| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
18. பாராயனானுகீ³திகா³தா²னித்³தே³ஸவண்ணனா
18. Pārāyanānugītigāthāniddesavaṇṇanā
102. பாராயனமனுகா³யிஸ்ஸந்தி அஸ்ஸ அயங் ஸம்ப³ந்தோ⁴ – ப⁴க³வதா ஹி பாராயனே தே³ஸிதே ஸோளஸஸஹஸ்ஸஜடிலா அரஹத்தங் பாபுணிங்ஸு, அவஸேஸானஞ்ச சுத்³த³ஸகோடிஸங்கா²னங் தே³வமனுஸ்ஸானங் த⁴ம்மாபி⁴ஸமயோ அஹோஸி. வுத்தஞ்ஹேதங் போராணேஹி –
102.Pārāyanamanugāyissanti assa ayaṃ sambandho – bhagavatā hi pārāyane desite soḷasasahassajaṭilā arahattaṃ pāpuṇiṃsu, avasesānañca cuddasakoṭisaṅkhānaṃ devamanussānaṃ dhammābhisamayo ahosi. Vuttañhetaṃ porāṇehi –
‘‘ததோ பாஸாணகே ரம்மே, பாராயனஸமாக³மே;
‘‘Tato pāsāṇake ramme, pārāyanasamāgame;
அமதங் பாபயீ பு³த்³தோ⁴, சுத்³த³ஸ பாணகோடியோ’’தி. (ஸு॰ நி॰ அட்ட²॰ 2.1138);
Amataṃ pāpayī buddho, cuddasa pāṇakoṭiyo’’ti. (su. ni. aṭṭha. 2.1138);
நிட்டி²தாய பன த⁴ம்மதே³ஸனாய ததோ ததோ ஆக³தா மனுஸ்ஸா ப⁴க³வதோ ஆனுபா⁴வேன அத்தனோ அத்தனோ கா³மனிக³மாதீ³ஸ்வேவ பாதுரஹேஸுங். ப⁴க³வாபி ஸாவத்தி²மேவ அக³மாஸி பரிசாரகஸோளஸாதீ³ஹி அனேகேஹி பி⁴க்கு²ஸஹஸ்ஸேஹி பரிவுதோ. தத்த² பிங்கி³யோ ப⁴க³வந்தங் வந்தி³த்வா ஆஹ – ‘‘க³ச்சா²மஹங், ப⁴ந்தே, பா³வரிஸ்ஸ பு³த்³து⁴ப்பாத³ங் ஆரோசேதுங், படிஸ்ஸுதஞ்ஹி தஸ்ஸேவ மயா’’தி. அத² ப⁴க³வதா அனுஞ்ஞாதோ ஞாணக³மனேனேவ கோ³தா⁴வரீதீரங் க³ந்த்வா பாத³க³மனேன அஸ்ஸமாபி⁴முகோ² அக³மாஸி. தமேனங் பா³வரீ ப்³ராஹ்மணோ மக்³க³ங் ஓலோகெந்தோ நிஸின்னோ தூ³ரதோவ தங் கா²ரிஜடாதி³விரஹிதங் பி⁴க்கு²வேஸேனாக³ச்ச²ந்தங் தி³ஸ்வா ‘‘பு³த்³தோ⁴ லோகே உப்பன்னோ’’தி நிட்ட²மக³மாஸி. ஸம்பத்தஞ்சாபி நங் புச்சி² – ‘‘கிங், பிங்கி³ய, பு³த்³தோ⁴ லோகே உப்பன்னோ’’தி? ‘‘ஆம, ப்³ராஹ்மண, உப்பன்னோ, பாஸாணகே சேதியே நிஸின்னோ அம்ஹாகங் த⁴ம்மங் தே³ஸேஸி, தமஹங் துய்ஹங் தே³ஸெஸ்ஸாமீ’’தி. ததோ பா³வரீ மஹதா ஸக்காரேன ஸபரிஸோ தங் பூஜெத்வா ஆஸனங் பஞ்ஞாபேஸி. தத்த² நிஸீதி³த்வா பிங்கி³யோ ‘‘பாராயனமனுகா³யிஸ்ஸ’’ந்திஆதி³மாஹ.
Niṭṭhitāya pana dhammadesanāya tato tato āgatā manussā bhagavato ānubhāvena attano attano gāmanigamādīsveva pāturahesuṃ. Bhagavāpi sāvatthimeva agamāsi paricārakasoḷasādīhi anekehi bhikkhusahassehi parivuto. Tattha piṅgiyo bhagavantaṃ vanditvā āha – ‘‘gacchāmahaṃ, bhante, bāvarissa buddhuppādaṃ ārocetuṃ, paṭissutañhi tasseva mayā’’ti. Atha bhagavatā anuññāto ñāṇagamaneneva godhāvarītīraṃ gantvā pādagamanena assamābhimukho agamāsi. Tamenaṃ bāvarī brāhmaṇo maggaṃ olokento nisinno dūratova taṃ khārijaṭādivirahitaṃ bhikkhuvesenāgacchantaṃ disvā ‘‘buddho loke uppanno’’ti niṭṭhamagamāsi. Sampattañcāpi naṃ pucchi – ‘‘kiṃ, piṅgiya, buddho loke uppanno’’ti? ‘‘Āma, brāhmaṇa, uppanno, pāsāṇake cetiye nisinno amhākaṃ dhammaṃ desesi, tamahaṃ tuyhaṃ desessāmī’’ti. Tato bāvarī mahatā sakkārena sapariso taṃ pūjetvā āsanaṃ paññāpesi. Tattha nisīditvā piṅgiyo ‘‘pārāyanamanugāyissa’’ntiādimāha.
தத்த² அனுகா³யிஸ்ஸந்தி ப⁴க³வதோ கீ³தங் அனுகா³யிஸ்ஸங். யதா²த்³த³க்கீ²தி யதா² ஸாமங் ஸச்சாபி⁴ஸம்போ³தே⁴ன அஸாதா⁴ரணஞாணேன ச அத்³த³க்கி². நிக்காமோதி பஹீனகாமோ. ‘‘நிக்கமோ’’திபி பாடோ², வீரியவாதி அத்தோ². நிக்க²ந்தோ வா அகுஸலபக்கா². நிப்³ப³னோதி கிலேஸவனவிரஹிதோ, தண்ஹாவிரஹிதோ ஏவ வா. கிஸ்ஸ ஹேது முஸா ப⁴ணேதி யேஹி கிலேஸேஹி முஸா ப⁴ணெய்ய, ஏதே தஸ்ஸ பஹீனாதி த³ஸ்ஸேதி. ஏதேன ப்³ராஹ்மணஸ்ஸ ஸவனே உஸ்ஸாஹங் ஜனேதி (ஸு॰ நி॰ அட்ட²॰ 2.1138).
Tattha anugāyissanti bhagavato gītaṃ anugāyissaṃ. Yathāddakkhīti yathā sāmaṃ saccābhisambodhena asādhāraṇañāṇena ca addakkhi. Nikkāmoti pahīnakāmo. ‘‘Nikkamo’’tipi pāṭho, vīriyavāti attho. Nikkhanto vā akusalapakkhā. Nibbanoti kilesavanavirahito, taṇhāvirahito eva vā. Kissa hetu musā bhaṇeti yehi kilesehi musā bhaṇeyya, ete tassa pahīnāti dasseti. Etena brāhmaṇassa savane ussāhaṃ janeti (su. ni. aṭṭha. 2.1138).
அமலோதி கிலேஸமலவிரஹிதோ. விமலோதி விக³தகிலேஸமலோ. நிம்மலோதி கிலேஸமலஸுத்³தோ⁴. மலாபக³தோதி கிலேஸமலா தூ³ரீபூ⁴தோ ஹுத்வா சரதி. மலவிப்பஹீனோதி கிலேஸமலப்பஹீனோ. மலவிமுத்தோதி கிலேஸேஹி விமுத்தோ. ஸப்³ப³மலவீதிவத்தோதி வாஸனாதி³ஸப்³ப³கிலேஸமலங் அதிக்கந்தோ. தே வனாதி ஏதே வுத்தப்பகாரா கிலேஸா.
Amaloti kilesamalavirahito. Vimaloti vigatakilesamalo. Nimmaloti kilesamalasuddho. Malāpagatoti kilesamalā dūrībhūto hutvā carati. Malavippahīnoti kilesamalappahīno. Malavimuttoti kilesehi vimutto. Sabbamalavītivattoti vāsanādisabbakilesamalaṃ atikkanto. Te vanāti ete vuttappakārā kilesā.
103. வண்ணூபஸங்ஹிதந்தி கு³ணூபஸங்ஹிதங்.
103. Vaṇṇūpasaṃhitanti guṇūpasaṃhitaṃ.
104. ஸச்சவ்ஹயோதி பு³த்³தோ⁴ ஹி ஸச்சேனேவ அவ்ஹானேன நாமேன யுத்தோ. ப்³ரஹ்மேதி தங் ப்³ராஹ்மணங் ஆலபதி.
104.Saccavhayoti buddho hi sacceneva avhānena nāmena yutto. Brahmeti taṃ brāhmaṇaṃ ālapati.
தத்த² லோகோதி லுஜ்ஜனட்டே²ன லோகோ. ஏகோ லோகோ ப⁴வலோகோதி தேபூ⁴மகவிபாகோ. ஸோ ஹி ப⁴வதீதி ப⁴வோ, ப⁴வோ ஏவ லோகோ ப⁴வலோகோ. ப⁴வலோகோ ச ஸம்ப⁴வலோகோ சாதி எத்த² ஏகேகோ த்³வே த்³வே ஹோதி. ப⁴வலோகோ ஹி ஸம்பத்திப⁴வவிபத்திப⁴வவஸேன து³விதோ⁴. ஸம்ப⁴வலோகோபி ஸம்பத்திஸம்ப⁴வவிபத்திஸம்ப⁴வவஸேன து³விதோ⁴. தத்த² ஸம்பத்திப⁴வலோகோதி ஸுக³திலோகோ. ஸோ ஹி இட்ட²ப²லத்தா ஸுந்த³ரோ லோகோதி ஸம்பத்தி, ப⁴வதீதி ப⁴வோ, ஸம்பத்தி ஏவ ப⁴வோ ஸம்பத்திப⁴வோ, ஸோ ஏவ லோகோ ஸம்பத்திப⁴வலோகோ. ஸம்பத்திஸம்ப⁴வலோகோதி ஸுக³தூபக³ங் கம்மங். தஞ்ஹி ஸம்ப⁴வதி ஏதஸ்மா ப²லந்தி ஸம்ப⁴வோ, ஸம்பத்தியா ஸம்ப⁴வோ ஸம்பத்திஸம்ப⁴வோ, ஸம்பத்திஸம்ப⁴வோ ஏவ லோகோ ஸம்பத்திஸம்ப⁴வலோகோதி.
Tattha lokoti lujjanaṭṭhena loko. Eko loko bhavalokoti tebhūmakavipāko. So hi bhavatīti bhavo, bhavo eva loko bhavaloko. Bhavaloko ca sambhavaloko cāti ettha ekeko dve dve hoti. Bhavaloko hi sampattibhavavipattibhavavasena duvidho. Sambhavalokopi sampattisambhavavipattisambhavavasena duvidho. Tattha sampattibhavalokoti sugatiloko. So hi iṭṭhaphalattā sundaro lokoti sampatti, bhavatīti bhavo, sampatti eva bhavo sampattibhavo, so eva loko sampattibhavaloko. Sampattisambhavalokoti sugatūpagaṃ kammaṃ. Tañhi sambhavati etasmā phalanti sambhavo, sampattiyā sambhavo sampattisambhavo, sampattisambhavo eva loko sampattisambhavalokoti.
விபத்திப⁴வலோகோதி அபாயலோகோ. ஸோ ஹி அனிட்ட²ப²லத்தா விரூபோ லோகோதி விபத்தி, ப⁴வதீதி ப⁴வோ, விபத்தி ஏவ ப⁴வோ விபத்திப⁴வோ, விபத்திப⁴வோ ஏவ லோகோ விபத்திப⁴வலோகோ. விபத்திஸம்ப⁴வலோகோதி அபாயூபக³ங் கம்மங். தஞ்ஹி ஸம்ப⁴வதி ஏதஸ்மா ப²லந்தி ஸம்ப⁴வோ, விபத்தியா ஸம்ப⁴வோ விபத்திஸம்ப⁴வோ, விபத்திஸம்ப⁴வோ ஏவ லோகோ விபத்திஸம்ப⁴வலோகோதி. திஸ்ஸோ வேத³னாதி ஸுகா² வேத³னா, து³க்கா² வேத³னா, அது³க்க²மஸுகா² வேத³னா லோகியா ஏவ. ஆஹாராதி பச்சயா. பச்சயா ஹி அத்தனோ ப²லங் ஆஹரந்தீதி ஆஹாரா. கப³ளீகாராஹாரோ ப²ஸ்ஸாஹாரோ மனோஸஞ்சேதனாஹாரோ விஞ்ஞாணாஹாரோதி சத்தாரோ. வத்து²வஸேன கப³ளீகத்தப்³ப³த்தா கப³ளீகாரோ, அஜ்ஜோ²ஹரிதப்³ப³த்தா ஆஹாரோ, ஓத³னகும்மாஸாதி³வத்து²காய ஓஜாயேதங் நாமங். ஸா ஹி ஓஜட்ட²மகரூபானி ஆஹரதீதி ஆஹாரோ. சக்கு²ஸம்ப²ஸ்ஸாதி³கோ ச²ப்³பி³தோ⁴ ப²ஸ்ஸோ திஸ்ஸோ வேத³னா ஆஹரதீதி ஆஹாரோ. மனஸோ ஸஞ்சேதனா ந ஸத்தஸ்ஸாதி மனோஸஞ்சேதனா யதா² சித்தேகக்³க³தா, மனஸா வா ஸம்பயுத்தா ஸஞ்சேதனா மனோஸஞ்சேதனா யதா² ஆஜஞ்ஞரதோ², தேபூ⁴மககுஸலாகுஸலசேதனா. ஸா ஹி தயோ ப⁴வே ஆஹரதீதி ஆஹாரோ. விஞ்ஞாணந்தி ஏகூனவீஸதிபே⁴த³ங் படிஸந்தி⁴விஞ்ஞாணங். தஞ்ஹி படிஸந்தி⁴னாமரூபங் ஆஹரதீதி ஆஹாரோ.
Vipattibhavalokoti apāyaloko. So hi aniṭṭhaphalattā virūpo lokoti vipatti, bhavatīti bhavo, vipatti eva bhavo vipattibhavo, vipattibhavo eva loko vipattibhavaloko. Vipattisambhavalokoti apāyūpagaṃ kammaṃ. Tañhi sambhavati etasmā phalanti sambhavo, vipattiyā sambhavo vipattisambhavo, vipattisambhavo eva loko vipattisambhavalokoti. Tisso vedanāti sukhā vedanā, dukkhā vedanā, adukkhamasukhā vedanā lokiyā eva. Āhārāti paccayā. Paccayā hi attano phalaṃ āharantīti āhārā. Kabaḷīkārāhāro phassāhāro manosañcetanāhāro viññāṇāhāroti cattāro. Vatthuvasena kabaḷīkattabbattā kabaḷīkāro, ajjhoharitabbattā āhāro, odanakummāsādivatthukāya ojāyetaṃ nāmaṃ. Sā hi ojaṭṭhamakarūpāni āharatīti āhāro. Cakkhusamphassādiko chabbidho phasso tisso vedanā āharatīti āhāro. Manaso sañcetanā na sattassāti manosañcetanā yathā cittekaggatā, manasā vā sampayuttā sañcetanā manosañcetanā yathā ājaññaratho, tebhūmakakusalākusalacetanā. Sā hi tayo bhave āharatīti āhāro. Viññāṇanti ekūnavīsatibhedaṃ paṭisandhiviññāṇaṃ. Tañhi paṭisandhināmarūpaṃ āharatīti āhāro.
உபாதா³னக்க²ந்தா⁴தி உபாதா³னகோ³சரா க²ந்தா⁴ உபாதா³னக்க²ந்தா⁴, மஜ்ஜே² பத³லோபோ த³ட்ட²ப்³போ³. உபாதா³னஸம்பூ⁴தா வா க²ந்தா⁴ உபாதா³னக்க²ந்தா⁴ யதா² திணக்³கி³, து²ஸக்³கி³. உபாதா³னவிதெ⁴ய்யா வா க²ந்தா⁴ உபாதா³னக்க²ந்தா⁴ யதா² ராஜபுரிஸோ. உபாதா³னப்பப⁴வா வா க²ந்தா⁴ உபாதா³னக்க²ந்தா⁴ யதா² புப்ப²ருக்கோ², ப²லருக்கோ². உபாதா³னானி பன காமுபாதா³னங் தி³ட்டு²பாதா³னங் ஸீலப்³ப³துபாதா³னங் அத்தவாது³பாதா³னந்தி சத்தாரி. அத்த²தோ பன பு⁴ஸங் ஆதா³னந்தி உபாதா³னங். ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴தி பஞ்ச. ச² அஜ்ஜ²த்திகானி ஆயதனானீதி சக்கா²யதனங், ஸோதாயதனங், கா⁴னாயதனங், ஜிவ்ஹாயதனங், காயாயதனங், மனாயதனங். ஸத்த விஞ்ஞாணட்டி²தியோ வுத்தனயா ஏவ. ததா² அட்ட² லோகத⁴ம்மா. அபி ச – லாபோ⁴, அலாபோ⁴, யஸோ, அயஸோ, நிந்தா³, பஸங்ஸா, ஸுக²ங், து³க்க²ந்தி இமே அட்ட² லோகப்பவத்தியா ஸதி அனுபரிவத்தனத⁴ம்மகத்தா லோகஸ்ஸ த⁴ம்மாதி லோகத⁴ம்மா. ஏதேஹி முத்தோ ஸத்தோ நாம நத்தி², பு³த்³தா⁴னம்பி ஹொந்தியேவ. யதா²ஹ –
Upādānakkhandhāti upādānagocarā khandhā upādānakkhandhā, majjhe padalopo daṭṭhabbo. Upādānasambhūtā vā khandhā upādānakkhandhā yathā tiṇaggi, thusaggi. Upādānavidheyyā vā khandhā upādānakkhandhā yathā rājapuriso. Upādānappabhavā vā khandhā upādānakkhandhā yathā puppharukkho, phalarukkho. Upādānāni pana kāmupādānaṃ diṭṭhupādānaṃ sīlabbatupādānaṃ attavādupādānanti cattāri. Atthato pana bhusaṃ ādānanti upādānaṃ. Rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandhoti pañca. Cha ajjhattikāni āyatanānīti cakkhāyatanaṃ, sotāyatanaṃ, ghānāyatanaṃ, jivhāyatanaṃ, kāyāyatanaṃ, manāyatanaṃ. Satta viññāṇaṭṭhitiyo vuttanayā eva. Tathā aṭṭhalokadhammā. Api ca – lābho, alābho, yaso, ayaso, nindā, pasaṃsā, sukhaṃ, dukkhanti ime aṭṭha lokappavattiyā sati anuparivattanadhammakattā lokassa dhammāti lokadhammā. Etehi mutto satto nāma natthi, buddhānampi hontiyeva. Yathāha –
‘‘அட்டி²மே, பி⁴க்க²வே, லோகத⁴ம்மா லோகங் அனுபரிவத்தந்தி, லோகோ ச அட்ட² லோகத⁴ம்மே அனுபரிவத்ததி. கதமே அட்ட²? லாபோ⁴ ச அலாபோ⁴ ச…பே॰… ஸுக²ஞ்ச து³க்க²ஞ்ச. இமே கோ², பி⁴க்க²வே, அட்ட² லோகத⁴ம்மா லோகங் அனுபரிவத்தந்தி, லோகோ ச இமே அட்ட² லோகத⁴ம்மே அனுபரிவத்ததீ’’தி (அ॰ நி॰ 8.6).
‘‘Aṭṭhime, bhikkhave, lokadhammā lokaṃ anuparivattanti, loko ca aṭṭha lokadhamme anuparivattati. Katame aṭṭha? Lābho ca alābho ca…pe… sukhañca dukkhañca. Ime kho, bhikkhave, aṭṭha lokadhammā lokaṃ anuparivattanti, loko ca ime aṭṭha lokadhamme anuparivattatī’’ti (a. ni. 8.6).
தத்த² அனுபரிவத்தந்தீதி அனுப³ந்த⁴ந்தி நப்பஜஹந்தி, லோகதோ ந நிவத்தந்தீதி அத்தோ². லாபோ⁴தி பப்³ப³ஜிதஸ்ஸ சீவராதி³, க³ஹட்ட²ஸ்ஸ த⁴னத⁴ஞ்ஞாதி³லாபோ⁴. ஸோயேவ அலப்³ப⁴மானோ லாபோ⁴ அலாபோ⁴ ந லாபோ⁴ அலாபோ⁴தி வுச்சதி, நோ ச அத்தாபா⁴வப்பத்திதோ பரிஞ்ஞெய்யோ ஸியா. யஸோதி பரிவாரோ. ஸோயேவ அலப்³ப⁴மானோ யஸோ அயஸோ. நிந்தா³தி அவண்ணப⁴ணனங். பஸங்ஸாதி வண்ணப⁴ணனங். ஸுக²ந்தி காமாவசரகாயிகசேதஸிகங். து³க்க²ந்தி புது²ஜ்ஜனஸோதாபன்னஸகதா³கா³மீனங் காயிகசேதஸிகங், அனாகா³மிஅரஹந்தானங் காயிகமேவ. ஸத்தாவாஸாதி ஸத்தானங் ஆவாஸா, வஸனட்டா²னானீதி அத்தோ². தானி பன ததா² பகாஸிதா க²ந்தா⁴ ஏவ. ஸத்தஸு விஞ்ஞாணட்டி²தீஸு அஸஞ்ஞஸத்தேன ச நேவஸஞ்ஞானாஸஞ்ஞாயதனேன ச ஸத்³தி⁴ங் நவ ஸத்தாவாஸா. த³ஸாயதனானீதி சக்கா²யதனங், ரூபாயதனங், ஸோதாயதனங், ஸத்³தா³யதனங், கா⁴னாயதனங், க³ந்தா⁴யதனங், ஜிவ்ஹாயதனங், ரஸாயதனங், காயாயதனங், பொ²ட்ட²ப்³பா³யதனந்தி ஏவங் த³ஸ. த்³வாத³ஸாயதனானீதி மனாயதனத⁴ம்மாயதனேஹி ஸத்³தி⁴ங் ஏவங் த்³வாத³ஸ. அட்டா²ரஸ தா⁴துயோதி சக்கு²தா⁴து, ரூபதா⁴து, சக்கு²விஞ்ஞாணதா⁴து…பே॰… மனோதா⁴து, த⁴ம்மதா⁴து, மனோவிஞ்ஞாணதா⁴தூதி ஏகேகஸ்மிங் தீணி தீணி கத்வா அட்டா²ரஸ தா⁴துயோ.
Tattha anuparivattantīti anubandhanti nappajahanti, lokato na nivattantīti attho. Lābhoti pabbajitassa cīvarādi, gahaṭṭhassa dhanadhaññādilābho. Soyeva alabbhamāno lābho alābho na lābho alābhoti vuccati, no ca attābhāvappattito pariññeyyo siyā. Yasoti parivāro. Soyeva alabbhamāno yaso ayaso. Nindāti avaṇṇabhaṇanaṃ. Pasaṃsāti vaṇṇabhaṇanaṃ. Sukhanti kāmāvacarakāyikacetasikaṃ. Dukkhanti puthujjanasotāpannasakadāgāmīnaṃ kāyikacetasikaṃ, anāgāmiarahantānaṃ kāyikameva. Sattāvāsāti sattānaṃ āvāsā, vasanaṭṭhānānīti attho. Tāni pana tathā pakāsitā khandhā eva. Sattasu viññāṇaṭṭhitīsu asaññasattena ca nevasaññānāsaññāyatanena ca saddhiṃ nava sattāvāsā. Dasāyatanānīti cakkhāyatanaṃ, rūpāyatanaṃ, sotāyatanaṃ, saddāyatanaṃ, ghānāyatanaṃ, gandhāyatanaṃ, jivhāyatanaṃ, rasāyatanaṃ, kāyāyatanaṃ, phoṭṭhabbāyatananti evaṃ dasa. Dvādasāyatanānīti manāyatanadhammāyatanehi saddhiṃ evaṃ dvādasa. Aṭṭhārasa dhātuyoti cakkhudhātu, rūpadhātu, cakkhuviññāṇadhātu…pe… manodhātu, dhammadhātu, manoviññāṇadhātūti ekekasmiṃ tīṇi tīṇi katvā aṭṭhārasa dhātuyo.
ஸதி³ஸனாமோதி தேஸங் ஸதி³ஸனாமோ ஏககு³ணவண்ணனாமோ. ஸதி³ஸவ்ஹயோதி ஏககு³ணவண்ணனாமேன அவ்ஹாயனோ. ஸச்சஸதி³ஸவ்ஹயோதி அவிதத²ஏககு³ணவண்ணனாமேன அவிபரீதேன அவ்ஹாயனோ.
Sadisanāmoti tesaṃ sadisanāmo ekaguṇavaṇṇanāmo. Sadisavhayoti ekaguṇavaṇṇanāmena avhāyano. Saccasadisavhayoti avitathaekaguṇavaṇṇanāmena aviparītena avhāyano.
ஆஸிதோதி உபஸங்கமிதோ. உபாஸிதோதி உபக³ந்த்வா ஸேவிதோ. பயிருபாஸிதோதி ப⁴த்திவஸேன அதீவ ஸேவிதோ.
Āsitoti upasaṅkamito. Upāsitoti upagantvā sevito. Payirupāsitoti bhattivasena atīva sevito.
105. குப்³ப³னகந்தி பரித்தவனங். ப³ஹுப்ப²லங் கானநமாவஸெய்யாதி அனேகப²லாதி³விகதிப⁴ரிதகானநங் ஆக³ம்ம வஸெய்ய. அப்பத³ஸ்ஸேதி பா³வரிப்பபு⁴திகே பரித்தபஞ்ஞே. மஹோத³தி⁴ந்தி அனோதத்தாதி³ங் மஹந்தங் உத³கராஸிங்.
105.Kubbanakanti parittavanaṃ. Bahupphalaṃ kānanamāvaseyyāti anekaphalādivikatibharitakānanaṃ āgamma vaseyya. Appadasseti bāvarippabhutike parittapaññe. Mahodadhinti anotattādiṃ mahantaṃ udakarāsiṃ.
அப்பத³ஸ்ஸாதி மந்த³த³ஸ்ஸினோ. பரித்தத³ஸ்ஸாதி அதிமந்த³த³ஸ்ஸினோ. தோ²கத³ஸ்ஸாதி பரித்ததோபி அதிபரித்தத³ஸ்ஸினோ. ஓமகத³ஸ்ஸாதி ஹெட்டி²மத³ஸ்ஸினோ. லாமகத³ஸ்ஸாதி அப்பதா⁴னத³ஸ்ஸினோ. ச²துக்கத³ஸ்ஸாதி ந உத்தமத³ஸ்ஸினோ. அப்பமாணத³ஸ்ஸந்தி பமாணங் அதிக்கமித்வா அப்பமாணங் நிப்³பா³னத³ஸ்ஸங். அக்³க³த³ஸ்ஸந்தி ‘‘அக்³க³தோ வே பஸன்னான’’ந்திஆதி³னா (அ॰ நி॰ 4.34; இதிவு॰ 90) நயேன அக்³க³த⁴ம்மத³ஸ்ஸங். ஸெட்ட²த³ஸ்ஸந்தி ஸம்பு³த்³தோ⁴ த்³விபத³ஸெட்டோ²தி ஸெட்ட²த³ஸ்ஸங். விஸெட்ட²த³ஸ்ஸந்திஆதீ³னி சத்தாரி உபஸக்³கே³ன வட்³டி⁴தானி. அஸமந்தி ந ஸமங் அஸமங் ஸப்³ப³ஞ்ஞுங். அஸமஸமந்தி அஸமேஹி அதீதபு³த்³தே⁴ஹி ஸமங் அஸமஸமங். அப்படிஸமந்தி அத்தனோ ஸதி³ஸவிரஹிதங். அப்படிபா⁴க³ந்தி அத்தனோ படிபி³ம்ப³விரஹிதங். அப்படிபுக்³க³லந்தி படிமல்லபுக்³க³லவிரஹிதங். தே³வாதிதே³வந்தி விஸுத்³தி⁴தே³வானம்பி அதிதே³வங். அபி⁴மங்க³லஸம்மதட்டே²ன உஸப⁴ங். அச²ம்பி⁴தட்டே²ன புரிஸஸீஹங். நித்³தோ³ஸட்டே²ன புரிஸனாக³ங். உத்தமட்டே²ன புரிஸாஜஞ்ஞங். அட்ட²பரிஸபத²விங் உப்பீளெத்வா ஸதே³வகே லோகே கேனசி பச்சத்தி²கேன பச்சாமித்தேன அகம்பியே அசலட்டா²னே திட்ட²னட்டே²ன புரிஸனிஸப⁴ங். த⁴ம்மதே³ஸனாது⁴ரவஹனட்டே²ன புரிஸதோ⁴ரய்ஹங்.
Appadassāti mandadassino. Parittadassāti atimandadassino. Thokadassāti parittatopi atiparittadassino. Omakadassāti heṭṭhimadassino. Lāmakadassāti appadhānadassino. Chatukkadassāti na uttamadassino. Appamāṇadassanti pamāṇaṃ atikkamitvā appamāṇaṃ nibbānadassaṃ. Aggadassanti ‘‘aggato ve pasannāna’’ntiādinā (a. ni. 4.34; itivu. 90) nayena aggadhammadassaṃ. Seṭṭhadassanti sambuddho dvipadaseṭṭhoti seṭṭhadassaṃ. Viseṭṭhadassantiādīni cattāri upasaggena vaḍḍhitāni. Asamanti na samaṃ asamaṃ sabbaññuṃ. Asamasamanti asamehi atītabuddhehi samaṃ asamasamaṃ. Appaṭisamanti attano sadisavirahitaṃ. Appaṭibhāganti attano paṭibimbavirahitaṃ. Appaṭipuggalanti paṭimallapuggalavirahitaṃ. Devātidevanti visuddhidevānampi atidevaṃ. Abhimaṅgalasammataṭṭhena usabhaṃ. Achambhitaṭṭhena purisasīhaṃ. Niddosaṭṭhena purisanāgaṃ. Uttamaṭṭhena purisājaññaṃ. Aṭṭhaparisapathaviṃ uppīḷetvā sadevake loke kenaci paccatthikena paccāmittena akampiye acalaṭṭhāne tiṭṭhanaṭṭhena purisanisabhaṃ. Dhammadesanādhuravahanaṭṭhena purisadhorayhaṃ.
மானஸகங் வா ஸரந்தி மனஸா சிந்தெத்வா கதங் பல்லங் வா நாமமேவ வா. அனோதத்தங் வா த³ஹந்தி சந்தி³மஸூரியா த³க்கி²ணேன வா உத்தரேன வா க³ச்ச²ந்தா பப்³ப³தந்தரேன தங் ஓபா⁴ஸெந்தி, உஜுங் க³ச்ச²ந்தா ந ஓபா⁴ஸெந்தி, தேனேவஸ்ஸ ‘‘அனோதத்த’’ந்தி ஸங்கா² உத³பாதி³. ஏவரூபங் அனோதத்தங் வா த³ஹங். அக்கோ²ப⁴ங் அமிதோத³கந்தி சாலேதுங் அஸக்குணெய்யங் அபரிமிதங் உத³கஜலராஸிங். ஏவமேவாதி ஓபம்மஸங்ஸந்த³னங், பு³த்³த⁴ங் ப⁴க³வந்தங் அக்கோ²ப⁴ங் ஆஸப⁴ங் டா²னட்டா²னேன சாலேதுங் அஸக்குணெய்யங். அமிததேஜந்தி அபரிமிதஞாணதேஜங். பபி⁴ன்னஞாணந்தி த³ஸப³லஞாணாதி³வஸேன பபே⁴த³க³தஞாணங். விவடசக்கு²ந்தி ஸமந்தசக்கு²ங்.
Mānasakaṃ vā saranti manasā cintetvā kataṃ pallaṃ vā nāmameva vā. Anotattaṃ vā dahanti candimasūriyā dakkhiṇena vā uttarena vā gacchantā pabbatantarena taṃ obhāsenti, ujuṃ gacchantā na obhāsenti, tenevassa ‘‘anotatta’’nti saṅkhā udapādi. Evarūpaṃ anotattaṃ vā dahaṃ. Akkhobhaṃ amitodakanti cāletuṃ asakkuṇeyyaṃ aparimitaṃ udakajalarāsiṃ. Evamevāti opammasaṃsandanaṃ, buddhaṃ bhagavantaṃ akkhobhaṃ āsabhaṃ ṭhānaṭṭhānena cāletuṃ asakkuṇeyyaṃ. Amitatejanti aparimitañāṇatejaṃ. Pabhinnañāṇanti dasabalañāṇādivasena pabhedagatañāṇaṃ. Vivaṭacakkhunti samantacakkhuṃ.
பஞ்ஞாபபே⁴த³குஸலந்தி ‘‘யா பஞ்ஞா பஜானநா விசயோ பவிசயோ’’திஆதி³னா (த⁴॰ ஸ॰ 16; விப⁴॰ 525) நயேன பஞ்ஞாய பபே⁴த³ஜானநே சே²கங். அதி⁴க³தபடிஸம்பி⁴த³ந்தி படிலத்³த⁴சதுபடிஸம்பி⁴த³ங். சதுவேஸாரஜ்ஜப்பத்தந்தி ‘‘ஸம்மாஸம்பு³த்³த⁴ஸ்ஸ தே படிஜானதோ இமே த⁴ம்மா அனபி⁴ஸம்பு³த்³தா⁴’’திஆதி³னா (ம॰ நி॰ 1.150; அ॰ நி॰ 4.8) நயேன வுத்தேஸு சதூஸு டா²னேஸு விஸாரத³பா⁴வப்பத்தங். ஸத்³தா⁴தி⁴முத்தந்தி பரிஸுத்³தே⁴ ப²லஸமாபத்திசித்தே அதி⁴முத்தங், தத்த² பவிட்ட²ங். ஸேதபச்சத்தந்தி வாஸனாய விப்பஹீனத்தா பரிஸுத்³த⁴ங் ஆவேணிகஅத்தபா⁴வங். அத்³வயபா⁴ணிந்தி பரிச்சி²ன்னவசனத்தா த்³விவசனவிரஹிதங். தாதி³ந்தி தாதி³ஸங், இட்டா²னிட்டே²ஸு அகம்பனங் வா. ததா² படிஞ்ஞா அஸ்ஸாதி ததா²படிஞ்ஞோ, தங். அபரித்தந்தி ந கு²த்³த³கங். மஹந்தந்தி தேதா⁴துங் அதிக்கமித்வா மஹந்தப்பத்தங்.
Paññāpabhedakusalanti ‘‘yā paññā pajānanā vicayo pavicayo’’tiādinā (dha. sa. 16; vibha. 525) nayena paññāya pabhedajānane chekaṃ. Adhigatapaṭisambhidanti paṭiladdhacatupaṭisambhidaṃ. Catuvesārajjappattanti ‘‘sammāsambuddhassa te paṭijānato ime dhammā anabhisambuddhā’’tiādinā (ma. ni. 1.150; a. ni. 4.8) nayena vuttesu catūsu ṭhānesu visāradabhāvappattaṃ. Saddhādhimuttanti parisuddhe phalasamāpatticitte adhimuttaṃ, tattha paviṭṭhaṃ. Setapaccattanti vāsanāya vippahīnattā parisuddhaṃ āveṇikaattabhāvaṃ. Advayabhāṇinti paricchinnavacanattā dvivacanavirahitaṃ. Tādinti tādisaṃ, iṭṭhāniṭṭhesu akampanaṃ vā. Tathā paṭiññā assāti tathāpaṭiñño, taṃ. Aparittanti na khuddakaṃ. Mahantanti tedhātuṃ atikkamitvā mahantappattaṃ.
க³ம்பீ⁴ரந்தி அஞ்ஞேஸங் து³ப்பவேஸங். அப்பமெய்யந்தி அதுலட்டே²ன அப்பமெய்யங். து³ப்பரியோகா³ஹந்தி பரியோகா³ஹிதுங் து³க்க²ப்பவேஸங். பஹூதரதனந்தி ஸத்³தா⁴தி³ரதனேஹி பஹூதரதனங். ஸாக³ரஸமந்தி ரதனாகரதோ ஸமுத்³த³ஸதி³ஸங். ச²ளங்கு³பெக்கா²ய ஸமன்னாக³தந்தி ‘‘சக்கு²னா ரூபங் தி³ஸ்வா நேவ ஸுமனோ ஹோதி ந து³ம்மனோ’’தி (அ॰ நி॰ 6.1) வுத்தனயேன ச²ளங்கு³பெக்கா²ய பரிபுண்ணங். அதுலந்தி துலவிரஹிதங், துலயிதுங் அஸக்குணெய்யங். விபுலந்தி அதிமஹந்தங். அப்பமெய்யந்தி பமேதுங் அஸக்குணெய்யங். தங் தாதி³ஸந்தி தங் ப⁴க³வந்தங் தாதி³கு³ணஸம்பன்னங். பவத³தங் மக்³க³வாதி³னந்தி பவத³ந்தானங் கதெ²ந்தானங் உத்தமங் கத²யந்தங் வத³ந்தங் அதி⁴க³ச்சி²ந்தி ஸம்ப³ந்தோ⁴. மேருமிவ நகா³னந்தி பப்³ப³தானங் அந்தரே ஸினேருங் விய. க³ருளமிவ தி³ஜானந்தி பக்கி²ஜாதானங் அந்தரே ஸுபண்ணங் விய. ஸீஹமிவ மிகா³னந்தி சதுப்பதா³னமந்தரே ஸீஹங் விய. உத³தி⁴மிவ அண்ணவானந்தி வித்தி²ண்ணஅண்ணவானங் அந்தரே ஸமுத்³த³ங் விய அதி⁴க³ச்சி²ங். ஜினபவரந்தி பு³த்³து⁴த்தமங்.
Gambhīranti aññesaṃ duppavesaṃ. Appameyyanti atulaṭṭhena appameyyaṃ. Duppariyogāhanti pariyogāhituṃ dukkhappavesaṃ. Pahūtaratananti saddhādiratanehi pahūtaratanaṃ. Sāgarasamanti ratanākarato samuddasadisaṃ. Chaḷaṅgupekkhāya samannāgatanti ‘‘cakkhunā rūpaṃ disvā neva sumano hoti na dummano’’ti (a. ni. 6.1) vuttanayena chaḷaṅgupekkhāya paripuṇṇaṃ. Atulanti tulavirahitaṃ, tulayituṃ asakkuṇeyyaṃ. Vipulanti atimahantaṃ. Appameyyanti pametuṃ asakkuṇeyyaṃ. Taṃ tādisanti taṃ bhagavantaṃ tādiguṇasampannaṃ. Pavadataṃ maggavādinanti pavadantānaṃ kathentānaṃ uttamaṃ kathayantaṃ vadantaṃ adhigacchinti sambandho. Merumiva nagānanti pabbatānaṃ antare sineruṃ viya. Garuḷamiva dijānanti pakkhijātānaṃ antare supaṇṇaṃ viya. Sīhamiva migānanti catuppadānamantare sīhaṃ viya. Udadhimiva aṇṇavānanti vitthiṇṇaaṇṇavānaṃ antare samuddaṃ viya adhigacchiṃ. Jinapavaranti buddhuttamaṃ.
106. யேமே புப்³பே³தி யே இமே புப்³பே³.
106.Yeme pubbeti ye ime pubbe.
107. தமோனுதா³ஸீனோதி தமோனுதோ³ ஆஸீனோ. பூ⁴ரிபஞ்ஞாணோதி ஞாணத்³த⁴ஜோ. பூ⁴ரிமேத⁴ஸோதி விபுலபஞ்ஞோ.
107.Tamonudāsīnoti tamonudo āsīno. Bhūripaññāṇoti ñāṇaddhajo. Bhūrimedhasoti vipulapañño.
நித்³தே³ஸே பப⁴ங்கரோதி தேஜங்கரோ. ஆலோககரோதி அனந்த⁴காரகரோ. ஓபா⁴ஸகரோதி ஓபா⁴ஸங் ஜோதிங் கரோதீதி ஓபா⁴ஸகரோ. தீ³பஸதி³ஸங் ஆலோகங் கரோதீதி தீ³பங்கரோ. பதீ³பஸதி³ஸங் ஆலோகங் கரோதீதி பதீ³பகரோ. உஜ்ஜோதகரோதி பதாபகரோ. பஜ்ஜோதகரோதி தி³ஸாவிதி³ஸா பதாபகரோ.
Niddese pabhaṅkaroti tejaṃkaro. Ālokakaroti anandhakārakaro. Obhāsakaroti obhāsaṃ jotiṃ karotīti obhāsakaro. Dīpasadisaṃ ālokaṃ karotīti dīpaṅkaro. Padīpasadisaṃ ālokaṃ karotīti padīpakaro. Ujjotakaroti patāpakaro. Pajjotakaroti disāvidisā patāpakaro.
பூ⁴ரிபஞ்ஞாணோதி புது²லஞாணோ. ஞாணபஞ்ஞாணோதி ஞாணேன பாகடோ. பஞ்ஞாத⁴ஜோதி உஸ்ஸிதட்டே²ன பஞ்ஞாவ த⁴ஜோ அஸ்ஸாதி பஞ்ஞாத⁴ஜோ, த⁴ஜோ ரத²ஸ்ஸ பஞ்ஞாணந்திஆதீ³ஸு (ஜா॰ 2.22.1841; சூளனி॰ பாராயனானுகீ³திகா³தா²னித்³தே³ஸ 107) விய. விபூ⁴தவிஹாரீதி பாகடவிஹாரோ.
Bhūripaññāṇoti puthulañāṇo. Ñāṇapaññāṇoti ñāṇena pākaṭo. Paññādhajoti ussitaṭṭhena paññāva dhajo assāti paññādhajo, dhajo rathassa paññāṇantiādīsu (jā. 2.22.1841; cūḷani. pārāyanānugītigāthāniddesa 107) viya. Vibhūtavihārīti pākaṭavihāro.
108. ஸந்தி³ட்டி²கமகாலிகந்தி ஸாமங் பஸ்ஸிதப்³ப³ங் ப²லங், ந ச காலந்தரே பத்தப்³ப³ப²லங். அனீதிகந்தி கிலேஸாதி³ஈதிவிரஹிதங்.
108.Sandiṭṭhikamakālikanti sāmaṃ passitabbaṃ phalaṃ, na ca kālantare pattabbaphalaṃ. Anītikanti kilesādiītivirahitaṃ.
ஸந்தி³ட்டி²கந்தி லோகுத்தரத⁴ம்மோ யேன அதி⁴க³தோ ஹோதி, தேன பரஸத்³தா⁴ய க³ந்தப்³ப³தங் ஹித்வா பச்சவெக்க²ணஞாணேன ஸயங் த³ட்ட²ப்³போ³தி ஸந்தி³ட்டி²கோ, தங் ஸந்தி³ட்டி²கங். அத்தனோ ப²லங்தா³னங் ஸந்தா⁴ய நாஸ்ஸ காலோதி அகாலோ, அகாலோயேவ அகாலிகோ. யோ எத்த² அரியமக்³க³த⁴ம்மோ, ஸோ அத்தனோ ஸமனந்தரமேவ ப²லங் தே³தீதி அத்தோ², தங் அகாலிகங். ஏஹி பஸ்ஸ இமங் த⁴ம்மந்தி ஏவங் பவத்தங் ஏஹிபஸ்ஸவிதி⁴ங் அரஹதீதி ஏஹிபஸ்ஸிகோ, தங் ஏஹிபஸ்ஸிகங். ஆதி³த்தங் சேலங் வா ஸீஸங் வா அஜ்ஜு²பெக்கி²த்வாபி அத்தனோ சித்தே உபனயங் அரஹதீதி ஓபனெய்யிகோ, தங் ஓபனெய்யிகங். ஸப்³பே³ஹிபி உக்³க⁴டிதஞ்ஞூஆதீ³ஹி ‘‘பா⁴விதோ மே மக்³கோ³, அதி⁴க³தங் ப²லங், ஸச்சி²கதோ நிரோதோ⁴’’தி அத்தனி அத்தனி வேதி³தப்³ப³ந்தி பச்சத்தங் வேதி³தப்³ப³ங் விஞ்ஞூஹி.
Sandiṭṭhikanti lokuttaradhammo yena adhigato hoti, tena parasaddhāya gantabbataṃ hitvā paccavekkhaṇañāṇena sayaṃ daṭṭhabboti sandiṭṭhiko, taṃ sandiṭṭhikaṃ. Attano phalaṃdānaṃ sandhāya nāssa kāloti akālo, akāloyeva akāliko. Yo ettha ariyamaggadhammo, so attano samanantarameva phalaṃ detīti attho, taṃ akālikaṃ. Ehi passa imaṃ dhammanti evaṃ pavattaṃ ehipassavidhiṃ arahatīti ehipassiko, taṃ ehipassikaṃ. Ādittaṃ celaṃ vā sīsaṃ vā ajjhupekkhitvāpi attano citte upanayaṃ arahatīti opaneyyiko, taṃ opaneyyikaṃ. Sabbehipi ugghaṭitaññūādīhi ‘‘bhāvito me maggo, adhigataṃ phalaṃ, sacchikato nirodho’’ti attani attani veditabbanti paccattaṃ veditabbaṃ viññūhi.
109. அத² நங் பா³வரீ ஆஹ ‘‘கிங் நு தம்ஹா’’தி த்³வே கா³தா².
109. Atha naṃ bāvarī āha ‘‘kiṃ nu tamhā’’ti dve gāthā.
முஹுத்தம்பீதி தோ²கம்பி. க²ணம்பீதி ந ப³ஹுகம்பி. லயம்பீதி மனம்பி. வயம்பீதி கொட்டா²ஸம்பி. அத்³த⁴ம்பீதி தி³வஸம்பி.
Muhuttampīti thokampi. Khaṇampīti na bahukampi. Layampīti manampi. Vayampīti koṭṭhāsampi. Addhampīti divasampi.
111-113. ததோ பிங்கி³யோ ப⁴க³வதோ ஸந்திகா அவிப்பவாஸமேவ தீ³பெந்தோ ‘‘நாஹங் தம்ஹா’’திஆதி³மாஹ. நாஹங் யோ மே…பே॰… பஸ்ஸாமி நங் மனஸா சக்கு²னாவாதி தங் பு³த்³த⁴ங் மங்ஸசக்கு²னா விய மனஸா பஸ்ஸாமி. நமஸ்ஸமானோ விவஸேமி ரத்திந்தி நமஸ்ஸமானோவ ரத்திங் அதினாமேமி.
111-113. Tato piṅgiyo bhagavato santikā avippavāsameva dīpento ‘‘nāhaṃ tamhā’’tiādimāha. Nāhaṃ yo me…pe… passāmi naṃ manasā cakkhunāvāti taṃ buddhaṃ maṃsacakkhunā viya manasā passāmi. Namassamāno vivasemi rattinti namassamānova rattiṃ atināmemi.
114. தேன தேனேவ நதோதி யேன யேன தி³ஸாபா⁴கே³ன பு³த்³தோ⁴, தேன தேனேவாஹம்பி நதோ, தன்னின்னோ தப்போணோதி த³ஸ்ஸேதி.
114. Tena teneva natoti yena yena disābhāgena buddho, tena tenevāhampi nato, tanninno tappoṇoti dasseti.
115. து³ப்³ப³லதா²மகஸ்ஸாதி அப்பதா²மகஸ்ஸ. அத² வா து³ப்³ப³லஸ்ஸ து³த்தா²மகஸ்ஸ ச, ப³லவீரியஹீனஸ்ஸாபீதி வுத்தங் ஹோதி. தேனேவ காயோ ந பலேதீதி தேனேவ து³ப்³ப³லத்தா²மகத்தேன காயோ ந க³ச்ச²தி, யேன பு³த்³தோ⁴, ந தேன க³ச்ச²தி. ‘‘ந பரேதீ’’திபி பாடோ², ஸோ ஏவத்தோ². தத்தா²தி பு³த்³த⁴ஸ்ஸ ஸந்திகே. ஸங்கப்பயந்தாயாதி ஸங்கப்பக³மனேன. தேன யுத்தோதி யேன பு³த்³தோ⁴, தேன யுத்தோ பயுத்தோ அனுயுத்தோதி த³ஸ்ஸேதி.
115.Dubbalathāmakassāti appathāmakassa. Atha vā dubbalassa dutthāmakassa ca, balavīriyahīnassāpīti vuttaṃ hoti. Teneva kāyo na paletīti teneva dubbalatthāmakattena kāyo na gacchati, yena buddho, na tena gacchati. ‘‘Na paretī’’tipi pāṭho, so evattho. Tatthāti buddhassa santike. Saṅkappayantāyāti saṅkappagamanena. Tena yuttoti yena buddho, tena yutto payutto anuyuttoti dasseti.
யேன பு³த்³தோ⁴தி யேன தி³ஸாபா⁴கே³ன பு³த்³தோ⁴ உபஸங்கமிதப்³போ³, தேன தி³ஸாபா⁴கே³ன ந பலேதி. அத² வா பு⁴ம்மத்தே² கரணவசனங். யத்த² பு³த்³தோ⁴ தத்த² ந பலேதி ந க³ச்ச²தி. ந வஜதீதி புரதோ ந யாதி. ந க³ச்ச²தீதி நிவத்ததி. நாதிக்கமதீதி ந உபஸங்கமதி.
Yena buddhoti yena disābhāgena buddho upasaṅkamitabbo, tena disābhāgena na paleti. Atha vā bhummatthe karaṇavacanaṃ. Yattha buddho tattha na paleti na gacchati. Na vajatīti purato na yāti. Na gacchatīti nivattati. Nātikkamatīti na upasaṅkamati.
116. பங்கே ஸயானோதி காமகத்³த³மே ஸயமானோ. தீ³பா தீ³பங் உபல்லவிந்தி ஸத்தா²ராதி³தோ ஸத்தா²ராதி³ங் அதி⁴க³ச்சி²ங். அத²த்³த³ஸாஸிங் ஸம்பு³த்³த⁴ந்தி ஸோஹங் ஏவங் து³தி³ட்டி²ங் க³ஹெத்வா அன்வாஹிண்ட³ந்தோ அத² பாஸாணகசேதியே பு³த்³த⁴மத்³த³க்கி²ங்.
116.Paṅke sayānoti kāmakaddame sayamāno. Dīpā dīpaṃ upallavinti satthārādito satthārādiṃ adhigacchiṃ. Athaddasāsiṃ sambuddhanti sohaṃ evaṃ dudiṭṭhiṃ gahetvā anvāhiṇḍanto atha pāsāṇakacetiye buddhamaddakkhiṃ.
தத்த² ஸேமானோதி நிஸஜ்ஜமானோ. ஸயமானோதி ஸெய்யங் கப்பயமானோ. ஆவஸமானோதி வஸமானோ. பரிவஸமானோதி நிச்சங் வஸமானோ.
Tattha semānoti nisajjamāno. Sayamānoti seyyaṃ kappayamāno. Āvasamānoti vasamāno. Parivasamānoti niccaṃ vasamāno.
பல்லவிந்தி உக்³க³மிங். உபல்லவிந்தி உத்தரிங் , ஸம்பல்லவிந்தி உபஸக்³கே³ன பத³ங் வட்³டி⁴தங். அத்³த³ஸந்தி நித்³தே³ஸஸ்ஸ உத்³தே³ஸபத³ங். அத்³த³ஸந்தி பஸ்ஸிங். அத்³த³க்கி²ந்தி ஓலோகேஸிங். அபஸ்ஸிந்தி ஏஸிங். படிவிஜ்ஜி²ந்தி வினிவிஜ்ஜி²ங்.
Pallavinti uggamiṃ. Upallavinti uttariṃ , sampallavinti upasaggena padaṃ vaḍḍhitaṃ. Addasanti niddesassa uddesapadaṃ. Addasanti passiṃ. Addakkhinti olokesiṃ. Apassinti esiṃ. Paṭivijjhinti vinivijjhiṃ.
117. இமிஸ்ஸா கா³தா²ய அவஸானே பிங்கி³யஸ்ஸ ச பா³வரிஸ்ஸ ச இந்த்³ரியபரிபாகங் விதி³த்வா ப⁴க³வா ஸாவத்தி²யங் டி²தோயேவ ஸுவண்ணோபா⁴ஸங் முஞ்சி. பிங்கி³யோ பா³வரிஸ்ஸ பு³த்³த⁴கு³ணே வண்ணயந்தோ நிஸின்னோ ஏவ தங் ஓபா⁴ஸங் தி³ஸ்வா ‘‘கிங் இத³’’ந்தி ஓலோகெந்தோ ப⁴க³வந்தங் அத்தனோ புரதோ டி²தங் விய தி³ஸ்வா பா³வரிப்³ராஹ்மணஸ்ஸ ‘‘பு³த்³தோ⁴ ஆக³தோ’’தி ஆரோசேஸி. ப்³ராஹ்மணோ உட்டா²யாஸனா அஞ்ஜலிங் பக்³க³ஹெத்வா அட்டா²ஸி. ப⁴க³வாபி ஓபா⁴ஸங் ப²ரித்வா ப்³ராஹ்மணஸ்ஸ அத்தானங் த³ஸ்ஸெந்தோ உபி⁴ன்னம்பி ஸப்பாயங் விதி³த்வா பிங்கி³யமேவ ஆலபமானோ ‘‘யதா² அஹூ, வக்கலீ’’தி இமங் கா³த²மபா⁴ஸி.
117. Imissā gāthāya avasāne piṅgiyassa ca bāvarissa ca indriyaparipākaṃ viditvā bhagavā sāvatthiyaṃ ṭhitoyeva suvaṇṇobhāsaṃ muñci. Piṅgiyo bāvarissa buddhaguṇe vaṇṇayanto nisinno eva taṃ obhāsaṃ disvā ‘‘kiṃ ida’’nti olokento bhagavantaṃ attano purato ṭhitaṃ viya disvā bāvaribrāhmaṇassa ‘‘buddho āgato’’ti ārocesi. Brāhmaṇo uṭṭhāyāsanā añjaliṃ paggahetvā aṭṭhāsi. Bhagavāpi obhāsaṃ pharitvā brāhmaṇassa attānaṃ dassento ubhinnampi sappāyaṃ viditvā piṅgiyameva ālapamāno ‘‘yathā ahū, vakkalī’’ti imaṃ gāthamabhāsi.
தஸ்ஸத்தோ² – யதா² வக்கலித்தே²ரோ ஸத்³தா⁴தி⁴முத்தோ அஹோஸி, ஸத்³தா⁴து⁴ரேனேவ அரஹத்தங் பாபுணி, யதா² ச ஸோளஸன்னங் ஏகோ ப⁴த்³ராவுதோ⁴ நாம, யதா² ச ஆளவிகோ³தமோ ச. ஏவமேவ த்வம்பி பமுஞ்சஸ்ஸு ஸத்³த⁴ங் , ததோ ஸத்³தா⁴ய அதி⁴முச்சந்தோ ‘‘ஸப்³பே³ ஸங்கா²ரா அனிச்சா’’திஆதி³னா (த⁴॰ ப॰ 277; தே²ரகா³॰ 676; படி॰ ம॰ 1.31; கதா²॰ 753) நயேன விபஸ்ஸனங் ஆரபி⁴த்வா மச்சுதெ⁴ய்யஸ்ஸ பாரங் நிப்³பா³னங் க³மிஸ்ஸஸீதி அரஹத்தனிகூடேன தே³ஸனங் நிட்டா²பேஸி, தே³ஸனாபரியோஸானே பிங்கி³யோ அரஹத்தே, பா³வரீ அனாகா³மிப²லே பதிட்ட²ஹி, பா³வரிப்³ராஹ்மணஸ்ஸ ஸிஸ்ஸா பன பஞ்சஸதா ஸோதாபன்னா அஹேஸுங்.
Tassattho – yathā vakkalitthero saddhādhimutto ahosi, saddhādhureneva arahattaṃ pāpuṇi, yathā ca soḷasannaṃ eko bhadrāvudho nāma, yathā ca āḷavigotamo ca. Evameva tvampi pamuñcassu saddhaṃ, tato saddhāya adhimuccanto ‘‘sabbe saṅkhārā aniccā’’tiādinā (dha. pa. 277; theragā. 676; paṭi. ma. 1.31; kathā. 753) nayena vipassanaṃ ārabhitvā maccudheyyassa pāraṃ nibbānaṃ gamissasīti arahattanikūṭena desanaṃ niṭṭhāpesi, desanāpariyosāne piṅgiyo arahatte, bāvarī anāgāmiphale patiṭṭhahi, bāvaribrāhmaṇassa sissā pana pañcasatā sotāpannā ahesuṃ.
தத்த² முஞ்சஸ்ஸூதி மோசஸ்ஸு. பமுஞ்சஸ்ஸூதி மோசேஹி. அதி⁴முஞ்சஸ்ஸூதி தத்த² அதி⁴மொக்க²ங் கரஸ்ஸு. ஓகப்பேஹீதி ப³ஹுமானங் உப்பாதே³ஹீதி. ஸப்³பே³ ஸங்கா²ரா அனிச்சாதி ஹுத்வா அபா⁴வட்டே²ன. ஸப்³பே³ ஸங்கா²ரா து³க்கா²தி து³க்க²மட்டே²ன. ஸப்³பே³ த⁴ம்மா அனத்தாதி அவஸவத்தனட்டே²ன.
Tattha muñcassūti mocassu. Pamuñcassūti mocehi. Adhimuñcassūti tattha adhimokkhaṃ karassu. Okappehīti bahumānaṃ uppādehīti. Sabbe saṅkhārā aniccāti hutvā abhāvaṭṭhena. Sabbe saṅkhārā dukkhāti dukkhamaṭṭhena. Sabbe dhammā anattāti avasavattanaṭṭhena.
118. இதா³னி பிங்கி³யோ அத்தனோ பஸாத³ங் நிவேதெ³ந்தோ ‘‘ஏஸ பி⁴ய்யோதிஆதி³மாஹ. தத்த² படிபா⁴னவாதி படிபா⁴னப்படிஸம்பி⁴தா³ய உபேதோ.
118. Idāni piṅgiyo attano pasādaṃ nivedento ‘‘esa bhiyyotiādimāha. Tattha paṭibhānavāti paṭibhānappaṭisambhidāya upeto.
பி⁴ய்யோ பி⁴ய்யோதி உபரூபரி.
Bhiyyo bhiyyoti uparūpari.
119. அதி⁴தே³வே அபி⁴ஞ்ஞாயாதி அதி⁴தே³வகரே த⁴ம்மே ஞத்வா. பரோபரந்தி ஹீனபணீதங், அத்தனோ ச பரஸ்ஸ ச அதி⁴தே³வத்தகரங் ஸப்³ப³த⁴ம்மஜாதங் அவேதீ³தி வுத்தங் ஹோதி. கங்கீ²னங் படிஜானதந்தி கங்கீ²னங்யேவ ஸதங் ‘‘நிக்கங்க²ம்ஹா’’தி படிஜானந்தானங்.
119.Adhideve abhiññāyāti adhidevakare dhamme ñatvā. Paroparanti hīnapaṇītaṃ, attano ca parassa ca adhidevattakaraṃ sabbadhammajātaṃ avedīti vuttaṃ hoti. Kaṅkhīnaṃ paṭijānatanti kaṅkhīnaṃyeva sataṃ ‘‘nikkaṅkhamhā’’ti paṭijānantānaṃ.
நித்³தே³ஸே பாராயனிகபஞ்ஹானந்தி பாராயனிகப்³ராஹ்மணானங் புச்சா²னங். அவஸானங் கரோதீதி அந்தகரோ. கோடிங் கரோதீதி பரியந்தகரோ. ஸீமங் மரியாத³ங் கரோதீதி பரிச்சே²த³கரோ. நிக³மங் கரோதீதி பரிவடுமகரோ. ஸபி⁴யபஞ்ஹானந்தி ந கேவலங் பாராயனிகப்³ராஹ்மணானங் பஞ்ஹானங் ஏவ, அத² கோ² ஸபி⁴யபரிப்³பா³ஜகாதீ³னம்பி பஞ்ஹானங் அந்தங் கரோதீதி த³ஸ்ஸேதுங் ‘‘ஸபி⁴யபஞ்ஹான’’ந்திஆதி³மாஹ.
Niddese pārāyanikapañhānanti pārāyanikabrāhmaṇānaṃ pucchānaṃ. Avasānaṃ karotīti antakaro. Koṭiṃ karotīti pariyantakaro. Sīmaṃ mariyādaṃ karotīti paricchedakaro. Nigamaṃ karotīti parivaṭumakaro. Sabhiyapañhānanti na kevalaṃ pārāyanikabrāhmaṇānaṃ pañhānaṃ eva, atha kho sabhiyaparibbājakādīnampi pañhānaṃ antaṃ karotīti dassetuṃ ‘‘sabhiyapañhāna’’ntiādimāha.
120. அஸங்ஹீரந்தி ராகா³தீ³ஹி அஸங்ஹாரியங். அஸங்குப்பந்தி அஸங்குப்பங் அவிபரிணாமத⁴ம்மங். த்³வீஹிபி பதே³ஹி நிப்³பா³னங் ப⁴ணதி. அத்³தா⁴ க³மிஸ்ஸாமீதி ஏகங்ஸேனேவ தங் அனுபாதி³ஸேஸனிப்³பா³னதா⁴துங் க³மிஸ்ஸாமி. ந மெத்த² கங்கா²தி நத்தி² மே எத்த² நிப்³பா³னே கங்கா². ஏவங் மங் தா⁴ரேஹி அதி⁴முத்தசித்தந்தி பிங்கி³யோ ‘‘ஏவமேவ த்வம்பி பமுஞ்சஸ்ஸு ஸத்³த⁴’’ந்தி இமினா ப⁴க³வதோ ஓவாதே³ன அத்தனி ஸத்³த⁴ங் உப்பாதெ³த்வா ஸத்³தா⁴து⁴ரேனேவ ச விமுஞ்சித்வா தங் ஸத்³தா⁴தி⁴முத்திங் பகாஸெந்தோ ப⁴க³வந்தங் ஆஹ – ‘‘ஏவங் மங் தா⁴ரேஹி அதி⁴முத்தசித்த’’ந்தி. அயஞ்ஹெத்த² அதி⁴ப்பாயோ ‘‘யதா² மங் த்வங் அவச, ஏவமேவ மங் அதி⁴முத்தசித்தங் தா⁴ரேஹீ’’தி.
120.Asaṃhīranti rāgādīhi asaṃhāriyaṃ. Asaṅkuppanti asaṅkuppaṃ avipariṇāmadhammaṃ. Dvīhipi padehi nibbānaṃ bhaṇati. Addhā gamissāmīti ekaṃseneva taṃ anupādisesanibbānadhātuṃ gamissāmi. Na mettha kaṅkhāti natthi me ettha nibbāne kaṅkhā. Evaṃ maṃ dhārehi adhimuttacittanti piṅgiyo ‘‘evameva tvampi pamuñcassu saddha’’nti iminā bhagavato ovādena attani saddhaṃ uppādetvā saddhādhureneva ca vimuñcitvā taṃ saddhādhimuttiṃ pakāsento bhagavantaṃ āha – ‘‘evaṃ maṃ dhārehi adhimuttacitta’’nti. Ayañhettha adhippāyo ‘‘yathā maṃ tvaṃ avaca, evameva maṃ adhimuttacittaṃ dhārehī’’ti.
ந ஸங்ஹரியதீதி க³ஹெத்வா ஸங்ஹரிதுங் ந ஸக்கா. நியோக³வசனந்தி யுத்தவசனங். அவத்தா²பனவசனந்தி ஸன்னிட்டா²னவசனங். இமஸ்மிங் பாராயனவக்³கே³ யங் அந்தரந்தரா ந வுத்தங், தங் ஹெட்டா² வுத்தனயேன க³ஹேதப்³ப³ங். ஸேஸங் ஸப்³ப³த்த² பாகடமேவ.
Na saṃhariyatīti gahetvā saṃharituṃ na sakkā. Niyogavacananti yuttavacanaṃ. Avatthāpanavacananti sanniṭṭhānavacanaṃ. Imasmiṃ pārāyanavagge yaṃ antarantarā na vuttaṃ, taṃ heṭṭhā vuttanayena gahetabbaṃ. Sesaṃ sabbattha pākaṭameva.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
பாராயனானுகீ³திகா³தா²னித்³தே³ஸவண்ணனா நிட்டி²தா.
Pārāyanānugītigāthāniddesavaṇṇanā niṭṭhitā.
பாராயனவக்³க³வண்ணனா நிட்டி²தா.
Pārāyanavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
18. பாராயனானுகீ³திகா³தா² • 18. Pārāyanānugītigāthā
18. பாராயனானுகீ³திகா³தா²னித்³தே³ஸோ • 18. Pārāyanānugītigāthāniddeso
