| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੫. ਪਾਰਿਚ੍ਛਤ੍ਤਕਸੁਤ੍ਤવਣ੍ਣਨਾ
5. Pāricchattakasuttavaṇṇanā
੬੯. ਪਞ੍ਚਮੇ ਪਨ੍ਨਪਲਾਸੋਤਿ ਪਤਿਤਪਲਾਸੋ। ਜਾਲਕਜਾਤੋਤਿ ਸਞ੍ਜਾਤਪਤ੍ਤਪੁਪ੍ਫਜਾਲੋ। ਤਸ੍ਸ ਹਿ ਪਤ੍ਤਜਾਲਞ੍ਚ ਪੁਪ੍ਫਜਾਲਞ੍ਚ ਸਹੇવ ਨਿਕ੍ਖਮਤਿ। ਖਾਰਕਜਾਤੋਤਿ ਪਾਟਿਯੇਕ੍ਕਂ ਸਞ੍ਜਾਤੇਨ ਸੁવਿਭਤ੍ਤੇਨ ਪਤ੍ਤਜਾਲਕੇਨ ਚ ਪੁਪ੍ਫਜਾਲਕੇਨ ਚ ਸਮਨ੍ਨਾਗਤੋ। ਕੁਟੁਮਲਕਜਾਤੋਤਿ ਸਞ੍ਜਾਤਮਕੁਲ਼ੋ। ਕੋਰਕਜਾਤੋਤਿ ਅવਿਕਸਿਤੇਹਿ ਮਹਾਕੁਚ੍ਛੀਹਿ ਸਮ੍ਭਿਨ੍ਨਮੁਖੇਹਿ ਪੁਪ੍ਫੇਹਿ ਸਮਨ੍ਨਾਗਤੋ। ਸਬ੍ਬਪਾਲਿਫੁਲ੍ਲੋਤਿ ਸਬ੍ਬਾਕਾਰੇਨ ਸੁਪੁਪ੍ਫਿਤੋ। ਦਿਬ੍ਬੇ ਚਤ੍ਤਾਰੋ ਮਾਸੇਤਿ ਦਿਬ੍ਬੇਨ ਆਯੁਨਾ ਚਤ੍ਤਾਰੋ ਮਾਸੇ। ਮਨੁਸ੍ਸਗਣਨਾਯ ਪਨ ਤਾਨਿ ਦ੍વਾਦਸ વਸ੍ਸਸਹਸ੍ਸਾਨਿ ਹੋਨ੍ਤਿ। ਪਰਿਚਾਰੇਨ੍ਤੀਤਿ ਇਤੋ ਚਿਤੋ ਚ ਇਨ੍ਦ੍ਰਿਯਾਨਿ ਚਾਰੇਨ੍ਤਿ, ਕੀਲ਼ਨ੍ਤਿ ਰਮਨ੍ਤੀਤਿ ਅਤ੍ਥੋ।
69. Pañcame pannapalāsoti patitapalāso. Jālakajātoti sañjātapattapupphajālo. Tassa hi pattajālañca pupphajālañca saheva nikkhamati. Khārakajātoti pāṭiyekkaṃ sañjātena suvibhattena pattajālakena ca pupphajālakena ca samannāgato. Kuṭumalakajātoti sañjātamakuḷo. Korakajātoti avikasitehi mahākucchīhi sambhinnamukhehi pupphehi samannāgato. Sabbapāliphulloti sabbākārena supupphito. Dibbe cattāro māseti dibbena āyunā cattāro māse. Manussagaṇanāya pana tāni dvādasa vassasahassāni honti. Paricārentīti ito cito ca indriyāni cārenti, kīḷanti ramantīti attho.
ਆਭਾਯ ਫੁਟਂ ਹੋਤੀਤਿ ਤਤ੍ਤਕਂ ਠਾਨਂ ਓਭਾਸੇਨ ਫੁਟਂ ਹੋਤਿ। ਤੇਸਞ੍ਹਿ ਪੁਪ੍ਫਾਨਂ ਬਾਲਸੂਰਿਯਸ੍ਸ વਿਯ ਆਭਾ ਹੋਤਿ, ਪਤ੍ਤਾਨਿ ਪਣ੍ਣਚ੍ਛਤ੍ਤਪ੍ਪਮਾਣਾਨਿ, ਅਨ੍ਤੋ ਮਹਾਤੁਮ੍ਬਮਤ੍ਤਾ ਰੇਣੁ ਹੋਤਿ। ਪੁਪ੍ਫਿਤੇ ਪਨ ਪਾਰਿਚ੍ਛਤ੍ਤਕੇ ਆਰੋਹਨਕਿਚ੍ਚਂ વਾ ਅਙ੍ਕੁਸਕਂ ਗਹੇਤ੍વਾ ਨਮਨਕਿਚ੍ਚਂ વਾ ਪੁਪ੍ਫਾਹਰਣਤ੍ਥਂ ਚਙ੍ਗੋਟਕਕਿਚ੍ਚਂ વਾ ਨਤ੍ਥਿ, ਕਨ੍ਤਨਕવਾਤੋ ਉਟ੍ਠਹਿਤ੍વਾ ਪੁਪ੍ਫਾਨਿ વਣ੍ਟਤੋ ਕਨ੍ਤਤਿ, ਸਮ੍ਪਟਿਚ੍ਛਨਕવਾਤੋ ਸਮ੍ਪਟਿਚ੍ਛਤਿ, ਪવੇਸਨਕવਾਤੋ ਸੁਧਮ੍ਮਂ ਦੇવਸਭਂ ਪવੇਸੇਤਿ, ਸਮ੍ਮਜ੍ਜਨਕવਾਤੋ ਪੁਰਾਣਪੁਪ੍ਫਾਨਿ ਨੀਹਰਤਿ, ਸਨ੍ਥਰਣਕવਾਤੋ ਪਤ੍ਤਕਣ੍ਣਿਕਕੇਸਰਾਨਿ ਰਞ੍ਜੇਨ੍ਤੋ ਸਨ੍ਥਰਤਿ। ਮਜ੍ਝਟ੍ਠਾਨੇ ਧਮ੍ਮਾਸਨਂ ਹੋਤਿ ਯੋਜਨਪ੍ਪਮਾਣੋ ਰਤਨਪਲ੍ਲਙ੍ਕੋ ਉਪਰਿ ਤਿਯੋਜਨੇਨ ਸੇਤਚ੍ਛਤ੍ਤੇਨ ਧਾਰਿਯਮਾਨੇਨ, ਤਦਨਨ੍ਤਰਂ ਸਕ੍ਕਸ੍ਸ ਦੇવਰਞ੍ਞੋ ਆਸਨਂ ਅਤ੍ਥਰਿਯਤਿ, ਤਤੋ ਤੇਤ੍ਤਿਂਸਾਯ ਦੇવਪੁਤ੍ਤਾਨਂ, ਤਤੋ ਅਞ੍ਞੇਸਂ ਮਹੇਸਕ੍ਖਾਨਂ ਦੇવਾਨਂ, ਅਞ੍ਞਤਰਦੇવਤਾਨਂ ਪੁਪ੍ਫਕਣ੍ਣਿਕਾવ ਆਸਨਂ ਹੋਤਿ। ਦੇવਾ ਦੇવਸਭਂ ਪવਿਸਿਤ੍વਾ ਨਿਸੀਦਨ੍ਤਿ। ਤਤੋ ਪੁਪ੍ਫੇਹਿ ਰੇਣੁવਟ੍ਟਿ ਉਗ੍ਗਨ੍ਤ੍વਾ ਉਪਰਿਕਣ੍ਣਿਕਂ ਆਹਚ੍ਚ ਨਿਪਤਮਾਨਾ ਦੇવਤਾਨਂ ਤਿਗਾવੁਤਪ੍ਪਮਾਣਂ ਅਤ੍ਤਭਾવਂ ਲਾਖਾਰਸਪਰਿਕਮ੍ਮਸਜ੍ਜਿਤਂ વਿਯ ਸੁવਣ੍ਣਚੁਣ੍ਣਪਿਞ੍ਜਰਂ વਿਯ ਕਰੋਤਿ। ਏਕਚ੍ਚੇ ਦੇવਾ ਏਕੇਕਂ ਪੁਪ੍ਫਂ ਗਹੇਤ੍વਾ ਅਞ੍ਞਮਞ੍ਞਂ ਪਹਰਨ੍ਤਾਪਿ ਕੀਲ਼ਨ੍ਤਿਯੇવ। ਪਹਰਣਕਾਲੇਪਿ ਮਹਾਤੁਮ੍ਬਪ੍ਪਮਾਣਾ ਰੇਣੁ ਨਿਕ੍ਖਮਿਤ੍વਾ ਸਰੀਰਂ ਪਭਾਸਮ੍ਪਨ੍ਨੇਹਿ ਗਨ੍ਧਚੁਣ੍ਣੇਹਿ ਸਞ੍ਜਤਮਨੋਸਿਲਾਰਾਗਂ વਿਯ ਕਰੋਤਿ। ਏવਂ ਸਾ ਕੀਲ਼ਾ ਚਤੂਹਿ ਮਾਸੇਹਿ ਪਰਿਯੋਸਾਨਂ ਗਚ੍ਛਤਿ। ਅਯਮਾਨੁਭਾવੋਤਿ ਅਯਂ ਅਨੁਫਰਿਤੁਂ ਆਨੁਭਾવੋ।
Ābhāya phuṭaṃ hotīti tattakaṃ ṭhānaṃ obhāsena phuṭaṃ hoti. Tesañhi pupphānaṃ bālasūriyassa viya ābhā hoti, pattāni paṇṇacchattappamāṇāni, anto mahātumbamattā reṇu hoti. Pupphite pana pāricchattake ārohanakiccaṃ vā aṅkusakaṃ gahetvā namanakiccaṃ vā pupphāharaṇatthaṃ caṅgoṭakakiccaṃ vā natthi, kantanakavāto uṭṭhahitvā pupphāni vaṇṭato kantati, sampaṭicchanakavāto sampaṭicchati, pavesanakavāto sudhammaṃ devasabhaṃ paveseti, sammajjanakavāto purāṇapupphāni nīharati, santharaṇakavāto pattakaṇṇikakesarāni rañjento santharati. Majjhaṭṭhāne dhammāsanaṃ hoti yojanappamāṇo ratanapallaṅko upari tiyojanena setacchattena dhāriyamānena, tadanantaraṃ sakkassa devarañño āsanaṃ atthariyati, tato tettiṃsāya devaputtānaṃ, tato aññesaṃ mahesakkhānaṃ devānaṃ, aññataradevatānaṃ pupphakaṇṇikāva āsanaṃ hoti. Devā devasabhaṃ pavisitvā nisīdanti. Tato pupphehi reṇuvaṭṭi uggantvā uparikaṇṇikaṃ āhacca nipatamānā devatānaṃ tigāvutappamāṇaṃ attabhāvaṃ lākhārasaparikammasajjitaṃ viya suvaṇṇacuṇṇapiñjaraṃ viya karoti. Ekacce devā ekekaṃ pupphaṃ gahetvā aññamaññaṃ paharantāpi kīḷantiyeva. Paharaṇakālepi mahātumbappamāṇā reṇu nikkhamitvā sarīraṃ pabhāsampannehi gandhacuṇṇehi sañjatamanosilārāgaṃ viya karoti. Evaṃ sā kīḷā catūhi māsehi pariyosānaṃ gacchati. Ayamānubhāvoti ayaṃ anupharituṃ ānubhāvo.
ਇਦਾਨਿ ਯਸ੍ਮਾ ਨ ਸਤ੍ਥਾ ਪਾਰਿਚ੍ਛਤ੍ਤਕੇਨ ਅਤ੍ਥਿਕੋ, ਤੇਨ ਪਨ ਸਦ੍ਧਿਂ ਉਪਮੇਤ੍વਾ ਸਤ੍ਤ ਅਰਿਯਸਾવਕੇ ਦਸ੍ਸੇਤੁਕਾਮੋ, ਤਸ੍ਮਾ ਤੇ ਦਸ੍ਸੇਤੁਂ ਏવਮੇવ ਖੋਤਿਆਦਿਮਾਹ। ਤਤ੍ਥ ਪਬ੍ਬਜ੍ਜਾਯ ਚੇਤੇਤੀਤਿ ਪਬ੍ਬਜਿਸ੍ਸਾਮੀਤਿ ਚਿਨ੍ਤੇਤਿ। ਦੇવਾਨਂવਾਤਿ ਦੇવਾਨਂ વਿਯ। ਯਾવ ਬ੍ਰਹ੍ਮਲੋਕਾ ਸਦ੍ਦੋ ਅਬ੍ਭੁਗ੍ਗਚ੍ਛਤੀਤਿ ਪਥવਿਤਲਤੋ ਯਾવ ਬ੍ਰਹ੍ਮਲੋਕਾ ਸਾਧੁਕਾਰਸਦ੍ਦੇਨ ਸਬ੍ਬਂ ਏਕਸਦ੍ਦਮੇવ ਹੋਤਿ। ਅਯਮਾਨੁਭਾવੋਤਿ ਅਯਂ ਖੀਣਾਸવਸ੍ਸ ਭਿਕ੍ਖੁਨੋ ਅਨੁਫਰਣਾਨੁਭਾવੋ। ਇਮਸ੍ਮਿਂ ਸੁਤ੍ਤੇ ਚਤੁਪਾਰਿਸੁਦ੍ਧਿਸੀਲਂ ਪਬ੍ਬਜ੍ਜਾਨਿਸ੍ਸਿਤਂ ਹੋਤਿ, ਕਸਿਣਪਰਿਕਮ੍ਮਂ ਪਠਮਜ੍ਝਾਨਸਨ੍ਨਿਸ੍ਸਿਤਂ, વਿਪਸ੍ਸਨਾਯ ਸਦ੍ਧਿਂ ਤਯੋ ਮਗ੍ਗਾ ਤੀਣਿ ਚ ਫਲਾਨਿ ਅਰਹਤ੍ਤਮਗ੍ਗਸਨ੍ਨਿਸ੍ਸਿਤਾਨਿ ਹੋਨ੍ਤਿ। ਦੇਸਨਾਯ ਹੇਟ੍ਠਤੋ વਾ ਉਪਰਿਤੋ વਾ ਉਭਯਤੋ વਾ ਪਰਿਚ੍ਛੇਦੋ ਹੋਤਿ, ਇਧ ਪਨ ਉਭਯਤੋ ਪਰਿਚ੍ਛੇਦੋ। ਤੇਨੇਤਂ વੁਤ੍ਤਂ। ਸਙ੍ਖੇਪਤੋ ਪਨੇਤ੍ਥ વਟ੍ਟવਿવਟ੍ਟਂ ਕਥਿਤਨ੍ਤਿ વੇਦਿਤਬ੍ਬਂ।
Idāni yasmā na satthā pāricchattakena atthiko, tena pana saddhiṃ upametvā satta ariyasāvake dassetukāmo, tasmā te dassetuṃ evameva khotiādimāha. Tattha pabbajjāya cetetīti pabbajissāmīti cinteti. Devānaṃvāti devānaṃ viya. Yāva brahmalokā saddo abbhuggacchatīti pathavitalato yāva brahmalokā sādhukārasaddena sabbaṃ ekasaddameva hoti. Ayamānubhāvoti ayaṃ khīṇāsavassa bhikkhuno anupharaṇānubhāvo. Imasmiṃ sutte catupārisuddhisīlaṃ pabbajjānissitaṃ hoti, kasiṇaparikammaṃ paṭhamajjhānasannissitaṃ, vipassanāya saddhiṃ tayo maggā tīṇi ca phalāni arahattamaggasannissitāni honti. Desanāya heṭṭhato vā uparito vā ubhayato vā paricchedo hoti, idha pana ubhayato paricchedo. Tenetaṃ vuttaṃ. Saṅkhepato panettha vaṭṭavivaṭṭaṃ kathitanti veditabbaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੫. ਪਾਰਿਚ੍ਛਤ੍ਤਕਸੁਤ੍ਤਂ • 5. Pāricchattakasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੫-੬. ਪਾਰਿਚ੍ਛਤ੍ਤਕਸੁਤ੍ਤਾਦਿવਣ੍ਣਨਾ • 5-6. Pāricchattakasuttādivaṇṇanā
