| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៣៣. បរាយនសុត្តំ
33. Parāyanasuttaṃ
៤០៩. ‘‘បរាយនញ្ច 1 វោ, ភិក្ខវេ, ទេសេស្សាមិ បរាយនគាមិញ្ច មគ្គំ។ តំ សុណាថ។ កតមញ្ច, ភិក្ខវេ, បរាយនំ? យោ, ភិក្ខវេ, រាគក្ខយោ ទោសក្ខយោ មោហក្ខយោ – ឥទំ វុច្ចតិ, ភិក្ខវេ, បរាយនំ។ កតមោ ច, ភិក្ខវេ, បរាយនគាមី មគ្គោ? កាយគតាសតិ។ អយំ វុច្ចតិ, ភិក្ខវេ, បរាយនគាមិមគ្គោ។ ឥតិ ខោ, ភិក្ខវេ, ទេសិតំ វោ មយា បរាយនំ, ទេសិតោ បរាយនគាមិមគ្គោ។ យំ, ភិក្ខវេ, សត្ថារា ករណីយំ សាវកានំ ហិតេសិនា អនុកម្បកេន អនុកម្បំ ឧបាទាយ, កតំ វោ តំ មយា។ ឯតានិ, ភិក្ខវេ, រុក្ខមូលានិ, ឯតានិ សុញ្ញាគារានិ។ ឈាយថ, ភិក្ខវេ, មា បមាទត្ថ; មា បច្ឆា វិប្បដិសារិនោ អហុវត្ថ។ អយំ វោ អម្ហាកំ អនុសាសនី’’តិ។ (យថា អសង្ខតំ តថា វិត្ថារេតព្ពំ)។ តេត្តិំសតិមំ។
409. ‘‘Parāyanañca 2 vo, bhikkhave, desessāmi parāyanagāmiñca maggaṃ. Taṃ suṇātha. Katamañca, bhikkhave, parāyanaṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, parāyanaṃ. Katamo ca, bhikkhave, parāyanagāmī maggo? Kāyagatāsati. Ayaṃ vuccati, bhikkhave, parāyanagāmimaggo. Iti kho, bhikkhave, desitaṃ vo mayā parāyanaṃ, desito parāyanagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī’’ti. (Yathā asaṅkhataṃ tathā vitthāretabbaṃ). Tettiṃsatimaṃ.
ទុតិយោ វគ្គោ។
Dutiyo vaggo.
តស្សុទ្ទានំ –
Tassuddānaṃ –
អសង្ខតំ អនតំ អនាសវំ, សច្ចញ្ច បារំ និបុណំ សុទុទ្ទសំ;
Asaṅkhataṃ anataṃ anāsavaṃ, saccañca pāraṃ nipuṇaṃ sududdasaṃ;
អជជ្ជរំ ធុវំ អបលោកិតំ, អនិទស្សនំ និប្បបញ្ច សន្តំ។
Ajajjaraṃ dhuvaṃ apalokitaṃ, anidassanaṃ nippapañca santaṃ.
អមតំ បណីតញ្ច សិវញ្ច ខេមំ, តណ្ហាក្ខយោ អច្ឆរិយញ្ច អព្ភុតំ;
Amataṃ paṇītañca sivañca khemaṃ, taṇhākkhayo acchariyañca abbhutaṃ;
អនីតិកំ អនីតិកធម្មំ, និព្ពានមេតំ សុគតេន ទេសិតំ។
Anītikaṃ anītikadhammaṃ, nibbānametaṃ sugatena desitaṃ.
អព្យាបជ្ឈោ វិរាគោ ច, សុទ្ធិ មុត្តិ អនាលយោ;
Abyāpajjho virāgo ca, suddhi mutti anālayo;
ទីបោ លេណញ្ច តាណញ្ច, សរណញ្ច បរាយនន្តិ។
Dīpo leṇañca tāṇañca, saraṇañca parāyananti.
អសង្ខតសំយុត្តំ សមត្តំ។
Asaṅkhatasaṃyuttaṃ samattaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១-៣៣. អសង្ខតសុត្តាទិវណ្ណនា • 1-33. Asaṅkhatasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ២៣-៣៣. អសង្ខតសុត្តាទិវណ្ណនា • 23-33. Asaṅkhatasuttādivaṇṇanā
