| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၅. ပရပက္ခာဒိအဝဇာနနံ
5. Parapakkhādiavajānanaṃ
၃၉၁. ကထံ လဒ္ဓပက္ခောမ္ဟီတိ ပရပက္ခံ အဝဇာနာတိ? ဣဓေကစ္စော လဒ္ဓပက္ခော ဟောတိ လဒ္ဓပရိဝာရော ပက္ခဝာ ဉာတိမာ။ ‘‘အယံ အလဒ္ဓပက္ခော အလဒ္ဓပရိဝာရော န ပက္ခဝာ န ဉာတိမာ’’တိ တသ္သ အဝဇာနန္တော အဓမ္မံ ဓမ္မောတိ ဒီပေတိ, ဓမ္မံ အဓမ္မောတိ ဒီပေတိ။ပေ.။ ဒုဋ္ဌုလ္လံ အာပတ္တိံ အဒုဋ္ဌုလ္လာ အာပတ္တီတိ ဒီပေတိ, အဒုဋ္ဌုလ္လံ အာပတ္တိံ ဒုဋ္ဌုလ္လာ အာပတ္တီတိ ဒီပေတိ။ ဧဝံ လဒ္ဓပက္ခောမ္ဟီတိ ပရပက္ခံ အဝဇာနာတိ။
391.Kathaṃ laddhapakkhomhīti parapakkhaṃ avajānāti? Idhekacco laddhapakkho hoti laddhaparivāro pakkhavā ñātimā. ‘‘Ayaṃ aladdhapakkho aladdhaparivāro na pakkhavā na ñātimā’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ laddhapakkhomhīti parapakkhaṃ avajānāti.
၃၉၂. ကထံ ဗဟုသ္သုတောမ္ဟီတိ အပ္ပသ္သုတံ အဝဇာနာတိ? ဣဓေကစ္စော ဗဟုသ္သုတော ဟောတိ သုတဓရော သုတသန္နိစယော။ ‘‘အယံ အပ္ပသ္သုတော အပ္ပာဂမော အပ္ပဓရော’’တိ တသ္သ အဝဇာနန္တော အဓမ္မံ ဓမ္မောတိ ဒီပေတိ, ဓမ္မံ အဓမ္မောတိ ဒီပေတိ။ပေ.။ ဒုဋ္ဌုလ္လံ အာပတ္တိံ အဒုဋ္ဌုလ္လာ အာပတ္တီတိ ဒီပေတိ, အဒုဋ္ဌုလ္လံ အာပတ္တိံ ဒုဋ္ဌုလ္လာ အာပတ္တီတိ ဒီပေတိ။ ဧဝံ ဗဟုသ္သုတောမ္ဟီတိ အပ္ပသ္သုတံ အဝဇာနာတိ။
392.Kathaṃ bahussutomhīti appassutaṃ avajānāti? Idhekacco bahussuto hoti sutadharo sutasannicayo. ‘‘Ayaṃ appassuto appāgamo appadharo’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ bahussutomhīti appassutaṃ avajānāti.
၃၉၃. ကထံ ထေရတရောမ္ဟီတိ နဝကတရံ အဝဇာနာတိ? ဣဓေကစ္စော ထေရော ဟောတိ ရတ္တညူ စိရပဗ္ဗဇိတော အယံ နဝကော အပ္ပညာတော အပ္ပကတညူ ဣမသ္သ ဝစနံ အကတံ ဘဝိသ္သတီ’’တိ တသ္သ အဝဇာနန္တော အဓမ္မံ ဓမ္မောတိ ဒီပေတိ, ဓမ္မံ အဓမ္မောတိ ဒီပေတိ ။ပေ.။ ဒုဋ္ဌုလ္လံ အာပတ္တိံ အဒုဋ္ဌုလ္လာ အာပတ္တီတိ ဒီပေတိ, အဒုဋ္ဌုလ္လံ အာပတ္တိံ ဒုဋ္ဌုလ္လာ အာပတ္တီတိ ဒီပေတိ။ ဧဝံ ထေရတရောမ္ဟီတိ နဝကတရံ အဝဇာနာတိ။
393.Kathaṃ therataromhīti navakataraṃ avajānāti? Idhekacco thero hoti rattaññū cirapabbajito ayaṃ navako appaññāto appakataññū imassa vacanaṃ akataṃ bhavissatī’’ti tassa avajānanto adhammaṃ dhammoti dīpeti, dhammaṃ adhammoti dīpeti …pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ therataromhīti navakataraṃ avajānāti.
၃၉၄. အသမ္ပတ္တံ န ဗ္ယာဟရိတဗ္ဗန္တိ အနောတိဏ္ဏံ ဘာရံ 1 န ဩတာရေတဗ္ဗံ။ သမ္ပတ္တံ ဓမ္မတော ဝိနယတော န ပရိဟာပေတဗ္ဗန္တိ ယံအတ္ထာယ သင္ဃော သန္နိပတိတော ဟောတိ တံ အတ္ထံ ဓမ္မတော ဝိနယတော န ပရိဟာပေတဗ္ဗံ။
394.Asampattaṃ na byāharitabbanti anotiṇṇaṃ bhāraṃ 2 na otāretabbaṃ. Sampattaṃ dhammato vinayato na parihāpetabbanti yaṃatthāya saṅgho sannipatito hoti taṃ atthaṃ dhammato vinayato na parihāpetabbaṃ.
၃၉၅. ယေန ဓမ္မေနာတိ ဘူတေန ဝတ္ထုနာ။ ယေန ဝိနယေနာတိ စောဒေတ္ဝာ သာရေတ္ဝာ။ ယေန သတ္ထုသာသနေနာတိ ဉတ္တိသမ္ပဒာယ အနုသ္သာဝနသမ္ပဒာယ, ယေန ဓမ္မေန ယေန ဝိနယေန ယေန သတ္ထုသာသနေန တံ အဓိကရဏံ ဝူပသမ္မတိ, တထာ တံ အဓိကရဏံ ဝူပသမေတဗ္ဗန္တိ။
395.Yena dhammenāti bhūtena vatthunā. Yena vinayenāti codetvā sāretvā. Yena satthusāsanenāti ñattisampadāya anussāvanasampadāya, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbanti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / အဂတိအဂန္တဗ္ဗဝဏ္ဏနာ • Agatiagantabbavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / အဂတိအဂန္တဗ္ဗဝဏ္ဏနာ • Agatiagantabbavaṇṇanā
