| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༥. པརཔཀྑཱདིཨཝཛཱནནཾ
5. Parapakkhādiavajānanaṃ
༣༩༡. ཀཐཾ ལདྡྷཔཀྑོམྷཱིཏི པརཔཀྑཾ ཨཝཛཱནཱཏི? ཨིདྷེཀཙྩོ ལདྡྷཔཀྑོ ཧོཏི ལདྡྷཔརིཝཱརོ པཀྑཝཱ ཉཱཏིམཱ། ‘‘ཨཡཾ ཨལདྡྷཔཀྑོ ཨལདྡྷཔརིཝཱརོ ན པཀྑཝཱ ན ཉཱཏིམཱ’’ཏི ཏསྶ ཨཝཛཱནནྟོ ཨདྷམྨཾ དྷམྨོཏི དཱིཔེཏི, དྷམྨཾ ཨདྷམྨོཏི དཱིཔེཏི…པེ॰… དུཊྛུལླཾ ཨཱཔཏྟིཾ ཨདུཊྛུལླཱ ཨཱཔཏྟཱིཏི དཱིཔེཏི, ཨདུཊྛུལླཾ ཨཱཔཏྟིཾ དུཊྛུལླཱ ཨཱཔཏྟཱིཏི དཱིཔེཏི། ཨེཝཾ ལདྡྷཔཀྑོམྷཱིཏི པརཔཀྑཾ ཨཝཛཱནཱཏི།
391.Kathaṃ laddhapakkhomhīti parapakkhaṃ avajānāti? Idhekacco laddhapakkho hoti laddhaparivāro pakkhavā ñātimā. ‘‘Ayaṃ aladdhapakkho aladdhaparivāro na pakkhavā na ñātimā’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ laddhapakkhomhīti parapakkhaṃ avajānāti.
༣༩༢. ཀཐཾ བཧུསྶུཏོམྷཱིཏི ཨཔྤསྶུཏཾ ཨཝཛཱནཱཏི? ཨིདྷེཀཙྩོ བཧུསྶུཏོ ཧོཏི སུཏདྷརོ སུཏསནྣིཙཡོ། ‘‘ཨཡཾ ཨཔྤསྶུཏོ ཨཔྤཱགམོ ཨཔྤདྷརོ’’ཏི ཏསྶ ཨཝཛཱནནྟོ ཨདྷམྨཾ དྷམྨོཏི དཱིཔེཏི, དྷམྨཾ ཨདྷམྨོཏི དཱིཔེཏི…པེ॰… དུཊྛུལླཾ ཨཱཔཏྟིཾ ཨདུཊྛུལླཱ ཨཱཔཏྟཱིཏི དཱིཔེཏི, ཨདུཊྛུལླཾ ཨཱཔཏྟིཾ དུཊྛུལླཱ ཨཱཔཏྟཱིཏི དཱིཔེཏི། ཨེཝཾ བཧུསྶུཏོམྷཱིཏི ཨཔྤསྶུཏཾ ཨཝཛཱནཱཏི།
392.Kathaṃ bahussutomhīti appassutaṃ avajānāti? Idhekacco bahussuto hoti sutadharo sutasannicayo. ‘‘Ayaṃ appassuto appāgamo appadharo’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ bahussutomhīti appassutaṃ avajānāti.
༣༩༣. ཀཐཾ ཐེརཏརོམྷཱིཏི ནཝཀཏརཾ ཨཝཛཱནཱཏི? ཨིདྷེཀཙྩོ ཐེརོ ཧོཏི རཏྟཉྙཱུ ཙིརཔབྦཛིཏོ ཨཡཾ ནཝཀོ ཨཔྤཉྙཱཏོ ཨཔྤཀཏཉྙཱུ ཨིམསྶ ཝཙནཾ ཨཀཏཾ བྷཝིསྶཏཱི’’ཏི ཏསྶ ཨཝཛཱནནྟོ ཨདྷམྨཾ དྷམྨོཏི དཱིཔེཏི, དྷམྨཾ ཨདྷམྨོཏི དཱིཔེཏི …པེ॰… དུཊྛུལླཾ ཨཱཔཏྟིཾ ཨདུཊྛུལླཱ ཨཱཔཏྟཱིཏི དཱིཔེཏི, ཨདུཊྛུལླཾ ཨཱཔཏྟིཾ དུཊྛུལླཱ ཨཱཔཏྟཱིཏི དཱིཔེཏི། ཨེཝཾ ཐེརཏརོམྷཱིཏི ནཝཀཏརཾ ཨཝཛཱནཱཏི།
393.Kathaṃ therataromhīti navakataraṃ avajānāti? Idhekacco thero hoti rattaññū cirapabbajito ayaṃ navako appaññāto appakataññū imassa vacanaṃ akataṃ bhavissatī’’ti tassa avajānanto adhammaṃ dhammoti dīpeti, dhammaṃ adhammoti dīpeti …pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ therataromhīti navakataraṃ avajānāti.
༣༩༤. ཨསམྤཏྟཾ ན བྱཱཧརིཏབྦནྟི ཨནོཏིཎྞཾ བྷཱརཾ 1 ན ཨོཏཱརེཏབྦཾ། སམྤཏྟཾ དྷམྨཏོ ཝིནཡཏོ ན པརིཧཱཔེཏབྦནྟི ཡཾཨཏྠཱཡ སངྒྷོ སནྣིཔཏིཏོ ཧོཏི ཏཾ ཨཏྠཾ དྷམྨཏོ ཝིནཡཏོ ན པརིཧཱཔེཏབྦཾ།
394.Asampattaṃ na byāharitabbanti anotiṇṇaṃ bhāraṃ 2 na otāretabbaṃ. Sampattaṃ dhammato vinayato na parihāpetabbanti yaṃatthāya saṅgho sannipatito hoti taṃ atthaṃ dhammato vinayato na parihāpetabbaṃ.
༣༩༥. ཡེན དྷམྨེནཱཏི བྷཱུཏེན ཝཏྠུནཱ། ཡེན ཝིནཡེནཱཏི ཙོདེཏྭཱ སཱརེཏྭཱ། ཡེན སཏྠུསཱསནེནཱཏི ཉཏྟིསམྤདཱཡ ཨནུསྶཱཝནསམྤདཱཡ, ཡེན དྷམྨེན ཡེན ཝིནཡེན ཡེན སཏྠུསཱསནེན ཏཾ ཨདྷིཀརཎཾ ཝཱུཔསམྨཏི, ཏཐཱ ཏཾ ཨདྷིཀརཎཾ ཝཱུཔསམེཏབྦནྟི།
395.Yena dhammenāti bhūtena vatthunā. Yena vinayenāti codetvā sāretvā. Yena satthusāsanenāti ñattisampadāya anussāvanasampadāya, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbanti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཨགཏིཨགནྟབྦཝཎྞནཱ • Agatiagantabbavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨགཏིཨགནྟབྦཝཎྞནཱ • Agatiagantabbavaṇṇanā
