| Library / Tipiṭaka / తిపిటక • Tipiṭaka / పరివారపాళి • Parivārapāḷi |
౫. పరపక్ఖాదిఅవజాననం
5. Parapakkhādiavajānanaṃ
౩౯౧. కథం లద్ధపక్ఖోమ్హీతి పరపక్ఖం అవజానాతి? ఇధేకచ్చో లద్ధపక్ఖో హోతి లద్ధపరివారో పక్ఖవా ఞాతిమా. ‘‘అయం అలద్ధపక్ఖో అలద్ధపరివారో న పక్ఖవా న ఞాతిమా’’తి తస్స అవజానన్తో అధమ్మం ధమ్మోతి దీపేతి, ధమ్మం అధమ్మోతి దీపేతి…పే॰… దుట్ఠుల్లం ఆపత్తిం అదుట్ఠుల్లా ఆపత్తీతి దీపేతి, అదుట్ఠుల్లం ఆపత్తిం దుట్ఠుల్లా ఆపత్తీతి దీపేతి. ఏవం లద్ధపక్ఖోమ్హీతి పరపక్ఖం అవజానాతి.
391.Kathaṃ laddhapakkhomhīti parapakkhaṃ avajānāti? Idhekacco laddhapakkho hoti laddhaparivāro pakkhavā ñātimā. ‘‘Ayaṃ aladdhapakkho aladdhaparivāro na pakkhavā na ñātimā’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ laddhapakkhomhīti parapakkhaṃ avajānāti.
౩౯౨. కథం బహుస్సుతోమ్హీతి అప్పస్సుతం అవజానాతి? ఇధేకచ్చో బహుస్సుతో హోతి సుతధరో సుతసన్నిచయో. ‘‘అయం అప్పస్సుతో అప్పాగమో అప్పధరో’’తి తస్స అవజానన్తో అధమ్మం ధమ్మోతి దీపేతి, ధమ్మం అధమ్మోతి దీపేతి…పే॰… దుట్ఠుల్లం ఆపత్తిం అదుట్ఠుల్లా ఆపత్తీతి దీపేతి, అదుట్ఠుల్లం ఆపత్తిం దుట్ఠుల్లా ఆపత్తీతి దీపేతి. ఏవం బహుస్సుతోమ్హీతి అప్పస్సుతం అవజానాతి.
392.Kathaṃ bahussutomhīti appassutaṃ avajānāti? Idhekacco bahussuto hoti sutadharo sutasannicayo. ‘‘Ayaṃ appassuto appāgamo appadharo’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ bahussutomhīti appassutaṃ avajānāti.
౩౯౩. కథం థేరతరోమ్హీతి నవకతరం అవజానాతి? ఇధేకచ్చో థేరో హోతి రత్తఞ్ఞూ చిరపబ్బజితో అయం నవకో అప్పఞ్ఞాతో అప్పకతఞ్ఞూ ఇమస్స వచనం అకతం భవిస్సతీ’’తి తస్స అవజానన్తో అధమ్మం ధమ్మోతి దీపేతి, ధమ్మం అధమ్మోతి దీపేతి …పే॰… దుట్ఠుల్లం ఆపత్తిం అదుట్ఠుల్లా ఆపత్తీతి దీపేతి, అదుట్ఠుల్లం ఆపత్తిం దుట్ఠుల్లా ఆపత్తీతి దీపేతి. ఏవం థేరతరోమ్హీతి నవకతరం అవజానాతి.
393.Kathaṃ therataromhīti navakataraṃ avajānāti? Idhekacco thero hoti rattaññū cirapabbajito ayaṃ navako appaññāto appakataññū imassa vacanaṃ akataṃ bhavissatī’’ti tassa avajānanto adhammaṃ dhammoti dīpeti, dhammaṃ adhammoti dīpeti …pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ therataromhīti navakataraṃ avajānāti.
౩౯౪. అసమ్పత్తం న బ్యాహరితబ్బన్తి అనోతిణ్ణం భారం 1 న ఓతారేతబ్బం. సమ్పత్తం ధమ్మతో వినయతో న పరిహాపేతబ్బన్తి యంఅత్థాయ సఙ్ఘో సన్నిపతితో హోతి తం అత్థం ధమ్మతో వినయతో న పరిహాపేతబ్బం.
394.Asampattaṃ na byāharitabbanti anotiṇṇaṃ bhāraṃ 2 na otāretabbaṃ. Sampattaṃ dhammato vinayato na parihāpetabbanti yaṃatthāya saṅgho sannipatito hoti taṃ atthaṃ dhammato vinayato na parihāpetabbaṃ.
౩౯౫. యేన ధమ్మేనాతి భూతేన వత్థునా. యేన వినయేనాతి చోదేత్వా సారేత్వా. యేన సత్థుసాసనేనాతి ఞత్తిసమ్పదాయ అనుస్సావనసమ్పదాయ, యేన ధమ్మేన యేన వినయేన యేన సత్థుసాసనేన తం అధికరణం వూపసమ్మతి, తథా తం అధికరణం వూపసమేతబ్బన్తి.
395.Yena dhammenāti bhūtena vatthunā. Yena vinayenāti codetvā sāretvā. Yena satthusāsanenāti ñattisampadāya anussāvanasampadāya, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbanti.
Footnotes:
Related texts:
అట్ఠకథా • Aṭṭhakathā / వినయపిటక (అట్ఠకథా) • Vinayapiṭaka (aṭṭhakathā) / పరివార-అట్ఠకథా • Parivāra-aṭṭhakathā / అగతిఅగన్తబ్బవణ్ణనా • Agatiagantabbavaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / పాచిత్యాదియోజనాపాళి • Pācityādiyojanāpāḷi / అగతిఅగన్తబ్బవణ్ణనా • Agatiagantabbavaṇṇanā
