| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
17. பாராயனத்து²திகா³தா²னித்³தே³ஸவண்ணனா
17. Pārāyanatthutigāthāniddesavaṇṇanā
93. இதோ பரங் ஸங்கீ³திகாரா தே³ஸனங் தோ²மெந்தா ‘‘இத³மவோச ப⁴க³வா’’திஆதி³மாஹங்ஸு. தத்த² இத³மவோசாதி இத³ங் பாராயனங் அவோச. பரிசாரகஸோளஸானந்தி பா³வரிஸ்ஸ பரிசாரகேன பிங்கி³யேன ஸஹ ஸோளஸானங், பு³த்³த⁴ஸ்ஸ வா ப⁴க³வதோ பரிசாரகானங் ஸோளஸானந்தி பரிசாரகஸோளஸானங். தே ஏவ ச ப்³ராஹ்மணா தத்த² ஸோளஸஸு தி³ஸாஸு புரதோ ச பச்ச²தோ ச வாமபஸ்ஸதோ ச த³க்கி²ணபஸ்ஸதோ ச ச² ச² யோஜனா நிஸின்னா உஜுகேன த்³வாத³ஸயோஜனிகா அஹோஸி. அஜ்ஜி²ட்டோ²தி யாசிதோ.
93. Ito paraṃ saṅgītikārā desanaṃ thomentā ‘‘idamavoca bhagavā’’tiādimāhaṃsu. Tattha idamavocāti idaṃ pārāyanaṃ avoca. Paricārakasoḷasānanti bāvarissa paricārakena piṅgiyena saha soḷasānaṃ, buddhassa vā bhagavato paricārakānaṃ soḷasānanti paricārakasoḷasānaṃ. Te eva ca brāhmaṇā tattha soḷasasu disāsu purato ca pacchato ca vāmapassato ca dakkhiṇapassato ca cha cha yojanā nisinnā ujukena dvādasayojanikā ahosi. Ajjhiṭṭhoti yācito.
94-97. அத்த²மஞ்ஞாயாதி பாளிஅத்த²மஞ்ஞாய. த⁴ம்மமஞ்ஞாயாதி பாளிமஞ்ஞாய. பாராயனந்தி ஏவங் இமஸ்ஸ த⁴ம்மபரியாயஸ்ஸ அதி⁴வசனங் ஆரோபெத்வா தேஸங் ப்³ராஹ்மணானங் நாமானி கித்தயந்தோ ‘‘அஜிதோ…பே॰… பு³த்³த⁴ஸெட்ட²முபாக³மு’’ந்தி ஆஹங்ஸு. தத்த² ஸம்பன்னசரணந்தி நிப்³பா³னபத³ட்டா²னபூ⁴தேன பாதிமொக்க²ஸீலாதி³னா ஸம்பன்னங். இஸிந்தி மஹேஸிங்.
94-97.Atthamaññāyāti pāḷiatthamaññāya. Dhammamaññāyāti pāḷimaññāya. Pārāyananti evaṃ imassa dhammapariyāyassa adhivacanaṃ āropetvā tesaṃ brāhmaṇānaṃ nāmāni kittayanto ‘‘ajito…pe… buddhaseṭṭhamupāgamu’’nti āhaṃsu. Tattha sampannacaraṇanti nibbānapadaṭṭhānabhūtena pātimokkhasīlādinā sampannaṃ. Isinti mahesiṃ.
நித்³தே³ஸே உபாக³மிங்ஸூதி ஸமீபங் க³மிங்ஸு. உபஸங்கமிங்ஸூதி அவிதூ³ரட்டா²னங் க³மிங்ஸு. பயிருபாஸிங்ஸூதி ஸமீபே நிஸீதி³ங்ஸு. பரிபுச்சி²ங்ஸூதி பரிபுச்ச²ங் ஆஹரிங்ஸு. பரிக³ண்ஹிங்ஸூதி துலயிங்ஸு. ‘‘சோத³யிங்ஸூ’’தி கேசி.
Niddese upāgamiṃsūti samīpaṃ gamiṃsu. Upasaṅkamiṃsūti avidūraṭṭhānaṃ gamiṃsu. Payirupāsiṃsūti samīpe nisīdiṃsu. Paripucchiṃsūti paripucchaṃ āhariṃsu. Parigaṇhiṃsūti tulayiṃsu. ‘‘Codayiṃsū’’ti keci.
ஸீலாசாரனிப்³ப³த்தீதி உத்தமஸீலாசாரனிப்³ப³த்தி, மக்³கே³ன நிப்ப²ன்னஸீலந்தி அத்தோ².
Sīlācāranibbattīti uttamasīlācāranibbatti, maggena nipphannasīlanti attho.
க³ம்பீ⁴ரேதி உத்தானபா⁴வபடிக்கே²பவசனங். து³த்³த³ஸேதி க³ம்பீ⁴ரத்தா து³த்³த³ஸே, து³க்கே²ன த³ட்ட²ப்³பே³, ந ஸக்கா ஸுகே²ன த³ட்டு²ங். து³த்³த³ஸத்தாவ து³ரனுபோ³தே⁴, து³க்கே²ன அவபு³ஜ்ஜி²தப்³பே³, ந ஸக்கா ஸுகே²ன அவபு³ஜ்ஜி²துங். ஸந்தேதி நிப்³பு³தே. பணீதேதி அதப்பகே. இத³ங் த்³வயங் லோகுத்தரமேவ ஸந்தா⁴ய வுத்தங். அதக்காவசரேதி தக்கேன ந அவசரிதப்³பே³ ந ஓகா³ஹிதப்³பே³ ஞாணேனேவ அவசரிதப்³பே³. நிபுணேதி ஸண்ஹே. பண்டி³தவேத³னீயேதி ஸம்மா படிபன்னேஹி பண்டி³தேஹி வேதி³தப்³பே³.
Gambhīreti uttānabhāvapaṭikkhepavacanaṃ. Duddaseti gambhīrattā duddase, dukkhena daṭṭhabbe, na sakkā sukhena daṭṭhuṃ. Duddasattāva duranubodhe, dukkhena avabujjhitabbe, na sakkā sukhena avabujjhituṃ. Santeti nibbute. Paṇīteti atappake. Idaṃ dvayaṃ lokuttarameva sandhāya vuttaṃ. Atakkāvacareti takkena na avacaritabbe na ogāhitabbe ñāṇeneva avacaritabbe. Nipuṇeti saṇhe. Paṇḍitavedanīyeti sammā paṭipannehi paṇḍitehi veditabbe.
98. தோஸேஸீதி துட்டி²ங் ஆபாதே³ஸி. விதோஸேஸீதி விவிதா⁴ தேஸங் ஸோமனஸ்ஸங் உப்பாதே³ஸி. பஸாதே³ஸீதி தேஸங் சித்தப்பஸாத³ங் அகாஸி . ஆராதே⁴ஸீதி ஆராத⁴யி ஸித்³தி⁴ங் பாபேஸி. அத்தமனே அகாஸீதி ஸோமனஸ்ஸவஸேன ஸகமனே அகாஸி.
98.Tosesīti tuṭṭhiṃ āpādesi. Vitosesīti vividhā tesaṃ somanassaṃ uppādesi. Pasādesīti tesaṃ cittappasādaṃ akāsi . Ārādhesīti ārādhayi siddhiṃ pāpesi. Attamane akāsīti somanassavasena sakamane akāsi.
99. ததோ பரங் ப்³ரஹ்மசரியமசரிங்ஸூதி மக்³க³ப்³ரஹ்மசரியங் அசரிங்ஸு.
99. Tato paraṃ brahmacariyamacariṃsūti maggabrahmacariyaṃ acariṃsu.
101. தஸ்மா பாராயனந்தி தஸ்ஸ பாரபூ⁴தஸ்ஸ நிப்³பா³னஸ்ஸ ஆயதனந்தி வுத்தங் ஹோதி.
101.Tasmā pārāyananti tassa pārabhūtassa nibbānassa āyatananti vuttaṃ hoti.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
பாராயனத்து²திகா³தா²னித்³தே³ஸவண்ணனா நிட்டி²தா.
Pārāyanatthutigāthāniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
17. பாராயனத்து²திகா³தா² • 17. Pārāyanatthutigāthā
17. பாராயனத்து²திகா³தா²னித்³தே³ஸோ • 17. Pārāyanatthutigāthāniddeso
