| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౩. పరిహానధమ్మసుత్తం
3. Parihānadhammasuttaṃ
౯౬. ‘‘పరిహానధమ్మఞ్చ వో, భిక్ఖవే, దేసేస్సామి అపరిహానధమ్మఞ్చ ఛ చ అభిభాయతనాని. తం సుణాథ. కథఞ్చ, భిక్ఖవే, పరిహానధమ్మో హోతి? ఇధ, భిక్ఖవే, భిక్ఖునో చక్ఖునా రూపం దిస్వా ఉప్పజ్జన్తి పాపకా అకుసలా సరసఙ్కప్పా 1 సంయోజనియా. తఞ్చే భిక్ఖు అధివాసేతి నప్పజహతి న వినోదేతి న బ్యన్తీకరోతి 2 న అనభావం గమేతి, వేదితబ్బమేతం, భిక్ఖవే, భిక్ఖునా – ‘పరిహాయామి కుసలేహి ధమ్మేహి’. పరిహానఞ్హేతం వుత్తం భగవతాతి…పే॰….
96. ‘‘Parihānadhammañca vo, bhikkhave, desessāmi aparihānadhammañca cha ca abhibhāyatanāni. Taṃ suṇātha. Kathañca, bhikkhave, parihānadhammo hoti? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā sarasaṅkappā 3 saṃyojaniyā. Tañce bhikkhu adhivāseti nappajahati na vinodeti na byantīkaroti 4 na anabhāvaṃ gameti, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti…pe….
‘‘పున చపరం, భిక్ఖవే, భిక్ఖునో జివ్హాయ రసం సాయిత్వా ఉప్పజ్జన్తి…పే॰… పున చపరం, భిక్ఖవే, భిక్ఖునో మనసా ధమ్మం విఞ్ఞాయ ఉప్పజ్జన్తి పాపకా అకుసలా సరసఙ్కప్పా సంయోజనియా. తఞ్చే భిక్ఖు అధివాసేతి నప్పజహతి న వినోదేతి న బ్యన్తీకరోతి న అనభావం గమేతి, వేదితబ్బమేతం, భిక్ఖవే, భిక్ఖునా – ‘పరిహాయామి కుసలేహి ధమ్మేహి’. పరిహానఞ్హేతం వుత్తం భగవతాతి. ఏవం ఖో, భిక్ఖవే, పరిహానధమ్మో హోతి.
‘‘Puna caparaṃ, bhikkhave, bhikkhuno jivhāya rasaṃ sāyitvā uppajjanti…pe… puna caparaṃ, bhikkhave, bhikkhuno manasā dhammaṃ viññāya uppajjanti pāpakā akusalā sarasaṅkappā saṃyojaniyā. Tañce bhikkhu adhivāseti nappajahati na vinodeti na byantīkaroti na anabhāvaṃ gameti, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti. Evaṃ kho, bhikkhave, parihānadhammo hoti.
‘‘కథఞ్చ, భిక్ఖవే, అపరిహానధమ్మో హోతి? ఇధ, భిక్ఖవే, భిక్ఖునో చక్ఖునా రూపం దిస్వా ఉప్పజ్జన్తి పాపకా అకుసలా సరసఙ్కప్పా సంయోజనియా. తఞ్చే భిక్ఖు నాధివాసేతి పజహతి వినోదేతి బ్యన్తీకరోతి అనభావం గమేతి, వేదితబ్బమేతం, భిక్ఖవే, భిక్ఖునా – ‘న పరిహాయామి కుసలేహి ధమ్మేహి’. అపరిహానఞ్హేతం వుత్తం భగవతాతి…పే॰….
‘‘Kathañca, bhikkhave, aparihānadhammo hoti? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā sarasaṅkappā saṃyojaniyā. Tañce bhikkhu nādhivāseti pajahati vinodeti byantīkaroti anabhāvaṃ gameti, veditabbametaṃ, bhikkhave, bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti…pe….
‘‘పున చపరం, భిక్ఖవే, భిక్ఖునో జివ్హాయ రసం సాయిత్వా ఉప్పజ్జన్తి…పే॰… పున చపరం, భిక్ఖవే, భిక్ఖునో మనసా ధమ్మం విఞ్ఞాయ ఉప్పజ్జన్తి పాపకా అకుసలా సరసఙ్కప్పా సంయోజనియా. తఞ్చే భిక్ఖు నాధివాసేతి పజహతి వినోదేతి బ్యన్తీకరోతి అనభావం గమేతి, వేదితబ్బమేతం , భిక్ఖవే, భిక్ఖునా – ‘న పరిహాయామి కుసలేహి ధమ్మేహి’. అపరిహానఞ్హేతం వుత్తం భగవతాతి. ఏవం ఖో, భిక్ఖవే, అపరిహానధమ్మో హోతి.
‘‘Puna caparaṃ, bhikkhave, bhikkhuno jivhāya rasaṃ sāyitvā uppajjanti…pe… puna caparaṃ, bhikkhave, bhikkhuno manasā dhammaṃ viññāya uppajjanti pāpakā akusalā sarasaṅkappā saṃyojaniyā. Tañce bhikkhu nādhivāseti pajahati vinodeti byantīkaroti anabhāvaṃ gameti, veditabbametaṃ , bhikkhave, bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti. Evaṃ kho, bhikkhave, aparihānadhammo hoti.
‘‘కతమాని చ, భిక్ఖవే, ఛ అభిభాయతనాని? ఇధ, భిక్ఖవే, భిక్ఖునో చక్ఖునా రూపం దిస్వా నుప్పజ్జన్తి పాపకా అకుసలా సరసఙ్కప్పా సంయోజనియా. వేదితబ్బమేతం, భిక్ఖవే, భిక్ఖునా – ‘అభిభూతమేతం ఆయతనం’. అభిభాయతనఞ్హేతం వుత్తం భగవతాతి…పే॰… పున చపరం, భిక్ఖవే, భిక్ఖునో మనసా ధమ్మం విఞ్ఞాయ నుప్పజ్జన్తి పాపకా అకుసలా ధమ్మా సరసఙ్కప్పా సంయోజనియా. వేదితబ్బమేతం, భిక్ఖవే, భిక్ఖునా – ‘అభిభూతమేతం ఆయతనం’. అభిభాయతనఞ్హేతం వుత్తం భగవతాతి. ఇమాని వుచ్చన్తి, భిక్ఖవే, ఛ అభిభాయతనానీ’’తి. తతియం.
‘‘Katamāni ca, bhikkhave, cha abhibhāyatanāni? Idha, bhikkhave, bhikkhuno cakkhunā rūpaṃ disvā nuppajjanti pāpakā akusalā sarasaṅkappā saṃyojaniyā. Veditabbametaṃ, bhikkhave, bhikkhunā – ‘abhibhūtametaṃ āyatanaṃ’. Abhibhāyatanañhetaṃ vuttaṃ bhagavatāti…pe… puna caparaṃ, bhikkhave, bhikkhuno manasā dhammaṃ viññāya nuppajjanti pāpakā akusalā dhammā sarasaṅkappā saṃyojaniyā. Veditabbametaṃ, bhikkhave, bhikkhunā – ‘abhibhūtametaṃ āyatanaṃ’. Abhibhāyatanañhetaṃ vuttaṃ bhagavatāti. Imāni vuccanti, bhikkhave, cha abhibhāyatanānī’’ti. Tatiyaṃ.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౩. పరిహానధమ్మసుత్తవణ్ణనా • 3. Parihānadhammasuttavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౩. పరిహానసుత్తవణ్ణనా • 3. Parihānasuttavaṇṇanā
