| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. பரிப்³பா³ஜகஸுத்தவண்ணனா
10. Paribbājakasuttavaṇṇanā
30. த³ஸமே அபி⁴ஞ்ஞாதாதி ஞாதா பாகடா. அன்னபா⁴ரோதிஆதீ³னி தேஸங் நாமானி. படிஸல்லானா வுட்டி²தோதி ப²லஸமாபத்திதோ வுட்டி²தோ. ஸா ஹி இத⁴ படிஸல்லானந்தி அதி⁴ப்பேதா. பச்சக்கா²யாதி படிக்கி²பித்வா. அபி⁴ஜ்ஜா²லுந்தி ஸதண்ஹங். காமேஸு திப்³ப³ஸாராக³ந்தி வத்து²காமேஸு ப³ஹலராக³ங். தமஹங் தத்த² ஏவங் வதெ³ய்யந்தி தங் அஹங் தஸ்மிங் காரணே ஏவங் வதெ³ய்யங். படிக்கோஸிதப்³ப³ங் மஞ்ஞெய்யாதி படிக்கோஸிதப்³பா³னி படிபா³ஹிதப்³ப³னி வா மஞ்ஞெய்ய. ஸஹத⁴ம்மிகாதி ஸகாரணா. வாதா³னுபாதாதி த⁴ம்மிகவாதே³ க⁴ட்டயமானா அத⁴ம்மிகவாதா³னுபாதா, வாத³ப்பவத்தியோதி அத்தோ². கா³ரய்ஹா டா²னாதி க³ரஹிதப்³ப³யுத்தகா பச்சயா. ஆக³ச்ச²ந்தீதி உபக³ச்ச²ந்தி.
30. Dasame abhiññātāti ñātā pākaṭā. Annabhārotiādīni tesaṃ nāmāni. Paṭisallānā vuṭṭhitoti phalasamāpattito vuṭṭhito. Sā hi idha paṭisallānanti adhippetā. Paccakkhāyāti paṭikkhipitvā. Abhijjhālunti sataṇhaṃ. Kāmesutibbasārāganti vatthukāmesu bahalarāgaṃ. Tamahaṃ tattha evaṃ vadeyyanti taṃ ahaṃ tasmiṃ kāraṇe evaṃ vadeyyaṃ. Paṭikkositabbaṃ maññeyyāti paṭikkositabbāni paṭibāhitabbani vā maññeyya. Sahadhammikāti sakāraṇā. Vādānupātāti dhammikavāde ghaṭṭayamānā adhammikavādānupātā, vādappavattiyoti attho. Gārayhā ṭhānāti garahitabbayuttakā paccayā. Āgacchantīti upagacchanti.
உக்கலாதி உக்கலஜனபத³வாஸினோ. வஸ்ஸப⁴ஞ்ஞாதி வஸ்ஸோ ச ப⁴ஞ்ஞோ சாதி த்³வே ஜனா. அஹேதுகவாதா³தி ‘‘நத்தி² ஹேது நத்தி² பச்சயோ ஸத்தானங் விஸுத்³தி⁴யா’’திஏவமாதி³வாதி³னோ. அகிரியவாதா³தி ‘‘கரோதோ ந கரீயதி பாப’’ந்தி ஏவங் கிரியபடிக்கே²பவாதி³னோ. நத்தி²கவாதா³தி ‘‘நத்தி² தி³ன்ன’’ந்திஆதி³வாதி³னோ. தே இமேஸு தீஸுபி த³ஸ்ஸனேஸு ஓக்கந்தனியாமா அஹேஸுங். கத²ங் பன தேஸு நியாமோ ஹோதீதி? யோ ஹி ஏவரூபங் லத்³தி⁴ங் க³ஹெத்வா ரத்திட்டா²னதி³வாட்டா²னேஸு நிஸின்னோ ஸஜ்ஜா²யதி வீமங்ஸதி, தஸ்ஸ ‘‘நத்தி² ஹேது நத்தி² பச்சயோ கரோதோ ந கரீயதி பாபங்…பே॰… நத்தி² தி³ன்னங்…பே॰… காயஸ்ஸ பே⁴தா³ உச்சி²ஜ்ஜதீ’’தி தஸ்மிங் ஆரம்மணே மிச்சா²ஸதி ஸந்திட்ட²தி, சித்தங் ஏகக்³க³ங் ஹோதி, ஜவனானி ஜவந்தி. பட²மஜவனே ஸதேகிச்சோ² ஹோதி, ததா² து³தியாதீ³ஸு, ஸத்தமே பு³த்³தா⁴னம்பி அதேகிச்சோ² அனிவத்தி அரிட்ட²கண்டகஸதி³ஸோ ஹோதி . தத்த² கோசி ஏகங் த³ஸ்ஸனங் ஓக்கமதி, கோசி த்³வே, கோசி தீணிபி. நியதமிச்சா²தி³ட்டி²கோவ ஹோதி, பத்தோ ஸக்³க³மக்³கா³வரணஞ்சேவ மொக்க²மக்³கா³வரணஞ்ச, அப⁴ப்³போ³ தஸ்ஸ அத்தபா⁴வஸ்ஸ அனந்தரங் ஸக்³க³ம்பி க³ந்துங், பகே³வ மொக்க²ங். வட்டகா²ணுகோ நாமேஸ ஸத்தோ பத²விகோ³பகோ, யேபு⁴ய்யேன ஏவரூபஸ்ஸ ப⁴வதோ வுட்டா²னங் நத்தி². வஸ்ஸப⁴ஞ்ஞாபி ஏதி³ஸா அஹேஸுங். நிந்தா³ப்³யாரோஸனஉபாரம்ப⁴ப⁴யாதி அத்தனோ நிந்த³ப⁴யேன க⁴ட்டனப⁴யேன உபவாத³ப⁴யேன சாதி அத்தோ². அபி⁴ஜ்ஜா²வினயே ஸிக்க²ந்தி அபி⁴ஜ்ஜா²வினயோ வுச்சதி அரஹத்தங், அரஹத்தே ஸிக்க²மானோ அப்பமத்தோ நாம வுச்சதீதி ஸுத்தந்தே வட்டவிட்டங் கதெ²த்வா கா³தா²ய ப²லஸமாபத்தி கதி²தாதி.
Ukkalāti ukkalajanapadavāsino. Vassabhaññāti vasso ca bhañño cāti dve janā. Ahetukavādāti ‘‘natthi hetu natthi paccayo sattānaṃ visuddhiyā’’tievamādivādino. Akiriyavādāti ‘‘karoto na karīyati pāpa’’nti evaṃ kiriyapaṭikkhepavādino. Natthikavādāti ‘‘natthi dinna’’ntiādivādino. Te imesu tīsupi dassanesu okkantaniyāmā ahesuṃ. Kathaṃ pana tesu niyāmo hotīti? Yo hi evarūpaṃ laddhiṃ gahetvā rattiṭṭhānadivāṭṭhānesu nisinno sajjhāyati vīmaṃsati, tassa ‘‘natthi hetu natthi paccayo karoto na karīyati pāpaṃ…pe… natthi dinnaṃ…pe… kāyassa bhedā ucchijjatī’’ti tasmiṃ ārammaṇe micchāsati santiṭṭhati, cittaṃ ekaggaṃ hoti, javanāni javanti. Paṭhamajavane satekiccho hoti, tathā dutiyādīsu, sattame buddhānampi atekiccho anivatti ariṭṭhakaṇṭakasadiso hoti . Tattha koci ekaṃ dassanaṃ okkamati, koci dve, koci tīṇipi. Niyatamicchādiṭṭhikova hoti, patto saggamaggāvaraṇañceva mokkhamaggāvaraṇañca, abhabbo tassa attabhāvassa anantaraṃ saggampi gantuṃ, pageva mokkhaṃ. Vaṭṭakhāṇuko nāmesa satto pathavigopako, yebhuyyena evarūpassa bhavato vuṭṭhānaṃ natthi. Vassabhaññāpi edisā ahesuṃ. Nindābyārosanaupārambhabhayāti attano nindabhayena ghaṭṭanabhayena upavādabhayena cāti attho. Abhijjhāvinaye sikkhanti abhijjhāvinayo vuccati arahattaṃ, arahatte sikkhamāno appamatto nāma vuccatīti suttante vaṭṭaviṭṭaṃ kathetvā gāthāya phalasamāpatti kathitāti.
உருவேலவக்³கோ³ ததியோ.
Uruvelavaggo tatiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. பரிப்³பா³ஜகஸுத்தங் • 10. Paribbājakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. பரிப்³பா³ஜகஸுத்தவண்ணனா • 10. Paribbājakasuttavaṇṇanā
