| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৫. পরপক্খাদিঅৰজাননং
5. Parapakkhādiavajānanaṃ
৩৯১. কথং লদ্ধপক্খোম্হীতি পরপক্খং অৰজানাতি? ইধেকচ্চো লদ্ধপক্খো হোতি লদ্ধপরিৰারো পক্খৰা ঞাতিমা। ‘‘অযং অলদ্ধপক্খো অলদ্ধপরিৰারো ন পক্খৰা ন ঞাতিমা’’তি তস্স অৰজানন্তো অধম্মং ধম্মোতি দীপেতি, ধম্মং অধম্মোতি দীপেতি…পে॰… দুট্ঠুল্লং আপত্তিং অদুট্ঠুল্লা আপত্তীতি দীপেতি, অদুট্ঠুল্লং আপত্তিং দুট্ঠুল্লা আপত্তীতি দীপেতি। এৰং লদ্ধপক্খোম্হীতি পরপক্খং অৰজানাতি।
391.Kathaṃ laddhapakkhomhīti parapakkhaṃ avajānāti? Idhekacco laddhapakkho hoti laddhaparivāro pakkhavā ñātimā. ‘‘Ayaṃ aladdhapakkho aladdhaparivāro na pakkhavā na ñātimā’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ laddhapakkhomhīti parapakkhaṃ avajānāti.
৩৯২. কথং বহুস্সুতোম্হীতি অপ্পস্সুতং অৰজানাতি? ইধেকচ্চো বহুস্সুতো হোতি সুতধরো সুতসন্নিচযো। ‘‘অযং অপ্পস্সুতো অপ্পাগমো অপ্পধরো’’তি তস্স অৰজানন্তো অধম্মং ধম্মোতি দীপেতি, ধম্মং অধম্মোতি দীপেতি…পে॰… দুট্ঠুল্লং আপত্তিং অদুট্ঠুল্লা আপত্তীতি দীপেতি, অদুট্ঠুল্লং আপত্তিং দুট্ঠুল্লা আপত্তীতি দীপেতি। এৰং বহুস্সুতোম্হীতি অপ্পস্সুতং অৰজানাতি।
392.Kathaṃ bahussutomhīti appassutaṃ avajānāti? Idhekacco bahussuto hoti sutadharo sutasannicayo. ‘‘Ayaṃ appassuto appāgamo appadharo’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ bahussutomhīti appassutaṃ avajānāti.
৩৯৩. কথং থেরতরোম্হীতি নৰকতরং অৰজানাতি? ইধেকচ্চো থেরো হোতি রত্তঞ্ঞূ চিরপব্বজিতো অযং নৰকো অপ্পঞ্ঞাতো অপ্পকতঞ্ঞূ ইমস্স ৰচনং অকতং ভৰিস্সতী’’তি তস্স অৰজানন্তো অধম্মং ধম্মোতি দীপেতি, ধম্মং অধম্মোতি দীপেতি …পে॰… দুট্ঠুল্লং আপত্তিং অদুট্ঠুল্লা আপত্তীতি দীপেতি, অদুট্ঠুল্লং আপত্তিং দুট্ঠুল্লা আপত্তীতি দীপেতি। এৰং থেরতরোম্হীতি নৰকতরং অৰজানাতি।
393.Kathaṃ therataromhīti navakataraṃ avajānāti? Idhekacco thero hoti rattaññū cirapabbajito ayaṃ navako appaññāto appakataññū imassa vacanaṃ akataṃ bhavissatī’’ti tassa avajānanto adhammaṃ dhammoti dīpeti, dhammaṃ adhammoti dīpeti …pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ therataromhīti navakataraṃ avajānāti.
৩৯৪. অসম্পত্তং ন ব্যাহরিতব্বন্তি অনোতিণ্ণং ভারং 1 ন ওতারেতব্বং। সম্পত্তং ধম্মতো ৰিনযতো ন পরিহাপেতব্বন্তি যংঅত্থায সঙ্ঘো সন্নিপতিতো হোতি তং অত্থং ধম্মতো ৰিনযতো ন পরিহাপেতব্বং।
394.Asampattaṃ na byāharitabbanti anotiṇṇaṃ bhāraṃ 2 na otāretabbaṃ. Sampattaṃ dhammato vinayato na parihāpetabbanti yaṃatthāya saṅgho sannipatito hoti taṃ atthaṃ dhammato vinayato na parihāpetabbaṃ.
৩৯৫. যেন ধম্মেনাতি ভূতেন ৰত্থুনা। যেন ৰিনযেনাতি চোদেত্ৰা সারেত্ৰা। যেন সত্থুসাসনেনাতি ঞত্তিসম্পদায অনুস্সাৰনসম্পদায, যেন ধম্মেন যেন ৰিনযেন যেন সত্থুসাসনেন তং অধিকরণং ৰূপসম্মতি, তথা তং অধিকরণং ৰূপসমেতব্বন্তি।
395.Yena dhammenāti bhūtena vatthunā. Yena vinayenāti codetvā sāretvā. Yena satthusāsanenāti ñattisampadāya anussāvanasampadāya, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbanti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অগতিঅগন্তব্বৰণ্ণনা • Agatiagantabbavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / অগতিঅগন্তব্বৰণ্ণনা • Agatiagantabbavaṇṇanā
