তীণি নিমন্তনানি একতো ৰা কত্ৰা ভুঞ্জতীতি দ্ৰে তীণি নিমন্তনানি একতো পক্খিপিত্ৰা মিস্সেত্ৰা একং কত্ৰা ভুঞ্জতীতি অত্থো। ‘‘সকলেন গামেন ৰা’’তিআদীসু সকলেন গামেন একতো হুত্ৰা নিমন্তিতস্সেৰ যত্থ কত্থচি ভুঞ্জতো অনাপত্তি। পূগেপি এসেৰ নযো। নিমন্তিযমানো ৰা ‘‘ভিক্খং গহেস্সামী’’তি ৰদতীতি ‘‘ভত্তং গণ্হা’’তি নিমন্তিযমানো ‘‘ন ময্হং তৰ ভত্তেন অত্থো, ভিক্খং গহেস্সামী’’তি ভণতি। কিরিযাকিরিযন্তি এত্থ ভোজনং কিরিযং, অৰিকপ্পনং অকিরিযং।
Aññatra nimantanabhojanavatthusminti aññatra paṭhamaṃ nimantitā hutvā aññasmiṃ nimantane bhuñjanavatthusmiṃ. Yadi tividhā anupaññatti, atha kasmā parivāre ‘‘catasso anupaññattiyo’’ti vuttanti āha ‘‘parivāre panā’’tiādi. Vikappanampi gahetvāti vikappanānujānanampi anupaññattisamānanti anupaññattibhāvena gahetvā. Ekasaṃsaṭṭhānīti ekasmiṃ missitāni. Idaṃ vuttaṃ hoti (pāci. aṭṭha. 229) – dve tīṇi kulāni nimantetvā ekasmiṃ ṭhāne nisīdāpetvā ito cito ca āharitvā bhattaṃ ākiranti, sūpabyañjanaṃ ākiranti, ekamissakaṃ hoti, ettha anāpattīti. Sace pana mūlanimantanaṃ heṭṭhā hoti, pacchimaṃ pacchimaṃ upari, taṃ uparito paṭṭhāya bhuñjantassa āpatti. Hatthaṃ pana anto pavesetvā paṭhamanimantanato ekampi kabaḷaṃ uddharitvā bhuttakālato paṭṭhāya yathā tathā vā bhuñjantassa anāpatti. Dve tīṇi nimantanāni ekato vā katvā bhuñjatīti dve tīṇi nimantanāni ekato pakkhipitvā missetvā ekaṃ katvā bhuñjatīti attho. ‘‘Sakalena gāmena vā’’tiādīsu sakalena gāmena ekato hutvā nimantitasseva yattha katthaci bhuñjato anāpatti. Pūgepi eseva nayo. Nimantiyamāno vā ‘‘bhikkhaṃ gahessāmī’’ti vadatīti ‘‘bhattaṃ gaṇhā’’ti nimantiyamāno ‘‘na mayhaṃ tava bhattena attho, bhikkhaṃ gahessāmī’’ti bhaṇati. Kiriyākiriyanti ettha bhojanaṃ kiriyaṃ, avikappanaṃ akiriyaṃ.
পরম্পরভোজনসিক্খাপদৰণ্ণনা নিট্ঠিতা।
Paramparabhojanasikkhāpadavaṇṇanā niṭṭhitā.
