| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
பாராயனத்து²திகா³தா²வண்ணனா
Pārāyanatthutigāthāvaṇṇanā
இதோ பரங் ஸங்கீ³திகாரா தே³ஸனங் தோ²மெந்தா ‘‘இத³மவோச ப⁴க³வா’’திஆதி³மாஹங்ஸு. தத்த² இத³மவோசாதி இத³ங் பராயனங் அவோச. பரிசாரகஸோளஸானந்தி பா³வரிஸ்ஸ பரிசாரகேன பிங்கி³யேன ஸஹ ஸோளஸன்னங் பு³த்³த⁴ஸ்ஸ வா ப⁴க³வதோ பரிசாரகானங் ஸோளஸன்னந்தி பரிசாரகஸோளஸன்னங். தே ஏவ ச ப்³ராஹ்மணா. தத்த² ஸோளஸபரிஸா பன புரதோ ச பச்ச²தோ ச வாமபஸ்ஸதோ ச த³க்கி²ணபஸ்ஸதோ ச ச² ச² யோஜனானி நிஸின்னா உஜுகேன த்³வாத³ஸயோஜனிகா அஹோஸி. அஜ்ஜி²ட்டோ²தி யாசிதோ அத்த²மஞ்ஞாயாதி பாளிஅத்த²மஞ்ஞாய. த⁴ம்மமஞ்ஞாயாதி பாளிமஞ்ஞாய. பாராயனந்தி ஏவங் இமஸ்ஸ த⁴ம்மபரியாயஸ்ஸ அதி⁴வசனங் ஆரோபெத்வா தேஸங் ப்³ராஹ்மணானங் நாமானி கித்தயந்தா ‘‘அஜிதோ திஸ்ஸமெத்தெய்யோ…பே॰… பு³த்³த⁴ஸெட்ட²ங் உபாக³மு’’ந்தி ஆஹங்ஸு.
Ito paraṃ saṅgītikārā desanaṃ thomentā ‘‘idamavoca bhagavā’’tiādimāhaṃsu. Tattha idamavocāti idaṃ parāyanaṃ avoca. Paricārakasoḷasānanti bāvarissa paricārakena piṅgiyena saha soḷasannaṃ buddhassa vā bhagavato paricārakānaṃ soḷasannanti paricārakasoḷasannaṃ. Te eva ca brāhmaṇā. Tattha soḷasaparisā pana purato ca pacchato ca vāmapassato ca dakkhiṇapassato ca cha cha yojanāni nisinnā ujukena dvādasayojanikā ahosi. Ajjhiṭṭhoti yācito atthamaññāyāti pāḷiatthamaññāya. Dhammamaññāyāti pāḷimaññāya. Pārāyananti evaṃ imassa dhammapariyāyassa adhivacanaṃ āropetvā tesaṃ brāhmaṇānaṃ nāmāni kittayantā ‘‘ajito tissametteyyo…pe… buddhaseṭṭhaṃ upāgamu’’nti āhaṃsu.
1131-7. தத்த² ஸம்பன்னசரணந்தி நிப்³பா³னபத³ட்டா²னபூ⁴தேன பாதிமொக்க²ஸீலாதி³னா ஸம்பன்னங். இஸிந்தி மஹேஸிங். ஸேஸங் பாகடமேவ. ததோ பரங் ப்³ரஹ்மசரியமசரிங்ஸூதி மக்³க³ப்³ரஹ்மசரியங் அசரிங்ஸு. தஸ்மா பாராயனந்தி தஸ்ஸ பாரபூ⁴தஸ்ஸ நிப்³பா³னஸ்ஸ அயனந்தி வுத்தங் ஹோதி.
1131-7. Tattha sampannacaraṇanti nibbānapadaṭṭhānabhūtena pātimokkhasīlādinā sampannaṃ. Isinti mahesiṃ. Sesaṃ pākaṭameva. Tato paraṃ brahmacariyamacariṃsūti maggabrahmacariyaṃ acariṃsu. Tasmā pārāyananti tassa pārabhūtassa nibbānassa ayananti vuttaṃ hoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / பாராயனத்து²திகா³தா² • Pārāyanatthutigāthā
