| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. পরিব্বাজকসুত্তং
4. Paribbājakasuttaṃ
৫৫. অথ খো অঞ্ঞতরো ব্রাহ্মণপরিব্বাজকো যেন ভগৰা তেনুপসঙ্কমি; উপসঙ্কমিত্ৰা…পে॰… একমন্তং নিসিন্নো খো সো ব্রাহ্মণপরিব্বাজকো ভগৰন্তং এতদৰোচ – ‘‘‘সন্দিট্ঠিকো ধম্মো সন্দিট্ঠিকো ধম্মো’তি, ভো গোতম, ৰুচ্চতি। কিত্তাৰতা নু খো, ভো গোতম, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি?
55. Atha kho aññataro brāhmaṇaparibbājako yena bhagavā tenupasaṅkami; upasaṅkamitvā…pe… ekamantaṃ nisinno kho so brāhmaṇaparibbājako bhagavantaṃ etadavoca – ‘‘‘sandiṭṭhiko dhammo sandiṭṭhiko dhammo’ti, bho gotama, vuccati. Kittāvatā nu kho, bho gotama, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti?
‘‘রত্তো খো, ব্রাহ্মণ, রাগেন অভিভূতো পরিযাদিন্নচিত্তো অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতি, চেতসিকম্পি দুক্খং দোমনস্সং পটিসংৰেদেতি। রাগে পহীনে নেৰত্তব্যাবাধাযপি চেতেতি, ন পরব্যাবাধাযপি চেতেতি, ন উভযব্যাবাধাযপি চেতেতি, ন চেতসিকম্পি দুক্খং দোমনস্সং পটিসংৰেদেতি।
‘‘Ratto kho, brāhmaṇa, rāgena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṃ domanassaṃ paṭisaṃvedeti. Rāge pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikampi dukkhaṃ domanassaṃ paṭisaṃvedeti.
‘‘রত্তো খো, ব্রাহ্মণ, রাগেন অভিভূতো পরিযাদিন্নচিত্তো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি। রাগে পহীনে নেৰ কাযেন দুচ্চরিতং চরতি, ন ৰাচায দুচ্চরিতং চরতি, ন মনসা দুচ্চরিতং চরতি।
‘‘Ratto kho, brāhmaṇa, rāgena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. Rāge pahīne neva kāyena duccaritaṃ carati, na vācāya duccaritaṃ carati, na manasā duccaritaṃ carati.
‘‘রত্তো খো, ব্রাহ্মণ, রাগেন অভিভূতো পরিযাদিন্নচিত্তো অত্তত্থম্পি যথাভূতং নপ্পজানাতি, পরত্থম্পি যথাভূতং নপ্পজানাতি, উভযত্থম্পি যথাভূতং নপ্পজানাতি। রাগে পহীনে অত্তত্থম্পি যথাভূতং পজানাতি , পরত্থম্পি যথাভূতং পজানাতি, উভযত্থম্পি যথাভূতং পজানাতি। এৰম্পি খো, ব্রাহ্মণ, সন্দিট্ঠিকো ধম্মো হোতি…পে॰…।
‘‘Ratto kho, brāhmaṇa, rāgena abhibhūto pariyādinnacitto attatthampi yathābhūtaṃ nappajānāti, paratthampi yathābhūtaṃ nappajānāti, ubhayatthampi yathābhūtaṃ nappajānāti. Rāge pahīne attatthampi yathābhūtaṃ pajānāti , paratthampi yathābhūtaṃ pajānāti, ubhayatthampi yathābhūtaṃ pajānāti. Evampi kho, brāhmaṇa, sandiṭṭhiko dhammo hoti…pe….
‘‘দুট্ঠো খো, ব্রাহ্মণ, দোসেন…পে॰… মূল়্হো খো, ব্রাহ্মণ, মোহেন অভিভূতো পরিযাদিন্নচিত্তো অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতি, চেতসিকম্পি দুক্খং দোমনস্সং পটিসংৰেদেতি। মোহে পহীনে নেৰত্তব্যাবাধাযপি চেতেতি, ন পরব্যাবাধাযপি চেতেতি, ন উভযব্যাবাধাযপি চেতেতি, ন চেতসিকং দুক্খং দোমনস্সং পটিসংৰেদেতি।
‘‘Duṭṭho kho, brāhmaṇa, dosena…pe… mūḷho kho, brāhmaṇa, mohena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṃ domanassaṃ paṭisaṃvedeti. Mohe pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikaṃ dukkhaṃ domanassaṃ paṭisaṃvedeti.
‘‘মূল়্হো খো, ব্রাহ্মণ, মোহেন অভিভূতো পরিযাদিন্নচিত্তো, কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি। মোহে পহীনে নেৰ কাযেন দুচ্চরিতং চরতি, ন ৰাচায দুচ্চরিতং চরতি, ন মনসা দুচ্চরিতং চরতি।
‘‘Mūḷho kho, brāhmaṇa, mohena abhibhūto pariyādinnacitto, kāyena duccaritaṃ carati, vācāya duccaritaṃ carati, manasā duccaritaṃ carati. Mohe pahīne neva kāyena duccaritaṃ carati, na vācāya duccaritaṃ carati, na manasā duccaritaṃ carati.
‘‘মূল়্হো খো, ব্রাহ্মণ, মোহেন অভিভূতো পরিযাদিন্নচিত্তো অত্তত্থম্পি যথাভূতং নপ্পজানাতি, পরত্থম্পি যথাভূতং নপ্পজানাতি , উভযত্থম্পি যথাভূতং নপ্পজানাতি। মোহে পহীনে অত্তত্থম্পি যথাভূতং পজানাতি, পরত্থম্পি যথাভূতং পজানাতি, উভযত্থম্পি যথাভূতং পজানাতি। এৰং খো, ব্রাহ্মণ, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি।
‘‘Mūḷho kho, brāhmaṇa, mohena abhibhūto pariyādinnacitto attatthampi yathābhūtaṃ nappajānāti, paratthampi yathābhūtaṃ nappajānāti , ubhayatthampi yathābhūtaṃ nappajānāti. Mohe pahīne attatthampi yathābhūtaṃ pajānāti, paratthampi yathābhūtaṃ pajānāti, ubhayatthampi yathābhūtaṃ pajānāti. Evaṃ kho, brāhmaṇa, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti.
‘‘অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি। চতুত্থং।
‘‘Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. পরিব্বাজকসুত্তৰণ্ণনা • 4. Paribbājakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৩-৪. অঞ্ঞতরব্রাহ্মণসুত্তাদিৰণ্ণনা • 3-4. Aññatarabrāhmaṇasuttādivaṇṇanā
