| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
১০. পারাপরিযত্থেরগাথাৰণ্ণনা
10. Pārāpariyattheragāthāvaṇṇanā
সমণস্স অহু চিন্তাতিআদিকা আযস্মতো পারাপরিযত্থেরস্স গাথা। ইমস্স ৰত্থু হেট্ঠা আগতমেৰ। তা চ গাথা সত্থরি ধরন্তে অত্তনো পুথুজ্জনকালে মনচ্ছট্ঠানং ইন্দ্রিযানং নিগ্গণ্হনচিন্তায পকাসনৰসেন ভাসিতা। ইমা পন অপরভাগে সত্থরি পরিনিব্বুতে অত্তনো চ পরিনিব্বানে উপট্ঠিতে তদা আযতিঞ্চ ভিক্খূনং উদ্ধম্মপটিপত্তিযা পকাসনৰসেন ভাসিতা। তত্থ –
Samaṇassaahu cintātiādikā āyasmato pārāpariyattherassa gāthā. Imassa vatthu heṭṭhā āgatameva. Tā ca gāthā satthari dharante attano puthujjanakāle manacchaṭṭhānaṃ indriyānaṃ niggaṇhanacintāya pakāsanavasena bhāsitā. Imā pana aparabhāge satthari parinibbute attano ca parinibbāne upaṭṭhite tadā āyatiñca bhikkhūnaṃ uddhammapaṭipattiyā pakāsanavasena bhāsitā. Tattha –
৯২০.
920.
‘‘সমণস্স অহু চিন্তা, পুপ্ফিতম্হি মহাৰনে।
‘‘Samaṇassa ahu cintā, pupphitamhi mahāvane;
একগ্গস্স নিসিন্নস্স, পৰিৰিত্তস্স ঝাযিনো’’তি॥ –
Ekaggassa nisinnassa, pavivittassa jhāyino’’ti. –
অযং গাথা সঙ্গীতিকারেহি ঠপিতা। তস্সত্থো হেট্ঠা ৰুত্তনযোৰ। অযং পন সম্বন্ধো – সত্থরি অগ্গসাৰকেসু একচ্চেসু মহাথেরেসু চ পরিনিব্বুতেসু অতীতসত্থুকে পাৰচনে সুব্বচেসু সিক্খাকামেসু ভিক্খূসু দুল্লভেসু, দুব্বচেসু মিচ্ছাপটিপত্তিবহুলেসু ভিক্খূসু চ জাতেসু সুপুপ্ফিতে মহন্তে সালৰনে নিসিন্নস্স পৰিৰিত্তস্স একগ্গস্স ঝাযনসীলস্স, সমিতপাপতায সমণস্স, পারাপরিযত্থেরস্স পটিপত্তিং নিস্সায চিন্তা ৰীমংসা অহোসীতি ইতরা –
Ayaṃ gāthā saṅgītikārehi ṭhapitā. Tassattho heṭṭhā vuttanayova. Ayaṃ pana sambandho – satthari aggasāvakesu ekaccesu mahātheresu ca parinibbutesu atītasatthuke pāvacane subbacesu sikkhākāmesu bhikkhūsu dullabhesu, dubbacesu micchāpaṭipattibahulesu bhikkhūsu ca jātesu supupphite mahante sālavane nisinnassa pavivittassa ekaggassa jhāyanasīlassa, samitapāpatāya samaṇassa, pārāpariyattherassa paṭipattiṃ nissāya cintā vīmaṃsā ahosīti itarā –
৯২১.
921.
‘‘অঞ্ঞথা লোকনাথম্হি, তিট্ঠন্তে পুরিসুত্তমে।
‘‘Aññathā lokanāthamhi, tiṭṭhante purisuttame;
ইরিযং আসি ভিক্খূনং, অঞ্ঞথা দানি দিস্সতি॥
Iriyaṃ āsi bhikkhūnaṃ, aññathā dāni dissati.
৯২২.
922.
‘‘সীতৰাতপরিত্তাণং, হিরিকোপীনছাদনং।
‘‘Sītavātaparittāṇaṃ, hirikopīnachādanaṃ;
মত্তট্ঠিযং অভুঞ্জিংসু, সন্তুট্ঠা ইতরীতরে॥
Mattaṭṭhiyaṃ abhuñjiṃsu, santuṭṭhā itarītare.
৯২৩.
923.
‘‘পণীতং যদি ৰা লূখং, অপ্পং ৰা যদি ৰা বহুং।
‘‘Paṇītaṃ yadi vā lūkhaṃ, appaṃ vā yadi vā bahuṃ;
যাপনত্থং অভুঞ্জিংসু, অগিদ্ধা নাধিমুচ্ছিতা॥
Yāpanatthaṃ abhuñjiṃsu, agiddhā nādhimucchitā.
৯২৪.
924.
‘‘জীৰিতানং পরিক্খারে, ভেসজ্জে অথ পচ্চযে।
‘‘Jīvitānaṃ parikkhāre, bhesajje atha paccaye;
ন বাল়্হং উস্সুকা আসুং, যথা তে আসৰক্খযে॥
Na bāḷhaṃ ussukā āsuṃ, yathā te āsavakkhaye.
৯২৫.
925.
‘‘অরঞ্ঞে রুক্খমূলেসু, কন্দরাসু গুহাসু চ।
‘‘Araññe rukkhamūlesu, kandarāsu guhāsu ca;
ৰিৰেকমনুব্রূহন্তা, ৰিহংসু তপ্পরাযণা॥
Vivekamanubrūhantā, vihaṃsu tapparāyaṇā.
৯২৬.
926.
‘‘নীচা নিৰিট্ঠা সুভরা, মুদূ অথদ্ধমানসা।
‘‘Nīcā niviṭṭhā subharā, mudū athaddhamānasā;
অব্যাসেকা অমুখরা, অত্থচিন্তাৰসানুগা॥
Abyāsekā amukharā, atthacintāvasānugā.
৯২৭.
927.
‘‘ততো পাসাদিকং আসি, গতং ভুত্তং নিসেৰিতং।
‘‘Tato pāsādikaṃ āsi, gataṃ bhuttaṃ nisevitaṃ;
সিনিদ্ধা তেলধারাৰ, অহোসি ইরিযাপথো॥
Siniddhā teladhārāva, ahosi iriyāpatho.
৯২৮.
928.
‘‘সব্বাসৰপরিক্খীণা , মহাঝাযী মহাহিতা।
‘‘Sabbāsavaparikkhīṇā , mahājhāyī mahāhitā;
নিব্বুতা দানি তে থেরা, পরিত্তা দানি তাদিসা॥
Nibbutā dāni te therā, parittā dāni tādisā.
৯২৯.
929.
‘‘কুসলানঞ্চ ধম্মানং, পঞ্ঞায চ পরিক্খযা।
‘‘Kusalānañca dhammānaṃ, paññāya ca parikkhayā;
সব্বাকারৰরূপেতং, লুজ্জতে জিনসাসনং॥
Sabbākāravarūpetaṃ, lujjate jinasāsanaṃ.
৯৩০.
930.
‘‘পাপকানঞ্চ ধম্মানং, কিলেসানঞ্চ যো উতু।
‘‘Pāpakānañca dhammānaṃ, kilesānañca yo utu;
উপট্ঠিতা ৰিৰেকায, যে চ সদ্ধম্মসেসকা॥
Upaṭṭhitā vivekāya, ye ca saddhammasesakā.
৯৩১.
931.
‘‘তে কিলেসা পৰড্ঢন্তা, আৰিসন্তি বহুং জনং।
‘‘Te kilesā pavaḍḍhantā, āvisanti bahuṃ janaṃ;
কীল়ন্তি মঞ্ঞে বালেহি, উম্মত্তেহিৰ রক্খসা॥
Kīḷanti maññe bālehi, ummattehiva rakkhasā.
৯৩২.
932.
‘‘কিলেসেহাভিভূতা তে, তেন তেন ৰিধাৰিতা।
‘‘Kilesehābhibhūtā te, tena tena vidhāvitā;
নরা কিলেসৰত্থূসু, সসঙ্গামেৰ ঘোসিতে॥
Narā kilesavatthūsu, sasaṅgāmeva ghosite.
৯৩৩.
933.
‘‘পরিচ্চজিত্ৰা সদ্ধম্মং, অঞ্ঞমঞ্ঞেহি ভণ্ডরে।
‘‘Pariccajitvā saddhammaṃ, aññamaññehi bhaṇḍare;
দিট্ঠিগতানি অন্ৰেন্তা, ইদং সেয্যোতি মঞ্ঞরে॥
Diṭṭhigatāni anventā, idaṃ seyyoti maññare.
৯৩৪.
934.
‘‘ধনঞ্চ পুত্তং ভরিযঞ্চ, ছড্ডযিত্ৰান নিগ্গতা।
‘‘Dhanañca puttaṃ bhariyañca, chaḍḍayitvāna niggatā;
কটচ্ছুভিক্খহেতূপি, অকিচ্ছানি নিসেৰরে॥
Kaṭacchubhikkhahetūpi, akicchāni nisevare.
৯৩৫.
935.
‘‘উদরাৰদেহকং ভুত্ৰা, সযন্তুত্তানসেয্যকা।
‘‘Udarāvadehakaṃ bhutvā, sayantuttānaseyyakā;
কথা ৰড্ঢেন্তি পটিবুদ্ধা, যা কথা সত্থুগরহিতা॥
Kathā vaḍḍhenti paṭibuddhā, yā kathā satthugarahitā.
৯৩৬.
936.
‘‘সব্বকারুকসিপ্পানি, চিত্তিং কত্ৰান সিক্খরে।
‘‘Sabbakārukasippāni, cittiṃ katvāna sikkhare;
অৰূপসন্তা অজ্ঝত্তং, সামঞ্ঞত্থোতিঅচ্ছতি॥
Avūpasantā ajjhattaṃ, sāmaññatthotiacchati.
৯৩৭.
937.
‘‘মত্তিকং তেলচুণ্ণঞ্চ, উদকাসনভোজনং।
‘‘Mattikaṃ telacuṇṇañca, udakāsanabhojanaṃ;
গিহীনং উপনামেন্তি, আকঙ্খন্তা বহুত্তরং॥
Gihīnaṃ upanāmenti, ākaṅkhantā bahuttaraṃ.
৯৩৮.
938.
‘‘দন্তপোনং কপিত্থঞ্চ, পুপ্ফং খাদনিযানি চ।
‘‘Dantaponaṃ kapitthañca, pupphaṃ khādaniyāni ca;
পিণ্ডপাতে চ সম্পন্নে, অম্বে আমলকানি চ॥
Piṇḍapāte ca sampanne, ambe āmalakāni ca.
৯৩৯.
939.
‘‘ভেসজ্জেসু যথা ৰেজ্জা, কিচ্চাকিচ্চে যথা গিহী।
‘‘Bhesajjesu yathā vejjā, kiccākicce yathā gihī;
গণিকাৰ ৰিভূসাযং, ইস্সরে খত্তিযা যথা॥
Gaṇikāva vibhūsāyaṃ, issare khattiyā yathā.
৯৪০.
940.
‘‘নেকতিকা ৰঞ্চনিকা, কূটসক্খী অপাটুকা।
‘‘Nekatikā vañcanikā, kūṭasakkhī apāṭukā;
বহূহি পরিকপ্পেহি, আমিসং পরিভুঞ্জরে॥
Bahūhi parikappehi, āmisaṃ paribhuñjare.
৯৪১.
941.
‘‘লেসকপ্পে পরিযাযে, পরিকপ্পেনুধাৰিতা।
‘‘Lesakappe pariyāye, parikappenudhāvitā;
জীৰিকত্থা উপাযেন, সঙ্কড্ঢন্তি বহুং ধনং॥
Jīvikatthā upāyena, saṅkaḍḍhanti bahuṃ dhanaṃ.
৯৪২.
942.
‘‘উপট্ঠাপেন্তি পরিসং, কম্মতো নো চ ধম্মতো।
‘‘Upaṭṭhāpenti parisaṃ, kammato no ca dhammato;
ধম্মং পরেসং দেসেন্তি, লাভতো নো চ অত্থতো॥
Dhammaṃ paresaṃ desenti, lābhato no ca atthato.
৯৪৩.
943.
‘‘সঙ্ঘলাভস্স ভণ্ডন্তি, সঙ্ঘতো পরিবাহিরা।
‘‘Saṅghalābhassa bhaṇḍanti, saṅghato paribāhirā;
পরলাভোপজীৰন্তা, অহিরীকা ন লজ্জরে॥
Paralābhopajīvantā, ahirīkā na lajjare.
৯৪৪.
944.
‘‘নানুযুত্তা তথা একে, মুণ্ডা সঙ্ঘাটিপারুতা।
‘‘Nānuyuttā tathā eke, muṇḍā saṅghāṭipārutā;
সম্ভাৰনংযেৰিচ্ছন্তি, লাভসক্কারমুচ্ছিতা॥
Sambhāvanaṃyevicchanti, lābhasakkāramucchitā.
৯৪৫.
945.
‘‘এৰং নানপ্পযাতম্হি, ন দানি সুকরং তথা।
‘‘Evaṃ nānappayātamhi, na dāni sukaraṃ tathā;
অফুসিতং ৰা ফুসিতুং, ফুসিতং ৰানুরক্খিতুং॥
Aphusitaṃ vā phusituṃ, phusitaṃ vānurakkhituṃ.
৯৪৬.
946.
‘‘যথা কণ্টকট্ঠানম্হি, চরেয্য অনুপাহনো।
‘‘Yathā kaṇṭakaṭṭhānamhi, careyya anupāhano;
সতিং উপট্ঠপেত্ৰান, এৰং গামে মুনী চরে॥
Satiṃ upaṭṭhapetvāna, evaṃ gāme munī care.
৯৪৭.
947.
‘‘সরিত্ৰা পুব্বকে যোগী, তেসং ৰত্তমনুস্সরং।
‘‘Saritvā pubbake yogī, tesaṃ vattamanussaraṃ;
কিঞ্চাপি পচ্ছিমো কালো, ফুসেয্য অমতং পদং॥
Kiñcāpi pacchimo kālo, phuseyya amataṃ padaṃ.
৯৪৮.
948.
‘‘ইদং ৰত্ৰা সালৰনে, সমণো ভাৰিতিন্দ্রিযো।
‘‘Idaṃ vatvā sālavane, samaṇo bhāvitindriyo;
ব্রাহ্মণো পরিনিব্বাযী, ইসি খীণপুনব্ভৰো’’তি॥ –
Brāhmaṇo parinibbāyī, isi khīṇapunabbhavo’’ti. –
ইমা গাথা থেরেনেৰ ভাসিতা।
Imā gāthā thereneva bhāsitā.
তত্থ ইরিযং আসি ভিক্খূনন্তি পুরিসুত্তমে লোকনাথম্হি সম্মাসম্বুদ্ধে তিট্ঠন্তে ধরন্তে এতরহি পটিপত্তিভাৰতো। অঞ্ঞথা অঞ্ঞেন পকারেন ভিক্খূনং ইরিযং চরিতং অহোসি যথানুসিট্ঠং পটিপত্তিভাৰতো। অঞ্ঞথা দানি দিস্সতীতি ইদানি পন ততো অঞ্ঞথা ভিক্খূনং ইরিযং দিস্সতি অযাথাৰপটিপত্তিভাৰতোতি অধিপ্পাযো ।
Tattha iriyaṃ āsi bhikkhūnanti purisuttame lokanāthamhi sammāsambuddhe tiṭṭhante dharante etarahi paṭipattibhāvato. Aññathā aññena pakārena bhikkhūnaṃ iriyaṃ caritaṃ ahosi yathānusiṭṭhaṃ paṭipattibhāvato. Aññathā dāni dissatīti idāni pana tato aññathā bhikkhūnaṃ iriyaṃ dissati ayāthāvapaṭipattibhāvatoti adhippāyo .
ইদানি সত্থরি ধরন্তে যেনাকারেন ভিক্খূনং পটিপত্তি অহোসি, তং তাৰ দস্সেতুং ‘‘সীতৰাতপরিত্তাণ’’ন্তিআদি ৰুত্তং। তত্থ মত্তট্ঠিযন্তি তং মত্তং পযোজনং। যাৰদেৰ সীতৰাতপরিত্তাণং, যাৰদেৰ হিরীকোপীনপটিচ্ছাদনং কত্ৰা চীৰরং পরিভুঞ্জিংসু। কথং? সন্তুট্ঠা ইতরীতরে যস্মিং তস্মিং হীনে পণীতে ৰা যথালদ্ধে পচ্চযে সন্তোসং আপন্না।
Idāni satthari dharante yenākārena bhikkhūnaṃ paṭipatti ahosi, taṃ tāva dassetuṃ ‘‘sītavātaparittāṇa’’ntiādi vuttaṃ. Tattha mattaṭṭhiyanti taṃ mattaṃ payojanaṃ. Yāvadeva sītavātaparittāṇaṃ, yāvadeva hirīkopīnapaṭicchādanaṃ katvā cīvaraṃ paribhuñjiṃsu. Kathaṃ? Santuṭṭhā itarītare yasmiṃ tasmiṃ hīne paṇīte vā yathāladdhe paccaye santosaṃ āpannā.
পণীতন্তি উল়ারং সপ্পিআদিনা সংসট্ঠং, তদভাৰেন লূখং। অপ্পন্তি, চতুপঞ্চালোপমত্তম্পি। বহুং যাপনত্থং অভুঞ্জিংসূতি পণীতং বহুং ভুঞ্জন্তাপি যাপনমত্তমেৰ আহারং ভুঞ্জিংসু। ততো এৰ অগিদ্ধা গেধং অনাপন্না। নাধিমুচ্ছিতা ন অজ্ঝোসিতা অক্খব্ভঞ্জনং ৰিয সাকটিকা, ৰণলেপনং ৰিয ৰণিনো অভুঞ্জিংসু।
Paṇītanti uḷāraṃ sappiādinā saṃsaṭṭhaṃ, tadabhāvena lūkhaṃ. Appanti, catupañcālopamattampi. Bahuṃ yāpanatthaṃ abhuñjiṃsūti paṇītaṃ bahuṃ bhuñjantāpi yāpanamattameva āhāraṃ bhuñjiṃsu. Tato eva agiddhā gedhaṃ anāpannā. Nādhimucchitā na ajjhositā akkhabbhañjanaṃ viya sākaṭikā, vaṇalepanaṃ viya vaṇino abhuñjiṃsu.
জীৰিতানং পরিক্খারে, ভেসজ্জে অথ পচ্চযেপি জীৰিতানং পৰত্তিযা পরিক্খারভূতে ভেসজ্জসঙ্খাতে পচ্চযে গিলানপচ্চযে। যথা তেতি যথা তে পুরিমকা ভিক্খূ আসৰক্খযে উস্সুকা যুত্তা আসুং, তথা তে রোগাভিভূতাপি গিলানপচ্চযে বাল়্হং অতিৰিয উস্সুকা নাহেসুন্তি অত্থো।
Jīvitānaṃparikkhāre, bhesajje atha paccayepi jīvitānaṃ pavattiyā parikkhārabhūte bhesajjasaṅkhāte paccaye gilānapaccaye. Yathā teti yathā te purimakā bhikkhū āsavakkhaye ussukā yuttā āsuṃ, tathā te rogābhibhūtāpi gilānapaccaye bāḷhaṃ ativiya ussukā nāhesunti attho.
তপ্পরাযণাতি ৰিৰেকপরাযণা ৰিৰেকপোণা। এৰং চতূহি গাথাহি চতুপচ্চযসন্তোসং ভাৰনাভিরতিঞ্চ দস্সেন্তেন তেসং অরিযৰংসপটিপদা দস্সিতা।
Tapparāyaṇāti vivekaparāyaṇā vivekapoṇā. Evaṃ catūhi gāthāhi catupaccayasantosaṃ bhāvanābhiratiñca dassentena tesaṃ ariyavaṃsapaṭipadā dassitā.
নীচাতি ‘‘মযং পংসুকূলিকা পিণ্ডপাতিকা’’তি অত্তুক্কংসনপরৰম্ভনানি অকত্ৰা নীচৰুত্তিনো, নিৰাতৰুত্তিনোতি অত্থো। নিৰিট্ঠাতি সাসনে নিৰিট্ঠসদ্ধা। সুভরাতি অপ্পিচ্ছতাদিভাৰেন সুপোসা। মুদূতি ৰত্তপটিপত্তিযং সকলে চ ব্রহ্মচরিযে মুদূ, সুপরিকম্মকতসুৰণ্ণং ৰিয ৰিনিযোগক্খমা। মুদূতি ৰা অভাকুটিকা উত্তানমুখা পুপ্ফিতমুখেন পটিসন্থারৰুত্তিনো, সুতিত্থং ৰিয সুখাৰহাতি ৰুত্তং হোতি। অথদ্ধমানসাতি অকথিনচিত্তা তেন সুব্বচভাৰমাহ। অব্যাসেকাতি সতিৰিপ্পৰাসাভাৰতো কিলেসব্যাসেকরহিতা, অন্তরন্তরা তণ্হাদিট্ঠিমানাদীহি অৰোকিণ্ণাতি অত্থো। অমুখরাতি ন মুখরা, ন মুখেন খরা ৰচীপাগব্ভিযরহিতাতি ৰা অত্থো। অত্থচিন্তাৰসানুগাতি হিতচিন্তাৰসানুগাহিতচিন্তাৰসিকা, অত্তনো পরেসঞ্চ হিতচিন্তমেৰ অনুপরিৰত্তনকা।
Nīcāti ‘‘mayaṃ paṃsukūlikā piṇḍapātikā’’ti attukkaṃsanaparavambhanāni akatvā nīcavuttino, nivātavuttinoti attho. Niviṭṭhāti sāsane niviṭṭhasaddhā. Subharāti appicchatādibhāvena suposā. Mudūti vattapaṭipattiyaṃ sakale ca brahmacariye mudū, suparikammakatasuvaṇṇaṃ viya viniyogakkhamā. Mudūti vā abhākuṭikā uttānamukhā pupphitamukhena paṭisanthāravuttino, sutitthaṃ viya sukhāvahāti vuttaṃ hoti. Athaddhamānasāti akathinacittā tena subbacabhāvamāha. Abyāsekāti sativippavāsābhāvato kilesabyāsekarahitā, antarantarā taṇhādiṭṭhimānādīhi avokiṇṇāti attho. Amukharāti na mukharā, na mukhena kharā vacīpāgabbhiyarahitāti vā attho. Atthacintāvasānugāti hitacintāvasānugāhitacintāvasikā, attano paresañca hitacintameva anuparivattanakā.
ততোতি তস্মা নীচৰুত্তাদিহেতু। পাসাদিকন্তি পসাদজনিকং পটিপত্তিং পস্সন্তানং সুণন্তানঞ্চ পসাদাৰহং। গতন্তি অভিক্কন্তপটিক্কন্তপরিৰত্তনাদিগমনং। গতন্তি ৰা কাযৰাচাপৰত্তি। ভুত্তন্তি চতুপচ্চযপরিভোগো। নিসেৰিতন্তি গোচরনিসেৰনং। সিনিদ্ধা তেলধারাৰাতি যথা অনিৰত্তিতা কুসলজনাভিসিঞ্চিতা সৰন্তী তেলধারা অৰিচ্ছিন্না সিনিদ্ধা মট্ঠা দস্সনীযা পাসাদিকা হোতি, এৰং তেসং আকপ্পসম্পন্নানং ইরিযাপথো অচ্ছিদ্দো সণ্হো মট্ঠো দস্সনীযো পাসাদিকো অহোসি।
Tatoti tasmā nīcavuttādihetu. Pāsādikanti pasādajanikaṃ paṭipattiṃ passantānaṃ suṇantānañca pasādāvahaṃ. Gatanti abhikkantapaṭikkantaparivattanādigamanaṃ. Gatanti vā kāyavācāpavatti. Bhuttanti catupaccayaparibhogo. Nisevitanti gocaranisevanaṃ. Siniddhāteladhārāvāti yathā anivattitā kusalajanābhisiñcitā savantī teladhārā avicchinnā siniddhā maṭṭhā dassanīyā pāsādikā hoti, evaṃ tesaṃ ākappasampannānaṃ iriyāpatho acchiddo saṇho maṭṭho dassanīyo pāsādiko ahosi.
মহাঝাযীতি মহন্তেহি ঝানেহি ঝাযনসীলা, মহন্তং ৰা নিব্বানং ঝাযন্তীতি মহাঝাযী। ততো এৰ মহাহিতা, মহন্তেহি হিতেহি সমন্নাগতাতি অত্থো। তে থেরাতি তে যথাৰুত্তপ্পকারা পটিপত্তিপরাযণা থেরা ইদানি পরিনিব্বুতাতি অত্থো। পরিত্তা দানি তাদিসাতি ইদানি পচ্ছিমে কালে তাদিসা তথারূপা থেরা পরিত্তা অপ্পকা কতিপযা এৰাতি ৰুত্তং হোতি।
Mahājhāyīti mahantehi jhānehi jhāyanasīlā, mahantaṃ vā nibbānaṃ jhāyantīti mahājhāyī. Tato eva mahāhitā, mahantehi hitehi samannāgatāti attho. Te therāti te yathāvuttappakārā paṭipattiparāyaṇā therā idāni parinibbutāti attho. Parittā dāni tādisāti idāni pacchime kāle tādisā tathārūpā therā parittā appakā katipayā evāti vuttaṃ hoti.
কুসলানঞ্চ ধম্মানন্তি ৰিৰট্টস্স উপনিস্সযভূতানং ৰিমোক্খসম্ভারানং অনৰজ্জধম্মানং। পঞ্ঞায চাতি তথারূপায পঞ্ঞায চ। পরিক্খযাতি অভাৰতো অনুপ্পত্তিতো। কামঞ্চেত্থ পঞ্ঞাপি সিযা অনৰজ্জধম্মা, বহুকারভাৰদস্সনত্থং পনস্সা ৰিসুং গহণং যথা পুঞ্ঞঞাণসম্ভারাতি। সব্বাকারৰরূপেতন্তি আদিকল্যাণতাদীহি সব্বেহি আকারৰরেহি পকারৰিসেসেহি উপেতং যুত্তং জিনস্স ভগৰতো সাসনং লুজ্জতি ৰিনস্সতীতি অত্থো।
Kusalānañcadhammānanti vivaṭṭassa upanissayabhūtānaṃ vimokkhasambhārānaṃ anavajjadhammānaṃ. Paññāya cāti tathārūpāya paññāya ca. Parikkhayāti abhāvato anuppattito. Kāmañcettha paññāpi siyā anavajjadhammā, bahukārabhāvadassanatthaṃ panassā visuṃ gahaṇaṃ yathā puññañāṇasambhārāti. Sabbākāravarūpetanti ādikalyāṇatādīhi sabbehi ākāravarehi pakāravisesehi upetaṃ yuttaṃ jinassa bhagavato sāsanaṃ lujjati vinassatīti attho.
পাপকানঞ্চ ধম্মানং, কিলেসানঞ্চ যো উতূতি কাযদুচ্চরিতাদীনং পাপধম্মানং লোভাদীনঞ্চ কিলেসানং যো উতু যো কালো, সো অযং ৰত্ততীতি ৰচনসেসো। উপট্ঠিতা ৰিৰেকায, যে চ সদ্ধম্মসেসকাতি যে পন এৰরূপে কালে কাযচিত্তউপধিৰিৰেকত্থায উপট্ঠিতা আরদ্ধৰীরিযা, তে চ সেসপটিপত্তিসদ্ধম্মকা হোন্তি। অযঞ্হেত্থ অধিপ্পাযো – সুৰিসুদ্ধসীলাচারাপি সমানা ইদানি একচ্চে ভিক্খূ ইরিযাপথসণ্ঠাপনং, সমথৰিপস্সনাভাৰনাৰিধানং, মহাপলিবোধূপচ্ছেদো, খুদ্দকপলিবোধূপচ্ছেদোতি এৰমাদিপুব্বকিচ্চং সম্পাদেত্ৰা ভাৰনমনুযুঞ্জন্তি। তে সেসপটিপত্তিসদ্ধম্মকা, পটিপত্তিং মত্থকং পাপেতুং ন সক্কোন্তীতি।
Pāpakānañca dhammānaṃ, kilesānañca yo utūti kāyaduccaritādīnaṃ pāpadhammānaṃ lobhādīnañca kilesānaṃ yo utu yo kālo, so ayaṃ vattatīti vacanaseso. Upaṭṭhitā vivekāya, ye ca saddhammasesakāti ye pana evarūpe kāle kāyacittaupadhivivekatthāya upaṭṭhitā āraddhavīriyā, te ca sesapaṭipattisaddhammakā honti. Ayañhettha adhippāyo – suvisuddhasīlācārāpi samānā idāni ekacce bhikkhū iriyāpathasaṇṭhāpanaṃ, samathavipassanābhāvanāvidhānaṃ, mahāpalibodhūpacchedo, khuddakapalibodhūpacchedoti evamādipubbakiccaṃ sampādetvā bhāvanamanuyuñjanti. Te sesapaṭipattisaddhammakā, paṭipattiṃ matthakaṃ pāpetuṃ na sakkontīti.
তে কিলেসা পৰড্ঢন্তাতি যে ভগৰতো ওরসপুত্তেহি চ তদা পরিক্খযং পরিযাদানং গমিতা কিলেসা, তে এতরহি লদ্ধোকাসা ভিক্খূসু ৰুদ্ধিং ৰিরূল়্হিং ৰেপুল্লং আপজ্জন্তা। আৰিসন্তি বহুং জনন্তি কল্যাণমিত্তরহিতং অযোনিসোমনসিকারবহুলং অন্ধবালজনং অভিভৰিত্ৰা অৰসং করোন্তা আৰিসন্তি সন্তানং অনুপৰিসন্তি। এৰংভূতা চ তে কীল়ন্তি মঞ্ঞে বালেহি, উম্মত্তেহিৰ রক্খসা, যথা নাম কেল়িসীলা রক্খসা ভিসক্করহিতে উম্মত্তে আৰিসিত্ৰা তে অনযব্যসনং আপাদেন্তা তেহি কীল়ন্তি, এৰং তে কিলেসা সম্মাসম্বুদ্ধভিসক্করহিতে অন্ধবালে ভিক্খূ আৰিসিত্ৰা তেসং দিট্ঠধম্মিকাদিভেদং অনত্থং উপ্পাদেন্তা তেহি সদ্ধিং কীল়ন্তি মঞ্ঞে, কীল়ন্তা ৰিয হোন্তীতি অত্থো।
Te kilesā pavaḍḍhantāti ye bhagavato orasaputtehi ca tadā parikkhayaṃ pariyādānaṃ gamitā kilesā, te etarahi laddhokāsā bhikkhūsu vuddhiṃ virūḷhiṃ vepullaṃ āpajjantā. Āvisanti bahuṃ jananti kalyāṇamittarahitaṃ ayonisomanasikārabahulaṃ andhabālajanaṃ abhibhavitvā avasaṃ karontā āvisanti santānaṃ anupavisanti. Evaṃbhūtā ca te kīḷanti maññe bālehi, ummattehiva rakkhasā, yathā nāma keḷisīlā rakkhasā bhisakkarahite ummatte āvisitvā te anayabyasanaṃ āpādentā tehi kīḷanti, evaṃ te kilesā sammāsambuddhabhisakkarahite andhabāle bhikkhū āvisitvā tesaṃ diṭṭhadhammikādibhedaṃ anatthaṃ uppādentā tehi saddhiṃ kīḷanti maññe, kīḷantā viya hontīti attho.
তেন তেনাতি তেন তেন আরম্মণভাগেন। ৰিধাৰিতাতি ৰিরূপং ধাৰিতা অসারুপ্পৰসেন পটিপজ্জন্তা। কিলেসৰত্থূসূতি পঠমং উপ্পন্নং কিলেসা পচ্ছা উপ্পজ্জনকানং কারণভাৰতো কিলেসাৰ কিলেসৰত্থূনি, তেসু কিলেসৰত্থূসু সমূহিতেসু। সসঙ্গামেৰ ঘোসিতেতি হিরঞ্ঞসুৰণ্ণমণিমুত্তাদিকং ধনং ৰিপ্পকিরিত্ৰা ‘‘যং যং হিরঞ্ঞসুৰণ্ণাদি যস্স যস্স হত্থগতং, তং তং তস্স তস্সেৰ হোতূ’’তি এৰং কামঘোসনা সসঙ্গামঘোসনা নাম। তত্থাযমত্থো – কিলেসৰত্থূসু ‘‘যো যো কিলেসো যং যং সত্তং গণ্হাতি অভিভৰতি, সো সো তস্স তস্স হোতূ’’তি কিলেসসেনাপতিনা মারেন সসঙ্গামে ঘোসিতে ৰিয। তেহি তেহি কিলেসেহি অভিভূতা তে বালপুথুজ্জনা তেন তেন আরম্মণভাগেন ৰিধাৰিতা ৰোসিতাতি।
Tenatenāti tena tena ārammaṇabhāgena. Vidhāvitāti virūpaṃ dhāvitā asāruppavasena paṭipajjantā. Kilesavatthūsūti paṭhamaṃ uppannaṃ kilesā pacchā uppajjanakānaṃ kāraṇabhāvato kilesāva kilesavatthūni, tesu kilesavatthūsu samūhitesu. Sasaṅgāmeva ghositeti hiraññasuvaṇṇamaṇimuttādikaṃ dhanaṃ vippakiritvā ‘‘yaṃ yaṃ hiraññasuvaṇṇādi yassa yassa hatthagataṃ, taṃ taṃ tassa tasseva hotū’’ti evaṃ kāmaghosanā sasaṅgāmaghosanā nāma. Tatthāyamattho – kilesavatthūsu ‘‘yo yo kileso yaṃ yaṃ sattaṃ gaṇhāti abhibhavati, so so tassa tassa hotū’’ti kilesasenāpatinā mārena sasaṅgāme ghosite viya. Tehi tehi kilesehi abhibhūtā te bālaputhujjanā tena tena ārammaṇabhāgena vidhāvitā vositāti.
তে এৰং ৰিধাৰিতা কিং করোন্তীতি আহ ‘‘পরিচ্চজিত্ৰা সদ্ধম্মং, অঞ্ঞমঞ্ঞেহি ভণ্ডরে’’তি। তস্সত্থো – পটিপত্তিসদ্ধম্মং ছড্ডেত্ৰা আমিসকিঞ্জক্খহেতু অঞ্ঞমঞ্ঞেহি ভণ্ডরে কলহং করোন্তীতি। দিট্ঠিগতানীতি ‘‘ৰিঞ্ঞাণমত্তমেৰ অত্থি, নত্থেৰ রূপধম্মা’’তি, ‘‘যথা পুগ্গলো নাম পরমত্থতো নত্থি, এৰং সভাৰধম্মাপি পরমত্থতো নত্থি, ৰোহারমত্তমেৰা’’তি চ এৰমাদীনি দিট্ঠিগতানি মিচ্ছাগাহে অন্ৰেন্তা অনুগচ্ছন্তা ইদং সেয্যো ইদমেৰ সেট্ঠং, অঞ্ঞং মিচ্ছাতি মঞ্ঞন্তি।
Te evaṃ vidhāvitā kiṃ karontīti āha ‘‘pariccajitvā saddhammaṃ, aññamaññehi bhaṇḍare’’ti. Tassattho – paṭipattisaddhammaṃ chaḍḍetvā āmisakiñjakkhahetu aññamaññehi bhaṇḍare kalahaṃ karontīti. Diṭṭhigatānīti ‘‘viññāṇamattameva atthi, nattheva rūpadhammā’’ti, ‘‘yathā puggalo nāma paramatthato natthi, evaṃ sabhāvadhammāpi paramatthato natthi, vohāramattamevā’’ti ca evamādīni diṭṭhigatāni micchāgāhe anventā anugacchantā idaṃ seyyo idameva seṭṭhaṃ, aññaṃ micchāti maññanti.
নিগ্গতাতি গেহতো নিক্খন্তা। কটচ্ছুভিক্খহেতূপীতি কটচ্ছুমত্তভিক্খানিমিত্তম্পি। তং দদন্তস্স গহট্ঠস্স অননুলোমিকসংসগ্গৰসেন অকিচ্চানি পব্বজিতেন অকত্তব্বানি কম্মানি নিসেৰরে করোন্তি।
Niggatāti gehato nikkhantā. Kaṭacchubhikkhahetūpīti kaṭacchumattabhikkhānimittampi. Taṃ dadantassa gahaṭṭhassa ananulomikasaṃsaggavasena akiccāni pabbajitena akattabbāni kammāni nisevare karonti.
উদরাৰদেহকং ভুত্ৰাতি ‘‘ঊনূদরো মিতাহারো’’তি (থেরগা॰ ৯৮২; মি॰ প॰ ৬.৫.১০) ৰুত্তৰচনং অচিন্তেত্ৰা উদরপূরং ভুঞ্জিত্ৰা। সযন্তুত্তানসেয্যকাতি ‘‘দক্খিণেন পস্সেন সীহসেয্যং কপ্পেতি পাদে পাদং অচ্চাধায সতো সম্পজানো’’তি (অ॰ নি॰ ৮.৯; ৰিভ॰ ৫১৯) ৰুত্তৰিধানং অননুস্সরিত্ৰা উত্তানসেয্যকা সযন্তি। যা কথা সত্থুগরহিতাতি রাজকথাদিতিরচ্ছানকথং সন্ধায ৰদতি।
Udarāvadehakaṃ bhutvāti ‘‘ūnūdaro mitāhāro’’ti (theragā. 982; mi. pa. 6.5.10) vuttavacanaṃ acintetvā udarapūraṃ bhuñjitvā. Sayantuttānaseyyakāti ‘‘dakkhiṇena passena sīhaseyyaṃ kappeti pāde pādaṃ accādhāya sato sampajāno’’ti (a. ni. 8.9; vibha. 519) vuttavidhānaṃ ananussaritvā uttānaseyyakā sayanti. Yā kathā satthugarahitāti rājakathāditiracchānakathaṃ sandhāya vadati.
সব্বকারুকসিপ্পানীতি সব্বেহি ৰেস্সাদীহি কারুকেহি কত্তব্বানি ভত্ততালৰণ্টকরণাদীনি হত্থসিপ্পানি। চিত্তিং কত্ৰানাতি সক্কচ্চং সাদরং কত্ৰা। অৰূপসন্তা অজ্ঝত্তন্তি কিলেসৰূপসমাভাৰতো গদ্দুহনমত্তম্পি সমাধানাভাৰতো চ অজ্ঝত্তং অৰূপসন্তা, অৰূপসন্তচিত্তাতি অত্থো। সামঞ্ঞত্থোতি সমণধম্মো। অতিঅচ্ছতীতি তেসং আজীৰকিচ্চপসুততায একদেসম্পি অফুসনতো ৰিসুংযেৰ নিসীদতি, অনল্লীযতীতি ৰুত্তং হোতি।
Sabbakārukasippānīti sabbehi vessādīhi kārukehi kattabbāni bhattatālavaṇṭakaraṇādīni hatthasippāni. Cittiṃ katvānāti sakkaccaṃ sādaraṃ katvā. Avūpasantā ajjhattanti kilesavūpasamābhāvato gadduhanamattampi samādhānābhāvato ca ajjhattaṃ avūpasantā, avūpasantacittāti attho. Sāmaññatthoti samaṇadhammo. Atiacchatīti tesaṃ ājīvakiccapasutatāya ekadesampi aphusanato visuṃyeva nisīdati, anallīyatīti vuttaṃ hoti.
মত্তিকন্তি পাকতিকং ৰা পঞ্চৰণ্ণং ৰা গিহীনং ৰিনিযোগক্খমং মত্তিকং। তেলচুণ্ণঞ্চাতি পাকতিকং, অভিসঙ্খতং ৰা তেলঞ্চ চুণ্ণঞ্চ। উদকাসনভোজনন্তি উদকঞ্চ আসনঞ্চ ভোজনঞ্চ। আকঙ্খন্তা বহুত্তরন্তি বহুং পিণ্ডপাতাদিউত্তরুত্তরং আকঙ্খন্তা ‘‘অম্হেহি মত্তিকাদীসু দিন্নেসু মনুস্সা দল়্হভত্তিকা হুত্ৰা বহুং উত্তরুত্তরং চতুপচ্চযজাতং দস্সন্তী’’তি অধিপ্পাযেন গিহীনং উপনামেন্তীতি অত্থো।
Mattikanti pākatikaṃ vā pañcavaṇṇaṃ vā gihīnaṃ viniyogakkhamaṃ mattikaṃ. Telacuṇṇañcāti pākatikaṃ, abhisaṅkhataṃ vā telañca cuṇṇañca. Udakāsanabhojananti udakañca āsanañca bhojanañca. Ākaṅkhantā bahuttaranti bahuṃ piṇḍapātādiuttaruttaraṃ ākaṅkhantā ‘‘amhehi mattikādīsu dinnesu manussā daḷhabhattikā hutvā bahuṃ uttaruttaraṃ catupaccayajātaṃ dassantī’’ti adhippāyena gihīnaṃ upanāmentīti attho.
দন্তে পুনন্তি সোধেন্তি এতেনাতি দন্তপোনং, দন্তকট্ঠং। কপিত্থন্তি কপিত্থফলং। পুপ্ফন্তি সুমনচম্পকাদিপুপ্ফং। খাদনীযানীতি অট্ঠারসৰিধেপি খজ্জকৰিসেসে। পিণ্ডপাতে চ সম্পন্নেতি ৰণ্ণাদিসম্পযুত্তে ওদনৰিসেসে। ‘‘অম্বে আমলকানি চা’’তি চ-সদ্দেন মাতুলুঙ্গতালনাল়িকেরাদিফলানি অৰুত্তানি সঙ্গণ্হাতি। সব্বত্থ গিহীনং উপনামেন্তি আকঙ্খন্তা বহুত্তরন্তি যোজনা।
Dante punanti sodhenti etenāti dantaponaṃ, dantakaṭṭhaṃ. Kapitthanti kapitthaphalaṃ. Pupphanti sumanacampakādipupphaṃ. Khādanīyānīti aṭṭhārasavidhepi khajjakavisese. Piṇḍapāte ca sampanneti vaṇṇādisampayutte odanavisese. ‘‘Ambe āmalakāni cā’’ti ca-saddena mātuluṅgatālanāḷikerādiphalāni avuttāni saṅgaṇhāti. Sabbattha gihīnaṃ upanāmenti ākaṅkhantā bahuttaranti yojanā.
ভেসজ্জেসু যথা ৰেজ্জাতি গিহীনং ভেসজ্জপ্পযোগেসু যথা ৰেজ্জা, তথা ভিক্খূ পটিপজ্জন্তীতি অধিপ্পাযো। কিচ্চাকিচ্চে যথা গিহীতি গহট্ঠানং খুদ্দকে চেৰ মহন্তে চ কিচ্চে কত্তব্বে গিহী ৰিয। গণিকাৰ ৰিভূসাযন্তি অত্তনো সরীরস্স ৰিভূসনে রূপূপজীৰিনিযো ৰিয। ইস্সরে খত্তিযা যথাতি ইস্সরে ইস্সরিযপৰত্তনে যথা খত্তিযা, এৰং কুলপতী হুত্ৰা ৰত্তন্তীতি অত্থো।
Bhesajjesu yathā vejjāti gihīnaṃ bhesajjappayogesu yathā vejjā, tathā bhikkhū paṭipajjantīti adhippāyo. Kiccākicce yathā gihīti gahaṭṭhānaṃ khuddake ceva mahante ca kicce kattabbe gihī viya. Gaṇikāva vibhūsāyanti attano sarīrassa vibhūsane rūpūpajīviniyo viya. Issare khattiyā yathāti issare issariyapavattane yathā khattiyā, evaṃ kulapatī hutvā vattantīti attho.
নেকতিকাতি নিকতিযং নিযুত্তা, অমণিংযেৰ মণিং, অসুৰণ্ণংযেৰ সুৰণ্ণং কত্ৰা পটিরূপসাচিযোগনিরতা। ৰঞ্চনিকাতি কূটমানাদীহি ৰিপ্পলম্বকা। কূটসক্খীতি অযাথাৰসক্খিনো। অপাটুকাতি ৰামকা, অসংযতৰুত্তীতি অত্থো। বহূহি পরিকপ্পেহীতি যথাৰুত্তেহি অঞ্ঞেহি চ বহূহি মিচ্ছাজীৰপ্পকারেহি।
Nekatikāti nikatiyaṃ niyuttā, amaṇiṃyeva maṇiṃ, asuvaṇṇaṃyeva suvaṇṇaṃ katvā paṭirūpasāciyoganiratā. Vañcanikāti kūṭamānādīhi vippalambakā. Kūṭasakkhīti ayāthāvasakkhino. Apāṭukāti vāmakā, asaṃyatavuttīti attho. Bahūhi parikappehīti yathāvuttehi aññehi ca bahūhi micchājīvappakārehi.
লেসকপ্পেতি কপ্পিযলেসে কপ্পিযপটিরূপে। পরিযাযেতি, পচ্চযেসু পরিযাযস্স যোগে। পরিকপ্পেতি ৰড্ঢিআদিৰিকপ্পনে, সব্বত্থ ৰিসযে ভুম্মং। অনুধাৰিতাতি মহিচ্ছতাদীহি পাপধম্মেহি অনুধাৰিতা ৰোসিতা। জীৰিকত্থা জীৰিকপ্পযোজনা আজীৰহেতুকা। উপাযেনাতি পরিকথাদিনা উপাযেন পচ্চযুপ্পাদননযেন। সঙ্কড্ঢন্তীতি সংহরন্তি।
Lesakappeti kappiyalese kappiyapaṭirūpe. Pariyāyeti, paccayesu pariyāyassa yoge. Parikappeti vaḍḍhiādivikappane, sabbattha visaye bhummaṃ. Anudhāvitāti mahicchatādīhi pāpadhammehi anudhāvitā vositā. Jīvikatthā jīvikappayojanā ājīvahetukā. Upāyenāti parikathādinā upāyena paccayuppādananayena. Saṅkaḍḍhantīti saṃharanti.
উপট্ঠাপেন্তি পরিসন্তি পরিসায অত্তানং উপট্ঠপেন্তি, যথা পরিসা অত্তানং উপট্ঠপেন্তি, এৰং পরিসং সঙ্গণ্হন্তীতি অত্থো। কম্মতোতি কম্মহেতু। তে হি অত্তনো কত্তব্বৰেয্যাৰচ্চনিমিত্তং উপট্ঠপেন্তি। নো চ ধম্মতোতি ধম্মনিমিত্তং নো চ উপট্ঠপেন্তি। যো সত্থারা উল্লুম্পনসভাৰসণ্ঠিতায পরিসায সঙ্গহো অনুঞ্ঞাতো, তেন ন সঙ্গণ্হন্তীতি অত্থো। লাভতোতি লাভহেতু, ‘‘অয্যো বহুস্সুতো, ভাণকো, ‘ধম্মকথিকো’তি এৰং সম্ভাৰেন্তো মহাজনো ময্হং লাভসক্কারে উপনযিস্সতী’’তি ইচ্ছাচারে ঠত্ৰা লাভনিমিত্তং পরেসং ধম্মং দেসেন্তি। নো চ অত্থতোতি যো সো ৰিমুত্তাযতনসীসে ঠত্ৰা সদ্ধম্মং কথেন্তেন পত্তব্বো অত্থো, ন তংদিট্ঠধম্মিকাদিভেদহিতনিমিত্তং ধম্মং দেসেন্তীতি অত্থো।
Upaṭṭhāpenti parisanti parisāya attānaṃ upaṭṭhapenti, yathā parisā attānaṃ upaṭṭhapenti, evaṃ parisaṃ saṅgaṇhantīti attho. Kammatoti kammahetu. Te hi attano kattabbaveyyāvaccanimittaṃ upaṭṭhapenti. No ca dhammatoti dhammanimittaṃ no ca upaṭṭhapenti. Yo satthārā ullumpanasabhāvasaṇṭhitāya parisāya saṅgaho anuññāto, tena na saṅgaṇhantīti attho. Lābhatoti lābhahetu, ‘‘ayyo bahussuto, bhāṇako, ‘dhammakathiko’ti evaṃ sambhāvento mahājano mayhaṃ lābhasakkāre upanayissatī’’ti icchācāre ṭhatvā lābhanimittaṃ paresaṃ dhammaṃ desenti. No ca atthatoti yo so vimuttāyatanasīse ṭhatvā saddhammaṃ kathentena pattabbo attho, na taṃdiṭṭhadhammikādibhedahitanimittaṃ dhammaṃ desentīti attho.
সঙ্ঘলাভস্স ভণ্ডন্তীতি সঙ্ঘলাভহেতু ভণ্ডন্তি ‘‘ময্হং পাপুণাতি, ন তুয্হ’’ন্তিআদিনা কলহং করোন্তি। সঙ্ঘতো পরিবাহিরাতি, অরিযসঙ্ঘতো বহিভূতা অরিযসঙ্ঘে তদভাৰতো। পরলাভোপজীৰন্তাতি সাসনে লাভস্স অন্ধবালপুথুজ্জনেহি পরে সীলাদিগুণসম্পন্নে সেক্খে উদ্দিস্স উপ্পন্নত্তা তং পরলাভং, পরতো ৰা দাযকতো লদ্ধব্বলাভং উপজীৰন্তা ভণ্ডনকারকা ভিক্খূ পাপজিগুচ্ছায অভাৰতো অহিরিকা সমানা চ ‘‘মযং পরলাভং ভুঞ্জাম, পরপটিবদ্ধজীৰিকা’’তিপি ন লজ্জরে ন হিরীযন্তি।
Saṅghalābhassa bhaṇḍantīti saṅghalābhahetu bhaṇḍanti ‘‘mayhaṃ pāpuṇāti, na tuyha’’ntiādinā kalahaṃ karonti. Saṅghato paribāhirāti, ariyasaṅghato bahibhūtā ariyasaṅghe tadabhāvato. Paralābhopajīvantāti sāsane lābhassa andhabālaputhujjanehi pare sīlādiguṇasampanne sekkhe uddissa uppannattā taṃ paralābhaṃ, parato vā dāyakato laddhabbalābhaṃ upajīvantā bhaṇḍanakārakā bhikkhū pāpajigucchāya abhāvato ahirikā samānā ca ‘‘mayaṃ paralābhaṃ bhuñjāma, parapaṭibaddhajīvikā’’tipi na lajjare na hirīyanti.
নানুযুত্তাতি সমণকরণেহি ধম্মেহি অননুযুত্তা। তথাতি যথা পুব্বে ৰুত্তা বন্ধনকারকাদযো, তথা। একেতি একচ্চে। মুণ্ডা সঙ্ঘাটিপারুতাতি কেৰলং মুণ্ডিতকেসতায মুণ্ডা পিলোতিকখণ্ডেহি সঙ্ঘটিতট্ঠেন ‘‘সঙ্ঘাটী’’তি লদ্ধনামেন চীৰরেন পারুতসরীরা। সম্ভাৰনংযেৰিচ্ছন্তি, লাভসক্কারমুচ্ছিতাতি লাভসক্কারাসায মুচ্ছিতা অজ্ঝোসিতা হুত্ৰা, ‘‘পেসলো ধুতৰাদো বহুস্সুতো’’তি ৰা মধুরৰচনমনুযুত্তা ‘‘অরিযো’’তি চ কেৰলং সম্ভাৰনং বহুমানংযেৰ ইচ্ছন্তি এসন্তি, ন তন্নিমিত্তে গুণেতি অত্থো।
Nānuyuttāti samaṇakaraṇehi dhammehi ananuyuttā. Tathāti yathā pubbe vuttā bandhanakārakādayo, tathā. Eketi ekacce. Muṇḍā saṅghāṭipārutāti kevalaṃ muṇḍitakesatāya muṇḍā pilotikakhaṇḍehi saṅghaṭitaṭṭhena ‘‘saṅghāṭī’’ti laddhanāmena cīvarena pārutasarīrā. Sambhāvanaṃyevicchanti, lābhasakkāramucchitāti lābhasakkārāsāya mucchitā ajjhositā hutvā, ‘‘pesalo dhutavādo bahussuto’’ti vā madhuravacanamanuyuttā ‘‘ariyo’’ti ca kevalaṃ sambhāvanaṃ bahumānaṃyeva icchanti esanti, na tannimitte guṇeti attho.
এৰন্তি ‘‘কুসলানঞ্চ ধম্মানং পঞ্ঞায চ পরিক্খযা’’তি ৰুত্তনযেন। নানপ্পযাতম্হীতি নানপ্পকারে ভেদনধম্মে পযাতে সমকতে, নানপ্পকারেন ৰা সংকিলেসধম্মে পযাতুং পৰত্তিতুং আরদ্ধে। ন দানি সুকরং তথাতি ইদানি ইমস্মিং দুল্লভকল্যাণমিত্তে দুল্লভসপ্পাযসদ্ধম্মস্সৰনে চ কালে যথা সত্থরি ধরন্তে অফুসিতং অফুট্ঠং, অনধিগতং ঝানৰিপস্সনং ফুসিতুং অধিগন্তুং, ফুসিতং ৰা হানভাগিযং ঠিতিভাগিযমেৰ ৰা অহুত্ৰা যথা ৰিসেসভাগিযং হোতি, তথা অনুরক্খিতুং পালেতুং সুকরং, তথা ন সুকরং, তথা সম্পাদেতুং ন সক্কাতি অত্থো।
Evanti ‘‘kusalānañca dhammānaṃ paññāya ca parikkhayā’’ti vuttanayena. Nānappayātamhīti nānappakāre bhedanadhamme payāte samakate, nānappakārena vā saṃkilesadhamme payātuṃ pavattituṃ āraddhe. Na dāni sukaraṃ tathāti idāni imasmiṃ dullabhakalyāṇamitte dullabhasappāyasaddhammassavane ca kāle yathā satthari dharante aphusitaṃ aphuṭṭhaṃ, anadhigataṃ jhānavipassanaṃ phusituṃ adhigantuṃ, phusitaṃ vā hānabhāgiyaṃ ṭhitibhāgiyameva vā ahutvā yathā visesabhāgiyaṃ hoti, tathā anurakkhituṃ pāletuṃ sukaraṃ, tathā na sukaraṃ, tathā sampādetuṃ na sakkāti attho.
ইদানি অত্তনো পরিনিব্বানকালস্স আসন্নত্তা সংখিত্তেন ওৰাদেন সব্রহ্মচারিং ওৰদন্তো ‘‘যথা কণ্টকট্ঠানম্হী’’তিআদিমাহ। তস্সত্থো – যথা পুরিসো কেনচিদেৰ পযোজনেন কণ্টকনিচিতে পদেসে অনুপাহনো ৰিচরন্তো ‘‘মা মং কণ্টকো ৰিজ্ঝী’’তি সতিং উপট্ঠপেত্ৰাৰ ৰিচরতি, এৰং কিলেসকণ্টকনিচিতে গোচরগামে পযোজনেন চরন্তো মুনি সতিং উপট্ঠপেত্ৰান সতিসম্পজঞ্ঞযুত্তো অপ্পমত্তোৰ চরেয্য কম্মট্ঠানং অৰিজহন্তোতি ৰুত্তং হোতি।
Idāni attano parinibbānakālassa āsannattā saṃkhittena ovādena sabrahmacāriṃ ovadanto ‘‘yathā kaṇṭakaṭṭhānamhī’’tiādimāha. Tassattho – yathā puriso kenacideva payojanena kaṇṭakanicite padese anupāhano vicaranto ‘‘mā maṃ kaṇṭako vijjhī’’ti satiṃ upaṭṭhapetvāva vicarati, evaṃ kilesakaṇṭakanicite gocaragāme payojanena caranto muni satiṃ upaṭṭhapetvāna satisampajaññayutto appamattova careyya kammaṭṭhānaṃ avijahantoti vuttaṃ hoti.
সরিত্ৰা পুব্বকে যোগী, তেসং ৰত্তমনুস্সরন্তি পুরিমকে যোগে ভাৰনায যুত্ততায যোগী আরদ্ধৰিপস্সকে সরিত্ৰা তেসং ৰত্তং আগমানুসারেন সম্মাপটিপত্তিভাৰনাৰিধিং অনুস্সরন্তো ধুরনিক্খেপং অকত্ৰা যথাপটিপজ্জন্তো। কিঞ্চাপি পচ্ছিমো কালোতি যদিপাযং অতীতসত্থুকো চরিমো কালো, তথাপি যথাধম্মমেৰ পটিপজ্জন্তো ৰিপস্সনং উস্সুক্কাপেন্তো ফুসেয্য অমতং পদং নিব্বানং অধিগচ্ছেয্য।
Saritvā pubbake yogī, tesaṃ vattamanussaranti purimake yoge bhāvanāya yuttatāya yogī āraddhavipassake saritvā tesaṃ vattaṃ āgamānusārena sammāpaṭipattibhāvanāvidhiṃ anussaranto dhuranikkhepaṃ akatvā yathāpaṭipajjanto. Kiñcāpi pacchimo kāloti yadipāyaṃ atītasatthuko carimo kālo, tathāpi yathādhammameva paṭipajjanto vipassanaṃ ussukkāpento phuseyya amataṃ padaṃ nibbānaṃ adhigaccheyya.
ইদং ৰত্ৰাতি, যথাদস্সিতং সংকিলেসৰোদানেসু ইমং পটিপত্তিৰিধিং কথেত্ৰা। অযঞ্চ ওসানগাথা সঙ্গীতিকারেহি থেরস্স পরিনিব্বানং পকাসেতুং ৰুত্তাতি ৰেদিতব্বা।
Idaṃ vatvāti, yathādassitaṃ saṃkilesavodānesu imaṃ paṭipattividhiṃ kathetvā. Ayañca osānagāthā saṅgītikārehi therassa parinibbānaṃ pakāsetuṃ vuttāti veditabbā.
পারাপরিযত্থেরগাথাৰণ্ণনা নিট্ঠিতা।
Pārāpariyattheragāthāvaṇṇanā niṭṭhitā.
ৰীসতিনিপাতৰণ্ণনা নিট্ঠিতা।
Vīsatinipātavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ১০. পারাপরিযত্থেরগাথা • 10. Pārāpariyattheragāthā
