| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
10. баарижчад̇д̇агавимаанаван̣н̣анаа
10. Pāricchattakavimānavaṇṇanā
баарижчад̇д̇агз говил̣аарзд̇и баарижчад̇д̇агавимаанам̣. д̇асса гаа уббад̇д̇и? бхаг̇аваа саавад̇т̇ияам̣ вихарад̇и ж̇зд̇аванз. д̇зна самаязна саавад̇т̇иваасий ан̃н̃ад̇аро убаасаго бхаг̇аванд̇ам̣ убасан̇гамид̇ваа, сваад̇анааяа ниманд̇зд̇ваа, ад̇д̇ано г̇зхад̣̇ваарз маханд̇ам̣ ман̣д̣абам̣ саж̇ж̇зд̇ваа саан̣ибаагаарам̣ баригкибид̇ваа убари вид̇аанам̣ б̣анд̇хид̇ваа д̇хаж̇абадаагаад̣̇аяо уссаабзд̇ваа наанаавирааг̇аван̣н̣аани вад̇т̇аани г̇анд̇хад̣̇аамамаалаад̣̇аамаани жа оламб̣зд̇ваа сид̇д̇асаммадтз бад̣̇зсз аасанаани бан̃н̃аабзд̇ваа бхаг̇авад̇о гаалам̣ аарожзси. ат̇а бхаг̇аваа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа д̣̇звавимаанам̣ вияа алан̇гад̇абадияад̇д̇ам̣ ман̣д̣абам̣ бависид̇ваа сахассарам̣сий вияа ан̣н̣авагужчим̣ обхаасаяамаано бан̃н̃ад̇д̇з аасанз нисийд̣̇и. убаасаго г̇анд̇хабубпад̇хуумад̣̇ийбзхи бхаг̇аванд̇ам̣ бууж̇зси.
Pāricchattake koviḷāreti pāricchattakavimānaṃ. Tassa kā uppatti? Bhagavā sāvatthiyaṃ viharati jetavane. Tena samayena sāvatthivāsī aññataro upāsako bhagavantaṃ upasaṅkamitvā, svātanāya nimantetvā, attano gehadvāre mahantaṃ maṇḍapaṃ sajjetvā sāṇipākāraṃ parikkhipitvā upari vitānaṃ bandhitvā dhajapaṭākādayo ussāpetvā nānāvirāgavaṇṇāni vatthāni gandhadāmamālādāmāni ca olambetvā sittasammaṭṭhe padese āsanāni paññāpetvā bhagavato kālaṃ ārocesi. Atha bhagavā pubbaṇhasamayaṃ nivāsetvā pattacīvaramādāya devavimānaṃ viya alaṅkatapaṭiyattaṃ maṇḍapaṃ pavisitvā sahassaraṃsī viya aṇṇavakucchiṃ obhāsayamāno paññatte āsane nisīdi. Upāsako gandhapupphadhūmadīpehi bhagavantaṃ pūjesi.
д̇зна жа самаязна ан̃н̃ад̇араа гадтахааригаа ид̇т̇ий анд̇хаванз субубпид̇ам̣ асогаругкам̣ д̣̇исваа сабаллаван̇гураани бин̣д̣ийгад̇аани б̣ахууни асогабубпаани г̇ахзд̇ваа ааг̇ажчанд̇ий, бхаг̇аванд̇ам̣ д̇ад̇т̇а нисиннам̣ д̣̇исваа басаннажид̇д̇аа аасанасса саманд̇ад̇о д̇зхи бубпзхи бубпасант̇арам̣ сант̇аранд̇ий, бхаг̇авад̇о бууж̇ам̣ гад̇ваа ванд̣̇ид̇ваа д̇игкад̇д̇ум̣ бад̣̇агкин̣ам̣ гад̇ваа намассамаанаа аг̇амааси. саа абарзна самаязна гаалам̣ гад̇ваа д̇аавад̇им̣сзсу ниб̣б̣ад̇д̇и, ажчараасахассабариваараа язбхуяязна нанд̣̇анаванз нажжанд̇ий г̇ааяанд̇ий баарижчад̇д̇агамаалаа г̇ант̇знд̇ий бамод̣̇амаанаа гийл̣анд̇ий сукам̣ анубхавад̇и. ат̇ааяасмаа махаамог̇г̇аллаано хздтаа вуд̇д̇анаязна д̣̇зважааригам̣ жаранд̇о д̇аавад̇им̣сабхаванам̣ г̇анд̇ваа д̇ам̣ д̣̇исваа д̇ааяа гад̇агаммам̣ имаахи г̇аат̇аахи бужчи –
Tena ca samayena aññatarā kaṭṭhahārikā itthī andhavane supupphitaṃ asokarukkhaṃ disvā sapallavaṅkurāni piṇḍīkatāni bahūni asokapupphāni gahetvā āgacchantī, bhagavantaṃ tattha nisinnaṃ disvā pasannacittā āsanassa samantato tehi pupphehi pupphasantharaṃ santharantī, bhagavato pūjaṃ katvā vanditvā tikkhattuṃ padakkhiṇaṃ katvā namassamānā agamāsi. Sā aparena samayena kālaṃ katvā tāvatiṃsesu nibbatti, accharāsahassaparivārā yebhuyyena nandanavane naccantī gāyantī pāricchattakamālā ganthentī pamodamānā kīḷantī sukhaṃ anubhavati. Athāyasmā mahāmoggallāno heṭṭhā vuttanayena devacārikaṃ caranto tāvatiṃsabhavanaṃ gantvā taṃ disvā tāya katakammaṃ imāhi gāthāhi pucchi –
680.
680.
‘‘баарижчад̇д̇агз говил̣аарз, раман̣ийяз манорамз;
‘‘Pāricchattake koviḷāre, ramaṇīye manorame;
д̣̇иб̣б̣амаалам̣ г̇ант̇амаанаа, г̇ааяанд̇ий самбамод̣̇аси.
Dibbamālaṃ ganthamānā, gāyantī sampamodasi.
681.
681.
‘‘д̇ассаа д̇з нажжамаанааяа, ан̇г̇аман̇г̇зхи саб̣б̣асо;
‘‘Tassā te naccamānāya, aṅgamaṅgehi sabbaso;
д̣̇иб̣б̣аа сад̣̇д̣̇аа нижчаранд̇и, саванийяаа манорамаа.
Dibbā saddā niccharanti, savanīyā manoramā.
682.
682.
‘‘д̇ассаа д̇з нажжамаанааяа, ан̇г̇аман̇г̇зхи саб̣б̣асо;
‘‘Tassā te naccamānāya, aṅgamaṅgehi sabbaso;
д̣̇иб̣б̣аа г̇анд̇хаа бавааяанд̇и, сужиг̇анд̇хаа манорамаа.
Dibbā gandhā pavāyanti, sucigandhā manoramā.
683.
683.
‘‘вивад̇д̇амаанаа гааязна, яаа взн̣ийсу бил̣анд̇ханаа;
‘‘Vivattamānā kāyena, yā veṇīsu piḷandhanā;
д̇зсам̣ суяяад̇и ниг̇гхосо, д̇уурияз бан̃жан̇г̇игз яат̇аа.
Tesaṃ suyyati nigghoso, tūriye pañcaṅgike yathā.
684.
684.
‘‘вадам̣сагаа ваад̇ад̇худ̇аа, ваад̇зна самбагамбид̇аа;
‘‘Vaṭaṃsakā vātadhutā, vātena sampakampitā;
д̇зсам̣ суяяад̇и ниг̇гхосо, д̇уурияз бан̃жан̇г̇игз яат̇аа.
Tesaṃ suyyati nigghoso, tūriye pañcaṅgike yathā.
685.
685.
‘‘яааби д̇з сирасмим̣ маалаа, сужиг̇анд̇хаа манорамаа;
‘‘Yāpi te sirasmiṃ mālā, sucigandhā manoramā;
ваад̇и г̇анд̇хо д̣̇исаа саб̣б̣аа, ругко ман̃ж̇уусаго яат̇аа.
Vāti gandho disā sabbā, rukkho mañjūsako yathā.
686.
686.
‘‘гхааяасз д̇ам̣ сужиг̇анд̇хам̣, руубам̣ бассаси амаанусам̣;
‘‘Ghāyase taṃ sucigandhaṃ, rūpaṃ passasi amānusaṃ;
д̣̇звад̇з бужчид̇аажигка, гисса гаммассид̣̇ам̣ пала’’нд̇и.
Devate pucchitācikkha, kissa kammassidaṃ phala’’nti.
680. д̇ад̇т̇а баарижчад̇д̇агз говил̣аарзд̇и баарижчад̇д̇аганаамагз говил̣аарабубпз аад̣̇ааяа д̣̇иб̣б̣амаалам̣ г̇ант̇амаанаад̇и яож̇анаа. яан̃хи логияаа ‘‘баариж̇аад̇а’’нд̇и вад̣̇анд̇и, д̇ам̣ мааг̇ад̇хабхаасааяа ‘‘баарижчад̇д̇ага’’нд̇и вужжад̇и. говил̣аарод̇и жа говил̣аараж̇аад̇иго, со жа мануссалогзби д̣̇звалогзби говил̣ааро, д̇ассааби ж̇аад̇ийд̇и вад̣̇анд̇и.
680. Tattha pāricchattake koviḷāreti pāricchattakanāmake koviḷārapupphe ādāya dibbamālaṃ ganthamānāti yojanā. Yañhi lokiyā ‘‘pārijāta’’nti vadanti, taṃ māgadhabhāsāya ‘‘pāricchattaka’’nti vuccati. Koviḷāroti ca koviḷārajātiko, so ca manussalokepi devalokepi koviḷāro, tassāpi jātīti vadanti.
681. д̇ассаа бана д̣̇звад̇ааяа нажжанагаалз ан̇г̇абхааравасзна сарийрад̇о жа бил̣анд̇ханад̇о жа ад̇ивияа мад̇хуро сад̣̇д̣̇о нижчарад̇и, г̇анд̇хо сад̣̇аа саб̣б̣аа д̣̇исааби парид̇ваа д̇идтад̇и. д̇знааха ‘‘д̇ассаа д̇з нажжамаанааяаа’’д̇иаад̣̇и. д̇ад̇т̇а саванийяаад̇и сод̇ум̣ яуд̇д̇аа, саванасса ваа хид̇аа, ган̣н̣асукаад̇и ад̇т̇о.
681. Tassā pana devatāya naccanakāle aṅgabhāravasena sarīrato ca piḷandhanato ca ativiya madhuro saddo niccharati, gandho sadā sabbā disāpi pharitvā tiṭṭhati. Tenāha ‘‘tassā te naccamānāyā’’tiādi. Tattha savanīyāti sotuṃ yuttā, savanassa vā hitā, kaṇṇasukhāti attho.
683. вивад̇д̇амаанаа гааязнаад̇и д̇ава гааязна сарийрзна баривад̇д̇амаанзна, ид̇т̇амбхууд̇алагкан̣з жзд̇ам̣ гаран̣аважанам̣. яаа взн̣ийсу бил̣анд̇ханаад̇и яаани д̇з гзсавзн̣ийсу бил̣анд̇ханаани, вибхад̇д̇илобо жзд̇т̇а д̣̇адтаб̣б̣о, лин̇г̇авибаллаасо ваа.
683.Vivattamānā kāyenāti tava kāyena sarīrena parivattamānena, itthambhūtalakkhaṇe cetaṃ karaṇavacanaṃ. Yā veṇīsu piḷandhanāti yāni te kesaveṇīsu piḷandhanāni, vibhattilopo cettha daṭṭhabbo, liṅgavipallāso vā.
684. вадам̣сагаад̇и рад̇анамаяаа ган̣н̣игаа вадам̣сагаад̇и ад̇т̇о. ваад̇ад̇худ̇аад̇и манд̣̇зна маалуд̇зна д̇хуубаяамаанаа. ваад̇зна самбагамбид̇аад̇и ваад̇зна саманд̇ад̇о висзсад̇о гамбид̇аа жалид̇аа. ат̇а ваа вадам̣сагаа ваад̇ад̇худ̇аа, ваад̇зна самбагамбид̇аад̇и аваад̇зрид̇ааби ваад̇зрид̇ааби яз д̇з вадам̣сагаа гамбид̇аа, д̇зсам̣ суяяад̇и ниг̇гхосод̇и ад̇т̇аяож̇анаа.
684.Vaṭaṃsakāti ratanamayā kaṇṇikā vaṭaṃsakāti attho. Vātadhutāti mandena mālutena dhūpayamānā. Vātenasampakampitāti vātena samantato visesato kampitā calitā. Atha vā vaṭaṃsakā vātadhutā, vātena sampakampitāti avāteritāpi vāteritāpi ye te vaṭaṃsakā kampitā, tesaṃ suyyati nigghosoti atthayojanā.
685. ваад̇и г̇анд̇хо д̣̇исаа саб̣б̣аад̇и д̇ассаа д̇з сирасмим̣ д̣̇иб̣б̣амаалааяа г̇анд̇хо вааяад̇и саб̣б̣аа д̣̇исаа. яат̇аа гим̣? ругко ман̃ж̇уусаго яат̇аад̇и, яат̇аа наама ман̃ж̇уусаго ругко субубпид̇о ад̇д̇ано г̇анд̇хзна б̣ахууни яож̇анаани парамаано саб̣б̣аа д̣̇исаа вааяад̇и, звам̣ д̇ава сирасмим̣ бил̣анд̇ханамаалааяа г̇анд̇ход̇и ад̇т̇о. со гира ругко г̇анд̇хамаад̣̇анз бажжзгаб̣уд̣̇д̇хаанам̣ убосат̇агаран̣аман̣д̣аламаал̣агамаж̇жхз д̇идтад̇и. яад̇д̇агаани д̣̇звалогз жа мануссалогз жа сурабхигусумаани, д̇аани д̇асса саакаг̇г̇зсу ниб̣б̣ад̇д̇анд̇и. д̇зна со ад̇ивияа суг̇анд̇хо ход̇и. звам̣ д̇ааяа д̣̇звад̇ааяа бил̣анд̇ханамаалааяа г̇анд̇ход̇и. д̇зна вуд̇д̇ам̣ ‘‘ругко ман̃ж̇уусаго яат̇аа’’д̇и.
685.Vāti gandho disā sabbāti tassā te sirasmiṃ dibbamālāya gandho vāyati sabbā disā. Yathā kiṃ? Rukkho mañjūsako yathāti, yathā nāma mañjūsako rukkho supupphito attano gandhena bahūni yojanāni pharamāno sabbā disā vāyati, evaṃ tava sirasmiṃ piḷandhanamālāya gandhoti attho. So kira rukkho gandhamādane paccekabuddhānaṃ uposathakaraṇamaṇḍalamāḷakamajjhe tiṭṭhati. Yattakāni devaloke ca manussaloke ca surabhikusumāni, tāni tassa sākhaggesu nibbattanti. Tena so ativiya sugandho hoti. Evaṃ tāya devatāya piḷandhanamālāya gandhoti. Tena vuttaṃ ‘‘rukkho mañjūsako yathā’’ti.
686. яад̣̇иби д̇асса саг̇г̇асса чапассааяад̇анигабхаавад̇о саб̣б̣ааниби д̇ад̇т̇а аарамман̣аани бияаруубааниязва, г̇анд̇харуубаанам̣ бана сависзсаанам̣ д̇ассаа д̣̇звад̇ааяа лаабхибхаавад̇о ‘‘гхааяасз д̇ам̣ сужиг̇анд̇хам̣, руубам̣ бассаси амаануса’’нд̇и вуд̇д̇ам̣.
686. Yadipi tassa saggassa chaphassāyatanikabhāvato sabbānipi tattha ārammaṇāni piyarūpāniyeva, gandharūpānaṃ pana savisesānaṃ tassā devatāya lābhibhāvato ‘‘ghāyase taṃ sucigandhaṃ, rūpaṃ passasi amānusa’’nti vuttaṃ.
ат̇а д̣̇звад̇аа д̣̇вийхи г̇аат̇аахи б̣яаагааси –
Atha devatā dvīhi gāthāhi byākāsi –
687.
687.
‘‘бабхассарам̣ ажжиманд̇ам̣, ван̣н̣аг̇анд̇хзна сам̣яуд̇ам̣;
‘‘Pabhassaraṃ accimantaṃ, vaṇṇagandhena saṃyutaṃ;
асогабубпамаалаахам̣, б̣уд̣̇д̇хасса убанаамаяим̣.
Asokapupphamālāhaṃ, buddhassa upanāmayiṃ.
688.
688.
‘‘д̇аахам̣ гаммам̣ гарид̇ваана, гусалам̣ б̣уд̣̇д̇хаван̣н̣ид̇ам̣;
‘‘Tāhaṃ kammaṃ karitvāna, kusalaṃ buddhavaṇṇitaṃ;
абзд̇асогаа сукид̇аа, самбамод̣̇ааманаамаяаа’’д̇и.
Apetasokā sukhitā, sampamodāmanāmayā’’ti.
687. д̇ад̇т̇а суд̇ход̇абаваал̣асан̇гхаад̇асаннибхасса гин̃ж̇агкагзсарасамуд̣̇ааязна бхаан̣урам̣сиж̇ааласса вияа асогабубпуд̇д̇амасса д̇ад̣̇аа убадтид̇ад̇ам̣ санд̇хааяааха ‘‘бабхассарам̣ ажжиманд̇а’’нд̇и. сзсам̣ вуд̇д̇анаяамзва.
687. Tattha sudhotapavāḷasaṅghātasannibhassa kiñjakkhakesarasamudāyena bhāṇuraṃsijālassa viya asokapupphuttamassa tadā upaṭṭhitataṃ sandhāyāha ‘‘pabhassaraṃ accimanta’’nti. Sesaṃ vuttanayameva.
ат̇ааяасмаа махаамог̇г̇аллаано д̇ааяа д̣̇звад̇ааяа ад̇д̇ано сужарид̇агаммз гат̇ид̇з сабариваарааяа д̇ассаа д̇хаммам̣ д̣̇зсзд̇ваа д̇ад̇о мануссалогам̣ ааг̇анд̇ваа бхаг̇авад̇о д̇ам̣ бавад̇д̇им̣ гат̇зси. бхаг̇аваа д̇ам̣ адтуббад̇д̇им̣ гад̇ваа самбад̇д̇амахааж̇анасса д̇хаммам̣ д̣̇зсзси, саа д̣̇зсанаа махааж̇анасса саад̇т̇игаа ахосийд̇и.
Athāyasmā mahāmoggallāno tāya devatāya attano sucaritakamme kathite saparivārāya tassā dhammaṃ desetvā tato manussalokaṃ āgantvā bhagavato taṃ pavattiṃ kathesi. Bhagavā taṃ aṭṭhuppattiṃ katvā sampattamahājanassa dhammaṃ desesi, sā desanā mahājanassa sātthikā ahosīti.
баарижчад̇д̇агавимаанаван̣н̣анаа нидтид̇аа.
Pāricchattakavimānavaṇṇanā niṭṭhitā.
ид̇и барамад̇т̇ад̣̇ийбанияаа куд̣̇д̣̇ага-адтагат̇ааяа вимаанавад̇т̇усмим̣
Iti paramatthadīpaniyā khuddaka-aṭṭhakathāya vimānavatthusmiṃ
д̣̇асавад̇т̇убадиман̣д̣ид̇асса д̇ад̇ияасса баарижчад̇д̇агаваг̇г̇асса
Dasavatthupaṭimaṇḍitassa tatiyassa pāricchattakavaggassa
ад̇т̇аван̣н̣анаа нидтид̇аа.
Atthavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 10. баарижчад̇д̇агавимаанавад̇т̇у • 10. Pāricchattakavimānavatthu
