| Library / Tipiṭaka / തിപിടക • Tipiṭaka / പരിവാരപാളി • Parivārapāḷi |
൫. പരപക്ഖാദിഅവജാനനം
5. Parapakkhādiavajānanaṃ
൩൯൧. കഥം ലദ്ധപക്ഖോമ്ഹീതി പരപക്ഖം അവജാനാതി? ഇധേകച്ചോ ലദ്ധപക്ഖോ ഹോതി ലദ്ധപരിവാരോ പക്ഖവാ ഞാതിമാ. ‘‘അയം അലദ്ധപക്ഖോ അലദ്ധപരിവാരോ ന പക്ഖവാ ന ഞാതിമാ’’തി തസ്സ അവജാനന്തോ അധമ്മം ധമ്മോതി ദീപേതി, ധമ്മം അധമ്മോതി ദീപേതി…പേ॰… ദുട്ഠുല്ലം ആപത്തിം അദുട്ഠുല്ലാ ആപത്തീതി ദീപേതി, അദുട്ഠുല്ലം ആപത്തിം ദുട്ഠുല്ലാ ആപത്തീതി ദീപേതി. ഏവം ലദ്ധപക്ഖോമ്ഹീതി പരപക്ഖം അവജാനാതി.
391.Kathaṃ laddhapakkhomhīti parapakkhaṃ avajānāti? Idhekacco laddhapakkho hoti laddhaparivāro pakkhavā ñātimā. ‘‘Ayaṃ aladdhapakkho aladdhaparivāro na pakkhavā na ñātimā’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ laddhapakkhomhīti parapakkhaṃ avajānāti.
൩൯൨. കഥം ബഹുസ്സുതോമ്ഹീതി അപ്പസ്സുതം അവജാനാതി? ഇധേകച്ചോ ബഹുസ്സുതോ ഹോതി സുതധരോ സുതസന്നിചയോ. ‘‘അയം അപ്പസ്സുതോ അപ്പാഗമോ അപ്പധരോ’’തി തസ്സ അവജാനന്തോ അധമ്മം ധമ്മോതി ദീപേതി, ധമ്മം അധമ്മോതി ദീപേതി…പേ॰… ദുട്ഠുല്ലം ആപത്തിം അദുട്ഠുല്ലാ ആപത്തീതി ദീപേതി, അദുട്ഠുല്ലം ആപത്തിം ദുട്ഠുല്ലാ ആപത്തീതി ദീപേതി. ഏവം ബഹുസ്സുതോമ്ഹീതി അപ്പസ്സുതം അവജാനാതി.
392.Kathaṃ bahussutomhīti appassutaṃ avajānāti? Idhekacco bahussuto hoti sutadharo sutasannicayo. ‘‘Ayaṃ appassuto appāgamo appadharo’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ bahussutomhīti appassutaṃ avajānāti.
൩൯൩. കഥം ഥേരതരോമ്ഹീതി നവകതരം അവജാനാതി? ഇധേകച്ചോ ഥേരോ ഹോതി രത്തഞ്ഞൂ ചിരപബ്ബജിതോ അയം നവകോ അപ്പഞ്ഞാതോ അപ്പകതഞ്ഞൂ ഇമസ്സ വചനം അകതം ഭവിസ്സതീ’’തി തസ്സ അവജാനന്തോ അധമ്മം ധമ്മോതി ദീപേതി, ധമ്മം അധമ്മോതി ദീപേതി …പേ॰… ദുട്ഠുല്ലം ആപത്തിം അദുട്ഠുല്ലാ ആപത്തീതി ദീപേതി, അദുട്ഠുല്ലം ആപത്തിം ദുട്ഠുല്ലാ ആപത്തീതി ദീപേതി. ഏവം ഥേരതരോമ്ഹീതി നവകതരം അവജാനാതി.
393.Kathaṃ therataromhīti navakataraṃ avajānāti? Idhekacco thero hoti rattaññū cirapabbajito ayaṃ navako appaññāto appakataññū imassa vacanaṃ akataṃ bhavissatī’’ti tassa avajānanto adhammaṃ dhammoti dīpeti, dhammaṃ adhammoti dīpeti …pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ therataromhīti navakataraṃ avajānāti.
൩൯൪. അസമ്പത്തം ന ബ്യാഹരിതബ്ബന്തി അനോതിണ്ണം ഭാരം 1 ന ഓതാരേതബ്ബം. സമ്പത്തം ധമ്മതോ വിനയതോ ന പരിഹാപേതബ്ബന്തി യംഅത്ഥായ സങ്ഘോ സന്നിപതിതോ ഹോതി തം അത്ഥം ധമ്മതോ വിനയതോ ന പരിഹാപേതബ്ബം.
394.Asampattaṃ na byāharitabbanti anotiṇṇaṃ bhāraṃ 2 na otāretabbaṃ. Sampattaṃ dhammato vinayato na parihāpetabbanti yaṃatthāya saṅgho sannipatito hoti taṃ atthaṃ dhammato vinayato na parihāpetabbaṃ.
൩൯൫. യേന ധമ്മേനാതി ഭൂതേന വത്ഥുനാ. യേന വിനയേനാതി ചോദേത്വാ സാരേത്വാ. യേന സത്ഥുസാസനേനാതി ഞത്തിസമ്പദായ അനുസ്സാവനസമ്പദായ, യേന ധമ്മേന യേന വിനയേന യേന സത്ഥുസാസനേന തം അധികരണം വൂപസമ്മതി, തഥാ തം അധികരണം വൂപസമേതബ്ബന്തി.
395.Yena dhammenāti bhūtena vatthunā. Yena vinayenāti codetvā sāretvā. Yena satthusāsanenāti ñattisampadāya anussāvanasampadāya, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbanti.
Footnotes:
Related texts:
അട്ഠകഥാ • Aṭṭhakathā / വിനയപിടക (അട്ഠകഥാ) • Vinayapiṭaka (aṭṭhakathā) / പരിവാര-അട്ഠകഥാ • Parivāra-aṭṭhakathā / അഗതിഅഗന്തബ്ബവണ്ണനാ • Agatiagantabbavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / അഗതിഅഗന്തബ്ബവണ്ണനാ • Agatiagantabbavaṇṇanā
