| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. பரிப்³பா³ஜகஸுத்தவண்ணனா
10. Paribbājakasuttavaṇṇanā
30. த³ஸமே அபி⁴ஞ்ஞாதாதி ஏதி³ஸோ ச ஏதி³ஸோ சாதி அபி⁴லக்க²ணவஸேன ஞாதா. தேனாஹ ‘‘ஞாதா பாகடா’’தி. படிஸல்லானா வுட்டி²தோதி எத்த² படிஸல்லானந்தி தேஹி தேஹி ஸத்³தி⁴விஹாரிகஅந்தேவாஸிகஉபாஸகாதி³ஸத்தேஹி சேவ ரூபாரம்மணாதி³ஸங்கா²ரேஹி ச படினிவத்தித்வா அபஸக்கித்வா ஸல்லீனங் நிலீயனங், ஏகீபா⁴வோ பவிவேகோதி வுத்தங் ஹோதி. யோ ததோ வுட்டி²தோ, ஸோ படிஸல்லானா வுட்டி²தோ நாம ஹோதி. ப⁴க³வா பன யஸ்மா படிஸல்லானா உத்தமதோ ப²லஸமாபத்திதோ வுட்டா²ஸி, தஸ்மா வுத்தங் ‘‘படிஸல்லானா வுட்டி²தோதி ப²லஸமாபத்திதோ வுட்டி²தோ’’தி. வத்து²காமேஸூதி ரூபாதீ³ஸு கிலேஸகாமஸ்ஸ வத்து²பூ⁴தேஸு காமேஸு. ப³ஹலராக³ந்தி தி²ரமூலது³ம்மோசனீயதாஹி அஜ்ஜோ²ஸானேன ப³ஹலபூ⁴தங் கிலேஸகாமங் . ஸகாரணாதி யேஹி காரணேஹி பரேஸங் வாதே³ தோ³ஸங் த³ஸ்ஸெந்தி, தேஹி காரணேஹி ஸகாரணா. ந ஹி லக்க²ணயுத்தேன ஹேதுனா வினா பரவாதே³ஸு தோ³ஸங் த³ஸ்ஸேதுங் ஸக்கா.
30. Dasame abhiññātāti ediso ca ediso cāti abhilakkhaṇavasena ñātā. Tenāha ‘‘ñātā pākaṭā’’ti. Paṭisallānā vuṭṭhitoti ettha paṭisallānanti tehi tehi saddhivihārikaantevāsikaupāsakādisattehi ceva rūpārammaṇādisaṅkhārehi ca paṭinivattitvā apasakkitvā sallīnaṃ nilīyanaṃ, ekībhāvo pavivekoti vuttaṃ hoti. Yo tato vuṭṭhito, so paṭisallānā vuṭṭhito nāma hoti. Bhagavā pana yasmā paṭisallānā uttamato phalasamāpattito vuṭṭhāsi, tasmā vuttaṃ ‘‘paṭisallānā vuṭṭhitoti phalasamāpattito vuṭṭhito’’ti. Vatthukāmesūti rūpādīsu kilesakāmassa vatthubhūtesu kāmesu. Bahalarāganti thiramūladummocanīyatāhi ajjhosānena bahalabhūtaṃ kilesakāmaṃ . Sakāraṇāti yehi kāraṇehi paresaṃ vāde dosaṃ dassenti, tehi kāraṇehi sakāraṇā. Na hi lakkhaṇayuttena hetunā vinā paravādesu dosaṃ dassetuṃ sakkā.
ஏவமாதீ³தி எத்த² ஆதி³ஸத்³தே³ன ‘‘நத்தி² ஹேது நத்தி² பச்சயோ ஸத்தானங் ஸங்கிலேஸாயா’’தி (தீ³॰ நி॰ 1.168) ஏவமாதி³ங் ஸங்க³ண்ஹாதி, தஸ்மா ஏவமாதி³வாதி³னோ ஏவங் ஹேதுப்படிக்கே²பவாதி³னோதி அத்தோ². எத்த² ச நத்தி²கதி³ட்டி² விபாகங் படிபா³ஹதி, அகிரியதி³ட்டி² கம்மங் படிபா³ஹதி, அஹேதுகதி³ட்டி² உப⁴யங் படிபா³ஹதி. தத்த² கம்மங் படிபா³ஹந்தேன விபாகோ படிபா³ஹிதோ ஹோதி, விபாகங் படிபா³ஹந்தேனபி கம்மங் படிபா³ஹிதங். இதி ஸப்³பே³பேதே அத்த²தோ உப⁴யபடிபா³ஹகா அஹேதுவாதா³ சேவ அகிரியவாதா³ ச நத்தி²கவாதா³ ச ஹொந்தி.
Evamādīti ettha ādisaddena ‘‘natthi hetu natthi paccayo sattānaṃ saṃkilesāyā’’ti (dī. ni. 1.168) evamādiṃ saṅgaṇhāti, tasmā evamādivādino evaṃ hetuppaṭikkhepavādinoti attho. Ettha ca natthikadiṭṭhi vipākaṃ paṭibāhati, akiriyadiṭṭhi kammaṃ paṭibāhati, ahetukadiṭṭhi ubhayaṃ paṭibāhati. Tattha kammaṃ paṭibāhantena vipāko paṭibāhito hoti, vipākaṃ paṭibāhantenapi kammaṃ paṭibāhitaṃ. Iti sabbepete atthato ubhayapaṭibāhakā ahetuvādā ceva akiriyavādā ca natthikavādā ca honti.
ஓக்கந்தனியமாதி ஓகா³ள்ஹமிச்ச²த்தனியமா. ஸஜ்ஜா²யதீதி தங் தி³ட்டி²தீ³பகங் க³ந்த²ங் உக்³க³ஹெத்வா பட²தி. வீமங்ஸதீதி தஸ்ஸ அத்த²ங் விசாரேதி. தஸ்ஸாதிஆதி³ வீமங்ஸனாகாரத³ஸ்ஸனங். தஸ்மிங் ஆரம்மணேதி யதா²பரிகப்பிதஹேதுபச்சயாபா⁴வாதி³கே நத்தி² ஹேதூதிஆதி³னயப்பவத்தாய லத்³தி⁴யா ஆரம்மணே. மிச்சா²ஸதி ஸந்திட்ட²தீதி ‘‘நத்தி² ஹேதூ’’திஆதி³வஸேன அனுஸ்ஸவூபலத்³தே⁴ அத்தே² ததா³காரபரிவிதக்கனேஹி ஸவிக்³க³ஹே விய ஸரூபதோ சித்தஸ்ஸ பச்சுபட்டி²தே சிரகாலபரிசயேன ஏவமேதந்தி நிஜ்ஜா²னக்க²மபா⁴வூபக³மனேன நிஜ்ஜா²னக்க²ந்தியா ததா²க³ஹிதே புனப்புனங் ததே²வ ஆஸேவந்தஸ்ஸ ப³ஹுலீகரொந்தஸ்ஸ மிச்சா²விதக்கேன ஸமானீயமானா மிச்சா²வாயாமோபத்த²ம்பி⁴தா அதங்ஸபா⁴வங் தங்ஸபா⁴வந்தி க³ண்ஹந்தீ மிச்சா²ஸதீதி லத்³த⁴னாமா தங்லத்³தி⁴ஸஹக³தா தண்ஹா ஸந்திட்ட²தி. சித்தங் ஏகக்³க³ங் ஹோதீதி யதா²வுத்தவிதக்காதி³பச்சயலாபே⁴ன தஸ்மிங் ஆரம்மணே அவட்டி²ததாய அனேகக்³க³தங் பஹாய சித்தங் ஏகக்³க³ங் அப்பிதங் விய ஹோதி மிச்சா²ஸமாதி⁴னா. ஸோபி ஹி பச்சயவிஸேஸேன லத்³த⁴பா⁴வனாப³லோ கதா³சி ஸமாதா⁴னபடிரூபகிச்சகரோ ஹோதியேவ பஹரணவிஜ்ஜ²னாதீ³ஸு வியாதி த³ட்ட²ப்³ப³ங்.
Okkantaniyamāti ogāḷhamicchattaniyamā. Sajjhāyatīti taṃ diṭṭhidīpakaṃ ganthaṃ uggahetvā paṭhati. Vīmaṃsatīti tassa atthaṃ vicāreti. Tassātiādi vīmaṃsanākāradassanaṃ. Tasmiṃārammaṇeti yathāparikappitahetupaccayābhāvādike natthi hetūtiādinayappavattāya laddhiyā ārammaṇe. Micchāsati santiṭṭhatīti ‘‘natthi hetū’’tiādivasena anussavūpaladdhe atthe tadākāraparivitakkanehi saviggahe viya sarūpato cittassa paccupaṭṭhite cirakālaparicayena evametanti nijjhānakkhamabhāvūpagamanena nijjhānakkhantiyā tathāgahite punappunaṃ tatheva āsevantassa bahulīkarontassa micchāvitakkena samānīyamānā micchāvāyāmopatthambhitā ataṃsabhāvaṃ taṃsabhāvanti gaṇhantī micchāsatīti laddhanāmā taṃladdhisahagatā taṇhā santiṭṭhati. Cittaṃ ekaggaṃ hotīti yathāvuttavitakkādipaccayalābhena tasmiṃ ārammaṇe avaṭṭhitatāya anekaggataṃ pahāya cittaṃ ekaggaṃ appitaṃ viya hoti micchāsamādhinā. Sopi hi paccayavisesena laddhabhāvanābalo kadāci samādhānapaṭirūpakiccakaro hotiyeva paharaṇavijjhanādīsu viyāti daṭṭhabbaṃ.
ஜவனானி ஜவந்தீதி அனேகக்க²த்துங் தேனாகாரேன புப்³ப³பா⁴கி³யேஸு ஜவனவாரேஸு பவத்தேஸு ஸப்³ப³பச்சி²மே ஜவனவாரே ஸத்த ஜவனானி ஜவந்தி. பட²மஜவனே ஸதேகிச்சோ² ஹோதி, ததா² து³தியாதீ³ஸூதி த⁴ம்மஸபா⁴வத³ஸ்ஸனமேதங், ந பன தஸ்மிங் க²ணே தேஸங் ஸதேகிச்ச²பா⁴வாபாத³னங் கேனசி ஸக்கா காதுங். தத்தா²தி தேஸு தீஸு மிச்சா²த³ஸ்ஸனேஸு. கோசி ஏகங் த³ஸ்ஸனங் ஓக்கமதீதி யஸ்ஸ ஏகஸ்மிங்யேவ அபி⁴னிவேஸோ ஆஸேவனா பவத்தா, ஸோ ஏகங்யேவ த³ஸ்ஸனங் ஓக்கமதி. யஸ்ஸ த்³வீஸு தீஸுபி வா அபி⁴னிவேஸோ ஆஸேவனா பவத்தா, ஸோ த்³வே தீணி ஓக்கமதி. ஏதேன யா புப்³பே³ உப⁴யபடிபா³ஹிகதாமுகே²ன பவத்தா அத்த²ஸித்³தா⁴ ஸப்³ப³தி³ட்டி²கா, ஸா புப்³ப³பா⁴கி³யா, மிச்சா²னியாமோக்கந்தியா பன யதா²ஸகங் பச்சயஸமுதா³க³மதி³ட்டி²தோ பி⁴ன்னாரம்மணானங் விய விஸேஸாதி⁴க³மானங் ஏகஜ்ஜ²ங் அனுப்பத்தியா அபி⁴கிண்ணா ஏவாதி த³ஸ்ஸேதி. ஏகஸ்மிங் ஓக்கந்தேபி த்³வீஸு தீஸு ஓக்கந்தேஸுபி நியதமிச்சா²தி³ட்டி²கோவ ஹோதீதி இமினா திஸ்ஸன்னம்பி தி³ட்டீ²னங் ஸமானப²லதங் ஸமானப³லஞ்ச த³ஸ்ஸேதி. தஸ்மா திஸ்ஸோபி சேதனா ஏகஸ்ஸ உப்பன்னா அஞ்ஞமஞ்ஞங் அனுப³லப்பதா³யிகா ஹொந்தி.
Javanāni javantīti anekakkhattuṃ tenākārena pubbabhāgiyesu javanavāresu pavattesu sabbapacchime javanavāre satta javanāni javanti. Paṭhamajavane satekiccho hoti, tathā dutiyādīsūti dhammasabhāvadassanametaṃ, na pana tasmiṃ khaṇe tesaṃ satekicchabhāvāpādanaṃ kenaci sakkā kātuṃ. Tatthāti tesu tīsu micchādassanesu. Koci ekaṃ dassanaṃ okkamatīti yassa ekasmiṃyeva abhiniveso āsevanā pavattā, so ekaṃyeva dassanaṃ okkamati. Yassa dvīsu tīsupi vā abhiniveso āsevanā pavattā, so dve tīṇi okkamati. Etena yā pubbe ubhayapaṭibāhikatāmukhena pavattā atthasiddhā sabbadiṭṭhikā, sā pubbabhāgiyā, micchāniyāmokkantiyā pana yathāsakaṃ paccayasamudāgamadiṭṭhito bhinnārammaṇānaṃ viya visesādhigamānaṃ ekajjhaṃ anuppattiyā abhikiṇṇā evāti dasseti. Ekasmiṃ okkantepi dvīsu tīsu okkantesupi niyatamicchādiṭṭhikova hotīti iminā tissannampi diṭṭhīnaṃ samānaphalataṃ samānabalañca dasseti. Tasmā tissopi cetanā ekassa uppannā aññamaññaṃ anubalappadāyikā honti.
கிங் பனேஸ ஏதஸ்மிஞ்ஞேவ அத்தபா⁴வே நியதோ, உதா³ஹு அஞ்ஞஸ்மிம்பீதி? ஏதஸ்மிஞ்ஞேவ நியதோ. அகுஸலஞ்ஹி நாமேதங் அப³லங், ந குஸலங் விய மஹாப³லங். அஞ்ஞதா² ஸம்மத்தனியாமோ விய அச்சந்திகோ ஸியா, ஆஸேவனவஸேன பன ப⁴வந்தரேபி தங் தங் தி³ட்டி²ங் ரோசேதியேவ. தேனேவாஹ ‘‘வட்டகா²ணுகோ நாமேஸ ஸத்தோ’’தி. தஸ்மா ‘‘ஸகிங் நிமுக்³கோ³ நிமுக்³கோ³ ஏவ பா³லோ’’தி விய வட்டகா²ணுஜோதனா, யாதி³ஸேஹி பன பச்சயேஹி அயங் தங் த³ஸ்ஸனங் ஓக்கந்தோ புன கதா³சி மிச்ச²த்தனியாமோ தப்படிக்கே²பபச்சயே படிச்ச ததோ ஸீஸுக்கே²பனமஸ்ஸ ந ஹோதீதி ந வத்தப்³ப³ங். தேன வுத்தங் ‘‘யேபு⁴ய்யேனா’’தி. ஏதி³ஸாதி ‘‘பு³த்³தா⁴னம்பி அதேகிச்சா²’’திஆதி³னா வுத்தஸதி³ஸா.
Kiṃ panesa etasmiññeva attabhāve niyato, udāhu aññasmimpīti? Etasmiññeva niyato. Akusalañhi nāmetaṃ abalaṃ, na kusalaṃ viya mahābalaṃ. Aññathā sammattaniyāmo viya accantiko siyā, āsevanavasena pana bhavantarepi taṃ taṃ diṭṭhiṃ rocetiyeva. Tenevāha ‘‘vaṭṭakhāṇuko nāmesa satto’’ti. Tasmā ‘‘sakiṃ nimuggo nimuggo eva bālo’’ti viya vaṭṭakhāṇujotanā, yādisehi pana paccayehi ayaṃ taṃ dassanaṃ okkanto puna kadāci micchattaniyāmo tappaṭikkhepapaccaye paṭicca tato sīsukkhepanamassa na hotīti na vattabbaṃ. Tena vuttaṃ ‘‘yebhuyyenā’’ti. Edisāti ‘‘buddhānampi atekicchā’’tiādinā vuttasadisā.
அத்தனோ நிந்தா³ப⁴யேனாதி ‘‘ஸம்மா தி³ட்டி²ஞ்ச நாம தே க³ரஹந்தீ’’திஆதி³னா அத்தனோ உபரி பரேஹி வத்தப்³ப³னிந்தா³ப⁴யேன. க⁴ட்டனப⁴யேனாதி ததா² பரேஸங் அபஸாத³னப⁴யேன. ஸஹத⁴ம்மேன பரேன அத்தனோ உபரி காதப்³ப³னிக்³க³ஹோ உபாரம்போ⁴, ததோ பரித்தாஸோ உபாரம்ப⁴ப⁴யங். தங் பன அத்த²தோ உபவாத³ப⁴யங் ஹோதீதி ஆஹ ‘‘உபவாத³ப⁴யேனா’’தி. படிப்பஸ்ஸத்³தி⁴வஸேன அபி⁴ஜ்ஜா² வினயதி ஏதேனாதி அபி⁴ஜ்ஜா²வினயோ, அரஹத்தப²லங். தேனாஹ ‘‘அபி⁴ஜ்ஜா²வினயோ வுச்சதி அரஹத்த’’ந்தி.
Attanonindābhayenāti ‘‘sammā diṭṭhiñca nāma te garahantī’’tiādinā attano upari parehi vattabbanindābhayena. Ghaṭṭanabhayenāti tathā paresaṃ apasādanabhayena. Sahadhammena parena attano upari kātabbaniggaho upārambho, tato parittāso upārambhabhayaṃ. Taṃ pana atthato upavādabhayaṃ hotīti āha ‘‘upavādabhayenā’’ti. Paṭippassaddhivasena abhijjhā vinayati etenāti abhijjhāvinayo, arahattaphalaṃ. Tenāha ‘‘abhijjhāvinayo vuccati arahatta’’nti.
பரிப்³பா³ஜகஸுத்தவண்ணனா நிட்டி²தா.
Paribbājakasuttavaṇṇanā niṭṭhitā.
உருவேலவக்³க³வண்ணனா நிட்டி²தா.
Uruvelavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. பரிப்³பா³ஜகஸுத்தங் • 10. Paribbājakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. பரிப்³பா³ஜகஸுத்தவண்ணனா • 10. Paribbājakasuttavaṇṇanā
