| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5-6. பாரிச்ச²த்தகஸுத்தாதி³வண்ணனா
5-6. Pāricchattakasuttādivaṇṇanā
69-70. பஞ்சமே பதிதபலாஸோதி பதிதபத்தோ. எத்த² பட²மங் பண்டு³பலாஸதங், து³தியங் பன்னபலாஸதஞ்ச வத்வா ததியங் ஜாலகஜாததா, சதுத்த²ங் கா²ரகஜாததா ச பாளியங் வுத்தா. தீ³க⁴னிகாயட்ட²கதா²யங் பன மஹாகோ³விந்த³ஸுத்தவண்ணனாயங் (தீ³॰ நி॰ அட்ட²॰ 2.294) இமமேவ பாளிங் ஆஹரித்வா த³ஸ்ஸெந்தேன பட²மங் பண்டு³பலாஸதங், து³தியங் பன்னபலாஸதஞ்ச வத்வா ததியங் கா²ரகஜாததா, சதுத்த²ங் ஜாலகஜாததா ச த³ஸ்ஸிதா. ஏவஞ்ஹி தத்த² வுத்தங் – ‘‘பாரிச்ச²த்தகே புப்ப²மானே ஏகங் வஸ்ஸங் உபட்டா²னங் க³ச்ச²ந்தி, தே தஸ்ஸ பண்டு³பலாஸபா⁴வதோ பட்டா²ய அத்தமனா ஹொந்தி. யதா²ஹ –
69-70. Pañcame patitapalāsoti patitapatto. Ettha paṭhamaṃ paṇḍupalāsataṃ, dutiyaṃ pannapalāsatañca vatvā tatiyaṃ jālakajātatā, catutthaṃ khārakajātatā ca pāḷiyaṃ vuttā. Dīghanikāyaṭṭhakathāyaṃ pana mahāgovindasuttavaṇṇanāyaṃ (dī. ni. aṭṭha. 2.294) imameva pāḷiṃ āharitvā dassentena paṭhamaṃ paṇḍupalāsataṃ, dutiyaṃ pannapalāsatañca vatvā tatiyaṃ khārakajātatā, catutthaṃ jālakajātatā ca dassitā. Evañhi tattha vuttaṃ – ‘‘pāricchattake pupphamāne ekaṃ vassaṃ upaṭṭhānaṃ gacchanti, te tassa paṇḍupalāsabhāvato paṭṭhāya attamanā honti. Yathāha –
யஸ்மிங், பி⁴க்க²வே, ஸமயே தே³வானங் தாவதிங்ஸானங் பாரிச்ச²த்தகோ கோவிளாரோ, பண்டு³பலாஸோ ஹோதி, அத்தமனா, பி⁴க்க²வே, தே³வா தாவதிங்ஸா தஸ்மிங் ஸமயே ஹொந்தி ‘பண்டு³பலாஸோ தா³னி பாரிச்ச²த்தகோ, கோவிளாரோ, ந சிரஸ்ஸேவ பன்னபலாஸோ ப⁴விஸ்ஸதீ’தி. யஸ்மிங் ஸமயே தே³வானங் தாவதிங்ஸானங் பாரிச்ச²த்தகோ, கோவிளாரோ, பன்னபலாஸோ ஹோதி, ஜாலகஜாதோ ஹோதி, கா²ரகஜாதோ ஹோதி, குடுமலகஜாதோ ஹோதி, கோரகஜாதோ ஹோதி, அத்தமனா, பி⁴க்க²வே , தே³வா தாவதிங்ஸா தஸ்மிங் ஸமயே ஹொந்தி ‘கோரகஜாதோ தா³னி பாரிச்ச²த்தகோ கோவிளாரோ, ந சிரஸ்ஸேவ ஸப்³ப³பாலிபு²ல்லோ ப⁴விஸ்ஸதீ’தி.
Yasmiṃ, bhikkhave, samaye devānaṃ tāvatiṃsānaṃ pāricchattako koviḷāro, paṇḍupalāso hoti, attamanā, bhikkhave, devā tāvatiṃsā tasmiṃ samaye honti ‘paṇḍupalāso dāni pāricchattako, koviḷāro, na cirasseva pannapalāso bhavissatī’ti. Yasmiṃ samaye devānaṃ tāvatiṃsānaṃ pāricchattako, koviḷāro, pannapalāso hoti, jālakajāto hoti, khārakajāto hoti, kuṭumalakajāto hoti, korakajāto hoti, attamanā, bhikkhave , devā tāvatiṃsā tasmiṃ samaye honti ‘korakajāto dāni pāricchattako koviḷāro, na cirasseva sabbapāliphullo bhavissatī’ti.
லீனத்த²ப்பகாஸினியம்பி (தீ³॰ நி॰ டீ॰ 2.294) எத்த² ஏவமத்தோ² த³ஸ்ஸிதோ – பன்னபலாஸோதி பதிதபத்தோ. கா²ரகஜாதோதி ஜாதகு²த்³த³கமகுளோ. யே ஹி நீலபத்தகா அதிவிய கு²த்³த³கா மகுளா, தே ‘‘கா²ரகா’’தி வுச்சந்தி. ஜாலகஜாதோதி தேஹியேவ கு²த்³த³கமகுளேஹி ஜாதஜாலகோ ஸப்³ப³ஸோ ஜாலோ விய ஜாதோ. கேசி பன ‘‘ஜாலகஜாதோதி ஏகஜாலோ விய ஜாதோ’’தி அத்த²ங் வத³ந்தி. பாரிச்ச²த்தகோ கிர கா²ரகக்³க³ஹணகாலே ஸப்³ப³த்த²கமேவ பல்லவிகோ ஹோதி, தே சஸ்ஸ பல்லவா பப⁴ஸ்ஸரபவாளவண்ணஸமுஜ்ஜலா ஹொந்தி. தேன ஸோ ஸப்³ப³ஸோ ஸமுஜ்ஜலந்தோ திட்ட²தி. குடுமலஜாதோதி ஸஞ்ஜாதமஹாமகுளோ. கோரகஜாதோதி ஸஞ்ஜாதஸூசிபே⁴தோ³ ஸம்பதிவிகஸமானாவத்தோ². ஸப்³ப³பாலிபு²ல்லோதி ஸப்³ப³ஸோ பு²ல்லிதவிகஸிதோதி. அயஞ்ச அனுக்கமோ தீ³க⁴பா⁴ணகானங் வளஞ்ஜனானுக்கமேன த³ஸ்ஸிதோ, ந எத்த² ஆசரியஸ்ஸ விரோதோ⁴ ஆஸங்கிதப்³போ³.
Līnatthappakāsiniyampi (dī. ni. ṭī. 2.294) ettha evamattho dassito – pannapalāsoti patitapatto. Khārakajātoti jātakhuddakamakuḷo. Ye hi nīlapattakā ativiya khuddakā makuḷā, te ‘‘khārakā’’ti vuccanti. Jālakajātoti tehiyeva khuddakamakuḷehi jātajālako sabbaso jālo viya jāto. Keci pana ‘‘jālakajātoti ekajālo viya jāto’’ti atthaṃ vadanti. Pāricchattako kira khārakaggahaṇakāle sabbatthakameva pallaviko hoti, te cassa pallavā pabhassarapavāḷavaṇṇasamujjalā honti. Tena so sabbaso samujjalanto tiṭṭhati. Kuṭumalajātoti sañjātamahāmakuḷo. Korakajātoti sañjātasūcibhedo sampativikasamānāvattho. Sabbapāliphulloti sabbaso phullitavikasitoti. Ayañca anukkamo dīghabhāṇakānaṃ vaḷañjanānukkamena dassito, na ettha ācariyassa virodho āsaṅkitabbo.
கந்தனகவாதோதி தே³வானங் புஞ்ஞகம்மபச்சயா புப்பா²னங் சி²ந்த³னகவாதோ. கந்ததீதி சி²ந்த³தி. ஸம்படிச்ச²னகவாதோதி சி²ன்னானங் சி²ன்னானங் புப்பா²னங் ஸம்படிக்³க³ண்ஹகவாதோ. சினந்தோதி நானாவித⁴ப⁴த்திஸன்னிவேஸவஸேன நிசினங் கரொந்தோ. அஞ்ஞதரதே³வதானந்தி நாமகொ³த்தவஸேன அபஞ்ஞாததே³வதானங். ரேணுவட்டீதி ரேணுஸங்கா⁴தோ. கண்ணிகங் ஆஹச்சாதி ஸுத⁴ம்மாய கூடங் ஆஹந்த்வா.
Kantanakavātoti devānaṃ puññakammapaccayā pupphānaṃ chindanakavāto. Kantatīti chindati. Sampaṭicchanakavātoti chinnānaṃ chinnānaṃ pupphānaṃ sampaṭiggaṇhakavāto. Cinantoti nānāvidhabhattisannivesavasena nicinaṃ karonto. Aññataradevatānanti nāmagottavasena apaññātadevatānaṃ. Reṇuvaṭṭīti reṇusaṅghāto. Kaṇṇikaṃ āhaccāti sudhammāya kūṭaṃ āhantvā.
அனுப²ரணானுபா⁴வோதி கீ²ணாஸவஸ்ஸ பி⁴க்கு²னோ கித்திஸத்³த³ஸ்ஸ யாவ ப்³ரஹ்மலோகா அனுப²ரணஸங்கா²தோ ஆனுபா⁴வோ. பப்³ப³ஜ்ஜானிஸ்ஸிதங் ஹோதீதி பப்³ப³ஜ்ஜாய சதுபாரிஸுத்³தி⁴ஸீலம்பி த³ஸ்ஸிதமேவாதி அதி⁴ப்பாயோ. பட²மஜ்ஜா²னஸன்னிஸ்ஸிதந்திஆதீ³ஸுபி இமினாவ நயேன அத்தோ² வேதி³தப்³போ³. இத⁴ பன உப⁴யதோ பரிச்சே²தோ³ ஹெட்டா² ஸீலதோ உபரி அரஹத்ததோ ச பரிச்சே²த³ஸ்ஸ த³ஸ்ஸிதத்தா. தேனேதங் வுத்தந்தி தேன காரணேன ஏதங் ‘‘சதுபாரிஸுத்³தி⁴ஸீலங் பப்³ப³ஜ்ஜானிஸ்ஸிதங் ஹோதீ’’திஆதி³வசனங் வுத்தங். ச²ட்ட²ங் உத்தானமேவ.
Anupharaṇānubhāvoti khīṇāsavassa bhikkhuno kittisaddassa yāva brahmalokā anupharaṇasaṅkhāto ānubhāvo. Pabbajjānissitaṃ hotīti pabbajjāya catupārisuddhisīlampi dassitamevāti adhippāyo. Paṭhamajjhānasannissitantiādīsupi imināva nayena attho veditabbo. Idha pana ubhayato paricchedo heṭṭhā sīlato upari arahattato ca paricchedassa dassitattā. Tenetaṃ vuttanti tena kāraṇena etaṃ ‘‘catupārisuddhisīlaṃ pabbajjānissitaṃ hotī’’tiādivacanaṃ vuttaṃ. Chaṭṭhaṃ uttānameva.
பாரிச்ச²த்தகஸுத்தாதி³வண்ணனா நிட்டி²தா.
Pāricchattakasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
5. பாரிச்ச²த்தகஸுத்தங் • 5. Pāricchattakasuttaṃ
6. ஸக்கச்சஸுத்தங் • 6. Sakkaccasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
5. பாரிச்ச²த்தகஸுத்தவண்ணனா • 5. Pāricchattakasuttavaṇṇanā
6. ஸக்கச்சஸுத்தவண்ணனா • 6. Sakkaccasuttavaṇṇanā
