| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
33. පරායනසුත්‌තං
33. Parāyanasuttaṃ
409. ‘‘පරායනඤ්‌ච 1 වො, භික්‌ඛවෙ, දෙසෙස්‌සාමි පරායනගාමිඤ්‌ච මග්‌ගං. තං සුණාථ. කතමඤ්‌ච, භික්‌ඛවෙ, පරායනං? යො, භික්‌ඛවෙ, රාගක්‌ඛයො දොසක්‌ඛයො මොහක්‌ඛයො – ඉදං වුච්‌චති, භික්‌ඛවෙ, පරායනං. කතමො ච, භික්‌ඛවෙ, පරායනගාමී මග්‌ගො? කායගතාසති. අයං වුච්‌චති, භික්‌ඛවෙ, පරායනගාමිමග්‌ගො. ඉති ඛො, භික්‌ඛවෙ, දෙසිතං වො මයා පරායනං, දෙසිතො පරායනගාමිමග්‌ගො. යං, භික්‌ඛවෙ, සත්‌ථාරා කරණීයං සාවකානං හිතෙසිනා අනුකම්‌පකෙන අනුකම්‌පං උපාදාය, කතං වො තං මයා. එතානි, භික්‌ඛවෙ, රුක්‌ඛමූලානි, එතානි සුඤ්‌ඤාගාරානි. ඣායථ, භික්‌ඛවෙ, මා පමාදත්‌ථ; මා පච්‌ඡා විප්‌පටිසාරිනො අහුවත්‌ථ. අයං වො අම්‌හාකං අනුසාසනී’’ති. (යථා අසඞ්‌ඛතං තථා විත්‌ථාරෙතබ්‌බං). තෙත්‌තිංසතිමං.
409. ‘‘Parāyanañca 2 vo, bhikkhave, desessāmi parāyanagāmiñca maggaṃ. Taṃ suṇātha. Katamañca, bhikkhave, parāyanaṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, parāyanaṃ. Katamo ca, bhikkhave, parāyanagāmī maggo? Kāyagatāsati. Ayaṃ vuccati, bhikkhave, parāyanagāmimaggo. Iti kho, bhikkhave, desitaṃ vo mayā parāyanaṃ, desito parāyanagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī’’ti. (Yathā asaṅkhataṃ tathā vitthāretabbaṃ). Tettiṃsatimaṃ.
දුතියො වග්‌ගො.
Dutiyo vaggo.
තස්‌සුද්‌දානං –
Tassuddānaṃ –
අසඞ්‌ඛතං අනතං අනාසවං, සච්‌චඤ්‌ච පාරං නිපුණං සුදුද්‌දසං;
Asaṅkhataṃ anataṃ anāsavaṃ, saccañca pāraṃ nipuṇaṃ sududdasaṃ;
අජජ්‌ජරං ධුවං අපලොකිතං, අනිදස්‌සනං නිප්‌පපඤ්‌ච සන්‌තං.
Ajajjaraṃ dhuvaṃ apalokitaṃ, anidassanaṃ nippapañca santaṃ.
අමතං පණීතඤ්‌ච සිවඤ්‌ච ඛෙමං, තණ්‌හාක්‌ඛයො අච්‌ඡරියඤ්‌ච අබ්‌භුතං;
Amataṃ paṇītañca sivañca khemaṃ, taṇhākkhayo acchariyañca abbhutaṃ;
අනීතිකං අනීතිකධම්‌මං, නිබ්‌බානමෙතං සුගතෙන දෙසිතං.
Anītikaṃ anītikadhammaṃ, nibbānametaṃ sugatena desitaṃ.
අබ්‍යාපජ්‌ඣො විරාගො ච, සුද්‌ධි මුත්‌ති අනාලයො;
Abyāpajjho virāgo ca, suddhi mutti anālayo;
දීපො ලෙණඤ්‌ච තාණඤ්‌ච, සරණඤ්‌ච පරායනන්‌ති.
Dīpo leṇañca tāṇañca, saraṇañca parāyananti.
අසඞ්‌ඛතසංයුත්‌තං සමත්‌තං.
Asaṅkhatasaṃyuttaṃ samattaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-33. අසඞ්‌ඛතසුත්‌තාදිවණ්‌ණනා • 1-33. Asaṅkhatasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 23-33. අසඞ්‌ඛතසුත්‌තාදිවණ්‌ණනා • 23-33. Asaṅkhatasuttādivaṇṇanā
