| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
3. පරම්‌පරභොජනසික්‌ඛාපදවණ්‌ණනා
3. Paramparabhojanasikkhāpadavaṇṇanā
221. තතියෙ පාළියං භත්‌තපටිපාටි අට්‌ඨිතාති කුලපටිපාටියා දාතබ්‌බා භත්‌තපටිපාටි අට්‌ඨිතා න ඨිතා, අබ්‌බොච්‌ඡින්‌නා නිරන්‌තරප්‌පවත්‌තාති අත්‌ථො. බදරඵලානි පක්‌ඛිපිත්‌වා පක්‌කයාගුආදිකං ‘‘බදරසාළව’’න්‌ති වුච්‌චති.
221. Tatiye pāḷiyaṃ bhattapaṭipāṭi aṭṭhitāti kulapaṭipāṭiyā dātabbā bhattapaṭipāṭi aṭṭhitā na ṭhitā, abbocchinnā nirantarappavattāti attho. Badaraphalāni pakkhipitvā pakkayāguādikaṃ ‘‘badarasāḷava’’nti vuccati.
පාළියං පරම්‌පරභොජනෙති යෙන පඨමං නිමන්‌තිතො, තස්‌ස භොජනතො පරස්‌ස භොජනස්‌ස භුඤ්‌ජනෙ. විකප්‌පනාව ඉධ අනුපඤ්‌ඤත්‌තිවසෙන මාතිකායං අනාරොපිතාපි පරිවාරෙ ‘‘චතස්‌සො අනුපඤ්‌ඤත්‌තියො’’ති (පරි. 86) අනුපඤ්‌ඤත්‌තියං ගණිතා. තත්‌ථ කිඤ්‌චාපි අට්‌ඨකථායං මහාපච්‌චරිවාදස්‌ස පච්‌ඡා කථනෙන පරම්‌මුඛාවිකප්‌පනා පතිට්‌ඨපිතා, තථාපි සම්‌මුඛාවිකප්‌පනාපි ගහෙතබ්‌බාව. තෙනෙව මාතිකාට්‌ඨකථායම්‌පි ‘‘යො භික්‌ඛු පඤ්‌චසු සහධම්‌මිකෙසු අඤ්‌ඤතරස්‌ස ‘මය්‌හං භත්‌තපච්‌චාසං තුය්‌හං දම්‌මී’ති වා ‘විකප්‌පෙමී’ති වා එවං සම්‌මුඛා’’තිආදි (කඞ්‌ඛා. අට්‌ඨ. පරම්‌පරභොජනසික්‌ඛාපදවණ්‌ණනා) වුත්‌තං.
Pāḷiyaṃ paramparabhojaneti yena paṭhamaṃ nimantito, tassa bhojanato parassa bhojanassa bhuñjane. Vikappanāva idha anupaññattivasena mātikāyaṃ anāropitāpi parivāre ‘‘catasso anupaññattiyo’’ti (pari. 86) anupaññattiyaṃ gaṇitā. Tattha kiñcāpi aṭṭhakathāyaṃ mahāpaccarivādassa pacchā kathanena parammukhāvikappanā patiṭṭhapitā, tathāpi sammukhāvikappanāpi gahetabbāva. Teneva mātikāṭṭhakathāyampi ‘‘yo bhikkhu pañcasu sahadhammikesu aññatarassa ‘mayhaṃ bhattapaccāsaṃ tuyhaṃ dammī’ti vā ‘vikappemī’ti vā evaṃ sammukhā’’tiādi (kaṅkhā. aṭṭha. paramparabhojanasikkhāpadavaṇṇanā) vuttaṃ.
229. ඛීරං වා රසං වාති පඤ්‌චභොජනාමිසං භත්‌තතො උපරි ඨිතං සන්‌ධාය වුත්‌තං. තඤ්‌හි අභොජනත්‌තා උප්‌පටිපාටියා පිවතොපි අනාපත්‌ති. තෙනාහ ‘‘භුඤ්‌ජන්‌තෙනා’’තිආදි.
229.Khīraṃ vā rasaṃ vāti pañcabhojanāmisaṃ bhattato upari ṭhitaṃ sandhāya vuttaṃ. Tañhi abhojanattā uppaṭipāṭiyā pivatopi anāpatti. Tenāha ‘‘bhuñjantenā’’tiādi.
විකප්‌පනාය අකරණතො අකිරියාවසෙන ඉදං වාචායපි සමුට්‌ඨිතන්‌ති ආහ ‘‘වචීකම්‌ම’’න්‌ති. පරම්‌පරභොජනතා, සමයාභාවො, අජ්‌ඣොහරණන්‌ති ඉමානෙත්‌ථ තීණි අඞ්‌ගානි.
Vikappanāya akaraṇato akiriyāvasena idaṃ vācāyapi samuṭṭhitanti āha ‘‘vacīkamma’’nti. Paramparabhojanatā, samayābhāvo, ajjhoharaṇanti imānettha tīṇi aṅgāni.
පරම්‌පරභොජනසික්‌ඛාපදවණ්‌ණනා නිට්‌ඨිතා.
Paramparabhojanasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 4. භොජනවග්‌ගො • 4. Bhojanavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 3. පරම්‌පරභොජනසික්‌ඛාපදවණ්‌ණනා • 3. Paramparabhojanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. පරම්‌පරභොජනසික්‌ඛාපදවණ්‌ණනා • 3. Paramparabhojanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. පරම්‌පරභොජනසික්‌ඛාපදවණ්‌ණනා • 3. Paramparabhojanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 3. පරම්‌පරභොජනසික්‌ඛාපදං • 3. Paramparabhojanasikkhāpadaṃ
