| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၃. ပရမ္ပရဘောဇနသိက္ခာပဒဝဏ္ဏနာ
3. Paramparabhojanasikkhāpadavaṇṇanā
ဂဏဘောဇနေ ဝုတ္တနယေနေဝာတိ ဘိက္ခုံ ဥပသင္ကမိတ္ဝာ ‘‘တုမ္ဟေ, ဘန္တေ, ဩဒနေန နိမန္တေမိ, ဩဒနံ မေ ဂဏ္ဟထာ’’တိအာဒိနာ (ပာစိ. အဋ္ဌ. ၂၁၇-၂၁၈) နယေန ယေန ကေနစိ ဝေဝစနေန ဝာ ဘာသန္တရေန ဝာ ပဉ္စန္နံ ဘောဇနာနံ အညတရသ္သ နာမံ ဂဟေတ္ဝာ နိမန္တေတီတိ ဝုတ္တေနေဝ နယေန ။ နိမန္တိတသ္သာတိ အကပ္ပိယနိမန္တနေန နိမန္တိတသ္သ။ အဝိကပ္ပေတ္ဝာတိ သမ္မုခာသမ္မုခဝသေန အဝိကပ္ပေတ္ဝာ, အပရိစ္စဇိတ္ဝာတိ အတ္ထော။ အယဉ္ဟိ ဘတ္တဝိကပ္ပနာ နာမ သမ္မုခာပရမ္မုခာပိ ဝဋ္ဋတိ။ တေနာဟ ‘‘ယော ဘိက္ခု ပဉ္စသု သဟဓမ္မိကေသူ’’တိအာဒိ။
Gaṇabhojane vuttanayenevāti bhikkhuṃ upasaṅkamitvā ‘‘tumhe, bhante, odanena nimantemi, odanaṃ me gaṇhathā’’tiādinā (pāci. aṭṭha. 217-218) nayena yena kenaci vevacanena vā bhāsantarena vā pañcannaṃ bhojanānaṃ aññatarassa nāmaṃ gahetvā nimantetīti vutteneva nayena . Nimantitassāti akappiyanimantanena nimantitassa. Avikappetvāti sammukhāsammukhavasena avikappetvā, apariccajitvāti attho. Ayañhi bhattavikappanā nāma sammukhāparammukhāpi vaṭṭati. Tenāha ‘‘yo bhikkhu pañcasu sahadhammikesū’’tiādi.
အညတ္ရ နိမန္တနဘောဇနဝတ္ထုသ္မိန္တိ အညတ္ရ ပဌမံ နိမန္တိတာ ဟုတ္ဝာ အညသ္မိံ နိမန္တနေ ဘုဉ္ဇနဝတ္ထုသ္မိံ။ ယဒိ တိဝိဓာ အနုပညတ္တိ, အထ ကသ္မာ ပရိဝာရေ ‘‘စတသ္သော အနုပညတ္တိယော’’တိ ဝုတ္တန္တိ အာဟ ‘‘ပရိဝာရေ ပနာ’’တိအာဒိ။ ဝိကပ္ပနမ္ပိ ဂဟေတ္ဝာတိ ဝိကပ္ပနာနုဇာနနမ္ပိ အနုပညတ္တိသမာနန္တိ အနုပညတ္တိဘာဝေန ဂဟေတ္ဝာ။ ဧကသံသဋ္ဌာနီတိ ဧကသ္မိံ မိသ္သိတာနိ။ ဣဒံ ဝုတ္တံ ဟောတိ (ပာစိ. အဋ္ဌ. ၂၂၉) – ဒ္ဝေ တီဏိ ကုလာနိ နိမန္တေတ္ဝာ ဧကသ္မိံ ဌာနေ နိသီဒာပေတ္ဝာ ဣတော စိတော စ အာဟရိတ္ဝာ ဘတ္တံ အာကိရန္တိ, သူပဗ္ယဉ္ဇနံ အာကိရန္တိ, ဧကမိသ္သကံ ဟောတိ, ဧတ္ထ အနာပတ္တီတိ။ သစေ ပန မူလနိမန္တနံ ဟေဋ္ဌာ ဟောတိ, ပစ္ဆိမံ ပစ္ဆိမံ ဥပရိ, တံ ဥပရိတော ပဋ္ဌာယ ဘုဉ္ဇန္တသ္သ အာပတ္တိ။ ဟတ္ထံ ပန အန္တော ပဝေသေတ္ဝာ ပဌမနိမန္တနတော ဧကမ္ပိ ကဗဠံ ဥဒ္ဓရိတ္ဝာ ဘုတ္တကာလတော ပဋ္ဌာယ ယထာ တထာ ဝာ ဘုဉ္ဇန္တသ္သ အနာပတ္တိ။ ဒ္ဝေ တီဏိ နိမန္တနာနိ ဧကတော ဝာ ကတ္ဝာ ဘုဉ္ဇတီတိ ဒ္ဝေ တီဏိ နိမန္တနာနိ ဧကတော ပက္ခိပိတ္ဝာ မိသ္သေတ္ဝာ ဧကံ ကတ္ဝာ ဘုဉ္ဇတီတိ အတ္ထော။ ‘‘သကလေန ဂာမေန ဝာ’’တိအာဒီသု သကလေန ဂာမေန ဧကတော ဟုတ္ဝာ နိမန္တိတသ္သေဝ ယတ္ထ ကတ္ထစိ ဘုဉ္ဇတော အနာပတ္တိ။ ပူဂေပိ ဧသေဝ နယော။ နိမန္တိယမာနော ဝာ ‘‘ဘိက္ခံ ဂဟေသ္သာမီ’’တိ ဝဒတီတိ ‘‘ဘတ္တံ ဂဏ္ဟာ’’တိ နိမန္တိယမာနော ‘‘န မယ္ဟံ တဝ ဘတ္တေန အတ္ထော, ဘိက္ခံ ဂဟေသ္သာမီ’’တိ ဘဏတိ။ ကိရိယာကိရိယန္တိ ဧတ္ထ ဘောဇနံ ကိရိယံ, အဝိကပ္ပနံ အကိရိယံ။
Aññatra nimantanabhojanavatthusminti aññatra paṭhamaṃ nimantitā hutvā aññasmiṃ nimantane bhuñjanavatthusmiṃ. Yadi tividhā anupaññatti, atha kasmā parivāre ‘‘catasso anupaññattiyo’’ti vuttanti āha ‘‘parivāre panā’’tiādi. Vikappanampi gahetvāti vikappanānujānanampi anupaññattisamānanti anupaññattibhāvena gahetvā. Ekasaṃsaṭṭhānīti ekasmiṃ missitāni. Idaṃ vuttaṃ hoti (pāci. aṭṭha. 229) – dve tīṇi kulāni nimantetvā ekasmiṃ ṭhāne nisīdāpetvā ito cito ca āharitvā bhattaṃ ākiranti, sūpabyañjanaṃ ākiranti, ekamissakaṃ hoti, ettha anāpattīti. Sace pana mūlanimantanaṃ heṭṭhā hoti, pacchimaṃ pacchimaṃ upari, taṃ uparito paṭṭhāya bhuñjantassa āpatti. Hatthaṃ pana anto pavesetvā paṭhamanimantanato ekampi kabaḷaṃ uddharitvā bhuttakālato paṭṭhāya yathā tathā vā bhuñjantassa anāpatti. Dve tīṇi nimantanāni ekato vā katvā bhuñjatīti dve tīṇi nimantanāni ekato pakkhipitvā missetvā ekaṃ katvā bhuñjatīti attho. ‘‘Sakalena gāmena vā’’tiādīsu sakalena gāmena ekato hutvā nimantitasseva yattha katthaci bhuñjato anāpatti. Pūgepi eseva nayo. Nimantiyamāno vā ‘‘bhikkhaṃ gahessāmī’’ti vadatīti ‘‘bhattaṃ gaṇhā’’ti nimantiyamāno ‘‘na mayhaṃ tava bhattena attho, bhikkhaṃ gahessāmī’’ti bhaṇati. Kiriyākiriyanti ettha bhojanaṃ kiriyaṃ, avikappanaṃ akiriyaṃ.
ပရမ္ပရဘောဇနသိက္ခာပဒဝဏ္ဏနာ နိဋ္ဌိတာ။
Paramparabhojanasikkhāpadavaṇṇanā niṭṭhitā.
