| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
10. баараабарияад̇т̇зраг̇аат̇ааван̣н̣анаа
10. Pārāpariyattheragāthāvaṇṇanā
саман̣асса аху жинд̇аад̇иаад̣̇игаа ааяасмад̇о баараабарияад̇т̇зрасса г̇аат̇аа. имасса вад̇т̇у хздтаа ааг̇ад̇амзва. д̇аа жа г̇аат̇аа сад̇т̇ари д̇харанд̇з ад̇д̇ано бут̇уж̇ж̇анагаалз манажчадтаанам̣ инд̣̇рияаанам̣ ниг̇г̇ан̣ханажинд̇ааяа багаасанавасзна бхаасид̇аа. имаа бана абарабхааг̇з сад̇т̇ари бариниб̣б̣уд̇з ад̇д̇ано жа бариниб̣б̣аанз убадтид̇з д̇ад̣̇аа ааяад̇ин̃жа бхигкуунам̣ уд̣̇д̇хаммабадибад̇д̇ияаа багаасанавасзна бхаасид̇аа. д̇ад̇т̇а –
Samaṇassaahu cintātiādikā āyasmato pārāpariyattherassa gāthā. Imassa vatthu heṭṭhā āgatameva. Tā ca gāthā satthari dharante attano puthujjanakāle manacchaṭṭhānaṃ indriyānaṃ niggaṇhanacintāya pakāsanavasena bhāsitā. Imā pana aparabhāge satthari parinibbute attano ca parinibbāne upaṭṭhite tadā āyatiñca bhikkhūnaṃ uddhammapaṭipattiyā pakāsanavasena bhāsitā. Tattha –
920.
920.
‘‘саман̣асса аху жинд̇аа, бубпид̇амхи махааванз;
‘‘Samaṇassa ahu cintā, pupphitamhi mahāvane;
згаг̇г̇асса нисиннасса, бавивид̇д̇асса жхааяино’’д̇и. –
Ekaggassa nisinnassa, pavivittassa jhāyino’’ti. –
аяам̣ г̇аат̇аа сан̇г̇ийд̇игаарзхи табид̇аа. д̇ассад̇т̇о хздтаа вуд̇д̇анаяова. аяам̣ бана самб̣анд̇хо – сад̇т̇ари аг̇г̇асаавагзсу згажжзсу махаат̇зрзсу жа бариниб̣б̣уд̇зсу ад̇ийд̇асад̇т̇угз бааважанз суб̣б̣ажзсу сигкаагаамзсу бхигкуусу д̣̇уллабхзсу, д̣̇уб̣б̣ажзсу мижчаабадибад̇д̇иб̣ахулзсу бхигкуусу жа ж̇аад̇зсу субубпид̇з маханд̇з саалаванз нисиннасса бавивид̇д̇асса згаг̇г̇асса жхааяанасийласса, самид̇абаабад̇ааяа саман̣асса, баараабарияад̇т̇зрасса бадибад̇д̇им̣ ниссааяа жинд̇аа виймам̣саа ахосийд̇и ид̇араа –
Ayaṃ gāthā saṅgītikārehi ṭhapitā. Tassattho heṭṭhā vuttanayova. Ayaṃ pana sambandho – satthari aggasāvakesu ekaccesu mahātheresu ca parinibbutesu atītasatthuke pāvacane subbacesu sikkhākāmesu bhikkhūsu dullabhesu, dubbacesu micchāpaṭipattibahulesu bhikkhūsu ca jātesu supupphite mahante sālavane nisinnassa pavivittassa ekaggassa jhāyanasīlassa, samitapāpatāya samaṇassa, pārāpariyattherassa paṭipattiṃ nissāya cintā vīmaṃsā ahosīti itarā –
921.
921.
‘‘ан̃н̃ат̇аа логанаат̇амхи, д̇идтанд̇з бурисуд̇д̇амз;
‘‘Aññathā lokanāthamhi, tiṭṭhante purisuttame;
ирияам̣ ааси бхигкуунам̣, ан̃н̃ат̇аа д̣̇аани д̣̇иссад̇и.
Iriyaṃ āsi bhikkhūnaṃ, aññathā dāni dissati.
922.
922.
‘‘сийд̇аваад̇абарид̇д̇аан̣ам̣, хиригобийначаад̣̇анам̣;
‘‘Sītavātaparittāṇaṃ, hirikopīnachādanaṃ;
мад̇д̇адтияам̣ абхун̃ж̇им̣су, санд̇удтаа ид̇арийд̇арз.
Mattaṭṭhiyaṃ abhuñjiṃsu, santuṭṭhā itarītare.
923.
923.
‘‘бан̣ийд̇ам̣ яад̣̇и ваа луукам̣, аббам̣ ваа яад̣̇и ваа б̣ахум̣;
‘‘Paṇītaṃ yadi vā lūkhaṃ, appaṃ vā yadi vā bahuṃ;
яаабанад̇т̇ам̣ абхун̃ж̇им̣су, аг̇ид̣̇д̇хаа наад̇химужчид̇аа.
Yāpanatthaṃ abhuñjiṃsu, agiddhā nādhimucchitā.
924.
924.
‘‘ж̇ийвид̇аанам̣ баригкаарз, бхзсаж̇ж̇з ат̇а бажжаяз;
‘‘Jīvitānaṃ parikkhāre, bhesajje atha paccaye;
на б̣аал̣хам̣ уссугаа аасум̣, яат̇аа д̇з аасавагкаяз.
Na bāḷhaṃ ussukā āsuṃ, yathā te āsavakkhaye.
925.
925.
‘‘аран̃н̃з ругкамуулзсу, ганд̣̇араасу г̇ухаасу жа;
‘‘Araññe rukkhamūlesu, kandarāsu guhāsu ca;
вивзгамануб̣рууханд̇аа, вихам̣су д̇аббарааяан̣аа.
Vivekamanubrūhantā, vihaṃsu tapparāyaṇā.
926.
926.
‘‘нийжаа нивидтаа субхараа, муд̣̇уу ат̇ад̣̇д̇хамаанасаа;
‘‘Nīcā niviṭṭhā subharā, mudū athaddhamānasā;
аб̣яаасзгаа амукараа, ад̇т̇ажинд̇аавасаануг̇аа.
Abyāsekā amukharā, atthacintāvasānugā.
927.
927.
‘‘д̇ад̇о баасаад̣̇игам̣ ааси, г̇ад̇ам̣ бхуд̇д̇ам̣ нисзвид̇ам̣;
‘‘Tato pāsādikaṃ āsi, gataṃ bhuttaṃ nisevitaṃ;
синид̣̇д̇хаа д̇злад̇хаараава, ахоси ирияаабат̇о.
Siniddhā teladhārāva, ahosi iriyāpatho.
928.
928.
‘‘саб̣б̣аасавабаригкийн̣аа , махаажхааяий махаахид̇аа;
‘‘Sabbāsavaparikkhīṇā , mahājhāyī mahāhitā;
ниб̣б̣уд̇аа д̣̇аани д̇з т̇зраа, барид̇д̇аа д̣̇аани д̇аад̣̇исаа.
Nibbutā dāni te therā, parittā dāni tādisā.
929.
929.
‘‘гусалаанан̃жа д̇хаммаанам̣, бан̃н̃ааяа жа баригкаяаа;
‘‘Kusalānañca dhammānaṃ, paññāya ca parikkhayā;
саб̣б̣аагаараваруубзд̇ам̣, луж̇ж̇ад̇з ж̇инасаасанам̣.
Sabbākāravarūpetaṃ, lujjate jinasāsanaṃ.
930.
930.
‘‘баабагаанан̃жа д̇хаммаанам̣, гилзсаанан̃жа яо уд̇у;
‘‘Pāpakānañca dhammānaṃ, kilesānañca yo utu;
убадтид̇аа вивзгааяа, яз жа сад̣̇д̇хаммасзсагаа.
Upaṭṭhitā vivekāya, ye ca saddhammasesakā.
931.
931.
‘‘д̇з гилзсаа бавад̣дханд̇аа, аависанд̇и б̣ахум̣ ж̇анам̣;
‘‘Te kilesā pavaḍḍhantā, āvisanti bahuṃ janaṃ;
гийл̣анд̇и ман̃н̃з б̣аалзхи, уммад̇д̇зхива рагкасаа.
Kīḷanti maññe bālehi, ummattehiva rakkhasā.
932.
932.
‘‘гилзсзхаабхибхууд̇аа д̇з, д̇зна д̇зна вид̇хаавид̇аа;
‘‘Kilesehābhibhūtā te, tena tena vidhāvitā;
нараа гилзсавад̇т̇уусу, сасан̇г̇аамзва гхосид̇з.
Narā kilesavatthūsu, sasaṅgāmeva ghosite.
933.
933.
‘‘барижжаж̇ид̇ваа сад̣̇д̇хаммам̣, ан̃н̃аман̃н̃зхи бхан̣д̣арз;
‘‘Pariccajitvā saddhammaṃ, aññamaññehi bhaṇḍare;
д̣̇идтиг̇ад̇аани анвзнд̇аа, ид̣̇ам̣ сзяяод̇и ман̃н̃арз.
Diṭṭhigatāni anventā, idaṃ seyyoti maññare.
934.
934.
‘‘д̇ханан̃жа буд̇д̇ам̣ бхарияан̃жа, чад̣д̣аяид̇ваана ниг̇г̇ад̇аа;
‘‘Dhanañca puttaṃ bhariyañca, chaḍḍayitvāna niggatā;
гадажчубхигкахзд̇ууби, агижчаани нисзварз.
Kaṭacchubhikkhahetūpi, akicchāni nisevare.
935.
935.
‘‘уд̣̇араавад̣̇зхагам̣ бхуд̇ваа, саяанд̇уд̇д̇аанасзяяагаа;
‘‘Udarāvadehakaṃ bhutvā, sayantuttānaseyyakā;
гат̇аа вад̣дхзнд̇и бадиб̣уд̣̇д̇хаа, яаа гат̇аа сад̇т̇уг̇арахид̇аа.
Kathā vaḍḍhenti paṭibuddhā, yā kathā satthugarahitā.
936.
936.
‘‘саб̣б̣агааругасиббаани, жид̇д̇им̣ гад̇ваана сигкарз;
‘‘Sabbakārukasippāni, cittiṃ katvāna sikkhare;
авуубасанд̇аа аж̇жхад̇д̇ам̣, сааман̃н̃ад̇т̇од̇иажчад̇и.
Avūpasantā ajjhattaṃ, sāmaññatthotiacchati.
937.
937.
‘‘мад̇д̇игам̣ д̇злажун̣н̣ан̃жа, уд̣̇агаасанабхож̇анам̣;
‘‘Mattikaṃ telacuṇṇañca, udakāsanabhojanaṃ;
г̇ихийнам̣ убанаамзнд̇и, ааган̇канд̇аа б̣ахуд̇д̇арам̣.
Gihīnaṃ upanāmenti, ākaṅkhantā bahuttaraṃ.
938.
938.
‘‘д̣̇анд̇абонам̣ габид̇т̇ан̃жа, бубпам̣ каад̣̇анияаани жа;
‘‘Dantaponaṃ kapitthañca, pupphaṃ khādaniyāni ca;
бин̣д̣абаад̇з жа самбаннз, амб̣з аамалагаани жа.
Piṇḍapāte ca sampanne, ambe āmalakāni ca.
939.
939.
‘‘бхзсаж̇ж̇зсу яат̇аа взж̇ж̇аа, гижжаагижжз яат̇аа г̇ихий;
‘‘Bhesajjesu yathā vejjā, kiccākicce yathā gihī;
г̇ан̣игаава вибхуусааяам̣, иссарз кад̇д̇ияаа яат̇аа.
Gaṇikāva vibhūsāyaṃ, issare khattiyā yathā.
940.
940.
‘‘нзгад̇игаа ван̃жанигаа, гуудасагкий абаадугаа;
‘‘Nekatikā vañcanikā, kūṭasakkhī apāṭukā;
б̣ахуухи баригаббзхи, аамисам̣ барибхун̃ж̇арз.
Bahūhi parikappehi, āmisaṃ paribhuñjare.
941.
941.
‘‘лзсагаббз барияааяз, баригаббзнуд̇хаавид̇аа;
‘‘Lesakappe pariyāye, parikappenudhāvitā;
ж̇ийвигад̇т̇аа убааязна, сан̇гад̣дханд̇и б̣ахум̣ д̇ханам̣.
Jīvikatthā upāyena, saṅkaḍḍhanti bahuṃ dhanaṃ.
942.
942.
‘‘убадтаабзнд̇и барисам̣, гаммад̇о но жа д̇хаммад̇о;
‘‘Upaṭṭhāpenti parisaṃ, kammato no ca dhammato;
д̇хаммам̣ барзсам̣ д̣̇зсзнд̇и, лаабхад̇о но жа ад̇т̇ад̇о.
Dhammaṃ paresaṃ desenti, lābhato no ca atthato.
943.
943.
‘‘сан̇гхалаабхасса бхан̣д̣анд̇и, сан̇гхад̇о бариб̣аахираа;
‘‘Saṅghalābhassa bhaṇḍanti, saṅghato paribāhirā;
баралаабхобаж̇ийванд̇аа, ахирийгаа на лаж̇ж̇арз.
Paralābhopajīvantā, ahirīkā na lajjare.
944.
944.
‘‘наануяуд̇д̇аа д̇ат̇аа згз, мун̣д̣аа сан̇гхаадибааруд̇аа;
‘‘Nānuyuttā tathā eke, muṇḍā saṅghāṭipārutā;
самбхааванам̣язвижчанд̇и, лаабхасаггаарамужчид̇аа.
Sambhāvanaṃyevicchanti, lābhasakkāramucchitā.
945.
945.
‘‘звам̣ наанаббаяаад̇амхи, на д̣̇аани сугарам̣ д̇ат̇аа;
‘‘Evaṃ nānappayātamhi, na dāni sukaraṃ tathā;
апусид̇ам̣ ваа пусид̇ум̣, пусид̇ам̣ ваанурагкид̇ум̣.
Aphusitaṃ vā phusituṃ, phusitaṃ vānurakkhituṃ.
946.
946.
‘‘яат̇аа ган̣дагадтаанамхи, жарзяяа анубаахано;
‘‘Yathā kaṇṭakaṭṭhānamhi, careyya anupāhano;
сад̇им̣ убадтабзд̇ваана, звам̣ г̇аамз муний жарз.
Satiṃ upaṭṭhapetvāna, evaṃ gāme munī care.
947.
947.
‘‘сарид̇ваа буб̣б̣агз яог̇ий, д̇зсам̣ вад̇д̇амануссарам̣;
‘‘Saritvā pubbake yogī, tesaṃ vattamanussaraṃ;
гин̃жааби бажчимо гаало, пусзяяа амад̇ам̣ бад̣̇ам̣.
Kiñcāpi pacchimo kālo, phuseyya amataṃ padaṃ.
948.
948.
‘‘ид̣̇ам̣ вад̇ваа саалаванз, саман̣о бхаавид̇инд̣̇рияо;
‘‘Idaṃ vatvā sālavane, samaṇo bhāvitindriyo;
б̣раахман̣о бариниб̣б̣ааяий, иси кийн̣абунаб̣бхаво’’д̇и. –
Brāhmaṇo parinibbāyī, isi khīṇapunabbhavo’’ti. –
имаа г̇аат̇аа т̇зрзнзва бхаасид̇аа.
Imā gāthā thereneva bhāsitā.
д̇ад̇т̇а ирияам̣ ааси бхигкуунанд̇и бурисуд̇д̇амз логанаат̇амхи саммаасамб̣уд̣̇д̇хз д̇идтанд̇з д̇харанд̇з зд̇арахи бадибад̇д̇ибхаавад̇о. ан̃н̃ат̇аа ан̃н̃зна багаарзна бхигкуунам̣ ирияам̣ жарид̇ам̣ ахоси яат̇аанусидтам̣ бадибад̇д̇ибхаавад̇о. ан̃н̃ат̇аа д̣̇аани д̣̇иссад̇ийд̇и ид̣̇аани бана д̇ад̇о ан̃н̃ат̇аа бхигкуунам̣ ирияам̣ д̣̇иссад̇и аяаат̇аавабадибад̇д̇ибхаавад̇од̇и ад̇хиббааяо .
Tattha iriyaṃ āsi bhikkhūnanti purisuttame lokanāthamhi sammāsambuddhe tiṭṭhante dharante etarahi paṭipattibhāvato. Aññathā aññena pakārena bhikkhūnaṃ iriyaṃ caritaṃ ahosi yathānusiṭṭhaṃ paṭipattibhāvato. Aññathā dāni dissatīti idāni pana tato aññathā bhikkhūnaṃ iriyaṃ dissati ayāthāvapaṭipattibhāvatoti adhippāyo .
ид̣̇аани сад̇т̇ари д̇харанд̇з язнаагаарзна бхигкуунам̣ бадибад̇д̇и ахоси, д̇ам̣ д̇аава д̣̇ассзд̇ум̣ ‘‘сийд̇аваад̇абарид̇д̇аан̣а’’нд̇иаад̣̇и вуд̇д̇ам̣. д̇ад̇т̇а мад̇д̇адтияанд̇и д̇ам̣ мад̇д̇ам̣ баяож̇анам̣. яаавад̣̇зва сийд̇аваад̇абарид̇д̇аан̣ам̣, яаавад̣̇зва хирийгобийнабадижчаад̣̇анам̣ гад̇ваа жийварам̣ барибхун̃ж̇им̣су. гат̇ам̣? санд̇удтаа ид̇арийд̇арз яасмим̣ д̇асмим̣ хийнз бан̣ийд̇з ваа яат̇аалад̣̇д̇хз бажжаяз санд̇осам̣ аабаннаа.
Idāni satthari dharante yenākārena bhikkhūnaṃ paṭipatti ahosi, taṃ tāva dassetuṃ ‘‘sītavātaparittāṇa’’ntiādi vuttaṃ. Tattha mattaṭṭhiyanti taṃ mattaṃ payojanaṃ. Yāvadeva sītavātaparittāṇaṃ, yāvadeva hirīkopīnapaṭicchādanaṃ katvā cīvaraṃ paribhuñjiṃsu. Kathaṃ? Santuṭṭhā itarītare yasmiṃ tasmiṃ hīne paṇīte vā yathāladdhe paccaye santosaṃ āpannā.
бан̣ийд̇анд̇и ул̣аарам̣ саббиаад̣̇инаа сам̣садтам̣, д̇ад̣̇абхаавзна луукам̣. аббанд̇и, жад̇убан̃жаалобамад̇д̇амби. б̣ахум̣ яаабанад̇т̇ам̣ абхун̃ж̇им̣сууд̇и бан̣ийд̇ам̣ б̣ахум̣ бхун̃ж̇анд̇ааби яаабанамад̇д̇амзва аахаарам̣ бхун̃ж̇им̣су. д̇ад̇о зва аг̇ид̣̇д̇хаа г̇зд̇хам̣ анаабаннаа. наад̇химужчид̇аа на аж̇жхосид̇аа агкаб̣бхан̃ж̇анам̣ вияа саагадигаа, ван̣алзбанам̣ вияа ван̣ино абхун̃ж̇им̣су.
Paṇītanti uḷāraṃ sappiādinā saṃsaṭṭhaṃ, tadabhāvena lūkhaṃ. Appanti, catupañcālopamattampi. Bahuṃ yāpanatthaṃ abhuñjiṃsūti paṇītaṃ bahuṃ bhuñjantāpi yāpanamattameva āhāraṃ bhuñjiṃsu. Tato eva agiddhā gedhaṃ anāpannā. Nādhimucchitā na ajjhositā akkhabbhañjanaṃ viya sākaṭikā, vaṇalepanaṃ viya vaṇino abhuñjiṃsu.
ж̇ийвид̇аанам̣ баригкаарз, бхзсаж̇ж̇з ат̇а бажжаязби ж̇ийвид̇аанам̣ бавад̇д̇ияаа баригкаарабхууд̇з бхзсаж̇ж̇асан̇каад̇з бажжаяз г̇илаанабажжаяз. яат̇аа д̇зд̇и яат̇аа д̇з буримагаа бхигкуу аасавагкаяз уссугаа яуд̇д̇аа аасум̣, д̇ат̇аа д̇з рог̇аабхибхууд̇ааби г̇илаанабажжаяз б̣аал̣хам̣ ад̇ивияа уссугаа наахзсунд̇и ад̇т̇о.
Jīvitānaṃparikkhāre, bhesajje atha paccayepi jīvitānaṃ pavattiyā parikkhārabhūte bhesajjasaṅkhāte paccaye gilānapaccaye. Yathā teti yathā te purimakā bhikkhū āsavakkhaye ussukā yuttā āsuṃ, tathā te rogābhibhūtāpi gilānapaccaye bāḷhaṃ ativiya ussukā nāhesunti attho.
д̇аббарааяан̣аад̇и вивзгабарааяан̣аа вивзгабон̣аа. звам̣ жад̇уухи г̇аат̇аахи жад̇убажжаяасанд̇осам̣ бхааванаабхирад̇ин̃жа д̣̇ассзнд̇зна д̇зсам̣ арияавам̣сабадибад̣̇аа д̣̇ассид̇аа.
Tapparāyaṇāti vivekaparāyaṇā vivekapoṇā. Evaṃ catūhi gāthāhi catupaccayasantosaṃ bhāvanābhiratiñca dassentena tesaṃ ariyavaṃsapaṭipadā dassitā.
нийжаад̇и ‘‘маяам̣ бам̣сугуулигаа бин̣д̣абаад̇игаа’’д̇и ад̇д̇уггам̣санабаравамбханаани агад̇ваа нийжавуд̇д̇ино, ниваад̇авуд̇д̇инод̇и ад̇т̇о. нивидтаад̇и саасанз нивидтасад̣̇д̇хаа. субхараад̇и аббижчад̇аад̣̇ибхаавзна субосаа. муд̣̇ууд̇и вад̇д̇абадибад̇д̇ияам̣ сагалз жа б̣рахмажарияз муд̣̇уу, субаригаммагад̇асуван̣н̣ам̣ вияа винияог̇агкамаа. муд̣̇ууд̇и ваа абхаагудигаа уд̇д̇аанамукаа бубпид̇амукзна бадисант̇ааравуд̇д̇ино, суд̇ид̇т̇ам̣ вияа сукаавахаад̇и вуд̇д̇ам̣ ход̇и. ат̇ад̣̇д̇хамаанасаад̇и агат̇инажид̇д̇аа д̇зна суб̣б̣ажабхаавамааха. аб̣яаасзгаад̇и сад̇ивиббаваасаабхаавад̇о гилзсаб̣яаасзгарахид̇аа, анд̇аранд̇араа д̇ан̣хаад̣̇идтимаанаад̣̇ийхи авогин̣н̣аад̇и ад̇т̇о. амукараад̇и на мукараа, на мукзна караа важийбааг̇аб̣бхияарахид̇аад̇и ваа ад̇т̇о. ад̇т̇ажинд̇аавасаануг̇аад̇и хид̇ажинд̇аавасаануг̇аахид̇ажинд̇аавасигаа, ад̇д̇ано барзсан̃жа хид̇ажинд̇амзва анубаривад̇д̇анагаа.
Nīcāti ‘‘mayaṃ paṃsukūlikā piṇḍapātikā’’ti attukkaṃsanaparavambhanāni akatvā nīcavuttino, nivātavuttinoti attho. Niviṭṭhāti sāsane niviṭṭhasaddhā. Subharāti appicchatādibhāvena suposā. Mudūti vattapaṭipattiyaṃ sakale ca brahmacariye mudū, suparikammakatasuvaṇṇaṃ viya viniyogakkhamā. Mudūti vā abhākuṭikā uttānamukhā pupphitamukhena paṭisanthāravuttino, sutitthaṃ viya sukhāvahāti vuttaṃ hoti. Athaddhamānasāti akathinacittā tena subbacabhāvamāha. Abyāsekāti sativippavāsābhāvato kilesabyāsekarahitā, antarantarā taṇhādiṭṭhimānādīhi avokiṇṇāti attho. Amukharāti na mukharā, na mukhena kharā vacīpāgabbhiyarahitāti vā attho. Atthacintāvasānugāti hitacintāvasānugāhitacintāvasikā, attano paresañca hitacintameva anuparivattanakā.
д̇ад̇од̇и д̇асмаа нийжавуд̇д̇аад̣̇ихзд̇у. баасаад̣̇иганд̇и басаад̣̇аж̇анигам̣ бадибад̇д̇им̣ бассанд̇аанам̣ сун̣анд̇аанан̃жа басаад̣̇аавахам̣. г̇ад̇анд̇и абхигганд̇абадигганд̇абаривад̇д̇анаад̣̇иг̇аманам̣. г̇ад̇анд̇и ваа гааяаваажаабавад̇д̇и. бхуд̇д̇анд̇и жад̇убажжаяабарибхог̇о. нисзвид̇анд̇и г̇ожаранисзванам̣. синид̣̇д̇хаа д̇злад̇хаарааваад̇и яат̇аа анивад̇д̇ид̇аа гусалаж̇анаабхисин̃жид̇аа саванд̇ий д̇злад̇хаараа авижчиннаа синид̣̇д̇хаа мадтаа д̣̇ассанийяаа баасаад̣̇игаа ход̇и, звам̣ д̇зсам̣ аагаббасамбаннаанам̣ ирияаабат̇о ажчид̣̇д̣̇о сан̣хо мадто д̣̇ассанийяо баасаад̣̇иго ахоси.
Tatoti tasmā nīcavuttādihetu. Pāsādikanti pasādajanikaṃ paṭipattiṃ passantānaṃ suṇantānañca pasādāvahaṃ. Gatanti abhikkantapaṭikkantaparivattanādigamanaṃ. Gatanti vā kāyavācāpavatti. Bhuttanti catupaccayaparibhogo. Nisevitanti gocaranisevanaṃ. Siniddhāteladhārāvāti yathā anivattitā kusalajanābhisiñcitā savantī teladhārā avicchinnā siniddhā maṭṭhā dassanīyā pāsādikā hoti, evaṃ tesaṃ ākappasampannānaṃ iriyāpatho acchiddo saṇho maṭṭho dassanīyo pāsādiko ahosi.
махаажхааяийд̇и маханд̇зхи жхаанзхи жхааяанасийлаа, маханд̇ам̣ ваа ниб̣б̣аанам̣ жхааяанд̇ийд̇и махаажхааяий. д̇ад̇о зва махаахид̇аа, маханд̇зхи хид̇зхи саманнааг̇ад̇аад̇и ад̇т̇о. д̇з т̇зраад̇и д̇з яат̇аавуд̇д̇аббагаараа бадибад̇д̇ибарааяан̣аа т̇зраа ид̣̇аани бариниб̣б̣уд̇аад̇и ад̇т̇о. барид̇д̇аа д̣̇аани д̇аад̣̇исаад̇и ид̣̇аани бажчимз гаалз д̇аад̣̇исаа д̇ат̇ааруубаа т̇зраа барид̇д̇аа аббагаа гад̇ибаяаа зваад̇и вуд̇д̇ам̣ ход̇и.
Mahājhāyīti mahantehi jhānehi jhāyanasīlā, mahantaṃ vā nibbānaṃ jhāyantīti mahājhāyī. Tato eva mahāhitā, mahantehi hitehi samannāgatāti attho. Te therāti te yathāvuttappakārā paṭipattiparāyaṇā therā idāni parinibbutāti attho. Parittā dāni tādisāti idāni pacchime kāle tādisā tathārūpā therā parittā appakā katipayā evāti vuttaṃ hoti.
гусалаанан̃жа д̇хаммаананд̇и виваддасса убаниссаяабхууд̇аанам̣ вимогкасамбхаараанам̣ анаваж̇ж̇ад̇хаммаанам̣. бан̃н̃ааяа жаад̇и д̇ат̇ааруубааяа бан̃н̃ааяа жа. баригкаяаад̇и абхаавад̇о ануббад̇д̇ид̇о. гааман̃жзд̇т̇а бан̃н̃ааби сияаа анаваж̇ж̇ад̇хаммаа, б̣ахугаарабхаавад̣̇ассанад̇т̇ам̣ банассаа висум̣ г̇ахан̣ам̣ яат̇аа бун̃н̃ан̃аан̣асамбхаараад̇и. саб̣б̣аагаараваруубзд̇анд̇и аад̣̇игаляаан̣ад̇аад̣̇ийхи саб̣б̣зхи аагаараварзхи багаарависзсзхи убзд̇ам̣ яуд̇д̇ам̣ ж̇инасса бхаг̇авад̇о саасанам̣ луж̇ж̇ад̇и винассад̇ийд̇и ад̇т̇о.
Kusalānañcadhammānanti vivaṭṭassa upanissayabhūtānaṃ vimokkhasambhārānaṃ anavajjadhammānaṃ. Paññāya cāti tathārūpāya paññāya ca. Parikkhayāti abhāvato anuppattito. Kāmañcettha paññāpi siyā anavajjadhammā, bahukārabhāvadassanatthaṃ panassā visuṃ gahaṇaṃ yathā puññañāṇasambhārāti. Sabbākāravarūpetanti ādikalyāṇatādīhi sabbehi ākāravarehi pakāravisesehi upetaṃ yuttaṃ jinassa bhagavato sāsanaṃ lujjati vinassatīti attho.
баабагаанан̃жа д̇хаммаанам̣, гилзсаанан̃жа яо уд̇ууд̇и гааяад̣̇ужжарид̇аад̣̇ийнам̣ баабад̇хаммаанам̣ лобхаад̣̇ийнан̃жа гилзсаанам̣ яо уд̇у яо гаало, со аяам̣ вад̇д̇ад̇ийд̇и важанасзсо. убадтид̇аа вивзгааяа, яз жа сад̣̇д̇хаммасзсагаад̇и яз бана зваруубз гаалз гааяажид̇д̇аубад̇хививзгад̇т̇ааяа убадтид̇аа аарад̣̇д̇хавийрияаа, д̇з жа сзсабадибад̇д̇исад̣̇д̇хаммагаа хонд̇и. аяан̃хзд̇т̇а ад̇хиббааяо – сувисуд̣̇д̇хасийлаажаарааби самаанаа ид̣̇аани згажжз бхигкуу ирияаабат̇асан̣таабанам̣, самат̇авибассанаабхааванаавид̇хаанам̣, махаабалиб̣од̇хуубажчзд̣̇о, куд̣̇д̣̇агабалиб̣од̇хуубажчзд̣̇од̇и звамаад̣̇ибуб̣б̣агижжам̣ самбаад̣̇зд̇ваа бхааванамануяун̃ж̇анд̇и. д̇з сзсабадибад̇д̇исад̣̇д̇хаммагаа, бадибад̇д̇им̣ мад̇т̇агам̣ баабзд̇ум̣ на саггонд̇ийд̇и.
Pāpakānañca dhammānaṃ, kilesānañca yo utūti kāyaduccaritādīnaṃ pāpadhammānaṃ lobhādīnañca kilesānaṃ yo utu yo kālo, so ayaṃ vattatīti vacanaseso. Upaṭṭhitā vivekāya, ye ca saddhammasesakāti ye pana evarūpe kāle kāyacittaupadhivivekatthāya upaṭṭhitā āraddhavīriyā, te ca sesapaṭipattisaddhammakā honti. Ayañhettha adhippāyo – suvisuddhasīlācārāpi samānā idāni ekacce bhikkhū iriyāpathasaṇṭhāpanaṃ, samathavipassanābhāvanāvidhānaṃ, mahāpalibodhūpacchedo, khuddakapalibodhūpacchedoti evamādipubbakiccaṃ sampādetvā bhāvanamanuyuñjanti. Te sesapaṭipattisaddhammakā, paṭipattiṃ matthakaṃ pāpetuṃ na sakkontīti.
д̇з гилзсаа бавад̣дханд̇аад̇и яз бхаг̇авад̇о орасабуд̇д̇зхи жа д̇ад̣̇аа баригкаяам̣ барияаад̣̇аанам̣ г̇амид̇аа гилзсаа, д̇з зд̇арахи лад̣̇д̇хогаасаа бхигкуусу вуд̣̇д̇хим̣ вируул̣хим̣ взбуллам̣ аабаж̇ж̇анд̇аа. аависанд̇и б̣ахум̣ ж̇ананд̇и галяаан̣амид̇д̇арахид̇ам̣ аяонисоманасигаараб̣ахулам̣ анд̇хаб̣аалаж̇анам̣ абхибхавид̇ваа авасам̣ гаронд̇аа аависанд̇и санд̇аанам̣ анубависанд̇и. звам̣бхууд̇аа жа д̇з гийл̣анд̇и ман̃н̃з б̣аалзхи, уммад̇д̇зхива рагкасаа, яат̇аа наама гзл̣исийлаа рагкасаа бхисаггарахид̇з уммад̇д̇з аависид̇ваа д̇з анаяаб̣яасанам̣ аабаад̣̇знд̇аа д̇зхи гийл̣анд̇и, звам̣ д̇з гилзсаа саммаасамб̣уд̣̇д̇хабхисаггарахид̇з анд̇хаб̣аалз бхигкуу аависид̇ваа д̇зсам̣ д̣̇идтад̇хаммигаад̣̇ибхзд̣̇ам̣ анад̇т̇ам̣ уббаад̣̇знд̇аа д̇зхи сад̣̇д̇хим̣ гийл̣анд̇и ман̃н̃з, гийл̣анд̇аа вияа хонд̇ийд̇и ад̇т̇о.
Te kilesā pavaḍḍhantāti ye bhagavato orasaputtehi ca tadā parikkhayaṃ pariyādānaṃ gamitā kilesā, te etarahi laddhokāsā bhikkhūsu vuddhiṃ virūḷhiṃ vepullaṃ āpajjantā. Āvisanti bahuṃ jananti kalyāṇamittarahitaṃ ayonisomanasikārabahulaṃ andhabālajanaṃ abhibhavitvā avasaṃ karontā āvisanti santānaṃ anupavisanti. Evaṃbhūtā ca te kīḷanti maññe bālehi, ummattehiva rakkhasā, yathā nāma keḷisīlā rakkhasā bhisakkarahite ummatte āvisitvā te anayabyasanaṃ āpādentā tehi kīḷanti, evaṃ te kilesā sammāsambuddhabhisakkarahite andhabāle bhikkhū āvisitvā tesaṃ diṭṭhadhammikādibhedaṃ anatthaṃ uppādentā tehi saddhiṃ kīḷanti maññe, kīḷantā viya hontīti attho.
д̇зна д̇знаад̇и д̇зна д̇зна аарамман̣абхааг̇зна. вид̇хаавид̇аад̇и вируубам̣ д̇хаавид̇аа асааруббавасзна бадибаж̇ж̇анд̇аа. гилзсавад̇т̇уусууд̇и батамам̣ уббаннам̣ гилзсаа бажчаа уббаж̇ж̇анагаанам̣ гааран̣абхаавад̇о гилзсаава гилзсавад̇т̇ууни, д̇зсу гилзсавад̇т̇уусу самуухид̇зсу. сасан̇г̇аамзва гхосид̇зд̇и хиран̃н̃асуван̣н̣аман̣имуд̇д̇аад̣̇игам̣ д̇ханам̣ виббагирид̇ваа ‘‘яам̣ яам̣ хиран̃н̃асуван̣н̣аад̣̇и яасса яасса хад̇т̇аг̇ад̇ам̣, д̇ам̣ д̇ам̣ д̇асса д̇ассзва ход̇уу’’д̇и звам̣ гаамагхосанаа сасан̇г̇аамагхосанаа наама. д̇ад̇т̇ааяамад̇т̇о – гилзсавад̇т̇уусу ‘‘яо яо гилзсо яам̣ яам̣ сад̇д̇ам̣ г̇ан̣хаад̇и абхибхавад̇и, со со д̇асса д̇асса ход̇уу’’д̇и гилзсасзнаабад̇инаа маарзна сасан̇г̇аамз гхосид̇з вияа. д̇зхи д̇зхи гилзсзхи абхибхууд̇аа д̇з б̣аалабут̇уж̇ж̇анаа д̇зна д̇зна аарамман̣абхааг̇зна вид̇хаавид̇аа восид̇аад̇и.
Tenatenāti tena tena ārammaṇabhāgena. Vidhāvitāti virūpaṃ dhāvitā asāruppavasena paṭipajjantā. Kilesavatthūsūti paṭhamaṃ uppannaṃ kilesā pacchā uppajjanakānaṃ kāraṇabhāvato kilesāva kilesavatthūni, tesu kilesavatthūsu samūhitesu. Sasaṅgāmeva ghositeti hiraññasuvaṇṇamaṇimuttādikaṃ dhanaṃ vippakiritvā ‘‘yaṃ yaṃ hiraññasuvaṇṇādi yassa yassa hatthagataṃ, taṃ taṃ tassa tasseva hotū’’ti evaṃ kāmaghosanā sasaṅgāmaghosanā nāma. Tatthāyamattho – kilesavatthūsu ‘‘yo yo kileso yaṃ yaṃ sattaṃ gaṇhāti abhibhavati, so so tassa tassa hotū’’ti kilesasenāpatinā mārena sasaṅgāme ghosite viya. Tehi tehi kilesehi abhibhūtā te bālaputhujjanā tena tena ārammaṇabhāgena vidhāvitā vositāti.
д̇з звам̣ вид̇хаавид̇аа гим̣ гаронд̇ийд̇и ааха ‘‘барижжаж̇ид̇ваа сад̣̇д̇хаммам̣, ан̃н̃аман̃н̃зхи бхан̣д̣арз’’д̇и. д̇ассад̇т̇о – бадибад̇д̇исад̣̇д̇хаммам̣ чад̣д̣зд̇ваа аамисагин̃ж̇агкахзд̇у ан̃н̃аман̃н̃зхи бхан̣д̣арз галахам̣ гаронд̇ийд̇и. д̣̇идтиг̇ад̇аанийд̇и ‘‘вин̃н̃аан̣амад̇д̇амзва ад̇т̇и, над̇т̇зва руубад̇хаммаа’’д̇и, ‘‘яат̇аа буг̇г̇ало наама барамад̇т̇ад̇о над̇т̇и, звам̣ сабхаавад̇хаммааби барамад̇т̇ад̇о над̇т̇и, вохаарамад̇д̇амзваа’’д̇и жа звамаад̣̇ийни д̣̇идтиг̇ад̇аани мижчааг̇аахз анвзнд̇аа ануг̇ажчанд̇аа ид̣̇ам̣ сзяяо ид̣̇амзва сздтам̣, ан̃н̃ам̣ мижчаад̇и ман̃н̃анд̇и.
Te evaṃ vidhāvitā kiṃ karontīti āha ‘‘pariccajitvā saddhammaṃ, aññamaññehi bhaṇḍare’’ti. Tassattho – paṭipattisaddhammaṃ chaḍḍetvā āmisakiñjakkhahetu aññamaññehi bhaṇḍare kalahaṃ karontīti. Diṭṭhigatānīti ‘‘viññāṇamattameva atthi, nattheva rūpadhammā’’ti, ‘‘yathā puggalo nāma paramatthato natthi, evaṃ sabhāvadhammāpi paramatthato natthi, vohāramattamevā’’ti ca evamādīni diṭṭhigatāni micchāgāhe anventā anugacchantā idaṃ seyyo idameva seṭṭhaṃ, aññaṃ micchāti maññanti.
ниг̇г̇ад̇аад̇и г̇зхад̇о нигканд̇аа. гадажчубхигкахзд̇уубийд̇и гадажчумад̇д̇абхигкаанимид̇д̇амби. д̇ам̣ д̣̇ад̣̇анд̇асса г̇ахадтасса анануломигасам̣саг̇г̇авасзна агижжаани баб̣б̣аж̇ид̇зна агад̇д̇аб̣б̣аани гаммаани нисзварз гаронд̇и.
Niggatāti gehato nikkhantā. Kaṭacchubhikkhahetūpīti kaṭacchumattabhikkhānimittampi. Taṃ dadantassa gahaṭṭhassa ananulomikasaṃsaggavasena akiccāni pabbajitena akattabbāni kammāni nisevare karonti.
уд̣̇араавад̣̇зхагам̣ бхуд̇ваад̇и ‘‘уунууд̣̇аро мид̇аахааро’’д̇и (т̇зраг̇аа. 982; ми. ба. 6.5.10) вуд̇д̇аважанам̣ ажинд̇зд̇ваа уд̣̇арабуурам̣ бхун̃ж̇ид̇ваа. саяанд̇уд̇д̇аанасзяяагаад̇и ‘‘д̣̇агкин̣зна бассзна сийхасзяяам̣ габбзд̇и баад̣̇з баад̣̇ам̣ ажжаад̇хааяа сад̇о самбаж̇аано’’д̇и (а. ни. 8.9; вибха. 519) вуд̇д̇авид̇хаанам̣ анануссарид̇ваа уд̇д̇аанасзяяагаа саяанд̇и. яаа гат̇аа сад̇т̇уг̇арахид̇аад̇и рааж̇агат̇аад̣̇ид̇иражчаанагат̇ам̣ санд̇хааяа вад̣̇ад̇и.
Udarāvadehakaṃ bhutvāti ‘‘ūnūdaro mitāhāro’’ti (theragā. 982; mi. pa. 6.5.10) vuttavacanaṃ acintetvā udarapūraṃ bhuñjitvā. Sayantuttānaseyyakāti ‘‘dakkhiṇena passena sīhaseyyaṃ kappeti pāde pādaṃ accādhāya sato sampajāno’’ti (a. ni. 8.9; vibha. 519) vuttavidhānaṃ ananussaritvā uttānaseyyakā sayanti. Yā kathā satthugarahitāti rājakathāditiracchānakathaṃ sandhāya vadati.
саб̣б̣агааругасиббаанийд̇и саб̣б̣зхи взссаад̣̇ийхи гааругзхи гад̇д̇аб̣б̣аани бхад̇д̇ад̇аалаван̣дагаран̣аад̣̇ийни хад̇т̇асиббаани. жид̇д̇им̣ гад̇ваанаад̇и саггажжам̣ саад̣̇арам̣ гад̇ваа. авуубасанд̇аа аж̇жхад̇д̇анд̇и гилзсавуубасамаабхаавад̇о г̇ад̣̇д̣̇уханамад̇д̇амби самаад̇хаанаабхаавад̇о жа аж̇жхад̇д̇ам̣ авуубасанд̇аа, авуубасанд̇ажид̇д̇аад̇и ад̇т̇о. сааман̃н̃ад̇т̇од̇и саман̣ад̇хаммо. ад̇иажчад̇ийд̇и д̇зсам̣ ааж̇ийвагижжабасуд̇ад̇ааяа згад̣̇зсамби апусанад̇о висум̣язва нисийд̣̇ад̇и, аналлийяад̇ийд̇и вуд̇д̇ам̣ ход̇и.
Sabbakārukasippānīti sabbehi vessādīhi kārukehi kattabbāni bhattatālavaṇṭakaraṇādīni hatthasippāni. Cittiṃ katvānāti sakkaccaṃ sādaraṃ katvā. Avūpasantā ajjhattanti kilesavūpasamābhāvato gadduhanamattampi samādhānābhāvato ca ajjhattaṃ avūpasantā, avūpasantacittāti attho. Sāmaññatthoti samaṇadhammo. Atiacchatīti tesaṃ ājīvakiccapasutatāya ekadesampi aphusanato visuṃyeva nisīdati, anallīyatīti vuttaṃ hoti.
мад̇д̇иганд̇и баагад̇игам̣ ваа бан̃жаван̣н̣ам̣ ваа г̇ихийнам̣ винияог̇агкамам̣ мад̇д̇игам̣. д̇злажун̣н̣ан̃жаад̇и баагад̇игам̣, абхисан̇кад̇ам̣ ваа д̇злан̃жа жун̣н̣ан̃жа. уд̣̇агаасанабхож̇ананд̇и уд̣̇аган̃жа аасанан̃жа бхож̇анан̃жа. ааган̇канд̇аа б̣ахуд̇д̇аранд̇и б̣ахум̣ бин̣д̣абаад̇аад̣̇иуд̇д̇аруд̇д̇арам̣ ааган̇канд̇аа ‘‘амхзхи мад̇д̇игаад̣̇ийсу д̣̇иннзсу мануссаа д̣̇ал̣хабхад̇д̇игаа худ̇ваа б̣ахум̣ уд̇д̇аруд̇д̇арам̣ жад̇убажжаяаж̇аад̇ам̣ д̣̇ассанд̇ий’’д̇и ад̇хиббааязна г̇ихийнам̣ убанаамзнд̇ийд̇и ад̇т̇о.
Mattikanti pākatikaṃ vā pañcavaṇṇaṃ vā gihīnaṃ viniyogakkhamaṃ mattikaṃ. Telacuṇṇañcāti pākatikaṃ, abhisaṅkhataṃ vā telañca cuṇṇañca. Udakāsanabhojananti udakañca āsanañca bhojanañca. Ākaṅkhantā bahuttaranti bahuṃ piṇḍapātādiuttaruttaraṃ ākaṅkhantā ‘‘amhehi mattikādīsu dinnesu manussā daḷhabhattikā hutvā bahuṃ uttaruttaraṃ catupaccayajātaṃ dassantī’’ti adhippāyena gihīnaṃ upanāmentīti attho.
д̣̇анд̇з бунанд̇и сод̇хзнд̇и зд̇знаад̇и д̣̇анд̇абонам̣, д̣̇анд̇агадтам̣. габид̇т̇анд̇и габид̇т̇апалам̣. бубпанд̇и суманажамбагаад̣̇ибубпам̣. каад̣̇анийяаанийд̇и адтаарасавид̇хзби каж̇ж̇агависзсз. бин̣д̣абаад̇з жа самбаннзд̇и ван̣н̣аад̣̇исамбаяуд̇д̇з од̣̇анависзсз. ‘‘амб̣з аамалагаани жаа’’д̇и жа-сад̣̇д̣̇зна маад̇улун̇г̇ад̇ааланаал̣игзраад̣̇ипалаани авуд̇д̇аани сан̇г̇ан̣хаад̇и. саб̣б̣ад̇т̇а г̇ихийнам̣ убанаамзнд̇и ааган̇канд̇аа б̣ахуд̇д̇аранд̇и яож̇анаа.
Dante punanti sodhenti etenāti dantaponaṃ, dantakaṭṭhaṃ. Kapitthanti kapitthaphalaṃ. Pupphanti sumanacampakādipupphaṃ. Khādanīyānīti aṭṭhārasavidhepi khajjakavisese. Piṇḍapāte ca sampanneti vaṇṇādisampayutte odanavisese. ‘‘Ambe āmalakāni cā’’ti ca-saddena mātuluṅgatālanāḷikerādiphalāni avuttāni saṅgaṇhāti. Sabbattha gihīnaṃ upanāmenti ākaṅkhantā bahuttaranti yojanā.
бхзсаж̇ж̇зсу яат̇аа взж̇ж̇аад̇и г̇ихийнам̣ бхзсаж̇ж̇аббаяог̇зсу яат̇аа взж̇ж̇аа, д̇ат̇аа бхигкуу бадибаж̇ж̇анд̇ийд̇и ад̇хиббааяо. гижжаагижжз яат̇аа г̇ихийд̇и г̇ахадтаанам̣ куд̣̇д̣̇агз жзва маханд̇з жа гижжз гад̇д̇аб̣б̣з г̇ихий вияа. г̇ан̣игаава вибхуусааяанд̇и ад̇д̇ано сарийрасса вибхуусанз руубуубаж̇ийвинияо вияа. иссарз кад̇д̇ияаа яат̇аад̇и иссарз иссарияабавад̇д̇анз яат̇аа кад̇д̇ияаа, звам̣ гулабад̇ий худ̇ваа вад̇д̇анд̇ийд̇и ад̇т̇о.
Bhesajjesu yathā vejjāti gihīnaṃ bhesajjappayogesu yathā vejjā, tathā bhikkhū paṭipajjantīti adhippāyo. Kiccākicce yathā gihīti gahaṭṭhānaṃ khuddake ceva mahante ca kicce kattabbe gihī viya. Gaṇikāva vibhūsāyanti attano sarīrassa vibhūsane rūpūpajīviniyo viya. Issare khattiyā yathāti issare issariyapavattane yathā khattiyā, evaṃ kulapatī hutvā vattantīti attho.
нзгад̇игаад̇и нигад̇ияам̣ нияуд̇д̇аа, аман̣им̣язва ман̣им̣, асуван̣н̣ам̣язва суван̣н̣ам̣ гад̇ваа бадируубасаажияог̇анирад̇аа. ван̃жанигаад̇и гуудамаанаад̣̇ийхи виббаламб̣агаа. гуудасагкийд̇и аяаат̇аавасагкино. абаадугаад̇и ваамагаа, асам̣яад̇авуд̇д̇ийд̇и ад̇т̇о. б̣ахуухи баригаббзхийд̇и яат̇аавуд̇д̇зхи ан̃н̃зхи жа б̣ахуухи мижчааж̇ийваббагаарзхи.
Nekatikāti nikatiyaṃ niyuttā, amaṇiṃyeva maṇiṃ, asuvaṇṇaṃyeva suvaṇṇaṃ katvā paṭirūpasāciyoganiratā. Vañcanikāti kūṭamānādīhi vippalambakā. Kūṭasakkhīti ayāthāvasakkhino. Apāṭukāti vāmakā, asaṃyatavuttīti attho. Bahūhi parikappehīti yathāvuttehi aññehi ca bahūhi micchājīvappakārehi.
лзсагаббзд̇и габбияалзсз габбияабадируубз. барияааязд̇и, бажжаязсу барияааяасса яог̇з. баригаббзд̇и вад̣дхиаад̣̇ивигаббанз, саб̣б̣ад̇т̇а висаяз бхуммам̣. ануд̇хаавид̇аад̇и махижчад̇аад̣̇ийхи баабад̇хаммзхи ануд̇хаавид̇аа восид̇аа. ж̇ийвигад̇т̇аа ж̇ийвигаббаяож̇анаа ааж̇ийвахзд̇угаа. убааязнаад̇и баригат̇аад̣̇инаа убааязна бажжаяуббаад̣̇ананаязна. сан̇гад̣дханд̇ийд̇и сам̣харанд̇и.
Lesakappeti kappiyalese kappiyapaṭirūpe. Pariyāyeti, paccayesu pariyāyassa yoge. Parikappeti vaḍḍhiādivikappane, sabbattha visaye bhummaṃ. Anudhāvitāti mahicchatādīhi pāpadhammehi anudhāvitā vositā. Jīvikatthā jīvikappayojanā ājīvahetukā. Upāyenāti parikathādinā upāyena paccayuppādananayena. Saṅkaḍḍhantīti saṃharanti.
убадтаабзнд̇и барисанд̇и барисааяа ад̇д̇аанам̣ убадтабзнд̇и, яат̇аа барисаа ад̇д̇аанам̣ убадтабзнд̇и, звам̣ барисам̣ сан̇г̇ан̣ханд̇ийд̇и ад̇т̇о. гаммад̇од̇и гаммахзд̇у. д̇з хи ад̇д̇ано гад̇д̇аб̣б̣авзяяааважжанимид̇д̇ам̣ убадтабзнд̇и. но жа д̇хаммад̇од̇и д̇хамманимид̇д̇ам̣ но жа убадтабзнд̇и. яо сад̇т̇аараа уллумбанасабхаавасан̣тид̇ааяа барисааяа сан̇г̇ахо анун̃н̃аад̇о, д̇зна на сан̇г̇ан̣ханд̇ийд̇и ад̇т̇о. лаабхад̇од̇и лаабхахзд̇у, ‘‘аяяо б̣ахуссуд̇о, бхаан̣аго, ‘д̇хаммагат̇иго’д̇и звам̣ самбхаавзнд̇о махааж̇ано маяхам̣ лаабхасаггаарз убанаяиссад̇ий’’д̇и ижчаажаарз тад̇ваа лаабханимид̇д̇ам̣ барзсам̣ д̇хаммам̣ д̣̇зсзнд̇и. но жа ад̇т̇ад̇од̇и яо со вимуд̇д̇ааяад̇анасийсз тад̇ваа сад̣̇д̇хаммам̣ гат̇знд̇зна бад̇д̇аб̣б̣о ад̇т̇о, на д̇ам̣д̣̇идтад̇хаммигаад̣̇ибхзд̣̇ахид̇анимид̇д̇ам̣ д̇хаммам̣ д̣̇зсзнд̇ийд̇и ад̇т̇о.
Upaṭṭhāpenti parisanti parisāya attānaṃ upaṭṭhapenti, yathā parisā attānaṃ upaṭṭhapenti, evaṃ parisaṃ saṅgaṇhantīti attho. Kammatoti kammahetu. Te hi attano kattabbaveyyāvaccanimittaṃ upaṭṭhapenti. No ca dhammatoti dhammanimittaṃ no ca upaṭṭhapenti. Yo satthārā ullumpanasabhāvasaṇṭhitāya parisāya saṅgaho anuññāto, tena na saṅgaṇhantīti attho. Lābhatoti lābhahetu, ‘‘ayyo bahussuto, bhāṇako, ‘dhammakathiko’ti evaṃ sambhāvento mahājano mayhaṃ lābhasakkāre upanayissatī’’ti icchācāre ṭhatvā lābhanimittaṃ paresaṃ dhammaṃ desenti. No ca atthatoti yo so vimuttāyatanasīse ṭhatvā saddhammaṃ kathentena pattabbo attho, na taṃdiṭṭhadhammikādibhedahitanimittaṃ dhammaṃ desentīti attho.
сан̇гхалаабхасса бхан̣д̣анд̇ийд̇и сан̇гхалаабхахзд̇у бхан̣д̣анд̇и ‘‘маяхам̣ баабун̣аад̇и, на д̇уяха’’нд̇иаад̣̇инаа галахам̣ гаронд̇и. сан̇гхад̇о бариб̣аахираад̇и, арияасан̇гхад̇о б̣ахибхууд̇аа арияасан̇гхз д̇ад̣̇абхаавад̇о. баралаабхобаж̇ийванд̇аад̇и саасанз лаабхасса анд̇хаб̣аалабут̇уж̇ж̇анзхи барз сийлаад̣̇иг̇ун̣асамбаннз сзгкз уд̣̇д̣̇исса уббаннад̇д̇аа д̇ам̣ баралаабхам̣, барад̇о ваа д̣̇ааяагад̇о лад̣̇д̇хаб̣б̣алаабхам̣ убаж̇ийванд̇аа бхан̣д̣анагаарагаа бхигкуу баабаж̇иг̇ужчааяа абхаавад̇о ахиригаа самаанаа жа ‘‘маяам̣ баралаабхам̣ бхун̃ж̇аама, барабадиб̣ад̣̇д̇хаж̇ийвигаа’’д̇иби на лаж̇ж̇арз на хирийяанд̇и.
Saṅghalābhassa bhaṇḍantīti saṅghalābhahetu bhaṇḍanti ‘‘mayhaṃ pāpuṇāti, na tuyha’’ntiādinā kalahaṃ karonti. Saṅghato paribāhirāti, ariyasaṅghato bahibhūtā ariyasaṅghe tadabhāvato. Paralābhopajīvantāti sāsane lābhassa andhabālaputhujjanehi pare sīlādiguṇasampanne sekkhe uddissa uppannattā taṃ paralābhaṃ, parato vā dāyakato laddhabbalābhaṃ upajīvantā bhaṇḍanakārakā bhikkhū pāpajigucchāya abhāvato ahirikā samānā ca ‘‘mayaṃ paralābhaṃ bhuñjāma, parapaṭibaddhajīvikā’’tipi na lajjare na hirīyanti.
наануяуд̇д̇аад̇и саман̣агаран̣зхи д̇хаммзхи анануяуд̇д̇аа. д̇ат̇аад̇и яат̇аа буб̣б̣з вуд̇д̇аа б̣анд̇ханагаарагаад̣̇аяо, д̇ат̇аа. згзд̇и згажжз. мун̣д̣аа сан̇гхаадибааруд̇аад̇и гзвалам̣ мун̣д̣ид̇агзсад̇ааяа мун̣д̣аа билод̇игакан̣д̣зхи сан̇гхадид̇адтзна ‘‘сан̇гхаадий’’д̇и лад̣̇д̇ханаамзна жийварзна бааруд̇асарийраа. самбхааванам̣язвижчанд̇и, лаабхасаггаарамужчид̇аад̇и лаабхасаггаараасааяа мужчид̇аа аж̇жхосид̇аа худ̇ваа, ‘‘бзсало д̇худ̇аваад̣̇о б̣ахуссуд̇о’’д̇и ваа мад̇хураважанамануяуд̇д̇аа ‘‘арияо’’д̇и жа гзвалам̣ самбхааванам̣ б̣ахумаанам̣язва ижчанд̇и зсанд̇и, на д̇аннимид̇д̇з г̇ун̣зд̇и ад̇т̇о.
Nānuyuttāti samaṇakaraṇehi dhammehi ananuyuttā. Tathāti yathā pubbe vuttā bandhanakārakādayo, tathā. Eketi ekacce. Muṇḍā saṅghāṭipārutāti kevalaṃ muṇḍitakesatāya muṇḍā pilotikakhaṇḍehi saṅghaṭitaṭṭhena ‘‘saṅghāṭī’’ti laddhanāmena cīvarena pārutasarīrā. Sambhāvanaṃyevicchanti, lābhasakkāramucchitāti lābhasakkārāsāya mucchitā ajjhositā hutvā, ‘‘pesalo dhutavādo bahussuto’’ti vā madhuravacanamanuyuttā ‘‘ariyo’’ti ca kevalaṃ sambhāvanaṃ bahumānaṃyeva icchanti esanti, na tannimitte guṇeti attho.
званд̇и ‘‘гусалаанан̃жа д̇хаммаанам̣ бан̃н̃ааяа жа баригкаяаа’’д̇и вуд̇д̇анаязна. наанаббаяаад̇амхийд̇и наанаббагаарз бхзд̣̇анад̇хаммз баяаад̇з самагад̇з, наанаббагаарзна ваа сам̣гилзсад̇хаммз баяаад̇ум̣ бавад̇д̇ид̇ум̣ аарад̣̇д̇хз. на д̣̇аани сугарам̣ д̇ат̇аад̇и ид̣̇аани имасмим̣ д̣̇уллабхагаляаан̣амид̇д̇з д̣̇уллабхасаббааяасад̣̇д̇хаммассаванз жа гаалз яат̇аа сад̇т̇ари д̇харанд̇з апусид̇ам̣ апудтам̣, анад̇хиг̇ад̇ам̣ жхаанавибассанам̣ пусид̇ум̣ ад̇хиг̇анд̇ум̣, пусид̇ам̣ ваа хаанабхааг̇ияам̣ тид̇ибхааг̇ияамзва ваа ахуд̇ваа яат̇аа висзсабхааг̇ияам̣ ход̇и, д̇ат̇аа анурагкид̇ум̣ баалзд̇ум̣ сугарам̣, д̇ат̇аа на сугарам̣, д̇ат̇аа самбаад̣̇зд̇ум̣ на саггаад̇и ад̇т̇о.
Evanti ‘‘kusalānañca dhammānaṃ paññāya ca parikkhayā’’ti vuttanayena. Nānappayātamhīti nānappakāre bhedanadhamme payāte samakate, nānappakārena vā saṃkilesadhamme payātuṃ pavattituṃ āraddhe. Na dāni sukaraṃ tathāti idāni imasmiṃ dullabhakalyāṇamitte dullabhasappāyasaddhammassavane ca kāle yathā satthari dharante aphusitaṃ aphuṭṭhaṃ, anadhigataṃ jhānavipassanaṃ phusituṃ adhigantuṃ, phusitaṃ vā hānabhāgiyaṃ ṭhitibhāgiyameva vā ahutvā yathā visesabhāgiyaṃ hoti, tathā anurakkhituṃ pāletuṃ sukaraṃ, tathā na sukaraṃ, tathā sampādetuṃ na sakkāti attho.
ид̣̇аани ад̇д̇ано бариниб̣б̣аанагааласса аасаннад̇д̇аа сам̣кид̇д̇зна оваад̣̇зна саб̣рахмажаарим̣ овад̣̇анд̇о ‘‘яат̇аа ган̣дагадтаанамхий’’д̇иаад̣̇имааха. д̇ассад̇т̇о – яат̇аа бурисо гзнажид̣̇зва баяож̇анзна ган̣даганижид̇з бад̣̇зсз анубаахано вижаранд̇о ‘‘маа мам̣ ган̣даго виж̇жхий’’д̇и сад̇им̣ убадтабзд̇ваава вижарад̇и, звам̣ гилзсаган̣даганижид̇з г̇ожараг̇аамз баяож̇анзна жаранд̇о муни сад̇им̣ убадтабзд̇ваана сад̇исамбаж̇ан̃н̃аяуд̇д̇о аббамад̇д̇ова жарзяяа гаммадтаанам̣ авиж̇аханд̇од̇и вуд̇д̇ам̣ ход̇и.
Idāni attano parinibbānakālassa āsannattā saṃkhittena ovādena sabrahmacāriṃ ovadanto ‘‘yathā kaṇṭakaṭṭhānamhī’’tiādimāha. Tassattho – yathā puriso kenacideva payojanena kaṇṭakanicite padese anupāhano vicaranto ‘‘mā maṃ kaṇṭako vijjhī’’ti satiṃ upaṭṭhapetvāva vicarati, evaṃ kilesakaṇṭakanicite gocaragāme payojanena caranto muni satiṃ upaṭṭhapetvāna satisampajaññayutto appamattova careyya kammaṭṭhānaṃ avijahantoti vuttaṃ hoti.
сарид̇ваа буб̣б̣агз яог̇ий, д̇зсам̣ вад̇д̇амануссаранд̇и буримагз яог̇з бхааванааяа яуд̇д̇ад̇ааяа яог̇ий аарад̣̇д̇хавибассагз сарид̇ваа д̇зсам̣ вад̇д̇ам̣ ааг̇амаанусаарзна саммаабадибад̇д̇ибхааванаавид̇хим̣ ануссаранд̇о д̇хуранигкзбам̣ агад̇ваа яат̇аабадибаж̇ж̇анд̇о. гин̃жааби бажчимо гаалод̇и яад̣̇ибааяам̣ ад̇ийд̇асад̇т̇уго жаримо гаало, д̇ат̇ааби яат̇аад̇хаммамзва бадибаж̇ж̇анд̇о вибассанам̣ уссуггаабзнд̇о пусзяяа амад̇ам̣ бад̣̇ам̣ ниб̣б̣аанам̣ ад̇хиг̇ажчзяяа.
Saritvā pubbake yogī, tesaṃ vattamanussaranti purimake yoge bhāvanāya yuttatāya yogī āraddhavipassake saritvā tesaṃ vattaṃ āgamānusārena sammāpaṭipattibhāvanāvidhiṃ anussaranto dhuranikkhepaṃ akatvā yathāpaṭipajjanto. Kiñcāpi pacchimo kāloti yadipāyaṃ atītasatthuko carimo kālo, tathāpi yathādhammameva paṭipajjanto vipassanaṃ ussukkāpento phuseyya amataṃ padaṃ nibbānaṃ adhigaccheyya.
ид̣̇ам̣ вад̇ваад̇и, яат̇аад̣̇ассид̇ам̣ сам̣гилзсавод̣̇аанзсу имам̣ бадибад̇д̇ивид̇хим̣ гат̇зд̇ваа. аяан̃жа осаанаг̇аат̇аа сан̇г̇ийд̇игаарзхи т̇зрасса бариниб̣б̣аанам̣ багаасзд̇ум̣ вуд̇д̇аад̇и взд̣̇ид̇аб̣б̣аа.
Idaṃ vatvāti, yathādassitaṃ saṃkilesavodānesu imaṃ paṭipattividhiṃ kathetvā. Ayañca osānagāthā saṅgītikārehi therassa parinibbānaṃ pakāsetuṃ vuttāti veditabbā.
баараабарияад̇т̇зраг̇аат̇ааван̣н̣анаа нидтид̇аа.
Pārāpariyattheragāthāvaṇṇanā niṭṭhitā.
вийсад̇инибаад̇аван̣н̣анаа нидтид̇аа.
Vīsatinipātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 10. баараабарияад̇т̇зраг̇аат̇аа • 10. Pārāpariyattheragāthā
