| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೪. ಪರಪ್ಪಸಾದಕತ್ಥೇರಅಪದಾನವಣ್ಣನಾ
4. Parappasādakattheraapadānavaṇṇanā
ಉಸಭಂ ಪವರಂ ವೀರನ್ತಿಆದಿಕಂ ಆಯಸ್ಮತೋ ಪರಪ್ಪಸಾದಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿದ್ಧತ್ಥಸ್ಸ ಭಗವತೋ ಕಾಲೇ ಬ್ರಾಹ್ಮಣಕುಲೇ ನಿಬ್ಬತ್ತೋ ತಿಣ್ಣಂ ವೇದಾನಂ ಪಾರಗೂ ಇತಿಹಾಸಪಞ್ಚಮಾನಂ ಪದಕೋ ವೇಯ್ಯಾಕರಣೋ ಸನಿಘಣ್ಡುಕೇಟುಭಾನಂ ಸಾಕ್ಖರಪ್ಪಭೇದಾನಂ ಲೋಕಾಯತಮಹಾಪುರಿಸಲಕ್ಖಣೇಸು ಅನವಯೋ ನಾಮೇನ ಸೇಲಬ್ರಾಹ್ಮಣೋತಿ ಪಾಕಟೋ ಸಿದ್ಧತ್ಥಂ ಭಗವನ್ತಂ ದಿಸ್ವಾ ದ್ವತ್ತಿಂಸಮಹಾಪುರಿಸಲಕ್ಖಣೇಹಿ ಅಸೀತಿಅನುಬ್ಯಞ್ಜನೇಹಿ ಚಾತಿ ಸಯಂ ಸೋಭಮಾನಂ ದಿಸ್ವಾ ಪಸನ್ನಮಾನಸೋ ಅನೇಕೇಹಿ ಕಾರಣೇಹಿ ಅನೇಕಾಹಿ ಉಪಮಾಹಿ ಥೋಮನಂ ಪಕಾಸೇಸಿ। ಸೋ ತೇನ ಪುಞ್ಞಕಮ್ಮೇನ ದೇವಲೋಕೇ ಸಕ್ಕಮಾರಾದಯೋ ಛ ಕಾಮಾವಚರಸಮ್ಪತ್ತಿಯೋ ಅನುಭವಿತ್ವಾ ಮನುಸ್ಸೇಸು ಚಕ್ಕವತ್ತಿಸಮ್ಪತ್ತಿಂ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ವಿಭವಸಮ್ಪನ್ನೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಸತ್ಥರಿ ಪಸೀದಿಸ್ವಾ ಪಬ್ಬಜಿತೋ ನಚಿರಸ್ಸೇವ ಚತುಪಟಿಸಮ್ಭಿದಾಛಳಭಿಞ್ಞಪ್ಪತ್ತೋ ಮಹಾಖೀಣಾಸವೋ ಅಹೋಸಿ, ಬುದ್ಧಸ್ಸ ಥುತಿಯಾ ಸತ್ತಾನಂ ಸಬ್ಬೇಸಂ ಚಿತ್ತಪ್ಪಸಾದಕರಣತೋ ಪರಪ್ಪಸಾದಕತ್ಥೇರೋತಿ ಪಾಕಟೋ।
Usabhaṃ pavaraṃ vīrantiādikaṃ āyasmato parappasādakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle brāhmaṇakule nibbatto tiṇṇaṃ vedānaṃ pāragū itihāsapañcamānaṃ padako veyyākaraṇo sanighaṇḍukeṭubhānaṃ sākkharappabhedānaṃ lokāyatamahāpurisalakkhaṇesu anavayo nāmena selabrāhmaṇoti pākaṭo siddhatthaṃ bhagavantaṃ disvā dvattiṃsamahāpurisalakkhaṇehi asītianubyañjanehi cāti sayaṃ sobhamānaṃ disvā pasannamānaso anekehi kāraṇehi anekāhi upamāhi thomanaṃ pakāsesi. So tena puññakammena devaloke sakkamārādayo cha kāmāvacarasampattiyo anubhavitvā manussesu cakkavattisampattiṃ anubhavitvā imasmiṃ buddhuppāde vibhavasampanne ekasmiṃ kulagehe nibbatto viññutaṃ patto satthari pasīdisvā pabbajito nacirasseva catupaṭisambhidāchaḷabhiññappatto mahākhīṇāsavo ahosi, buddhassa thutiyā sattānaṃ sabbesaṃ cittappasādakaraṇato parappasādakattheroti pākaṭo.
೨೦. ಏಕದಿವಸಂ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಉಸಭಂ ಪವರಂ ವೀರನ್ತಿಆದಿಮಾಹ। ತತ್ಥ ಉಸಭನ್ತಿ ವಸಭೋ ನಿಸಭೋ ವಿಸಭೋ ಆಸಭೋತಿ ಚತ್ತಾರೋ ಜೇಟ್ಠಪುಙ್ಗವಾ। ತತ್ಥ ಗವಸತಜೇಟ್ಠಕೋ ವಸಭೋ, ಗವಸಹಸ್ಸಜೇಟ್ಠಕೋ ನಿಸಭೋ, ಗವಸತಸಹಸ್ಸಜೇಟ್ಠಕೋ ವಿಸಭೋ, ಗವಕೋಟಿಸತಸಹಸ್ಸಜೇಟ್ಠಕೋ ಆಸಭೋತಿ ಚ ಯಸ್ಸ ಕಸ್ಸಚಿ ಥುತಿಂ ಕರೋನ್ತಾ ಬ್ರಾಹ್ಮಣಪಣ್ಡಿತಾ ಬಹುಸ್ಸುತಾ ಅತ್ತನೋ ಅತ್ತನೋ ಪಞ್ಞಾವಸೇನ ಥುತಿಂ ಕರೋನ್ತಿ, ಬುದ್ಧಾನಂ ಪನ ಸಬ್ಬಾಕಾರೇನ ಥುತಿಂ ಕಾತುಂ ಸಮತ್ಥೋ ಏಕೋಪಿ ನತ್ಥಿ। ಅಪ್ಪಮೇಯ್ಯೋ ಹಿ ಬುದ್ಧೋ। ವುತ್ತಞ್ಹೇತಂ –
20. Ekadivasaṃ attano pubbakammaṃ saritvā somanassajāto pubbacaritāpadānaṃ pakāsento usabhaṃ pavaraṃ vīrantiādimāha. Tattha usabhanti vasabho nisabho visabho āsabhoti cattāro jeṭṭhapuṅgavā. Tattha gavasatajeṭṭhako vasabho, gavasahassajeṭṭhako nisabho, gavasatasahassajeṭṭhako visabho, gavakoṭisatasahassajeṭṭhako āsabhoti ca yassa kassaci thutiṃ karontā brāhmaṇapaṇḍitā bahussutā attano attano paññāvasena thutiṃ karonti, buddhānaṃ pana sabbākārena thutiṃ kātuṃ samattho ekopi natthi. Appameyyo hi buddho. Vuttañhetaṃ –
‘‘ಬುದ್ಧೋಪಿ ಬುದ್ಧಸ್ಸ ಭಣೇಯ್ಯ ವಣ್ಣಂ, ಕಪ್ಪಮ್ಪಿ ಚೇ ಅಞ್ಞಮಭಾಸಮಾನೋ।
‘‘Buddhopi buddhassa bhaṇeyya vaṇṇaṃ, kappampi ce aññamabhāsamāno;
ಖೀಯೇಥ ಕಪ್ಪೋ ಚಿರದೀಘಮನ್ತರೇ, ವಣ್ಣೋ ನ ಖೀಯೇಥ ತಥಾಗತಸ್ಸಾ’’ತಿ॥ (ದೀ॰ ನಿ॰ ಅಟ್ಠ॰ ೧.೩೦೪; ೩.೧೪೧; ಮ॰ ನಿ॰ ಅಟ್ಠ॰ ೨.೪೨೫; ಉದಾ॰ ಅಟ್ಠ॰ ೫೩) –
Khīyetha kappo ciradīghamantare, vaṇṇo na khīyetha tathāgatassā’’ti. (dī. ni. aṭṭha. 1.304; 3.141; ma. ni. aṭṭha. 2.425; udā. aṭṭha. 53) –
ಆದಿಕಂ। ಅಯಮ್ಪಿ ಬ್ರಾಹ್ಮಣೋ ಮುಖಾರೂಳ್ಹವಸೇನ ಏಕಪಸೀದನವಸೇನ ‘‘ಆಸಭ’’ನ್ತಿ ವತ್ತಬ್ಬೇ ‘‘ಉಸಭ’’ನ್ತಿಆದಿಮಾಹ। ವರಿತಬ್ಬೋ ಪತ್ಥೇತಬ್ಬೋತಿ ವರೋ। ಅನೇಕೇಸು ಕಪ್ಪಸತಸಹಸ್ಸೇಸು ಕತವೀರಿಯತ್ತಾ ವೀರೋ। ಮಹನ್ತಂ ಸೀಲಕ್ಖನ್ಧಾದಿಕಂ ಏಸತಿ ಗವೇಸತೀತಿ ಮಹೇಸೀ, ತಂ ಮಹೇಸಿಂ ಬುದ್ಧಂ। ವಿಸೇಸೇನ ಕಿಲೇಸಖನ್ಧಮಾರಾದಯೋ ಮಾರೇ ಜಿತವಾತಿ ವಿಜಿತಾವೀ, ತಂ ವಿಜಿತಾವಿನಂ ಸಮ್ಬುದ್ಧಂ। ಸುವಣ್ಣಸ್ಸ ವಣ್ಣೋ ಇವ ವಣ್ಣೋ ಯಸ್ಸ ಸಮ್ಬುದ್ಧಸ್ಸ ಸೋ ಸುವಣ್ಣವಣ್ಣೋ, ತಂ ಸುವಣ್ಣವಣ್ಣಂ ಸಮ್ಬುದ್ಧಂ ದಿಸ್ವಾ ಕೋ ನಾಮ ಸತ್ತೋ ನಪ್ಪಸೀದತೀತಿ।
Ādikaṃ. Ayampi brāhmaṇo mukhārūḷhavasena ekapasīdanavasena ‘‘āsabha’’nti vattabbe ‘‘usabha’’ntiādimāha. Varitabbo patthetabboti varo. Anekesu kappasatasahassesu katavīriyattā vīro. Mahantaṃ sīlakkhandhādikaṃ esati gavesatīti mahesī, taṃ mahesiṃ buddhaṃ. Visesena kilesakhandhamārādayo māre jitavāti vijitāvī, taṃ vijitāvinaṃ sambuddhaṃ. Suvaṇṇassa vaṇṇo iva vaṇṇo yassa sambuddhassa so suvaṇṇavaṇṇo, taṃ suvaṇṇavaṇṇaṃ sambuddhaṃ disvā ko nāma satto nappasīdatīti.
ಪರಪ್ಪಸಾದಕತ್ಥೇರಅಪದಾನವಣ್ಣನಾ ಸಮತ್ತಾ।
Parappasādakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೪. ಪರಪ್ಪಸಾದಕತ್ಥೇರಅಪದಾನಂ • 4. Parappasādakattheraapadānaṃ
