| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
३३. परायनसुत्तं
33. Parāyanasuttaṃ
४०९. ‘‘परायनञ्च 1 वो, भिक्खवे, देसेस्सामि परायनगामिञ्च मग्गं। तं सुणाथ। कतमञ्च, भिक्खवे, परायनं? यो, भिक्खवे, रागक्खयो दोसक्खयो मोहक्खयो – इदं वुच्चति, भिक्खवे, परायनं। कतमो च, भिक्खवे, परायनगामी मग्गो? कायगतासति। अयं वुच्चति, भिक्खवे, परायनगामिमग्गो। इति खो, भिक्खवे, देसितं वो मया परायनं, देसितो परायनगामिमग्गो। यं, भिक्खवे, सत्थारा करणीयं सावकानं हितेसिना अनुकम्पकेन अनुकम्पं उपादाय, कतं वो तं मया। एतानि, भिक्खवे, रुक्खमूलानि, एतानि सुञ्ञागारानि। झायथ, भिक्खवे, मा पमादत्थ; मा पच्छा विप्पटिसारिनो अहुवत्थ। अयं वो अम्हाकं अनुसासनी’’ति। (यथा असङ्खतं तथा वित्थारेतब्बं)। तेत्तिंसतिमं।
409. ‘‘Parāyanañca 2 vo, bhikkhave, desessāmi parāyanagāmiñca maggaṃ. Taṃ suṇātha. Katamañca, bhikkhave, parāyanaṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, parāyanaṃ. Katamo ca, bhikkhave, parāyanagāmī maggo? Kāyagatāsati. Ayaṃ vuccati, bhikkhave, parāyanagāmimaggo. Iti kho, bhikkhave, desitaṃ vo mayā parāyanaṃ, desito parāyanagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī’’ti. (Yathā asaṅkhataṃ tathā vitthāretabbaṃ). Tettiṃsatimaṃ.
दुतियो वग्गो।
Dutiyo vaggo.
तस्सुद्दानं –
Tassuddānaṃ –
असङ्खतं अनतं अनासवं, सच्चञ्च पारं निपुणं सुदुद्दसं।
Asaṅkhataṃ anataṃ anāsavaṃ, saccañca pāraṃ nipuṇaṃ sududdasaṃ;
अजज्जरं धुवं अपलोकितं, अनिदस्सनं निप्पपञ्च सन्तं॥
Ajajjaraṃ dhuvaṃ apalokitaṃ, anidassanaṃ nippapañca santaṃ.
अमतं पणीतञ्च सिवञ्च खेमं, तण्हाक्खयो अच्छरियञ्च अब्भुतं।
Amataṃ paṇītañca sivañca khemaṃ, taṇhākkhayo acchariyañca abbhutaṃ;
अनीतिकं अनीतिकधम्मं, निब्बानमेतं सुगतेन देसितं॥
Anītikaṃ anītikadhammaṃ, nibbānametaṃ sugatena desitaṃ.
अब्यापज्झो विरागो च, सुद्धि मुत्ति अनालयो।
Abyāpajjho virāgo ca, suddhi mutti anālayo;
दीपो लेणञ्च ताणञ्च, सरणञ्च परायनन्ति॥
Dīpo leṇañca tāṇañca, saraṇañca parāyananti.
असङ्खतसंयुत्तं समत्तं।
Asaṅkhatasaṃyuttaṃ samattaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १-३३. असङ्खतसुत्तादिवण्णना • 1-33. Asaṅkhatasuttādivaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / २३-३३. असङ्खतसुत्तादिवण्णना • 23-33. Asaṅkhatasuttādivaṇṇanā
