| Library / Tipiṭaka / తిపిటక • Tipiṭaka / చూళనిద్దేసపాళి • Cūḷaniddesapāḷi |
౧౭. పారాయనత్థుతిగాథా
17. Pārāyanatthutigāthā
ఇదమవోచ భగవా మగధేసు విహరన్తో పాసాణకే చేతియే, పరిచారకసోళసానం 1 బ్రాహ్మణానం అజ్ఝిట్ఠో పుట్ఠో పుట్ఠో పఞ్హం 2 బ్యాకాసి. ఏకమేకస్స చేపి పఞ్హస్స అత్థమఞ్ఞాయ ధమ్మమఞ్ఞాయ ధమ్మానుధమ్మం పటిపజ్జేయ్య, గచ్ఛేయ్యేవ జరామరణస్స పారం. ‘‘పారఙ్గమనీయా ఇమే ధమ్మా’’తి – తస్మా ఇమస్స ధమ్మపరియాయస్స పారాయనన్తేవ 3 అధివచనం.
Idamavoca bhagavā magadhesu viharanto pāsāṇake cetiye, paricārakasoḷasānaṃ 4 brāhmaṇānaṃ ajjhiṭṭho puṭṭho puṭṭho pañhaṃ 5 byākāsi. Ekamekassa cepi pañhassa atthamaññāya dhammamaññāya dhammānudhammaṃ paṭipajjeyya, gaccheyyeva jarāmaraṇassa pāraṃ. ‘‘Pāraṅgamanīyā ime dhammā’’ti – tasmā imassa dhammapariyāyassa pārāyananteva 6 adhivacanaṃ.
౧౪౯.
149.
అజితో తిస్సమేత్తేయ్యో, పుణ్ణకో అథ మేత్తగూ;
Ajito tissametteyyo, puṇṇako atha mettagū;
ధోతకో ఉపసీవో చ, నన్దో చ అథ హేమకో.
Dhotako upasīvo ca, nando ca atha hemako.
౧౫౦.
150.
తోదేయ్యకప్పా దుభయో, జతుకణ్ణీ చ పణ్డితో;
Todeyyakappā dubhayo, jatukaṇṇī ca paṇḍito;
భద్రావుధో ఉదయో చ, పోసాలో చాపి బ్రాహ్మణో;
Bhadrāvudho udayo ca, posālo cāpi brāhmaṇo;
మోఘరాజా చ మేధావీ, పిఙ్గియో చ మహాఇసి.
Mogharājā ca medhāvī, piṅgiyo ca mahāisi.
౧౫౧.
151.
ఏతే బుద్ధం ఉపాగచ్ఛుం, సమ్పన్నచరణం ఇసిం;
Ete buddhaṃ upāgacchuṃ, sampannacaraṇaṃ isiṃ;
పుచ్ఛన్తా నిపుణే పఞ్హే, బుద్ధసేట్ఠం ఉపాగముం.
Pucchantā nipuṇe pañhe, buddhaseṭṭhaṃ upāgamuṃ.
౧౫౨.
152.
తేసం బుద్ధో పబ్యాకాసి, పఞ్హే పుట్ఠో యథాతథం;
Tesaṃ buddho pabyākāsi, pañhe puṭṭho yathātathaṃ;
పఞ్హానం వేయ్యాకరణేన, తోసేసి బ్రాహ్మణే ముని.
Pañhānaṃ veyyākaraṇena, tosesi brāhmaṇe muni.
౧౫౩.
153.
తే తోసితా చక్ఖుమతా, బుద్ధేనాదిచ్చబన్ధునా;
Te tositā cakkhumatā, buddhenādiccabandhunā;
బ్రహ్మచరియమచరింసు, వరపఞ్ఞస్స సన్తికే.
Brahmacariyamacariṃsu, varapaññassa santike.
౧౫౪.
154.
ఏకమేకస్స పఞ్హస్స, యథా బుద్ధేన దేసితం;
Ekamekassa pañhassa, yathā buddhena desitaṃ;
తథా యో పటిపజ్జేయ్య, గచ్ఛే పారం అపారతో.
Tathā yo paṭipajjeyya, gacche pāraṃ apārato.
౧౫౫.
155.
అపారా పారం గచ్ఛేయ్య, భావేన్తో మగ్గముత్తమం;
Apārā pāraṃ gaccheyya, bhāvento maggamuttamaṃ;
మగ్గో సో పారం గమనాయ, తస్మా పారాయనం ఇతి.
Maggo so pāraṃ gamanāya, tasmā pārāyanaṃ iti.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / ఖుద్దకనికాయ (అట్ఠకథా) • Khuddakanikāya (aṭṭhakathā) / చూళనిద్దేస-అట్ఠకథా • Cūḷaniddesa-aṭṭhakathā / ౧౭. పారాయనత్థుతిగాథానిద్దేసవణ్ణనా • 17. Pārāyanatthutigāthāniddesavaṇṇanā
