| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੧੦. ਪਰਿਬ੍ਬਾਜਕਸੁਤ੍ਤવਣ੍ਣਨਾ
10. Paribbājakasuttavaṇṇanā
੩੦. ਦਸਮੇ ਅਭਿਞ੍ਞਾਤਾਤਿ ਏਦਿਸੋ ਚ ਏਦਿਸੋ ਚਾਤਿ ਅਭਿਲਕ੍ਖਣવਸੇਨ ਞਾਤਾ। ਤੇਨਾਹ ‘‘ਞਾਤਾ ਪਾਕਟਾ’’ਤਿ। ਪਟਿਸਲ੍ਲਾਨਾ વੁਟ੍ਠਿਤੋਤਿ ਏਤ੍ਥ ਪਟਿਸਲ੍ਲਾਨਨ੍ਤਿ ਤੇਹਿ ਤੇਹਿ ਸਦ੍ਧਿવਿਹਾਰਿਕਅਨ੍ਤੇવਾਸਿਕਉਪਾਸਕਾਦਿਸਤ੍ਤੇਹਿ ਚੇવ ਰੂਪਾਰਮ੍ਮਣਾਦਿਸਙ੍ਖਾਰੇਹਿ ਚ ਪਟਿਨਿવਤ੍ਤਿਤ੍વਾ ਅਪਸਕ੍ਕਿਤ੍વਾ ਸਲ੍ਲੀਨਂ ਨਿਲੀਯਨਂ, ਏਕੀਭਾવੋ ਪવਿવੇਕੋਤਿ વੁਤ੍ਤਂ ਹੋਤਿ। ਯੋ ਤਤੋ વੁਟ੍ਠਿਤੋ, ਸੋ ਪਟਿਸਲ੍ਲਾਨਾ વੁਟ੍ਠਿਤੋ ਨਾਮ ਹੋਤਿ। ਭਗવਾ ਪਨ ਯਸ੍ਮਾ ਪਟਿਸਲ੍ਲਾਨਾ ਉਤ੍ਤਮਤੋ ਫਲਸਮਾਪਤ੍ਤਿਤੋ વੁਟ੍ਠਾਸਿ, ਤਸ੍ਮਾ વੁਤ੍ਤਂ ‘‘ਪਟਿਸਲ੍ਲਾਨਾ વੁਟ੍ਠਿਤੋਤਿ ਫਲਸਮਾਪਤ੍ਤਿਤੋ વੁਟ੍ਠਿਤੋ’’ਤਿ। વਤ੍ਥੁਕਾਮੇਸੂਤਿ ਰੂਪਾਦੀਸੁ ਕਿਲੇਸਕਾਮਸ੍ਸ વਤ੍ਥੁਭੂਤੇਸੁ ਕਾਮੇਸੁ। ਬਹਲਰਾਗਨ੍ਤਿ ਥਿਰਮੂਲਦੁਮ੍ਮੋਚਨੀਯਤਾਹਿ ਅਜ੍ਝੋਸਾਨੇਨ ਬਹਲਭੂਤਂ ਕਿਲੇਸਕਾਮਂ । ਸਕਾਰਣਾਤਿ ਯੇਹਿ ਕਾਰਣੇਹਿ ਪਰੇਸਂ વਾਦੇ ਦੋਸਂ ਦਸ੍ਸੇਨ੍ਤਿ, ਤੇਹਿ ਕਾਰਣੇਹਿ ਸਕਾਰਣਾ। ਨ ਹਿ ਲਕ੍ਖਣਯੁਤ੍ਤੇਨ ਹੇਤੁਨਾ વਿਨਾ ਪਰવਾਦੇਸੁ ਦੋਸਂ ਦਸ੍ਸੇਤੁਂ ਸਕ੍ਕਾ।
30. Dasame abhiññātāti ediso ca ediso cāti abhilakkhaṇavasena ñātā. Tenāha ‘‘ñātā pākaṭā’’ti. Paṭisallānā vuṭṭhitoti ettha paṭisallānanti tehi tehi saddhivihārikaantevāsikaupāsakādisattehi ceva rūpārammaṇādisaṅkhārehi ca paṭinivattitvā apasakkitvā sallīnaṃ nilīyanaṃ, ekībhāvo pavivekoti vuttaṃ hoti. Yo tato vuṭṭhito, so paṭisallānā vuṭṭhito nāma hoti. Bhagavā pana yasmā paṭisallānā uttamato phalasamāpattito vuṭṭhāsi, tasmā vuttaṃ ‘‘paṭisallānā vuṭṭhitoti phalasamāpattito vuṭṭhito’’ti. Vatthukāmesūti rūpādīsu kilesakāmassa vatthubhūtesu kāmesu. Bahalarāganti thiramūladummocanīyatāhi ajjhosānena bahalabhūtaṃ kilesakāmaṃ . Sakāraṇāti yehi kāraṇehi paresaṃ vāde dosaṃ dassenti, tehi kāraṇehi sakāraṇā. Na hi lakkhaṇayuttena hetunā vinā paravādesu dosaṃ dassetuṃ sakkā.
ਏવਮਾਦੀਤਿ ਏਤ੍ਥ ਆਦਿਸਦ੍ਦੇਨ ‘‘ਨਤ੍ਥਿ ਹੇਤੁ ਨਤ੍ਥਿ ਪਚ੍ਚਯੋ ਸਤ੍ਤਾਨਂ ਸਂਕਿਲੇਸਾਯਾ’’ਤਿ (ਦੀ॰ ਨਿ॰ ੧.੧੬੮) ਏવਮਾਦਿਂ ਸਙ੍ਗਣ੍ਹਾਤਿ, ਤਸ੍ਮਾ ਏવਮਾਦਿવਾਦਿਨੋ ਏવਂ ਹੇਤੁਪ੍ਪਟਿਕ੍ਖੇਪવਾਦਿਨੋਤਿ ਅਤ੍ਥੋ। ਏਤ੍ਥ ਚ ਨਤ੍ਥਿਕਦਿਟ੍ਠਿ વਿਪਾਕਂ ਪਟਿਬਾਹਤਿ, ਅਕਿਰਿਯਦਿਟ੍ਠਿ ਕਮ੍ਮਂ ਪਟਿਬਾਹਤਿ, ਅਹੇਤੁਕਦਿਟ੍ਠਿ ਉਭਯਂ ਪਟਿਬਾਹਤਿ। ਤਤ੍ਥ ਕਮ੍ਮਂ ਪਟਿਬਾਹਨ੍ਤੇਨ વਿਪਾਕੋ ਪਟਿਬਾਹਿਤੋ ਹੋਤਿ, વਿਪਾਕਂ ਪਟਿਬਾਹਨ੍ਤੇਨਪਿ ਕਮ੍ਮਂ ਪਟਿਬਾਹਿਤਂ। ਇਤਿ ਸਬ੍ਬੇਪੇਤੇ ਅਤ੍ਥਤੋ ਉਭਯਪਟਿਬਾਹਕਾ ਅਹੇਤੁવਾਦਾ ਚੇવ ਅਕਿਰਿਯવਾਦਾ ਚ ਨਤ੍ਥਿਕવਾਦਾ ਚ ਹੋਨ੍ਤਿ।
Evamādīti ettha ādisaddena ‘‘natthi hetu natthi paccayo sattānaṃ saṃkilesāyā’’ti (dī. ni. 1.168) evamādiṃ saṅgaṇhāti, tasmā evamādivādino evaṃ hetuppaṭikkhepavādinoti attho. Ettha ca natthikadiṭṭhi vipākaṃ paṭibāhati, akiriyadiṭṭhi kammaṃ paṭibāhati, ahetukadiṭṭhi ubhayaṃ paṭibāhati. Tattha kammaṃ paṭibāhantena vipāko paṭibāhito hoti, vipākaṃ paṭibāhantenapi kammaṃ paṭibāhitaṃ. Iti sabbepete atthato ubhayapaṭibāhakā ahetuvādā ceva akiriyavādā ca natthikavādā ca honti.
ਓਕ੍ਕਨ੍ਤਨਿਯਮਾਤਿ ਓਗਾਲ਼੍ਹਮਿਚ੍ਛਤ੍ਤਨਿਯਮਾ। ਸਜ੍ਝਾਯਤੀਤਿ ਤਂ ਦਿਟ੍ਠਿਦੀਪਕਂ ਗਨ੍ਥਂ ਉਗ੍ਗਹੇਤ੍વਾ ਪਠਤਿ। વੀਮਂਸਤੀਤਿ ਤਸ੍ਸ ਅਤ੍ਥਂ વਿਚਾਰੇਤਿ। ਤਸ੍ਸਾਤਿਆਦਿ વੀਮਂਸਨਾਕਾਰਦਸ੍ਸਨਂ। ਤਸ੍ਮਿਂ ਆਰਮ੍ਮਣੇਤਿ ਯਥਾਪਰਿਕਪ੍ਪਿਤਹੇਤੁਪਚ੍ਚਯਾਭਾવਾਦਿਕੇ ਨਤ੍ਥਿ ਹੇਤੂਤਿਆਦਿਨਯਪ੍ਪવਤ੍ਤਾਯ ਲਦ੍ਧਿਯਾ ਆਰਮ੍ਮਣੇ। ਮਿਚ੍ਛਾਸਤਿ ਸਨ੍ਤਿਟ੍ਠਤੀਤਿ ‘‘ਨਤ੍ਥਿ ਹੇਤੂ’’ਤਿਆਦਿવਸੇਨ ਅਨੁਸ੍ਸવੂਪਲਦ੍ਧੇ ਅਤ੍ਥੇ ਤਦਾਕਾਰਪਰਿવਿਤਕ੍ਕਨੇਹਿ ਸવਿਗ੍ਗਹੇ વਿਯ ਸਰੂਪਤੋ ਚਿਤ੍ਤਸ੍ਸ ਪਚ੍ਚੁਪਟ੍ਠਿਤੇ ਚਿਰਕਾਲਪਰਿਚਯੇਨ ਏવਮੇਤਨ੍ਤਿ ਨਿਜ੍ਝਾਨਕ੍ਖਮਭਾવੂਪਗਮਨੇਨ ਨਿਜ੍ਝਾਨਕ੍ਖਨ੍ਤਿਯਾ ਤਥਾਗਹਿਤੇ ਪੁਨਪ੍ਪੁਨਂ ਤਥੇવ ਆਸੇવਨ੍ਤਸ੍ਸ ਬਹੁਲੀਕਰੋਨ੍ਤਸ੍ਸ ਮਿਚ੍ਛਾવਿਤਕ੍ਕੇਨ ਸਮਾਨੀਯਮਾਨਾ ਮਿਚ੍ਛਾવਾਯਾਮੋਪਤ੍ਥਮ੍ਭਿਤਾ ਅਤਂਸਭਾવਂ ਤਂਸਭਾવਨ੍ਤਿ ਗਣ੍ਹਨ੍ਤੀ ਮਿਚ੍ਛਾਸਤੀਤਿ ਲਦ੍ਧਨਾਮਾ ਤਂਲਦ੍ਧਿਸਹਗਤਾ ਤਣ੍ਹਾ ਸਨ੍ਤਿਟ੍ਠਤਿ। ਚਿਤ੍ਤਂ ਏਕਗ੍ਗਂ ਹੋਤੀਤਿ ਯਥਾવੁਤ੍ਤવਿਤਕ੍ਕਾਦਿਪਚ੍ਚਯਲਾਭੇਨ ਤਸ੍ਮਿਂ ਆਰਮ੍ਮਣੇ ਅવਟ੍ਠਿਤਤਾਯ ਅਨੇਕਗ੍ਗਤਂ ਪਹਾਯ ਚਿਤ੍ਤਂ ਏਕਗ੍ਗਂ ਅਪ੍ਪਿਤਂ વਿਯ ਹੋਤਿ ਮਿਚ੍ਛਾਸਮਾਧਿਨਾ। ਸੋਪਿ ਹਿ ਪਚ੍ਚਯવਿਸੇਸੇਨ ਲਦ੍ਧਭਾવਨਾਬਲੋ ਕਦਾਚਿ ਸਮਾਧਾਨਪਟਿਰੂਪਕਿਚ੍ਚਕਰੋ ਹੋਤਿਯੇવ ਪਹਰਣવਿਜ੍ਝਨਾਦੀਸੁ વਿਯਾਤਿ ਦਟ੍ਠਬ੍ਬਂ।
Okkantaniyamāti ogāḷhamicchattaniyamā. Sajjhāyatīti taṃ diṭṭhidīpakaṃ ganthaṃ uggahetvā paṭhati. Vīmaṃsatīti tassa atthaṃ vicāreti. Tassātiādi vīmaṃsanākāradassanaṃ. Tasmiṃārammaṇeti yathāparikappitahetupaccayābhāvādike natthi hetūtiādinayappavattāya laddhiyā ārammaṇe. Micchāsati santiṭṭhatīti ‘‘natthi hetū’’tiādivasena anussavūpaladdhe atthe tadākāraparivitakkanehi saviggahe viya sarūpato cittassa paccupaṭṭhite cirakālaparicayena evametanti nijjhānakkhamabhāvūpagamanena nijjhānakkhantiyā tathāgahite punappunaṃ tatheva āsevantassa bahulīkarontassa micchāvitakkena samānīyamānā micchāvāyāmopatthambhitā ataṃsabhāvaṃ taṃsabhāvanti gaṇhantī micchāsatīti laddhanāmā taṃladdhisahagatā taṇhā santiṭṭhati. Cittaṃ ekaggaṃ hotīti yathāvuttavitakkādipaccayalābhena tasmiṃ ārammaṇe avaṭṭhitatāya anekaggataṃ pahāya cittaṃ ekaggaṃ appitaṃ viya hoti micchāsamādhinā. Sopi hi paccayavisesena laddhabhāvanābalo kadāci samādhānapaṭirūpakiccakaro hotiyeva paharaṇavijjhanādīsu viyāti daṭṭhabbaṃ.
ਜવਨਾਨਿ ਜવਨ੍ਤੀਤਿ ਅਨੇਕਕ੍ਖਤ੍ਤੁਂ ਤੇਨਾਕਾਰੇਨ ਪੁਬ੍ਬਭਾਗਿਯੇਸੁ ਜવਨવਾਰੇਸੁ ਪવਤ੍ਤੇਸੁ ਸਬ੍ਬਪਚ੍ਛਿਮੇ ਜવਨવਾਰੇ ਸਤ੍ਤ ਜવਨਾਨਿ ਜવਨ੍ਤਿ। ਪਠਮਜવਨੇ ਸਤੇਕਿਚ੍ਛੋ ਹੋਤਿ, ਤਥਾ ਦੁਤਿਯਾਦੀਸੂਤਿ ਧਮ੍ਮਸਭਾવਦਸ੍ਸਨਮੇਤਂ, ਨ ਪਨ ਤਸ੍ਮਿਂ ਖਣੇ ਤੇਸਂ ਸਤੇਕਿਚ੍ਛਭਾવਾਪਾਦਨਂ ਕੇਨਚਿ ਸਕ੍ਕਾ ਕਾਤੁਂ। ਤਤ੍ਥਾਤਿ ਤੇਸੁ ਤੀਸੁ ਮਿਚ੍ਛਾਦਸ੍ਸਨੇਸੁ। ਕੋਚਿ ਏਕਂ ਦਸ੍ਸਨਂ ਓਕ੍ਕਮਤੀਤਿ ਯਸ੍ਸ ਏਕਸ੍ਮਿਂਯੇવ ਅਭਿਨਿવੇਸੋ ਆਸੇવਨਾ ਪવਤ੍ਤਾ, ਸੋ ਏਕਂਯੇવ ਦਸ੍ਸਨਂ ਓਕ੍ਕਮਤਿ। ਯਸ੍ਸ ਦ੍વੀਸੁ ਤੀਸੁਪਿ વਾ ਅਭਿਨਿવੇਸੋ ਆਸੇવਨਾ ਪવਤ੍ਤਾ, ਸੋ ਦ੍વੇ ਤੀਣਿ ਓਕ੍ਕਮਤਿ। ਏਤੇਨ ਯਾ ਪੁਬ੍ਬੇ ਉਭਯਪਟਿਬਾਹਿਕਤਾਮੁਖੇਨ ਪવਤ੍ਤਾ ਅਤ੍ਥਸਿਦ੍ਧਾ ਸਬ੍ਬਦਿਟ੍ਠਿਕਾ, ਸਾ ਪੁਬ੍ਬਭਾਗਿਯਾ, ਮਿਚ੍ਛਾਨਿਯਾਮੋਕ੍ਕਨ੍ਤਿਯਾ ਪਨ ਯਥਾਸਕਂ ਪਚ੍ਚਯਸਮੁਦਾਗਮਦਿਟ੍ਠਿਤੋ ਭਿਨ੍ਨਾਰਮ੍ਮਣਾਨਂ વਿਯ વਿਸੇਸਾਧਿਗਮਾਨਂ ਏਕਜ੍ਝਂ ਅਨੁਪ੍ਪਤ੍ਤਿਯਾ ਅਭਿਕਿਣ੍ਣਾ ਏવਾਤਿ ਦਸ੍ਸੇਤਿ। ਏਕਸ੍ਮਿਂ ਓਕ੍ਕਨ੍ਤੇਪਿ ਦ੍વੀਸੁ ਤੀਸੁ ਓਕ੍ਕਨ੍ਤੇਸੁਪਿ ਨਿਯਤਮਿਚ੍ਛਾਦਿਟ੍ਠਿਕੋવ ਹੋਤੀਤਿ ਇਮਿਨਾ ਤਿਸ੍ਸਨ੍ਨਮ੍ਪਿ ਦਿਟ੍ਠੀਨਂ ਸਮਾਨਫਲਤਂ ਸਮਾਨਬਲਞ੍ਚ ਦਸ੍ਸੇਤਿ। ਤਸ੍ਮਾ ਤਿਸ੍ਸੋਪਿ ਚੇਤਨਾ ਏਕਸ੍ਸ ਉਪ੍ਪਨ੍ਨਾ ਅਞ੍ਞਮਞ੍ਞਂ ਅਨੁਬਲਪ੍ਪਦਾਯਿਕਾ ਹੋਨ੍ਤਿ।
Javanāni javantīti anekakkhattuṃ tenākārena pubbabhāgiyesu javanavāresu pavattesu sabbapacchime javanavāre satta javanāni javanti. Paṭhamajavane satekiccho hoti, tathā dutiyādīsūti dhammasabhāvadassanametaṃ, na pana tasmiṃ khaṇe tesaṃ satekicchabhāvāpādanaṃ kenaci sakkā kātuṃ. Tatthāti tesu tīsu micchādassanesu. Koci ekaṃ dassanaṃ okkamatīti yassa ekasmiṃyeva abhiniveso āsevanā pavattā, so ekaṃyeva dassanaṃ okkamati. Yassa dvīsu tīsupi vā abhiniveso āsevanā pavattā, so dve tīṇi okkamati. Etena yā pubbe ubhayapaṭibāhikatāmukhena pavattā atthasiddhā sabbadiṭṭhikā, sā pubbabhāgiyā, micchāniyāmokkantiyā pana yathāsakaṃ paccayasamudāgamadiṭṭhito bhinnārammaṇānaṃ viya visesādhigamānaṃ ekajjhaṃ anuppattiyā abhikiṇṇā evāti dasseti. Ekasmiṃ okkantepi dvīsu tīsu okkantesupi niyatamicchādiṭṭhikova hotīti iminā tissannampi diṭṭhīnaṃ samānaphalataṃ samānabalañca dasseti. Tasmā tissopi cetanā ekassa uppannā aññamaññaṃ anubalappadāyikā honti.
ਕਿਂ ਪਨੇਸ ਏਤਸ੍ਮਿਞ੍ਞੇવ ਅਤ੍ਤਭਾવੇ ਨਿਯਤੋ, ਉਦਾਹੁ ਅਞ੍ਞਸ੍ਮਿਮ੍ਪੀਤਿ? ਏਤਸ੍ਮਿਞ੍ਞੇવ ਨਿਯਤੋ। ਅਕੁਸਲਞ੍ਹਿ ਨਾਮੇਤਂ ਅਬਲਂ, ਨ ਕੁਸਲਂ વਿਯ ਮਹਾਬਲਂ। ਅਞ੍ਞਥਾ ਸਮ੍ਮਤ੍ਤਨਿਯਾਮੋ વਿਯ ਅਚ੍ਚਨ੍ਤਿਕੋ ਸਿਯਾ, ਆਸੇવਨવਸੇਨ ਪਨ ਭવਨ੍ਤਰੇਪਿ ਤਂ ਤਂ ਦਿਟ੍ਠਿਂ ਰੋਚੇਤਿਯੇવ। ਤੇਨੇવਾਹ ‘‘વਟ੍ਟਖਾਣੁਕੋ ਨਾਮੇਸ ਸਤ੍ਤੋ’’ਤਿ। ਤਸ੍ਮਾ ‘‘ਸਕਿਂ ਨਿਮੁਗ੍ਗੋ ਨਿਮੁਗ੍ਗੋ ਏવ ਬਾਲੋ’’ਤਿ વਿਯ વਟ੍ਟਖਾਣੁਜੋਤਨਾ, ਯਾਦਿਸੇਹਿ ਪਨ ਪਚ੍ਚਯੇਹਿ ਅਯਂ ਤਂ ਦਸ੍ਸਨਂ ਓਕ੍ਕਨ੍ਤੋ ਪੁਨ ਕਦਾਚਿ ਮਿਚ੍ਛਤ੍ਤਨਿਯਾਮੋ ਤਪ੍ਪਟਿਕ੍ਖੇਪਪਚ੍ਚਯੇ ਪਟਿਚ੍ਚ ਤਤੋ ਸੀਸੁਕ੍ਖੇਪਨਮਸ੍ਸ ਨ ਹੋਤੀਤਿ ਨ વਤ੍ਤਬ੍ਬਂ। ਤੇਨ વੁਤ੍ਤਂ ‘‘ਯੇਭੁਯ੍ਯੇਨਾ’’ਤਿ। ਏਦਿਸਾਤਿ ‘‘ਬੁਦ੍ਧਾਨਮ੍ਪਿ ਅਤੇਕਿਚ੍ਛਾ’’ਤਿਆਦਿਨਾ વੁਤ੍ਤਸਦਿਸਾ।
Kiṃ panesa etasmiññeva attabhāve niyato, udāhu aññasmimpīti? Etasmiññeva niyato. Akusalañhi nāmetaṃ abalaṃ, na kusalaṃ viya mahābalaṃ. Aññathā sammattaniyāmo viya accantiko siyā, āsevanavasena pana bhavantarepi taṃ taṃ diṭṭhiṃ rocetiyeva. Tenevāha ‘‘vaṭṭakhāṇuko nāmesa satto’’ti. Tasmā ‘‘sakiṃ nimuggo nimuggo eva bālo’’ti viya vaṭṭakhāṇujotanā, yādisehi pana paccayehi ayaṃ taṃ dassanaṃ okkanto puna kadāci micchattaniyāmo tappaṭikkhepapaccaye paṭicca tato sīsukkhepanamassa na hotīti na vattabbaṃ. Tena vuttaṃ ‘‘yebhuyyenā’’ti. Edisāti ‘‘buddhānampi atekicchā’’tiādinā vuttasadisā.
ਅਤ੍ਤਨੋ ਨਿਨ੍ਦਾਭਯੇਨਾਤਿ ‘‘ਸਮ੍ਮਾ ਦਿਟ੍ਠਿਞ੍ਚ ਨਾਮ ਤੇ ਗਰਹਨ੍ਤੀ’’ਤਿਆਦਿਨਾ ਅਤ੍ਤਨੋ ਉਪਰਿ ਪਰੇਹਿ વਤ੍ਤਬ੍ਬਨਿਨ੍ਦਾਭਯੇਨ। ਘਟ੍ਟਨਭਯੇਨਾਤਿ ਤਥਾ ਪਰੇਸਂ ਅਪਸਾਦਨਭਯੇਨ। ਸਹਧਮ੍ਮੇਨ ਪਰੇਨ ਅਤ੍ਤਨੋ ਉਪਰਿ ਕਾਤਬ੍ਬਨਿਗ੍ਗਹੋ ਉਪਾਰਮ੍ਭੋ, ਤਤੋ ਪਰਿਤ੍ਤਾਸੋ ਉਪਾਰਮ੍ਭਭਯਂ। ਤਂ ਪਨ ਅਤ੍ਥਤੋ ਉਪવਾਦਭਯਂ ਹੋਤੀਤਿ ਆਹ ‘‘ਉਪવਾਦਭਯੇਨਾ’’ਤਿ। ਪਟਿਪ੍ਪਸ੍ਸਦ੍ਧਿવਸੇਨ ਅਭਿਜ੍ਝਾ વਿਨਯਤਿ ਏਤੇਨਾਤਿ ਅਭਿਜ੍ਝਾવਿਨਯੋ, ਅਰਹਤ੍ਤਫਲਂ। ਤੇਨਾਹ ‘‘ਅਭਿਜ੍ਝਾવਿਨਯੋ વੁਚ੍ਚਤਿ ਅਰਹਤ੍ਤ’’ਨ੍ਤਿ।
Attanonindābhayenāti ‘‘sammā diṭṭhiñca nāma te garahantī’’tiādinā attano upari parehi vattabbanindābhayena. Ghaṭṭanabhayenāti tathā paresaṃ apasādanabhayena. Sahadhammena parena attano upari kātabbaniggaho upārambho, tato parittāso upārambhabhayaṃ. Taṃ pana atthato upavādabhayaṃ hotīti āha ‘‘upavādabhayenā’’ti. Paṭippassaddhivasena abhijjhā vinayati etenāti abhijjhāvinayo, arahattaphalaṃ. Tenāha ‘‘abhijjhāvinayo vuccati arahatta’’nti.
ਪਰਿਬ੍ਬਾਜਕਸੁਤ੍ਤવਣ੍ਣਨਾ ਨਿਟ੍ਠਿਤਾ।
Paribbājakasuttavaṇṇanā niṭṭhitā.
ਉਰੁવੇਲવਗ੍ਗવਣ੍ਣਨਾ ਨਿਟ੍ਠਿਤਾ।
Uruvelavaggavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧੦. ਪਰਿਬ੍ਬਾਜਕਸੁਤ੍ਤਂ • 10. Paribbājakasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੧੦. ਪਰਿਬ੍ਬਾਜਕਸੁਤ੍ਤવਣ੍ਣਨਾ • 10. Paribbājakasuttavaṇṇanā
