| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. பாரிச்ச²த்தகஸுத்தவண்ணனா
5. Pāricchattakasuttavaṇṇanā
69. பஞ்சமே பன்னபலாஸோதி பதிதபலாஸோ. ஜாலகஜாதோதி ஸஞ்ஜாதபத்தபுப்ப²ஜாலோ. தஸ்ஸ ஹி பத்தஜாலஞ்ச புப்ப²ஜாலஞ்ச ஸஹேவ நிக்க²மதி. கா²ரகஜாதோதி பாடியேக்கங் ஸஞ்ஜாதேன ஸுவிப⁴த்தேன பத்தஜாலகேன ச புப்ப²ஜாலகேன ச ஸமன்னாக³தோ. குடுமலகஜாதோதி ஸஞ்ஜாதமகுளோ. கோரகஜாதோதி அவிகஸிதேஹி மஹாகுச்சீ²ஹி ஸம்பி⁴ன்னமுகே²ஹி புப்பே²ஹி ஸமன்னாக³தோ. ஸப்³ப³பாலிபு²ல்லோதி ஸப்³பா³காரேன ஸுபுப்பி²தோ. தி³ப்³பே³ சத்தாரோ மாஸேதி தி³ப்³பே³ன ஆயுனா சத்தாரோ மாஸே. மனுஸ்ஸக³ணனாய பன தானி த்³வாத³ஸ வஸ்ஸஸஹஸ்ஸானி ஹொந்தி. பரிசாரெந்தீதி இதோ சிதோ ச இந்த்³ரியானி சாரெந்தி, கீளந்தி ரமந்தீதி அத்தோ².
69. Pañcame pannapalāsoti patitapalāso. Jālakajātoti sañjātapattapupphajālo. Tassa hi pattajālañca pupphajālañca saheva nikkhamati. Khārakajātoti pāṭiyekkaṃ sañjātena suvibhattena pattajālakena ca pupphajālakena ca samannāgato. Kuṭumalakajātoti sañjātamakuḷo. Korakajātoti avikasitehi mahākucchīhi sambhinnamukhehi pupphehi samannāgato. Sabbapāliphulloti sabbākārena supupphito. Dibbe cattāro māseti dibbena āyunā cattāro māse. Manussagaṇanāya pana tāni dvādasa vassasahassāni honti. Paricārentīti ito cito ca indriyāni cārenti, kīḷanti ramantīti attho.
ஆபா⁴ய பு²டங் ஹோதீதி தத்தகங் டா²னங் ஓபா⁴ஸேன பு²டங் ஹோதி. தேஸஞ்ஹி புப்பா²னங் பா³லஸூரியஸ்ஸ விய ஆபா⁴ ஹோதி, பத்தானி பண்ணச்ச²த்தப்பமாணானி, அந்தோ மஹாதும்ப³மத்தா ரேணு ஹோதி. புப்பி²தே பன பாரிச்ச²த்தகே ஆரோஹனகிச்சங் வா அங்குஸகங் க³ஹெத்வா நமனகிச்சங் வா புப்பா²ஹரணத்த²ங் சங்கோ³டககிச்சங் வா நத்தி², கந்தனகவாதோ உட்ட²ஹித்வா புப்பா²னி வண்டதோ கந்ததி, ஸம்படிச்ச²னகவாதோ ஸம்படிச்ச²தி, பவேஸனகவாதோ ஸுத⁴ம்மங் தே³வஸப⁴ங் பவேஸேதி, ஸம்மஜ்ஜனகவாதோ புராணபுப்பா²னி நீஹரதி, ஸந்த²ரணகவாதோ பத்தகண்ணிககேஸரானி ரஞ்ஜெந்தோ ஸந்த²ரதி. மஜ்ஜ²ட்டா²னே த⁴ம்மாஸனங் ஹோதி யோஜனப்பமாணோ ரதனபல்லங்கோ உபரி தியோஜனேன ஸேதச்ச²த்தேன தா⁴ரியமானேன, தத³னந்தரங் ஸக்கஸ்ஸ தே³வரஞ்ஞோ ஆஸனங் அத்த²ரியதி, ததோ தெத்திங்ஸாய தே³வபுத்தானங், ததோ அஞ்ஞேஸங் மஹேஸக்கா²னங் தே³வானங், அஞ்ஞதரதே³வதானங் புப்ப²கண்ணிகாவ ஆஸனங் ஹோதி. தே³வா தே³வஸப⁴ங் பவிஸித்வா நிஸீத³ந்தி. ததோ புப்பே²ஹி ரேணுவட்டி உக்³க³ந்த்வா உபரிகண்ணிகங் ஆஹச்ச நிபதமானா தே³வதானங் திகா³வுதப்பமாணங் அத்தபா⁴வங் லாகா²ரஸபரிகம்மஸஜ்ஜிதங் விய ஸுவண்ணசுண்ணபிஞ்ஜரங் விய கரோதி. ஏகச்சே தே³வா ஏகேகங் புப்ப²ங் க³ஹெத்வா அஞ்ஞமஞ்ஞங் பஹரந்தாபி கீளந்தியேவ. பஹரணகாலேபி மஹாதும்ப³ப்பமாணா ரேணு நிக்க²மித்வா ஸரீரங் பபா⁴ஸம்பன்னேஹி க³ந்த⁴சுண்ணேஹி ஸஞ்ஜதமனோஸிலாராக³ங் விய கரோதி. ஏவங் ஸா கீளா சதூஹி மாஸேஹி பரியோஸானங் க³ச்ச²தி. அயமானுபா⁴வோதி அயங் அனுப²ரிதுங் ஆனுபா⁴வோ.
Ābhāya phuṭaṃ hotīti tattakaṃ ṭhānaṃ obhāsena phuṭaṃ hoti. Tesañhi pupphānaṃ bālasūriyassa viya ābhā hoti, pattāni paṇṇacchattappamāṇāni, anto mahātumbamattā reṇu hoti. Pupphite pana pāricchattake ārohanakiccaṃ vā aṅkusakaṃ gahetvā namanakiccaṃ vā pupphāharaṇatthaṃ caṅgoṭakakiccaṃ vā natthi, kantanakavāto uṭṭhahitvā pupphāni vaṇṭato kantati, sampaṭicchanakavāto sampaṭicchati, pavesanakavāto sudhammaṃ devasabhaṃ paveseti, sammajjanakavāto purāṇapupphāni nīharati, santharaṇakavāto pattakaṇṇikakesarāni rañjento santharati. Majjhaṭṭhāne dhammāsanaṃ hoti yojanappamāṇo ratanapallaṅko upari tiyojanena setacchattena dhāriyamānena, tadanantaraṃ sakkassa devarañño āsanaṃ atthariyati, tato tettiṃsāya devaputtānaṃ, tato aññesaṃ mahesakkhānaṃ devānaṃ, aññataradevatānaṃ pupphakaṇṇikāva āsanaṃ hoti. Devā devasabhaṃ pavisitvā nisīdanti. Tato pupphehi reṇuvaṭṭi uggantvā uparikaṇṇikaṃ āhacca nipatamānā devatānaṃ tigāvutappamāṇaṃ attabhāvaṃ lākhārasaparikammasajjitaṃ viya suvaṇṇacuṇṇapiñjaraṃ viya karoti. Ekacce devā ekekaṃ pupphaṃ gahetvā aññamaññaṃ paharantāpi kīḷantiyeva. Paharaṇakālepi mahātumbappamāṇā reṇu nikkhamitvā sarīraṃ pabhāsampannehi gandhacuṇṇehi sañjatamanosilārāgaṃ viya karoti. Evaṃ sā kīḷā catūhi māsehi pariyosānaṃ gacchati. Ayamānubhāvoti ayaṃ anupharituṃ ānubhāvo.
இதா³னி யஸ்மா ந ஸத்தா² பாரிச்ச²த்தகேன அத்தி²கோ, தேன பன ஸத்³தி⁴ங் உபமெத்வா ஸத்த அரியஸாவகே த³ஸ்ஸேதுகாமோ, தஸ்மா தே த³ஸ்ஸேதுங் ஏவமேவ கோ²திஆதி³மாஹ. தத்த² பப்³ப³ஜ்ஜாய சேதேதீதி பப்³ப³ஜிஸ்ஸாமீதி சிந்தேதி. தே³வானங்வாதி தே³வானங் விய. யாவ ப்³ரஹ்மலோகா ஸத்³தோ³ அப்³பு⁴க்³க³ச்ச²தீதி பத²விதலதோ யாவ ப்³ரஹ்மலோகா ஸாது⁴காரஸத்³தே³ன ஸப்³ப³ங் ஏகஸத்³த³மேவ ஹோதி. அயமானுபா⁴வோதி அயங் கீ²ணாஸவஸ்ஸ பி⁴க்கு²னோ அனுப²ரணானுபா⁴வோ. இமஸ்மிங் ஸுத்தே சதுபாரிஸுத்³தி⁴ஸீலங் பப்³ப³ஜ்ஜானிஸ்ஸிதங் ஹோதி, கஸிணபரிகம்மங் பட²மஜ்ஜா²னஸன்னிஸ்ஸிதங், விபஸ்ஸனாய ஸத்³தி⁴ங் தயோ மக்³கா³ தீணி ச ப²லானி அரஹத்தமக்³க³ஸன்னிஸ்ஸிதானி ஹொந்தி. தே³ஸனாய ஹெட்ட²தோ வா உபரிதோ வா உப⁴யதோ வா பரிச்சே²தோ³ ஹோதி, இத⁴ பன உப⁴யதோ பரிச்சே²தோ³. தேனேதங் வுத்தங். ஸங்கே²பதோ பனெத்த² வட்டவிவட்டங் கதி²தந்தி வேதி³தப்³ப³ங்.
Idāni yasmā na satthā pāricchattakena atthiko, tena pana saddhiṃ upametvā satta ariyasāvake dassetukāmo, tasmā te dassetuṃ evameva khotiādimāha. Tattha pabbajjāya cetetīti pabbajissāmīti cinteti. Devānaṃvāti devānaṃ viya. Yāva brahmalokā saddo abbhuggacchatīti pathavitalato yāva brahmalokā sādhukārasaddena sabbaṃ ekasaddameva hoti. Ayamānubhāvoti ayaṃ khīṇāsavassa bhikkhuno anupharaṇānubhāvo. Imasmiṃ sutte catupārisuddhisīlaṃ pabbajjānissitaṃ hoti, kasiṇaparikammaṃ paṭhamajjhānasannissitaṃ, vipassanāya saddhiṃ tayo maggā tīṇi ca phalāni arahattamaggasannissitāni honti. Desanāya heṭṭhato vā uparito vā ubhayato vā paricchedo hoti, idha pana ubhayato paricchedo. Tenetaṃ vuttaṃ. Saṅkhepato panettha vaṭṭavivaṭṭaṃ kathitanti veditabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. பாரிச்ச²த்தகஸுத்தங் • 5. Pāricchattakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5-6. பாரிச்ச²த்தகஸுத்தாதி³வண்ணனா • 5-6. Pāricchattakasuttādivaṇṇanā
