| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৪. পরপ্পসাদকত্থেরঅপদানৰণ্ণনা
4. Parappasādakattheraapadānavaṇṇanā
উসভং পৰরং ৰীরন্তিআদিকং আযস্মতো পরপ্পসাদকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে ব্রাহ্মণকুলে নিব্বত্তো তিণ্ণং ৰেদানং পারগূ ইতিহাসপঞ্চমানং পদকো ৰেয্যাকরণো সনিঘণ্ডুকেটুভানং সাক্খরপ্পভেদানং লোকাযতমহাপুরিসলক্খণেসু অনৰযো নামেন সেলব্রাহ্মণোতি পাকটো সিদ্ধত্থং ভগৰন্তং দিস্ৰা দ্ৰত্তিংসমহাপুরিসলক্খণেহি অসীতিঅনুব্যঞ্জনেহি চাতি সযং সোভমানং দিস্ৰা পসন্নমানসো অনেকেহি কারণেহি অনেকাহি উপমাহি থোমনং পকাসেসি। সো তেন পুঞ্ঞকম্মেন দেৰলোকে সক্কমারাদযো ছ কামাৰচরসম্পত্তিযো অনুভৰিত্ৰা মনুস্সেসু চক্কৰত্তিসম্পত্তিং অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো ৰিঞ্ঞুতং পত্তো সত্থরি পসীদিস্ৰা পব্বজিতো নচিরস্সেৰ চতুপটিসম্ভিদাছল়ভিঞ্ঞপ্পত্তো মহাখীণাসৰো অহোসি, বুদ্ধস্স থুতিযা সত্তানং সব্বেসং চিত্তপ্পসাদকরণতো পরপ্পসাদকত্থেরোতি পাকটো।
Usabhaṃ pavaraṃ vīrantiādikaṃ āyasmato parappasādakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle brāhmaṇakule nibbatto tiṇṇaṃ vedānaṃ pāragū itihāsapañcamānaṃ padako veyyākaraṇo sanighaṇḍukeṭubhānaṃ sākkharappabhedānaṃ lokāyatamahāpurisalakkhaṇesu anavayo nāmena selabrāhmaṇoti pākaṭo siddhatthaṃ bhagavantaṃ disvā dvattiṃsamahāpurisalakkhaṇehi asītianubyañjanehi cāti sayaṃ sobhamānaṃ disvā pasannamānaso anekehi kāraṇehi anekāhi upamāhi thomanaṃ pakāsesi. So tena puññakammena devaloke sakkamārādayo cha kāmāvacarasampattiyo anubhavitvā manussesu cakkavattisampattiṃ anubhavitvā imasmiṃ buddhuppāde vibhavasampanne ekasmiṃ kulagehe nibbatto viññutaṃ patto satthari pasīdisvā pabbajito nacirasseva catupaṭisambhidāchaḷabhiññappatto mahākhīṇāsavo ahosi, buddhassa thutiyā sattānaṃ sabbesaṃ cittappasādakaraṇato parappasādakattheroti pākaṭo.
২০. একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো উসভং পৰরং ৰীরন্তিআদিমাহ। তত্থ উসভন্তি ৰসভো নিসভো ৰিসভো আসভোতি চত্তারো জেট্ঠপুঙ্গৰা। তত্থ গৰসতজেট্ঠকো ৰসভো, গৰসহস্সজেট্ঠকো নিসভো, গৰসতসহস্সজেট্ঠকো ৰিসভো, গৰকোটিসতসহস্সজেট্ঠকো আসভোতি চ যস্স কস্সচি থুতিং করোন্তা ব্রাহ্মণপণ্ডিতা বহুস্সুতা অত্তনো অত্তনো পঞ্ঞাৰসেন থুতিং করোন্তি, বুদ্ধানং পন সব্বাকারেন থুতিং কাতুং সমত্থো একোপি নত্থি। অপ্পমেয্যো হি বুদ্ধো। ৰুত্তঞ্হেতং –
20. Ekadivasaṃ attano pubbakammaṃ saritvā somanassajāto pubbacaritāpadānaṃ pakāsento usabhaṃ pavaraṃ vīrantiādimāha. Tattha usabhanti vasabho nisabho visabho āsabhoti cattāro jeṭṭhapuṅgavā. Tattha gavasatajeṭṭhako vasabho, gavasahassajeṭṭhako nisabho, gavasatasahassajeṭṭhako visabho, gavakoṭisatasahassajeṭṭhako āsabhoti ca yassa kassaci thutiṃ karontā brāhmaṇapaṇḍitā bahussutā attano attano paññāvasena thutiṃ karonti, buddhānaṃ pana sabbākārena thutiṃ kātuṃ samattho ekopi natthi. Appameyyo hi buddho. Vuttañhetaṃ –
‘‘বুদ্ধোপি বুদ্ধস্স ভণেয্য ৰণ্ণং, কপ্পম্পি চে অঞ্ঞমভাসমানো।
‘‘Buddhopi buddhassa bhaṇeyya vaṇṇaṃ, kappampi ce aññamabhāsamāno;
খীযেথ কপ্পো চিরদীঘমন্তরে, ৰণ্ণো ন খীযেথ তথাগতস্সা’’তি॥ (দী॰ নি॰ অট্ঠ॰ ১.৩০৪; ৩.১৪১; ম॰ নি॰ অট্ঠ॰ ২.৪২৫; উদা॰ অট্ঠ॰ ৫৩) –
Khīyetha kappo ciradīghamantare, vaṇṇo na khīyetha tathāgatassā’’ti. (dī. ni. aṭṭha. 1.304; 3.141; ma. ni. aṭṭha. 2.425; udā. aṭṭha. 53) –
আদিকং। অযম্পি ব্রাহ্মণো মুখারূল়্হৰসেন একপসীদনৰসেন ‘‘আসভ’’ন্তি ৰত্তব্বে ‘‘উসভ’’ন্তিআদিমাহ। ৰরিতব্বো পত্থেতব্বোতি ৰরো। অনেকেসু কপ্পসতসহস্সেসু কতৰীরিযত্তা ৰীরো। মহন্তং সীলক্খন্ধাদিকং এসতি গৰেসতীতি মহেসী, তং মহেসিং বুদ্ধং। ৰিসেসেন কিলেসখন্ধমারাদযো মারে জিতৰাতি ৰিজিতাৰী, তং ৰিজিতাৰিনং সম্বুদ্ধং। সুৰণ্ণস্স ৰণ্ণো ইৰ ৰণ্ণো যস্স সম্বুদ্ধস্স সো সুৰণ্ণৰণ্ণো, তং সুৰণ্ণৰণ্ণং সম্বুদ্ধং দিস্ৰা কো নাম সত্তো নপ্পসীদতীতি।
Ādikaṃ. Ayampi brāhmaṇo mukhārūḷhavasena ekapasīdanavasena ‘‘āsabha’’nti vattabbe ‘‘usabha’’ntiādimāha. Varitabbo patthetabboti varo. Anekesu kappasatasahassesu katavīriyattā vīro. Mahantaṃ sīlakkhandhādikaṃ esati gavesatīti mahesī, taṃ mahesiṃ buddhaṃ. Visesena kilesakhandhamārādayo māre jitavāti vijitāvī, taṃ vijitāvinaṃ sambuddhaṃ. Suvaṇṇassa vaṇṇo iva vaṇṇo yassa sambuddhassa so suvaṇṇavaṇṇo, taṃ suvaṇṇavaṇṇaṃ sambuddhaṃ disvā ko nāma satto nappasīdatīti.
পরপ্পসাদকত্থেরঅপদানৰণ্ণনা সমত্তা।
Parappasādakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৪. পরপ্পসাদকত্থেরঅপদানং • 4. Parappasādakattheraapadānaṃ
