| Library / Tipiṭaka / තිපිටක • Tipiṭaka / චූළනිද්‌දෙස-අට්‌ඨකථා • Cūḷaniddesa-aṭṭhakathā |
17. පාරායනත්‌ථුතිගාථානිද්‌දෙසවණ්‌ණනා
17. Pārāyanatthutigāthāniddesavaṇṇanā
93. ඉතො පරං සඞ්‌ගීතිකාරා දෙසනං ථොමෙන්‌තා ‘‘ඉදමවොච භගවා’’තිආදිමාහංසු. තත්‌ථ ඉදමවොචාති ඉදං පාරායනං අවොච. පරිචාරකසොළසානන්‌ති බාවරිස්‌ස පරිචාරකෙන පිඞ්‌ගියෙන සහ සොළසානං, බුද්‌ධස්‌ස වා භගවතො පරිචාරකානං සොළසානන්‌ති පරිචාරකසොළසානං. තෙ එව ච බ්‍රාහ්‌මණා තත්‌ථ සොළසසු දිසාසු පුරතො ච පච්‌ඡතො ච වාමපස්‌සතො ච දක්‌ඛිණපස්‌සතො ච ඡ ඡ යොජනා නිසින්‌නා උජුකෙන ද්‌වාදසයොජනිකා අහොසි. අජ්‌ඣිට්‌ඨොති යාචිතො.
93. Ito paraṃ saṅgītikārā desanaṃ thomentā ‘‘idamavoca bhagavā’’tiādimāhaṃsu. Tattha idamavocāti idaṃ pārāyanaṃ avoca. Paricārakasoḷasānanti bāvarissa paricārakena piṅgiyena saha soḷasānaṃ, buddhassa vā bhagavato paricārakānaṃ soḷasānanti paricārakasoḷasānaṃ. Te eva ca brāhmaṇā tattha soḷasasu disāsu purato ca pacchato ca vāmapassato ca dakkhiṇapassato ca cha cha yojanā nisinnā ujukena dvādasayojanikā ahosi. Ajjhiṭṭhoti yācito.
94-97. අත්‌ථමඤ්‌ඤායාති පාළිඅත්‌ථමඤ්‌ඤාය. ධම්‌මමඤ්‌ඤායාති පාළිමඤ්‌ඤාය. පාරායනන්‌ති එවං ඉමස්‌ස ධම්‌මපරියායස්‌ස අධිවචනං ආරොපෙත්‌වා තෙසං බ්‍රාහ්‌මණානං නාමානි කිත්‌තයන්‌තො ‘‘අජිතො…පෙ.… බුද්‌ධසෙට්‌ඨමුපාගමු’’න්‌ති ආහංසු. තත්‌ථ සම්‌පන්‌නචරණන්‌ති නිබ්‌බානපදට්‌ඨානභූතෙන පාතිමොක්‌ඛසීලාදිනා සම්‌පන්‌නං. ඉසින්‌ති මහෙසිං.
94-97.Atthamaññāyāti pāḷiatthamaññāya. Dhammamaññāyāti pāḷimaññāya. Pārāyananti evaṃ imassa dhammapariyāyassa adhivacanaṃ āropetvā tesaṃ brāhmaṇānaṃ nāmāni kittayanto ‘‘ajito…pe… buddhaseṭṭhamupāgamu’’nti āhaṃsu. Tattha sampannacaraṇanti nibbānapadaṭṭhānabhūtena pātimokkhasīlādinā sampannaṃ. Isinti mahesiṃ.
නිද්‌දෙසෙ උපාගමිංසූති සමීපං ගමිංසු. උපසඞ්‌කමිංසූති අවිදූරට්‌ඨානං ගමිංසු. පයිරුපාසිංසූති සමීපෙ නිසීදිංසු. පරිපුච්‌ඡිංසූති පරිපුච්‌ඡං ආහරිංසු. පරිගණ්‌හිංසූති තුලයිංසු. ‘‘චොදයිංසූ’’ති කෙචි.
Niddese upāgamiṃsūti samīpaṃ gamiṃsu. Upasaṅkamiṃsūti avidūraṭṭhānaṃ gamiṃsu. Payirupāsiṃsūti samīpe nisīdiṃsu. Paripucchiṃsūti paripucchaṃ āhariṃsu. Parigaṇhiṃsūti tulayiṃsu. ‘‘Codayiṃsū’’ti keci.
සීලාචාරනිබ්‌බත්‌තීති උත්‌තමසීලාචාරනිබ්‌බත්‌ති, මග්‌ගෙන නිප්‌ඵන්‌නසීලන්‌ති අත්‌ථො.
Sīlācāranibbattīti uttamasīlācāranibbatti, maggena nipphannasīlanti attho.
ගම්‌භීරෙති උත්‌තානභාවපටික්‌ඛෙපවචනං. දුද්‌දසෙති ගම්‌භීරත්‌තා දුද්‌දසෙ, දුක්‌ඛෙන දට්‌ඨබ්‌බෙ, න සක්‌කා සුඛෙන දට්‌ඨුං. දුද්‌දසත්‌තාව දුරනුබොධෙ, දුක්‌ඛෙන අවබුජ්‌ඣිතබ්‌බෙ, න සක්‌කා සුඛෙන අවබුජ්‌ඣිතුං. සන්‌තෙති නිබ්‌බුතෙ. පණීතෙති අතප්‌පකෙ. ඉදං ද්‌වයං ලොකුත්‌තරමෙව සන්‌ධාය වුත්‌තං. අතක්‌කාවචරෙති තක්‌කෙන න අවචරිතබ්‌බෙ න ඔගාහිතබ්‌බෙ ඤාණෙනෙව අවචරිතබ්‌බෙ. නිපුණෙති සණ්‌හෙ. පණ්‌ඩිතවෙදනීයෙති සම්‌මා පටිපන්‌නෙහි පණ්‌ඩිතෙහි වෙදිතබ්‌බෙ.
Gambhīreti uttānabhāvapaṭikkhepavacanaṃ. Duddaseti gambhīrattā duddase, dukkhena daṭṭhabbe, na sakkā sukhena daṭṭhuṃ. Duddasattāva duranubodhe, dukkhena avabujjhitabbe, na sakkā sukhena avabujjhituṃ. Santeti nibbute. Paṇīteti atappake. Idaṃ dvayaṃ lokuttarameva sandhāya vuttaṃ. Atakkāvacareti takkena na avacaritabbe na ogāhitabbe ñāṇeneva avacaritabbe. Nipuṇeti saṇhe. Paṇḍitavedanīyeti sammā paṭipannehi paṇḍitehi veditabbe.
98. තොසෙසීති තුට්‌ඨිං ආපාදෙසි. විතොසෙසීති විවිධා තෙසං සොමනස්‌සං උප්‌පාදෙසි. පසාදෙසීති තෙසං චිත්‌තප්‌පසාදං අකාසි . ආරාධෙසීති ආරාධයි සිද්‌ධිං පාපෙසි. අත්‌තමනෙ අකාසීති සොමනස්‌සවසෙන සකමනෙ අකාසි.
98.Tosesīti tuṭṭhiṃ āpādesi. Vitosesīti vividhā tesaṃ somanassaṃ uppādesi. Pasādesīti tesaṃ cittappasādaṃ akāsi . Ārādhesīti ārādhayi siddhiṃ pāpesi. Attamane akāsīti somanassavasena sakamane akāsi.
99. තතො පරං බ්‍රහ්‌මචරියමචරිංසූති මග්‌ගබ්‍රහ්‌මචරියං අචරිංසු.
99. Tato paraṃ brahmacariyamacariṃsūti maggabrahmacariyaṃ acariṃsu.
101. තස්‌මා පාරායනන්‌ති තස්‌ස පාරභූතස්‌ස නිබ්‌බානස්‌ස ආයතනන්‌ති වුත්‌තං හොති.
101.Tasmā pārāyananti tassa pārabhūtassa nibbānassa āyatananti vuttaṃ hoti.
සද්‌ධම්‌මප්‌පජ්‌ජොතිකාය චූළනිද්‌දෙස-අට්‌ඨකථාය
Saddhammappajjotikāya cūḷaniddesa-aṭṭhakathāya
පාරායනත්‌ථුතිගාථානිද්‌දෙසවණ්‌ණනා නිට්‌ඨිතා.
Pārāyanatthutigāthāniddesavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / චූළනිද්‌දෙසපාළි • Cūḷaniddesapāḷi
17. පාරායනත්‌ථුතිගාථා • 17. Pārāyanatthutigāthā
17. පාරායනත්‌ථුතිගාථානිද්‌දෙසො • 17. Pārāyanatthutigāthāniddeso
