| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
5. පරපක්‌ඛාදිඅවජානනං
5. Parapakkhādiavajānanaṃ
391. කථං ලද්‌ධපක්‌ඛොම්‌හීති පරපක්‌ඛං අවජානාති? ඉධෙකච්‌චො ලද්‌ධපක්‌ඛො හොති ලද්‌ධපරිවාරො පක්‌ඛවා ඤාතිමා. ‘‘අයං අලද්‌ධපක්‌ඛො අලද්‌ධපරිවාරො න පක්‌ඛවා න ඤාතිමා’’ති තස්‌ස අවජානන්‌තො අධම්‌මං ධම්‌මොති දීපෙති, ධම්‌මං අධම්‌මොති දීපෙති…පෙ.… දුට්‌ඨුල්‌ලං ආපත්‌තිං අදුට්‌ඨුල්‌ලා ආපත්‌තීති දීපෙති, අදුට්‌ඨුල්‌ලං ආපත්‌තිං දුට්‌ඨුල්‌ලා ආපත්‌තීති දීපෙති. එවං ලද්‌ධපක්‌ඛොම්‌හීති පරපක්‌ඛං අවජානාති.
391.Kathaṃ laddhapakkhomhīti parapakkhaṃ avajānāti? Idhekacco laddhapakkho hoti laddhaparivāro pakkhavā ñātimā. ‘‘Ayaṃ aladdhapakkho aladdhaparivāro na pakkhavā na ñātimā’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ laddhapakkhomhīti parapakkhaṃ avajānāti.
392. කථං බහුස්‌සුතොම්‌හීති අප්‌පස්‌සුතං අවජානාති? ඉධෙකච්‌චො බහුස්‌සුතො හොති සුතධරො සුතසන්‌නිචයො. ‘‘අයං අප්‌පස්‌සුතො අප්‌පාගමො අප්‌පධරො’’ති තස්‌ස අවජානන්‌තො අධම්‌මං ධම්‌මොති දීපෙති, ධම්‌මං අධම්‌මොති දීපෙති…පෙ.… දුට්‌ඨුල්‌ලං ආපත්‌තිං අදුට්‌ඨුල්‌ලා ආපත්‌තීති දීපෙති, අදුට්‌ඨුල්‌ලං ආපත්‌තිං දුට්‌ඨුල්‌ලා ආපත්‌තීති දීපෙති. එවං බහුස්‌සුතොම්‌හීති අප්‌පස්‌සුතං අවජානාති.
392.Kathaṃ bahussutomhīti appassutaṃ avajānāti? Idhekacco bahussuto hoti sutadharo sutasannicayo. ‘‘Ayaṃ appassuto appāgamo appadharo’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ bahussutomhīti appassutaṃ avajānāti.
393. කථං ථෙරතරොම්‌හීති නවකතරං අවජානාති? ඉධෙකච්‌චො ථෙරො හොති රත්‌තඤ්‌ඤූ චිරපබ්‌බජිතො අයං නවකො අප්‌පඤ්‌ඤාතො අප්‌පකතඤ්‌ඤූ ඉමස්‌ස වචනං අකතං භවිස්‌සතී’’ති තස්‌ස අවජානන්‌තො අධම්‌මං ධම්‌මොති දීපෙති, ධම්‌මං අධම්‌මොති දීපෙති …පෙ.… දුට්‌ඨුල්‌ලං ආපත්‌තිං අදුට්‌ඨුල්‌ලා ආපත්‌තීති දීපෙති, අදුට්‌ඨුල්‌ලං ආපත්‌තිං දුට්‌ඨුල්‌ලා ආපත්‌තීති දීපෙති. එවං ථෙරතරොම්‌හීති නවකතරං අවජානාති.
393.Kathaṃ therataromhīti navakataraṃ avajānāti? Idhekacco thero hoti rattaññū cirapabbajito ayaṃ navako appaññāto appakataññū imassa vacanaṃ akataṃ bhavissatī’’ti tassa avajānanto adhammaṃ dhammoti dīpeti, dhammaṃ adhammoti dīpeti …pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ therataromhīti navakataraṃ avajānāti.
394. අසම්‌පත්‌තං න බ්‍යාහරිතබ්‌බන්‌ති අනොතිණ්‌ණං භාරං 1 න ඔතාරෙතබ්‌බං. සම්‌පත්‌තං ධම්‌මතො විනයතො න පරිහාපෙතබ්‌බන්‌ති යංඅත්‌ථාය සඞ්‌ඝො සන්‌නිපතිතො හොති තං අත්‌ථං ධම්‌මතො විනයතො න පරිහාපෙතබ්‌බං.
394.Asampattaṃ na byāharitabbanti anotiṇṇaṃ bhāraṃ 2 na otāretabbaṃ. Sampattaṃ dhammato vinayato na parihāpetabbanti yaṃatthāya saṅgho sannipatito hoti taṃ atthaṃ dhammato vinayato na parihāpetabbaṃ.
395. යෙන ධම්‌මෙනාති භූතෙන වත්‌ථුනා. යෙන විනයෙනාති චොදෙත්‌වා සාරෙත්‌වා. යෙන සත්‌ථුසාසනෙනාති ඤත්‌තිසම්‌පදාය අනුස්‌සාවනසම්‌පදාය, යෙන ධම්‌මෙන යෙන විනයෙන යෙන සත්‌ථුසාසනෙන තං අධිකරණං වූපසම්‌මති, තථා තං අධිකරණං වූපසමෙතබ්‌බන්‌ති.
395.Yena dhammenāti bhūtena vatthunā. Yena vinayenāti codetvā sāretvā. Yena satthusāsanenāti ñattisampadāya anussāvanasampadāya, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbanti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / අගතිඅගන්‌තබ්‌බවණ්‌ණනා • Agatiagantabbavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / අගතිඅගන්‌තබ්‌බවණ්‌ණනා • Agatiagantabbavaṇṇanā
