| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. பரப்பஸாத³கத்தே²ரஅபதா³னவண்ணனா
4. Parappasādakattheraapadānavaṇṇanā
உஸப⁴ங் பவரங் வீரந்திஆதி³கங் ஆயஸ்மதோ பரப்பஸாத³கத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ திண்ணங் வேதா³னங் பாரகூ³ இதிஹாஸபஞ்சமானங் பத³கோ வெய்யாகரணோ ஸனிக⁴ண்டு³கேடுபா⁴னங் ஸாக்க²ரப்பபே⁴தா³னங் லோகாயதமஹாபுரிஸலக்க²ணேஸு அனவயோ நாமேன ஸேலப்³ராஹ்மணோதி பாகடோ ஸித்³த⁴த்த²ங் ப⁴க³வந்தங் தி³ஸ்வா த்³வத்திங்ஸமஹாபுரிஸலக்க²ணேஹி அஸீதிஅனுப்³யஞ்ஜனேஹி சாதி ஸயங் ஸோப⁴மானங் தி³ஸ்வா பஸன்னமானஸோ அனேகேஹி காரணேஹி அனேகாஹி உபமாஹி தோ²மனங் பகாஸேஸி. ஸோ தேன புஞ்ஞகம்மேன தே³வலோகே ஸக்கமாராத³யோ ச² காமாவசரஸம்பத்தியோ அனுப⁴வித்வா மனுஸ்ஸேஸு சக்கவத்திஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ ஸத்த²ரி பஸீதி³ஸ்வா பப்³ப³ஜிதோ நசிரஸ்ஸேவ சதுபடிஸம்பி⁴தா³ச²ளபி⁴ஞ்ஞப்பத்தோ மஹாகீ²ணாஸவோ அஹோஸி, பு³த்³த⁴ஸ்ஸ து²தியா ஸத்தானங் ஸப்³பே³ஸங் சித்தப்பஸாத³கரணதோ பரப்பஸாத³கத்தே²ரோதி பாகடோ.
Usabhaṃ pavaraṃ vīrantiādikaṃ āyasmato parappasādakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle brāhmaṇakule nibbatto tiṇṇaṃ vedānaṃ pāragū itihāsapañcamānaṃ padako veyyākaraṇo sanighaṇḍukeṭubhānaṃ sākkharappabhedānaṃ lokāyatamahāpurisalakkhaṇesu anavayo nāmena selabrāhmaṇoti pākaṭo siddhatthaṃ bhagavantaṃ disvā dvattiṃsamahāpurisalakkhaṇehi asītianubyañjanehi cāti sayaṃ sobhamānaṃ disvā pasannamānaso anekehi kāraṇehi anekāhi upamāhi thomanaṃ pakāsesi. So tena puññakammena devaloke sakkamārādayo cha kāmāvacarasampattiyo anubhavitvā manussesu cakkavattisampattiṃ anubhavitvā imasmiṃ buddhuppāde vibhavasampanne ekasmiṃ kulagehe nibbatto viññutaṃ patto satthari pasīdisvā pabbajito nacirasseva catupaṭisambhidāchaḷabhiññappatto mahākhīṇāsavo ahosi, buddhassa thutiyā sattānaṃ sabbesaṃ cittappasādakaraṇato parappasādakattheroti pākaṭo.
20. ஏகதி³வஸங் அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ உஸப⁴ங் பவரங் வீரந்திஆதி³மாஹ. தத்த² உஸப⁴ந்தி வஸபோ⁴ நிஸபோ⁴ விஸபோ⁴ ஆஸபோ⁴தி சத்தாரோ ஜெட்ட²புங்க³வா. தத்த² க³வஸதஜெட்ட²கோ வஸபோ⁴, க³வஸஹஸ்ஸஜெட்ட²கோ நிஸபோ⁴, க³வஸதஸஹஸ்ஸஜெட்ட²கோ விஸபோ⁴, க³வகோடிஸதஸஹஸ்ஸஜெட்ட²கோ ஆஸபோ⁴தி ச யஸ்ஸ கஸ்ஸசி து²திங் கரொந்தா ப்³ராஹ்மணபண்டி³தா ப³ஹுஸ்ஸுதா அத்தனோ அத்தனோ பஞ்ஞாவஸேன து²திங் கரொந்தி, பு³த்³தா⁴னங் பன ஸப்³பா³காரேன து²திங் காதுங் ஸமத்தோ² ஏகோபி நத்தி². அப்பமெய்யோ ஹி பு³த்³தோ⁴. வுத்தஞ்ஹேதங் –
20. Ekadivasaṃ attano pubbakammaṃ saritvā somanassajāto pubbacaritāpadānaṃ pakāsento usabhaṃ pavaraṃ vīrantiādimāha. Tattha usabhanti vasabho nisabho visabho āsabhoti cattāro jeṭṭhapuṅgavā. Tattha gavasatajeṭṭhako vasabho, gavasahassajeṭṭhako nisabho, gavasatasahassajeṭṭhako visabho, gavakoṭisatasahassajeṭṭhako āsabhoti ca yassa kassaci thutiṃ karontā brāhmaṇapaṇḍitā bahussutā attano attano paññāvasena thutiṃ karonti, buddhānaṃ pana sabbākārena thutiṃ kātuṃ samattho ekopi natthi. Appameyyo hi buddho. Vuttañhetaṃ –
‘‘பு³த்³தோ⁴பி பு³த்³த⁴ஸ்ஸ ப⁴ணெய்ய வண்ணங், கப்பம்பி சே அஞ்ஞமபா⁴ஸமானோ;
‘‘Buddhopi buddhassa bhaṇeyya vaṇṇaṃ, kappampi ce aññamabhāsamāno;
கீ²யேத² கப்போ சிரதீ³க⁴மந்தரே, வண்ணோ ந கீ²யேத² ததா²க³தஸ்ஸா’’தி. (தீ³॰ நி॰ அட்ட²॰ 1.304; 3.141; ம॰ நி॰ அட்ட²॰ 2.425; உதா³॰ அட்ட²॰ 53) –
Khīyetha kappo ciradīghamantare, vaṇṇo na khīyetha tathāgatassā’’ti. (dī. ni. aṭṭha. 1.304; 3.141; ma. ni. aṭṭha. 2.425; udā. aṭṭha. 53) –
ஆதி³கங். அயம்பி ப்³ராஹ்மணோ முகா²ரூள்ஹவஸேன ஏகபஸீத³னவஸேன ‘‘ஆஸப⁴’’ந்தி வத்தப்³பே³ ‘‘உஸப⁴’’ந்திஆதி³மாஹ. வரிதப்³போ³ பத்தே²தப்³போ³தி வரோ. அனேகேஸு கப்பஸதஸஹஸ்ஸேஸு கதவீரியத்தா வீரோ. மஹந்தங் ஸீலக்க²ந்தா⁴தி³கங் ஏஸதி க³வேஸதீதி மஹேஸீ, தங் மஹேஸிங் பு³த்³த⁴ங். விஸேஸேன கிலேஸக²ந்த⁴மாராத³யோ மாரே ஜிதவாதி விஜிதாவீ, தங் விஜிதாவினங் ஸம்பு³த்³த⁴ங். ஸுவண்ணஸ்ஸ வண்ணோ இவ வண்ணோ யஸ்ஸ ஸம்பு³த்³த⁴ஸ்ஸ ஸோ ஸுவண்ணவண்ணோ, தங் ஸுவண்ணவண்ணங் ஸம்பு³த்³த⁴ங் தி³ஸ்வா கோ நாம ஸத்தோ நப்பஸீத³தீதி.
Ādikaṃ. Ayampi brāhmaṇo mukhārūḷhavasena ekapasīdanavasena ‘‘āsabha’’nti vattabbe ‘‘usabha’’ntiādimāha. Varitabbo patthetabboti varo. Anekesu kappasatasahassesu katavīriyattā vīro. Mahantaṃ sīlakkhandhādikaṃ esati gavesatīti mahesī, taṃ mahesiṃ buddhaṃ. Visesena kilesakhandhamārādayo māre jitavāti vijitāvī, taṃ vijitāvinaṃ sambuddhaṃ. Suvaṇṇassa vaṇṇo iva vaṇṇo yassa sambuddhassa so suvaṇṇavaṇṇo, taṃ suvaṇṇavaṇṇaṃ sambuddhaṃ disvā ko nāma satto nappasīdatīti.
பரப்பஸாத³கத்தே²ரஅபதா³னவண்ணனா ஸமத்தா.
Parappasādakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. பரப்பஸாத³கத்தே²ரஅபதா³னங் • 4. Parappasādakattheraapadānaṃ
