| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
೫. ಪರಪಕ್ಖಾದಿಅವಜಾನನಂ
5. Parapakkhādiavajānanaṃ
೩೯೧. ಕಥಂ ಲದ್ಧಪಕ್ಖೋಮ್ಹೀತಿ ಪರಪಕ್ಖಂ ಅವಜಾನಾತಿ? ಇಧೇಕಚ್ಚೋ ಲದ್ಧಪಕ್ಖೋ ಹೋತಿ ಲದ್ಧಪರಿವಾರೋ ಪಕ್ಖವಾ ಞಾತಿಮಾ। ‘‘ಅಯಂ ಅಲದ್ಧಪಕ್ಖೋ ಅಲದ್ಧಪರಿವಾರೋ ನ ಪಕ್ಖವಾ ನ ಞಾತಿಮಾ’’ತಿ ತಸ್ಸ ಅವಜಾನನ್ತೋ ಅಧಮ್ಮಂ ಧಮ್ಮೋತಿ ದೀಪೇತಿ, ಧಮ್ಮಂ ಅಧಮ್ಮೋತಿ ದೀಪೇತಿ…ಪೇ॰… ದುಟ್ಠುಲ್ಲಂ ಆಪತ್ತಿಂ ಅದುಟ್ಠುಲ್ಲಾ ಆಪತ್ತೀತಿ ದೀಪೇತಿ, ಅದುಟ್ಠುಲ್ಲಂ ಆಪತ್ತಿಂ ದುಟ್ಠುಲ್ಲಾ ಆಪತ್ತೀತಿ ದೀಪೇತಿ। ಏವಂ ಲದ್ಧಪಕ್ಖೋಮ್ಹೀತಿ ಪರಪಕ್ಖಂ ಅವಜಾನಾತಿ।
391.Kathaṃ laddhapakkhomhīti parapakkhaṃ avajānāti? Idhekacco laddhapakkho hoti laddhaparivāro pakkhavā ñātimā. ‘‘Ayaṃ aladdhapakkho aladdhaparivāro na pakkhavā na ñātimā’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ laddhapakkhomhīti parapakkhaṃ avajānāti.
೩೯೨. ಕಥಂ ಬಹುಸ್ಸುತೋಮ್ಹೀತಿ ಅಪ್ಪಸ್ಸುತಂ ಅವಜಾನಾತಿ? ಇಧೇಕಚ್ಚೋ ಬಹುಸ್ಸುತೋ ಹೋತಿ ಸುತಧರೋ ಸುತಸನ್ನಿಚಯೋ। ‘‘ಅಯಂ ಅಪ್ಪಸ್ಸುತೋ ಅಪ್ಪಾಗಮೋ ಅಪ್ಪಧರೋ’’ತಿ ತಸ್ಸ ಅವಜಾನನ್ತೋ ಅಧಮ್ಮಂ ಧಮ್ಮೋತಿ ದೀಪೇತಿ, ಧಮ್ಮಂ ಅಧಮ್ಮೋತಿ ದೀಪೇತಿ…ಪೇ॰… ದುಟ್ಠುಲ್ಲಂ ಆಪತ್ತಿಂ ಅದುಟ್ಠುಲ್ಲಾ ಆಪತ್ತೀತಿ ದೀಪೇತಿ, ಅದುಟ್ಠುಲ್ಲಂ ಆಪತ್ತಿಂ ದುಟ್ಠುಲ್ಲಾ ಆಪತ್ತೀತಿ ದೀಪೇತಿ। ಏವಂ ಬಹುಸ್ಸುತೋಮ್ಹೀತಿ ಅಪ್ಪಸ್ಸುತಂ ಅವಜಾನಾತಿ।
392.Kathaṃ bahussutomhīti appassutaṃ avajānāti? Idhekacco bahussuto hoti sutadharo sutasannicayo. ‘‘Ayaṃ appassuto appāgamo appadharo’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ bahussutomhīti appassutaṃ avajānāti.
೩೯೩. ಕಥಂ ಥೇರತರೋಮ್ಹೀತಿ ನವಕತರಂ ಅವಜಾನಾತಿ? ಇಧೇಕಚ್ಚೋ ಥೇರೋ ಹೋತಿ ರತ್ತಞ್ಞೂ ಚಿರಪಬ್ಬಜಿತೋ ಅಯಂ ನವಕೋ ಅಪ್ಪಞ್ಞಾತೋ ಅಪ್ಪಕತಞ್ಞೂ ಇಮಸ್ಸ ವಚನಂ ಅಕತಂ ಭವಿಸ್ಸತೀ’’ತಿ ತಸ್ಸ ಅವಜಾನನ್ತೋ ಅಧಮ್ಮಂ ಧಮ್ಮೋತಿ ದೀಪೇತಿ, ಧಮ್ಮಂ ಅಧಮ್ಮೋತಿ ದೀಪೇತಿ …ಪೇ॰… ದುಟ್ಠುಲ್ಲಂ ಆಪತ್ತಿಂ ಅದುಟ್ಠುಲ್ಲಾ ಆಪತ್ತೀತಿ ದೀಪೇತಿ, ಅದುಟ್ಠುಲ್ಲಂ ಆಪತ್ತಿಂ ದುಟ್ಠುಲ್ಲಾ ಆಪತ್ತೀತಿ ದೀಪೇತಿ। ಏವಂ ಥೇರತರೋಮ್ಹೀತಿ ನವಕತರಂ ಅವಜಾನಾತಿ।
393.Kathaṃ therataromhīti navakataraṃ avajānāti? Idhekacco thero hoti rattaññū cirapabbajito ayaṃ navako appaññāto appakataññū imassa vacanaṃ akataṃ bhavissatī’’ti tassa avajānanto adhammaṃ dhammoti dīpeti, dhammaṃ adhammoti dīpeti …pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ therataromhīti navakataraṃ avajānāti.
೩೯೪. ಅಸಮ್ಪತ್ತಂ ನ ಬ್ಯಾಹರಿತಬ್ಬನ್ತಿ ಅನೋತಿಣ್ಣಂ ಭಾರಂ 1 ನ ಓತಾರೇತಬ್ಬಂ। ಸಮ್ಪತ್ತಂ ಧಮ್ಮತೋ ವಿನಯತೋ ನ ಪರಿಹಾಪೇತಬ್ಬನ್ತಿ ಯಂಅತ್ಥಾಯ ಸಙ್ಘೋ ಸನ್ನಿಪತಿತೋ ಹೋತಿ ತಂ ಅತ್ಥಂ ಧಮ್ಮತೋ ವಿನಯತೋ ನ ಪರಿಹಾಪೇತಬ್ಬಂ।
394.Asampattaṃ na byāharitabbanti anotiṇṇaṃ bhāraṃ 2 na otāretabbaṃ. Sampattaṃ dhammato vinayato na parihāpetabbanti yaṃatthāya saṅgho sannipatito hoti taṃ atthaṃ dhammato vinayato na parihāpetabbaṃ.
೩೯೫. ಯೇನ ಧಮ್ಮೇನಾತಿ ಭೂತೇನ ವತ್ಥುನಾ। ಯೇನ ವಿನಯೇನಾತಿ ಚೋದೇತ್ವಾ ಸಾರೇತ್ವಾ। ಯೇನ ಸತ್ಥುಸಾಸನೇನಾತಿ ಞತ್ತಿಸಮ್ಪದಾಯ ಅನುಸ್ಸಾವನಸಮ್ಪದಾಯ, ಯೇನ ಧಮ್ಮೇನ ಯೇನ ವಿನಯೇನ ಯೇನ ಸತ್ಥುಸಾಸನೇನ ತಂ ಅಧಿಕರಣಂ ವೂಪಸಮ್ಮತಿ, ತಥಾ ತಂ ಅಧಿಕರಣಂ ವೂಪಸಮೇತಬ್ಬನ್ತಿ।
395.Yena dhammenāti bhūtena vatthunā. Yena vinayenāti codetvā sāretvā. Yena satthusāsanenāti ñattisampadāya anussāvanasampadāya, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbanti.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಅಗತಿಅಗನ್ತಬ್ಬವಣ್ಣನಾ • Agatiagantabbavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಅಗತಿಅಗನ್ತಬ್ಬವಣ್ಣನಾ • Agatiagantabbavaṇṇanā
